གསེར་འགྱུར་རྩི་བ།
The Alchemist
རྩོམ་པ་བོ། ཕའོ་ལོ་ཁོའེ་ལོ།
སྒྱུར་བ་བོ། ཟླ་བ་གཞོན་ནུ།
བུ་དེའི་མིང་ལ་སན་ཏི་ཡ་གྷོ་ཟེར། ཁོས་ལུག་ཁྱུ་དེད་དེ་ལྷ་ཁང་སྟོང་བ་ཞིག་ཏུ་འབྱོར་དུས་ས་རུབ་ཀྱིན་འདུག །དེའི་བླ་གབ་སྔོན་ནས་བརྡིབས་ཟིན་འདུག་ལ། མཆོད་ཁང་གི་ཤུལ་དུ་ཤིང་སི་ཁ་མོར་ཆེན་པོ་ཞིག་སྐྱེས་འདུག །ཁོས་ནུབ་མོ་དེ་དེར་བསྐྱལ་རྩིས་བྱས། ལུག་ཚང་མ་གཅིག་མཇུག་གཉིས་མཐུད་ཀྱིས་རྒྱལ་སྒོ་ཞིག་རོ་དེ་ནས་ནང་དུ་འཛུལ་བར་བརྟག་རྗེས། མཚན་མོར་ཕྱི་ལ་མི་ཤོར་བའི་ཆེད་དུ་ཁོས་ཤིང་ལེབ་ཅིག་གིས་སྒོ་དེའི་ཁ་བཅད། སྤྱིར་སྤྱང་ཀི་མེད་ནའང་། ལུག་འདྲ་ཕྱི་ལ་ཤོར་སོང་ན། ཁོས་ཉིན་རྗེས་མར་ཉིན་གང་བོར་དེ་འཚོལ་དགོས་འཁེལ་གྱི་རེད།
ཁོས་སྟོད་གོས་ཀྱིས་ཐང་དེ་ཕྱགས་རྗེས་བཀླགས་ཚར་མ་ཐག་པའི་དེབ་དེ་སྔས་མགོ་བྱས་ཏེ་ཉལ་ཞོར། ད་ནས་བཟུང་དཔེ་ཆ་དེ་ལས་མཐུག་པ་བཀླག་ན་དེ་ཚོ་རྒྱུན་རིང་ཙམ་ལ་འདང་བ་དང་སྔས་མགོར་ལྷག་ཏུ་བདེ་རྒྱུ་རེད་བསམས། ཁོ་སད་དུས་ད་རུང་ནམ་ལངས་མི་འདུག་ལ། ཕྱེད་ཙམ་ཞིག་པའི་བླ་གབ་བརྒྱུད་དེ་གནམ་ལ་བལྟས་དུས་སྐར་མའང་མཐོང་ཐུབ་ཀྱི་འདུག །ང་ད་རུང་ཡུད་ཙམ་ལ་གཉིད་དགོས་འདུག་བསམས། ནུབ་མོ་དེར་ཁོང་གིས་བདུན་གཅིག་གི་སྔོན་ལ་རྨིས་པའི་རྨི་ལམ་དེ་བསྐྱར་དུ་རྨིས་ཤིང་། སྔར་བཞིན་གཉིད་ལམ་དེ་རྨིས་མ་ཚར་བའི་སྔོན་ལ་གཉིད་ལས་སད་བྱུང་།ཁོ་ཡར་ལངས་རྗེས་འཁར་རྒྱུག་དེ་བཟུང་སྟེ་ད་རུང་གཉིད་ནས་ཡོད་པའི་ལུག་དག་སློང་བར་བརྩམས། ཁོ་ཡར་ལངས་མ་ཐག་ཁོས་ལུག་ཕལ་ཆེ་བ་ཡང་འགུལ་ལྕོག་རྒྱག་མགོ་བརྩམས་པ་མཐོང་ཞིང་། ཁོའི་མི་ཚེ་ནི་འདས་པའི་ལོ་ངོ་གཉིས་ཙམ་མཉམ་དུ་རོལ་མྱོང་བའི་ལུག་དང་ལྷན་དུ་གསང་བའི་ནུས་ཤུགས་ཤིག་གིས་སྦྲེལ་ནས་ཡོད་པ་འདྲ་སྟེ། རྩྭ་ཆུ་བསྙེགས་པའི་ཕྱིར་རྟག་ཏུ་དེ་དག་དེད་དེ་ཞིང་གྲོང་བརྒལ། ཁོས་“ཁོ་ཚོ་ང་ལ་འདྲིས་དྲགས་ནས་ངའི་ལས་རིམ་ཡང་ཤེས་འདུག” ཞེས་ཤུབ་བུར་སྨྲས། དེ་ལ་ཡུད་ཙམ་བསམ་བློ་བཏང་རྗེས། ཁོས་དེ་ནི་དེ་ལས་ཡོངས་སུ་ལྡོག་ནས་འདུག་པའང་རྟོགས་པ་སྟེ། དེ་ནི་ཁོ་རང་ཉིད་ཁོ་རང་ཚོའི་ལས་རིམ་ལ་གོམས་འདུག་པའོ།།
ཡིན་ནའང་། གཉིད་ལས་སློང་བར་ཅུང་འགོར་མཁན་ཁག་ཅིག་ཀྱང་འདུག གཞོན་ནུས་དེ་ཚོ་རེ་རེ་བཞིན་མིང་ནས་འབོད་བཞིན་འཁར་རྒྱུག་གིས་རེ་རེ་བཞིན་བསྣུན། ཁོས་རྟག་ཏུ་ལུག་རྣམས་ཀྱིས་ཁོས་གང་བཤད་པ་དག་རྟོགས་ཀྱི་ཡོད་པར་ཡིད་ཆེས་བྱས། དེ་བས་དཔེ་དེབ་ལས་ཁོང་ལ་དམིགས་བསལ་གྱིས་བག་ཆགས་བཞག་པའི་ཆ་དེ་ཚོ་ཁོས་འདོན་པར་བྱེད་ཅིང་། དེ་མིན་ན། ཁོས་རྩྭ་སའི་ལུག་རྫི་ཞིག་གི་བདེ་སྐྱིད་དང་སུན་སྣང་ཁོ་ཚོར་བཤད་ངེས་ཡིན། མཚམས་ལན་རེར་གྲོང་གསེབ་བརྒྱུད་ནས་འོང་དུས་སུ་མཐོང་བའི་དོན་དག་གི་སྐོར་གྱི་བསམ་ཚུལ་རྣམས་ཁོ་ཚོར་བཤད་པ་ཡིན།
དེ་ལྟ་ནའང་། འདས་པའི་ཉིན་འགའི་རིང་ལ། ཁོས་ཁོ་ཚོར་དོན་དག་གཅིག་རང་བཤད་ནས་བསྡད་པ་སྟེ། དེ་ནི་ཁོ་ཚོ་ཉིན་བཞི་ཙམ་གྱིས་འབྱོར་བར་འགྱུར་བའི་གྲོང་གསེབ་ཅིག་ཏུ་འཚོ་སྡོད་བྱེད་ཀྱིན་པའི་ཚོང་བ་ཞིག་གི་བུ་མོ་དེའི་སྐོར་རེད། ཁོ་གྲོང་གསེབ་དེར་ཐེངས་གཅིག་མ་གཏོགས་སོང་མ་མྱོང་ལ། དེ་ནི་ན་ནིང་རེད། ཚོང་བ་དེ་ནི་བཅའ་ལག་སྐམ་པོའི་རིགས་བཙོང་སའི་ཚོང་ཁང་ཞིག་གི་བདག་པོ་ཡིན་འདུག་ཅིང་། ཁོས་རྟག་ཏུ་རང་ཉིད་གཞན་གྱི་གཡོ་འོག་ཏུ་མི་ཚུད་ཕྱིར། ལུག་གི་བལ་ཁོང་གི་མདུན་དུ་འབྲེག་དགོས་ཞེས་མངགས་པར་བྱེད། གྲོགས་པོ་ཞིག་གིས་ཁོ་ལ་ཚོང་ཁང་དེའི་སྐོར་བཤད་པ་ཡིན་ལ། དེ་ནས་ཁོས་ལུག་དེད་དེ་དེར་སོང་བ་རེད།
བུ་ན་རེ། “བལ་ཅུང་ཙམ་བཙོང་རྒྱུ་ཡིན” ཞེས་ཚོང་བར་བཤད།
ཚོང་ཁང་ནང་བྲེལ་བ་ཆེ། མི་དེས་ལུག་རྫི་ལ་ཕྱི་དྲོ་བར་དུ་སྒུགས་ཤིག་ཟེར་བས། བུ་དེ་ཚོང་ཁང་གི་རྡོ་སྐས་སྟེང་དུ་བསྡད་དེ་ཁོང་གི་ཁུག་མ་ལས་དཔེ་དེབ་ཅིག་ཕྱིར་བླངས།
“ངས་ལུག་རྫིས་ཡི་གེ་ཀློག་ཤེས་པ་ད་བར་དུ་མ་ཤེས”ཞེས་བུ་མོ་ཞིག་གི་སྐད་ཀྱིས་ཁོའི་རྒྱབ་ནས་བཤད་བྱུང་།
བུ་མོ་དེ་ནི་ཨན་དཱ་ལུ་སི་ཡའི་ཡུལ་གྱི་དཔེ་མཚོན་འཁྲུལ་མེད་ཅིག་སྟེ། གནག་ཅིང་འཇོ་བའི་སྐྲ་དང་མིག་དག་གིས་མོ་རིའི་རྒྱལ་བོ་དག་གི་སྣང་བརྙན་རབ་རིབ་ཅིག་དྲན་པར་བྱས།
“འོ། ནམ་རྒྱུན་ངས་དེབ་ལ་ལྟོས་ཏེ་ངའི་ལུག་ལས་མང་བ་སྦྱོང་གི་ཡོད” ཞེས་ཁོས་ལན་བཏབ། ཁོ་གཉིས་ཀྱིས་ཆུ་ཚོད་གཉིས་ཙམ་ལ་ཁ་བརྡ་བྱས་པའི་རིང་། མོས་མོ་ནི་ཚོང་བའི་བུ་མོ་ཡིན་ཚུལ་དང་། ཉིན་རྟག་པར་གཅིག་མཚུངས་ཡིན་པའི་གྲོང་གསེབ་ཀྱི་འཚོ་བའི་སྐོར་སོགས་ཁོ་ལ་བཤད་ཅིང་། ལུག་རྫིས་ཨན་དཱ་ལུ་སི་ཡའི་ཞིང་གྲོང་དང་། ད་དུང་དེ་དང་འབྲེལ་བ་ཡོད་ཅིང་ཁོ་ཞག་འདུག་བྱས་མྱོང་སའི་གྲོང་སྡེ་གཞན་དག་གི་གནས་ཚུལ་རྣམས་མོ་ལ་བཤད། དེ་ནི་བཤད་ས་ཁོའི་ལུག་མིན་པའི་འགྱུར་ལྡོག་ཉམས་དགའ་བ་ཞིག གོ།
“ཁྱོད་ཀྱིས་ཀློག་ཇི་ལྟར་ཤེས་པ་ཡིན།” བུ་མོས་དེ་སྐད་དྲིས།
ཁོ་ན་རེ། “གཞན་པ་ལྟར་སློབ་གྲྭའི་ནང་སྦྱངས།”
“འོ། ཁྱོས་ཀློག་ཤེས་ན། ཁྱོད་ད་དུང་ལུག་རྫི་ཞིག་ཡིན་དོན་ཅི་རེད།”
གཞོན་ནུས་ལན་ལྡབ་ལྡིབ་ཅིག་བཏབ་པས་ཁོ་མོར་ལན་འདེབས་རྒྱུ་ལས་གཡོལ་ཐུབ་པར་གྱུར། མོས་ཇི་ལྟར་ཡང་རྟོགས་པར་མི་འགྱུར་བ་ཁོས་གསལ་བོར་ཤེས་ཡོད། ཁོས་མུ་མཐུད་དེ་ཁོང་གི་འགྲུལ་བཞུད་སྐོར་གྱི་སྒྲུང་བཤད་པར། མོའི་བཀྲག་མདངས་ཆེ་ཞིང་མོ་རིའི་མིག་ཟུང་དེ་ཞེད་སྣང་དང་མཚར་སྣང་གིས་ཇེ་ཆེར་གྱུར། དུས་ཚོད་དེ་ལྟར་བཞུད་པ་དང་། ཁོས་རང་ཉིད་ཀྱིས་ཉིན་མ་འདི་གཏན་དུ་མ་རྫོགས་ན་ཨང་ཞེས་དང་མོའི་ཨ་ཕ་མུ་མཐུད་བྲེལ་བར་གྱུར་ཏེ་ཁོ་ལ་ཉིན་གསུམ་ལ་བསྒུག་ཏུ་གཞུག་ན་ཨང་སྙམ་གྱིན་པ་ཚོར། ཁོས་རང་ཉིད་ཀྱིས་སྔར་ནམ་ཡང་མྱངས་མ་མྱོང་བའི་འདོད་པ་སྟེ་ས་ཆ་གཅིག་རང་ནས་མི་ཚེ་སྐྱེལ་འདོད་པའི་ཚོར་བ་ཞིག་མྱོང་བཞིན་པ་རྟོགས་ཤིང་། ལྕང་ལོ་ཤིན་ཏུ་ནག་པའི་བུ་མོ་དང་མཉམ་དུ། ཁོའི་མ་འོངས་པའི་ཉིན་མ་དག་སྔོན་དང་གཏན་ནས་མཚུངས་པར་མི་འགྱུར་རོ།།
ཡིན་ནའང་། མཐའ་མར། ཚོང་བ་འོངས་ཏེ་ཁོ་ལ་ལུག་བཞིའི་བལ་བྲོགས་ཞེས་མངགས་བྱུང་། ཁོས་བལ་རིན་རྩིས་བརྒྱབ་རྗེས་ལུག་རྫི་ལ་ལོ་རྗེས་མར་ཡང་ཤོག་ཅེས་རེ་བ་ཞུས། ད་ནི་སྔོན་གྱི་གྲོང་གསེབ་དེ་རང་ལ་ཕྱིར་འབྱོར་བར་ཉིན་བཞི་དགོས་ཤིང་། ཁོས་དགའ་བ་ནོན་མ་ཐུབ་པ་དང་དུས་མཉམ་དུ་བུ་མོ་དེས་ཁོ་བརྗེད་པར་གྱུར་ཡོད་ཀྱང་སྲིད་སྙམ་དུ་བསམས་ཏེ་སེམས་པ་མི་བདེ་བར་ཡང་གྱུར། ལུག་རྫི་མི་ཉུང་བ་ཞིག་བལ་བཙོང་ནས་ས་དེ་བརྒྱུད་མྱོང་།
“དེར་ཁྱད་མེད་དེ། ངས་ས་ཆ་གཞན་གྱི་བུ་མོ་གཞན་པའང་ངོ་ཤེས་ཀྱི་ཡོད”ཅེས་ལུག་ལ་བཤད།
ཡིན་ནའང་། ཁོའི་སེམས་ཁོངས་སུ་དེ་ལ་ཁྱད་ཡོད་པ་ཤེས་ཡོད། ཁོ་མཉན་པ་དང་ཚོང་བ་འགྲུལ་བཞུད་པ་དག་དང་འདྲ་བའི་ལུག་རྫི་ཚོར་རྒྱུས་ཡོད་པ་སྟེ། ཁོ་ཚོས་སེམས་ངལ་མེད་པའི་འགྲུལ་བཞུད་ཀྱི་སྐྱིད་སྣང་བརྗེད་དུ་འཇུག་ནུས་པའི་མི་ཡོད་སའི་གྲོང་སྡེ་ཞིག་རྟག་ཏུ་རྙེད་ཐུབ་པ་དེའོ།།
ནམ་ལངས་ཀྱིན་འདུག་ལ། ལུག་རྫིས་ལུག་ཁྱུ་ཉི་མའི་ཕྱོགས་སུ་ནན་གྱིས་དེད། ཁོ་ཚོས་ནམ་ཡང་གདམ་གསེས་བྱེད་མི་དགོས་པའོ་སྙམ་དུ་བསམས་ཤིང་། ཕལ་ཆེར་དེའི་རྐྱེན་གྱིས་དེ་ཚོ་རང་ཉིད་ལ་སྙིང་ཉེ་བ་རེད་བསམས།
ལུག་ལ་སེམས་ཁྲལ་ཞིག་ཡོད་པ་ནི་རྩྭ་དང་ཆུ་ཡིན་ལ། ཁོས་རྩྭ་ས་ཡག་ཤོས་ཇི་ལྟར་འཚོལ་དགོས་མིན་ཤེས་ཕྱིན་ཆད། དེ་ཚོ་ཁོའི་གྲོགས་པོ་ཡིན་པ་རེད། རེད། ཉི་ཤར་ནས་ས་སྲོད་བར་གྱི་རྫོགས་རྒྱུ་མེད་པ་འདྲ་བའི་དུས་ཚོད་དང་བཅས་ཏེ། ཁོ་ཚོའི་ཉིན་མོ་རྣམས་ཚང་མ་གཅིག་མཚུངས་ཡིན། དེ་བཞིན་དུ་དེ་ཚོས་ཆུང་དུས་སུ་དཔེ་དེབ་གཅིག་ཀྱང་བཀླགས་མ་མྱོང་ཞིང་། ཁོས་ཁོ་ཚོར་གྲོང་ཁྱེར་གྱི་ཡུལ་ལྗོངས་ཀྱི་སྐོར་བཤད་དུས་དེ་ཚོས་རྟོགས་མེད། ཁོ་ཚོ་ཟས་དང་སྐོམ་ཙམ་གྱིས་ཆོག་ཤེས་པར་ཡོད་ཅིང་། དེའི་ལན་དུ། ཁོ་ཚོས་ཕངས་སེམས་མེད་པར་བལ་སྦྱིན་པ་དང་འགྲོ་རོགས་བྱེད་ཅིང་། མཚམས་མཚམས་ལ་ཁོ་ཚོའི་ཤ་ཡང་སྦྱིན་པར་བྱེད།
བུ་དེས། གལ་ཏེ་ང་བདུད་ཅིག་ཏུ་གྱུར་ཏེ། ཁོ་ཚོ་རེ་རེ་བཞིན་གསོད་རྩིས་བྱས་ན། ཁོ་ཚོས་ལུག་ཕལ་མོ་ཆེ་བསད་ཚར་ནས་མ་གཏོགས་ཤེས་རྒྱུ་མ་རེད་བསམས། ངས་ཁོ་ཚོ་རྩྭ་བཅུད་འཛོམས་སར་དེད་ནས་འགྲོ་བ་ཡིན་པས་ལུག་རྣམས་ང་ལ་བློ་གཏོད་པ་རེད། ད་ནི་ཁོ་ཚོ་སོ་སོའི་བློ་རིག་ལ་བརྟེན་རྒྱུ་ཡང་བརྗེད་པར་གྱུར་འདུག
བྱིས་པ་དེས་རང་གི་བསམ་གཞིག་དེ་ལ་ཧང་སངས་པར་གྱུར། ཕལ་ཆེར་ནང་ལོགས་སུ་སི་ཁ་མོར་ཤིང་སྡོང་སྐྱེས་པའི་ལྷ་ཁང་དེ་ལ་འདྲེ་འཁོར་གྱི་ཡོད་པ་འདྲ། དེས་ཁོར་རྨི་ལམ་གཅིག་པ་ཞིག་བསྐྱར་དུ་རྨིས་སུ་བཅུག་པ་དང་། དེས་ཁོ་ལ་ཁོང་གི་ཡིད་ཆེས་ཀྱིས་ཁེངས་པའི་རོགས་པ་རྣམས་ལ་འཚིག་པ་ཟ་རུ་བཅུག ཁོས་མདང་དགོང་ནུབ་འཚལ་སྐབས་ཀྱི་རྒུན་ཆང་འཐུང་འཕྲོ་དེ་ཅུང་ཙམ་འཐུང་ཞོར་རང་གི་སྟོད་གོས་ཀྱིས་ལུས་པོ་ལེགས་པར་བཏུམ། དུས་ཚོད་འགའི་རྗེས་སུ་ཉི་མ་གུང་ལ་བསླེབས་ཚེ། ཚ་བ་ཆེ་དྲག་སྟེ་ལག་ཁྱུ་རྩྭ་སར་འདེད་མི་ཐུབ་པའང་ཤེས་ཡོད། དུས་དེ་སི་ཕེན་ལ་མཚོན་ན་དབྱར་ཁའི་ཉིན་གཅིག་གི་གཉིད་ལྡོག་པའི་དུས་སྐབས་ཡིན་པ་རེད། ཚ་བ་ཉི་མ་མ་ནུབ་པར་མི་འཇགས། ཁོས་སྟོད་གོས་རྟག་ཏུ་འཁྱེར་དགོས་ཁེལ་གྱི་ཡོད་མོད། དེའི་ལྗིད་ཚད་ལ་འཁང་ར་བྱེད་བསམས་དུས། ཁོ་ལ་སྟོད་གོས་དེ་ཡོད་པས། ཞོགས་པའི་དྲང་རེག་འགོག་ཐུབ་པའང་དྲན་པར་གྱུར།
ཁོས་ང་ཚོར་འགྱུར་བ་གཏོང་རྒྱུར་ངེས་པར་གྲ་སྒྲིག་དགོས་བསམས། ཁོས་སྟོད་གོས་ཀྱི་ལྗིད་ཚད་དང་དྲོད་ཁོལ་གྱི་དྲིན་ཚོར་བར་གྱུར།
སྟོད་གོས་ལ་དམིགས་ཡུལ་ཞིག་ཡོད་པ་བཞིན་དུ་བུ་དེ་ལ་ཡང་ཡོད། ཁོང་གི་མི་ཚེའི་དམིགས་ཡུལ་ནི་འགྲུལ་བཞུད་བྱེད་རྒྱུ་ཡིན་ཞིང་། ལོ་གཉིས་ཀྱི་རིང་ལ་ཨན་དཱ་ལུ་སི་ཡའི་ས་ཆར་བསྐྱོད་མྱོང་ཡོད་པས། དེའི་ཁུལ་གྱི་གྲོང་ཁྱེར་ཚང་མར་རྒྱུས་ཡོད། ཁོས་ད་ལན་གྱི་འགྲུལ་བཞུད་འདི་བརྒྱུད་དེ་བུ་མོ་དེར་རང་དགའི་ལུག་རྫི་ཞིག་གིས་ཇི་ལྟར་ཀློག་ཤེས་པ་འགྲེལ་བརྗོད་བྱེད་རྩིས་ཡོད་པ་སྟེ། དེ་ནི་ཁོ་ལོ་བཅུ་དྲུག་བར་དུ་ཆོས་གྲྭར་ཞུགས་མྱོང་བའོ།།
ཁོའི་ཕ་མ་གཉིས་ཀྱིས་ཁོ་མཆོད་དཔོན་ཞིག་བྱེད་དུ་བཅུག་སྟེ་ཞིང་བའི་ཁྱིམ་ཚང་དཀྱུས་མ་ཞིག་གི་ང་རྒྱལ་གྱི་གནས་སུ་གྱུར་ན་དགོངས། ཁོ་ཚོས་ལུག་བཞིན་དུ་ཟ་འཐུང་གི་དོན་དུ་ལས་ལ་བརྩོན། ཁོས་ལ་ཋིན་དང་། སི་ཕེན་གྱི་སྐད། དེ་བཞིན་ལྷ་རིག་ཀྱང་སྦྱངས། ཆུང་བྱིས་པའི་དུས་ནས་བཟུང་། ཁོས་འཛམ་བུ་གླིང་གི་སྐོར་ཤེས་ན་འདོད་ཅིང་། ཁོ་ལ་མཚོན་ན་དེ་ནི་དཀོན་མཆོག་ཤེས་པ་ལས་གལ་འགངས་ཆེ་བར་འདོད་ལ། མིའི་སྡིག་པ་རྟོགས་པ་ལས་ཀྱང་གལ་ཆེ་བར་བསམས། ཡུལ་ལ་སོང་དུས་ཀྱི་ཕྱི་དྲོ་ཞིག་ལ། ཁོས་སྙིང་སྟོབས་བསྐྱེད་དེ། ཁོའི་ཨ་ཕར་རང་ཉིད་མཆོད་དཔོན་ཞིག་བྱེད་མི་འདོད་པར། འགྲུལ་བཞུད་བྱེད་ན་འདོད་ཅེས་སྨྲས།
ཁོའི་ཨ་ཕས “བུ། འཛམ་གླིང་ས་ཕྱོགས་གང་ས་ནས་འོངས་པའི་མི་རྣམས་གྲོང་སྡེ་འདི་བརྒྱུད་ནས་སོང་མྱོང་།” ཞེས་བཤད།
“ཁོ་ཚོ་དངོས་པོ་གསར་བ་འདྲ་འཚོལ་རུ་འོངས་ན་ཡང་། ཕྱིར་ལོག་དུས་ཕལ་ཆེར་ཚུར་འབྱོར་དུས་དང་གཅིག་པ་རེད། ཁོ་ཚོ་རི་བོ་བརྒལ་ཏེ་མཁར་རྫོང་ལ་ལྟ་རུ་འོངས་ནའང་། འདས་ཟིན་པ་ནི་ད་ལྟར་ང་ཚོར་གང་ཡོད་པ་ལས་ལེགས་པར་བསམས་ཏེ་མཇུག་བསྡུ་བར་བྱེད། ཁོ་ཚོར་སྐྲ་སེར་བོ་ཡོད་པ་དང་། ཡང་ན་སྐྱི་པགས་ནག་པོ་ཡོད་ཀྱང་ཆོག་གི སྤྱིར་བཏང་གིས་བཤད་ན་འདིར་ཡོད་པའི་མི་དང་གཅིག་པ་རེད།”
“ཡིན་ནའང་། ངས་ཁོ་ཚོ་འཚོ་བ་རོལ་སའི་མཁར་རྫོང་དེ་ཚོ་མཐོང་ན་འདོད” ཅེས་བུས་འགྲེལ་བཤད་བྱས།
“མི་དེ་ཚོས་ང་རང་ཚོའི་ས་ཆ་མཐོང་དུས། ཁོ་ཚོ་དུས་གཏན་དུ་འདིར་བསྡད་ན་འདོད་ཟེར” ཞེས་ཁོའི་ཨ་ཕས་མུ་མཐུད།
“ཆོག་གི ངས་ཁོ་ཚོའི་ས་ཆ་དང་། ད་རུང་ཁོ་ཚོའི་འཚོ་བ་རོལ་སྟངས་མཐོང་ན་འདོད” ཞེས་བུས་བཤད།
ཁོའི་ཨ་ཕ་ན་རེ། “འདིར་ཡོང་མཁན་གྱི་མི་དེ་ཚོར་སྒོར་མོ་མང་བོ་ཡོད་པས། ཁོ་ཚོ་སྐོར་རྒྱག་ཐུབ་ཀྱི་ཡོད་པ་རེད། ང་ཚོའི་ནང་ན། སྐོར་རྒྱག་ཐུབ་མཁན་ཉག་གཅིག་ཡོད་པ་ནི་ལུག་རྫི་ཚོ་རེད།”
“བཟང་གི དེས་ན་ང་རང་ལུག་རྫི་བྱེད་རྒྱུ་ཡིན།”
དེ་ནས་ཨ་ཕས་ཅང་མ་བཤད། ཉིན་རྗེས་མར་ཁོས་རང་གི་བུ་ལ་གནའ་བོའི་སི་ཕེན་གྱི་གསེར་སྒོར་གསུམ་ཡོད་པའི་ཁུག་མ་ཞིག་གནང་།
“ཉིན་ཞིག་ལ་ངས་འདི་ཞིང་ནང་ནས་རྙེད་བྱུང་། ངས་འདིས་ཁྱོད་ཀྱི་ཤུལ་བཞག་གི་ཆ་ཤས་ཤིག་འོང་ན་བསམས། ཡིན་ནའང་། ད་དེས་ལུག་ཁྱུ་ཞིག་ཉོས་ནས་རྩྭ་སར་དེད། ཁྱོད་ཀྱིས་མ་འོངས་པར་ང་རང་ཚོའི་ཞིང་གྲོང་ནི་ཡག་ཤོས་ཡིན་པ་དང་ང་རང་ཚོའི་བུད་མེད་ནི་མཛེས་ཤོས་ཡིན་པ་རྟོགས་འོང་གི་རེད།”
དེ་ནས་ཁོས་བུ་བྱིན་གྱིས་བརླབས། བུས་རང་གི་ཨ་ཕའི་སྤྱན་ལས་ཨ་ཕ་ཁོ་རང་ཉིད་འཛམ་གླིང་ལ་སྐོར་བ་རྒྱག་པའི་འདོད་པ་སྟེ། ཟ་འཐུང་གི་ཁུར་བོ་དང་རང་གི་མི་ཚེའི་ནུབ་རེ་བཞིན་ཉལ་ས་གཅིག་པ་ཞིག་ཐོབ་སླད། ལོ་ངོ་བཅུ་ཕྲག་འགར་འཐབ་རྩོད་བྱས་ཏེ་རེ་འདོད་དེ་སྦས་དགོས་བྱུང་ནའང་ད་རུང་གསོན་ཡོད་པའི་མངོན་འདོད་དེ་རིག་ཐུབ་ཀྱི་འདུག
གནམ་སའི་མཐུད་མཚམས་ནི་དམར་བོར་གྱུར་འདུག་ལ། ཉི་མ་གློ་བུར་དུ་མངོན་པར་གྱུར། བུ་དེས་རང་གི་ཨ་ཕ་དང་ལྷན་དུ་བཀའ་མོལ་གནང་བ་དྲན་ཏེ་སྐྱིད་སྣང་ཤར། ཁོས་ད་ནི་མཁར་རྫོང་དུ་མ་ཞིག་མཇལ་མྱོང་ཞིང་བུད་མེད་ཀྱང་གང་མང་ཞིག་ལ་ཐུག་མྱོང་། (ཡིན་ནའང་། ཁོར་བསྒུགས་ཡོད་ཅིང་ཉིན་འགས་ཐུག་པར་འགྱུར་བ་དེ་དང་བསྒྲུན་དུ་རུང་བ་སུ་ཡང་མི་འདུག) ཁོ་ལ་བདག་པ་ནི་སྟོད་གོས་ཤིག་དང་གཞན་ཞིག་ལ་བརྗེ་ཆོག་པའི་དཔེ་ཆ་ཞིག ད་རུང་ལུག་ཁྱུ་ཞིག་གོ།
(མུ་འགོད)
No comments:
Post a Comment