ང་དང་ངའི་སྙིང་སྡུག་འཇིགས་མེད་ནོར་བུ།
སེང་གེ་རྡོ་རྗེ།
འཇིག་རྟེན་འདིའི་ལྷོ་སྤྲིན་བྱང་དུ་མྱུར་མྱུར་འགྲོ་ཞིང་ཤར་སྤྲིན་ནུབ་ཏུ་བྲེལ་བྲེལ་བརྒྱུགས་པའི་མཚན་མོ་ཞིག་ལ། བུ་མོ་ང་རང་རྨ་ཆུ་ལུ་མའི་འགྲམ་རྒྱུད་ཀྱི་སྡེ་བ་ཆུང་ཆུང་ཞིག་ཏུ་སྐྱེས་སོ་སྐད། སྡེ་བ་དེའི་ཁྱིམ་ཚང་དག་ནི་ལ་ལུང་སོ་སོར་ཐོར་ནས་གནས་ཡོད་པ་དང་། ས་ཆགས་རེ་ན་ཁང་བ་སྐྱ་ལེབ་རེ་ཡོད་པ་དེ་འདྲའོ། །སྡེ་དཀྱིལ་དུ་མཆོད་རྟེན་དཀར་བོ་ཞིག་ཡོད་པའི་ཐད་དུ་སྐབས་རེར་འཇའ་ཕྲ་མོ་ཞིག་གསེག་གིས་འཆར་ལ། སྐབས་རེར་སྤྲིན་སེར་འབོལ་ལེ་ཞིག་ཆེས་དམའ་བར་འཁྲིགས་པར་ཐལ། ངའི་ཁྱིམ་ཡང་མཆོད་རྟེན་དེའི་ཐག་ཉེར་ཡོད་ལ། ངའི་བྱིས་དུས་ཀྱི་དྲན་སྣང་ཞིག་ལ་ཉིན་མོར་མཆོད་རྟེན་དེ་ཉི་འོད་ཀྱིས་བསྐོར་ཡོད་ཅིང་མཚན་མོར་མཆོད་རྟེན་དེ་ཟླ་འོད་ཀྱིས་བསྐོར་ཡོད་དོ། །
ཨ་མས་བཤད་ན། ང་སྐྱེས་པའི་མཚན་མོ་དེར་ནམ་མཁའི་ཟླ་བ་ནི་སྤྲིན་བར་ཞིག་ནས་སྤྲིན་བར་གཞན་ཞིག་ལ་མྱུར་སྟབས་ཀྱིས་ལྷུང་ནས་འགྲོ་བ་འདྲ་བོ་རེད་ལ། སྡེ་དཀྱིལ་གྱི་མཆོད་རྟེན་དཀར་བོ་དེ་ཁོ་ན་གཡོ་མེད་འགུལ་མེད་དུ་བསྡད་འདུག་ཟེར་རོ། །ཨ་མའི་སྐད་ཆ་དེ་ལ་དངོས་བསྟན་གྱི་གོ་རྒྱུ་དེ་ལས་མི་འདུག་ལ་ཤུགས་བསྟན་གྱི་གོ་བ་འདྲ་ཡོད་མེད་ངས་ཀྱང་མི་ཤེས་སོ། །
ང་ལག་ཆགས་རྗེས་རྨོ་མོས་ང་ལ་“བུ་མོ་ཁྱོད་རང་སྐུ་དྲག་དང་དཔོན་ཆེན། བླ་མ་དེ་འདྲའི་སྲས་མོར་འཁྲུངས་མ་ཐུབ་ཀྱང་། བསམ་པ་ཧ་ཅང་བཟང་ཞིང་གཤིས་རྒྱུད་ཧ་ཅང་དྲང་བའི་ཕ་མ་གཉིས་ཤིག་གི་བུ་མོར་སྐྱེས་ཐུབ་ཡོད་ལ། རྒྱུ་ནོར་ལོངས་སྤྱོད་ཀྱང་མི་ལ་སྨོན་མི་དགོས་པ་ཞིག་མཆིས་”སོགས་ཟེར་རོ། །
རྨོ་མོས་བཤད་པ་བདེན་པ་རེད། གཞུང་དྲང་གི་ཕ་མ་གཉིས་དང་ཕུ་བོ་ཨ་ཅེ་སོགས་ཀྱི་གཉོར་སྐྱོང་ལ་བརྟེན་ནས་བུ་མོ་ང་རང་མིག་རྡེབ་ཡུན་ཙམ་ལ་ལག་ཆགས་ཤིང་ཇ་ཁོལ་ཡུན་ཙམ་ལ་བསམ་ཤེས་པར་ཐལ། རང་གིས་རང་ལ་མཉམ་ཞིག་བཞག་དུས། བྱིས་པའི་གནས་ཚད་ག་ལེ་ག་ལེར་རྫོགས་འདུག འདྲ་ཆགས་ལ་མི་ཆགས་ཀྱི་བསམ་ཚུལ་སྣ་ཚོགས་ཀྱང་བདོ། ཅི་མ་ཡིན་ཞིག་ལ་སློབ་གྲྭ་ཆུང་འབྲིང་ཡང་རིམ་པར་བཏོན་ཐལ་ལོ། །
སོ་སོས་སོ་སོར་གཤིས་ཀྱིས་མཉམ་ཞིག་བཞག་དུས། ངང་གིས་གོས་གསར་བརྗེ་བ་དང་། རྒྱན་གསར་འདོགས་པ་དང་། རང་བཞིན་གྱིས་སྐྲ་ཤད་པ། ཅི་མི་སྙམ་པར་རྣ་ལུང་འདོགས་པ་སོགས་ལོབས་ནས་འདུག་སྟེ། ད་དུང་ཉིན་རེ་ཞག་རེའི་མཚམས་ནས་ཁ་མགུལ་སྐེ་མགུལ་ཕྱེས་པ། ཟླ་རེ་ལོ་རེའི་མཚམས་ནས་དཀར་ཐག་དམར་ཐག་ཆོད་པ། རྒྱུ་མེད་རྐྱེན་མེད་ཅིག་གིས་གློ་བུར་དུ་ངོ་ཚ་སྨིན་པོ་ཞིག་ཀྱང་བྱུང་ངོ་། །རང་གིས་རང་ཉིད་ལ་སྐད་འཇམ་ངག་དལ། ཆེ་བཀུར་ཆུང་
བྱམས། འགྲོ་ཤེས་འདུག་མཁས་ཤིག་ཀྱང་ཡོང་དུ་བཅུག་ཐལ་ལོ། །དེ་དང་ཆབས་ཅིག་དགོད་མི་དགོས་ས་ཞིག་ལའང་དགོད་རྒྱུ་ཡོང་བ་དང་མཚར་མི་དགོས་ས་ཞིག་ལ་མཚར་རྒྱུ་ཡོང་བ་སོགས་མདོར་ན་རང་ལུས་ཀྱི་གནམ་ས་གཡོས། རང་སེམས་ཀྱི་མེ་ཏོག་འདར། རང་རྒྱུད་ཀྱི་གཙང་བོ་བྲུག་པ་སོགས་ནད་རྟགས་དང་འཆི་རྟགས་གང་ཡང་མ་ཡིན་པའི་རྟགས་གཞན་མང་བོ་ཞིག་ཚང་ནས་འདུག་གོ །
ཉིན་ཞིག་ཨ་ཅེས་ང་ལ། “་བསམ་གཏན་ལྷ་མོ། ཁྱོད་ཀྱི་དཔྱི་འདལ་བ་དང་། ཚང་སྒྲོམ་རྒྱས་པ་སོགས་ལ་ལྟོས་དང་། ད་ལྟ་ལང་ཚོ་སྨིན་ཐག་ཆོད་ནས་མོ་གསར་གྱི་བཟང་སྒང་རེད་ཡ། ཞི་ལུ་ཞིག་དང་འགྲོག་ན་བཟང་རྒྱུ་རེད། རྒྱུན་དུ་ཨ་མའི་གམ་ནས་གཉིད་འདུག་རྒྱུར་ངོ་མི་ཚའམ་”སོགས་ཟེར་རོ། །
ངས་དེ་དུས་མ་ཤེས་པ་རེད་མ་གཏོགས། སྤྱིར་ནའང་མོ་ལོ་བཅུ་དྲུག་བཅུ་བདུན་དེ་ལོ་ཚོད་དམིགས་བསལ་བ་ཞིག་ཏན་ཏན་ཡིན་ས་རེད། ཕྱིས་ཕྱིས་སུ་ངས་ཁ་བཏོན་མང་བོའི་ནང་ནས་མཐོང་བ་ནི་སྔོན་སྔོན་གྱི་མཁས་གྲུབ་གནམ་གྱིས་ས་བཀབ་པ་ལྟ་བུ་དག་གིས་ཀྱང་ལྷ་མོ་མཛེས་མ་དག་ལ་“བཅུ་དྲུག་ལོན་པའི་ལུས་དང་ལྡན”ཞེས་བསྟོད་པ་མཛད་འདུག་ཨང་།
གང་ལྟར་རང་སྡེའི་རྒན་མོ་བསམ་ཤེས་དག་དང་རང་ཁྱིམ་གྱི་ཨ་མ་ཨ་ཅེ་སོགས་ཀྱིས་ང་ལ་རབ་གཉེན་རྟགས་རྒྱག་པ་དང་འབྲིང་དགའ་རོགས་སྒྲིག་པ། མཐའ་མ་ཡང་རྩེ་རོགས་དགོད་རོགས་ཤིག་ཅིས་ཀྱང་ཚོལ་ཞེས་མང་ནས་མང་དུ་བསྐུལ་བྱུང་། ངའི་ཨ་ནེ་ཞིག་གིས་ཀྱང་“བསམ་གཏན་ལྷ་མོ། ད་སྐབས་ཁྱོད་ལ་རེ་བ་བྱེད་པའི་ཞི་ལུ་ཉུང་ཉུང་མ་རེད། རང་བློར་འབབ་པ་ཞིག་དང་མཐུན་རྒྱུ་བྱོས་དང་བཟང་ནི་རེད། གཞུག་ནས་ལུས་ལང་ཚོ་ཡལ། ཉམས་བཀྲག་མདངས་ཤོར། སྟོབས་གཟི་བྱིན་ཡལ་ཚར་དུས་ཞི་ལུ་དགའ་ཞིག་ལག་ལ་ཡོང་དཀའ་ནི་རེད་”སོགས་ཟེར་རོ། །སློབ་གྲྭའི་ནང་ནས་ཀྱང་ཞི་ལུ་མང་བོས་ང་སྲང་ན་ཡོད་དུས་རྗེས་ནས་འདེད། ང་ཁྱིམ་ནང་སྡོད་དུས་སྒོ་ནས་འཇབ། ང་ཁ་རོག་སྒོམ་དུས་མིང་གིས་འབོད་པ་སོགས་བྱེད་དོ། །དེས་ཡིན་ས་རེད། སྐབས་དེར་བསོད་ཟད་མ་ང་ལ་རང་གིས་ཀྱང་ཚོད་འཛིན་བྱེད་མི་ཐུབ་པའི་ང་རྒྱལ་ཕྲ་མོ་ཞིག་སྐྱེས་གྲབས་བྱེད། ལང་ཚོས་སྙེམས་པ་དང་རང་སྣང་གིས་དྲེགས་པ་དང་ལོ་ཚོད་ཀྱིས་རློམ་པ་སོགས་ཀྱི་གཡེར་བག་ཅིག་ཀྱང་འབར་ཐལ་ལོ། །ཕོ་སེམས་མང་བོ་ཚིག་གིས་བསྲེགས། “ང་ཁྱོད་ལ་སྙིང་ཐག་པ་ནས་དགའ་བཀའ་ བསྟན་དཔང”ཞེས་མགོ་ངིག་ངིག་དང་ཁ་ཐམ་ཐམ་བྱེད་མཁན་དག་གི་སེམས་ལའང་ཆུ་འཁྱགས་བླུགས། མཛའ་འཕྲིན་ཡིན་ཞེས་ཤོག་ལྟེབ་སྒམ་ཚད་དུ་ལོངས་པ་ཁྱེར་ཡོང་མཁན་རྣམས་ལའང་ཞེ་ཐག་པ་ནས་ཁ་ཡ་བྱེད་རྒྱུ་ཞིག་ལྟ་ཞོག ཅུང་གུས་པའི་ཨ་ལན་ཙམ་བྱིན་པའང་དྲན་རྒྱུ་མི་འདུག ང་ཡོད་སའི་སློབ་གྲྭ་དེའི་ཤར་ལྷོ་ནུབ་བྱང་ནས་བཙངས་ཡོང་བའི་འཕྲིན་ཡིག་དེ་དག་ངས་ཀློག་ཙམ་བྱེད་པ་ཡང་ངལ་བའི་རྒྱུ་རེད་འདོད་ནས་དཀར་ཐར་རེ་ས་ནང་དང་རྡོ་གསེབ་ལ་གཅོལ་བ་ཡིན་ནོ། །ལྷག་པར་དུ་རྫོང་དེའི་དཔོན་པོ་མཐོ་ཤོས་ཀྱི་གཅེས་ཕྲུག་གིས་ང་ལ་དང་བོར་ཁ་ཡག་ཚིག་རྒྱན་བཤད། བར་དུ་རྒྱུ་ངོམས་ཟས་ངོམས་བྱས། མཐའ་མར་བཙན་ཤེད་དབང་ཤེད་བཀོལ་རྩིས་བྱས་མོད་ངས་ནི་སྐུ་དྲག་གི་སྲས་མོ་ཞིག་གིས་རིགས་ངན་མགར་བ་ཞིག་ལ་ལྟ་བ་ནང་བཞིན་བྱས་ནས་ཁོའི་ངོ་གདོང་ཆུ་ལ་བསྐྱུར་དགོས་པའི་ཚད་ལ་བསྐྱལ་བཞག དོན་དེའི་ཆེད་དུ་ངའི་ཨ་ནེའི་བུ་མོས་ང་ལ་“བསམ་གཏན་ལྷ་མོ་ཡ། ནོར་བུ་རིན་པོ་ཆེ་ཁ་ནང་ལ་ཡོང་བ་སྣ་ནང་ནས་དོར་ཟེར་བ་ཁྱོད་ལ་བཤད་པ་མ་རེད་དམ། རྫོང་དཔོན་ཨུ་རྒྱན་གྱི་བུ་དེ་གཅིག་ནས་ཕོ་གསར་ཡག གཉིས་ནས་སྒོར་མོ་མང་།
གསུམ་ནས་མ་འོངས་པའི་མདུན་ལམ་ཡང་རྒྱ་ཆེན་པོ་ཞིག་ཡིན་པས་ཁྱོད་ཀྱིས་ངོ་མ་བརླག་ཐལ་ཡ་”སོགས་ཟེར་རོ། །
རྫོང་དཔོན་གྱི་གཅེས་ཕྲུག་གིས་ང་ལ་སྙིང་ནད་བརྩད་པ་ཡིན་ཞེས་ངའི་ལྭ་བ་མང་བོ་ཉི་མར་བསྐམས་ཡོད་པ་མེ་ལ་བསྲེགས་པའི་ཕྱི་དྲོ་དེ་རེད། རེད། དེ་ནི་ངས་སློབ་ཆེན་ལ་རྒྱུགས་འཕྲོད་མ་ཐག་པའི་ཕྱི་དྲོ་དེ་ཡང་རེད། ཕྱི་དྲོ་དེར་ང་དང་ངའི་གྲོགས་མོ་འགའ་ཟི་ལིང་གི་གླིང་ག་ཞིག་ལ་འཆམ་འཆམ་དུ་སོང་བ་ཡིན། ངས་ལྟ་ཕྱོགས་ཤིག་གིས་སམ་སྟེས་དབང་གིས་ནམ་མཁར་གཅིག་བལྟས་དུས། འཇིག་རྟེན་འདིའི་ལྷོ་སྤྲིན་ཁག་ཅིག་བྱང་དུ་མྱུར་མྱུར་འགྲོ་ཞིང་ཤར་སྤྲིན་དུམ་བུ་ཞིག་ནུབ་ཏུ་བྲེལ་བྲེལ་རྒྱུག་གིན་འདུག དེ་མ་ཐག ངས་ཨ་མས་ང་ལ་བཤད་པའི་ང་རང་སྐྱེས་དུས་ཀྱི་མཚན་མོ་དེ་རང་དྲན་བྱུང་། ངས་སེམས་ཤིག་ལ་རང་གི་དབང་ཐང་རྫོགས་པའམ་བསོད་ནམས་དར་བའམ། རང་ཉིད་ལ་ཅི་ཞིག་ན་བའམ་ག་ཤེད་དུ་འགྲོ་དགོས་པའམ། གང་ལྟར་རང་གི་ལས་སྐལ་ལ་འགྱུར་ལྡོག་ཐུ་མོ་ཞིག་འབྱུང་ངམ་སྙམ་པ་ཞིག་བྱུང་། ངས་འཕྲལ་དུ་རང་གི་གྲོགས་མོ་དག་ལ་རང་གི་བསམ་ཚུལ་དེ་ཟུར་ཙམ་ལབ་པ་ཡིན་མོད། ཁོ་མོ་ཚོས་ཅི་མི་སྙམ་པར་“ཁྱོད་ཀྱི་རྨི་ལམ་ཧ་ཅང་ཐིག་མོད། མངོན་ཤེས་དང་མཁྱེན་པ་ཡོད་ཁུལ་མ་བྱེད། ད་འགྲོ་ལ་ཟ་མ་ཟ་ཡ་”སོགས་ཟེར་རོ། །
ཁ་ཆེའི་ཟ་ཁང་སྒོ་ཐོད་ན་སྐར་མ་དང་ཟླ་རིས་ཡོད་ས་དེའི་ནང་ནས་འདྲེན་ཤུགས་མཐའ་མེད་ཀྱི་ཁོ་རང་ངས་ཐོག་མར་ངོ་ཤེས་པ་ཡིན། ཟ་ཁང་དུ་མི་མང་དྲགས་པས་ཁོ་རང་ང་ཚོ་དང་ལྷན་དུ་འདུག་དགོས་བྱུང་ལ། ཐོག་མར་ཉམས་དེ་འདྲ་མ་བཞག་མོད། ཟ་མ་ཟ་ཞོར་ཟ་ཞོར་ང་ཚོས་ཁོའི་ངོ་གདོང་དང་གཟུགས་བྱད་མཐོང་བྱུང་ལ། ཁོའི་ངག་གདངས་དང་ཁ་སྟབས་ཀྱང་ཚོར་བྱུང་། ཁོ་ན་རེ། “ངའི་མིང་ལ་འཇིགས་མེད་ནོར་བུ་ཟེར་”ཟེར་རོ། །ཁོའི་ཆེས་སྤྱིར་བཏང་གི་རྣམ་འགྱུར་རགས་པ་དེ་དག་ཀྱང་ང་དང་ངའི་གྲོགས་མོ་ཚོར་མཚོན་ན་ཤིན་ཏུ་འཐུས་སྒོ་ཚང་བའི་རི་མོའི་སྒྱུ་རྩལ་རེ་རེ་དང་འདྲ་བར་མྱོང་བས་ངོམས་པ་མེད་ཅིང་། ཁོའི་ཟ་སྐད་འཐུང་སྐད་ཀྱི་ཚིག་ཕྲེང་སྟབས་བདེ་དེ་དག་ཀྱང་ང་དང་ངའི་གྲོགས་མོ་ཚོར་མཚོན་ན་དབྱངས་དང་རོལ་མོའི་བརྩམས་ཆོས་རྣལ་མ་རེ་ལས་ཆ་འཇོག་ས་ཅང་མི་འདུག་ཡ། ཁོའི་ཁ་ངོ་ཉི་འོད་ཀྱིས་ཅུང་ཟད་ཚིག་འདུག་ནའང་། མ་གཞིའི་ཤ་རྩ་དྭངས་ཤིང་ཁ་སྣ་སོགས་ཀྱི་ཆེ་ཆུང་དང་སྲབ་མཐུག་ཚད་ལ་རན་པ་ནི་“ལྟ་བས་ཆོག་མི་ཤེས་པ་”ཞེས་པའི་ཚིག་དེ་ཁོ་ནས་མཚོན་ཐུབ་པ་འདྲ། གཞན་མ་བཤད་དང་། ཁོའི་ཅུང་ཟད་རྫོབ་ལ་ཡང་ཅུང་ཟད་
འཛིང་བའི་སྐྲ་ལོ་དེ་ཁོ་ནས་ཀྱང་སྨན་ང་ཚོའི་སྙིང་ཁ་དྲག་ཏུ་བརྡུངས་ཤིང་བླ་ཁམས་ཚ་ཙག་གེར་བཏང་ཐལ། ལྷག་ཏུ་ཁོའི་ཁྲ་སྒོར་སྒོར་གྱི་མིག་ཟུང་དེར་སྣང་སྲིད་སྣོད་བཅུད་ཐམས་ཅད་ཁྲ་ལམ་མེར་ཤར་འདུག་པ་ནང་བཞིན་ང་དང་ངའི་གྲོགས་མོ་ཚོས་བལྟས་ཀྱིན་བལྟས་ཀྱིན་ད་དུང་བལྟ་རྒྱུ་ཞིག་དང་། མྱོང་གིན་མྱོང་གིན་ད་དུང་མྱོང་རྒྱུ་ཞིག་གདའ་སྟེ། “སྤྱན་”གཟི་རིས་མ་དེ་གཉིས་ཀྱིས་གཡས་སུ་ལྟ་སྟངས། གཡོན་དུ་འཁོར་སྟངས། ཀླད་ལ་སྐོར་སྟངས། འགབ་ལ་ཅེར་སྟངས་སོགས་ཀྱིས་ང་དང་ངའི་གྲོགས་མོ་ཚོའི་གཡེར་མདོག་གི་ལྕགས་སྒོ་གཏོར། བཙུན་མདོག་གི་སྡོམ་པ་ཤོར། མཛེས་མདོག་གི་སྤོབས་སེམས་ཉམས། རང་སེམས་རང་ལ་ངོ་ཚ་དགོས་པ་ཞིག་བྱུང་ངོ་། །
སྤྱིར་ན་ང་དང་ངའི་གྲོགས་མོ་ཚོས་ཀྱང་ལོ་ཅུང་མང་བོའི་རིང་ལ་རྒྱ་ཡིག་གི་ལམ་ནས་བུད་མེད་ཀྱི་ཐོབ་ཐང་གླེང་བའི་དཔེ་ཆ་མང་ཙམ་བཀླགས་མྱོང་ལ། སོས་དལ་དུས་ནི་དེའི་སྐོར་ནས་རིགས་པ་བརྗོད་དགོས་ན་འདྲ། ལུང་འདྲེན་དགོས་ན་འདྲ། དཔེ་འགོད་དགོས་ན་འདྲ་ཧ་ཅང་གིས་ཐགས་ཐོགས་མེད་པ་ཤ་སྟག་ཡིན་མོད་ཀྱང་། དགོང་མོ་དེར་ཁོའི་མདུན་ལ་སླེབས་དུས་གཅིག་ན་ང་ཚོས་ཁ་ཡིས་མི་ཤོད། གཉིས་ན་ང་ཚོའི་བློ་ལ་མི་དྲན། གསུམ་ན་ང་ཚོའི་ངག་ཀྱང་དིག་འགྲོའོ། །ཡིན་ནའང་ང་ཚོས་མ་ཤོད་དེ་ཤོད་བྱས་ནས་ཁོ་ལ་བུད་མེད་ཀྱི་ཐོབ་ཐང་སོགས་ཕལ་ཆེར་དུས་ཚོད་གཅིག་ལྷག་ལ་ཁ་རུབ་ཚིག་རུབ་བྱས་ནས་བཤད་པ་ཡིན་ཏེ། ང་དང་ངའི་གྲོགས་མོ་ཚེས་བཤད་ཚར་རྗེས། ཁོས་དལ་བའི་ཉམས་ཀྱིས་ཇ་ལ་ཧུབ་གཅིག་བྱས། ལྷོད་པའི་ཉམས་ཀྱིས་སྐྲ་ལོ་སྤྲུགས་ཙམ་བྱས། འཇམ་པའི་ཉམས་ཀྱིས་ལག་པའི་ཕྱག་རྒྱ་དང་བཅས་ཚིག་ཧ་ཅང་ཐུང་ཐུང་ཞིག་གིས་ང་དང་གྲོགས་མོ་ཚོའི་དམ་བཅའ་དང་ལུང་རིགས། དཔེ་འཇོག་ཆ་ཚང་བོ་རྩེ་ཞོར་དགོད་ཞོར་ཞིག་ལ་རྩ་བ་རྡོ་རྗེའི་གདན་ནས་ཆེས་རྨེག་མེད་དུ་གཏོར་བར་ཐལ། ཁོས་ད་དུང་“དགོངས་པ་མ་ཚོམ་ཨ་”ཟེར། ཨ་མ་མ། ཁོས་བཤད་པ་དེ་དག་ཅི་འདྲའི་གཟུ་བ་ལ། གཟུ་དྲགས་ནས་ཡིད་འགུལ་ཐེབས་པ་ཞིག་རེད། ཁོས་བཤད་པ་དེ་དག་ཅི་འདྲའི་རྣོ་བ་ལ། རྣོ་དྲགས་ནས་ཁས་ལེན་འཆོར་བ་ཞིག་རེད། ཁོས་བཤད་པ་དེ་དག་ཅི་འདྲའི་བདེན་པ་ལ། བདེན་དྲགས་ནས་དབང་མེད་དུ་“བཀའ་དྲིན་ཆེ་དང་ཐུགས་རྗེ་ཆེ་”ཞོར་ལ་འཆོར་བ་ཞིག་རེད་དོ། །
དེ་ནས་བཟུང་ཉི་མ་ནམ་ཁོམ་ལ་ང་དང་གྲོགས་མོ་ཚོས་འཇིགས་མེད་ནོར་བུ་དང་དུས་ཆད་བྱས་ནས། ལྷན་དུ་ཇ་འཐུང་བ་སོགས་སྤྱིར་བཏང་གི་འབྲེལ་བ་ཞིག་རྒྱུན་བསྐྱངས། ཐེངས་ཤིག་ལ་འཇིགས་མེད་ནོར་བུས་མཚན་ཉིད་རིག་པའི་སྐོར་ནས་ཁ་བརྡ་བྱས་པ་ཞིག་སྒྲར་བླངས་ཡོད་པ་མི་ལག་མི་བརྒྱུད་ཀྱིས་དྲ་ལམ་དུ་ཤོར། དེ་ལ་ཁག་བཞག་ནས་ང་དང་ངའི་གྲོགས་མོ་ཚོའི་སློབ་གྲོགས་མང་བོ་དང་ང་ཚོའི་སྤྱི་ཚོགས་ཐོག་གི་ངོ་ཤེས་ཚོས་ཀྱང་འཇིགས་མེད་ནོར་བུ་ངོ་ཤེས་ན་འདོད་ཟེར་བས། ང་ཚོས་མི་དེ་དག་འཇིགས་མེད་ནོར་བུ་ལ་མཚམས་སྦྱོར་བྱས་པ་ཡིན། ཐོག་མར་འཇིགས་མེད་ནོར་བུས་མི་དེ་འདྲ་མང་བོ་དང་ངོ་ཤེས་བཅའ་རྒྱུར་སུན་ཟེར་མོད་ང་དང་ངའི་གྲོགས་མོ་ཚོས་ཡང་ཡང་ངོ་ཆེན་ཞུས་ངོར་མཐར་ཁོས་“ཆོག་གི་”ཟེར་རོ། །
འཇིགས་མེད་ནོར་བུ་དང་ཁ་བརྡ་བྱེད་དུ་ཡོང་མཁན་དེ་ཚོའི་ཁྲོད་དུ་སྤྲུལ་སྐུ། གྲྭ་བ། སློབ་མ། སྤྱི་ཚོགས་ཐོག་གི་མི་སོགས་ཤེས་ཡོན་གྱི་ཆུ་ཚད་མི་འདྲ་བ། ཁོག་རྒྱའི་ཆེ་ཆུང་མི་འདྲ་བ། ཁ་སྟབས་ངག་གདངས་མི་འདྲ་བ་སྟེ་མདོར་བསྡུས་ན་ཆེས་སྣ་མ་སྣ་ཚོགས་ཤིག་རེད།མི་མང་བོ་དང་འཇིགས་མེད་ནོར་བུས་བགྲོ་གླེང་བྱེད་ཐེངས་རེ་རེ་ནི་སྐབས་རེར་གཡུལ་འགྱེད་པ་འདྲ་བོ་རེད། མི་མང་བོས་འཇིགས་མེད་ནོར་བུ་ལ་ཁ་རུབ་ཚིག་རུབ་བྱེད་པ་ནི་ང་དང་གྲོགས་མོ་ཚོའི་ཐོག་མའི་ངང་ཚུལ་དང་འདྲ་ལ། འཇིགས་མེད་ནོར་བུས་མི་ཟད་པའི་སྤོབས་པ་ཆེན་པོ་ཞིག་དང་རྣམ་རིག་བཀྲ་ཐག་ཆོད་པ་ཞིག་གི་ངང་ནས་ཁོ་ཚོ་ཚང་མ་ལན་མེད་པའི་གནས་ལ་བཀོད་ཅིང་འགོད་པ་ནི་རྒྱ་ཚ་གཅིག་པུ་ཧོར་དམག་འབུམ་ཕྲག་གི་གཞི་དཀྱིལ་ལ་བརྒྱུགས་ནས་རྟིང་མ་བླངས་ཏེ་ཕྱིར་གླིང་སྒར་ལ་ལོག་པ་དང་ཡང་འདྲའོ། །ཚུལ་དེ་མཐོང་བས་ང་རང་འཇིགས་མེད་ནོར་བུ་ལ་སྔར་ལས་ཀྱང་དད་པར་གྱུར། སྔར་ལས་ཀྱང་དགའ་བར་གྱུར། དགའ་དད་དེ་ལ་མཐའ་ཞིག་མེད་པར་གྱུར་ཏོ། །ངའི་སེམས་ལ་རང་གི་ལུས་ལོངས་སྤྱོད་དང་མིང་ལ་རྒྱ་ཐམས་ཅད་མི་འདིའི་ལག་ཏུ་འཇོག་པ་ལས་འོས་མེད་པ་ལྟ་བུ་ཞིག་ཏུ་མཐོང་སོང་། ཐ་ན་མི་ཚེ་གང་བོར་ཁོ་ཚང་གི་གཡོག་མོ་ལྟ་བུ་ཞིག་བྱས་ནས་འདུག་དགོས་ནའང་འགྱོད་པ་ཅི་ཡོད་དམ་ལྟ་བུ་བསམས་པར་གྱུར་ཏོ། །
འཇིགས་མེད་ནོར་བུ་ལ་རྩོད་དུ་ཡོང་བ་དེ་ཚོའི་ཁྲོད་ཀྱི་མི་མང་བོ་ཞིག་ཐོག་མར་གཤིས་མི་འཇམ་པ། ཁ་ཕོ་ཆེ་བ། གདུག་རྩུབ་ལྡན་པ་ཤ་སྟག་ཡིན་ཁར། ཁ་གཉེར་སྣ་གཉེར་བྱེད། སྐོར་ལོག་དཀྱོགས་ལོག་བཤད། མངོན་སུམ་ལ་བསྙོན་འདིང་། གནས་ལུགས་ལ་རྡོག་རྫིས་བྱེད། དཔང་རྟགས་ལ་ཅི་མི་སྙམ་པ་སོགས་ཧ་ལམ་ལག་ཐུག་རྒྱུ་མིན་ན་ཐབས་བཀོད་རྙེད་དཀའ་བ་དེ་འདྲ་ཡིན་ནའང་། འཇིགས་མེད་ནོར་བུས་ནི་ཁོ་ཚོ་རེ་རེའི་བསམ་ཚུལ་ལ་རྒྱུས་ལོན་ཚར་བའི་སྒོ་ནས། གདོང་དགའ་ལྷང་ངེ་། མིག་འཛུམ་དྭངས་སེ། ཉམས་སྤྲོ་གསལ་ལེར། རང་ལ་ནོར་བ་དང་འཁྲུལ་བ་ཡོད་ན་ཇི་མ་ཇི་བཞིན་དུ་ཁས་བླངས། གཅིག་གཅིག་གཉིས་གཉིས་སུ་ཡོ་བསྲང་བྱས་ཚར་འཕྲོར། ཆེས་ཤིན་ཏུ་གནད་ལ་ཕོག་པ་དང་། དྲི་བ་ཡོངས་རྫོགས་ཀྱི་མཐའ་ནོན་པ། ཐོས་པ་ཙམ་གྱིས་ར་འཕྲོད་ཅིང་བདེན་ཁོ་ཐག་ཆོད་པའི་ལན་འབའ་ཞིག་བཏབ་ནས་ཡོང་དུས། སེར་སྐྱ་མང་བོ་ཞིག་རང་བཞིན་གྱིས་ཁོའི་སློབ་མ་དང་ཁོའི་གྲོགས་པོ་གྲོགས་མོར་གྱུར་ཏོ། །
སྐབས་ཤིག་ནས་བཟུང་འཇིགས་མེད་ནོར་བུས་ཆང་འཐུང་མགོ་བརྩམས། ཆང་གིས་བཟི་དྲགས་ན་ཁོས་ང་ལ། “བསམ་གཏན་ལྷ་མོ། ཁྱོད་ཞི་མོ་གཞུང་དྲང་བབ་ཆགས་ཤིག་རེད་”ཟེར་ཡོང་། ཚིག་ངོས་ཁོ་ན་ནས་བསྡུར་ན་ནི། ད་ལྟ་འཇིགས་མེད་ནོར་བུའི་ངག་སྒོ་ནས་ཐོན་པའི་“གཞུང་དྲང་བབ་ཆགས་”ཞེས་པ་འདི་སྔར་གཞན་གྱིས་ང་ལ་ལབ་མྱོང་བ་དག་གི་དོ་ཟླ་ག་ལ་ཡིན་ཏེ། རྫོང་དཔོན་གྱི་གཅེས་ཕྲུག་གིས་ང་ལ་ཁྱོད་ནི་“རྨ་ཡུལ་གྱི་ཀོང་ཇོ་”དང་“མི་ཡུལ་གྱི་སྒྲོལ་མ་དཀར་མོ་”རེད་སོགས་ཟེར་མྱོང་། དེ་མིན་ཡང་ངས་ཚིག་དེ་འདྲ་མང་བོ་ཐོས་མྱོང་། ཡིན་ནའང་འཇིགས་མེད་ནོར་བུས་ཆང་ཞོར་ཞིག་ཏུ་ང་ལ། “བསམ་གཏན་ལྷ་མོ། ཁྱོད་ཞི་མོ་གཞུང་དྲང་བབ་ཆགས་ཤིག་རེད་”ཟེར་བ་གོ་དུས། ང་ལ་སྲོག་གསར་བ་ཐོབ་འདྲའི་དགའ་སྤྲོ་ཚད་མེད་ཅིག་སྐྱེས་སོ། །དེ་ལྟར་ཁོའི་“གཞུང་དྲང་བབ་ཆགས་”ཞེས་པའི་ཚིག་དེས་སྐད་ཅིག་ཙམ་ལ་ང་རང་ཁོའི་དགའ་རོགས་སུ་བསྒྱུར། ཡང་ཁོའི་ཚིག་དེ་དང་འདྲ་བའི་ཚིག་གཞན་ཞིག་གིས་སྐད་ཅིག་ཙམ་ལ་ང་རང་ཁོའི་ཆུང་མར་བསྒྱུར། འགོར་གྱིན་འགོར་གྱིན་ཁོས་ཁ་གསལ་ནས་མ་བཤད་ཀྱང་ཁོའི་རྣམ་འགྱུར་ཕྲ་མོ་ཙམ་གྱིས་ཀྱང་ངས་རུང་མི་རུང་གི་གནང་བཀག་ཆ་ཚང་ཧ་གོ་ཞིང་། ནོར་འཆུག་ཕྲ་མོ་ཙམ་ཡང་མེད་པར་ལག་ལེན་དུ་འདེབས་ཐུབ་པ་ཞིག་བྱུང་ངོ་། །འཇིགས་མེད་ནོར་བུ་ཚང་གི་རྨོ་མོ་ནད་ཀྱིས་མནར་བས་ངས་ལོ་ཧྲིལ་བོ་བདུན་ལ་གཉོར་བ་ཡིན། ཁ་ཟས་ལས་པ། གཅིན་སྐྱག་ལེན་པ། ཉལ་ས་འགེལ་གཡོགས་སོགས་དུས་ཚོད་གཅིག་ལའང་མ་ཆག་པར་བྱས། དེའི་རྐྱེན་གྱིས་འཇིགས་མེད་ནོར་བུའི་ཨ་ཕ་སྟེ་ངའི་ཨ་མྱེས་ཀྱིས་ཀྱང་ང་ལ་བསྟོད་བསྔགས་ཚད་མེད་བྱས་མོད་ཀྱང་། ཉིན་ཞིག་འཇིགས་མེད་ནོར་བུས་“བསམ་གཏན་ལྷ་མོ། བཀའ་དྲིན་ཆེ་ཨ་”ཟེར། ཁོའི་ཚིག་དེས་ཅུང་མིན་ན་ངའི་མིག་ཆུ་འཆོར་དུ་བཅུག་སོང་། གང་ལྟར་ངའི་ཡིད་ཡོངས་སུ་ཚིམས་སོང་། ངའི་མཁོ་ཡོངས་སུ་སོད་སོང་།
འཇིགས་མེད་ནོར་བུ་ཆང་གིས་བཟི་དྲགས་ནས་ཐེངས་མང་བོར་ང་ལ་གཤེ་གཤེ་དྲག་པོ་བཏང་མྱོང་། གཅར་རྡུང་སྐོར་གསུམ་ཡང་བྱས་མྱོང་། ཁ་ཁྲག་སྣ་ཁྲག་ཀྱང་བསྐོལ་མྱོང་། ཡིན་ནའང་དེ་ནི་ཁོའི་ཁམས་མ་དྭངས་པས་རེད། སེམས་མ་སྐྱིད་པས་ཀྱང་རེད། སྤྱི་ཚོགས་ཐོག་གི་གནོན་ཤུགས་ཀྱིས་ཀྱང་ཡིན་ན་ཐང་། དེའི་རྐྱེན་གྱིས་ངས་ཁོ་ལ་ནམ་ཡང་ལེ་བདའ་བྱེད་མི་སྲིད་དོ། །ཁོ་སྐབས་རེར་ཆང་གིས་བཟི་དྲགས་ན་ཁྱིམ་གྱི་ཅ་ལག་ཀྱང་གཅོག སྒོ་ལ་རྡོག་ཐོས་ཀྱང་གཞུ། ནམ་གུང་ཆུ་ཚོད་གསུམ་པ་ཡིན་ཡང་ཟ་མ་ད་ལས་ཟེར་ན་ལས་དགོས་ལ། འོ་ཇ་ད་སྐོལ་ཟེར་ན་བསྐོལ་དགོས་པ་ཡིན། ཡིན་ནའང་ཁོའི་ཆེད་དུ་ངས་སྡུག་ཅུང་ཟད་རིག་པ་དང་བློས་ཅུང་ཟད་བཏང་བ་དེས་ངའི་སེམས་ཁ་བདེ་ཞིང་བློ་ཡུལ་སྐྱིད་ཀྱི་ཡོད་དོ། །ཡུལ་མི་ལ་ལས།ང་ལ་“བསམ་ཁོ། ཁྱོད་བུ་མོ་ལས་ངན་ཞིག་རེད་”ཟེར། ཡང་ཡུལ་མི་ལ་ལས་ང་ལ་“བསམ་གཏན་ལྷ་མོ། ཁྱོད་ཆུང་དུས་རྣམ་རིག་བཀྲ་ཞིང་ཁོག་དཔུང་ལ་རྒྱ་ཅན་དཔེ་མེད་ཅིག་ཡིན་མོད། ད་ཅི་རེད། ཁྱོད་གླེན་མ་ཞིག་ཆགས་འདུག་”ཟེར་བར་ཐལ། གཅིག་བྱས་ན་ཁོ་ཚོས་བཤད་པ་བདེན་ཡང་སྲིད་མོད། འོན་ཀྱང་ཁོའི་ཆེད་དུ་ངས་ཁོག་དཔུང་དང་ལ་རྒྱ། ངོ་ཚ་ཟེར་བ་ཆ་ཚང་ཕར་ལ་འཕེན་ཐུབ། ང་རང་འཇིགས་མེད་ནོར་བུ་ལ་གཉེན་སྒྲིག་བྱས་རྗེས་སྤྱིར་བཏང་ཕ་ཡུལ་དུ་སོང་མ་མྱོང་སྟེ། སོང་ཐེངས་རེ་རེར་ཡུལ་མི་ཚོས་ཟས་ཀ་ར་བུ་རམ་གྱིས་སྡེར་ཁ་བསྒྲིགས་ནས། “ལོ་ལོ་ཁྱོད་སྡོད་གདའ། ལོ་ལོ་ཁྱོད་ཀྱི་ཟོ་གདའ་”ཞེས་འཁྱེར་ས་འཇོག་ས་མི་རྙེད་པའི་ཚད་དུ་བྱེད། ཡིན་ནའང་ངས་ཉིན་གཉིས་གསུམ་ཙམ་ལ་འཇིགས་མེད་ནོར་བུ་མ་རིག་ཀྱང་ཁོ་རང་དྲན་ནས་ཡེ་མི་བཟོད་དོ། །ངའི་སེམས་ཤིག་ལ་ང་མེད་ན་ཁོ་ལ་ཁ་སྐོལ་སུས་བྱེད། ཁོའི་གོན་པ་སུས་བཀྲུ། ཁོ་ལ་རྟ་ལག་ཡས་དང་སྟན་ལག་ཡས་སུས་བྱེད་འདོད་ནས་འདུག་བཟོད་མེད་པ་ཞིག་རེད་ཡ། ངའི་རྣམ་ཤེས་ལ་ཐག་པ་བརྒྱབ་ནས་སུ་ཞིག་གིས་རྒྱབ་ལ་འཐེན་བཞིན་ཡོད་པ་འདྲ་བོ་ཞིག་རེད་ཡ། ན་མཉམ་བུ་མོ་ལ་ལས་“བསམ་གཏན་ལྷ་མོ། ཁྱོད་ཕྱིར་ལ་དེ་འདྲ་བྲེལ་ནས་ཅི་བྱེད། འཇིགས་མེད་ནོར་བུ་ཁྱོད་གཉིས་ཀྱིས་དགོང་རྒྱུན་ལ་ལས་པ་ཡིན་ནམ་”ཞེས་ཀུ་རེ་བརྩེས། དོན་གྱིས་དེ་འདྲ་ཞིག་མ་རེད། འཇིགས་མེད་ནོར་བུ་ཁོ་རང་རུ་ཉུལ་སར་ཐོན་ན་རུ་ཉུལ་རྒྱུ་རེད། ཟླ་བ་ཆ་རེར་ཕྱིར་མི་ཡོང་དུས་ཀྱང་ཡོད། དེ་དུས་ཀྱང་ངས་ཁོ་རང་དྲན་ནི་དྲན་མོད། ཁོའི་བྱ་བར་བར་ཆད་བྱས་ཨེ་འགྲོར་དོགས་ནས་ཅང་ལབ་མ་མྱོང་། ཁོས་དཔེ་ཆར་བལྟ་འདོད་དུས་དཔེ་མཚམས་ལྟ་བུར་འདུག་རྒྱུ་རེད། བདུན་ཕྲག་འགའ་རེར་ཁང་བ་ཞིག་ཏུ་འཛུལ་ནས་སྒོར་མི་ཡོང་། ཡིན་ནའང་ངས་ཉི་ཟླ་དཔང་ལ་བཞག་སྟེ་མནའ་སྐྱེལ་ཐུབ་པ་ཞིག་ནི་འཇིགས་མེད་ནོར་བུའི་ཕན་ནས་ངས་སྐྱེས་པ་ཞིག་གི་ངོར་བལྟས་མ་མྱོང་ངོ་། །བལྟ་འདོད་ཀྱི་ཡི་ག་ཡང་དངོས་གནས་མ་མཆིས་སོ། །
ལར་ངའི་སྐྲ་དཀར་གྱི་ཕ་མ་གཉིས་ཀ་ཕ་ཡུལ་ན་ཡོད་ཙང་། ངས་ཀྱང་ཕ་ཡུལ་དྲན་སྐབས་ལོས་ཡོད་ཡ། ང་རང་ཕ་ཡུལ་དང་ཕུ་ནུར་དུངས་པ་མེད་པའང་དཔེ་ཅི་ལ་སྲིད་དེ་གཏན་ནས་མི་སྲིད་མོད། ང་རང་འཇིགས་མེད་ནོར་བུའི་མི་དང་ཁྱི་ཡིན་པས་ཚེ་འདིར་ཁོ་དང་ཁ་འབྲལ་ཐབས་མེད་དོ། །
འཇིགས་མེད་ནོར་བུ་ལ་ཟུར་མོ་མཛེས་མ་ཡང་མང་བོ་ཡོད་མོད། དེ་དག་ནི་ཁོའི་ཏབ་ཅིག་གི་རྩེད་རོགས་དགོད་རོགས་ཙམ་ལས་གཞན་ཅི་ཡང་མིན། དེ་ཅིའི་ཕྱིར་ཞེ་ན། ཁོའི་བློ་ཁོག་ཏུ་དཔེ་ཆ་འགའ་རེའི་ནང་དོན་ཡོད་པ་ཙམ་མ་ཡིན་པར་སྤྱི་ཚོགས་ཀྱི་གནད་དོན་ཆེ་ཕྲ། འཁོར་བ་འདིའི་སྐྱིད་སྡུག་སྣ་ཚོགས། མི་ཡུལ་གྱི་འཕྲལ་ཕུགས་ཆ་ཚང་འཁོར་ཡོད་པས་ན། ཁོས་འཆི་བདག་གཤིན་རྗེ་ཐོན་པ་མིན་ན་ང་དང་བུ་མོ་གཉིས་གཏན་ནས་བསྐྱུར་མི་སྲིད་དོ། །ངས་འདི་ལྟར་བཤད་ན་ལ་ལས་དེས་ན་ཁྱོད་ནི་འཇིགས་མེད་ནོར་བུའི་ཇ་མ་དང་གཡོག་མོ་ཙམ་རེད་ཀྱང་ཟེར་ལོས་ཆེ་མོད། ང་རང་ཁོའི་ཇ་མ་ཙམ་ཡིན་པས་ཀྱང་ངའི་འདོད་པ་རྫོགས་ནས་ཡོད་དོ་ཟེར་འདོད། སྔར་འཇིགས་མེད་ནོར་བུས་ང་ལ་གཅར་རྡུང་བཏང་དུས་ཤིག་ལ་ངའི་གྲོགས་མོ་ཞིག་གིས་ངར་“འུ་གཉིས་ཀྱིས་འཇིགས་མེད་ནོར་བུ་མི་དམངས་ཁྲིམས་ཁང་ལ་གཏུག་ཡ་”ཟེར་རོ། ། “འཇིགས་མེད་ནོར་བུ་ཁྲིམས་ལ་ཐོགས་པ་ལས་ང་རང་ཉིད་ཁྲིམས་ལ་ཐོགས་ན་ང་དགའོ། །ངའི་ཚེ་འདིའི་སྐྲ་བདག་དང་སྲོག་བདག་ཆ་ཚང་འཇིགས་མེད་ནོར་བུ་ཁོ་ན་ཡིན་པས། ཁོས་ནམ་ཞིག་ང་ལ་ཁྱོད་རང་འཆི་དགོས་ཟེར་ནའང་ང་འཆི་ངེས་ཡིན།” ངས་མོ་ལ་དེ་ལྟར་ལབ་སྟེ་ཉིན་དེ་ནས་བཟུང་མོ་དང་འབྲེལ་ཐག་བཅད་པ་ཡིན་ནོ། །
ཡང་སྐབས་རེར་འཇིགས་མེད་ནོར་བུ་རྒྱུ་མེད་རྐྱེན་མེད་དུ་ཕྲུ་གུ་ངུ་བ་བཞིན་དུ་ངུ་བ་དང་། ང་ལ་བལྟས་ནས་“བསམ་གཏན་ལྷ་མོ། ངའི་གམ་དུ་ཁྱོད་ལ་སྐྱིད་ཅིག་ངོ་མ་མི་འདུག་ཡ། ད་ཁྱོད་ཕྱིར་རང་གི་ཕ་ཡུལ་ལ་སོང་”ཡང་ཟེར་ལ། ཡང་“ངས་ཁྱོད་ལ་གཤེ་གཤེ་བཏང་བ་དང་གཅར་རྡུང་བྱས་པ་ནི་ངའི་ནོར་འཁྲུལ་ཆེན་པོ་རེད་”ཅེས་སེམས་གཏམ་མང་བོ་མང་བོ་བརྗོད་བྱུང་། ངས་ཁོ་ལ་“ངའི་ལུས་ངག་ཡིད་གསུམ་པོ་ཁྱོད་ཀྱི་ཡིན་པས་ཁྱོད་ཀྱིས་ཅི་བྱས་ཀྱང་ངའི་སེམས་ལ་ཅི་
ཡང་མི་ཕོག་ལ་ཅི་ཡང་མི་གནོད་དོ། །ཁྱོད་ཡོད་པས་ང་ལ་མ་འདང་བ་གཅིག་ཀྱང་མེད་ལྷ་དཔང་”ཞེས་མིག་ཆུ་བཞུར་ཞོར་ཞུ་བ་བྱས་པ་ཡིན།
ད་ལྟ་ངའི་སྙིང་གི་ནོར་བུ་སྟེ་འཇིགས་མེད་ནོར་བུ་ཅུང་ཟད་རྒས་བཞིན་ཡང་འདུག་སྟེ། ངོ་ཇེ་ནག་ཏུ་གྱུར། ཁ་སྤུ་ཇེ་མང་ལ་སོང་། སྐྲ་ལ་སེ་མདའ་ལྷུང་། གཟུགས་གཞི་སྒུར་བ་སོགས་སོ། །ཡིན་ནའང་རིན་པོ་ཆེ་བྱུ་རུ་ནི་ཟད་ཀྱིན་ཟད་ཀྱིན་ཇེ་མཛེས་ཡིན་པ་ནང་བཞིན། བློ་ཞིབ་མོས་དཔྱད་ན་ཁོ་རང་ལ་བརྟན་བརླིང་བརྗིད་གསུམ་ཇེ་ལྡན་རེད། ཁོ་རང་གི་ཉམས་དང་ཕོ་ཚོད་ཇེ་མཐོ་རེད། ཁོ་རང་ལ་གདེང་དང་སྤོབས་པ་ཇེ་ཡོད་རེད་ལ། ཁོའི་རྣམ་འགྱུར་དང་ཉམས་འགྱུར་ལས་ངས་“སྨིན་ཐག་ཆོད་པའི་སྐྱེས་པ་ཕོ་”ཞེས་པ་དེ་ཡོངས་སུ་རྫོགས་པར་རྙེད་ཟིན་ལགས། ཁོའི་སྤྱིར་བཏང་གི་ཤ་ཁྲག་གདོས་བཅས་ཀྱི་ཕུང་བོ་དེ་ཉིད་བུ་མོ་ང་ལ་མཚོན་ན་‘ཕུན་ཚོགས་དགེ་ལེགས་བྱེ་བས་བསྐྲུན་པའི་སྐུ་’ཞིག་རེད། ཁོའི་སྤྱིར་བཏང་གི་ཁ་ངག་དང་ཁ་སྟབས་དེ་ཡང་མོ་དམན་ང་ལ་མཚོན་ན་‘མཐའ་ཡས་འགྲོ་བའི་རེ་བ་སྐོང་བའི་གསུང་’ཞིག་རེད། ཁོའི་སྤྱིར་བཏང་གི་འཆར་སྒོ་དང་དྲན་ཚུལ་དག་ཀྱང་ནག་ཆགས་ང་ལ་མཚོན་ན་‘མ་ལུས་ཤེས་བྱ་ཇི་བཞིན་གཟིགས་པའི་ ཐུགས་’ཤིག་རེད་དོ། །
ལྟོས་དང་། དོ་ནུབ་ཀྱང་འཇིག་རྟེན་འདིའི་ལྷོ་སྤྲིན་བྱང་དུ་མྱུར་མྱུར་འགྲོ་ཞིང་ཤར་སྤྲིན་ནུབ་ཏུ་བྲེལ་བྲེལ་རྒྱུགས་པའི་མཚན་མོ་ཞིག་རེད་ཨང་། འཇིགས་མེད་ནོར་བུ་དང་ངེད་གཉིས་ཀྱི་བུ་མོས་ཀྱང་སྒེའུ་ཁུང་ལས་ཡར་ནམ་མཁའ་ལ་བལྟས་ནས་ཅུང་ཟད་དགོད་པར་བྱེད་ཅིང་། དེ་ནས་“ཨ་མ། ཨ་ཕ་གང་ལ་བུད་ཐལ་”ཟེར་རོ། །
༢༠༡༧།༩།༡༢
