སྙན་ངག་མེ་ལོང་།
རྒྱ་གར་སྐད་དུ། ཀཱབྱཱརྡཤ།
བོད་སྐད་དུ། སྙན་ངག་མེ་ལོང་།
ངག་གི་དབང་ཕྱུག་ལྷ་མོ་དབྱངས་ཅན་མ་ལ་ཕྱག་འཚལ་ལོ། །
ལེའུ་དང་བོ།
གདོང་བཞི་གདོང་གི་པད་ཚལ་གྱི། །ངང་བའི་བུ་མོ་ཐམས་ཅད་དཀར། །
དབྱངས་ཅན་མ་ནི་ཁོ་བོ་ཡི། །ཡིད་ལ་རིང་དུ་གནས་པར་མཛོད། ༡ །
བསྟན་བཅོས་སྔ་མ་རྣམས་བསྡུས་ཤིང་། །སྦྱོར་བ་རྣམས་ཀྱང་ཉེར་མཚོན་ཏེ། །
ཇི་ལྟར་ནུས་བཞིན་བདག་གིས་ནི། །སྙན་ངག་དག་གི་མཚན་ཉིད་བྱ། ༢ །
འདི་ན་ཀུན་ཏུ་མཆོག་རྣམས་ཀྱི། །རྗེས་སུ་བསྟན་དང་ལྷག་མའི་ཡང་། །
ཚིག་རྣམས་ཉིད་ཀྱི་དྲིན་གྱིས་ནི། །འཇིག་རྟེན་ལུགས་ལ་འཇུག་པར་བྱེད། ༣ །
གལ་ཏེ་སྒྲར་བོད་སྣང་བ་ཡིས། །འཁོར་བ་གསལ་བར་མ་བྱས་ན། །
འཇིག་རྟེན་གསུམ་པོ་མཐའ་དག་འདི། །སྨག་རུམ་མུན་པ་ཉིད་དུ་འགྱུར། ༤ །
སྔོན་གྱི་རྒྱལ་བོ་གྲགས་པའི་གཟུགས། །ངག་གི་རང་བཞིན་མེ་ལོང་ཐོབ། །
དེ་དག་ཉེ་བར་མི་གནས་ཀྱང་། །རང་ཉིད་ཉམས་པ་མེད་ལ་ལྟོས། ༥ །
མཁས་པས་ཡང་དག་རབ་སྦྱར་བའི། །ངག་ནི་འདོད་འཇོའི་བ་རུ་བཤད། །
དེ་ཉིད་ཉེས་པར་སྦྱར་ན་སླར། །སྦྱོར་བོ་བ་ལང་ཉིད་རྗོད་བྱེད། ༦ །
དེ་ཕྱིར་སྙན་དངགས་དག་ལ་སྐྱོན། །ཆུང་བར་གྱུར་ཀྱང་ཅི་ཞིག་ལྟར། །
བཏང་སྙོམས་མི་བྱ་ལུས་མཛེས་ཀྱང་། །ཤ་བཀྲ་གཅིག་གིས་སྐལ་ངན་འགྱུར། ༧ །
སྐྱེ་བོ་བསྟན་བཅོས་མི་ཤེས་པས། །ཡོན་ཏན་སྐྱོན་དག་ཇི་ལྟར་དབྱེ། །
གཟུགས་ཀྱི་དབྱེ་བ་དམིགས་པའི་སྐབས། །ལོང་བ་དག་ལ་ཡོད་དམ་ཅི། ༨ །
དེ་ཕྱིར་མཁས་པས་སྐྱེ་དགུ་རྣམས། །བྱེ་བྲག་རྟོགས་ལ་མངོན་དགོངས་ནས། །
རྣམ་བཀྲ་ལམ་ལྡན་ཚིག་རྣམས་ཀྱི། །བྱ་བའི་ཆོ་ག་ངེས་པར་སྦྱར། ༩ །
དེ་དག་གིས་ནི་སྙན་ངག་གི །ལུས་དང་རྒྱན་ཡང་རབ་ཏུ་བསྟན། །
ལུས་ནི་རེ་ཞིག་འདོད་པ་ཡི། །དོན་གྱི་རྣམ་བཅད་ཚིག་གི་ཕྲེང་། ༡༠ །
དེ་ཡང་ཚིགས་བཅད་ལྷུག་པ་དང་། །སྤེལ་མ་རྣམ་གསུམ་ཉིད་དུ་གནས། །
ཚིགས་བཅད་རྐང་བཞི་བ་དེ་ཡང་། །འཇུག་དང་རིགས་ཞེས་རྣམ་པ་གཉིས། ༡༡ །
དེ་ཡི་སྤྲོས་པ་མཐའ་དག་ནི། །སྡེབ་སྦྱོར་གཞུང་དུ་ངེས་པར་བསྟན ། །
རིག་དེ་སྙན་ངག་རྒྱ་མཚོ་ནི། །ཟབ་མོ་རྒལ་འདོད་རྣམས་ཀྱི་གྲུ། ༡༢ །
གྲོལ་བ་དང་ནི་རིགས་དང་མཛོད། །འདུས་པ་ཞེས་བྱ་དེ་འདྲ་ཡི། །
ཚིགས་བཅད་རྒྱ་ཆེ་ལེ་ཡིས་བཅིངས། །ཆ་ཤས་རང་བཞིན་ཕྱིར་མ་བརྗོད། ༡༣ །
ལེ་ཡིས་བཅིངས་པ་སྙན་དངགས་ཆེ། །དེ་ཡི་མཚན་ཉིད་བརྗོད་པར་བྱ། །
ཤིས་བརྗོད་ཕྱག་བྱ་དངོས་པོ་ནི། །ངེས་པར་བསྟན་པའང་དེ་ཡི་སྒོ། ༡༤ །
སྔོན་བྱུང་གཏམ་ལས་གྱུར་བའམ། །ཅིག་ཤོས་ལེགས་པ་ལ་བརྟེན་པ། །
སྡེ་བཞི་འབྲས་བུའི་དབང་གྱུར་དང་། །མཁས་ཤིང་རྒྱ་ཆེའི་འདྲེན་པ་ཅན། ༡༥ །
གྲོང་ཁྱེར་རྒྱ་མཚོ་རི་དང་དུས། །ཉི་ཟླ་འཆར་བའི་བསྔགས་པ་དང་། །
སྐྱེད་ཚལ་ཆུ་ཡི་རོལ་རྩེད་དང་། །ཆང་འཐུང་དགའ་བའི་དགའ་སྟོན་དང་། ༡༦ །
བསླུ་བ་དང་ནི་བག་མ་དང་། །གཞོན་ནུ་སྐྱེ་བ་བསྔགས་པ་དང་། །
བློན་དང་ཕོ་ཉ་བགྲོད་པ་དང་། །གཡུལ་དང་འདྲེན་པ་དར་བས་ཀྱང་། ༡༧ །
བརྒྱན་པར་གྱུར་ཅིང་མདོར་བསྡུས་མིན། །ཉམས་དང་འགྱུར་བ་དག་གིས་གཏམས། །
ལེ་ཡིས་ཤིན་ཏུ་རྒྱ་ཆེ་མིན། །མཉན་འོས་འཇུག་པས་ལེགས་མཚམས་སྦྱར། ༡༨ །
ཀུན་ཏུ་ལེ་ཚན་དག་གི་མཐའ། །ཐ་དད་ལྡན་པས་འཇིག་རྟེན་མཛེས། །
སྙན་ངག་དམ་པའི་རྒྱན་ལྡན་ནི། །བསྐལ་བའི་བར་དུ་གནས་པར་འགྱུར། ༡༩ །
གང་ཞིག་ཡན་ལག་འགས་དམན་ཡང་། །གལ་ཏེ་སྦྱར་རྣམས་ཕུན་ཚོགས་ཀྱིས། །
དེ་རིག་མགུ་བར་བྱེད་པ་ན། །འདིར་ནི་སྙན་ངག་སྐྱོན་མ་ཡིན། ༢༠ །
ཐོག་མར་འདྲེན་པ་ཡོན་ཏན་གྱིས། །ཉེ་བར་བཀོད་ནས་དེ་ཡིས་ནི། །
དགྲ་ལ་གནོད་པ་བྱེད་ཅེས་པའི། །ལམ་འདི་རང་བཞིན་མཛེས་པ་ཡིན། ༢༡ །
རིགས་དང་བརྩོན་འགྲུས་ཐོས་སོགས་ཀྱིས། །དགྲ་བོ་དག་ལ་ཡང་བསྔགས་བྱས་ནས། །
དེ་ལས་རྒྱལ་ཕྱིར་འདྲེན་པ་ནི། །ཁྱད་འཕགས་བརྗོད་པའང་བདག་དགའ་སྐྱེད། ༢༢ །
རྐང་བ་མེད་པའི་ཚིག་རྒྱུན་ནི། །ལྷུག་པའོ་བརྗོད་པ་དག་དང་གཏམ། །
ཞེས་པ་དེ་ཡི་རབ་དབྱེ་གཉིས། །དེ་ལ་འདྲེན་པ་ཉིད་ཀྱིས་ནི། ༢༣ །
བརྗོད་པར་བྱ་བ་བརྗོད་པ་ལོ། །གཞན་ནི་འདྲེན་པའམ་གཞན་གྱིས་ཀྱང་། །
རང་གི་ཡོན་ཏན་བསྒྲགས་སྐྱོན་འདིར། །ཡང་དག་དོན་བསྔགས་ཕྱིར་ཡོད་མིན། ༢༤ །
འོན་ཀྱང་ངེས་པ་མ་མཐོང་སྟེ། །དེར་ཡང་གཞན་གྱིས་བརྗོད་པའི་ཕྱིར། །
གཞན་གྱིས་བརྗོད་དམ་རང་གིས་ཞེས། །དབྱེ་བའི་རྒྱུ་ནི་ཅི་འདྲ་ཞིག ༢༥ །
གལ་ཏེ་སྒོ་དང་གཞན་སྒོ་དང་། །དབུགས་མཚམས་བཅས་ཉིད་བརྗོད་པ་ཡི། །
ཐ་དད་པ་ཡི་རྟགས་ཡིན་ན། །ཞར་གྱིས་གཏམ་རྣམས་དག་ལ་ཡང་། ༢༦ །
འཕགས་མ་སོགས་བཞིན་སྒོ་དང་ནི། །གཞན་གྱི་སྒོ་དག་ཅིས་མི་འཇུག །
ལམྦྷ་སོགས་སམ་ཨཱ་ཤྭཱ་སའི། །དབྱེ་བ་མཐོང་ཡང་དེ་ལས་ཅི། ༢༧ །
དེ་ཕྱིར་གཏམ་དང་བརྗོད་པ་ཞེས། །མིང་གཉིས་དག་གིས་རིགས་གཅིག་མཚོན། །
ལྷག་མ་བརྗོད་པའི་རིགས་རྣམས་ཀྱང་། །འདི་ཉིད་ནང་དུ་འདུས་པར་འགྱུར། ༢༨ །
བུ་མོ་འཕྲོག་དང་གཡུལ་དང་ནི། །བསླུ་བ་དར་བ་ལ་སོགས་པ། །
ལེ་ཡིས་བཅིངས་པ་མཚུངས་པ་ཉིད། །དེ་དག་ཁྱད་བྱེད་ཡོན་ཏན་མིན། ༢༩ །
སྙན་ངག་མཁན་གྱིས་བསམ་བྱས་རྟགས། །གཞན་དུ་ཡང་ནི་སྐྱོན་མི་འགྱུར། །
འདོད་དོན་སྒྲུབ་ལ་སྒོ་རུ་ནི། །མཁས་པ་རྣམས་ལ་ཅིས་མི་འགྱུར། ༣༠ །
སྤེལ་མ་ཟློས་གར་ལ་སོགས་ཏེ། །དེ་དག་རྣམས་ནི་གཞན་ན་རྒྱས། །
ལྷུག་པ་ཚིགས་བཅད་རང་བཞིན་གང་། །བསྲེས་མ་ཞེས་པར་མངོན་པར་བརྗོད། ༣༡ །
ངག་གི་རང་བཞིན་དེ་དག་ཀྱང་། །ལེགས་སྦྱར་དེ་བཞིན་རང་བཞིན་དང་། །
ཟུར་ཆག་འདྲེས་མ་ཞེས་པ་སྟེ། །རྣམ་པ་བཞི་རུ་མཁས་པས་གསུངས། ༣༢ །
ལེགས་སྦྱར་ཞེས་བྱ་ལྷ་ཡི་ནི། །སྐད་དུ་དྲང་སྲོང་ཆེན་པོས་གསུངས། །
དེ་སྐྱེས་དེ་མཚུངས་ཡུལ་ཅན་ཞེས། །དུ་མ་རང་བཞིན་དག་གི་རིམ། ༣༣ །
ཡུལ་འཁོར་ཆེན་པོ་ལ་བརྟེན་སྐད། །ལེགས་བརྗོད་རིན་ཆེན་དག་གི་མཚོ། །
ཟམ་པས་བཅིངས་སོགས་རང་བཞིན་གང་། །རང་བཞིན་མཆོག་ཏུ་གྱུར་བར་རིག ༣༤ །
དཔའ་བོའི་སྡེ་དང་ཤར་བ་དང་། །ལཱ་ཊ་གཞན་ཡང་དེ་འདྲ་ཡི། །
སྐད་ནི་རང་བཞིན་ཉིད་ཅེས་བྱའི། །ཐ་སྙད་རྣམས་ལ་ཉེ་བར་འགྱུར། ༣༥ །
བ་ལང་རྫི་ལ་སོགས་པའི་ཚིག །སྙན་ངག་རྣམས་ལ་ཟུར་ཆག་འདོད། །
བསྟན་བཅོས་རྣམས་ལ་ལེགས་སྦྱར་ལས། །གཞན་པ་ཟུར་ཆག་ཉིད་དུ་བརྗོད། ༣༦ །
ལེགས་སྦྱར་ལེ་ཡིས་བཅིངས་ལ་སོགས། །རང་བཞིན་ཕུང་བོ་ཅན་སོགས་གང་། །
ཟུར་ཆག་ཨོ་ས་ར་སོགས་ཏེ། །ཟློས་གར་ལ་སོགས་འདྲེས་པ་འོ། ༣༧ །
གཏམ་སོགས་སྐད་རྣམས་ཐམས་ཅད་དང་། །ལེགས་སྦྱར་གྱིས་ཀྱང་བཅིངས་པ་སྟེ། །
རྨད་བྱུང་དོན་ཅན་རྒྱ་ཆེའི་གཏམ། །འབྱུང་བོའི་སྐད་ཀྱི་རང་བཞིན་བརྗོད། ༣༨ །
སྒེག་དང་རོལ་དང་སྟབས་ལ་སོགས། །ལྟ་བའི་དོན་ཡིན་ཅིག་ཤོས་ཀྱང་། །
མཉན་པར་བྱ་བ་ཉིད་ཅེས་པ། །འདི་ཡང་ལུགས་གཉིས་དག་ཏུ་བརྗོད། ༣༩ །
ཕན་ཚུན་དབྱེ་བ་ཕྲ་མོ་ཅན། །ཚིག་གི་ལམ་ནི་དུ་མ་ཡོད། །
དེ་ལ་ལྷོ་ཕྱོགས་པ་དང་ནི། །ཤར་བའི་ཁྱད་པར་གསལ་བར་བརྗོད། ༤༠ །
སྦྱར་བ་རབ་དྭངས་མཉམ་ཉིད་དང་། །སྙན་དང་ཤིན་ཏུ་གཞོན་པ་དང་། །
དོན་གསལ་བ་དང་རྒྱ་ཆེ་ཉིད། །བརྗིད་དང་མཛེས་དང་ཏིང་ངེ་འཛིན། ༤༡ །
ཡོན་ཏན་འདི་བཅུ་ལྷོ་ཕྱོགས་པའི། །ལམ་གྱི་སྲོག་ཏུ་བཤད་པ་ཡིན། །
འདི་དག་ཕལ་ཆེར་ལྡོག་པ་ནི། །ཤར་བའི་ལམ་དག་མཚོན་པ་ཡིན། ༤༢ །
སྦྱར་བ་སྲོག་ཆུང་ཡི་གེ་མཆོག །ལྷོད་པ་ཉིད་ཀྱིས་མ་རེག་པའོ། །
ལྷོད་པ་མཱ་ལ་ཏཱི་མཱ་ལཱ། །ལོ་ལཱ་ལི་ཀ་ལི་ལཱ་བཞིན། ༤༣ །
ཤར་ཕྱོགས་པ་ཡིས་རྗེས་ཁྲིད་བློས། །དེ་འདོད་མཱ་ལ་ཏཱི་དཱ་མ། །
ལཾ་གྷི་ཏཾ་བྷྲ་མ་རཻཿ ཞེས། །ལྷོ་ཕྱོགས་པ་ཡིས་སྦྱོར་ལྕི་བྱེད། ༤༤ །
རབ་དྭངས་ལྡན་པ་གྲགས་དོན་ཅན། །ཟླ་བའི་མཚན་མ་ཨུཏྤལ་གྱི། །
འོད་ཀྱིས་མཛེས་པ་རྒྱས་ཞེས་པ། །རྟོགས་པའི་སྐལ་བཟང་ལྡན་པའི་ཚིག ༤༥ །
ངེས་ཚིག་ཡོད་ཕྱིར་ཤར་ཕྱོགས་པ། །ཤིན་ཏུ་གྲགས་པ་མིན་ཡང་འདོད། །
ཤིན་ཏུ་དཀར་མིན་ཆུ་ལས་སྐྱེས། །དེ་འདྲས་མཚན་པ་འོད་དཀར་ཅན། ༤༦ །
མཉམ་པ་སྦྱོར་བ་མི་མཉམ་བྲལ། །དེ་ནི་འཇམ་རྩུབ་བར་མ་སྟེ། །
སྦྱོར་བ་འཇམ་རྩུབ་བར་མ་ཡི། །ཡི་གེ་བཀོད་པའི་སྐྱེ་གནས་ཅན། ༤༧ །
ཁུ་བྱུག་ཅ་ཅོ་སྒྲོག་བྱེད་ཅིང་། །ཉར་མ་རབ་འཐོར་དྭངས་ཤིང་དྭངས། །
ཆུ་རྒྱུན་ཆུ་ཐིགས་ཀྱིས་བྲན་པའི། །མ་ལ་ཡ་རླུང་བདག་ལ་འོང་། ༤༨ །
ཙན་དན་གྱིས་བསྒོས་དྲི་ལྡང་ཞིང་། །འཇམ་པ་མ་ལ་ཡ་ཡི་རླུང་། །
བདག་གི་བརྟན་འགོག་དགའ་མ་ནི། །མཆོག་གི་ཁ་ཡི་རླུང་དང་འགྲན། ༤༩ །
ཞེས་པ་མི་མཉམ་མ་བརྟགས་པར། །དོན་གྱི་རྒྱན་དང་ཚོགས་དག་ལ། །
ལྟོས་ནས་ཤར་ཕྱོགས་པ་དག་ལ། །སྙན་ངག་ལམ་ནི་བྱུང་བར་གྱུར། ༥༠ །
སྙན་པ་ཉམས་ལྡན་ཚིག་དང་ནི། །དངོས་པོ་ལ་ཡང་ཉམས་གནས་པ། །
སྦྲང་རྩི་སྤྱོད་པ་སྦྲང་རྩིས་བཞིན། །གང་གིས་བློ་ལྡན་དགའ་བྱེད་པའོ། ༥༡ །
སྒྲ་ནི་གང་དང་ཅི་ཡིས་ཀྱང་། །གང་ཞིག་མཚུངས་པར་ཉམས་མྱོང་བ། །
དེ་ཡི་གཟུགས་སོགས་ཚིག་ཉེ་བར། །རྗེས་སུ་ཁྲིད་བཅས་ཉམས་དང་ལྡན། ༥༢ །
གང་ཚེ་བྲམ་ཟེ་དགའ་བ་ཡི། །རྒྱལ་བོ་འདི་ཡིས་དཔལ་ཐོབ་གྱུར། །
དེ་ནས་བཟུང་སྟེ་ཆོས་ཀྱི་ནི། །དགའ་སྟོན་འཇིག་རྟེན་འདི་རུ་བྱུང་། ༥༣ །
ཞེས་འདི་ཤར་ཕྱོགས་པ་མི་འདོད། །དེ་དག་རྗེས་སུ་ཁྲིད་ལ་དགའ། །
ཕལ་ཆེར་རྗེས་སུ་ཁྲིད་པས་ཀྱང་། །ལྷོ་ཕྱོགས་པ་ནི་འདི་ཉིད་འདོད། ༥༤ །
རྐང་བ་རྣམས་དང་ཚིག་རྣམས་ལ། །ཡི་གེ་བསྐོར་བ་རྗེས་སུ་ཁྲིད། །
སྔ་མའི་ཉམས་མྱོང་འདུ་བྱེད་ནི། །རྟོགས་བྱེད་གལ་ཏེ་མི་རིང་ཉིད། ༥༥ །
སྟོན་མཚན་དབུ་རྒྱན་ཟླ་བ་ནི། །ཀུན་དའི་ཕོན་པོར་འཁྲུལ་བ་ལ། །
མཚན་མ་ཨིནྡྲ་རྙིལ་དང་མཚུངས། །བུང་བའི་དཔལ་ནི་ཡང་དག་འཛིན། ༥༦ །
མཛེས་མ་མཁའ་ལ་ཟླ་བ་ཡི། །དཀྱིལ་འཁོར་མཛེས་པ་བདག་གི་ཡིད། །
ཡིད་སྲུབས་ཀྱིས་མནན་བརྩེ་མེད་དུ། །འཇོམས་པར་བརྩོན་པ་འདི་ལ་ལྟོས། ༥༧ །
ཞེས་པ་ཤིན་ཏུ་མི་རིང་བར། །ཐོས་པ་དག་ནི་རྗེས་ཁྲིད་འདོད། །
དགའ་མ་བཞིན་གྱི་ཆུ་སྐྱེས་དང་། །མཚུངས་པ་ཟླ་བ་ཞེས་མི་འདོད། ༥༨ །
བདག་གི་ལུས་དང་ཁྲོ་བ་ཕྲ། །འདོད་པ་རྩུབ་ཅིང་མཛའ་བོ་ངན། །
ཁེངས་པ་ཉམས་ཤིང་ཆགས་པ་རྒྱས། །རྨོངས་པ་སྐྱེས་ཏེ་སྲོག་རྣམས་སོང་། ༥༩ །
ཞེས་སོགས་སྦྱོར་བ་རྩུབ་པ་དང་། །ལྷོད་པ་ཡང་ནི་སྟེར་བར་བྱེད། །
དེ་ཕྱིར་དེ་ལྟའི་རྗེས་ཁྲིད་ནི། །ལྷོ་ཕྱོགས་པ་དག་མི་སྦྱོར་རོ། ༦༠ །
ཚོགས་པའི་སྤྱོད་ཡུལ་བསྐོར་བ་ནི། །ཁོ་ན་ཟུང་དང་ལྡན་པར་རིག །
དེ་ཡང་གཅིག་ཏུ་སྙན་པ་མིན། །དེ་ཕྱིར་ཕྱི་ནས་བསྟན་པར་བྱ། ༦༡ །
ངེས་པར་རྒྱན་རྣམས་ཀུན་ལ་ཡང་། །དོན་གྱི་ཉམས་དག་སྦྱིན་པར་བྱེད། །
དེ་ལྟ་ན་ཡང་གྲོང་བ་ཉིད། །མིན་པས་ཁུར་འདི་ཕལ་ཆེར་འཛིན། ༦༢ །
འདོད་ལྡན་བདག་ལ་གཞོན་ནུ་མ། །ཁྱོད་ནི་ཇི་ལྟར་འདོད་མི་བྱེད། །
ཅེས་འདི་གྲོང་བའི་དོན་བདག་ཉིད། །ཉམས་དང་བྲལ་བ་ཁོ་ནར་བྱེད། ༦༣ །
གཡོན་མིག་འདོད་པ་གཏུམ་པོ་ནི། །ངེས་པར་བདག་ལ་བརྩེ་བ་མེད། །
ཁྱོད་ལ་ཁྲོ་མེད་དགའ་ཞེས་པ། །གྲོང་བའི་དོན་མེད་ཉམས་དང་ལྡན། ༦༤ །
སྒྲ་ལའང་གྲོང་བ་ཉིད་ཡོད་དེ། །དེ་ནི་ལེགས་པའི་ཅིག་ཤོས་གྲགས། །
དགའ་བའི་དགའ་སྟོན་བརྗོད་པ་ལ། །ཇི་ལྟར་ཡ་ཡིག་ལ་སོགས་བཞིན། ༦༥ །
ཚིག་གི་མཚམས་སྦྱོར་གྱིས་ཞུགས་དང་། །སླར་ཡང་ངག་དོན་དག་གིས་ཀྱང་། །
ཉེས་པར་རྟོགས་བྱེད་གྲོང་བ་སྟེ། །ཡཱ་བྷ་བ་ཏཿ པྲི་ཡཱ་བཞིན། ༦༦ །
གཞན་ལ་བསྣུན་ནས་སྐྱེས་བུ་ནི། །བཱིརྱ་ལྡན་པ་བི་ཤྲཱནྟཿ། །
དེ་ལྟ་བུ་སོགས་ལམ་དག་ནི། །གཉི་ག་ལ་ཡང་བསྔགས་མ་ཡིན། ༦༧ །
བྷ་ག་བ་ཏཱི་བྷ་གི་ནཱི། །ཞེས་སོགས་ཀུན་ཏུ་ཁས་ལེན་ཉིད། །
དེ་ལྟར་སྙན་པ་རྣམ་པར་ཕྱེ། །ཤིན་ཏུ་གཞོན་པ་བཤད་པར་བྱ། ༦༨ །
རྩུབ་མིན་ཡི་གེ་མང་བ་ནི། །ཤིན་ཏུ་གཞོན་པ་ཉིད་དུ་འདོད། །
གང་ཕྱིར་ཐམས་ཅད་མཉེན་པ་ནི། །སྦྱོར་བ་ལྷོད་པའི་སྐྱོན་དུ་བཤད། ༦༩ །
སྤྲིན་གྱི་ཕྲེང་བ་ལྡན་དུས་སུ། །སྙན་པར་སྒྲོགས་པའི་མགྲིན་ལྡན་པ། །
རྨ་བྱ་ཡིས་ནི་མཇུག་མ་དག །ཟླུམ་པོར་བྱས་ནས་གར་བྱེད་དོ། ༧༠ །
ཞེས་པ་དོན་རྒྱས་ཉིད་མ་ཡིན། །རྒྱན་ཡང་དེ་འདྲ་ཡོད་མིན་ཏེ། །
ཤིན་ཏུ་གཞོན་པ་ཉིད་ཀྱིས་དེ། །དམ་པ་རྣམས་ཀྱི་ཁ་ན་གནས། ༧༡ །
གསལ་ཕྱིར་གཞན་དག་ཕལ་ཆེར་ནི། །བརྗོད་པར་དཀའ་བ་དག་ཀྱང་སྦྱོར། །
རྒྱལ་རིགས་རྣམས་ཀྱི་ཕྱོགས་མཐའ་དག །སྐད་ཅིག་གིས་ནི་ཉམས་པར་བྱས། ༧༢ །
དོན་གསལ་དོན་བརྟགས་མི་དགོས་ཉིད། །འཕྲོག་བྱེད་ཀྱིས་ནི་ས་གཞི་དག །
རྨིག་པས་བཅད་པའི་ཀླུ་ཁྲག་གིས། །དམར་བ་ཆུ་ཡི་གཏེར་ལས་ཕྱུང་། ༧༣ །
ཕག་པ་ཆེན་པོ་དག་གིས་ས། །ཆུ་གཏེར་དམར་བོ་དག་ལས་ཕྱུང་། །
ཞེས་པ་འདི་ཉིད་བསྟན་པ་ནི། །བྲང་འགྲོའི་ཁྲག་ནི་བརྟག་དགོས་ཉིད། ༧༤ །
ལམ་ནི་གཉིས་ཀ་དག་ལ་ཡང་། །རྟོགས་པའི་སྐལ་བཟང་མི་ལྡན་ཞིང་། །
སྒྲ་ཡི་ཚུལ་ལས་འགོངས་གྱུར་བ། །འདི་འདྲ་ཕལ་ཆེར་བཞེད་མ་ཡིན། ༧༥ །
གང་དུ་འགའ་ཞིག་བརྗོད་པ་ལ། །ཁྱད་འཕགས་ལྡན་པའི་ཡོན་ཏན་རྟོགས། །
དེ་ནི་རྒྱ་ཆེར་བརྗོད་དེ་དེས། །སྙན་ངག་ལམ་ཀུན་མགོན་དང་བཅས། ༧༦ །
སློང་བ་རྣམས་ཀྱི་བཀྲེན་པའི་མིག །ལན་ཅིག་ཁྱོད་གདོང་ལ་ལྷུང་བ། །
ལྷ་གཅིག་གནས་སྐབས་དེ་ཡིས་སླར། །གཞན་གྱི་གདོང་ལ་བལྟ་མ་ཡིན། ༧༧ །
ཞེས་པ་ཉིད་ཀྱི་ངག་འདི་ལ། །གཏོང་བ་ཁྱད་འཕགས་ལེགས་པར་མཚོན། །
ལམ་འདི་ཉིད་ཀྱིས་གཞན་དག་ཀྱང་། །རིགས་པ་མཚུངས་པས་དཔག་པར་བྱ། ༧༨ །
བསྔགས་པར་འོས་པའི་ཁྱད་པར་དང་། །ལྡན་པ་རྒྱ་ཆེར་འགའ་ཞིག་འདོད། །
རོལ་བའི་ཆུ་སྐྱེས་རྩེ་དགའི་མཚོ། །གསེར་གྱི་རྒྱན་ལ་སོགས་པ་བཞིན། ༧༩ །
བརྗིད་པ་ཚིག་སྡུད་མང་བོ་ཉིད། །འདི་ནི་ལྷུག་པ་དག་གི་གསོས། །
ཚིགས་བཅད་ལ་ཡང་ལྷོ་ཕྱོགས་པ། །མིན་པའི་དཔུང་གཉེན་གཅིག་པུ་ཡིན། ༨༠ །
དེ་ལ་ལྕི་དང་ཡང་བ་རྣམས། །མང་དང་ཉུང་བ་ཉིད་སྤེལ་བས། །
མཐོ་དམན་གྱི་ནི་རྣམ་པ་དེ། །བརྗོད་པ་ལ་སོགས་རྣམས་ལ་མཐོང་། ༨༡ །
ནུབ་ཀྱི་རི་མགོར་ལྷུང་བ་ཡི། །མཐའ་དག་ཉི་འོད་མལ་སྟན་ཅན། །
རྒྱས་པའི་ནུ་མ་ལ་གནས་པའི། །གོས་དམར་མཛེས་བཞིན་ཆུ་ལྡན་མ། ༨༢ །
ཞེས་པ་བརྗིད་དང་ལྡན་པའི་ཚིག །ཚིགས་བཅད་ལ་ཡང་ཤར་བ་སྦྱོར། །
གཞན་དག་འཁྲུགས་མིན་མཛེས་པ་ཡི། །ཚིག་རྣམས་བརྗིད་པར་འདོད་དེ་དཔེར། ༨༣ །
ཆུ་འཛིན་ངོས་ཀྱི་ཕང་ན་གནས། །མཚམས་ཀྱི་ཉི་འོད་གོས་དང་ལྡན། །
ཆུ་ལྡན་མ་ཡིས་སུ་ཡི་ཡིད། །འདོད་པས་གཟིར་བར་བྱེད་མི་འགྱུར། ༨༤ །
མཛེས་པ་འཇིག་རྟེན་དོན་དག་ལས། །མ་འདས་འགྲོ་ཀུན་ལ་མཛེས་པའོ། །
དེ་ཡང་གཏམ་གྱི་མངོན་བརྗོད་དང་། །བསྔགས་པ་ལ་སོགས་རྣམས་ལའང་སྦྱར། ༨༥ །
དཀའ་ཐུབ་ཕུང་བོ་ཁྱོད་འདྲ་ཡི། །ཞབས་ཀྱི་རྡུལ་ནི་གཙང་མ་རྣམས། །
ཡང་དག་བཏབ་པ་གང་ཡིན་པ། །དེ་དག་ཁོ་ན་ངེས་པར་ཁྱིམ། ༨༦ །
སྐྱོན་མེད་ལུས་ཅན་ཁྱོད་ཀྱི་ནི། །ལག་པའི་འཁྲི་ཤིང་བར་དག་ཏུ། །
ནུ་མ་རབ་རྒྱས་འདི་དག་གིས། །གོ་སྐབས་རྙེད་པར་འགྱུར་མ་ཡིན། ༨༧ །
ཞེས་པ་ཁྱད་པར་བརྗོད་པ་ཡིས། །ལེགས་སྦྱར་དེ་དག་སྲིད་པ་ཉིད། །
འཇིག་རྟེན་ལུགས་ཀྱི་རྗེས་སུ་ནི། །འབྲང་བ་ཐམས་ཅད་མཛེས་པར་འགྱུར། ༨༨ །
འཇིག་རྟེན་འདས་བཞིན་བརྗོད་འདོད་ཀྱིས། །དོན་གང་ཤིན་ཏུ་བཀོད་གྱུར་བ། །
དེ་ཡིས་མཁས་པ་ཤིན་ཏུ་ནི། །ཚིམ་འགྱུར་ཅིག་ཤོས་མ་ཡིན་དཔེར། ༨༩ །
དེང་ནས་བཟུང་སྟེ་བདག་གི་ཁྱིམ། །ལྷ་ཡི་ཁྱིམ་བཞིན་བསྟེན་པར་འོས། །
ཁྱོད་ཀྱི་ཞབས་རྡུལ་ལྷུང་བ་ཡིས། །ཉེས་པ་དག་ནི་མ་ལུས་བཀྲུས། ༩༠ །
ཁྱོད་ཀྱི་ནུ་མ་འདི་ལྟ་བུར། །རྣམ་པར་རྒྱས་པར་གྱུར་བ་འདི། །
ངེས་པར་མ་བརྟགས་བྱེད་པོ་ཡིས། །ནམ་མཁའ་དག་ནི་ཆུང་ངུར་སྤྲུལ། ༩༡ །
འདི་ནི་ཧ་ཅང་བརྗོད་པས་ན། །ཤར་ཕྱོགས་པ་ལ་མཛེས་པར་བརྗོད། །
འཇུག་པ་སྔ་མ་གཞན་གྱི་ནི། །ལམ་ལ་སྙིང་བོ་ཉིད་དུ་བཤད། ༩༢ །
གཞན་གྱི་ཆོས་དེ་གཞན་དག་ལ། །འཇིག་རྟེན་ལུགས་ཀྱི་རྗེས་འབྲངས་ནས། །
གང་དུ་ཡང་དག་འཛིན་བྱེད་པ། །ཏིང་ངེ་འཛིན་དུ་བརྗོད་དེ་དཔེར། ༩༣ །
ཀུ་མུ་ད་ནི་མིག་འཛུམ་ཞིང་། །པདྨ་དག་ཀྱང་མིག་འབྱེད་ཅེས། །
མིག་གི་བྱ་བ་བཀོད་པ་ལས། །དེ་ཡི་རྗོད་བྱེད་སྒྲ་དག་ཐོབ། ༩༤ །
ནིཥ྄་ཋཱུ་ཏ་དང་ཨུ་དྒཱི་རྞ། །སྐྱུགས་སོགས་ཕལ་བར་འཇུག་བརྟེན་པ། །
ཤིན་ཏུ་མཛེས་ཏེ་གཞན་དུ་ནི། །གྲོང་བ་ཉིད་ཀྱི་ནུས་པ་བརྟེན། ༩༥ །
པདྨས་ཉི་ཟེར་སྐྱུགས་པ་རྣམས། །འཐུངས་ནས་རྡུལ་དམར་སྐྱུགས་པ་ཡི། །
ཁ་ཡི་དག་བྱེད་ཟེར་མ་རྣམས། །ཤིན་ཏུ་སྐྱུགས་པར་བྱེད་པ་བཞིན། ༩༦ །
ཞེས་པ་མཛེས་ཏེ་མི་མཛེས་པ། །ཆུང་མ་སྐྱུགས་པར་བྱེད་ཅེས་པའོ། །
ཅིག་ཅར་ཉིད་དུ་ཆོས་དུ་མ། །བཀོད་པ་དག་ཀྱང་འདོད་དེ་དཔེར། ༩༧ །
ལྕི་བའི་མངལ་ཁུར་གྱིས་ངལ་ཞིང་། །འཁུན་པར་བྱེད་པ་སྤྲིན་གྱི་ཕྲེང་། །
འདི་དག་གཡོ་མེད་སྟེང་གི་ནི། །ཕང་བ་དག་ཏུ་ཡང་དག་ཉལ། ༩༨ །
གྲོགས་མོའི་ཕང་བར་ཉལ་བ་དང་། །འཁུན་དང་ལྕི་བ་ཉིད་དང་ངལ། །
ཞེས་པ་འདིར་ནི་མངལ་ལྡན་མའི། །ཆོས་ཏེ་མང་བོ་གཞན་དུ་བསྟན། ༩༩ །
ཏིང་འཛིན་ཞེས་པའི་ཡོན་ཏན་གང་། །འདི་ནི་སྙན་ངག་བདོག་ཀུན་ཏེ། །
སྙན་ངག་མཁན་པོ་དོན་མཐུན་གྱི། །ཚོགས་ཀྱང་འདི་ཉིད་རྗེས་སུ་འབྲང་། ༡༠༠ །
དེ་ལྟར་རང་བཞིན་བརྟགས་པ་ལས། །ལམ་ནི་འདི་གཉིས་རྣམ་པར་ཕྱེ། །
དེ་དག་དབྱེ་བ་སྙན་ངག་མཁན། །སོ་སོ་ལ་གནས་བརྗོད་མི་ནུས། ༡༠༡ །
བུར་ཤིང་འོ་མ་བུར་སོགས་ཀྱིས། །མངར་བ་ཉིད་ཀྱི་ཁྱད་པར་ཆེ། །
དེ་ལྟ་མོད་ཀྱི་དེ་བརྗོད་པར། །དབྱངས་ཅན་མས་ཀྱང་ནུས་མ་ཡིན། ༡༠༢ །
རང་བཞིན་གྱིས་གྲུབ་སྤོབས་པ་དང་། །མང་དུ་ཐོས་པ་དྲི་མེད་དང་། །
མངོན་པར་སྦྱོར་བ་མི་དམན་པ། །སྙན་ངག་ཕུན་སུམ་ཚོགས་པའི་རྒྱུ། ༡༠༣ །
གལ་ཏེ་སྔོན་གྱི་བག་ཆགས་ཡོན་ཏན་གྱི། །རྗེས་འབྲེལ་སྤོབས་པ་རྨད་བྱུང་མེད་པ་ལའང་། །
ཐོས་དང་འབད་པ་དག་གིས་ངག་བསྟེན་ན། །ཇི་ཞིག་ལྟར་ཡང་ངེས་པར་རྗེས་འཛིན་བྱེད། ༡༠༤ །
དེ་ཕྱིར་གྲགས་འདོད་རྣམས་ཀྱིས་རྟག་ཏུ་ནི། །སྙོམས་ལས་མེད་པར་རིམ་པས་དབྱངས་ཅན་བསྟེན། །
སྙན་ངག་ཆུང་ངུ་ལ་ཡང་ངལ་བྱས་མི། །མཁས་པའི་འདུན་ས་དག་ཏུ་འདུག་ལ་དབང་། ༡༠༥ །
ཞེས་སློབ་དཔོན་དབྱུག་པ་ཅན་གྱིས་མཛད་པའི་སྙན་ངག་མེ་ལོང་གི་ལམ་རྣམ་པར་ཕྱེ་བ་སྟེ་ལེའུ་དང་བོའོ། །
སློབ་དཔོན་ཟླ་བ་གཞོན་ནུས་ཞུས་ཤིང་དག་པར་བྱས་པ་དགེ །
