 |
ཤྲཱི་ལངྐ། |
སིངྒ་ལའི་ལོ་རྒྱུས་སྐོར།
 |
| མཁས་དབང་དགེ་འདུན་ཆོས་འཕེལ། |
དེ་ཡང་མདོ་ལས་ཕྱི་མའི་དུས་ན་བསྟན་པ་ལྷོ་དང་བྱང་དུ་རྒྱས་པར་ལུང་བསྟན་པ་བཞིན་ལྷོ་ཕྱོགས་ཀྱི་རྒྱ་མཚོའི་མཐར་ཐུག་པར་ཆགས་པའི་ནང་པའི་རྒྱལ་ཁམས་ཆེན་པོ་གསུམ་ལས་སིངྒ་ལ་ནི་ཡུལ་གཞན་གཉིས་སུ་ཡང་ཉན་ཐོས་ཀྱི་སྡེ་སྣོད་དར་བའི་རྩ་བའི་འབྱུང་ཁུངས་ཉིད་ཡིན་པས། འདིར་ཐོག་མར་བཤད་པར་བྱའོ།།
དེ་ལ་རྒྱ་གར་གྱི་གླིང་ཟུར་གསུམ་སོག་གའི་དབྱིབས་ཅན་གྱི་མཆུ་རིང་པོ་ལྷོ་ཕྱོགས་སུ་བསྟན་པའི་སྣེ་དང་ཉེ་བར་མ་ངྷུ་ར་ས་སྦྲང་རྩིའི་ཡུལ་དང་། དེའི་ཤར་ལྷོ་ངོས་ནས་ས་ལག་ཆེན་པོ་ཞིག་རྒྱ་མཚོའི་དབུས་སུ་བརྐྱངས་པ་ལ་མནྡ་པཾ་ཟེར། སྤྱིར་ཡུལ་འདི་ཀུན་སྙན་ངག་མེ་ལོང་ན་གསལ་བའི་ཙོ་ལའི་ཡུལ་གྱི་ཆར་གཏོགས། ས་ལག་དེའི་མཐའ་ཟད་ནས་ལྕགས་ཟམ་ཤིན་ཏུ་རིང་པོ་ཞིག་གིས་རཱ་མེ་ཤྭཱ་རའི་གླིང་དང་སྦྲེལ། དེར་གླིང་མཐའ་ཟད་པའི་སྒང་བརྒྱུད་མཚོ་འོག་ཏུ་ཤོར་བའི་རྐྱེན་གྱིས། རྒྱ་མཚོའི་དཀྱིལ་ན་ཕར་ལ་རླབས་ཆེན་པོའི་གདེངས་ཀ་སྐྱ་ཐལ་ལེ་བ། ངོ་མཚར་ཞིང་འཇིགས་སུ་རུང་བ་ཞིག་སྣང་ཞིང་། རང་རེའི་ལོ་རྒྱུས་འགར་ཡང་འདི་བཤད། འདི་མུ་སྟེགས་ཀྱི་སྒྲུང་ནས་བཤད་པའི་སྤྲེའུའི་ཟམ་པའི་ཤུལ་ཡིན་སྐད། རཱ་མེ་ཤྭ་ར། དགའ་བའི་དབང་ཕྱུག་གི་གླིང་འདི་ནི་ཉམས་མི་དགའ་ཞིང་། བྱེ་མ་སྐྱ་ཧང་ངེ་བས་ཁེངས་པ་ཞིག་སྣང་། གླིང་འདི་ལངྐའི་ཡུལ་ན་ཡོད་ཅེས་རང་རེའི་རྒྱུད་འགྲེལ་འགར་ཡང་གསུངས་ལ། ལངྐའི་རྒྱལ་པོ་པ་ར་ཀྲ་མ་ཕ་རོལ་གནོན་སོགས་ཀྱི་རྒྱལ་རབས་འགའ་ཞིག་གི་བར། གླིང་འདི་ཡང་སིངྒ་ལའི་ཆབ་འོག་ཏུ་ཡོད་འདུག་པས་ས་ཁོངས་དེ་གར་གཏོགས་པ་བདེན།རཱ་མེ་ཤྭ་རའི་ལྷ་ཁང་ནི་ལྷོ་ཕྱོགས་པའི་བཟོ་ལུགས་ཀྱི་ངོ་མཚར་བ་ཞིག་སྣང་། ལར་རྒྱ་གར་ལྷོ་ཕྱོགས་ཀྱི་མུ་སྟེགས་པའི་ལྷ་ཁང་དེ་ཀུན་མཐོང་ན་རང་རེའི་རྡོ་རྗེ་གདན་སོགས་ཀྱང་བཀོད་པའི་སྒོ་ནས་དེ་ཙམ་དུ་མི་མཚར། རྩེ་ན་གཤོག་པ་དང་བཅས་པའི་ཁང་བརྩེགས་གཏོར་མ་བྲང་ལེབ་ཀྱི་དབྱིབས་འདྲ་བ་ལ། ཕྱི་ཐམས་ཅད་པ་ཊ་དང་ལྷ་སྐུ་སྣ་ཚོགས་ཀྱིས་གཡོགས་པ། མེ་ཏོག་གི་ཕུང་པོ་བརྩིགས་པའི་བྲག་རི་འདྲ་བ་དག་སྣང་། གནས་ཆེན་ཉེར་བཞིའི་ཡ་གྱལ་ཡང་འདི་ཡིན་པར་ཕྱི་ནང་གི་ལོ་རྒྱུས་ཐམས་ཅད་མཐུན་པར་གསུངས། དེས་ན་ཨོ་རྒྱན་པ་རྗེས་མ་ངག་དབང་རྒྱ་མཚོ་དེས་གར་ཞ་དང་། ཛ་ལན་ངྷ་རའི་བར་གྱི་ལམ་གཡས་གཡོན་དུ་རཱ་མེ་ཤྭ་ར་དང་། ཀཱ་མ་རཱུ་པ་སོགས་གནས་ཆེན་ཉེར་བཞི་ཕལ་ཆེར་ཞིག་མཇལ་བར་གསུངས་པ་ཡང་། སྣང་སྲིད་ལྷ་ཡི་འཁོར་ལོར་གཟིགས་པའི་གྲུབ་ཐོབ་ཆེན་པོའི་དག་སྣང་ཙམ་ཞིག་ཏུ་གོ་དགོས། རཱ་མེ་ཤྭ་ར་ནས་རྒྱ་མཚོ་བརྒྱུད་དེ་མཚན་ཕྱེད་ཙམ་སོང་བས་སིངྒ་ལ་རང་དུ་སླེབས། མུ་སྟེགས་ཀྱི་རྒྱལ་ཁམས་སུ་ཡུན་རིང་བསྡད་བསྡད་པའི་མཐར། གླིང་འདིར་སླེབས་པ་ན། རི་ལྡིང་ནག་ཡོམ་མེ་བའི་གསེབ་ན་ཕར་ལ། མཆོད་རྟེན་དཀར་སེང་ངེ་བ་དང་། དགེ་སློང་རྒན་པོ་མགོ་སྐྱ་རིལ་ལེ་བ་ཉི་མར་ལྡེ་བ་སོགས་མཐོང་བས། ཨཱ་ད་ནི་རང་ཡུལ་གྱི་ཕྱོགས་ཤིག་ལ་སླེབས་སམ་སྙམ་པ་ཙམ་གྱི་དགའ་སྐྱོ་ལྷང་ངེ་བ་བྱུང་།
 |
| རྒྱལ་ས་ཀཎྜི་ན་ཡོད་པའི་སྟོན་པའི་ཚེམས་ཀྱི་ལྷ་ཁང་། ཕྲེང་ལྡན་མ། |
དེ་ལ་གླིང་འདིའི་མིང་ཆེས་ཡོངས་སུ་གྲགས་པ་ནི། ལངྐ་བྱ་བ་ཡིན་ཞིང་། ཁོང་པ་རྣམས་ཀྱང་རང་ཡུལ་ལ་མིང་དེ་ག་དང་། རྒྱ་གར་ལ་འཛམ་བུ་གླིང་ཞེས་འབོད། དེའི་འོག་ན་གྲགས་ཆེ་བའི་མིང་ནི་སིངྒྷ་ལ་སྟེ་ཡི་གེ་མཚམས་སྦྱར་བ་དང་སིཾ་ཧ་ལ་སྟེ་མཚམས་སྦྱོར་མེད་པ་འདི་ཡང་ཀུན་གྱིས་འབོད་པའི་མིང་ཡིན་ཅིང་། དོན་ནི་སིངྒེ་འཛིན་བྱ་བར་འགྱུར། མིང་གཞན་ཡང་ཙ་མ་ར་དྭཱི་པ་བྱ་བ་སྟེ། ཁོང་ཅག་གི་རྒྱལ་རབས་ན་ཡང་མིང་དེ་གསལ་ཞིང་། རང་ཅག་གི་གཞུང་མང་པོར་ཡང་སིངྒ་ལ་དང་དེ་གཉིས་དོན་གཅིག་ཏུ་གསུངས། དེ་བཞིན་ཏཱམྲ་དྭཱི་པ་སྟེ་ཟངས་གླིང་ཡང་འདི་ལ་ཟེར་བ། རང་རེའི་འདུལ་བའི་དཔེ་མེད་མའི་བྱུང་བའི་སྐབས་ན་ཡང་གསལ་ལ། ཁོང་དག་ལ་ཡང་རྒྱུས་འདུག རྒྱ་གར་ནུབ་ཀྱི་ཀླ་ཀློ་རྣམས་ནི་གླིང་འདི་ལ་སྭརྞདྭཱིཔ་སྟེ་གསེར་གླིང་དུ་འབོད་ཅིང་གནས་ཆེན་དུ་བརྩི། ལངྐའི་གསེར་བྱ་བ་རྒྱ་གར་གྱི་གཏམ་རྒྱུད་རྣམས་ན་ཡང་ཤིན་ཏུ་མང་། གསེར་གླིང་ནི་བྷར་མའི་ལྷོ་མཐའ་དང་དགེ་བའི་གླིང་ཕྲན་སུ་མ་ཏྲ་རུ་ཟུར་ཆག་སྟེ་འབོད་པའི་གླིང་འདི་ཡིན་པར་ཐེ་ཚོམ་མེད་མོད། འོན་ཀྱང་ཇོ་བོ་བྱོན་པའི་གསེར་གླིང་དེ་འདི་ཡིན་པ་ཡང་སྲིད་སྙམ་སྟེ། སིངྒ་ལ་ན་ད་ལྟ་བཞུགས་པའི་མ་ག་ངྷའི་སྐད་ཀྱི་བརྡ་སྤྲོད་པ་ཞིག་དང་། རཱུ་པ་སིདྡྷ་གཟུགས་གྲུབ་བྱ་བའི་བསྟན་བཅོས་གཉིས། དཱི་པཾ་ཀ་ར་ཤྲཱི་ཛྙཱ་ནས་མཛད་བྱ་བ་དུས་ཚོད་ཀྱང་ཇོ་བོ་རང་ལ་བསྒྲིགས་བཏུབ་པ་ཞིག་མཆིས་པར་རྒྱ་གར་དུ་འགྲོ་ཕན་མཛད་པ་དང་། ནཱ་ལནྡཱའི་སྟོབས་ཀྱི་ཉི་མའི་གཙུག་ལག་གི་བདག་པོ་ཡིན་ཚུལ་སོགས་བཤད། དགེ་སློང་མཁས་པ་འགའ་རེས་ཀྱང་ཁྱེད་ཀྱི་ཇོ་བོ་དེ་འདི་རང་ཡིན་པར་འདུག་ཟེར་གྱིན་གདའ། འོ་ན་དེ་བདེན་ཚེ་ཆོས་ཀྱི་གྲགས་པ་བྱ་བའི་གནས་བརྟན་ཞིག་གིས་མཛད་པའི་གཞུང་འགའ་ཡང་སྣང་བས། དེ་ཡང་བླ་མ་གསེར་གླིང་བ་ཡིན་ཨེ་སྲིད་སྙམ། འགའ་ཞིག་གིས་འདིའི་མར་མེ་མཛད་དེ་ཙོ་ལའི་ཡུལ་དུ་འཁྲུངས་པའི་མར་མེ་མཛད་སངས་རྒྱས་ཞབས་བྱ་བ་དེ་ཡིན་ཟེར།
གླིང་གི་མཐའ་སྐོར་རྐང་འགྲོས་ཟླ་ལམ་ལྷག་གིས་འཁོར་བའི་ཁྱོན་ཙམ་ཡོད། དབུས་ཀྱི་ཆ་ལ་རི་མང་ཞིང་རྒྱ་མཚོ་དང་ཉེ་བའི་ཕྱོགས་ཀུན་ཐང་དུ་ཡོད། དེ་ཡང་རྒྱ་གར་གྱི་ས་མཐའ་རྣམས་ས་དམར་པོ་ལ་རི་གཏོར་མ་འདྲ་བས་གང་བ་རང་རེའི་ཟ་ལར་ཁོག་དང་འདྲ་སེ་བ་ཞིག་ལ། གླིང་འདི་ནི་གང་དང་ཡང་མི་འདྲ་བར་ས་གཤིན་ཅིང་། གསིང་མ་དང་ནགས་ཚལ་རྒྱས་པས་རི་ལྗོངས་ཐམས་ཅད་སྨུག་དུང་ངེ་བ་ཡོད། ཕྱོགས་ཕལ་ཆེར་ནས་རྒྱ་མཚོ་ནག་མེར་རེ་བ་མཐོང་། ཡུལ་འདི་ཆ་གསུམ་དུ་བགོས་པའི་མ་ཧཱ་བེ་ལི་གངྒཱས་བཅད་པའི་བྱང་གི་ཆ་རྣམས་པི་ཧི་ཏིའི་ཡུལ་དུ་འབོད། ཀ་ལུ་གངྒཱ་འབབ་པའི་ཕྱོགས་ནུབ་ཀྱི་ཆ་རྣམས་ལ་མ་ལ་ཡཱ་སྟེ་རིའི་ཡུལ་དུ་གྲགས། དེའི་ཕྱིར་དཔའ་བོ་གཙུག་ལག་ཕྲེང་བ་སོགས་ཀྱིས་མ་ལ་ཡ་སིངྒ་ལ་ན་ཡོད་པར་གསུངས་པ་ཡང་འདི་ལ་ཟེར། འོན་ཀྱང་སྙན་དངགས་ལ་གྲགས་ཆེ་བའི་མ་ལ་ཡཱ་དེ་རྒྱ་གར་ལྷོ་ན་ཡོད། སྤྱིར་མ་ལ་ཡཱ་བྱ་བ་ཏ་མིལ་གྱི་སྐད་དེ་རིའི་མིང་ཙམ་ཡིན་ཅིང་། ཏྲཱི་མ་ལ་ཡཱ་བྱ་བ་ཡང་དེ་དག་གི་སྐད་དེ་ཤྲཱི་མ་ལ་ཡཱ་དང་དོན་གཅིག་ཅིང་། དཔལ་གྱི་རི་བོ་བྱ་བ་ཡིན། ཡུལ་འདིར་ཆུ་ཆེན་རྣམས་ལ་གངྒཱ་ཟེར་བ་མང་བས་ལོ་རྒྱུས་འགར་གངྒཱ་དངོས་མ་དེ་ལངྐ་ན་ཡོད་སོགས་ཀྱང་བྲིས་ནས་འདུག ཤར་ལྷོའི་ངོས་ཀྱི་རྒྱ་མཚོའི་ཕྱོགས་ཀུན་ས་དམར་སྐྱ་ཧལ་ལེ་བ་ཡོད་པས་རོ་ཧི་ནི་ཡང་དམར་མོ་བྱ་བ་སྟེ་དེ་ལ་ཟེར་བ་འདུག ཤར་ངོས་ཀྱི་ནགས་ཆེན་པོའི་དཀྱིལ་ན་ཀློ་པའི་རིགས་ཤ་རྗེན་ཟ་ཞིང་གཅེར་བུ་སྤྱིལ་པོ་ཡང་མེད་པར་སྡོད་པ་དག་ཡོད། གླང་ཆེན་གྱི་ཤ་སྦྲང་རྩི་དང་སྦགས་ནས་ཟ། གདོང་ལ་བལྟས་ནས་གད་མོ་ཤོར་ན་འཆི་ལྟས་སུ་བརྩི་བས་མདའ་བསྣུན་ཏེ་གསོད། གཞན་ཀློ་པའི་རིགས་ལ་གཤིས་འཇམ་ཞིག་ཡིན། ཡུལ་གྱི་དབུས་ནུ་རུ་བ་ར་ཨེ་ལི་ཡ་བྱ་བ་དེ་ཁ་མཐོ་ཞིང་ཤིན་ཏུ་བསིལ། དབྱར་དུས་སུ་བོད་ལས་ཀྱང་གྲང་བ་སྙམ་བྱེད། དེའི་ཤར་ངོས་སུ་ཕར་ལ་སྤང་གི་རི་ལྗོངས་ཆེན་པོ་རྒན་རྒྱའི་གཞུང་དྲན་བཟོད་པ་ཙམ་ཡོད། དེ་ནས་དམའ་བའི་རི་ཟུར་རྣམས་ན་ཐང་ཤིང་དང་ཤུག་པ་ཡང་སྐྱེས། རྒྱ་གར་ན་མཐོང་རྒྱུ་མེད་པའི་ཤིང་དེ་ཚོ་སིངྒ་ལར་མཐོང་ཚེ་ཡ་མཚན་པ་ཞིག་འབྱུང་། སྤྱིར་གླིང་འདི་རིན་པོ་ཆེའི་འབྱུང་ཁུངས་ས་སྟེང་ན་གྲགས་ཆེ་བ་ཞིག་ཡིན་ཅིང་། སངས་རྒྱས་བཞུགས་དུས་ནས་བཟུང་ཐག་ཉེ་རིང་གི་ཚོང་པ་མང་པོ་རྒྱ་མཚོ་བརྒལ་ནས་རིན་ཆེན་ལེན་དུ་འགྲོ་ས་ཞིག་ཡིན་འདུག ལྷག་པར་དུང་དང་མུ་ཏིག་གཉིས་ཀའི་འབྱུང་གནས་སུ་གྲགས། གླིང་གི་མིང་ལ་ལྷོ་ཕྱོགས་རྒྱ་མཚོའི་མུ་ཏིག་སོགས་སུ་ཡང་བརྗོད། ནགས་ཚལ་རྣམས་ན་གླང་ཆེན་མང་ཞིང་། གཞན་གཅན་གཟན་གདུག་པ་དུག་སྦྲུལ་དང་། གཟིག་ཙམ་ལས་མེད། ཆུ་ཆེན་རྣམས་ལ་ཆུ་སྲིན་ཀུམྦྷཱིར་མི་ཟན་གྱི་འཇིགས་པ་ཅུང་ཆེ། རྒྱ་མཚོའི་མཐར་ནམ་མཁའ་ལ་བྱེའུ་ལྟར་འཕུར་བའི་ཉ་དང་། ཤིང་སྡོང་ལ་འཛེག་པའི་ཉ། ཟླ་བ་ཉ་བའི་ཚེ་དུང་དང་། རྔ་སྒྲ། ཀིས་ཧིས་སོགས་སྒྲ་བརྒྱ་ཕྲག་མང་པོ་སྒྲོག་པའི་ཉ་གླུ་མཁན་དུ་འབོད་པ་ཞིག་དང་། གཞན་ཡང་ཆུ་དང་སྐམ་གྱི་སྲིན་འབུ་སྲོག་ཆགས་རང་རེའི་མིག་ལ་མཚར་བ་གྲངས་ལས་འདས་པ་ཞིག་སྣང་། རྩངས་པ་ཆེན་པོ་ཁྱིའི་ཚད་ལོངས་པ་ཡང་མཐོང་། ཀྲི་མི་བྱ་བའི་སྲིན་འབུ་ལྕི་བ་རློན་པ་ལ་རིལ་བུ་ལག་པས་བཟོས་འདྲ་ཞིག་བྱས་ཏེ་གཅིག་གིས་འཁུར། གཅིག་གིས་འཕུལ་ནས་མི་བཞིན་དུ་འཁྱེར་བ་ཞིག་ཀྱང་མཐོང་། ལར་རྒྱ་མཚོའི་རླབས་དཀྱུས་མ་རྣམས་ནི་རང་རེའི་མཚོ་སྔོན་པོའི་དེ་ལས་ཧ་ཅང་ཆེ་བ་མི་འདུག འོན་ཀྱང་ཉ་དང་གནམ་སྟོང་སྐབས་ཟླ་བའི་ཤུགས་ཀྱིས་དྲངས་པའི་རླབས་ཆེན་ཞིག་འོངས་པ་དེ་ཆུ་ཆེན་རྣམས་བརྒྱུད་ནས་ཉིན་ལམ་ཙམ་ལ་ཡང་འགྲོ། གྲུ་གཟིངས་ཆེན་པོ་རྣམས་ཀྱང་ཉིན་དེ་ལ་བསྒུགས་ནས། དེ་ནས་རླབས་དང་འགྲོགས་ཏེ་མཚོའི་མཐའ་ལ་བདེ་བར་སླེབས། དེས་ན་རྒྱ་མཚོ་ལ་ཟླ་བས་འཕེལ་ཟེར་བ་ནི། སྒྲོ་བཏགས་པའི་མངོན་བརྗོད་ཙམ་མིན་པར་འདུག དེ་མིན་རླུང་ཆེན་གྱིས་དེད་པའི་རླབས་འོངས་ནས་གྲོང་ཁྱེར་བསྣུབས་པ་སོགས་ཀྱང་ཡོད་དེ། རྒྱ་གར་ཀ་ལིངྐའི་ཕྱོགས་སུ་འཇིགས་པ་དེ་འདྲ་ལོ་བསྟར་འོངས་པ་ཡིན། རྒྱ་མཚོའི་འགྲམ་གྱི་ཕྱོགས་སུ་ཡུན་རིང་བསྡད་པས་ཏི་མི་དང་ཆུ་སྲིན་སོགས་ཤི་གསོན་ཅི་རིགས་པ་མང་དུ་མཐོང་སྟེ། ཐུང་དྲགས་པ་དང་ཆུང་དྲགས་པ་རྐྱང་ལས། བོད་ཀྱི་མིའི་སེམས་ཁ་གང་ནུས་པ་ཞིག་མི་འདུག་པས་འདིར་བཤད་རིན་མེད་པར་བཞག གླིང་འདིའི་ཐང་རྣམས་ནི་ཏ་ལའི་ནགས་ཚལ་གྱིས་ཁྱབ། རིའི་ངོས་ལ་ནི་ཤིང་རིགས་ལ་འདི་མེད་བྱ་བ་མི་འདུག སྲིང་མོ་གསོད་བྱ་བའི་སྔོ་རིགས་ཟོས་ན་ཆགས་པས་མྱོས་ནས་འཆི་བྱ་བ་ཞིག་ཀྱང་མཆིས། སྔོ་དེ་མུ་སྟེགས་ཀྱི་མན་ངག་རྣམས་ན་གྲགས་ཆེ། ཅུང་ཟད་ཟོས་པ་དང་མིད་པ་ཚ་ཟིར་རེ་ཞིག་ལས་གཞན་ཅི་ཡང་འོང་རྒྱུ་མི་འདུག ནགས་གསེབ་ཀྱི་དབུལ་པོའི་རྩྭ་ཁྱིམ་འགའ་རེའི་སྒོར་གླང་ཆེན་གྱི་བརླ་རྐང་དང་། ཉ་རུས་སོགས་བཙུགས། གླང་མགོ་ར་དཀྱིལ་དུ་བཞག་ནས་ཁྲེས་པོ་འཁུར་བའི་སྟེགས་སོགས་བྱེད་ཀྱིན་འདུག ཤིང་གི་ཅོག་ཙེ་ཞིག་ལ་གླང་མགོ་ཧྲིལ་པོར་བརྗེ་ངེས་ཀྱང་སུ་ཞིག་གིས་ཉོ། འོན་ཀྱང་མཆེ་བ་ནི་འདིར་ཡང་གོང་ཐང་ཆེ། གྲོང་ཁྱེར་ཆེ་ཤོས་ནི་ཀོ་ལུམ་བྷོ་བྱ་བ་དེ་ཡིན། དེར་རྒྱལ་ཁབ་ཀུན་གྱི་མི་རིགས་འཛོམས། དེའི་འོག་ཀནྜི་བྱ་བའི་གྲོང་དེ་སྔོན་གྱི་རྒྱལ་ས་ཡིན།
གླིང་འདི་ན་ཉིན་མཚན་རིང་ཐུང་འཕོ་བ་ཡང་མེད། དབྱར་དགུན་ཡང་མེད་པར་ལོ་ཧྲིལ་པོར་བསིལ་དྲོད་སྙོམས། ཧོར་ཟླ་གཉིས་པའི་ཚེས་གཅིག་ནས་བརྩིས་པའི་ཟླ་བ་བརྒྱད་ཀྱི་རིང་ལ་ནམ་དུས་ཆེན་པོ་དང་། ལྷག་མ་བཞི་ལ་ནམ་དུས་ཆུང་ངུར་འབོད་པ་ཙམ་ལས་དྲོ་གྲང་གོ་ལྡོག་ནམ་ཡང་མེད། གོ་ལའི་བྱང་ཆ་མ་ལུས་པར་ཟད་པས་ཚེས་གཅིག་གི་དུས་སུ་ཟླ་ཚེས་མཐོང་། ལྷོ་བགྲོད་མཐར་ཐུག་པའི་སྐབས་ཉིན་གུང་མི་འགྲེངས་ན་གྲིབ་མ་ཡང་རང་རེ་ལས་གོ་བཟློག་སྟེ་བྱང་ནས་ལྷོར་འབབ།
མིའི་རིགས་ནི་སྔོ་བསངས། དཀར་ཤམ། ནག་པོ་སོགས་ཅི་རིགས་པར་མཆིས་ཤིང་། ཕལ་མོ་ཆེ་དག་གཟུགས་མཛེས། དེས་ན་གུ་རུ་ལྷོ་ཕྱོགས་པས་སིངྒ་ལར་ལེན་གསུངས་པའི་གླུ་གྷ་རེ་གྷ་རེ་པདྨཱ་ནཱི་ན་རཱི། ཁྱིམ་དང་ཁྱིམ་རེར་བུ་མོ་པདྨ་ཅན། །བྱ་བ་ཡང་རྫུན་དུ་མ་སོང་ཙམ་འདུག རིགས་བྱིངས་ནི་ཨཱརྱཎ་ཡིན་ཅིང་། སྐད་ཀྱང་ལེགས་སྦྱར་ཟུར་ཆག་ཤས་ཆེ། ཨཱ་རྱཱ་ཎའི་ཁྲོད་ན་སངས་རྒྱས་ཀྱི་ཆོས་མ་ཉམས་པར་གནས་པ་ད་ལྟ་ཁོང་ཅག་གཅིག་པུ་ཡིན་ཟེར་ཏེ་དོན་ལ་ཡང་བདེན་པར་སེམས། བྷར་མ་སོགས་ནི་རིགས་གཞན་ཡིན། ཕོ་མོ་གཉིས་ཀ་ཁ་དོག་ཁྲ་བོ་ཅན་གྱི་སྨད་གཡོག་སུལ་མེད་པ་དང་། མོ་རྣམས་སྟོད་ལ་དཔུང་བཅད་ཅིག་གྱོན། སིངྒ་ལའི་བུད་མེད་དེ་སྨད་འཚོང་དང་། སྐྱེས་པ་བཤན་པ་བྱེད་པ་མེད་ཟེར། འོན་ཀྱང་ཉ་བཤོར་བ་ལ་ནི་བཤན་པའི་ཐ་སྙད་མི་འདོགས་པའི་ལུགས་ཡིན། ཡུལ་གང་པོའི་མི་རྣམས་ཉ་ལ་དགའ། སྡིག་སྲིན་དང་། ཆུ་སྦྲུལ། ལྕོང་མོ་ལ་སོགས་པ་ཐམས་ཅད་ཟ། སྒོ་ཟོག་ནི་གླང་དང་མ་ཧེ་ཤས་ཆེ། རྟ་ནི་ཡེ་མེད། ཤིང་རྟ་ཡང་གླང་གིས་འདྲེན། གླང་དེ་རྟ་ལས་ཀྱང་མགྱོགས་ཙམ་ཡོད། གྲོང་ཁྱེར་ཆེན་པོ་རྣམས་ན་གློག་ཆས་དང་། བཟོ་གྲྭ། ཡིག་ཁང་སོགས་གསར་སྲོལ་ཐམས་ཅད་དཀྱུས་དང་མཐུན་པར་ཡོད། སྲང་དང་སློབ་གྲྭ་སོགས་ལ་ཡང་ཆོས་དང་འབྲེལ་བའི་མིང་ཡང་བཏགས་པ། དཔེར་ན། སྐྱེ་རྒུའི་བདག་མོའི་བྲང་ཁང་དང་། གྲགས་འཛིན་མའི་སློབ་གྲྭ་སོགས་བུ་མོ་རྣམས་ཀྱི་སློབ་གྲྭ་དང་། ཀུན་དགའ་བོ་དང་། མྱ་ངན་མེད་པའི་འདུན་ཁང་སོགས་ཁྱེའུ་རྣམས་ཀྱི་དང་། ས་ག་མའི་ལམ་དང་། རྡོ་རྗེ་མའི་སྲང་སོགས་ཤིན་ཏུ་མང་། བཞི་མདོ་ཀུན་ན་བྱང་ཆུབ་ཤིང་དང་། དེའི་དྲུང་ན་བང་རིམ་ལ་བཞུགས་པའི་སངས་རྒྱས་དང་མཆོད་རྟེན་སོགས་མཐོང་ན་ཡིད་འཕྲོག་པ་འབའ་ཞིག་ཡོད། ཚེས་བཟང་དག་གི་ནངས་པར་ཐོག་མར་ཡིག་གྲྭའི་བུ་མོ་དག་གྲལ་དུ་བསྒྲིགས་ཏེ་སོང་ནས་བྱང་ཆུབ་ཤིང་དང་། མཆོད་རྟེན་གྱི་རྣ་བར་གད་དར་བྱེད། དེ་ནས་ཁྱེའུ་བརྒྱ་ཕྲག་དུ་མ་སློབ་དཔོན་གྱིས་ཁྲིད་དེ་མདོའི་ཚིགས་བཅད་འགའ་ཞིག་གླུར་ལེན་བཞིན། མཆོད་རྟེན་ལ་བསྐོར་ནས་མེ་ཏོག་གཏོར་བ་སོགས་ཡིད་དུ་འོང་བའི་སྲོལ་ལུགས་མང་དུ་ཡོད་ཀྱང་མ་བྲིས། ཉ་སྟོང་བརྒྱད་གསུམ་ལ་ཚུལ་ཁྲིམས་ཡན་ལག་བརྒྱད་པ་ཀུན་གྱིས་ལེན། ཉིན་དེར་ཁྱིམ་པ་ཀུན་ཁྲ་ཐིག་སོགས་ཡེ་མེད་པའི་རས་དཀར་རྐྱང་རེ་གྱོན། ལར་གོས་དེ་འདྲ་དགེ་བསྙེན་གྱི་རྟགས་སུ་བྱེད་ཀྱིན་གདའ། སྐུ་བརྙན་སོགས་མཇལ་ན། རང་རེས་སྐྱབས་སུ་མཆི་ཟེར་བའི་ཚོད་ལ་ཁོང་རྣམས་སཱ་དྡྷུ། སཱ་དྡྷུ། ལེགས་སོ་ལེགས་སོ་བྱ་བ་བརྗོད། བྱིས་པ་ཆུང་ངུ་རྣམས་ཀྱང་སེར་པོ་ཞིག་རྒྱང་ནས་མཐོང་ན། ཧཱ་དུ། ཧཱ་དུ། ཞེས་ཅ་ཅོ་བྱེད་པ་ལ་གོམས། གླིང་འདི་ནས་དགེ་འདུན་ལ་ཇི་ལྟར་གུས་པ་ནི་སངས་རྒྱས་བཞུགས་དུས་དང་ཕལ་ཆེར་ཁྱད་ཨེ་ཡོད་སྙམ། རིགས་ཆེན་པོའི་མི་དྲག་མགོ་སེ་ཡོར་རེ་བ་ཚོ་ཡང་། དགེ་ཚུལ་ཆུང་ངུ་ཞིག་གི་རྐང་པའི་དྲུང་དུ་པུས་མོ་བཙུགས་ནས་སྡོད། དགོན་པའི་ནང་དུ་སུ་འདྲ་ཞིག་སླེབས་ཀྱང་ས་སྒྲེ་བོ་ལ་སྡོད་པ་ལས་ཤིང་སྟེགས་ཙམ་ཡང་མི་འདིང་། ཧོར་ཟླ་གསུམ་པ་ཙམ་གྱི་ཚེས་སྟོད་ཉི་མ་ལུག་ཁྱིམ་དུ་འཕོས་པ་ན། གླིང་འདི་པ་རྣམས་ལོ་གསར་བྱེད། འདི་མྱ་ངན་མེད་དུས་ཀྱི་སྲོལ་ཡིན་ཟེར་ཞིང་། ཡུལ་འདི་ཙམ་ལས་གཞན་དུ་མི་བྱེད། ས་གའི་ཉ་ལ་སངས་རྒྱས་འཁྲུངས་པའི་དུས་སྟོན་བྱེད། ལོ་གཅིག་གི་ཉི་མ་འགངས་ཆེ་ཤོས་དེ་འདི་ཡིན། བྱིས་པ་རེ་རེས་རྔ་ཆུང་ཞིག་ཚགས་སུ་ཚུད་པར་བྱས་ཏེ་ཉི་མ་བགྲངས་ནས་བསྒུགས་ཏེ་སྡོད། ཐོ་རངས་ཙ་ན་གྲོང་ཐམས་ཅད་ཅིག་ཆར་དུ་གླུ་དང་རྔ་སྒྲ་དང་། སཱ་དྷུ་བྱ་བའི་འུར་གྱིས་གང་། བྱིས་པ་ཆུང་ངུ་ཞིག་གཞོན་ནུ་དོན་གྲུབ་ཀྱི་ཆས་སུ་བཅུག་སྟེ་ནང་མི་རྣམས་ཀྱིས་མཆོད། ཐམས་ཅད་ཀྱང་གོས་དཀར་པོ་འབའ་ཞིག་གྱོན་ཞིང་གཉེན་རྣམས་ལ་མགྲོན་གཏོང་། ཁྱིམ་རེ་རེའི་སྒོ་ན་བྱང་སེམས་བྱིས་པའི་གཟུགས་ཅན་གྱི་སྐུ་ཐང་རེ་དང་། དར་སྣ་ལྔའི་བ་དན་དུ་མ་འཕྱང་། ཁང་ཆེན་རྣམས་ཀྱི་མདུན་དུ་ལྡིང་ཁང་ཐོག་ཚད་བཞི་ལྔ་རེ་བསླངས་པའི་ནང་དུ། ལྷ་ལས་བབས་པ་དང་ལུམྦི་ནིར་བལྟམས་པ་སོགས་རྣམ་ཐར་གཟུགས་བརྙན་ནས་འཕྲུལ་འཁོར་གྱིས་གསོན་པོ་ལྟར་སྒུལ་སྐྱོད་བྱེད་པ་སོགས་སྟོན། ཤིང་རྟ་ཆེན་པོའི་སྟེང་ན་ཁང་བརྩེགས་ཀྱི་ཟོབ་བྱས་པའི་དབུས་སུ་བྱིས་པ་གཅིག་བྱང་ཆུབ་སེམས་དཔའ་དང་། བུ་མོ་མེ་ཏོག་གི་ཐོད་གྱོན་པ་དག་ལྷ་མོའི་ཆས་སུ་ཞུགས་ཏེ་སྒྲ་སྙན་སྣ་ཚོགས་དང་། མེ་ཏོག་འཐོར་བཞིན། སངས་རྒྱས་ཀྱི་བསྟོད་དབྱངས་བླངས་ཏེ་བྲང་དང་སྐྱེད་ཚལ་ཐམས་ཅད་བསྐོར། ཐམས་ཅད་ཀྱིས་ཁོང་རྣམས་ལ་མངར་ཆ་དང་དོང་ཙེ་སོགས་འབུལ། བཞི་མདོ་རྣམས་ན་རས་གུར་ཕུབ་པའི་འོག་ཏུ་དགེ་སློང་རེ་བཞུགས་པའི་མདུན་ན། དགེ་བསྙེན་དཀར་པོ་སྤྲ་བའི་མེ་ཏོག་འདྲ་བ་དག་གིས་བསྐོར་ཏེ་སྐྱེས་རབས་འཆད། ལམ་སྲང་གཡས་གཡོན་དུ་ལྡིང་གུར་རིང་པོའི་ནང་དུ་ཟས་སྣ་དང་བཏུང་བའི་རིགས་བཤམས་ཏེ་ལམ་ན་འགྲོ་ཚད་ལ་སྦྱིན། ཉིན་དེར་ཟ་ཁང་ལ་སོགས་པ་གར་ཕྱིན་ཡང་རིན་མེད་དུ་སྦྱིན། ཡུལ་མིའི་ཤན་གྱིས་མུ་སྟེགས་དང་ཀླ་ཀློའི་ཚོང་དཔོན་དག་གིས་ཀྱང་ས་གའི་དུས་སྟོན་བྱེད། ཉིན་དེ་ལས་ཉམས་སུ་དགའ་བ་མེད། སྔ་དྲོ་གྲོང་དུ་སོང་ན་དགེ་སློང་ཞི་དུལ་ཅན་བསོད་སྙོམས་ལ་རྒྱུ་བ་མཐོང་། ལྷུང་བཟེད་ཀྱི་སྐོན་བུའི་ལུང་ཐག་ཕྲག་པ་ལ་གྱོན། ཞབས་ལག་མཐིལ་དུ་བཞག་ནས་ཁྱིམ་གྱི་མདོར་འགྲེངས་ཏེ་སྡོད། ཁྱིམ་ནས་བསོད་སྙོམས་ཕུལ་ཏེ་རྐང་པ་ལ་གཏུགས་ནས་འགྲོ། ཚིགས་བཅད་སོགས་ཅི་ཡང་མེད། སླར་འཁོར་ཏེ་ཟས་རྣམས་བགོས་ན་མི་གསུམ་ཙམ་འགྲངས།
གླིང་ཧྲིལ་པོ་བསྡོམས་པར་དགེ་སློང་ཉིས་ཁྲི་ལྷག་ཙམ་ཡོད་ཟེར་ཞིང་། དེ་ཀུན་ལ་བསོད་སྙོམས་དང་གནས་མལ་སོགས་ཀྱི་སེམས་ལས་ཕྲ་མོ་ཙམ་ཡང་དགོས་པ་མེད། དགོན་གནས་ཆེ་བར་བགྲངས་པ་དག་ན་ཡང་དགེ་སློང་ཉི་ཤུ་ཙམ་ལས་ལྷག་མི་བཞུགས། དེ་ཀུན་གྱི་མལ་ཆ་དང་ཡོ་བྱད་ཀུན་རྒྱལ་པོ་ལ་འོས་པ་ཙམ་ཡོད། དེ་ཡང་ཕྱུག་པོ་རེ་ཤི་ན་ཁོའི་མལ་ཆ་སོགས་ནར་མའི་ཡོ་བྱད་རྣམས་གཙུག་ལག་ཁང་དུ་འབུལ་སྲོལ་འདུག་པས། དགེ་སློང་རྣམས་ལ་ཡོ་བྱད་ཀྱི་ཕུད་ཤ་སྟག་ཐེམས་པ་ཡིན། འོན་ཀྱང་དེ་ཀུན་དགེ་འདུན་གྱི་ཡིན་པར་བྱེད་དགོས། གང་ཟག་ལ་དབང་བ་ནི་མཁོ་བའི་ཡོ་བྱད་དང་། གཞན་ཕྲན་བུ་ཅི་རིགས་ལས་མེད། གཙུག་ལག་ཁང་ན་སྡོད་པ་རྣམས་ལ་གྲོང་པ་རེས་མོས་ཀྱིས་བསོད་སྙོམས་སྐྱེལ། ཕར་བསོད་སྙོམས་ལ་འགྲོ་བ་ལ་མི་རྣམས་ཤིན་ཏུ་དགའ་ཡང་། དགོན་པ་བ་དང་། ལྗོངས་རྒྱུ་བ་དང་། གསར་བུ་དག་གིས་བྱེད་པ་ལས་ཆེས་མང་པོ་མེད། འགའ་རེས་དུས་ཐུང་ངུ་རེ་ལ་དམ་བཅས་ཏེ་བསོད་སྙོམས་བྱེད་ཅིང་། དེ་དགེ་སྦྱོར་གྱི་ཁོངས་སུ་འདྲེན་པ་དང་ཚོགས་ཆེན་རྒྱུན་ཇ་ལ་འགྲོ་བའི་ཚོད་ཙམ་ཡིན། སྐྱེས་པ་གཅོད་པ། རིན་ཆེན་རེག་པ། མ་བྱིན་པར་ཟ་བ་སོགས་མི་རིགས་པ་ཕྲ་མོ་རྣམས་ཀྱང་རྒན་རྒོན་ཐམས་ཅད་ལ་རྒྱུས་ཡོད་པས་རང་དགར་བྱེད་ས་མེད།
དགེ་སློང་འགའ་རེ་ལ་དགེ་འདུན་གྱི་ཡིན་པར་བསྙད་བཏགས་པའི་དངུལ་ཕོན་ཆེ་ཙམ་ཡོད་ཀྱང་། རང་དགར་རེག་ས་མེད་པས་བཞད་གད་འོངས་པར་འདུག དངུལ་རྩིས་བྱེད་པ་ན་བྱིས་པ་ཞིག་གིས་དགེ་སློང་གི་མདུན་དུ་བཀྲམ། དགེ་སློང་གི་ཕྱག་ཏུ་དབྱུག་གུ་རིང་པོ་ཞིག་བསྣམས་ཏེ་དེས་དངུལ་རྣམས་བསྒྱུར་ཏེ་གྲངས་ཀ་བརྒྱབ། བྱིས་པ་རྩིས་ནོར་ཚེ་དབྱུག་གུ་དེ་ཉིད་ཀྱིས་མགོ་ལ་བསྣུན་པ་སོགས་བྱེད་ཀྱིན་འདུག་པས། དགོད་བྲོ་བ་ལས་དང་བ་འདྲེན་པ་ནི་མི་འདུག འོན་ཀྱང་འདུལ་བའི་ཕྱག་སྲོལ་ཙམ་ཡིན་པ་ལ་ནི་བསྙོན་དུ་མེད། ཉིན་གུང་ཡོལ་ན་དགེ་སློང་ལྟ་ཅི། སངས་རྒྱས་ཀྱི་སྐུ་གཟུགས་ལ་ཡང་ཞལ་ཟས་ཕུལ་ན་སྡིག་པར་བརྩི། ཕྱི་དྲོའི་མཆོད་པ་ནི་བཏུང་བ་དང་མར་མེ་སོགས་ཡིན། སྟོན་པ་བསྙེན་པར་རྫོགས་པ་ཡིན་པས་སྐུ་དྲུང་དུ་དགེ་ཚུལ་མི་ཉལ་བ། བུད་མེད་ཀྱིས་མི་རེག་པ་སོགས་ངོ་བོ་ཆོས་དང་འབྲེལ་ལ། རྣམ་པ་དགོད་བྲོ་བའི་སྲོལ་མང་དུ་སྣང་ཡང་བྲིར་མ་ལངས།
སྐབས་འགར་དགེ་འདུན་ལ་བསོད་སྙོམས་འབུལ། མཆོད་རྟེན་གཅིག་དང་ཏ་ལའི་གླེགས་བམ་བཅས་རྒན་རིམ་གྱིས་སེར་སྦྲེང་དུ་བྱས་ཏེ་འབྱོན་པའི་ཞབས་འོག་ཏུ་རས་ཡུག་ཆེན་དཀར་པོ་བརྗེ་ལེན་གྱིས་བཏིང་སྟེ་དཔག་ཚད་ཙམ་སྤྱན་འདྲེན། དགེ་སློང་རྣམས་ཁྱིམ་གྱི་སྒོར་སླེབས་པ་དང་། ཁྱིམ་པ་ཞིག་གིས་ཆོལ་ཟངས་དང་ཆུ་ཐོགས་ཏེ་དགེ་སློང་རེ་རེ་བཞིན་ཞབས་བཀྲུ། གཞན་ཞིག་གིས་རས་ཀྱིས་ཕྱི། དེ་ནས་གདན་ལ་འཁོད་པ་དང་། རྒན་པས་སྐྱབས་འགྲོ་དང་། བསླབ་པའི་གཞི་ལྔ་བཟླས་ཏེ་ཁྱིམ་མི་ཀུན་དེ་ལ་རྗེས་ཟློས་བྱེད། དེ་ནས་ཟས་རྣམས་ཁྱེར་ཏེ་སྦྱིན་བདག་ཀུན་མགྲིན་གཅིག་ཏུ། ཨི་མཾ་བྷི་ཀཁཾ་བྷི་ཀྵུ་སངྒྷསྶ་དེམཾ། ཟས་འདི་དགེ་སློང་གི་དགེ་འདུན་ལ་འབུལ་ལོ་བྱ་བ་ལན་གསུམ་དབྱངས་དང་བཅས་ཏེ་འདོན། དེ་ནས་ཚིག་དེ་བརྗོད་བཞིན་འབྲས་ཆན་དང་། ཚོད་མ་བྲིམ། དེ་ནས་ཞོ། དེ་ནས་ལ་དུ་དང་ཤིང་འབྲས་ཀྱི་མཐར་ཏཾ་བུ་ལ་འབུལ། ཟས་ཟིན་པ་དང་། སྦྱིན་བདག་ཕོ་མོ་གཉིས་ཀྱིས་བུམ་པ་གཅིག་ཐུན་མོང་དུ་བཟུང་ནས་བསོད་ནམས་འདིས་གཉེན་རྣམས་བདེ་བར་གྱུར་ཅིག ལན་འགའ་ཙམ་བཟླས་ཏེ་གཉེན་ཤི་ཟིན་པ་དག་ལ་དགེ་བ་བསྔོ། དེ་ནས་གནས་བརྟན་གྱི་ཕྱག་ཏུ་རླུང་ཡབ་དཀར་པོ་ཞིག་ཐོགས་ཏེ་ཡོན་བཤད་བྱེད། སྦྱིན་པ་འདིས་ཆེད་དུ་མ་བསམ་ན་ཡང་ལྷ་དང་མིའི་བདེ་བ་ཐོབ་པར་ངེས་ཤིང་། གལ་ཏེ་འབད་པའི་སེམས་ཀྱིས་ཆེད་དུ་གཉེར་ནས་བསྔོས་ན་ནི་གྲུབ་པ་དང་། བདེ་བ་བླ་ན་མེད་པའི་མྱ་ངན་ལས་འདས་པའི་རྒྱུར་ཡང་བརྒྱ་ལ་འགྱུར་སྲིད་དོ་ཞེས་སོགས་བཤད་དེ། དགའ་བོ། ཉེར་དགའ། མགོན་མེད་ཟས་སྦྱིན། གྲགས་འཛིན་མ་ལ་སོགས་པ། སངས་རྒྱས་རང་ཉིད་ཀྱི་སྦྱིན་བདག་རྣམས་ཀྱི་མིང་ཐོ་རིང་པོ་ཞིག་བཀླགས་ནས་དེ་ཀུན་ལ་དགེ་རྩ་བགོ་བཤའ་བྱེད། ལར་སྤྱོད་པ་དེ་ཚོ་གང་ཡང་གསར་དུ་མཐོང་ཚེ་ཡིད་མི་འཕྲོག་པའི་ནང་པ་སུ་ཡང་མེད།
གཙུག་ལག་ཁང་དུ་ཟས་ཟ་ཚེ་དགེ་སློང་རྣམས་ཁྲིའུ་ཆུང་ངུ་རེ་ལ་རྒྱ་འདུག་བྱས་ཏེ་གྲལ་དུ་བྱས་ནས་ཟས་ཟ། འདི་རང་རེའི་མིག་ལ་མི་མཛའ་ཡང་། ཆེས་གནའ་དུས་སུ་བྱོན་པའི་བཙུན་པ་ཨི་ཅིང་གི་ལམ་ཡིག་ཏུ་ནཱ་ལནྡཱ་ན་ཡང་དགེ་སློང་རྣམས་དེ་ལྟར་ཟས་ཟ་ཚུལ་གསུངས་འདུག བཙུན་པའི་ཞལ་ནས་སྤྱིར་འདུལ་བ་ལ་གསལ་བར་མ་བྱུང་ཡང་། བཅོམ་ལྡན་འདས་ཀྱི་དགོངས་པ་ཡང་འདི་ཡིན་པར་ངེས་ཏེ་འདུལ་བ་ལས་ཟས་རྐང་པའི་དྲུང་དུ་ལྷུང་ན་སོགས་གསུངས་ལ། ས་ལ་བདེ་བར་བསྡད་ན་རྐང་དྲུང་དུ་ལྷུང་ཚུལ་མེད་པའི་ཕྱིར་དང་། ཡང་ཟས་ཟིན་ནས་རྐང་པ་བཀྲུ་བར་གསུངས་པ་ལ། སྟན་ལ་དཀྱིལ་ཀྲུང་དུ་བསྡད་ན་རྐང་པ་ཅི་ལ་བཀྲུ་དགོས་བྱ་བའི་ཐལ་འགྱུར་གཉིས་ཀྱང་འཕངས་འདུག
ཆོས་ཀྱི་སྤྱོད་ལམ་ཕྲ་མོ་དེ་ཙམ་ལ་ཡང་ཨུ་ཚུགས་མཛད་པ། བཙུན་པ་ཨི་ཅིང་སངས་རྒྱས་ལ་གུས་པ་རེ་ཆེ། ད་དུང་བཙུན་པའི་ཞལ་ནས། སྔར་རང་རེའི་རྒྱ་ནག་ཏུ་ཡང་སྟེགས་ལ་བསྡད་ནས་ཟས་ཟ་བ་ལ་ཕྱིས་ཐང་གི་གོང་མའི་དུས་སུ་ཐམས་ཅད་ས་ལ་སྡོད་པའི་ལུགས་ངན་དེ་བྱུང་སོགས་གསུངས་ནས་འདུག གང་ལྟར་ཡང་ཀྲུང་ཧྭ་མིང་གོའི་དུས་སུ་སྔར་གྱི་སྲོལ་བཟང་དེ་སླར་ཡང་དར་བ་རང་ཅག་གིས་མཐོང་བ་དེ་ལགས། ཨི་ཅིང་འདི་ཆོས་ཀྱི་གྲགས་པ་དང་དུས་མཉམ་ཟེར། འདིའི་ལོ་རྒྱུས་ཞར་བྱུང་དུ་ཐལ། ཉ་སྟོང་དང་གཟའ་འཛིན་སོགས་ཀྱི་མཚན་མོ་ཁྱིམ་པ་ཀུན་དགོན་པར་ཚོགས་ཏེ་མཚན་ཐོག་ཐག་དགེ་སློང་ཞིག་གིས་ཆོས་འཆད། དེ་ལ་ཆོས་གོས་རྣམ་གསུམ་སོགས་ཡོན་དུ་འབུལ། མདོར་ན་རང་རེའི་འདུལ་བ་ལུང་ནས་རྣ་བས་ཐོས་པ་དེ་ཀུན་སིངྒ་ལར་སླེབས་ན་གསོན་པོ་རེ་མིག་གིས་མཐོང་རྒྱུ་འདུག ལན་གཅིག་དགེ་སློང་བཟང་པོ་ཞིག་ཞིང་གི་དཀྱིལ་ན་འབྱོན་གྱི་འདུག་པ་ལ་ངས་དད་པའི་སེམས་ཀྱིས་ཤིང་འབྲས་འགའ་ཞིག་ཉོས་ནས་ཕུལ་བས། ཁོས་ངའི་ལག་ཏུ་པ་ཎ་གཉིས་ཡོད་པ་མཐོང་སྟེ་ད་དུང་ཡང་ཉོས་ཟེར། དེ་རྣམས་ཉོས་ནས་ང་ལ་འཁྱེར་དུ་བཅུག་སྟེ་ཕ་ཚད་ཅིག་ཏུ་སོང་། ཞིང་པ་རྣམས་ལས་ཙརྞ་ཀ་བླངས་ཏེ་ཆག་པ་ཆེན་པོ་ཞིག་བྱུང་། དེ་ནས་སོང་སྟེ་ན་རི་ཀེ་ལའི་པགས་པ་མཐོང་སྟེ་འདི་གད་བདར་བྱེད་པ་ལ་ཕན་ཟེར་ནས། དེ་ཡང་ཕོན་ཆེན་ཞིག་ངའི་སྒལ་པར་བསྐུར་ནས་གཙུག་ལག་ཁང་དུ་ལོག ངེད་ཀྱི་སེམས་ལ་ཆོས་དང་ལས་ཀྱི་ལམ་གཅིག་གིས་འཚོ་བའི་བཙུན་པ་འདི་ཀུན་གྱིས་ཐ་ན་ལྟོགས་འདོད་བྱེད་ལུགས་ཀྱང་། སྔོན་གྱི་དྲུག་སྡེ་དེ་དག་དང་འདྲ་བ་ལ་སྙམ་ནས་དགོད་བྲོ་ལ་ཡིད་མུག་པ་ཞིག་བྱུང་།
དགོན་པ་རེ་རེ་བཞིན་སྟོན་པའི་སྐུ་བཞུགས་པའི་ལྷ་ཁང་གཅིག མཆོད་རྟེན་གཅིག བྱང་ཆུབ་ཤིང་གཅིག གློ་བུར་བ་ལ་འབོགས་པའི་མགྲོན་ཁང་གཅིག དྷརྨ་ཤཱ་ལཱ་བྱ་བ་ཆོས་སྟོན་པའི་མདུན་ཁང་གཅིག སཱེ་མ་སྟེ་མཚམས་བྱ་བའི་ཁང་ཆེན་ཕྱོགས་ཀུན་ནས་རྡོ་རྟགས་བཙུགས་ཏེ་ས་མཚམས་གཅིག་ཡོད་པ་དེ་ནི་འདུལ་བའི་ལས་གསོ་སྦྱོང་། མདོ་འདོན་པ་སོགས་ཐམས་ཅད་བྱེད་པ་ཡིན། ཁྱིམ་པ་ནང་དུ་འགྲོར་མི་ཉན་པ་སོགས་རང་ཅག་གི་མགོན་ཁང་བཞིན་དུ་གཉན། དགེ་སློང་རྣམས་སངས་རྒྱས་དང་རྒན་པ་གཉིས་ལས་གཞན་ལྷ་མི་སུ་ལ་ཡང་ཕྱག་འཚལ་བའི་སྲོལ་མེད་པ་རང་རེའི་ཆག་ལོས་རྡོ་རྗེ་གདན་དུ་ཇི་ལྟར་གཟིགས་པ་དེ་ཁོ་ན་ལྟར་སྣང་། ཁྱིམ་པ་མི་ཆེན་སུ་འདྲས་བཀུར་བསྟི་བྱས་ཀྱང་ལན་དུ་མགོ་ཙམ་གུག་པའི་སྲོལ་ཡང་མེད། གཙུག་ལག་ཁང་རྣམས་སུ་སྟོན་པ་བཞུགས་པ། བཞེངས་པ་དང་གཟིམ་པའི་སྐུ་གསུམ་རེ་སྤྱོད་ལམ་བཞིའི་དོད་དུ་ཡོད། ཤཱ་རིའི་བུ་དཀར་པོ་དང་། མཽད་གལ་བུ་ནག་པོ་ཞིག་བཞེངས་སྲོལ་གདའ། མར་མེ་མཛད་སོགས་བྱང་ཆུབ་སེམས་པའི་དགེ་བའི་བཤེས་གཉེན་དུ་གྱུར་པའི་འདས་པའི་སངས་རྒྱས་ཉི་ཤུར་གྲགས་པ་དག་དང་། སངས་རྒྱས་བདུན་ཕྲག་བདུན་གྱི་སྤྱོད་ལམ་མཛད་པ་རྣམས་ཤས་ཆེར་ཡོད། བཞེངས་བདེ་བའི་ཁྱད་ཡིན་ནམ་སྟོན་པ་མྱ་ངན་ལས་འདས་པའི་སྐུ་འདི་རྒྱ་ནག་ལ་སོགས་པའི་ཡུལ་གཞན་ན་ཡང་ཤིན་ཏུ་དར་ཆེ་བ་ལ་བོད་ན་ཡེ་མཐོང་རྒྱུ་མེད་པ་ཡ་མཚན། སངས་རྒྱས་གྲོངས་པ་ལྟས་ངན་ཡིན་སྙམ་པ་སེམས་ཀྱི་ཕུག་ན་ཡོད་པར་འདུག
ཉན་ཐོས་སྡེ་པ་རྣམས་ནི་ཆོས་ཀྱི་གོ་བ་བཟང་ཞིང་། མྱ་ངན་ལས་འདས་ཚེ་གོ་འཕང་མཐར་ཐུག་བརྙེས་པར་འདོད་པས་རྟེན་གྱི་གཙོ་བོ་ཡང་དེ་ལ་བྱེད། གནས་བརྟན་བཅུ་དྲུག་གི་སྡེ་ཚན་འདི་ཁོང་རྣམས་ལ་མ་གྲགས། འོན་ཀྱང་འཁོར་གྱི་གཙོ་བོ་བརྒྱད་ཅུར་གྲགས་པའི་ནང་ན་བཅུ་དྲུག་པོ་ཡང་འདུ། དེ་དག་ཀྱང་ཁྱིམ་པ་དད་པར་བྱེད་པ་འཆར་ཀ གནས་མལ་བསྐོ་བ་གྱད་བུ་ནོར་སོགས་སྟོན་པའི་ལུང་བསྟན་པའི་དགེ་སློང་མདོ་ན་ལོ་རྒྱུས་གསལ་བ་དག་ཡིན། སྒོ་ཁང་དུ་སྲིད་པའི་འཁོར་ལོ་བྲིས་པ་ཡང་མེད། དེ་མཚུངས་འཁར་གསིལ་ཡང་མེད། དེ་གཉིས་ལ་ཁོང་རྣམས་ཀྱིས་མདོ་ཁུངས་ཀྱང་མེད་ཟེར། དགོན་པ་འགའ་ལ་མགོན་ཁང་བཞི་རེ་ཡོད་པའི་ནང་ན་ཀུན་བཟང་དང་། སྤྱན་རས་གཟིགས། ཁྱབ་འཇུག གདོང་དྲུག་རྣམས་ཡོད། སྤྱན་རས་གཟིགས་ལ་ནཱ་ཐ་སྟེ་མགོན་པོ་ཟེར་ཞིང་གོ་ས་ཡང་དེ་ག་ཡིན། དེ་བཞི་ཀ་ཡང་བྱང་སེམས་སུ་བརྩི་ཞིང་ཁྱིམ་པའི་མཆོད་གནས་དང་། དགེ་སློང་གི་བཀའ་སྡོད་ཙམ་ཡིན།
 |
| ཨ་ནུ་ར་དྷ་པཱུར། མ་འགས་པའི་གྲོང་། |
འོན་ཀྱང་ད་ལྟའི་ལོ་ལྔ་བརྒྱ་ཙམ་གྱི་སྔར་སྤྱན་རས་གཟིགས་ལ་ཡི་དམ་དུ་བྱེད་པའི་དགེ་སློང་དུ་མ་དང་། དེ་དག་གིས་མཛད་པའི་བསྟོད་པ་མཛེས་པ་དག་ཀྱང་ཡོད། བྲག་ལ་བརྐོས་པའི་སྤྱན་རས་གཟིགས་ཤིག་ཀྱང་བེ་ལི་ག་མ་བྱ་བར་སྣང་། གཙུག་ལག་ཁང་འགའ་རེའི་སྒོ་འཕྱོར་དུ་རི་དྭགས་འཛིན་གྱི་མ་དང་མགོན་མེད་ཟས་སྦྱིན་གཉིས་ཀྱི་སྐུ་བརྙན་ཡོད། དེ་གཉིས་ཀྱང་ཆོས་སྐྱོང་འདྲ་བ་ཞིག་ཡིན། ལྷག་པར་རི་དྭགས་འཛིན་གྱི་མ་ས་ག་མ་དེ་གཡང་ལྷ་དང་། བུ་ལྷ་ལྟ་བུ་ཞིག་ཏུ་བརྩི། སྟོན་པའི་འཁྲུངས་སྐར་དང་། དགུང་ལོ་དང་། དབང་ཐང་སོགས་རེའུ་མིག་ཏུ་བཀོད་པ་མགུལ་དུ་བཏགས་ཏེ་སྲུང་འཁོར་དུ་བྱེད།
དགེ་སློང་དག་གི་ནར་མའི་ཀུན་ཏུ་སྤྱོད་པ་ནི། ནངས་སྔ་བར་ལངས་ཏེ་སོ་ཤིང་ཟ་བཞིན་ཕྱགས་མ་ཡུ་བ་རིང་པོ་སྒུར་མི་དགོས་པ་ཞིག་བཟུང་ནས་མཆོད་རྟེན་དང་བྱང་ཆུབ་ཤིང་གི་རྭ་བར་གད་བདར་བྱེད། དེ་ནས་གདོང་དང་རྐང་པ་བཀྲུས་ཏེ་སངས་རྒྱས་དང་། མཆོད་རྟེན་དང་བྱང་ཆུབ་ཤིང་རྣམས་ལ་ཕྱག་འཚལ་ཞིང་སོ་སོའི་ཚིགས་བཅད་རྣམས་འདོན། དེ་ནས་མཁན་པོ་དང་། རྒན་པ་ལ་ཕྱག་འཚལ་ནས་རུང་ཁང་དུ་སླེབས་ན། ནངས་མོའི་བསོད་སྙོམས་འབུལ་བ་སྦྱོར། ཟས་ཟིན་པ་དང་། དཀྱུས་མའི་བྱ་བ་དག་བྱེད། དྲིལ་བུ་བརྡུང་བ་དང་ཐམས་ཅད་ཁྲོན་པའི་དྲུང་དུ་སོང་སྟེ་ལུས་ཡོངས་རྫོགས་བཀྲུ་ཞིང་གོས་གཤེར་བ་བརྗེས། གཞོན་ནུ་རྣམས་རྒྱ་མཚོའི་འགྲམ་ལ་ཉིན་ལྟར་འགྲོ་ཞིང་ཁྱིམ་པ་དག་གིས་མི་མཐོང་བ་དང་། ཆུ་ལ་རྐྱལ་བ། གཅེར་བུར་རྒྱུག་པ་སོགས་འཕགས་པ་བཅུ་བདུན་སྡེའི་རྣམ་ཐར་རྣམས་ཀྱང་སྐྱོང་། སླར་ལོག་སྟེ་གདུགས་ཚོད་གསོལ། ཟས་ཟིན་པ་དང་མལ་དུ་ལོག་སྟེ་ཡུད་ཙམ་ཉལ། འདི་ཚ་བའི་ཡུལ་ཐམས་ཅད་ན་སྲོལ་དུ་ཡོད། ཕྱེད་ཡོལ་ནས་འོ་མ་མེད་པའི་ཇ་རྒོད་དཀར་ཡོལ་གང་ཙམ་རེ་འཐུང་། དགོང་ཀ་ཡང་ཇ་འཐུང་ཞིང་བཀྲེས་པ་དག་གིས་བུ་རམ་འདྲ་ཟ།
ས་རུབ་ནས་ཐམས་ཅད་གཙུག་ལག་ཁང་དུ་ཚོགས་ཏེ་ཚིགས་བཅད་འདོན། གཞོན་པ་རྣམས་ཀྱིས་རྒན་པ་ལ་ལྟུང་བ་བཤགས། སླར་གྲལ་རིམ་བཞིན་འཁོད་དེ་ཡུན་རིང་ཙམ་ཞིག་ཏིང་ངེ་འཛིན་ལ་སྡོད་པའམ་སྡོད་ཁུལ་བྱེད། ཐམས་ཅད་བསམ་གཏན་གྱི་དངོས་གཞི་ལ་སྙོམས་པར་ཞུགས་ཏེ་མིག་ཟུམ་མེ་ཡོད་པའི་སྒང་ལ་གནས་བརྟན་གྱིས་འདི་སྐད་བདག་གིས་ཐོས་པ་ཞེས་མདོའི་དབུ་བསྐུལ་བ་དང་མཉམ་དུ་གཞན་རྣམས་ཀྱང་མིག་ཧར་གྱིས་བསྒྲད་ནས་མཉམ་དུ་འདོན། དཀོན་མཆོག་རྗེས་དྲན་དང་། རྟེན་འབྲེལ་གྱི་མདོ། བྱམས་པའི་མདོ་ལ་སོགས་པ་རེས་མོས་སུ་སྒྲོག
མཆོད་རྟེན་དང་། བྱང་ཆུབ་ཤིང་དྲུང་དུ་ཡང་སོང་ནས་ཚིགས་བཅད་རེ་འདོན། རྒན་པ་ལ་ཕྱག་འཚལ་ནས་རང་རང་གི་ལམ་དུ་ལོག དཔེ་བལྟ་བ་དང་གླེང་མོལ་འདྲ་བྱེད་བཞིན་ནམ་གུང་ཐུག་ཐུག་ལ་སྡོད། དེ་ནས་རྐང་པ་བཀྲུས་ཏེ་ཆོས་གོས་གྱོན་ནས་ཉལ།
མཚན་ལ་དགེ་སློང་རྒན་པོ་རྣམས་གཉིད་སད་རེས་ཀྱིས་དངངས་སྐྲག་གི་ཉམས་དང་བཅས་ཏེ་འདུས་བྱས་ཐམས་ཅད་མི་རྟག་པའོ།། མི་རྟག་པའོ།། མི་རྟག་པའོ།། སབྦ་སཾཀཱརཱ་ཨནིཙྱ། ཨ་ནི་ཙྱ། ཨ་ནི་ཙྱ། སོགས་དང་། ཡང་ན། མ་རིག་པའི་རྐྱེན་གྱིས་འདུ་བྱེད་སོགས་སྐད་གསང་མཐོན་པོས་འཆོལ་ལེ་བ་ཞིག་བསྐྱོར་ཏེ་ཉེ་འཁོར་ཡས་མས་ན་ཡོད་པ་ཐམས་ཅད་གཉིད་བཀྲོག་པས་དད་པ་དང་འཚིག་པ་གཉིས་ཀ་རེས་མོས་སུ་བྱེད་དགོས་པ་ཞིག་ཡོད།
དགེ་སློང་འགའ་རེས་ཕྲེང་བ་བཟུང་ནས་སྔགས་འདྲ་བ་ཞིག་འདོན་གྱིན་འདུག་པར་མཉན་ན་གོང་གི་ཚིག་དེ་རྣམས་འདོན་གྱིན་འདུག ཡང་འགའ་རེས། བཅོམ་ལྡན་འདས་དེ་བཞིན་གཤེགས་པ་ཞེས་པ་ནས་ལྷ་དང་མི་རྣམས་ཀྱི་སྟོན་པ་བྱ་བའི་བར་དང་། འགའ་རེས་ཚིག་དེ་རྣམས་ཀྱི་རྒྱ་སྐད་ཐོག་མའི་ཡིག་འབྲུ་རྣམས་བཟླ་ཞིང་འདུག ཁོང་རྣམས་དེ་ལ་སྒོམ་བྱེད་པ་ལས་སྔགས་བཟླས་པའི་ཐ་སྙད་མི་འདོགས། མི་ཞིག་ཕྲེང་བ་ཐོགས་པ་མཐོང་ན་ཡང་། ཁོང་གིས་བྷཱ་བན། སྒོམ་བྱེད་ཀྱིན་འདུག་ཅེས་ཟེར། བགྲང་བ་དང་གཞལ་བའི་སྒོམ་གསུངས་པས་ཐ་སྙད་དེ་འདྲ་འདོགས་ཀྱང་འོས་པར་མངོན། དབྱར་སྔ་མ་རང་རེའི་ཧོར་ཟླ་དྲུག་པའི་བཅུ་དྲུག་ནས་དང་། ཕྱི་མ་བདུན་པའི་བཅུ་དྲུག་ནས་ཚུགས་ཏེ་ཟླ་འཁོར་གསུམ་སྡོད། དབྱར་གྱི་སྒང་ལ་ཟས་སོས་པ་འབུལ་བའི་སྦྱིན་བདག་མང་བས་དགེ་སློང་ཚོ་ཤ་རྒྱགས་སུ་འགྲོ་བའི་གཏམ་དཔེ་ཡང་འདུག དབྱར་སྔ་མའི་དགག་དབྱེ་ཟིན་ནས་ཉེ་འཁོར་གྱི་གྲོང་པ་ཐམས་ཅད་ཚོགས་ཏེ་ཀ་ཋཱི་ན་དཱ་ན་སྲ་བརྐྱང་གི་སྤྱིན་དང་ངུར་སྨྲིག་གི་དུས་སྟོན་བྱེད། དེ་ཡང་གྲོང་པའི་སྐྱེས་པ་བུད་མེད་བྱིས་པ་ཐམས་ཅད་ནམ་གུང་ཙམ་ན་ཡར་ལངས་ཏེ་སེར་ཕྲེང་བཞིན་བསྒྲིགས། མར་མེ་ཆེན་པོ་རྣམས་འཁྱེར། ཐམས་ཅད་ཀྱི་སྤྱི་བོར་མཁར་གཞོང་ཆེན་པོ་རེའི་ནང་དུ་ཆོས་གོས་ཀྱི་རྒྱུ་རས་དཀར་པོ་ཡུག་ཆེན་དང་། སྣམ་ཕྲན་དང་། གླེགས་བུ་ལྡང་བ་སོགས་ཅི་འབྱོར་པ་རེ་བཞག སཱ་དྡྷུའི་སྒྲ་དང་། རོལ་མོ་སྣ་ཚོགས་བཅས་ཡུལ་དེའི་མཆོད་རྟེན་སོགས་ཡོད་ཚད་ཀྱི་དྲུང་དུ་བསྐོར། མཐར་གཙུག་ལག་ཁང་དུ་འོངས་ཏེ་དགེ་སློང་རེ་རེ་བཞིན་འབུལ།
སྐྱ་རེངས་ཤར་བ་ཙམ་ལ་སྟེགས་བུ་ཆེན་པོ་མེ་ཏོག་གིས་སྤྲས་ཤིང་དྲི་བཟང་གིས་བྱུགས་པའི་སྟེང་དུ་རས་ཡུག་ཆེན་ཞིག་བཏིང་། དགེ་སློང་བཞིས་གྲིའུ་ཆུང་ཐིག་སྐུད་ཁབ་སོགས་འཁྱེར། དེ་ནས་གུར་ཀུམ་གྱིས་སྦངས་པའི་ཐིག་སྐུད་རིང་པོའི་སྣེ་གཅིག་དགེ་སློང་དང་། སྣེ་གཞན་དེ་སྦྱིན་བདག་གིས་བཟུང་བའི་རྒྱབ་ཀྱི་ཕར་ན་སྐུད་པའི་མཐའ་བྱིས་པ་རྣམས་ཀྱིས་འཚང་ག་བརྒྱབ་སྟེ་བཟུང་ནས་རྨ་ཆུའི་ཁ་ན་གྲུ་ཐག་འཐེན་པའི་བཟོ་འདྲ་ཞིག་བྱས། དེ་ནས་ཐིག་བཏབ་པ་དང་མཉམ་དུ་ཕྱི་རོལ་ནས་ཁྱིམ་པ་ཐམས་ཅད་ཀྱིས་ཅིག་ཅར་དུ་སཱ་དྷཱུ། སཱ་དྷཱུ་ཟེར་ཞིང་རྔ་བོ་ཆེ་བརྡུང་། སྟོན་པའི་བསྟན་པ་གནས་སོ།། ཚུལ་ཁྲིམས་ཀྱི་རྒྱ་མཚོ་མ་ཉམས་སོ་སོགས་ཅ་ཅོ་ཆེན་པོ་དང་བཅས་རོལ་མོ་སྒྲོག གླུ་གར་བྱེད། ཆོས་གྲྭ་པ་སོགས་ཐམས་ཅད་ལ་འདུལ་བའི་སྔགས་མང་པོ་འདོན་རྒྱུ་ཡོད། ཀུན་རིག་གི་བདག་འཇུག་ལས་ཀྱང་རྒྱ་ཆེ། མདོར་ན་ཆོས་གོས་གྲུབ་པ་དེ་ཉན་ཐོས་དགེ་སློང་རྣམས་ཀྱི་ལོ་གཅིག་གི་སྒྲུབ་མཆོད་ཆེ་ཤོས་དེར་སྣང་། དེ་ནས་ཉིན་གུང་བར་ཐམས་ཅད་ལག་རུབ་ཀྱིས་ཆོས་གོས་ཤིག་བཙེམས་ཏེ་ཁ་ཡང་བསྒྱུར། དགེ་འདུན་ལ་ཕུལ་ཏེ་དགེ་སློང་མཁོ་བ་ཞིག་ལ་སྟེར། ཆོ་ག་དེས་ངེད་ཀྱི་ཡིད་འཕྲོག་དྲགས་ཏེ་འདིར་ཡང་ཞིབ་ཙམ་བྲིས། ངུར་སྨྲིག་གི་དུས་སྟོན་དེ་རང་རེའི་ཧོར་ཟླ་དགུ་པ་ཙམ་ལ་ཡིན། ཟླ་བ་དེ་ལ་ངུར་སྨྲིག་གི་ཟླ་བར་ཡང་འབོད། ཟླ་བ་དེར་གླིང་འདིར་ཆར་ཞོད་ཤིན་ཏུ་ཆེ་བ་ཡོང་བས་དེ་དཀར་ཕྱོགས་ཀྱི་ལྷ་རྣམས་དགའ་བའི་མཐུ་ཡིན་སོགས་ཟེར། ཆོས་གོས་ནི་གླེགས་བུ་ཕྱེད་དང་གསུམ་ལ་རྣམ་ཕྲན་ལྔ་པ་རྐྱང་ཡིན། འོན་ཀྱང་རྣམ་ཕྲན་ཉེར་ལྔའི་བར་བྱེད་པ་ལ་འགལ་བ་མེད་ཟེར་ནས། འགའ་ཞིག་གིས་རེའུ་མིག་ཕྲ་མོས་གང་བའི་སྣམ་སྦྱར་ཡང་གྱོན།
ཆོས་གོས་གྱོན་སྟངས་དེ་ཤིན་ཏུ་ཡ་མཚན། གྲྭ་གཉིས་མཉམ་པར་གཤིབས་ནས་ཕྱོགས་གཅིག་ཏུ་བསྒྲིལ། དྲིལ་བའི་མཐའ་དཔུང་པ་གཡས་ནས་རྒྱབ་ཏུ་བསྐོར་ཏེ་མཆན་འོག་ནས་ཚུར་བླངས་པའི་སྣེ་མོ་ལག་པས་བཟུང་བས་མགྲིན་པ་ནས་ཤམ་ཐབས་ཀྱི་མཐའི་བར་ཁེབས་པའི་ཡ་མཚན་ཞིག་འདུག ཅུང་ཟད་གོམས་ན་མིག་ལ་ཡང་ཆེར་མཛེས།
རྒྱ་གར་གྱི་སྐུ་བརྙན་རྙིང་མ་ཀུན་དང་། རྒྱ་ནག་ཙནྡན་ཇོ་བོའི་བཟོ་ལུགས་དེ་ཀུན་ལ་ཆོས་གོས་འདི་ལྟར་ཡོད། གྲྭ་གཅིག་ཕྱག་གིས་བཟུང་བ་ཡང་དེ་ཀུན་ལ་ཡོད། དབང་བསྐུར་མཇུག་ཏུ་སློབ་མ་ལུང་སྟོན་སྐབས། ཤཱཀྱ་ཐུབ་པ་ཕྱག་གཡོན་གྱིས་ཆོས་གོས་ཀྱི་གྲྭ་རི་དྭགས་ཀྱི་རྣ་བ་ལྟར་བཟུང་བ་སོགས་བཤད་པ་ཡང་ཆ་ལུགས་འདི་རང་དུ་སེམས། འོན་ཀྱང་ཁོང་པའི་ཆོས་གོས་དཔང་དུ་ཁྲུ་ལྔ་རེ་ཡོད་པ་དེ་ལ་གྱོན་ལུགས་འདི་བཏུབ་ཀྱི་རང་རེའི་ཆོས་གོས་ཆུང་དྲགས་པས་མི་བཏུབ། དེ་ལ་གླིང་འདིའི་དགེ་སློང་ཐམས་ཅད་ཀྱང་གནས་བརྟན་སྡེ་པ་ཁོ་ན་ཡིན་ཞིང་། ནང་གསེས་ཀྱི་མཁན་བརྒྱུད་མི་འདྲ་བ་ལས་ཕྱེས་པ་ཤྱཾ་ནི་ཀཱ་ཡ། སྔོ་སངས་ཅན་གྱི་སྡེ་དང་། ཨ་མ་ར་པུ་ར་ནི་ཀཱ་ཡ་འཆི་མེད་གྲོང་གི་སྡེ། རཱ་མནྣ་ནི་ཀཱ་ཡ་དགའ་བ་ཅན་གྱི་སྡེ་བྱ་བ་གསུམ་ཡོད། གནས་བརྟན་པ་རྣམས་ཀྱི་མིང་མཐར་འབྱུང་གནས། གོ་ཆ་སོགས་ཡོད་པར་བཤད་མོད། འདིར་མིང་ལ་ངེས་པ་མི་འདུག་ཅིང་། གོ་ཆའི་མིང་ནི་མི་སྲིད་པ་ཙམ་ཡིན། ནགས་ཀྱི་རིན་ཆེན་བྱ་བའི་མིང་ཡང་མང་། དེ་ལ་ཤྱཾ་པ་རྣམས་ནི་སྡེ་གསུམ་ཀ་ལས་འབྱོར་ཞིང་དབང་ཆེ། སྟོན་པའི་ཚེམས་དང་། བྱང་ཆུབ་ཤིང་གི་བདག་པོ་ཡང་ཁོང་རྣམས་ཡིན། རིགས་ཆེན་པོའི་མི་རབ་ཏུ་བྱུང་བ་རྐྱང་ཡིན། སྔར་རིགས་དམན་ཡང་རབ་ཏུ་འབྱིན་པ་ལ་རྒྱལ་བློན་སོགས་ཀྱིས་ཕྱག་འཚལ་བའི་ཚེ་མ་བཟོད་པར་སྟན་ལས་ལངས་པ་སོགས་བྱས་པས་དེ་ཕྱིན་ཆད་དེ་རྣམས་རབ་ཏུ་འབྱིན་པ་བཀག་ཟེར། ཆོས་གོས་རང་རེ་བཞིན་དཔུང་པ་ཡ་གཅིག་ལ་བགོ སྨིན་མ་ཡང་བཞར། དེ་ནི་འདུལ་བར་ཁའི་སྤུ་བྲེགས་བྱ་བ་ལ། གདོང་གི་སྤུ་བྲེགས་བྱ་བའི་དོན་དུ་མཛད་པའི་ལུགས་ཡིན། ཨ་མ་ར་པུ་ར་པ་རྣམས་ནི་ཆོས་གོས་དཔུང་པ་གཉིས་སུ་བགོ དགོན་གནས་ཤིན་ཏུ་མང་།
 |
| འཇིགས་མེད་རི་བོ། |
རཱ་མནྱ་པ་ནི་འདུལ་བའི་ལག་ལེན་གུ་དོག་པའི་མཐར་ཐུག བསྙེན་རྫོགས་བྱེད་པ་ན་མཚམས་ཀྱང་ཆུའི་དབུས་སུ་གྲུ་ལ་བསྡད་དེ་བྱེད་དགོས། སྡེ་གཞན་གཉིས་ཀྱི་མཁན་བརྒྱུད་མ་དག་པས་ཁོང་རྣམས་ལ་བསྙེན་རྫོགས་མཚན་ཉིད་པ་ཡང་མེད་ཟེར་ཞིང་། དེ་དག་དང་ལྷན་དུ་མདོ་འདོན་པ་དང་། ཟས་ཟ་བ་ཡང་མི་བྱེད། དེའི་རྐྱེན་གྱིས་སྡེ་གཞན་གཉིས་ཁོང་ཅག་ལ་སྡང་བར་བྱེད། འོན་ཀྱང་ཁྱིམ་པ་རྣམས་ནི་ཐམས་ཅད་ལས་ཁོང་ཅག་ལ་མོས། རིགས་ངན་ཤ་སྟག་རབ་ཏུ་བྱུང་བ་ཡིན། རས་ཀྱི་ཆར་གདུགས་ཀྱང་འཛིན་དུ་མི་རུང་བས། ཏ་ལའི་ལོ་མ་ལས་བྱས་པའི་གདུགས་ཉ་ལྕིབས་ཀྱི་དབྱིབས་འདྲ་བ་དག་ཁྱེར། སྦྱངས་ཡོན་ལ་གནས་པའི་མཆོག་ནི་ཁོང་ཚོ་ཡིན། དེའི་ནང་ནས་ཀྱང་དགེ་བའི་གདུང་གི་སྡེ་ཀལྱ་ཎ་བཾ་ཤ་བྱ་བ་དེ་ཀུན་ལག་ལེན་དོག་པའི་མཐར་ཐུག སྤྱིར་སིངྒ་ལའི་དགེ་སློང་དེ་ཀུན་རང་ལུགས་ཁོ་ན་མཆོག་འཛིན་བྱེད་ཅིང་། གཞན་ལུགས་ལེགས་ཉེས་གང་ཡིན་ཡང་དབྱེ་བསལ་མེད་པར་ཧྲིལ་གྱིས་འདོར། འོན་ཀྱང་ཐེག་པ་ཆེན་པོའི་ལྟ་བའི་ཆ་ལ་མོས་པ་ཙམ་ནི་མང་། དབུ་མའི་རྩ་བ་བློ་ལ་ཡོད་པ་འགའ་ཡང་འདུག ལོངས་སྐུ་སོགས་རྒྱ་ཆེ་བའི་རྣམ་གཞག་གཞན་ནི་མུ་སྟེགས་ཀྱི་ཚངས་པ་ཆེན་པོའི་འདྲ་བཀབ་སྟེ་བཤད་པ་ཡིན་སོགས་ཟེར། ལྷག་མེད་ཀྱི་བེམ་རིག་རྒྱུན་ཆད་པ་ལ་གོ་བ་ཟབ་ཅིང་ཉོག་པ་ཞིག་བྱེད་རྒྱུ་འདུག དགྲ་བཅོམ་ལས་བྱང་ཆུབ་སེམས་དཔའ་ལྷག་བྱ་བ་དེ་མུ་སྟེགས་ཀྱི་རྒྱལ་རིགས་རྣམས་ཀྱི་ངག་སྒྲོས་ཡིན་ཟེར། གཞན་ཡང་། ཕལ་ཆེ་བ་རྣམས་ཀྱིས་དཀོན་མཆོག་བརྩེགས་པའི་མདོ་དང་། རྡོ་རྗེ་མོའི་བུ་པ་དག་གིས་སྒྱུ་མ་དྲྭ་བའི་རྒྱུད་བརྩམས་སོ་སོགས་ཐོ་རིང་པོ་ཞིག་ཡོད་ཀྱང་། ཁྱེད་རྣམས་འཁོན་ཀ་གཏུག་པར་མི་འདོད་པས་འདིར་མ་བཀོད། ཐོ་དེའི་མཇུག་ཏུ། དེ་ལྟ་མོད་ཀྱི་བདེ་བར་གཤེགས་པའི་བསྟན་པའི་སྙིང་པོ་ཙམ་ནི་དེ་ཀུན་གྱི་ཁྲོད་ན་མ་ཉམས་པར་བཞུགས་ཤིང་། ལྷག་པར་གངས་རི་པའི་སྡེ་རྣམས་ཀྱིས་འདོན་པའི་སྡེ་སྣོད་གསུམ་ནི། སངས་རྒྱས་རང་གི་ཞལ་ནས་གསུངས་པ་དག་དང་ཚིག་དོན་གཉིས་ཀའི་ཆ་ནས་ཤིན་ཏུ་འདྲ་བ་ཡིན་ནོ་སོགས་བྲིས་སོ།། གངས་རི་པ་དེ་གནས་བརྟན་སྡེ་པ་ལས་གྱེས་པར་སློབ་དཔོན་ལེགས་ལྡན་གྱིས་གསུངས་པས་ཁོང་རྣམས་ཀྱི་མདོ་དང་། གནས་བརྟན་པ་དག་གི་མདོ་ནི་འདོན་པ་མཐུན་པར་ངེས་པས། འདྲ་ཚུལ་ཡང་དོན་ལ་དེ་བཞིན་པར་འདུག་གོ། ཁོང་རྣམས་ལ་ཉན་ཐོས་སྡེའམ། ཐེ་ར་བཱ་ད་སྟེ་གནས་བརྟན་སྨྲ་པར་འབོད་པ་ལས་ཧི་ན་ཡཱ་ན་སྟེ་ཐེག་དམན་དུ་བོས་ན་འབར་དུ་འོངས། མིང་དེ་སྐད་སུས་བཏགས། འོ་ན་སངས་རྒྱས་ལ་ཡང་སྟོན་པ་དམན་པར་སྨྲོས་ཤིག་སོགས་ཟེར། ལྷག་པར་ཡང་རྡོ་རྗེ་ཐེག་པ་ནི་ཡ་ང་བའི་གནས་ཤིག་ཏུ་བརྩི་པཉྩམཀཱར་སྟེ་མ་ཡིག་ལྔ་པ་ཞེས་སྨོད། ངས་བོད་ན་བུ་སྟོན་དང་། རྗེ་ཙོང་ཁ་པ་ལྟ་བུའི་དགེ་སློང་ཡང་སྔགས་ལ་མོས་སྨྲས་པས་རྣ་བར་མ་སོང་བ་བྱེད་ཀྱིན་འདུག དགེ་སློང་ཞིག་མི་ལ་རས་པའི་ལོ་རྒྱུས་ཐོས་ནས་ཁོ་དགེ་བསྙེན་བཟང་པོ་ཞིག་ཡིན་འདུག་སྙམ་ནས་མོས་པ་དགའ་རབ་འདུག་པ་ལ། ངས་ཁོ་ཡང་གསང་སྔགས་པ་ཡིན་སྨྲས་པས་གཏམ་གྱི་འཕྲོ་ཡང་མི་མཉན་པར་ལངས་ཏེ་སོང་། མ་ཡིག་ལྔར་བསྡུས་པའི་བཤད་པ་དེ་འདྲ་རང་རེའི་རྒྱུད་ན་ནི་ཡོད་པར་མ་མཐོང་ལ། མུ་སྟེགས་ཀྱི་རྒྱུད་དུ་ནི་ངེས་པར་དུ་སྣང་། དེ་ནི་དཔེར་ན། ནག་མོ་རྣམ་སྒེག་གི་རྒྱུད་ལས། མདྱཾ་ མཱཾསཾ་ ཏཐཱ་ མདྱོ་ མུཏྲཱ་ མཻཐུནམེཝཅ། པཉྩཏཏྭབིཧཱིནཱཡཱཾ་ པཱུཇཱཡཱཾ་ ན་ ཕལོདྦྷབཿ། ཆང་དང་ཤ་དང་དེ་བཞིན་ཉ།།ཕྱག་རྒྱ་མོ་དང་གཉིས་སྦྱོར་ཏེ།།དེ་ཉིད་ལྔ་ཡིས་དམན་པ་ཡི།།མཆོད་པ་རྣམས་ལ་འབྲས་མི་འབྱུང་།། བྱ་བ་སྟེ་དེ་དག་གི་རྒྱ་སྐད་ལ་མ་ཡིག་ལྔ་ཡོད་པ་ཡིན། དེ་བཞིན་ཐེག་ཆེན་སློབ་དཔོན་ཡུལ་འདིར་སྔར་བྱོན་པ་འཕགས་པ་ལྷ་དང་། ཤནྟི་པ་སོགས་ཀྱི་ལོ་རྒྱུས་ཙམ་ཡང་མེད། གུ་རུ་ལྷོ་ཕྱོགས་པས་སིངྒ་ལའི་ཀཎྜི་ཡུལ་དུ་མཇལ་གསུངས་པའི་ཤནྟི་པའི་དངོས་སློབ་དེ་རྙེད་དུ་རེ་བས་བདག་ཡུལ་དེར་ཟླ་ཕྱེད་ལྷག་བསྐོར་ཀྱང་སུ་ལ་ཡང་རྒྱུས་མི་འདུག དེ་དུས་དགུང་ལོ་བདུན་བརྒྱ་ལོན་འདུག་གསུངས་པས་ད་ནི་དགུ་བརྒྱ་ལྷག་ཡིན་རྒྱུ་ལ། ཡང་ན་ནི་སྐུ་འདས་པར་ངེས། དེ་མིན་ཐེག་ཆེན་པ་མི་གཅིག་བོད་ནས་འོངས་པ་ལ་མཇལ་ཁ་ནི་ཅིའི་ཕྱིར་མི་གཏོང་སྙམ་པ་བྱུང་། དེ་བཞིན་གནས་བརྟན་རྡོ་རྗེ་མོའི་བུ་ཡང་གར་བཞུགས་ཀྱི་ས་མིག་སུ་ལའང་རྒྱུས་མི་འདུག་པས། ཕྱིས་འགྲོ་མཁན་ཞིག་བྱུང་ན། མ་ཧིན་ཏ་ལ་རི་སུལ་དུ་འཚོལ་བར་ཞུ། ན་ད་རིགས་སོགས་ནི་དེ་ལས་ཀྱང་ག་ལ་ཤེས། འོན་ཀྱང་སྔར་ཐེག་ཆེན་དར་བ་ནི་ཀུན་ལ་རྒྱུས་ཡོད་ཅིང་རྒྱལ་རབས་ནང་ན་ཡང་རྒྱས། སྔོན་གྱི་དགེ་བསྙེན་ཀུ་རུ་ཀུལླ་གོ་མི་བྱ་བའི་ཐེག་ཆེན་པ་ཞིག་གིས་མཛད་པའི་བྱང་ཆུབ་ཤིང་གི་རྒྱལ་རབས་སོགས་སྣང་། འདིས་ཐེག་ཆེན་གྱི་མདོ་འགྲེལ་འགའ་ཡང་བྱས་ཟེར། སིངྒ་ལའི་དགེ་བསྙེན་སའི་རྩ་ལག་གིས་མཛད་པའི་སྙིང་རྗེ་པད་དཀར་གྱི་འགྲེལ་པ་ཞེས་བུའི་བསྟན་འགྱུར་དཀར་ཆག་ཏུ་ཡང་ཚུད་པ་དེ་འདི་དང་གཅིག་གམ་སྙམ། དེས་ན་གདོན་མི་ཟ་བར་དགེ་བསྙེན་དེའི་མཚན་ཡང་གོོ་ཀུ་ལ་གོ་མི་བྱ་བར་ངེས། དེ་ལ་མ་ཧཱ་བི་ཧཱ་ར་གཙུག་ལག་ཁང་ཆེན། ཛེ་ཏ་བ་ན་རྒྱལ་བྱེད་ཚལ། ཨ་བྷྱ་གི་རི་འཇིགས་མེད་རི་བོ་གསུམ་ནི་སྔོན་གླིང་འདིའི་གནས་གཞི་ཀུན་གྱི་རྩ་བ་ཡིན་ཞིང་། རིམ་པ་བཞིན་རྒྱལ་པོ་སྐར་རྒྱལ་དང་། སྡེ་ཆེན་དང་། འཇིགས་མེད་རྣམས་ཀྱིས་བཞེངས། དེ་གསུམ་གའི་ཤུལ་ན་མཆོད་རྟེན་རི་འདྲ་བ་རེ་དང་། སྔོན་གྱི་དགོན་རོ་མིག་རྒྱང་གིས་མི་ཆོད་པ་ཙམ་དང་། གནས་འཛིན་གྱི་དགོན་ཆུང་ངུ་རེ་བཅས་པ་སྣང་། འདི་གསུམ་ནི་སྡེ་པ་བཅོ་བརྒྱད་ཀྱི་གྲངས་སུ་བྱུང་བའི་རྒྱལ་བྱེད་ཚལ་གནས། འཇིགས་མེད་རིར་གནས། གཙུག་ལག་ཁང་ཆེན་པ་གསུམ་གྱི་རྩ་བའི་གནས་གཞི་དག་ཡིན་པར་ཐེ་ཚོམ་མི་འདུག་ཅིང་། དེ་གསུམ་ག་གནས་བརྟན་པ་ཡིན་ཚུལ་ཡང་པདྨ་འབྱུང་གནས་དང་། དུལ་བའི་ལྷ་གཉིས་ཀས་གསལ་བར་གསུངས། འདི་གསུམ་ཕན་ཚུན་མི་མཐུན་ཞིང་རྩོད་པའི་གནས་ཚུལ་ཡང་སིངྒ་ལའི་རྒྱལ་རབས་རྣམས་ན་ཤིན་ཏུ་རྒྱས་ཤིང་། ལྷག་པར་དུ་འཇིགས་མེད་རི་བོ་པ་རྣམས་ཀྱིས་ཐེག་ཆེན་གྱི་ལྟ་སྤྱོད་ཡིད་མི་མཐུན་པ་ལན་གསུམ་གྱི་བར་དུ་བླངས་ཞེས་གྲགས། རྟོག་གེ་འབར་བ་སོགས་སུ་འདྲེས་ལུགས་མང་དུ་མཛད་ཀྱང་། འདི་གསུམ་ཡེ་མ་བཀོད་པ་ཡང་། དེ་གསུམ་ཕྱི་དུས་ཙ་ན་གྲགས་པའི་རྒྱུ་མཚན་གྱིས་ཡིན་སྙམ།
དེ་ཡང་ཡོད་སྨྲ་བ་ལ་སོགས་པའི་ཁྲོད་དུ་ཐེག་ཆེན་གྱི་པཎྜི་ཏ་རྟོག་གེ་ལ་བྱང་བ་མང་དུ་བྱུང་སྐབས། གནས་བརྟན་པ་དག་ནི་དེ་དག་ལ་རྩོད་པའི་སྤོབས་པ་ཡང་མེད། བཅོམ་ལྡན་འདས་ཀྱི་ལུང་དྲི་མ་མེད་པ་དག་འདོར་དུ་ཡང་ཕངས་ནས། ཡུལ་དབུས་བཏང་སྟེ་ལངྐའི་ཡུལ་དུ་འདུས་པ་ཡིན་ནོ་ཞེས་ཟེར། གནས་བརྟན་པ་དག་དེང་སང་དབུས་ནས་ཡུལ་བཏོན་ནོ་བྱ་བ་རྒྱའི་བཙུན་པའི་ལམ་ཡིག་ཏུ་ཡང་གསལ།
 |
| རྒྱལ་བྱེད་ཚལ། |
ལུང་ཕྲན་ཚེགས་སུ་སྡེ་ཚན་བཅོ་ལྔའི་ནང་ན་ཆེད་དུ་བརྗོད་པའི་ཚོམས་འདྲ་བའི་གཞུང་ཞིག་དང་སྐྱེས་རབས་སོགས་བཞུགས། མངོན་པ་ལ་སྡེ་བདུན་ལས་ངྷརྨ་སངྒྷ་ཎི་ཆོས་ཀྱི་ཚོགས། བི་བྷངྒ་རྣམ་འབྱེད། ཀ་ཐཱ་བཏ྄ཐུ་གཏམ་གྱི་གཞི། པུགྒལ་པཉྙཏྟི་གང་ཟག་གདགས་པ། དྷཱ་ཏུ་ཀ་ཐཱ་ཁམས་ཀྱི་གཏམ། ཡ་མ་ཀཾ་ཆ་ལྡན། པཊ྄ཋཱ་ནཾ་རབ་ཏུ་འཇུག་པ་རྣམས་ཡིན། འདིར་ཁ་ཆེ་བྱེ་བྲག་སྨྲ་བའི་སྡེ་བདུན་ནི་ཛྙཱ་ན་པྲསྠཱན་ཡེ་ཤེས་ལ་འཇུག་པ། སིངྒཱ་ཏི་པྲ་ཡཱ་ཡ་འགྲོ་བའི་རྣམ་གྲངས་སོགས་ཡིན་པས་འདི་དག་དང་མིང་མི་འདྲ། གཞུང་ངོ་བོ་གཅིག་གམ་མ་ཤེས། ཁ་ཆེ་བའི་སྡེ་བདུན་དེ་རྒྱ་ནག་སྐད་དུ་བཞུགས་པར་གྲགས། དེ་ལྟ་བུའི་སྡེ་བདུན་དེ་དག་སྟོན་པའི་བཀའ་ཡིན་པ་དང་། ལྷའི་འཁོར་ལ་གསུངས་པར་འདོད། སློབ་གཉེར་གྱི་གཙོ་བོ་ཡང་དེ་ལ་བྱེད། ལྷག་པར་བྷར་མའི་ཡུལ་ན་སྔོན་ཤིན་ཏུ་དར་ཆེ་ཟེར། མདོ་རྣམས་ལ་སྟོན་པ་རང་གི་ཞལ་ནས་གསུངས་པའི་ཚན་གཅིག་དང་། སྡུད་པ་པོ་རྣམས་ཀྱི་ངག་ཏུ་རྟོགས་པ་ཨཊ྄ཋ་ཀཐཱ་བྱ་བའི་ཚན་པ་གཉིས་གཉིས་ཕྱེས་ཏེ་ཤིན་ཏུ་ངོས་གཙང་བ་ཞིག་ཡོད། རང་རེའི་མདོ་རྣམས་ལ་ཆ་གཉིས་ཀ་མ་ཕྱེས་པར་ཡོད་འདུག འདུལ་བ་ལྟ་བུ་ལ་འདི་དག་གི་ལོ་རྒྱུས་དང་། རང་རེའི་དེ་དག་མཐའ་ཆོད་པ་ཞིག་བསྡུར་རྒྱུ་བྱུང་ན་གཅིག་ལ་མི་གསལ་བ་གཅིག་ལ་གསལ་བ་དང་། ཕྱོགས་གཅིག་ཏུ་འདྲེན་བཟོད་པ་དང་། ཡེ་མི་མཐུན་པ་ལ་སོགས་པ་ངོ་མཚར་མང་པོ་ཞིག་ཡོད་པར་མངོན། དཔེར་ན། བལ་ཐོགས་ཀྱི་སྤང་ལྟུང་སྐབས་དྲུག་སྡེ་བལ་ཡུལ་དུ་སོང་ཞེས་རང་རེའི་འདུལ་བར་ཤིན་ཏུ་གསལ་བ་ལ། འདི་དག་གི་ལུང་ན་བྱང་ཕྱོགས་ཀྱི་ཡུལ་ཞིག་ཏུ་སོང་བྱ་བ་ཙམ་ལས་མེད། དེ་བཞིན་འཆར་ཀ་དམར་པོ་གནས་ངན་ལེན་སྤྱོད་པ་ཞིག་དང་། འཆར་ཀ་ནག་པོ་ཕྱིས་དགྲ་བཅོམ་འཐོབ་པ་གཉིས་བཤད་དེ། རང་རེའི་ལུང་ན་མི་གསལ་ཞིང་། མི་མཐུན།
འཕགས་སྐྱེས་པོ་མིང་ཆེན་གྱི་ཁྱིམ་དུ་སོང་བའི་ཤུལ་དུ་ཁྱིམ་ཆུས་བཀྲུས་པའི་སྙིང་ནད་ཀྱིས་ཤཱཀྱ་རྣམས་བསད་ཅིང་། རྒྱ་མཚོའི་རླབས་ཀྱིས་དྲངས་ཏེ་དམྱལ་བར་སོང་ཟེར་ཏེ། འདི་ཡང་ཅུང་མི་མཐུན། དེ་བཞིན་གཅུང་དགའ་བོ་སུནྡ་རི་ཆུང་མར་བླངས་ན་སྐལ་བ་ཆད་པར་དགོངས་ཏེ། བག་སྟོན་གྱི་ཉིན་ཁོ་ན་ལ་རབ་ཏུ་བྱུང་ཟེར་ཏེ། རང་རེ་ལ་མི་གསལ་ཞིང་། ལག་རྒྱུད་འབྲོག་གནས་ལ་གཏམ་རྒྱུད་དེ་སྦྱར། གྲགས་འཛིན་མ་རབ་ཏུ་བྱུང་སྟེ་དགྲ་བཅོམ་བརྙེས་པ་དེ་ཡང་རང་རེའི་ལོ་རྒྱུས་དག་ན་མེད་སྙམ། དམ་ཆོས་པད་དཀར་དུ་གྲགས་འཛིན་མ་དགེ་སློང་ཡིན་པའི་སྒྲོས་ཤིག་ཡོད་དམ་སྙམ་པས་གཟིགས་པར་ཞུ། ཀུན་དགའ་བོ་གནས་ནས་ཕྱུངས་པའི་ལོ་རྒྱུས་ཀྱང་ཤིན་ཏུ་སྐྱོ་བ་ཞིག་ཡོད། རྒྱལ་བྱེད་ཚལ་དུ་སོང་བ་ན། དགེ་སློང་དེར་གནས་པ་དག་ལྷན་གཅིག་ཏུ་སྨྲ་བར་མི་བྱེད། འདོན་པར་མི་བྱེད་ནས་མཐའ་གཅིག་ཏུ་སོང་སྟེ་གནས་མལ་བྱས་ནས་འཁོད་དེ་ནངས་མོ་རེ་བཞིན་སྟོན་པའི་དྲི་གཙང་ཁང་སྟོང་པར་སོང་སྟེ། ཆུ་དང་ཚེམས་ཤིང་སྟོབ་པ་སོགས་ཞལ་བཞུགས་དུས་བཞིན་བྱས། བྱང་ཆུབ་ཤིང་གི་ཡལ་ག་ཞིག་བླངས་ནས་དྲི་གཙང་ཁང་གི་སྒོར་བཙུགས་པ། ཕྱིས་ཨཱ་ནནྡ་བོ་ངྷི་བྱ་བའི་ཤིང་དུ་གྱུར་ཏེ། དགེ་སློང་ལྗོངས་རྒྱུ་བ་རྣམས་ཕྱག་བྱེད་དོ་སོགས་བཤད། ཤིང་དེ་བཙུན་པ་ཐང་ཟན་གྱིས་ཀྱང་གཟིགས་ཞེས་གསུངས། སྔོ་བསངས་ཅན་གྱི་ཕ་མ་ནད་ཡམས་ལ་འཇིགས་ནས་རྩིག་པ་བརྟོལ་ཏེ་བྲོས་པ་ལམ་དུ་ཤི་ནས་མོ་འཁྱམས་པ་ན་གདེངས་ཅན་གྱིས་བུ་མོའི་ཚབ་ཏུ་བྱས་པ་དང་། ནོར་ལྷས་བྱིན་དང་ཤར་པའི་བར་དུ་ཡོལ་བས་བཅད་དེ་མཚན་མི་སྡུག་པར་བསྒྲགས་ཏེ། འདུལ་སྦྱོང་སློབ་སྐབས་ཉིན་གཅིག་ནོར་བ་ལ་ཤར་པས་ཁ་ཆེན་མ་ཞེས་སྤྱོས། མོ་ཁྲོས་ཏེ་ཡོལ་བ་རལ་པ་ལས་ཆས་ཏེ་བྱ་ཚང་དུ་སྡོད་པ་དང་། ཡང་དཔེ་མེད་མས་སྟོན་པ་ལ་དགེ་སློང་བོང་བུ་སོགས་ཚིག་རྩུབ་བཅུས་སྤྱོས་པ་སོགས་ཀྱང་རང་རེ་ལ་མི་གསལ། མཛངས་བླུན་དུ་ཨུཏྤ་ལའི་མདོག་གིས་སྡུག་མྱངས་པའི་གཏམ་རྒྱུད་ཅིག་འདུག་པ་ཁོང་རྣམས་སྐེམ་མོ་གཽ་ཏ་མི་ལ་སྦྱོར་ཞིང་། རང་ཅག་གི་མའི་རྣམ་འབྱེད་དུ་ཡང་དེ་ལྟར་ཡོད་པས་འདི་འདྲ་བར་སྐབས་འགར་མིང་བརྗེས་པ་འདྲ་ཡང་ཡོད་ཚོད་འདུག སྐེམ་མོ་བུ་ཤི་བའི་རོ་འཁྱེར་ཞིང་། གཽ་ཏ་མ་མཐུ་ཆེ་བས་གསོ་བར་མཛོད་ཅིག་ཅེས་ནན་གྱིས་ཞུས་པར། སྟོན་པས་ཀྱང་སྐབས་མཁྱེན་ནས་ཞལ་གྱིས་བཞེས་ཏེ། མ་ཤི་བའི་ཁྱིམ་ཞིག་ནས་ཡུངས་དཀར་སྙིམ་པ་གང་འོན་ཅིག དེས་མཉན་ཡོད་བསྐོར་ཡང་མ་རྙེད་པས་ཐམས་ཅད་འཆི་ངེས་སུ་གསུངས་ཏེ་འབྲས་བུ་འཐོབ་ཅེས་འབྱུང་། འཇིགས་མེད་རབ་ཏུ་བྱུང་ནས་དྲི་མེད་གྲགས་པ་བྱ་བར་གྱུར་ཅིང་། མདོ་འདོན་པ་རང་གི་མ་ཨ་མྲ་སྐྱོང་མས་ཐོས་ཏེ། དེ་ཡང་རབ་ཏུ་བྱུང་བ་དང་། དེའི་མཛེས་སྡུག་གིས་དགེ་སློང་རྣམས་ཡ་ཡ་བོར་གྱུར་པ་ལ། ཀུན་དགའ་བོས་ཆོས་བསྟན་པ་དང་ཨ་མྲ་སྐྱོང་མས་བརྗོད་པའི་ཚིགས་བཅད་ཅིག་གནས་བརྟན་མའི་ཚིགས་སུ་བཅད་པར་ཡང་ཡོད། འདི་དག་ཀྱང་རང་རེ་ལ་མ་གྲགས་སྙམ།
 |
| པོ་ལོ་ནྣ་རུ་བ་ལར་ཡོད་པའི་རྒྱལ་ཁང་། |
འཕགས་རྒྱལ་དུ་པདྨ་ཅན་བྱ་བའི་སྨད་འཚོང་དང་གཟུགས་སྙིང་འདུས་པ་ལས་གཞོན་ནུ་འཇིགས་མེད་གཉིས་པ་ཞིག་བྱུང་བའི་ལོ་རྒྱུས་ཀྱང་ཡོད། ཨ་མྲ་སྐྱོང་མའི་ལང་ཚོ་ལ་རྒྱལ་པོའི་ཁབ་པ་རྣམས་ཕྲག་དོག་ནས་ས་ལ་ཅན་མ་བྱ་བའི་མཛེས་མ་ཞིག་དེའི་ཚབ་ཏུ་བཙུགས། དེ་ལས་བུ་སྐྱེས་པ་འཚོ་བྱེད་གཞོན་ནུ་དང་། བུ་མོ་དཔལ་མོ་བྱ་བ་ཞིག་སྐྱེས་པ་ཀུན་ཡིད་འཕྲོག་པར་གྱུར། དེ་ཤི་བ་ན་སྟོན་པའི་བཀས་རོ་རང་སོར་ཞོག་ཅེས་གསུངས། ཞག་ཤས་ནས་རུལ་བ་དང་སྲིན་བུ་ཞུགས་པ་མཐོང་ནས་མང་པོ་དག་འབྲས་བུ་འཐོབ་ཅེས་བཤད་དེ། འདི་དང་དབྱིབས་མཐུན་ཞིག་རང་རེའི་དཀོན་བརྩེགས་ནང་ན་ཡོད་སྙམ།
རྒྱལ་པོའི་ཁབ་པ་རྣམས་འོད་སྲུང་ལ་ཆེར་མོས་པས་བུད་མེད་ཅིག་གིས་ཐོག་མར་ནོར་ནས་སྟོན་པ་ལ་བསོད་སྙོམས་ཕུལ། དེར་སྟོན་པའི་ཕྱག་ནས་སླར་འཕྲོག་སྟེ་འོད་སྲུང་ལ་ཕུལ། རྒྱུ་དེས་འོད་སྲུང་རྟག་ཏུ་དགོན་པ་ན་བཞུགས་ཤིང་། གྲོང་དུ་མ་བྱོན་ཏོ་སོགས་བཤད། སྤྱིར་ཐེག་པ་ཆུང་ངུའི་ལོ་རྒྱུས་གང་ཡིན་ཐུན་མོང་བའི་ལུགས་སུ་བཤད་པས་སྟོན་པའི་མཛད་ཕྱོགས་སོགས་གླེང་སྐབས་ཅི་བས་ཀྱང་ཡིད་འཕྲོག་པ་རྐྱང་སྣང་། ཐེག་ཆེན་ལས་བྱུང་བ་དག་ཕལ་ཆེར་ནི། ཧ་ཅང་རྒྱ་ཆེ་དྲགས་པས་ཧ་ཅང་མཁས་པ་དང་། ཧ་ཅང་གླེན་པ་ཞིག་མ་གཏོགས་དཀྱུས་མ་ཐམས་ཅད་ཀྱི་སེམས་ལ་འགྲོ་བ་ཞིག་ཤིན་ཏུ་དཀའ། སྟོན་པའི་རྣམ་ཐར་གྱི་ཆ་མི་མཐུན་པ་རྣམས་འདིར་མི་བྲི། དེ་བཞིན་འདི་པའི་མདོ་རྣམས་ཀྱང་དཔེ་ངོ་མཚར་ཅན་མང་པོ་དང་སྦྱར་ནས་བློ་འཁུལ་བ་རྐྱང་ཡོད།
དཔེར་ན། མི་ཞིག་གིས་གཽ་ཏམ་ལ་བསྟོད་སྨད་ཅི་བྱས་ཀྱང་ལན་མི་བྱེད་ཟེར་བ་ཐོས་ནས་སྟོན་པའི་དྲུང་དུ་སོང་སྟེ་ཁ་ཀྱལ་ངལ་ངལ་གྱི་བར་དུ་སྨྲས། དེར་སྟོན་པས་གལ་ཏེ་བྱིན་པ་དག་སྟེར་ཡུལ་དེས་བདག་གིར་མ་བྱས་ན། དེ་ནས་དེ་རྣམས་སུའི་ནོར་དུ་འགྱུར། ཁོས་བསམ་སྟེ། དེ་རྣམས་སྟེར་བ་པོའི་ནོར་དུ་འགྱུར་རོ།། འོ་ན་ཁྱོད་ཀྱིས་གང་སྨྲས་པའི་ཚིག་རྩུབ་དག་ཀྱང་ཁོ་བོས་བདག་གིར་མ་བྱས་པས་ད་ནི་ཁྱོད་ཉིད་ཀྱི་ཡིན་ནོ།། ཞེས་གསུངས། དེ་བཞིན་མ་ལུང་ཀའི་བུ་བྱ་བ་ཞིག་གིས་འཁོར་བའི་ཐོག་མ་ཡོད་མེད་སོགས་ལུང་མ་བསྟན་གྱི་དྲི་བ་དག་བཀོད་ནས་འདི་རྣམས་ཐག་མ་བཅད་ན། ང་སྐྱ་སར་འབབ་པ་ཡིན་ཞུས་པར་སྟོན་པས། ནགས་ཆེན་གྱི་དཀྱིལ་དུ་གར་བྱུང་ཆ་མེད་པའི་མདའ་དུག་ཅན་ཞིག་ལུས་ལ་ཕོག་ན་དེ་མ་ཐག་མདའ་བཏོན་ནས་རྨ་བཅོས་བྱེད་དགོས་ཀྱི། དེ་བཞག་ནས། མདའ་འདི་སུས་འཕངས། ཅི་ལས་བྱས་སོགས་དཔྱད་ན་ཚེ་འཕོ་བར་འགྱུར་བ་བཞིན་འདུས་བྱས་སྡུག་བསྔལ་དང་། དེ་སྤོང་ཐབས་ཀྱང་ཤེས་བཞིན་མི་སྒོམ་པར་ཐོག་མཐའ་སོགས་དཔྱད་ནས་ཚེ་ཆུད་འཛའ་བ་ཡིན་གསུངས། འདི་འདྲ་མང་སྟེ། ཁྱེད་རྣམས་ལ་མཉན་འདོད་ཀྱང་ཡོད་མེད་མི་ཤེས་ལ་འབྲི་བར་ཚེགས་ཀྱང་ཆེ་བར་འདུག་པས་བཞག
འོ་ན་གནས་བརྟན་པའི་མདོ་སྡེ་ལ་སོགས་པ་དེ་ཀུན་སྐད་རིགས་ཅི་འདྲ་ཞིག་ཏུ་ཡོད་སྙམ་ན། པྲཱཀྲྀཏའམ་གནའ་དུས་ཀྱི་མ་ག་ངྷའི་སྐད་དུ་ཡོད་པ་ཡིན། དེ་ལ་ཁོང་རྣམས་པཱ་ལི་ཞེས་ཟེར་ཞིང་། དོན་རྒྱུན་ཆགས་བྱ་བ་ཡིན། པཱ་ལིའི་སྐད་དེ་ནི་ངོ་བོ་ལེགས་སྦྱར་རང་ལ་སྒྲ་འཇམ་དུ་སོང་བའི་རྒྱུ་མཚན་གྱིས་ར་སྒྲ་ཕལ་ཆེར་ཉམས་པ་དང་། ཀྵ་ཡིག་ལ་སོགས་པའི་བརྗོད་དཀའ་བ་དག་ཁ་ཡིག་ཏུ་བཀླགས་པ་སོགས་ཡིན། སྐད་འདིའི་དཔེ་བརྗོད་ཤིན་ཏུ་གསལ་བ་ཞིག་འགྲེལ་ཆེན་དྲི་མེད་འོད་ཀྱི་སྐབས་དང་པོར་རེ་ཞིག་ཉན་ཐོས་ཀྱི་སྡེ་སྣོད་གསུམ་མ་ག་ངྷའི་སྐད་དུ་གསུངས་པ་ནི་འདི་ལྟ་སྟེ། ཨིཏྱཔི་སོ་ བྷགབཱདོ་སམྱཀྶཾ་བུདྷ་བིཛྫཙརཎསཾཔནཿ སུགཏོལོཀབིདྱཾཡཱཨནུཏྟརོ།། འདི་ལྟར་ཡང་། དེ་ནི་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་རིག་པ། བླ་ན་མེད་པ་སོགས་གསུངས་པ་དེར་གཟིགས་པར་ཞུ། སྐད་འདི་ཉིད་ཀྱིས་སྟོན་པས་ཆོས་གསུངས་པར་འདོད་ཅིང་། སྟོན་པ་ཞལ་བཞུགས་དུས་སྐད་འདི་ཉིད་ཡུལ་དབུས་མ་ག་ངྷའི་སྐྱེ་བོ་ཀུན་གྱི་སྐད་ཐུན་མོང་བ་ཡིན་ནོ་ཞེས་གནས་བརྟན་པ་དག་བཞེད་དོ།། དེ་ལ་བསྟན་པའི་གནས་ཚད་ནི་ལོ་ལྔ་སྟོང་དུ་འདོད་ཅིང་། ད་ལྟ་རབ་བྱུང་བཅུ་དྲུག་པའི་ཤིང་སྤྲེལ་འདི་བར་སྟོན་པ་འདས་ནས་ལོ་ཉིས་སྟོང་བཞི་བརྒྱ་གྱ་དྲུག་སོང་། མྱ་ངན་ལས་འདས་པའི་ལོ་དེ་རྒྱ་རྩིས་ཀྱི་མེ་སྦྲུལ་ཡིན། སྤྱིར་སངས་རྒྱས་འདས་ནས་ལོ་ཉིས་སྟོང་སུམ་བརྒྱ་ཙམ་སོང་བ་ནི། ཡ་བ་ནའི་སོ་བློན་མེ་གྷ་སྠན་དེ། རྒྱལ་པོ་ཨ་ཤོ་ཀ་འི་ཡབ་ཟླ་བ་སྦས་པའི་དུས་སུ་རྒྱ་གར་དབུས་སུ་བསླེབས་ཤིང་། དེའི་ལམ་ཡིག་ཏུ། སངས་རྒྱས་པའི་རབ་བྱུང་མཐོང་ཚུལ་བྲིས་པ་དེས་ཀྱང་ལེགས་པར་གྲུབ་པ་ལ། ཉིས་སྟོང་བརྒྱ་ལས་མི་མང་བ་ནི། སྙིང་པོ་པད་དཀར་སོགས་ཀྱི་མདོ་མང་པོར་ང་འདས་ནས་ལོ་བརྒྱ་ན་ཨ་ཤོ་ཀ་འབྱུང་ཞེས་གསུངས་པ་དང་། འཕྱིས་ན་ཡང་ཨ་ཤོ་ཀ་དེ་སྟོན་པ་འདས་ནས་ལོ་སུམ་བརྒྱའི་ཁོངས་སུ་ཡོད་ངེས་པས་སོ།།
དེས་ན་ལོ་ཚིགས་འདི་རྒྱུ་མཚན་ཤིན་ཏུ་ཆེ། སྤྱིར་སྔོན་གྱི་ཉན་ཐོས་སྡེ་པ་དག་ཟླ་བ་དང་། ཞག་རེ་བཞིན་སྟོན་པ་འདས་ནས་དུ་སོང་བརྩི་བར་གྲགས། འོན་ཀྱང་འདི་ལ་ཡང་བོད་སྔ་མའི་མཁས་ཆེན་འགའ་ཞིག་གིས་ཉན་ཐོས་བན་དྷེ་བསོད་སྙོམས་པ་རྣམས་ཀྱིས་སངས་རྒྱས་འཁྲུངས་པ་དང་། རྡོ་རྗེ་གདན་གྱི་བྱང་ཆུབ་ཆེན་པོའི་སྐུ་བརྙན་བཞེངས་པ་གཉིས་གཅིག་ཏུ་ནོར་ནས་སྟོན་པའི་འཁྲུངས་ལོ་བརྩིས་པས་བརྩི་གཞི་ནོར་རོ་ཞེས་གསུངས་ཏེ་བརྙས་པར་མཛད་ཅིང་། རང་ལུགས་ལ་ལོ་སྟོང་ཙམ་དེའི་སྟེང་དུ་བསྣན་པར་མཛད་དོ།། ཁ་ཆེ་པཎ་ཆེན་བསོད་སྙོམས་པ་ཆེན་པོ་བོད་དུ་བྱོན་པའི་ལོའི་ཤིང་བྱི་དེ། གནས་བརྟན་སྡེ་པའི་ལུགས་ཀྱི་སྟོན་པ་འདས་ནས་སྟོང་དང་བདུན་བརྒྱ་ཞེ་བརྒྱད་པ་ཡིན་ལ། དེ་དུས་ཁོང་གིས་སོལ་ནག་ཐང་པོ་ཆེར་བརྩིས་པ་ན། སངས་རྒྱས་འདས་ནས་ཆིག་སྟོང་བདུན་བརྒྱ་ལྔ་བཅུ་སོང་ཞེས་བཤད་པ་ཡང་། སིངྒ་ལ་པའི་ལོ་དེ་དང་རྩིས་ཀྱི་དབང་གིས་ལོ་གཉིས་ཙམ་མ་མཐུན་པ་ལས་གཅིག་ཏུ་བབས་པས་ཁོང་གིས་ཀྱང་དོན་ལ་ལོ་ཚིགས་དེ་རང་ལ་བརྟེན་པར་གསལ་ལོ།།
གཞན་ཡང་རྡོ་རྗེ་གདན་གྱི་སྐུ་བཞེངས་དུས་སངས་རྒྱས་མཇལ་མྱོང་བའི་རྒན་མོ་ཞིག་ཡོད་ཚུལ་སོགས་ཀྱང་བཤད་ལ་དེས་ན་སྐུ་བཞེངས་པ་དང་སངས་རྒྱས་འཁྲུངས་པ་གཉིས་ནོར་བའི་དབང་དུ་བྱས་ན་ཡང་། ལོ་བརྒྱ་ཙམ་ནོར་སྲིད་ཀྱི་སྟོང་ཕྲག་གཅིག་ཙམ་ནོར་དགོས་པའི་དོན་ནི་ག་ལ་ཡོད་སྙམ། ལར་འདི་ཚོ་ཞར་བྱུང་དུ་ཐལ། སངས་རྒྱས་འདས་ནས་ལོ་དུ་སོང་ན་ཡང་སོང་། རང་རེ་རྣམས་ཁ་ཆེ་པཎ་ཆེན་དང་། རྗེ་ས་པཎ་གཉིས་ཀྱི་ལ་རྒྱ་བཤད་ནས་རྒྱ་འདྲེ་བྱེད་དོན་ཅུང་ཟད་ཀྱང་མེད།
གང་ལྟར་ཡང་གནས་བརྟན་པ་ལྟར་ན་ད་དུང་བསྟན་པའི་ལྷག་མ་ལོ་ཉིས་སྟོང་ལྔ་བརྒྱ་ལྷག་ཡོད་ཅིང་། དེ་རྫོགས་ནས་འཛམ་གླིང་གི་རིང་བསྲེལ་ཐམས་ཅད་རྡོ་རྗེ་གདན་དུ་འདུས། དེ་སངས་རྒྱས་ཀྱི་སྐུ་དངོས་སུ་གྱུར་ཏེ་བྱང་ཆུབ་ཤིང་དྲུང་དུ་སྐད་ཅིག་ཙམ་ཞིག་བཞུགས་ནས་ཆོས་སྟོན་ཅིང་། དེའི་ཚེ་ལྷ་མི་སྐལ་ལྡན་མང་པོ་གྲོལ་བ་འཐོབ། དེ་ནས་སྐུ་ལས་མེ་འབར་ཏེ་མྱ་ངན་ལས་འདའ་ཞིང་། དེ་ཕྱིན་བསྟན་པའི་ལྷག་མ་མི་གནས་སོ་སོགས་སྨྲ། འོན་ཀྱང་འདི་ཚོ་ཁུངས་ཆེ་བའི་གཏམ་ཡིན་མིན་མ་ཤེས། འདི་འདྲ་བའི་ལོ་རྒྱུས་ཡ་མཚན་ཞིག་རྒྱའི་བཙུན་པ་ཕཱ་ཧེན་གྱིས་ཀྱང་གསུངས། བཙུན་པ་དེ་ཐང་ཟན་གྱི་སྔོན་མི་ཐོག་གཅིག་གི་གོང་ལ་རྒྱ་གར་དང་། སིངྒ་ལར་བྱོན། འཇིགས་མེད་རིའི་གཙུག་ལག་ཁང་དུ་བཞུགས་སྐབས་རྒྱ་གར་ནས་སླེབས་པའི་བཙུན་པ་ཞིག་སྐད་གསང་མཐོན་པོས་ད་ལྟ་རྒྱ་གར་བྱང་ན་བཞུགས་པའི་སྟོན་པའི་ལྷུང་བཟེད་འདི་ཐོག་མར་ཀོ་ཤམྦུ་ལ་གདན་འདྲེན། མ་འོངས་པ་ན་དྲི་ཟ་དང་། ལི་དང་། རྒྱ་ནག་དང་། སིངྒ་ལ་དང་། སླར་རྒྱ་གར་དུ་གདན་འདྲེན། དེ་ནས་སུམ་ཅུ་རྩ་གསུམ་དུ་ཁྱེར་ཏེ་ལྷ་རྣམས་ཀྱིས་མཆོད། བྱམས་པ་བྱོན་ཚེ་རྡོར་གྱུར་ཏེ་རྒྱལ་ཆེན་བཞིས་བྱམས་པ་ལ་འབུལ། དེ་བཞིན་སངས་རྒྱས་ཕྱི་མ་དག་ལ་ཡང་འབུལ་སོགས་མདོ་ཞིག་འདོན། བཙུན་པ་དེ་ལ་ཐུགས་འཕྲོག་ནས་ཁྱེད་ཀྱི་མདོ་དེའི་དཔེ་ཞིག་ཞུ་བར་འདོད་པས་ང་ལ་གཡར་པོ་ཞུ་གསུངས་པར་ཁོས་དེ་མདོ་མ་ཡིན། ངེད་རང་གིས་བརྩམས་པ་ཡིན་ཟེར་སྐད། དེས་ན་གཏམ་རྒྱུད་འདི་འདྲ་ཡང་ཡུལ་ཀུན་ཏུ་ཡོད་པར་སྣང་།
དགེ་སློང་རྣམས་ཀྱི་བསྲུང་བྱ་ནི། པཱརཱཛིཀ་ཕམ་པ་བཞི། སཾགྷཱབཤེཥ་དགེ་འདུན་ལྷག་མ་བཅུ་གསུམ། ཨཎིཡཏ་མ་ངེས་པ་གཉིས། ནིཿསྶགྒིཡ་སྤང་ལྷུང་ཉེར་གསུམ། པཱཏཡནྟིཀ་ལྟུང་བྱེད་འབའ་ཞིག་པ་གོ་དགུ། ཤིཀྵཱ་བསླབ་བྱའམ་ཉེས་བྱས་དོན་གསུམ། ཨདྷཱིཀརཎ་ཤམཐ་རྩོད་གཞི་ཞི་བ་བདུན་བཅས་ཡིན།
དགེ་ཚུལ་རྣམས་ཀྱི་ནི། རྩ་བཞི། ཆང་། ཕྱི་དྲོའི་ཟས། རིན་ཆེན་ལེན་པ། ཁྲི་སྟན་ཆེ་མཐོ། གླུ་གར། དྲི་ཉུག་པ་དང་བཅས་པའི་བསྲུང་བྱ་བཅུ་སྟེ། དེ་བཅུ་གང་བྱུང་ཡང་སྡོམ་པ་གཏོང་བས་སླར་ལེན་དགོས། འོན་ཀྱང་དེ་གང་ཡང་ཕམ་པ་མིན་ཞིང་ཕྱིར་བཅོས་བཏུབ། དགེ་སློང་ལ་ནི་བསླབ་པ་ཕུལ་བ་མ་གཏོགས་འཆབ་མེད་འཆབ་བཅས་སོགས་ཕམ་པ་བྱུང་བ་གསོར་མི་བཏུབ་ཟེར། བསྙེན་པར་རྫོགས་ནས་ལོ་ཞེ་ལྔ་ལོན་པ་ནི་དེ་བཞིན་བཤེགས་པའི་ཚངས་སྤྱོད་ཀྱི་སྐུ་ཚེའི་ཚད་རྫོགས་པ་ཞེས་དགྲ་བཅོམ་དང་ཞིང་མཉམ་པར་བརྩི།
རབ་ཏུ་བྱུང་བའི་སྔ་རོལ་ཏུ་བསྒྲུབ་བྱ་དེ་རྒྱལ་པོའི་ཆས་སུ་བཅུག དེ་ལ་གཞོན་ནུ་དོན་གྲུབ་ཀྱི་ཆས་ཟེར། གླང་ཆེན་ལ་བསྐྱོན། གདུགས་དཀར་དང་རྔ་ཡབ་སོགས་འཁྱེར་ཏེ་གྲོང་མི་ཡོངས་རྫོགས་ཀྱིས་བསྐྱལ་ཏེ་མཚམས་ཀྱི་ནང་འོངས། རྒྱང་རིང་པོ་ནས་སྲུང་མ་སོགས་བཞག་སྟེ་དབང་བསྐུར་ལས་ཀྱང་བཀའ་རྒྱ་དམ་པ་བྱེད། ཐ་ན་བསླབ་པ་ཉམས་པ་དག་ཀྱང་སྔོན་ཇི་ལྟར་མཐོང་བ་སོགས་སྨྲ་བར་མི་བྱེད། བར་ཆད་དྲི་བ་སོགས་རང་རེ་དང་མཐུན་པར་ཡོད་ཟེར། འོན་ཀྱང་བར་ཆད་ཀྱི་ཆོས་རྣམས་རང་རེ་དང་མི་མཐུན། འདིར་སིངྒ་ལའི་དགེ་སློང་ཁྲོད་ན་ཕྱི་གླིང་པ་ཡང་མང་ཙམ་ཡོད་ལ། ཛྙཱན་ཏི་ལོ་ཀ་བྱ་བའི་དགེ་སློང་མཁས་པ་ཤིན་ཏུ་གྲགས་ཆེན་ཞིག་བཞུགས་པ་དེ་ཡང་འཇར་མན་པ་ཡིན། འདིས་ཕྱི་པ་མང་པོ་ནང་པར་བཅུག འདུལ་འཛིན་གྱི་ཚད་དུ་བྱེད། འོ་ན་སྐྲ་སེར་ཅན་ལ་སྡོམ་པ་སྐྱེའམ་ཞེ་ན་དེ་དག་གི་ལུས་ཀྱི་ནང་དུ་སྡོམ་པ་ཅི་འདྲ་ཞིག་སྐྱེས་ཡོད་པ་ནི། ང་ལ་རྒྱུས་མེད། ལར་དེ་ཕལ་ཆེར་སྐྲ་ནག་པོ་ཡིན། གནས་བརྟན་པ་དག་སྐྲ་སེར་བར་ཆད་ཀྱི་ཆོས་སུ་ཡང་མི་འདྲེན།
སྤྱིར་རང་རེའི་ལོ་རྒྱུས་སུ་ཡང་ཤེད་བུ་སེར་སྐྱ་དེ་སྐྲ་སེར་སྐྱར་ཡོད་ཅེས་གསུངས་ལ། དེ་ནས་དེ་འོད་སྲུང་གི་དགེ་སློང་ཁྲོད་དུ་རབ་ཏུ་བྱུང་བ་དང་། སྡེ་སྣོད་གསུམ་པར་གྱུར་པ་ཡང་མ་གསུངས་སམ། དེ་བཞིན་གྲོ་བཞིན་བྱེ་བ་ཉི་ཤུ་པ་ལ་ཡང་རྐང་པའི་སྟེང་ན་སྤུ་གསེར་གྱི་མདོག་ཅན་སྐྱེས་ཡོད་ཚུལ་འདུག་པས། མགོའི་སྐྲ་ཡང་སེར་བ་ལས་འོས་མེད་སྙམ། རིགས་མ་ཉམས་པའི་བྲམ་ཟེ་ཐམས་ཅད་སྐྲ་སེར་པོར་ཡོད་པ་རྣམ་འགྲེལ་གྱི་འགྲེལ་པ་སོགས་དང་། གསེར་གླིང་ནས་བྲམ་ཟེ་སྐྲ་གསེར་གྱི་མདོག་ཅན་ཞིག་བསླེབས་པ་སོགས་མཆོག་ཟུང་གི་བྱུང་བའི་སྐབས་དང་། ཁྱེའུ་སྤྲིན་གྱི་རལ་པ་གསེར་གྱི་མདོག་ཅན་མར་མེ་མཛད་ཀྱི་ཞབས་འོག་ཏུ་བཏིང་སོགས་མང་དུ་བཤད་ལ། བྲམ་ཟེ་ནི་རིགས་ཀྱི་མཆོག་ཡིན་པས་རབ་ཏུ་འབྱིན་པ་སུ་ཞིག་གིས་འགོག
དེས་ན། པཱི་ཏ་ཀེ་ཤ་ཡུང་བའི་མདོག་འདྲ་བ་དང་ཀ་པཱི་ལ་ཀེ་ཤ་སྤྲེའུའི་སྤུ་མདོག་འདྲ་བ་དེ་གཉིས་ལ་ཁྱད་འདྲ་ཡོད་པ་ཨེ་ཡིན། གང་ལྟར་ཡང་དུས་ཀྱི་དབང་གིས་ཕྱི་གླིང་པ་མང་པོ་ཡང་སངས་རྒྱས་ལ་མོས་རབ་འདུག་པས། བརྒྱ་ལ་ཁྱེད་ཅག་གི་དྲུང་དུ་ཨུ་རུ་སུ་ཞིག་རབ་ཏུ་འབྱིན་པར་འོངས་ན། ཕྱུངས་ཤིག་དང་འགལ་བ་མེད་པར་མངོན་ནོ།། སྤྱིར་སེར་སྐྱའི་སྐད་དོད་ཀ་པིལ་བྱ་བར་བྱས་འདུག་ལ་ཨ་མར་ཀོ་ཤར། པཱི་ཏོ་བྱ་བ་སེར་པོ་དང་། ཀ་པཱི་ལ་བྱ་བ་ནག་སེར་དུ་བསྒྱུར་ནས་སྣང་།
 |
| ཤྲཱི་པ་དཱ། |
གླིང་འདིའི་གནས་རྟེན་གཙོ་བོ་གསུམ་ནི། རི་བོ་ཤྲཱི་པ་དཱ། སྟོན་པའི་ཚེམས་མཆེ་བ་དང་། བྱང་ཆུབ་ཤིང་རྣམས་ཡིན། ཤྲཱི་པ་དཱ་དཔལ་ཞབས་ནི་གླིང་གི་དབུས་སུ་ཡོད་ཅིང་། ཤིན་ཏུ་མཐོ། གནམ་ལྕགས་ཀྱི་འཇིགས་པ་ཆེ་བས་སོས་དུས་ཀྱི་ཟླ་བ་གཉིས་ཙམ་ལས་མཇལ་མི་ཐུབ། རི་འདི་ལ་སཱ་མནྣ་ལ་ཀན་དཱ་དང་། སུ་མནྠ་ཀུ་ཊ་ཀུན་ཏུ་བཟང་བརྩེགས་པ་སོགས་མིང་འགའ་ཙམ་ཡོད། རྩེ་ན་བྲག་གི་སྟེང་དུ་སངས་རྒྱས་ཀྱི་ཞབས་རྗེས་ཀྱང་ཁྲུ་གང་བ་ཞིག་ཡོད། དེ་རཱ་མ་ཎའི་ཞབས་རྗེས་ཡིན་ཞེས་མུ་སྟེགས་རྣམས་ཀྱང་མཆོད། ཨ་ཌཾ་གྱི་ཞབས་རྗེས་ཞེས་ཀླ་ཀློ་དག་ཀྱང་མཆོད། བདག་པོ་ནི་སངས་རྒྱས་པ་དག་ཡིན།
དེ་ཡང་སྟོན་པ་གླིང་འདིར་ལན་གསུམ་བྱོན་པའི་དང་པོ་སངས་རྒྱས་པའི་ལོ་དེའི་ཏུ་རུ་དུའི་ཟླ་བའི་ཉ་ལ་རི་རྩེ་འདིར་བྱོན་ཏེ་སྲིན་པོ་རྣམས་ལ་ཆོས་བསྟན། དེ་ནས་ལོ་ལྔ་པའི་ས་གའི་ཉ་ལ་ཀླུ་ལ་སྟོན་དུ་བྱོན་པ། དེའི་ཤུལ་དུ་མ་ཡཱངྒན་སྒྱུ་མའི་ཡན་ལག་བྱ་བའི་མཆོད་རྟེན་བརྩིགས་པ་ཤར་ངོས་ཀྱི་ཐང་གི་ནགས་ཚལ་ཀླ་ཀློ་དག་གི་ཡུལ་དང་ཉེ་བར་བཞུགས། སངས་རྒྱས་པའི་ལོ་བརྒྱད་པའི་ས་གའི་ཉ་ལ་ལྷ་ལ་ཆོས་སྟོན་དུ་བྱོན་པ་དེའི་ཤུལ་དུ་མ་ཡཱངྒ་མུ་སྟེགས་ཡན་ལག་བྱ་བའི་མཆོད་རྟེན་བརྩིགས་པ་ད་ལྟ་བཱ་དྷུ་ལླའི་གྲོང་ཁྱེར་དབུས་སུ་བཞུགས། གནས་དེ་ཀུན་གནས་བརྟན་དབང་ཆེན་སྡེས་ངོས་འཛིན་མཛད་ཅིང་། རྒྱལ་པོ་སྐར་རྒྱལ་གྱིས་མཆོད་རྟེན་བཞེངས་ཞེས་གྲགས། ཤྲཱི་པཱ་དཱའི་གནས་སྐོར་ལ་ལོ་རེ་བཞིན་ཡུལ་མིའི་སུམ་ཆ་ཙམ་རེ་འཆར་ཅན་དུ་འགྲོ། དེར་གནས་སྐོར་བ་ཐམས་ཅད་ལ་རྒྱགས་དང་སྡོད་གནས་སོགས་སྦྱིན་བདག་རྣམས་ཀྱིས་སྦྱོར། ཟླ་བ་ལྷག་མ་རྣམས་ལ་སྤྲེའུ་དང་། གླང་ཆེན་སོགས་མི་མ་ཡིན་པའི་འགྲོ་བ་ཀུན་གནས་སྐོར་ལ་འགྲོ་ཟེར། རི་དེ་ལ་རྒྱུན་དུ་གློག་འཁོར་ཞིང་། འཇའ་འོད་འཁྱིལ་བ་སོགས་ངོ་མཚར་ཡང་ཤིན་ཏུ་ཆེ། རི་རྩེ་ནས་གནམ་གཤིས་བཟང་ཚེ་ཉི་མ་རྒྱ་མཚོའི་དབུས་ནས་ཡར་ཐོན་ཡང་ནུབ་པ་ལྟ་བུའི་ཡ་མཚན་གྱི་སྣང་བ་མཐོང་བ་སོགས་ཡོད། དེ་ལ་འདིར་མིའི་འགྲོ་བ་ཐོག་མར་མཆེད་པའི་ཚུལ་མི་འདྲ་བ་དག་ལས་གཅིག་ནི་རྒྱལ་པོ་རཱ་མ་ཎ་སྤྲེའུའི་འཁོར་དང་བཅས་ཏེ་སོང་བའི་གཏམ་རྒྱུད་མུ་སྟེགས་ལ་གྲགས་པ་དང་། གཞན་ནི་རྒན་ཞུགས་ཀྱི་བྱུང་བའི་སྐབས་གསུངས་པ། དེད་དཔོན་སིངྒ་ལར་སོང་སྟེ་ཟངས་གླིང་གི་སྲིན་མོ་རྣམས་བསད་དེ་ཡུལ་བཟུང་བས་གླིང་གི་མིང་ཡང་དེ་སྐད་གྲགས་སོ་བྱ་བ་དེ་ཡིན་ལ། ཁོང་པ་དག་ལ་གྲགས་པའི་རྒྱལ་རྒྱུད་ཀྱི་ཐོག་མ་ནི། འཛམ་བུ་གླིང་གི་ཡུལ་བྷངྒའི་རྒྱལ་པོའི་བུ་མོ་གཟུགས་བྱད་བཟང་བ་ཞིག་དུད་འགྲོའི་ཆུང་མ་བྱེད་པར་ལུང་བསྟན་པར་འཇིགས་ནས་ཁང་བཟང་དུ་སྦས་ཏེ་བཞག དེས་དར་ལ་བབས་པ་ན། དགའ་བ་མེད་པའི་ལང་ཚོས་ཅི་བྱ་སྙམ་ནས་བྲོས་པ་ལས་སེངྒེ་ཞིག་གིས་གྲོགས་ཚོང་པ་རྣམས་བསད་དེ་བུ་མོ་ནགས་སུ་ཁྱེར་ཏེ་འདོད་པ་སྤྱད་པས་ཅི་ཞིག་ན་བུ་སྐྱེས་པ་ལ་སིངྷ་བཱ་ཧུ་དང་། བུ་མོ་སྐྱེས་པར་སིངྒྷ་ཤི་བ་ལིར་བཏགས། ཆེར་སྐྱེས་པ་ན་རང་གི་མས་མི་ཡུལ་གྱི་འབྱོར་པ་བཤད་པས། དེས་མ་དང་སྲིང་མོ་ཁྲིད་དེ་ཡུལ་ལ་ལཱ་བྱ་བར་བྲོས་ནས་དེའི་རྒྱལ་པོར་གྱུར། དེ་ལ་བུ་མང་དུ་སྐྱེས་པའི་ཐུ་བོ་བི་ཛ་ཡ་དེ་ཤིན་ཏུ་གཏུམ་ཞིང་བསྒོ་བ་མི་མཉན་པས། ཕས་དེ་འཁོར་དང་བཅས་པ་ཡུལ་ཕྱུང་པ་དག་རྒྱ་མཚོ་ལ་ཞུགས་ནས་གྲུ་དང་པོ་ལ་སྐྱེས་པ། གཉིས་པར་བུད་མེད། གསུམ་པར་བྱིས་པ་དག་བཞག་སྟེ་བཅོམ་ལྡན་འདས་མྱ་ངན་ལས་འདས་པའི་ཉིན་མོ་དེ་ཁོ་ན་ལ་ལངྐའི་ཡུལ་དུ་བསླེབས་སོ་ཞེས་གྲགས་སོ།། དེ་ནས་རྒྱལ་རབས་བདུན་པ་རྒྱལ་པོ་ཏིསྶ་སྐར་རྒྱལ་གྱིས་མ་འགགས་པའི་གྲོང་ན་སྲིད་སྐྱོང་བའི་ཚེ། ངྷརྨ་ཨ་ཤོ་ཀ་འཛམ་གླིང་གི་བདག་པོར་གྱུར་ཏོ།། དེ་ལ་གནས་བརྟན་པ་དག་གི་ལྟར་ན། མ་སྐྱེས་དགྲའི་ཁྲི་ལོ་བརྒྱད་པར་བསྡུ་བ་དང་པོ་བྱས། དེ་ལ་གནས་བརྟན་པའི་བཀའ་བསྡུ་ཟེར། དེ་ནས་ཨ་ཤོ་ཀ་ནག་པོའི་དུས་སུ་དགྲ་བཅོམ་ནམ་གྲུ་དང་གྲགས་པ་སོགས་ཀྱིས་བསྡུས། དེ་ལ་ཕལ་ཆེན་པའི་བསྡུ་བ་ཟེར། དེ་ནས་མྱ་ངན་མེད་ཀྱི་དུས་ཀྱི་ཁྲི་ལོ་བཅུ་བདུན་པ་ལ་མཽ་གལ་བུ་སོགས་ཀྱིས་བསྡུ་བ་བྱས། དེ་དུས་སྡེ་པ་བཅོ་བརྒྱད་གྱེས་ཟིན། དེ་ཡང་མ་སྐྱེས་དགྲའི་བུ་འཆར་ཀ། དེའི་བུ་མ་འགགས་པ། དེའི་བུ་སྤྱི་ཟླུམ། དེའི་བུ་ཀླུ་བྱིན། དེའི་བློན་པོའི་བུ་ཨ་ཤྭ་ནག་པོ། དེའི་ཁྲི་ལོ་བཅུ་པར་སངས་རྒྱས་འདས་ནས་ལོ་བརྒྱ་སོང་། སངས་རྒྱས་འདས་ནས་ཉིས་བརྒྱ་དང་དོན་གཅིག་པ་ལ་རྒྱལ་པོ་མྱ་ངན་མེད་ཀྱི་ཁྲི་ལོ་ཚུགས་པ་སོགས་ཡིན་ནོ།།
 |
| ཤྲཱི་པ་དཱའི་འདབ་ཀྱི་ཀུན་བཟང་ལྷ་ཁང་། |
ནམ་ཨ་ཤོ་ཀས་དགེ་སློང་ས་ཡ་བརྒྱད་ཅུ་དག་ལ་ནར་མའི་བསྙེན་བཀུར་བྱེད་པ་ན། གནས་བརྟན་མཽད་གལ་ལིའི་བུ་ཆེན་པོ་ལ་དྲིས་པ། བཙུན་པ། དགེ་འདུན་ལ་བསྙེན་བཀུར་བྱེད་པ་དག་ལས་ལྷག་པ་ལྟ་འགའ་ཞིག་མཆིས་སམ། རྒྱལ་པོ་ཆེན་པོ། རེ་ཞིག་ཆོས་ཀྱི་རྗེ་ཞལ་བཞུགས་པ་ན་ཡང་ཁྱོད་ལྟ་བུ་མེད་ན། ད་ལྟ་ནི་ལྟ་ཅི་སྨོས། བཙུན་པ་དགེ་བའི་རྩ་བ་འདི་གཞན་འགའ་ཞིག་གིས་ཟིལ་གྱིས་གནོན་པར་མ་གྱུར་གྲང་། རྒྱལ་པོ་ཆེན་པོ། གང་གི་རང་ཉིད་ཀྱི་བུ་དང་། བུ་མོ་རབ་ཏུ་འབྱིན་པར་བྱེད་པ་དེ་དག་ཁོ་ནས་སོ།། ཨ་ཤོ་ཀས། རང་གི་བུ་མཧེནྡ་དབང་ཆེན་དང་། བུ་མོ་སཾགྷ་མིཏྟ་དགེ་འདུན་རྩ་ལག་གཉིས་བོས་ནས་ཁྱེད་ཅག་རབ་ཏུ་འབྱིན་པར་འདོད་དམ། གང་གི་ཚེ་ཞང་པོ་རབ་ཏུ་བྱུང་བ་དེའི་ཉིན་མོ་ཁོ་ན་ནས་འདོད་པར་གྱུར་ན། གལ་ཏེ་ཡབ་ཀྱིས་གནང་ན་དེང་ཉིད་དུ་འཚལ་ལོ།། དེའི་ཚེ་ཨ་ཤོ་ཀ་ཁྲི་ལོ་དྲུག་པ་ལ་བབས་ཤིང་། དབང་ཆེན་སྡེ་ལོ་ཉི་ཤུ་དང་། སཾགྷ་མིཏྟ་བཅོ་བརྒྱད་ལོན་པ་གཉིས་རིམ་བཞིན་གནས་བརྟན་མཽགྒ་ལིའི་བུ་ཆེན་པོ་དང་། འཕགས་པ་ཆོས་སྐྱོང་མ་གཉིས་ཀས་རབ་ཏུ་བྱུང་ཞིང་། གཙུག་ལག་ཁང་དེ་ཉིད་དུ་དབང་ཆེན་སྡེ་བསྙེན་པར་རྫོགས་སོ།།
དེ་ལྟར་ན་གནས་བརྟན་དབང་ཆེན་སྡེ་ནི། མཽད་ག་ལིའི་བུ་ཆེན་པོའི་མཁན་བུ་ཡིན་ལ། མཽད་གལིའི་བུ་ནི་གནས་བརྟན་སིགྒ་ཝའི་དང་། དེ་གནས་བརྟན་སོཎཀའི་དང་། དེ་གནས་བརྟན་དཱསཀའི་དང་། དེ་ཨུཔཱལིའི་སྟེ། ཨུ་པཱ་ལི་ནི་སངས་རྒྱས་བཅོམ་ལྡན་འདས་ཉིད་ཀྱི་སློབ་མར་གྱུར་ཏོ།། མི་རིང་བར་མིང་སྲིང་གཉིས་ཀས་ཀྱང་དགྲ་བཅོམ་པ་ཐོབ་ནས་གནས་བརྟན་མཽ
 |
ཤྲཱི་པ་དཱའི་གྲིབ་མ། |
རྒྱལ་པོ་ཆེན་པོ། རེ་ཞིག་འཛམ་བུའི་གླིང་ཉིད་སྣམ་སྦྱར་འདི་ལྟ་བུ་དག་གིས་དམར་སེར་དུ་སྣང་ངོ་།། རྒྱལ་པོའི་དྲི་བ་རྫོགས་ནས་གནས་བརྟན་གྱིས། རྒྱལ་པོ་ཤིང་འདིའི་མིང་ཅི་ཞིག ཨ་མྲའོ།། ཨམྲ་གཞན་ཡང་མཆིས་སམ། འཕགས་པ་མང་དུ་མཆིས་སོ།། དེ་ལས་གཞན་པའི་ཤིང་འགའ་ཡང་མཆིས་སམ། འཕགས་པ། ཨ་མྲ་མ་ཡིན་པའི་ཤིང་མཐའ་དག་དེ་ཡིན་ནོ།། དེ་གཉིས་ལས་གཞན་དུ་གྱུར་པའི་ཤིང་འགའ་ཡང་མཆིས་སམ། འཕགས་པ་གཅིག་ཁོ་ན་སྟེ། ཨ་མྲའི་ཤིང་འདིའོ།།
རྒྱལ་པོ་ཤེས་རབ་ཅན་དུ་གཟིགས་ཏེ་ཆོས་བསྟན་པས་འཁོར་དང་བཅས་པ་མོས་པར་གྱུར་ཏེ། རང་གི་ཤིང་རྟ་ལ་གནས་བརྟན་འཁོར་བཅས་བཞུགས་སུ་གསོལ་ཏེ། གྲོང་ཁྱེར་དུ་གདན་དྲངས། རྒྱལ་བུ་བྷནྡུ་ཐོག་མར་རབ་ཏུ་བྱུང་ཞིང་བསྙེན་པར་རྫོགས་ཏེ་དགྲ་བཅོམ་པ་ཉིད་བརྙེས། གནས་བརྟན་བྱོན་པའི་ས་མིག་དེར་སིངྒ་ལའི་ཡུལ་གྱི་མཆོད་རྟེན་ཐོག་མ་བརྩིགས་པ་ད་ལྟའི་བར་གནས། ཕྱོགས་དེར་གནས་བརྟན་གཟིམས་པའི་བྲག་སྐྱིབས་སུ་མལ་ཁྲི་དང་སྔས་ཆ་སོགས་རྡོ་ལས་བྱས་པ་ཡང་སྣང་། བི་མཱ་ནའི་མདོ་བཤད་པ་ན་རྒྱལ་པོའི་བུ་མོ་ཨ་ནུ་ལ་འཁོར་ལྔ་བརྒྱ་དང་བཅས་པས་བདེན་པ་མཐོང་། ཡབ་ལ་རབ་ཏུ་འབྱིན་པར་ཞུས་པ་གནས་བརྟན་ལ་གསོལ་བས། བདག་ཅག་ལ་བུད་མེད་རབ་ཏུ་འབྱིན་པར་མ་གནང་བས། བདག་གི་སྲིང་མོ་དགེ་འདུན་རྩ་ལག་མ་བྱ་བ་ཡོད་པས་གདན་དྲོངས་ཤིག རྒྱལ་པོ་སྐར་རྒྱལ་གྱིས་རང་གི་ཚ་བོ་རྒྱལ་བུ་འཆི་ལྟས་ཨརིཏྠ་བྱ་བ་ལ་གཡས་འཁྱིལ་དང་། མུ་ཏིག་ལ་སོགས་པའི་སྐྱེས་མང་པོ་དང་བཅས་སྐྱ་ནར་གྱི་བུར་བརྫངས་པས། མྱ་ངན་མེད་ཀྱིས་རྒྱལ་པོ་སྐར་རྒྱལ་ཆོས་ལ་མོས་པ་ཐོབ་པ་ཐོས་ནས་ཤིན་ཏུ་དགའ་བར་གྱུར་ཅིང་། རང་གི་བུ་མོ་དགེ་འདུན་རྩ་ལག་མ་ཡང་བརྫངས། བྱང་ཆུབ་ཤིང་གི་ཡལ་ག་ཞིག་བླངས་ཏེ་གསེར་གྱི་ཡོལ་གོ་ལུས་ཚད་མཉམ་པའི་ནང་དུ་བཙུགས། ཉིན་བདུན་ལ་དུས་སྟོན་བྱས་ཏེ་དཔུང་གི་ཚོགས་ཆེན་པོ་དང་བཅས་པས་སིངྒ་ལའི་གླིང་དུ་བསྐྱལ། རྒྱལ་པོ་སྐར་རྒྱལ་གྱིས་སྔོན་མ་མྱོང་བའི་བསུ་བ་རྒྱ་ཆེན་པོ་བྱས་ཏེ། ཡལ་ཀ་དེ་སྤྲིན་ཆེན་པོའི་ཀུན་དགའ་ར་བར་བཙུགས་པ་ད་ལྟའི་བར་མ་འགགས་ཀྱི་གྲོང་ཁྱེར་ཨ་ནུ་རུ་ངྷ་པཱུ་ར་ན་ཤིན་ཏུ་རྒས་ཤིང་ཞུམ་པའི་རྣམ་པ་ཅན་དུ་བཞུགས་ཤིང་། སིངྒ་ལ་པ་རྣམས་ཀྱིས་སྲོག་གི་སྙིང་པོ་ལྟར་གཅེས་སྤྲས་བྱེད། ཡ་ང་བའི་སྐབས་ཀུན་ཏུ་དམག་དཔུང་ཆེན་པོས་བསྐོར་ཏེ་བསྲུངས། འདབ་མ་རེ་ལ་ཡང་གསེར་དང་འདྲ་བའི་རྩིས་ཐང་བྱེད་དོ།། བྱང་ཆུབ་ཤིང་འདི་གདན་དྲངས་པའི་བསུ་བཀོད་རྣམས་རྒྱ་གར་སཉྩིའི་ཡུལ་ན་ཨ་ཤོ་ཀ་རང་ཉིད་ཀྱིས་བཞེངས་པའི་མཆོད་རྟེན་ཆོས་ཀྱི་རྒྱལ་པོ་པ་ཞིག་ཡོད་པའི་ར་བའི་དྲྭ་མིག་གི་སྟེང་དུ་རྡོ་ལ་རི་མོར་བརྐོས་པ་དེང་སང་གི་བར་དུ་གནས་སོ།། བྱང་ཆུབ་ཤིང་སིངྒ་ལར་བཙུགས་པའི་ལོ་དེ་མྱ་ངན་མེད་ཀྱི་ཁྲི་ལོ་བཅོ་བརྒྱད་པ་ཡིན་པར་བཤད་ཅིང་། དེ་ནས་ལོ་བཅུ་གཉིས་ན་བཙུན་མོ་ཨཱ་སནྡྷི་མི་ཏྲ་བྱ་བ་དཀོན་མཆོག་གསུམ་ལ་དད་པ་དེ་ཤི། ལོ་བཞིའི་བར་རྒྱལ་པོ་ཉིད་བཙུན་མོ་ཏི་ཥྱ་རཀྵཱ་སྐར་རྒྱལ་སྲུང་མ་བྱ་བ་དེའི་དབང་དུ་སོང་། བུའི་མིག་འདོན་པ་སོགས་བྱས། དེ་བཙུན་མོ་གཙོ་མོར་གྱུར་པའི་ལོ་གསུམ་པ་ལ་རྒྱལ་པོ་རྟག་ཏུ་བྱང་ཆུབ་ཤིང་ལ་བསྙེན་བཀུར་བྱེད་དུ་འགྲོ་བ་ལ་དེ་མ་མོས་ནས་སྦྲུལ་གྱི་མཆེ་བ་དུག་ཅན་བཏབ་སྟེ་བྱང་ཆུབ་ཤིང་ཉམས་པར་བྱས་སོ།། དེ་ནས་སླར་ཡང་རྩ་བའི་ཆ་གཅིག་ལས་བྱང་ཆུབ་ཤིང་གཉིས་པ་ཞིག་སྐྱེས་ཤིང་། ལྗོན་པ་ཆེན་པོར་གྱུར་པ་ཞིག་མུ་སྟེགས་ཀྱི་རྒྱལ་པོ་ཤཱངྒ་ཟླ་བ་བྱ་བ་དེས་བཅད། ཟླ་ཤས་ནས་མ་ག་ངྷའི་རྒྱལ་པོ་གང་བའི་གོ་ཆ་བྱ་བས་སླར་ཡང་ཤིང་གསར་པ་སྐྱེས་ཤིང་ར་བས་བསྐོར་བ་ལས་བཙུན་པ་ཕ་ཧེན་བྱོན་ཚེ་ར་བའི་ཁ་ལ་མཉམ་པ་ཞིག་གཟིགས། ཐང་ཟན་ཙང་གིས་འདོམ་བརྒྱད་ཙམ་དུ་སྐྱེས་པ་ཞིག་གཟིགས། དེ་ནས་སླར་ཡང་ཀླ་ཀློའི་རྒྱལ་པོ་གྟོ་རིས་ཤིང་དེ་བཅད་ཅིང་། དེ་ཕྱིན་ཆད་ཇི་ལྟར་གྱུར་པ་མ་ཤེས་སོ།། བྱང་ཆུབ་ཤིང་ཉམས་ནས་ལོ་བཞི་ན་ཨ་ཤོ་ཀ་དུས་ཀྱི་ཆོས་སུ་གྱུར་ཅིང་། སྤྱིར་རྒྱལ་པོ་འདིས་ལོ་སོ་བདུན་རྒྱལ་སྲིད་བསྐྱངས་ཟེར་རོ།། དུས་ཚིགས་འདི་རྣམས་སིངྒ་ལའི་སྔོན་གྱི་གནས་བརྟན་མིང་ཆེན་བྱ་བས་མཛད་པའི་གདུང་ཆེན་མོའི་ལོ་རྒྱུས་ལ་རྩ་བ་བཅོལ་བ་ལགས་ཤིང་། ཨ་ཤོ་ཀའི་ལོ་རྒྱུས་ཀྱང་བདག་ཅག་གི་བསྟན་འགྱུར་གྱི་དེ་དག་དང་མི་མཐུན་པ་ཞིག་འདུག རྒྱལ་པོ་སྐར་རྒྱལ་གྱིས་ཆོས་ཀྱི་འཁོར་ལོའི་གཙུག་ལག་ཁང་ལ་སོགས་པ་གནས་གཞི་མང་དུ་བརྩིགས་ཤིང་། དཀོན་མཆོག་གསུམ་ལ་སྲི་ཞུ་ཆེན་པོ་བསྒྲུབས་ཏེ་ལོ་བཞི་བཅུར་སྲིད་བསྐྱངས་པའི་འོག་ཏུ་འདས། དེ་ནས་དེའི་ནུ་བོ་ཨུཏྟཡ་བྱ་བས་ཁྲི་བཟུང་། འདིའི་ཁྲི་ལོོ་བརྒྱད་པ་ལ། དགྲ་བཅོམ་པ་དབང་ཆེན་སྡེ་བསྙེན་པར་རྫོགས་ནས་དབྱར་དྲུག་ཅུ་བཞེས་པར་མྱ་ངན་ལས་འདས། ལོ་དེའི་རྗེས་མར་འཕགས་མ་དགེ་འདུན་རྩ་ལག་བསྙེན་པར་རྫོགས་ནས་དབྱར་ང་དགུ་ལོན་པ་གྲོངས། འཕགས་མའི་སྐུ་རུས་ཀྱི་སྟེང་དུ་ཀུན་དགའ་ར་བའི་མཆོད་རྟེན་དུ་གྲགས་པ་བཞེངས། ཨུཏྟཡ། ལོ་བཅུ་སྲིད་བསྐྱངས་ཏེ་ཤི།
 |
| བྱང་ཆུབ་ཤིང་གི་ར་བའི་ནང་། |
དེ་ནས་ཆོས་རྒྱལ་བརྒྱུད་མའི་རྒྱལ་ཐོག་ལྔ་འདས་པ་ན། རྒྱ་གར་ལྷོ་ཕྱོགས་ཏ་མི་ལའི་རྒྱལ་བུ་ཨེ་ལ་ར་བྱ་བ་འོངས་ཏེ་མ་འགགས་པའི་གྲོང་ཁྱེར་བཟུང་། རང་ཉིད་ཡུལ་དེ་ཀུན་གྱི་རྒྱལ་པོ་བྱས། མུ་སྟེགས་བྱེད་པའི་ལུགས་སྤེལ། འོན་ཀྱང་ཁྲིམས་ནི་གཟུ་བའི་ཚད་དུ་གྲགས། དེ་དུས་སིངྒ་ལའི་རྒྱལ་པོ་ཀ་ཝན་ཏི་སྶ་། གླིང་དེའི་ཡུལ་ཕྲན་རོ་ཧི་ནི་ཙམ་ལ་དབང་ཞིང་དེར་སྲིད་འཛིན་པ་ན། བུ་དུ་ཏུ་ག་མུ་ནུ་དང་། སདྡྷ་ཏིསྶ་བྱ་བའི་བུ་གཉིས་སྐྱེས། དུ་ཏུ་ག་མུ་ནུ་ནི་ཤིན་ཏུ་གཏུམ་ཞིང་རྩལ་ཆེ་བས། ཕ་འཇིགས་ཏེ་ཏ་མིལ་གྱི་རྒྱལ་པོ་དང་མི་འཐབ་པའི་མནའ་སྐྱེལ་དུ་བཅུག་པ་ལ་མ་མཉན། བྱིས་པའི་ཚེ། མལ་གྱི་ནང་ན་རྐང་ལག་བསྐུམས་ཏེ་ཁུམ་ཁུམ་པོར་ཉལ་བ་མཐོང་ནས། མས་དྲིས་པས། ཡུལ་མ་ཧཱ་བེ་ལི་ཕན་ཆད་མུ་སྟེགས་ཀྱིས་བཟུང་ཞིང་། ཕྱོགས་འདི་ནི་རྒྱ་མཚོ་ཡིན་ན་བདག་ཅག་ལ་རྐང་ལག་རྐྱོང་བའི་གནས་ཀྱང་ག་ལ་མཆིས་སྨྲས་སྐད། ལོ་བཅུ་དྲུག་པ་ན་གྲོགས་དཔའ་བོ་བཅུ་ཙམ་ཁྲིད་ནས་ཏ་མིལ་གྱི་རྒྱལ་པོ་ལ་འཐབ་ཏུ་ཆས་པ་ཕས་བཀག དེ་ནས་ཡབ་གྲོངས་ཀྱི་བར་བསྒུགས།
ལོ་གཅིག་ལྷག་ན་ཨེ་ལ་ར་བསད་དེ་མ་འགགས་པའི་གྲོང་ཁྱེར་སླར་ཐོབ། རང་ཉིད་གླིང་གི་རྒྱལ་པོར་གྱུར། གཡུལ་དུ་ཏ་མིལ་འབུམ་ལས་ལྷག་པ་བསད་ཟེར་ཞིང་། སྡིག་པ་དེ་མ་བྱས་ན་དེང་སང་གླིང་འདིར་སངས་རྒྱས་པའི་མིང་ཡང་ལུས་པ་མི་འོངས་སྐད། ཨེ་ལ་རའི་དཔའ་མཛངས་ཀྱིས་ཡིད་འཕྲོག་སྟེ། དགྲ་ཟླ་ཡིན་ཡང་གུས་པར་བྱ་བའི་འོས་སུ་བསམ་སྟེ། རོའི་སྟེང་དུ་བང་སོ་ཆེན་པོ་བསླངས། ཕྱིས་ཀྱི་རྒྱལ་རྒྱུད་རྣམས་དེར་སླེབས་ཚེ་རོལ་མོ་མི་བྱེད་པ་སོགས་བཀུར་བསྟི་དགོས་པའི་དྲིལ་བསྒྲགས། གསོ་སྦྱོང་གི་གཙུག་ལག་ཁང་དགུ་ཐོག་ཅན་མ་ཧཱ་པ་ཡའམ། ལིའི་ཕོ་བྲང་དུ་གྲགས་པ་བཞེངས། རུ་ཝན་བེ་ལི་ས་ཡ་བྱ་བའི་མཆོད་རྟེན་ཆེན་པོ་དེས་ཐོག་དྲངས་པའི་རྟེན་དང་གནས་གཞི་གྲངས་མེད་པ་ཞིག་བརྩིགས་ཏེ། སིངྒ་ལའི་ཨ་ཤོ་ཀར་གྲགས་པ་བྱས། ད་དུང་ཡང་བཞེངས་མཁན་རྒྱུས་མེད་པའི་རྟེན་དང་དགོན་རོ་ཞིག་མཐོང་ཚེ། དུ་ཏུ་ག་མུ་ནུས་བཞེངས་སོ་བྱ་བ་ཞིག་ཀུན་གྱི་ཁ་ལ་བྱང་། རྒྱལ་པོ་འདིའི་མིང་ནི་བྱིས་པ་ཚུན་ཆད་ཀྱི་ཁ་ན་རླུང་ལྟར་གྲགས་ཤིང་། འདི་དང་པྲ་ཀྲ་མ་བཱ་ཧུ་གཉིས་སིངྒ་ལའི་རྒྱལ་པོ་གྲགས་ཆེ་ཤོས་གཉིས་ཡིན། དེ་ཡང་ཏ་མིལ་བསད་པའི་སྡིག་སྦྱོང་དུ་མཆོད་རྟེན་རྒྱལ་པོ་རུ་བཾ་བཱ་ལི་འདི་བཞེངས། ནང་གི་དབུས་སུ་གསེར་ལས་གྲུབ་པའི་བྱང་ཆུབ་ཤིང་ཞིག་གི་མདུན་དུ་སངས་རྒྱས་ཀྱི་རིང་བསྲེལ་དང་། དེའི་མཐར་སྐྱེས་རབས་ཀྱི་རི་མོ་རྡོ་ལ་བརྐོས་པའི་བྱང་སེམས་གཙོ་བོ་རྣམས་ཀྱི་གཟུགས་གསེར་གར་བླུགས་ཀྱིས་བྱས་པ་དག་བཞུགས་ཟེར། མཆོད་རྟེན་ཧ་ཅང་ཆེ་བས་མ་གྲུབ་གོང་དུ་རྒྱལ་པོ་གྲོངས། འདའ་ཁར་བློན་པོ་རྣམས་ཀྱིས་རས་དཀར་པོའི་ཟོབ་ཆེན་པོ་བསླངས་ཏེ། རྒྱལ་པོའི་གློ་སྐར་ནས་གཟིགས་སུ་བཅུག དགེ་སློང་རྣམས་ཕོ་བྲང་དུ་བྱོན་ཏེ། སྔར་གྱི་དམག་དཔོན་གཙོ་བོ་པུ་ཏྟཱ་བྷྱ་ཡ་འཇིགས་མེད་བྱ་བ་དེས་རྒྱལ་པོས་དགེ་རྩ་བྱས་པ་དག་གི་ཐོ་རིང་པོ་ཞིག་བཀླགས་པར། ཞིབ་ཏུ་མཉན་ཏོ།། འོན་ཀྱང་དེ་ཀུན་ཕུན་སུམ་ཚོགས་པའི་དུས་སུ་བྱས་པ་འབའ་ཞིག་ལགས། སྔར་དགྲས་བདས་ཏེ་ནགས་སུ་བྲོས་སྐབས། ཉིན་གཅིག་རང་གི་ཟས་ཀྱི་ཕྱེད་དགེ་སློང་ཞིག་ལ་ཕུལ་བ་ཡོད་དེ། དེ་ཁོ་ན་འབྲས་བུ་ཆེའམ་སྙམ་ཟེར་ཞིང་ཚེ་འཕོས་སྐད།
དེ་ལྟ་བུའི་རྒྱལ་པོ་དུ་ཏུ་ག་མུ་ནུ་དེས་སྟོན་པ་འདས་ནས་ལོ་བཞི་བརྒྱ་དང་ཞེ་གསུམ་པ་ལ་ཁྲི་བཟུང་ཞིང་། ལོ་ཉེར་བཞིར་རྒྱལ་སྲིད་བསྐྱངས་སོ།། དེའི་འོག་ཏུ་དེའི་སྤུན་སདྡྷ་ཏིསྶས་ཁྲི་བཟུང་ཞིང་། མཆོད་རྟེན་གྱི་ལས་མཇུག་བསྐྱངས། དེའི་རྗེས་སུ་དེའི་བུ་གསུམ་གྱིས་སྲིད་བསྐྱངས། སངས་རྒྱས་འདས་ནས་ལོ་ལྔ་བརྒྱ་དང་གཅིག་ལ་རྒྱལ་པོ་བ་ལ་གམྦའམ་མིང་གཞན་འཇིགས་མེད་བྱ་བས་སྲིད་བསྐྱངས། སངས་རྒྱས་འདས་རྗེས་ཀྱི་ལོ་ལྔ་བརྒྱ་དང་གཅིག་ནས། འདིའི་ཁྲི་ལོ་ཚུགས། མི་རིང་བར་རྒྱ་གར་ཏ་མི་ལའི་མུ་སྟེགས་ཀྱི་རྒྱལ་པོ་འོངས་ནས་ཁྲི་ལས་ཕབ། ནགས་ཚལ་དུ་སྦས་ཏེ་བྲོས་པས་བྱ་སྐྱིབས་རྣམས་ལ་ཐིགས་འཛག་ཆེ་བས་དཀའ་ཚེགས་མྱོང་། སླར་རྒྱལ་སྲིད་ཐོབ་ནས་རང་ཉིད་བསྡད་པའི་བྲག་སྐྱིབས་རེ་རེ་བཞིན་དུ་གཙུག་ལག་ཁང་བརྩིགས་པས་སིངྒ་ལའི་རྒྱལ་པོས་རྡོ་ལ་ཡང་བྱས་པ་གཟོ་བར་གྲགས།
འཇིགས་མེད་རི་བོའི་མཆོད་རྟེན་བཞེངས། དེ་ཡང་སྔར་ཏ་མི་ལའི་དམག་བསླེབས་ཏེ་རྒྱལ་པོ་བྲོས་སྐབས་གཅེར་བུ་པའི་དགེ་སློང་ཞིག་གིས་མཐོང་སྟེ། གད་མོ་བགད་པའི་ས་མིག་དེ་ལ་བརྩིགས། རྒྱལ་པོའི་མཚན་ལས་དྲས་ཏེ་མཆོད་རྟེན་གྱི་མིང་ཆགས། མྱ་ངན་མེད་ཀྱིས་བཞེངས་པ་དག་གི་ཁྲོད་ན་ཡང་འདི་ལས་མཐོ་བའི་མཆོད་རྟེན་མེད་པར་གྲགས། ད་ལྟ་ནི་མཆོད་རྟེན་དེ་འཇིག་སྟེ། ནགས་ཚལ་དང་བཅས་པའི་རི་དེའུ་ཞིག་ཏུ་གྱུར་པའི་རྩེ་ན་ཡར་ལ་ཆོས་འཁོར་ཆག་པའི་ཕྱེད་ཙམ་འཐོན། ཕྱོགས་དེ་ཐང་རང་དུ་ཡོད་ཀྱང་ཆོས་འཁོར་གྱི་བར་དུ་འཛེགས་ཏེ་བལྟས་ན། གླིང་མཐའ་སྐོར་གྱི་རྒྱ་མཚོ་ནག་མེར་བར་མཐོང་ཞིང་། སྐྱི་གཡའ་བ་ལྟར་ཡོད།
 |
| བྱེ་མའི་གཙུག་ལག་ཁང་། |
སྔར་ཏམྦུ་ལའི་རི་ལ་སྦས་ཏེ་དགྲའི་ལག་ནས་སྲོག་ཐར་བས་བྲག་རི་དེ་ལ་ཏམྦུ་ལའི་གཙུག་ལག་ཁང་བརྩིགས་པ་ཡང་། ད་ལྟའི་བར་རྒྱས་ཤིང་འབྱོར་ཏེ་གནས། འདིའི་བར་སྡེ་སྣོད་གསུམ་ཡི་གེར་མ་བྲིས་པ་ལུང་འབོགས་ཏེ་འཛིན་པས་ཆུད་ཟོས་ཀྱིས་དོགས་ནས་ཨ་ལུ་བི་ཧཱར་བྱེ་མའི་གཙུག་ལག་ཁང་དུ་དགེ་འདུན་བསྡུས་ཏེ་འབྲུ་གཅིག་མ་ཆད་པར་ཡི་གེར་བཏབ། དགོན་དེར་བྲག་ལིང་པོ་མི་ཐར་དཀའ་བ་ཞིག་འདུག་པ་དེའི་ནང་ན་སྡེ་སྣོད་གསུམ་གྱི་ཐོག་མའི་ཕྱི་མོ་ཟངས་གླེགས་ལ་བྲིས་པ་དག་གཏེར་དུ་སྦས་པ་ཡོད་ཟེར། དགོན་པ་དེ་ན་དིང་སང་སླར་ཡང་སྡེ་སྣོད་གསུམ་ཟངས་ཀྱི་གླེགས་བུ་ལ་བརྐོ་བའི་གྲབས་བྱེད་ཅིང་འདུག རྒྱལ་པོ་འཇིགས་མེད་ཀྱིས་བཞེངས་པའི་གཙུག་ལག་ཁང་གར་བཞུགས་ན་ཁ་བྱང་སོགས་རྡོ་ལ་བརྐོས་པ་རྣམས་(𑀳𑀲𑀚𑀸𑀬𑀓𑀲𑀣𑀤𑁄𑀮𑀤𑀓𑀼𑀘𑀮𑀰𑀕𑀘𑀬)འདི་ལྟ་བུ་སྣང་བས་སྡེ་སྣོད་རྣམས་ཡིག་གཟུགས་གང་ཐོག་མར་བྲིས་པ་ནི་མྱ་ངན་མེད་ཀྱི་ཡི་གེ་རིགས་སུ་ངེས་སོ།། དེ་ལྟར་གནས་བརྟན་པ་དག་གི་སྡེ་སྣོད་ནི་སངས་རྒྱས་འདས་ནས་ལོ་ལྔ་བརྒྱ་དང་བཅུ་གྲངས་ཙམ་ན་གླེགས་བམ་དུ་བྲིས་ལ། སྡེ་པ་གཞན་རྣམས་ཀྱིས་བྲིས་པའི་དུས་ཚིགས་ནི་གསལ་བར་མ་ངེས་ཤིང་། སངས་རྒྱས་པའི་ལུང་ཐམས་ཅད་ཡི་གེར་བྲིས་པའི་རྗེས་སུ་གཅེར་བུ་པ་དག་གི་ཡན་ལག་གསུམ་པོ་ཡང་བྲིས། ཐམས་ཅད་ཀྱི་མཇུག་ཏུ་བྲམ་ཟེ་དག་གི་རིག་བྱེད་བཞི་ཡང་ཡི་གེར་བྲིས་སོ།། སྤྱིར་མི་བྲི་བ་རྣམ་པ་ལྔ་སོགས་མདོ་ལས་ཀྱང་གསུངས་པ་བཞིན། ལུང་འགངས་ཆེན་རིགས་ཡི་གེར་མི་བྲི་བ་དེ་སྔོན་རྒྱ་གར་ན་ཕྱི་ནང་གཉིས་ཀའི་སྲོལ་དུ་ཡོད་འདུག་ལ། དུས་ཕྱིས་བར་དུ་ཡང་ཇི་སྐད་དུ། རང་གི་སེམས་ལ་བལྟས་བལྟས་ནས།། ཡིག་ནག་དཔེ་ལ་བལྟ་མ་མྱོང་།། ཞེས་པ་ལ་སོགས་པ་བཞིན་རྣལ་འབྱོར་པ་རྣམས་གླེགས་བམ་ལ་ཅུང་ཟད་མི་དགྱེས་པ་ཡིན་ནོ།།
དེ་ལྟར་མདོ་རྣམས་ཁ་རྒྱུན་དུ་འདོན་པ་ན། ཚིག་འགའ་ཞིག་མི་མཐུན་པར་གྱུར་པ་ལ་དག་མ་དག་བརྩད་ཅིང་དགེ་འདུན་གྱེས་ཏེ་རྣལ་འབྱོར་པ་རྣམས་སོ་སོར་གྱེས་པའི་རྩ་བ་གཅིག་ནི་དེ་ཡིན་པར་འདུག་ཅིང་། དེ་ཡང་ཐོག་མར་གཉིས། དེ་ནས་དྲུག དེ་ནས་བཅོ་བརྒྱད། དེ་ནས་དྲུག་ཅུར་གྱེས་པ་སོགས་བཤད་དོ།། ལར་ལོ་རྒྱུས་འདི་རིགས་རྣམས་ལ་ཉན་ཐོས་སྡེ་པ་དག་ཤིན་ཏུ་ཐུགས་རྒྱུས་ཞིབ། རང་རེའི་རྒྱལ་པོ་གནམ་རི་སྲོང་བཙན་དང་དུས་མཉམ་པའི་བཙུན་པ་ཕ་ཧེན་གྱི་སྐབས་སུ་ད་དུང་ཡང་རྒྱ་གར་བྱང་གི་ཉན་ཐོས་ཀྱི་དགོན་པ་རྣམས་ན་གླེགས་བམ་གྱི་སྲོལ་མེད་པས། མདོ་དཔེ་རྣམས་ཀྱི་ཕྱི་མོ་ཐེག་ཆེན་དགོན་པ་འབའ་ཞིག་ནས་གཡར་ཞེས་གསུངས་སོ།། དེས་ན་ཉན་ཐོས་སྡེ་པ་ཕལ་མོ་ཆེ་ཞིག་རྗེས་ཤུལ་ཙམ་ཡང་མེད་པར་ཡལ་བ་ཡང་རྒྱུ་མཚན་དེ་ཡིན་ནམ་སྙམ། འདི་དག་ཞར་ལ་ཐལ་བ་ལགས། རྒྱལ་པོ་འཇིགས་མེད་ཀྱི་རྗེས་སུ་རྒྱལ་མོ་ཨ་ནུ་ལ་ཞེས་བྱ་བ། དཔའ་མཛངས་དང་ལྡན་ཞིང་། སྤྱོད་པ་ངན་པའི་མཐར་ཐུག་པ་ཞིག་བྱུང་། ཁྱོ་བོ་སྔ་ཕྱི་གཉིས་ལ་དུག་སྦྱིན་ནས་གསོད་པ་སོགས་བྱས། དེའི་འོག་ཏུ་ཏ་མིལ་མུ་སྟེགས་ཀྱི་རྒྱལ་པོས་སིངྒ་ལ་བཅོམ། མི་སྟོང་ཕྲག་བཅུ་གཉིས་བཟུང་ནས་བྲན་ཁོལ་དུ་ཁྱེར་བ་སོགས་བྱས་པར་རྒྱལ་པོ་གླང་ཆེན་དཔུང་སྟེ་ག་ཛ་བཱ་ཧུས་གྱད་ནཱི་ལ་བྱ་བ་ཁྲིད་དེ་གཉིས་ཀ་ཙཽ་ལའི་ཡུལ་དུ་སོང་ནས། ཏ་མིལ་གྱི་རྒྱལ་པོ་སོ་ལིའི་ཐད་དུ་འཇིགས་པ་མེད་པར་ཕྱིན་ཏེ་བདག་ཅག་གི་མི་རྣམས་འོན་ཅིག དེ་ན་རེ། ཁྱོད་ལ་དཔུང་ཡང་མི་འདུག་ན། གལ་ཏེ་མ་བྱིན་ན་ཇི་ལྟར་བྱ། འདི་ལྟར་བྱའོ་ཞེས། གླང་ཆེན་དཔུང་གིས་བྱེ་མ་སྤར་གང་བླངས་ཏེ། ཚན་པོ་ཆེའི་སྟོབས་ཀྱིས་བཙིར་བས་དེ་ནས་ཆུ་འཛག་པར་གྱུར་པ་སོ་ལིས་མཐོང་ནས་སྐྲག་སྟེ། མི་རྣམས་ཕྱིར་ཕུལ་ཞིང་། སྔར་སིངྒ་ལ་ནས་འཕྲོག་སྟེ་ཁྱེར་བའི་རྒྱལ་ཆེན་བཞིའི་སྐུ་བརྙན་གྱི་རྒྱན་སོགས་རིན་ཆེན་རྣམས་ཀྱང་སླར་སྤྲད་ཟེར། དེ་ནས་རྒྱལ་རབས་འགའི་འོག་ཏུ་སངས་རྒྱས་འདས་རྗེས་ཀྱི་ལོ་བདུན་བརྒྱ་དང་གྱ་གསུམ་པ་ལ་བབས་པ་ན་རྒྱལ་པོ་བྱང་ཆུབ་སེམས་དཔའ་སངྒ་བོ་ངྷི་དགེ་འདུན་བྱང་ཆུབ་བྱ་བས་སྲིད་འཛིན། སྲོག་ཆགས་གྲོག་སྤུར་ལ་ཡང་མི་འཚེ་བའི་མནའ་བོར། ཡུལ་མི་རྣམས་ལ་མུ་གེ་དང་། ནད་ཡམས་ཀྱི་འཇིགས་པ་བྱུང་བ་ཡང་བདེན་སྟོབས་བརྗོད་པས་བསྐྱབས། རོའི་མགོ་བཅད་ནས་བཙོན་མ་རྣམས་ཚེ་ཐར་བཏང་བ་སོགས་བྱས་པར་ལོ་གཉིས་ཀྱི་འོག་ཏུ་བློན་པོ་གོ་ཐ་ཀཱ་བྷྱ་བྱ་བ་ངོ་ལོག་སྟེ་དཔུང་ཆེན་ཁྲིད་ནས་བསླེབས་པ་ན། མི་མང་པོ་གསོད་ཀྱི་དོགས་ནས་མཚན་ལ་ཕོ་བྲང་ནས་བྲོས།
བློན་པོ་དེས་རྒྱལ་པོའི་མགོ་ཁྱེར་ནས་འོངས་ན་གསེར་འདི་སྙེད་སྦྱིན་ནོ་སྨྲས་པས། མི་མང་པོ་ནོར་ལ་བརྔམས་པས་མགོ་བརྫུས་མ་མང་པོ་ཕུལ་བ་སངྒ་བོ་ངྷིས་གསན་ཏེ། ངའི་ཆེད་དུ་མང་པོ་དག་བཀུམས་པ་མ་ལེགས་གསུངས་ནས། ཟས་སྐྱེལ་བའི་རྒད་པོ་ཞིག་ལ། ངའི་མགོ་ཁྱེར་ལ་རྒྱལ་པོ་ལ་ཕུལ་ཅིག་ཅེས། རང་གི་རྩེ་ཆུང་བྲེགས་ཏེ་གྲོངས། སིངྒ་ལའི་ནུབ་ངོས་ཀྱི་ཐང་ན་ངོས་བཞི་རྡོ་ཐེམ་གྱིས་གཡོགས་པའི་རི་ཆུང་ཞིག་གི་རྩེར་དེ་ངྷི་གྷ་མ་བྱ་བའི་གཙུག་ལག་ཁང་དང་། རྒྱལ་པོ་འདིའི་གདུང་རྟེན་མཆོད་རྟེན་ངོ་མཚར་ཅན་ཞིག་ཀྱང་བཞུགས། དབུ་ཡང་དེར་སྦྱིན་པ་ཡིན་ཟེར། གདུང་རྟེན་དེ་ནི་གྲོང་དུ་འཇུག་མཁན་གྱི་རྒྱལ་པོ་དེས་བཞེངས་སྐད།
དགོན་དེར་སྤྱོད་ངན་གྱི་གྲགས་པ་ཆེ་བའི་དགེ་སློང་འགའ་ཙམ་ཡོད། འབྱོར་བ་ཡང་ཤིན་ཏུ་ཆེ། རྒྱལ་པོ་གོ་ཐ་ཀཱ་བྷྱའི་སྐབས་སུ་འཇིགས་མེད་རིའི་དགེ་སློང་རྣམས་ཀྱིས་རྒྱ་གར་བའི་བཙུན་པ་འགའ་ཞིག་གི་རྗེས་སུ་འབྲངས་ཏེ་བཻཏུལྱ་རྣམ་པར་མི་མཐུན་པའམ་ཐེག་པ་ཆེན་པོའི་སྲོལ་དག་བླངས། སཱ་ག་ལིའི་བུ་བྱ་བའི་སྡེ་པ་ཞིག་ཟུར་དུ་གྱེས། དེའི་ཚེ་སྟོན་པ་མྱ་ངན་ལས་འདས་ནས་ལོ་བདུན་བརྒྱ་དང་གོ་བཞི་སོང་། ཡུན་དེ་སྲིད་དུ་འཕགས་པ་གནས་བརྟན་པའི་དགེ་འདུན་རྣམས། ཆོ་ག་དང་འདོན་པ་གཅིག་ཏུ་གྱུར་ཅིང་། རྩོད་པ་མེད་པར་གནས། དེ་ནས་རྒྱལ་རབས་གསུམ་པ་ནི་རྒྱལ་པོ་སྡེ་ཆེན་མ་ཧཱ་སེ་ན་ཞེས་བྱ་བ་སྟེ། སྟོན་པ་འདས་ནས་བརྒྱད་བརྒྱ་དང་ཉེར་གཅིག་པ་ལ་ཁྲི་བཟུང་། དེ་དུས་རྒྱ་གར་ཙཽ་ལའི་ཡུལ་ནས་འོངས་ཤིང་། ཆོས་སྲིད་ཀྱི་སྡེ་པར་གཏོགས་པའི་དགེ་སློང་དགེ་འདུན་རྩ་ལག་བྱ་བ་ཁྱིམ་པ་འདྲིད་པ་ལ་མཆོག་ཏུ་མཁས་པ་ཞིག་བསླེབས་པར། རྒྱལ་པོས་ཁོའི་ངག་ལ་མཉན་ཏེ། གཙུག་ལག་ཁང་ཆེན་པོའི་དགེ་སློང་རྣམས་སྤྱོད་པ་མ་དག་པ་ལ་བསྙད་དེ་བསོད་སྙོམས་གཅོད་པ་སོགས་བྱས་ཀྱང་མི་རིང་བར་དགེ་འདུན་སླར་བཟླུམ།
འོན་ཀྱང་དགེ་འདུན་གྱི་མཚམས་ཆེན་པོའི་ནང་ཁོངས་སུ་རྒྱལ་བྱེད་ཚལ་ཞེས་བྱ་བའི་གནས་གཞི་བརྩིགས་ཏེ་ལྟ་སྤྱོད་མི་མཐུན་པའི་དགེ་སློང་རྣམས་དེར་འཇོག་པ་སོགས་བྱས། གནས་གཞི་འདིའི་ཤུལ་ན་ཡང་མཆོད་རྟེན་རིར་གྱུར་པ་འཇིགས་མེད་རི་བོ་དང་མཚུངས་པ་ཞིག་ད་ལྟའི་བར་བཞུགས། དེ་ལྟར་གནས་གཞི་གསུམ་པོ་འདི་བྱེ་སྨྲའི་སྡེ་ཐ་མ་གསུམ་གྱི་རྩ་བར་སྣང་ཞིང་། དེ་གསུམ་ཕན་ཚུན་མི་མཐུན་པར་གནས་པའི་ཚུལ་ཡང་ཁོང་པའི་ལོ་རྒྱུས་རྣམས་ན་ཤིན་ཏུ་རྒྱས། རྒྱལ་པོ་འདིས་རྫིང་བུ་ཆེན་པོ་བཅུ་དྲུག་བྱས་པའི་ནང་ན། མིན་ནེ་རཱི་ཡ་བྱ་བ་དེ་རྒྱ་མཚོའི་འཁྱིལ་ཁུག་ཡིན་ནམ་སྙམ་པ་ཡོད། མཚོ་སྔོན་ཤར་ལོག་ན་མཚོ་ཆུང་དུ་གྲགས་པ་ཞིག་ཡོད་པ་དེ་ལས་མི་ཆུང་བ་སྙམ་བྱེད། ལར་སིངྒ་ལའི་རྒྱལ་པོ་དག་གིས་བྱས་པའི་རྫིང་བུ་རྣམས་དོན་ལ་མཚོ་ཆུང་རེ་འདུག་པས་རྒྱ་གར་གྱི་དེ་འདྲ་མིན། དེ་ཀུན་གཙོ་བོར་ཞིང་པ་ལ་ཕན་ཆེད་དུ་བྱས་པར་འདུག འདི་ཡན་ལ་བི་ཛཱ་ཡ་རྣམ་རྒྱལ་ནས་བརྩིས་པའི་རྒྱལ་རབས་དྲུག་ཅུ་སོང་ཟེར། དེ་ནས་དེའི་བུ་མེ་གྷ་བ་ནས་སྲིད་སྐྱོང་བའི་རིང་ལ་སྔར་གྱི་བསྟན་པ་ཉམས་པ་ཡང་སོར་ཆུད། འདིས་དཀོན་མཆོག་གསུམ་ལ་བྱ་བ་བླ་ལྷག་ཏུ་བྱས། དགྲ་བཅོམ་དབང་ཆེན་སྡེའི་སྐུ་དྲིན་ནས་གནས་བརྟན་དེའི་སྐུ་བརྙན་གསེར་གར་བླུགས་པ་ལས་མི་ཚད་ལོངས་པ་དང་། དེ་དང་ལྷན་དུ་བྱོན་པའི་དགེ་སློང་དག་གི་འདྲ་བརྙན་ཡང་བྱས།
དེ་ནས་བཅོམ་ལྡན་འདས་མཉན་ཡོད་ནས་ཡངས་པ་ཅན་དུ་གཤེགས་པའི་ལམ་བར་གྱི་བསུ་བཀོད་ཁོ་ན་ལྟར་བྱས་ཏེ། རྒྱལ་པོ་རང་ཉིད་ཀྱིས་སྣ་དྲངས་པའི་བསུ་བཀོད་ཆེན་པོ་དང་བཅས་སྐུ་གཟུགས་དེ་ཨམྦ་ཏ་ལ་ནས་གྲོང་ཁྱེར་དུ་སྤྱན་དྲངས། འདིའི་ཁྲི་ལོ་དགུ་པར་བབས་པ་ན། ཀ་ལིངྐའི་རྒྱལ་པོའི་གདུང་སྐལ་སངས་རྒྱས་ཀྱི་ཚེམས་མཆེ་བ་དེ་སིངྒ་ལར་བྱོན།
དེ་ཡང་ཀ་ལིངྐའི་རྒྱལ་པོ་མུ་སྟེགས་ཀྱི་དམག་གིས་ཕམ་སྟེ་མཚོན་ཕོག་ནས་འཆི་ལ་ཉེ་བ་ན། རང་གི་བུ་མོ་ལ་ཁྱོད་ཚེམས་འཁྱེར་ལ་བྲོས་ནས་སིངྒ་ལའི་རྒྱལ་པོ་ནང་པར་ཡོད་པ་ལ་བྱིན་ཅིག་ཅེས་སྨྲས་པ་བཞིན། དེས་ཚེམས་སྐྲ་གསེབ་ཏུ་བཅུག་སྟེ་སིངྒ་ལར་སླེབས་ནས་རྒྱལ་པོ་མེ་བྷ་བན་ལ་ཕུལ། @རྒྱལ་པོས་སྔོན་མ་མཐོང་བའི་བསུ་བཀོད་དང་བཅས་ཏེ། ཆོས་རྒྱལ་སྐར་རྒྱལ་གྱིས་བཞེངས་པའི་ཆོས་ཀྱི་འཁོར་ལོའི་གཙུག་ལག་ཁང་དུ་བཞུགས་སུ་གསོལ། རྒྱ་གར་ནས་དགེ་སློང་བྱོན་པ་དག་གིས་ཡུལ་དབུས་ན་བསྟན་པ་ཉིན་རེ་བཞིན་རྒུད་ཟེར་བ་ཐོས་ཏེ་གུཔྟའི་རྒྱལ་པོ་རྒྱ་མཚོ་སྦས་པ་ལ་སྦྲན་ཏེ་རྡོ་རྗེ་གདན་དུ་གཙུག་ལག་ཁང་ཆེན་པོ་ཞིག་བྱས། དགེ་སློང་མང་པོ་གནས་སྲུང་དུ་བཏང་བ་ལས། དུས་ཕྱིས་བར་དུ་ལུས་པ་རང་རེའི་ཆག་ལོས་ཀྱང་གཟིགས་ཏེ། སིངྒ་ལའི་དགེ་སློང་སུམ་བརྒྱ་རེ་རྡོ་རྗེ་གདན་ལ་བདག་བྱེད་ཅིང་རྒྱུན་དུ་སྡོད་པ་དང་། ཁོང་རྣམས་བརྒྱད་སྟོང་གི་གླེགས་བམ་ཞིག་ཡོད་པ་ལ་མ་དགའ་ཚུལ་སོགས་གསུངས། མེ་གྷ་བ་ནས་ལོ་ཉེར་བརྒྱད་སྲིད་བསྐྱངས་སོ།།
དེ་ལྟ་བུའི་སྟོན་པའི་ཚེམས་མཆེ་བ་དེ་ནི། གསུམ་པ་ཀ་ལིང་རྒྱལ་པོའི་ཡུལ་ན་སྟེ།། ཞེས་མདོ་ལ་གསལ་བ་དེ་རང་ཡིན་པར་གྲགས་ཤིང་། ད་ལྟ་ཀཎྜི་ན་ཕྲེང་ལྡན་མའི་གཙུག་ལག་ཁང་བྱ་བར་བཞུགས། དགོན་དེ་སིངྒ་ལའི་གནས་གཞི་ཀུན་གྱི་གཙོ་བོ་ཡིན་ཞིང་། ཡུལ་སྤྱིའི་དགེ་འདུན་གནས་བརྟན་ཡང་དེར་ཡོད། དེ་ལ་སངྒ་རཱ་ཛ་སྟེ་དགེ་འདུན་རྒྱལ་པོར་(གནས་བརྟན་རྒྱལ་པོ་)ཡང་འབོད། དགེ་འདུན་རྒྱལ་པོ་བྱ་བ་བསྐོ་སྲོལ་འདི་བྷར་མ་དང་། ཤྱམ་སོགས་ལྷོ་ཕྱོགས་ཀྱི་ཡུལ་ཀུན་ལ་སྔ་མོ་ཞིག་ནས་བྱུང་འདུག་ཅིང་། དབང་ཡང་ཤིན་ཏུ་ཆེ། ཇོ་བོའི་བླ་མ་གསེར་གླིང་རྒྱལ་པོ་དེ་ཡང་ཡུལ་དེའི་སངྒ་རཱ་ཛ་ཡིན་ནམ་སྙམ། ཚེམས་དེ་རྒྱུན་དུ་མཆོད་རྟེན་ཆུང་ངུ་རིམ་པ་དུ་མ་ཡོད་པ་ཞིག་ཏུ་བཞུགས། སྐབས་འགར་ཕྱི་ལ་བཏོན་ཏེ་མཇལ་ཐུབ། སྦོམ་ཕྲ་བྱིས་པའི་མཛུབ་ཆུང་ཙམ་ལ་རིང་ཆ་སོར་གཉིས་ལྷག་ཙམ་པ། ཁ་དོག་དཀར་ལ་སེར་མདངས་ཆགས་པ། སྣེ་གཅིག་ཤིན་ཏུ་རྣོ་བའི་དབྱིབས་ཟླ་ཚེས་ཀྱི་ཕྱེད་འདྲ་བ་ཡོད། ཧོར་ཟླ་དགུ་པའི་ཚེས་གསུམ་ནས་རེས་མོས་ཀྱིས་ཉིན་དགུའི་རིང་ལ། ཚེམས་སྤྱན་འདྲེན་པའི་དུས་སྟོན་བྱེད་ཅིང་། སེར་སྦྲེང་རྒྱ་ཆེན་པོ་ཡོད།
སྲོད་ལ་མགོ་བཙུགས་ཏེ་ཉིན་རེ་བཞིན་གླང་ཆེན་གྱི་གྲངས་སྤར་ཏེ་ཉ་བའི་ཉིན་མོ་གླང་ཆེན་སུམ་བརྒྱ་ཙམ་རེ་ཡོད། གླང་ཆེན་གསུམ་གཤིབ་ཏུ་བསྒྲིགས་པའི་དབུས་མའི་སྟེང་དུ་ཚེམས་ཀྱི་མཆོད་རྟེན་བཞུགས་ཁང་དང་བཅས་པ་དང་། གཞན་གཉིས་ལ་གདུགས་དཀར་དང་རྔ་ཡབ་ཐོགས་པ་བཞག གླང་ཆེན་དགུ་རེའི་མཚམས་ན་རྒྱལ་པོའི་ཆས་གྱོན་པ་ཞིག་རོལ་མོ་འཁྲོལ་བའི་མི་སུམ་ཅུ་ཙམ་རེས་བསྐོར་ཏེ་བྲོ་གར་བྱེད་པ་བཅས་ཤིན་ཏུ་ཡང་མཚར། གྲོང་ཁྱེར་གྱི་སྲང་ཆེན་རྣམས་བསྐོར་ནས་ནམ་གུང་ཡོལ་ཙམ་ན་མཇུག་བསྡུ་ཐུབ། དེ་ནས་རྒྱལ་རབས་བཞི་པ་རྒྱལ་པོ་མིང་ཆེན་གྱིས་སྲིད་སྐྱོང་བ་ན། བཙུན་པ་ཆེན་པོ་སངས་རྒྱས་དབྱངས་བུདྡྷ་གྷོ་ཥ་སངས་རྒྱས་དབྱངས་སིངྒ་ལར་བྱོན།
དེ་ཡང་མ་ག་ངྷའི་ཡུལ་ལྟེང་རྒྱས་ཀྱི་བྱང་ཆུབ་ཤིང་དང་མི་རིང་བའི་ཕྱོགས་ཤིག་ཏུ་བྲམ་ཟེའི་རིགས་སུ་འཁྲུངས་ཏེ། རིག་བྱེད་གསུམ་ལ་མཁས་པར་སྦྱངས། ཡུལ་དུ་མར་སོང་སྟེ་རྒོལ་བ་མང་པོ་ཚར་བཅད་ནས་སློབ་མ་སྟོང་ཕྲག་དུ་མ་སྐྱོང་བ་ལས། དུས་ནམ་ཞིག་ན་གཙུག་ལག་ཁང་ཞིག་ཏུ་སོང་བར་དགེ་སློང་ནམ་གྲུ་རཻ་བ་ཏ་བྱ་བ་མཐོང་སྟེ། བྲམ་ཟེ་ཡང་དག་པའི་མཐའ་མངོན་དུ་བྱེད་པ་ལ་འདི་ཙམ་གྱིས་གར་ཡང་མ་ཕྱིན་གྱི་སངས་རྒྱས་ཀྱི་གསུང་ལ་སློབས་ཤིག དེ་ཐོས་པ་དང་ཤིན་ཏུ་དྲེགས་པས་ཁྲོས་ནས་འདི་བོང་བུའི་སྐད་འབྱིན་པ་འདི་སུ་ཞིག ནམ་གྲུས། ཁྱོད་རེ་ཞིག་བོང་བུ་ཉིད་ཀྱང་མི་ཤེས་ན། ཅིའི་ཕྱིར་གཞན་ལ་གཤེ་བར་བྱེད། དེ་ཅི་ཞིག ནམ་གྲུས། བོང་བུའི་མིང་ལས་བརྩམས་ཏེ་ཆོས་མངོན་པའི་འབེལ་གཏམ་བགྱིས་པས། དེ་རྣམ་པ་ཐམས་ཅད་དུ་ཞུམ་པར་གྱུར་ཏེ་མཐར་གྱིས་བསྟན་པ་ལ་དད་པས་རབ་ཏུ་བྱུང་། སྡེ་སྣོད་གསུམ་ལ་མཁས་པར་གྱུར་ཅིང་ཨཊ྄ཋ་སཱ་ལི་ནཱི་སོགས་བསྟན་ཆོས་མང་དུ་བྱས། དེ་ནས་མདོའི་ཨ་ཊ྄ཋ་ཀ་ཐཱ་རྣམས་ལངྒའི་ཡུལ་འབའ་ཞིག་ན་ཚང་བར་གཟིགས་ཏེ། དེར་བྱོན་ནས་གཙུག་ལག་ཁང་ཆེན་པོ་རྣམས་ཀྱི་ཁྲོད་དུ་བཞུགས་ཤིང་། ལུང་གི་ཡན་ལག་ཐམས་ཅད་ཁོང་དུ་ཆུད་པར་མཛད། ནམ་ཞིག་ན་བི་ཤུདྷི་མཱགྒཱ་རྣམ་པར་དག་པའི་ལམ་ཞེས་བྱ་བའི་ཆོས་མངོན་པའི་དགོངས་འགྲེལ་ཆེན་པོ་དེ་བརྩམས་ཏེ། བཅོམ་ལྡན་འདས་བྱང་ཆུབ་ཤིང་གི་དྲུང་དུ་བཞུགས་ནས་གང་དགོངས་པའི་དོན་མཐའ་དག་གསལ་བར་བྱས་པས་ལྷ་རྣམས་ཀྱིས་གླེགས་བམ་ལན་གཉིས་སུ་བརྐུས། གསུམ་པའི་སྐབས་སློབ་མ་ལ་གཏད། བཙུན་པ་སངས་རྒྱས་དབྱངས་ཞེས་སྙན་གྲགས་ཀྱིས་འཇིག་རྟེན་ཀུན་ཏུ་ཁྱབ། སླར་ཡང་མ་ག་ངྷའི་ལྟེང་རྒྱས་སུ་བྱོན་ཏེ་བྱང་ཆུབ་ཀྱི་ཤིང་མཇལ་ཞིང་། ཡུལ་དེར་ཡང་བསྟན་པའི་བྱ་བ་རླབས་པོ་ཆེ་མཛད་དེ་མྱ་ངན་ལས་འདས། ཇི་ལྟར་རང་རེ་རྣམས་ཀྱིས་འཕགས་པ་ཐོགས་མེད་ལ་ཅི་ཙམ་དུ་གུས་པ་དེ་ཙམ་དུ་ཉན་ཐོས་སྡེ་པ་དེ་དག་ཀྱང་བཙུན་པ་ཆེན་པོ་འདི་ལ་གུས་པ་དང་སྙན་པ་བརྗོད་པར་བྱེད་དོ།། མིང་ཆེན་གྱི་རྗེས་སུ་མི་རིང་བར་སླར་ཡང་ཏ་མི་ལའི་རྒྱལ་པོས་དམག་དྲངས་ཏེ་སིངྒ་ལ་བཟུང་བ་ངྷ་ཏུ་སེ་ནས་ཁོ་ཕམ་སྟེ་རང་ཉིད་རྒྱལ་པོར་བྱས། རྒྱལ་པོ་འདི་འབངས་སྤྱི་ལ་བྱམས་པར་གྲགས་ཀྱང་ཁྲིམས་རྩུབ་པས་དམག་དཔོན་སོགས་ཞེ་ལོག མཐར་རང་གི་བུ་འོད་སྲུང་གིས་སྤུན་ཐུ་བོ་མཽད་ག་ལའི་བུ་བྱ་བ་གནས་ནས་བསྐྲད་དེ། ཡབ་བགྲེས་པོ་ཡོད་བཞིན་རང་ཉིད་ཀྱིས་སྲིད་བཟུང་། ཕ་དམག་དཔོན་གྱི་ལག་ཏུ་གཏད་དེ་བཀྲོངས།
 |
| སི་གི་རི་ཡ། སེང་གེ་རིའི་ཕོ་བྲང་། |
རྒྱལ་པོ་འདིས་སེངྒེ་རིའི་ཕོ་བྲང་བྱ་བ་བརྩིགས་པ་ད་ལྟ་ཞིག་རོ་ལས་མེད་ཀྱང་སིངྒ་ལའི་གླིང་གི་ངོ་མཚར་ཆེ་ཤོས་དེ་ཡིན། ཐོག་ཚད་བཞི་བཅུ་ལྷག་པའི་བྲག་རི་སྲུབ་མེད་ངོས་བཞི་རྩིག་པ་ལྟར་གྱེན་དུ་ལངས་པའི་རྩེར་ཕོ་བྲང་གི་ཤུལ་དང་བྲག་རང་ལ་བརྐོས་པའི་རྫིང་བུ་ཆེ་ཆུང་གསུམ། བྲག་གི་ཕྱེད་ནས་སྟེང་དུ་འཛེག་པའི་སྒོ་སེངྒེ་ཆེན་པོའི་གཟུགས་སུ་བྱས་པའི་ཁ་ནང་ནས་འཛུལ་དགོས་པ་ལ། སེང་མགོ་ཞིག་ཟིན་ཡང་སྡེར་མོ་གཡས་གཡོན་གཉིས་གླང་ཆེན་གྱི་རོ་འདྲ་བ་རེ་ད་དུང་ཡང་ལུས་པ་འཇིགས་ཤིང་རྔམ་ཆགས། བྲག་གི་རྩ་བར་དཔག་ཚད་ཕྱེད་ལྷག་པའི་ལྕགས་རིས་བསྐོར། བྲག་ཟུར་ན་སྒྱོགས་རྡོ་ཆེན་པོ་བཙུགས་པ་ཡང་། ད་དུང་དེ་གར་ལུས།
ངོ་མཚར་གཞན་ཞིག་ནི་བྲག་གི་སྐེད་ན་ཤེལ་འདྲ་བའི་རྩིག་པ་རིང་པོ་ཞིག་ལུས་པའི་སྟེང་དུ། མི་ཐོག་མང་པོའི་བར་ནས་དེར་བསླེབས་པའི་མི་རྣམས་ཀྱིས་རང་རང་གི་མིང་དང་རྩོམ་ཚིགས་བཅད་འགའ་ཞིག་བྲིས་པ་དག་ད་དུང་ཁྲ་ལམ་མེར་སྣང་ཞིང་། དེ་དག་ལ་བལྟས་ཚེ་ལོ་སྟོང་ཕྲག་གཅིག་གི་ཡུན་ལ་སིངྒ་ལའི་ཡི་གེའི་གཟུགས་རྣམ་པ་ཅི་ཙམ་དུ་འགྱུར་བ་ཡང་མཐོང་ནུས་པས་ངོ་མཚར་ལ་སེམས་སྐྱོ་བ་ཞིག་ཡོད།
ཕོ་བྲང་དེ་ལོ་བཅུ་ལ་བརྩིགས་ཤིང་ལོ་བརྒྱད་ལ་ལོངས་སུ་སྤྱད་ཟེར། འོད་སྲུང་གིས་ཕ་བསད་པའི་ལེ་ལན་གྱིས་འབངས་འཁོར་ཐམས་ཅད་མ་མགུ་ཞིང་། དེ་མཚུངས་མཽད་གལ་བུས་རྒྱ་གར་ནས་དམག་ཁྲིད་ནས་འོངས་པ་དང་འདོམ་པས་རྒྱལ་བའི་རེ་བ་མེད་པར་གྱུར་ཏེ་རང་གི་རྩེ་ཆུང་བྲེགས་ནས་བསད། རྒྱལ་པོ་འདི་གཉིས་ནག་མོ་ཁོལ་དང་དུས་མཉམ་ཟེར་ཞིང་། ནག་མོའི་ཁོལ་གྱི་གྲོགས་པོ་སིངྒ་ལའི་སྙན་ངག་མཁན་གཞོན་ནུའི་ཁོལ་ཡང་འདི་དུས་ཡོད། དེས་བརྩམས་པའི་ཛ་ན་ཀཱི་ཧ་ར་ཎ་སྐྱེད་བྱེད་བུ་མོ་འཕྲོག་པ་སྟེ། སི་ཏཱ་འཕྲོག་པའི་ལོ་རྒྱུས་ཡོད་ཅིང་། དེར།
ཛཱན་ཀཱི་ཧརཎཾ་ ཀརྟུཾ་ རཱགྟུཝཾཤེ་ པུརཿ སྠིཏེ།།
ཀབི་ཀུམཱརདཱསོ་ ཝཱ་ རཱཝཎོ་ ཡདི་ ཀྵམཿ།།
ར་གྷུའི་རྒྱུད་ནི་གནས་བཞིན་དུ།། [ཉི་མའི་གདུང་མདུན་གནས་བཞིན་དུ། །]
སྐྱེད་མ་འཕྲོག་པ་བྱེད་ནུས་པ།། [སྐྱེད་བྱེད་བུ་མོ་འཕྲོག་རྩོམ་པ། །]
རྩོམ་མཁན་གཞོན་ནུའི་ཁོལ་པོའམ།། [ནུས་ན་ངག་མཁན་གཞོན་ཁོལ་ལམ]
འོན་ཏེ་ཡང་ན་སྒྲ་སྒྲོག་ཉིད།། [ཡང་ན་སྒྲ་སྒྲོགས་ཉིད་ཡིན་ནོ། །]
ཅེས་སོགས་བྲིས་ཏེ། རྒྱལ་པོ་ཪཱ་མ་ཎའི་མཚན་ལ་རཱ་གྷུའི་རྒྱུད་ཉི་མའི་གདུང་ཟེར་ཞིང་། ནག་མོའི་ཁོལ་གྱིས་ར་གྷུའི་རྒྱུད་དེ་རཱ་གྷུ་བཾ་ཤ་བྱ་བའི་སྙན་ངག་ཅིག་ཀྱང་བརྩམས་པས། འདིར་སྒྲ་སྦྱར་ཏེ་རཱ་མ་ཎ་ཡོད་བཞིན་སི་ཏཱ་འཕྲོག་པ་བྱེད་ནུས་པ་དང་། རཱ་གྷུ་བཾ་ཤའི་བསྟན་བཅོས་ཡོད་བཞིན་སྐྱེད་བྱེད་མ་འཕྲོག་པའི་སྙན་དངགས་རྩོམ་ནུས་པ་གཉིས་ཀྱི་སྔོན་མ་ནི་སྒྲ་སྒྲོག་དང་། ཕྱི་མ་ནི་གཞོན་ནུའི་ཁོལ་བདག་ཡིན་ནོ་བྱ་བའོ།། གཞོན་ནུའི་ཁོལ་གྱི་ལོ་རྒྱུས་དང་འབྲེལ་བར་ནག་མོའི་ཁོལ་གྱི་རྣམ་ཐར་ཡང་མང་ཙམ་འདུག་སྟེ་འདིར་འབྲི་མ་ནུས། གཞན་ཡང་དེ་དུས་ཀྱི་སྙན་དངགས་མཁན་དག་གིས་བརྩམས་པའི་སྤྲིན་གྱི་ཕོ་ཉ་དང་། རྨ་བྱའི་ཕོ་ཉ། ཁུ་བྱུག་དང་ནེའུ་ཅོའི་ཕོ་ཉ་སོགས་ལྔ་དྲུག་འདུག་པའི་སྤྲིན་གྱི་ཕོ་ཉ་ནི་ནག་མོའི་ཁོལ་གྱི་དེ་ཡིན་ལ། གཞན་རྣམས་ཕལ་ཆེར་སིངྒ་ལ་པ་དག་གིས་བྲིས་ཤིང་། ཇོ་ནང་ཀུན་མཁྱེན་གྱིས་ཕོ་ཉ་བརྒྱད་ཡོད་གསུངས་པ་དེ་ཚོའི་གྲས་ཡིན་རྒྱུར་འདུག་གོ།
སྟོན་པ་འདས་ནས་ལོ་ ༡༦༠༠ ལྷག་པའི་སྐབས་སིངྒ་ལ་ཙཽ་ལའི་རྒྱལ་པོའི་ཆབ་འོག་ཏུ་ཤོར་བར། མི་རིང་བར་སྔོན་གྱི་རྒྱལ་རིགས། བི་ཛཱ་ཡ་བཱ་ཧུ་རྣམ་རྒྱལ་དཔུང་པ་བྱ་བ་ཞིག་རང་ལོ་བཅོ་ལྔ་པར་མ་ལ་ཡའི་ལྗོངས་སུ་སྲིད་བཟུང་། ལོ་ངོ་བཅུ་མུ་སྟེགས་ཀྱི་རྒྱལ་པོ་དང་གཡུལ་བཀྱེས་པའི་མཐར་མ་འགགས་པའི་གྲོང་ཁྱེར་སླར་འཕྲོགས་ཏེ་རང་ཉིད་ཀྱིས་ཅོད་པཎ་བཅིངས། རྒྱ་གར་ཅཱ་ལུ་ཀའི་རྒྱལ་པོ་རྣམ་གནོན་ཉི་མ་བི་ཀྲམཱ་དིཏྱ་དང་། ཀ་ལིངྐའི་རྒྱལ་པོ་སོགས་དང་གྲོགས་སུ་བསྡེབས་ཏེ། རང་ཡུལ་གྱི་བསྟན་པ་ཉམས་པ་དག་སླར་གསོས། བྷར་མའི་རྒྱལ་པོས་སྔར་དམག་རོགས་བྱས་པའི་དྲིན་གཟོར་ཡུལ་དེར་ཐེག་ཆེན་པའི་དགེ་སློང་ཤིན་ཏུ་འཆལ་བར་སྤྱོད་པ་དག་ཡོད་པ་གནས་ནས་དབྱུང་སྟེ། གནས་བརྟན་པའི་སྡོམ་རྒྱུན་སྤེལ་དུ་སིངྒ་ལ་ནས་དགེ་སློང་རྣམས་བཏང་། དེ་ཕྱིན་བྷར་མ་རྣམས་ཉན་ཐོས་ཀྱི་སྡེ་སྣོད་འཛིན་པར་གྱུར་ཅིང་། དེ་བོད་ན་རྗེ་མི་ལ་སོགས་བཞུགས་པའི་དུས་སུ་ཡིན། དེའི་འོག་ཏུ་དེའི་ནུ་བོ་ཛ་ཡ་བཱ་ཧུ་དང་། དེ་ནས་དེའི་བུ་བི་ཀྲམ་བཱ་ཧུ། ག་ཛ་བཱ་ཧུ་རྣམས་ཀྱིས་ཁྲི་རིམ་པར་བཟུང་། སངས་རྒྱས་འདས་རྗེས་ཀྱི་ཆིག་སྟོང་དྲུག་བརྒྱ་གོ་བདུན་པ་ན། ག་ཛ་བཱ་ཧུའི་ཕ་སྤུན་བི་ཀྲམ་བཱ་ཧུ་བྱ་བ་ཁྲི་ལ་འཁོད། འདི་སིངྒ་ལའི་རྒྱལ་པོ་གྲགས་ཆེན་གཉིས་ཀྱི་ཡ་གྱལ་དེ་ཡིན་ཞིང་། ལོ་སོ་གསུམ་སྲིད་བསྐྱངས། སིངྒ་ལ་དབང་བར་མ་ཟད་བྷར་མ་དང་རྒྱ་གར་ལྷོ་ཕྱོགས་ཀུན་ཀྱང་དབང་དུ་བསྡུས། མུ་སྟེགས་ཀྱི་མི་སྡེ་མང་པོ་སིངྒ་ལར་ཁྲིད་ནས་སྔར་ཁོང་དག་གིས་བཤིགས་པའི་གཙུག་ལག་ཁང་དང་། མཆོད་རྟེན་ཐམས་ཅད་ཉམས་གསོ་བྱེད་དུ་བཅུག
རྒྱལ་བྱེད་ཚལ་དང་། ལངྐའི་ཐིག་ལེ། ལ་ཏཱ་མཎྜ་ལ་སོགས་པའི་གཙུག་ལག་ཁང་བསམ་གྱིས་མི་ཁྱབ་པ་བཞེངས། དེ་དག་གི་ཤུལ་རྣམས་པོ་ལོནྣ་རུ་བ་བྱ་བའི་ཡུལ་དུ་འདུག་ཅིང་། རྡོའི་ཀ་བའི་ཆག་གྲུམ་ཙམ་ལ་ཡང་བཟོ་ཁྱད་ཀྱིས་འགྲན་ཟླ་མེད་པ་ཡིན། གཙུག་ལག་ཁང་ཆེན་པོ་ལ་སོགས་པའི་དགེ་འདུན་སྡེ་གསུམ་གྱི་ཁྲོད་དུ་ཐེག་ཆེན་པ་དག་ཆུད་པ་ཡང་རྒྱལ་པོ་འདིའི་རིང་ལ་གཙང་ཞིང་ལྷག་ལུས་མེད་པར་བྱས་ཏེ། དེ་ནས་བཟུང་སྟེ་གསུམ་ཀ་ཕན་ཚུན་རྩོད་པ་མེད་པར་གནས།
སྨན་ཁང་དང་། སྨན་དང་། སྨན་པ་བཅས་པ་དཀོར་མཛོད་ནས་བདག་རྐྱེན་སྦྱར་ཏེ་རྒྱ་ཆེན་པོར་བཙུགས། ཡུལ་ཐ་དད་ནས་འོངས་པའི་ནད་པ་རྣམས་ལ་ཟས་གོས་སྦྱར། ཚེས་བཅོ་ལྔ་ནམ་ཤར་ལ་རྒྱལ་པོ་རང་ཉིད་དབུ་རྒྱན་སོགས་བཞག་སྟེ། གོས་དཀར་པོ་གྱོན་ཞིང་ཡན་ལག་བརྒྱད་པ་ལེན། བློན་པོ་རྣམས་དང་ལྷན་དུ་ནད་པ་རྣམས་ལ་འདྲི་རྟོག་བྱེད་དུ་འགྲོ། ནམ་མཁའི་གངྒཱ་བྱ་བའི་ཡུར་ཆེན་སོགས་བྱས་ཏེ་འབངས་ཀྱི་ཞིང་པ་དག་ཀྱང་ཆེས་ཕུན་སུམ་ཚོགས་པར་བྱས་པ་སོགས་མདོར་ན་འདི་དུས་ཡུལ་འདི་ཆོས་སྲིད་གཉིས་ཀའི་སྒོ་ནས་དར་བའི་རྩེར་སོན་པར་གྲགས།
དེའི་འོག་ཏུ་དེའི་སྲིང་མོའི་བུ་པཎྜི་ཏ་བི་ཛ་ཡ་བཱ་ཧུ་རྣམ་རྒྱལ་དཔུང་བྱ་བའི་རྒྱལ་པོ་མཁས་པ་ཞིག་གིས་ཁྲི་བཟུང་། དེ་གྲོངས་ནས་རྒྱ་གར་ཀ་ལིངྐའི་སེངྒེ་གྲོང་དུ་སྐྱེས་པའི་རྒྱལ་རིགས་སིངྒ་ལའི་རྒྱལ་པོའི་གཉེན་ཚན་དུ་གཏོགས་པ་ནི་ཤངྐ་མལླ་བྱ་བས་ལོ་ངོ་དགུའི་བར་སྲིད་བཟུང་། དུས་འདི་ཙ་ན། འཕགས་པ་དགྲ་བཅོམ་པ་མལླི་ཡ་དེ་བ་ཞལ་བཞུགས་ཤིང་། དགྲ་བཅོམ་དེས་མུ་ཏིག་ཡན་ལག་གི་མཆོད་རྟེན་དུ་ཆོས་བསྟན་པ་ན་དགེ་སློང་དྲུག་ཅུས་འབྲས་བུ་ཐོབ། ཆོ་འཕྲུལ་གྱིས་སྐྱེ་བོ་རྣམས་དད་པར་བྱས་ཤིང་། མྱ་ངན་ལས་འདས་ཚེ་སྐུ་གདུང་ལྷ་རྣམས་ཀྱིས་ནམ་མཁའ་ལ་འཁྱེར་བ་རང་གི་སྲིང་མོ་དང་གྲོང་པ་ཀུན་གྱིས་དངོས་སུ་མཐོང་བ་སོགས་བྱུང་། གུ་ཧ་རཱ་མ་ཡ་བྱ་བར་དགྲ་བཅོམ་འདིའི་གཙུག་ལག་ཁང་ཡང་ཡོད་ཅིང་། འདིའི་གཉེན་ཚན་གྱི་རྒྱུད་པར་གྲགས་པའི་མི་ངོ་འགའ་ཞིག་ཀྱང་ད་ལྟའི་བར་ཀུ་རུ་ནེ་ག་ལ་བྱ་བའི་ཡུལ་ན་འདུག དགྲ་བཅོམ་འདིའི་སྐུ་བསྟོད་སོགས་ཀྱང་མང་དུ་སྣང་ཞིང་། འདི་ལ་སིངྒ་ལའི་དགྲ་བཅོམ་མཐའ་མ་ཞེས་གྲགས་སོ།། དེས་ན་འདི་ནི་གདོན་མི་ཟ་བར། ཁྲོ་ལོས་མཛད་པའི་པཎ་ཆེན་གྱི་རྣམ་ཐར་དུ་གསལ་བའི་སིངྒ་ལའི་དགྲ་བཅོམ་འབྲི་གུང་སྐྱོབ་པ་སོགས་ལ་མེ་ཏོག་བསྐུར་མཁན་དེ་ཡིན་པར་གོར་མ་ཆག་མོད། ཁྲོ་ལོས་མཛད་པ་དེར་རཏྣ་ཙིནྟ་མ་ཎིའི་གྲོང་ན་བཞུགས་པའི་དགྲ་བཅོམ་གུ་ཎ་རཏྣ་ཞེས་མཚན་མི་འདྲ་བ་སྣང་། དགྲ་བཅོམ་འདི་ལ་མཚན་དེ་འདྲ་ཡོད་པ་རྒྱུས་མི་འདུག་ཅིང་། ཙིནྟ་མ་ཎིའི་གྲོང་དེ་ད་ལྟའི་པོ་ལོན་ན་རུ་བའི་མིང་དུ་སྔར་གྲགས་ཞེས་འགའ་ཞིག་ཟེར་རོ།། དགྲ་བཅོམ་འདིའི་རྣམ་ཐར་རྒྱས་ཙམ་མ་ག་ངྷའི་སྐད་དུ་བྲིས་པའི་ར་ས་བ་ཧི་ནི་བྱ་བ་དང་། གཞན་སིངྒ་ལའི་སྐད་དུ་བྲིས་པའི་སངྔྷརྨཱ་ལངྐཱ་ར་དམ་པའི་ཆོས་རྒྱན་བྱ་བའི་གཞུང་གཉིས་ན་ཡོད་ཟེར་ཡང་བདག་ཕྱི་བཤོལ་གྱིས་བསླུས་ཏེ་འདི་ཙམ་ལས་བྲི་རྒྱུ་མ་རྙེད་དོ།། དེའི་རྗེས་སུ་དཔུང་གི་མིང་ཅན་གྱི་རྒྱལ་པོ་དུ་མ་བྱུང་ཞིང་། དཔའ་བོའི་དཔུང་གི་སྐབས་རྒྱལ་བུ་ལྕང་ལོ་ཅན་གྱི་དབང་ཕྱུག་བྱ་བས་ཕམ་སྟེ་ཁྲི་བཟུང་། དེས་རྒྱ་ནག་གི་ཕོ་ཉ་ལ་འཚེ་བའི་རྐྱེན་གྱིས་རྒྱའི་གོང་མའི་དམག་དཔོན་ཅིང་ཧོ་བྱ་བས་རྒྱལ་པོ་འཁོར་བཅས་བཟུང་ནས་རྒྱ་ནག་ཏུ་ཁྲིད། རྒྱལ་བུ་པ་ར་ཀྲ་མ་བཱ་ཧུ་བྱ་བ་སླར་བཏང་སྟེ་རྒྱལ་སྲིད་འཛིན་དུ་བཅུག དེ་ནས་བཙུགས་པའི་རྒྱའི་རྡོ་རིང་། ཏ་ཟིག་དང་། རྒྱ་དང་། ཏ་མིལ་གྱི་ཡི་གེ་གསུམ་ཡོད་པ་ཞིག་སིངྒ་ལའི་རྒོ་ལི་བྱ་བར་ཡོད། རྒྱལ་རྒྱུད་དེ་དག་གི་ཚེ་གསེར་གྱི་དོང་ཙེ་ཟངས་སུ་བསྒྱུར་ཅིང་། ཡུལ་གྲུ་ཅུང་ཟད་རྒུད་ཟེར། པཎྜི་ཏ་ནགས་ཀྱི་རིན་ཆེན་ཡང་འདི་དུས་ཤིག་ལ་གླིང་འདིར་བྱོན་པ་ཡིན།
སྟོན་པ་འདས་ནས་ལོ་ཉིས་སྟོང་ཟིན་པ་ན། རྒྱལ་འཕེལ་གྱི་ཡུལ་དུ་མཱ་ཡཱ་དུ་ནྣེ་སྒྱུ་མའི་གཞུ་བྱ་བའི་རྒྱལ་ཕྲན་སྟོབས་ལྡན་ཞིག་གིས་སྲིད་འཛིན། དེའི་བུ་རཱ་ཛ་སིངྷ་རྒྱལ་སྲིད་ལ་བརྔམས་པས་རང་གི་ཕ་བཀུམས་ནས་ཅོད་པཎ་བཅིངས། ཡུན་རིང་ཙམ་ཞིག་དགེ་འདུན་ལ་མཆོད་པ་སོགས་ཆོས་ཀྱི་བྱ་བ་བྱས། ཉིན་གཅིག་དགེ་སློང་ཞིག་ལ་བསོད་སྙོམས་འབུལ་བ་ན། སྔར་གྱི་སྡིག་པ་གློ་བུར་དུ་དྲན་ཏེ་སྐྲག་ནས། ངས་ཕ་བསད་པའི་སྡིག་འབྲས་འདི་མི་མྱོང་བའི་ཐབས་ཚུལ་འགའ་ཞིག་ཡོད་དམ། དེ་ན་རེ། རྒྱལ་པོ་ངེས་པའི་ལས་འདིའི་རྣམ་སྨིན་གདོན་མི་ཟ་བར་མྱོང་དགོས་སོ།། གནས་བརྟན་གཞན་དག་ལ་དྲིས་པ། དེ་དག་ཀྱང་དེ་སྐད་ཟེར་ནས། ཡིད་ཆད་དེ་མུ་སྟེགས་ཀྱི་སློབ་དཔོན་ཞིག་ལ་དྲིས་པར། དེ་ན་རེ། བཟླས་པ་དང་མཆོད་སྦྱིན་འདི་ཞེས་བྱ་བ་དག་བྱས་ན་སྡིག་པ་དེ་ལྟ་བུ་དག་ཅིང་སྐད་ཅིག་གིས་འབྱང་བར་འགྱུར་རོ།། རྒྱལ་པོ་བདུད་རྩིས་བྲན་པ་བཞིན་དུ་གྱུར་ཏེ། དེ་ཕྱིན་ཆད་དེ་དབང་ཕྱུག་གི་རྗེས་སུ་འབྲང་བར་གྱུར་ཅིང་། རང་ཡུལ་གྱི་དགེ་སློང་རྣམས་བཀྲོངས། གཙུག་ལག་ཁང་དང་གླེགས་བམ་མེ་ལ་བསྲེགས། དེ་དག་གི་ཤུལ་དུ་མུ་སྟེགས་ཀྱི་རྟེན་དག་བཙུགས། མཐར་གྱིས་དེ་དཔུང་སྟོབས་ཅན་དུ་གྱུར་ཏེ་ལངྐའི་ཡུལ་ཧྲིལ་པོ་འོག་ཏུ་བཅུག དགེ་སློང་རྣམས་ལ་རྟགས་འདོར་བའམ་སྲོག་འདོར་དགོས་པའི་དྲིལ་བསྒྲགས། བསོད་སྙོམས་སྦྱིན་པ་དག་ལ་ཡང་ཁྲིམས་བཅད།
དེ་ལ་དགེ་སློང་གང་དག་རྒྱལ་པོ་ལ་གུས་པ་རྣམས་ནི་ཁྱིམ་པར་བབས། གང་སྟོན་པ་ལ་གུས་པ་རྣམས་ནི་རྐྱེན་དེ་ཉིད་ཀྱིས་རང་གི་སྲོག་བཏང་། འགའ་ཞིག་དག་འཛམ་བུ་གླིང་དུ་བྲོས་ཏེ་ལངྐའི་ཡུལ་ན་བསྟན་པ་ཅུང་ཟད་ཀྱང་མི་གནས་པར་བྱས་སོ།། འདིའི་བསྟན་པའི་སྟོང་ཆར་ཡུལ་ཅི་ཙམ་བྱུང་བ་མི་གསལ་ཡང་ལོ་ཉི་ཤུ་ཙམ་ལས་མི་རིང་བར་མངོན། འདི་བོད་ན་རྗེ་བླ་མའི་དངོས་སློབ་ཚོ་ཞལ་བཞུགས་པའི་དུས་ཡིན་ཞིང་། སིངྒ་ལའི་རྒྱལ་རྒྱུད་ཀྱི་ཁྲོད་ནས་མུ་སྟེགས་བྱེད་པ་འདི་གཅིག་པུར་གྲགས། དེ་ནས་རྒྱལ་རབས་བཞི་ཙམ་སོང་ཞིང་། སངས་རྒྱས་འདས་ནས་ལོ་ཉིས་སྟོང་བརྒྱ་དང་སོ་ལྔ་ལ་བབས་པ་ན་བི་མ་ལ་དྷརྨ་སུརྱ་དྲི་མེད་ཆོས་ཀྱི་ཉི་མ་བྱ་བས་སྲིད་འཛིན། གྲོང་ཁྱེར་གྱི་མཐའ་ལྕགས་རིས་བསྐོར་ཞིང་། ཡུལ་རྣམས་བདེ་བར་བསྐྱངས། སྟོན་པའི་ཚེམས་རྩད་བཅད་པས། སྟེང་གི་ཡུལ་དུ་སྦས་ནས་བཞག་པ་ཐོས་ཏེ། བཀུར་བསྟི་ཆེན་པོས་སྤྱན་དྲངས་ཤིང་། གཙུག་ལག་ཁང་ཆེད་གཏད་ཀྱིས་བཞེངས་པར་བཞུགས་སུ་གསོལ། དེ་ནས་རང་ཡུལ་ན་དགེ་སློང་མི་བཞུགས་པས་གདུང་བ་སྐྱེས་ཏེ་ཡུལ་ར་ཁི་ནེ་བྱ་བ་ནས་བཙུན་པ་དག་སྤྱན་དྲངས། ནནྡི་ཙཀྐ་བྱ་བའི་གནས་བརྟན་སོགས་སངས་རྒྱས་འདས་རྗེས་ཀྱི་ལོ་ཉིས་སྟོང་བརྒྱ་དང་བཞི་བཅུ་པ་ལ་སིངྒ་ལར་བྱོན། མི་ཆེན་གྱི་རིགས་མང་པོ་རབ་ཏུ་བྱུང་། གཙུག་ལག་ཁང་དུ་མ་བརྩིགས། དེ་ལྟར་ཆོས་ཀྱི་རྒྱལ་སྲིད་ཡུན་རིང་བསྐྱངས་པའི་མཐར། རང་གི་སྤུན་གཞོན་པ་ལ་ཁྲི་གཏད་དེ། རང་ཉིད་སེམས་ལས་ཆུང་ངུར་དགེ་བའི་ཕྱོགས་ལ་བརྩོན་ཞིང་བསྡད། ཕྱིས་ཀྱི་རྒྱལ་པོའི་ཁྲོད་ན་བསྟན་པ་ལ་བཀའ་དྲིན་ཆེ་ཤོས་འདི་ཡིན་པར་གྲགས།
སླར་ཡང་བར་སྐབས་སུ་རྒྱལ་པོའི་གཉེན་ཚན་རྒྱ་གར་བ་མང་པོ་བསླེབས་པའི་ཤན་གྱིས་མུ་སྟེགས་ཀྱི་མཆོད་སྦྱིན་སོགས་ཆེར་འཕེལ་ཞིང་། རབ་བྱུང་རྣམས་གཡེལ་ཏེ་བསྙེན་རྫོགས་འབོགས་པའི་དགེ་འདུན་ཡང་གྲངས་མང་པོ་ལོངས་ཙམ་དུ་གྱུར་པ་ན་དགེ་ཚུལ་མཁས་པ་ས་ར་ནན་ཀ་ར་སྐྱབས་མཛད་བྱ་བ་དེས་རྒྱལ་པོ་ལ་ཞུས་ཏེ། ཤྱམ་དུ་དགེ་སློང་སྤྱན་འདྲེན་པའི་ཕོ་ཉ་ལན་ཁ་ཡར་བཏང་ཡང་གྲུ་ཞིག་པ་སོགས་ཀྱི་རྐྱེན་ངན་འཕྲད་དེ་མ་གྲུབ།
སླར་རྒྱལ་པོ་གྲགས་པ་སེངྒེའི་ཁྲི་ལོ་བདུན་པ་སངས་རྒྱས་འདས་ནས་ལོ་ཉིས་སྟོང་བརྒྱ་གོ་བདུན་པ་ལ་ཤྱམ་ནས་གནས་བརྟན་ཉེ་བར་འཁོར་ལ་སོགས་པའི་དགེ་སློང་ཉི་ཤུ་ལྷག་སྤྱན་དྲངས། ཆུ་དབུས་སུ་གྲུ་བོ་ཆེ་ལ་མཚམས་བཅད་དེ་ས་ར་ནན་ཀ་ར་ལ་སོགས་པའི་བསྒྲུབ་བྱ་མང་པོ་བསྙེན་པར་རྫོགས།
དེ་ནས་མཆེད་པ་ད་ལྟའི་ཤྱམ་ཡིན། ཤྱམ་གྱི་དགེ་སློང་དག་གིས་གྲོང་ཁྱེར་དབུས་སུ་ཁྱབ་འཇུག་དང་ཞི་བའི་ལྷ་ཁང་མཐོང་ནས་ཤིན་ཏུ་བྲེད་དེ་ནང་པའི་རྒྱལ་པོའི་ཕོ་བྲང་གི་ཉེ་འཁོར་དུ་ཡང་འདི་འདྲ་ཡོད་པ་ཆེས་ཡ་མཚན་ཟེར་བ་ཐོས་ནས། རྒྱལ་པོའི་ལུང་གིས་ལྷ་ཁང་དེ་ཀུན་བཤིགས་ཤིང་མཆོད་སྦྱིན་བཅད། ཤྱམ་གྱི་རྒྱལ་པོའི་སྲས་ཀྱང་དགེ་སློང་རྣམས་དང་ལྷན་དུ་བྱོན་པ་ལ་རྒྱལ་སྲིད་གཏད་ཀྱང་མ་བཞེས། དེ་ནས་ས་ར་ནན་ཀ་ར་ཡུལ་སྤྱིའི་དགེ་འདུན་གནས་བརྟན་དུ་བཞུགས་ཏེ་བསྟན་པའི་བྱ་བ་རླབས་ཆེན་མཛད་ཅིང་། བརྡ་སྤྲོད་དང་། སྨན་ལ་སོགས་པའི་རིག་གནས་ཀྱི་བསྟན་བཅོས་དུ་མ་ཡང་མཛད་དེ་སངས་རྒྱས་འདས་རྗེས་ཀྱི་ལོ་ཉིས་སྟོང་སུམ་བརྒྱ་སོ་གཉིས་པ་ལ་མྱ་ངན་ལས་འདས། བྱུང་བ་འདི་དག་གི་སྐབས་སུ་བོད་ན་ཀུན་མཁྱེན་འཇིགས་མེད་དབང་པོ་སོགས་ཞལ་བཞུགས། དེའི་གོང་ཆེས་སྔ་མོ་སངས་རྒྱས་འདས་རྗེས་ཀྱི་ལོ་ཉིས་སྟོང་ལྔ་བཅུའི་ནང་ཙམ་ན་མཐའ་མི་ཕོར་ཆུ་གྷལ་རྣམས་གླིང་འདིར་སླེབས་ཤིང་། དེ་ཡོ་རུབ་ཀྱི་མི་མཐོང་བའི་ཐོག་མ་ཡིན་པས་ཡུལ་མི་རྣམས་ཤིན་ཏུ་བྲེད་དེ་སྔོན་མ་མཐོང་བའི་མི་རིགས་པགས་པ་སྐྱ་ལ་སྐྲ་དམར་བ། ལྕགས་ཀྱི་ཞྭ་གྱོན་ཞིང་སྐད་ཅིག་ཀྱང་མི་སྡོད་པར་ཕན་ཚུན་འགྲོ་བ། ཉ་དུམ་བུ་རེ་ལ་གསེར་དུམ་རེ་སྟེར་བ། ཟས་སུ་རྡོ་ཟ་ཞིང་། སྐོམ་དུ་ཁྲག་འཐུང་བ་སོགས་སྨྲས་ཏེ། ཇ་བཏུང་ཞིང་འཁུར་སྐམ་ཟ་བ་མཐོང་སྐད།
ཕོར་ཆུ་གྷལ་དེ་དག་ས་ཉུལ་བ་ལ་རྒྱུས་ཆེ་བས་འགའ་ཞིག་དབུས་གཙང་དུ་ཡང་སླེབས། འབྲུག་ངག་དབང་རྣམ་རྒྱལ་གྱི་མདུན་དུ་ཡང་བསླེབས་ནས་མེ་མདའ་ཕུལ་བ་སོགས་ཁོང་གི་རྣམ་ཐར་ན་ཡང་གསལ། འོན་ཀྱང་ཁོང་རྣམས་སིངྒ་ལར་སླེབས་པའི་དུས་དེ་ཀུན་མཁྱེན་པད་དཀར་སོགས་ཀྱི་དུས་སུ་ཡིན་ཞིང་། དེའི་གོང་ལོ་དུ་མའི་སྔོན་ནས་རྒྱ་གར་དུ་སླེབས། དེ་དག་སིངྒ་ལའི་རྒྱལ་པོ་དང་དགྲ་གྲོགས་རེས་མོས་སུ་བྱས་ཏེ་ལོ་བརྒྱ་དང་ལྔ་བཅུ་ཙམ་ཡུལ་འདིའི་མཚོ་འགྲམ་དུ་བསྡད། དེ་ནས་མཐའ་མིའི་རིགས་གཞན་ཌ་ཆི་བྱ་བ་དག་སླེབས་ཏེ་སྔོན་མ་རྣམས་བསྐྲད་ནས་དེའི་ཤུལ་དུ་ཁོང་རྣམས་ཚོང་པའི་ཚུལ་དུ་བྱས་ཏེ་ལོ་སུམ་ཅུ་ཙམ་བསྡད། དེ་ཡང་ཡུན་རིང་མོ་ཞིག་གི་བར་སིངྒ་ལའི་རྒྱལ་པོས་སྡེ་ཕྱོགས་སུ་སྲིད་བཟུང་ཞིང་། ཕྱི་གླིང་དབྱིན་ཇིའི་རིགས་དང་གྲོགས་བསྡེབས་མཐར་རྒྱལ་པོ་ཤྲཱི་བི་ཀྲམ་བྱ་བའི་རིང་ལ་ཉེས་མེད་མང་པོ་ཁྲིམས་ལ་སྦྱར་ཞིང་། གསེར་གར་བླུགས་ཀྱི་ཁྲི་ལ་སྡོད་པ་སོགས་ཚུལ་མི་མཐུན་པ་དུ་མ་ཞིག་བྱས། འབངས་རྣམས་ཀྱང་ཕྱོགས་གཉིས་སུ་སླེབས། དེར་ཕྱི་གླིང་པའི་ངོ་ཚབ་བྱང་ཕྱོགས་པ་བྱ་བ་ཞིག་གིས་དམག་ཁྲིད་དེ་ཀཎྜི་བཅོམ། ཕོ་བྲང་བསྲེགས། རྒྱལ་པོ་རྒྱུད་དང་བཅས་པ་རྒྱ་གར་དུ་སྤྱུགས་པ་ལས་དེར་གྲོངས་ཏེ་ད་ལྟ་ལོ་བརྒྱ་དང་དགུ་ཙམ་སོང་། དེའི་འོག་ཏུ་མཐའ་མིའི་ཤན་གྱིས་ཆོས་ལུགས་མི་འདྲ་བ་དག་ཀྱང་སླེབས། ཀྲིསྟན་ནམ་མ་ཤི་ཀ་པའི་སྲོལ་ཆེར་དར་ཏེ་བར་སྐབས་སུ་ནང་པའི་ཕྱོགས་ཀུན་ནས་ཆེས་ཉམ་ཐག་པར་གྱུར་པ་ན། དགེ་སློང་སྨྲ་བ་ཅན་གུ་ཎ་རཏྣ་བྱ་བ་ཆོས་ལུགས་ཀུན་ལ་བྱང་ཞིང་རྩོད་པ་ལ་མཁས་པ་དེས་མ་ཤི་ཀ་པའི་བླ་མ་རྣམས་དང་ཆོས་ལུགས་རྒྱན་དུ་བཞག་སྟེ་ཉིན་དུ་མར་རྩོད་པ་བྱས་པས། ཁོང་རྣམས་རྨེག་མེད་དུ་ཚར་བཅད་ཅིང་། སྟོང་ཕྲག་དུ་མ་དག་སླར་ནང་པའི་ཕྱོགས་སུ་བཞུགས། ང་ལ་བླ་མ་གནས་བརྟན་ཆོས་ཀྱི་དགའ་བ་བྱ་བ་ཞིག་ཡོད་པ། ཁོང་དགུང་ལོ་ཤིན་ཏུ་བགྲེས་པས་ཁོང་གིས་ཀྱང་བྱིས་པའི་ཚེ་དགེ་སློང་མཇལ་བར་འདུག ཡན་ལག་རགས་ལ། མིག་ཧུར་བ། བལྟས་ན་ཡང་འཇིགས་སུ་རུང་བ་ཞིག་ཡོད་སྐད། དེ་དུས་ཁོང་རྣམས་ཀྱིས་བྱས་པའི་རྩོད་པ་ཀུན་ཡི་གེར་བཏབ་པ་ཞིག་ཀྱང་འདུག་པ་ཤིན་ཏུ་ངོ་མཚར། ལྟ་བའི་གནད་སོགས་ལ་རྩོད་པ་མི་འདུག་མོད་ཀྱི་འོན་ཀྱང་ཕ་རོལ་པོའི་རྩོད་པ་རྣམས་དིང་སང་གི་རིག་པ་གསར་པའི་ཤེས་རྒྱ་དག་ལ་གཞི་བཙུགས་ནས་བཀོད་པས་རང་ཅག་ལྟ་བུས་ལན་གདབ་པ་ཤིན་ཏུ་ཡང་བྱ་དཀའ་བའི་མཐར་ཐུག་ཅིག་ཏུ་སེམས།
དེ་ལྟར་ཆོས་ཀྱི་རྒྱལ་པོ་སྐར་རྒྱལ་ནས་བཟུང་སྟེ་སིངྒ་ལའི་རྒྱལ་རྒྱུད་མཐའ་མ་ཐུག་གི་བར་དུ་ནང་པའི་རྒྱལ་པོ་བརྒྱུད་མར་བྱུང་ཞིང་། བཙུན་མོ་རྣམས་རྒྱ་གར་གྱི་ཡུལ་དག་ནས་ལེན་པའི་སྲོལ་གནས་པ་ལས། བརྒྱ་ལ་རྒྱལ་པོའི་རིགས་འཛིན་པ་མེད་ན་བཙུན་མོའི་གཉེན་ཚན་ཞིག་རྒྱ་གར་ནས་བོས་ཏེ་ཁྲི་འཛིན་དུ་འཇུག་པ་ཡིན་ཞིང་། དེ་ཡང་སིངྒ་ལའི་ཁྲི་ལ་སླེབས་ཕྱིན་ཆད་མུ་སྟེགས་ཀྱི་སྲོལ་བྱེད་ས་མེད་པར་དཀོན་མཆོག་གསུམ་ལ་བླ་མ་འཛིན་དགོས་པའི་སྤྱི་ཁྲིམས་བྱས་ཏེ། སངས་རྒྱས་མྱ་ངན་ལས་འདས་ནས་མི་རིང་བ་ན་ཆོས་བྱུང་བ་ནས་བཟུང་། ད་ལྟ་དུས་གསར་པའི་རྒྱལ་ཁམས་འདི་འདྲ་ཞིག་ཏུ་གྱུར་གྱི་བར་དགེ་སློང་རྣམས་ཀྱང་སྡེ་སྣོད་གསུམ་གྱི་བཤད་སྒྲུབ་མ་ཉམས་པར་བསྐྱངས་ཤིང་། ཁྱིམ་པ་དག་ཀྱང་དཀོན་མཆོག་བླ་མ་བྱེད་པའི་ཚུལ་ལུགས་གཙང་མར་གནས་ཏེ་ནང་པའི་རྒྱལ་ཁམས་རྣམས་ཀྱི་ཁྲོད་ན་གསེར་གྱི་རྒྱན་ལྟ་བུར་གནས་པ་ཡིན་ལ། མདོར་ན། རྒྱལ་ཁམས་ཀུན་གྱི་མི་རིགས་བརྒྱུད་མར་འདུ་བའི་ས་མཐའི་གླིང་ཕྲན་ཞིག་ཏུ་བདེ་བར་གཤེགས་པའི་བསྟན་པ་མི་ལོ་ཉིས་སྟོང་གི་རིང་ལ་མ་ཉམས་པར་གནས་སོ།། ཞེས་བྱ་བ་འདི་ནི། བསམ་ཤེས་པ་དག་ལ་ཆེས་ཤིན་ཏུ་ངོ་མཚར་བའི་གནས་སོ།། སིངྒ་ལ་བ་དག་ལ་མ་ཧཱ་ཝཾ་ས་གདུང་རབས་ཆེན་མོ་དང་། དཱི་པ་ཝཾ་ས་གླིང་གདུང་རབས། རཱ་ཛཱ་བ་ལི་རྒྱལ་པོའི་ཕྲེང་བ་སོགས་ཀྱིས་ཐོག་དྲངས་པའི་ཆེས་ཞིབ་པའི་རྒྱལ་རབས་ཀྱི་གླེགས་བམ། རྒྱ་ནག་དང་། ཏ་ཟིག་པ་དག་གི་རྗེས་སུ་འགྲོ་བ་ཙམ་ཡོད་པས་མཐའ་དག་པ་བྲི་བ་ནི་བྱ་དཀའ་བ་ལགས་ན། འདིར་མངོན་ཚན་ཆེ་བའི་བྱུང་བ་འགའ་ཞིག་ཅུང་ཟད་བརྗོད་པ་ཙམ་མོ།།
ཉེ་དུས་ཀྱི་ལོ་རྒྱུས་སྨྲ་རི་བ་ཞིག་ནི་སྔར་བཤད་པའི་དུ་ཊུ་ག་མུ་ནུས་བཞེངས་པའི་མཆོད་རྟེན་རྒྱལ་པོ་རུ་ཝན་བེ་ལིར་གྲགས་པ་འདི་གནའ་དུས་ཤིག་ནས་ཉམས་ཏེ། རི་ལྟར་བུར་གྱུར་ནས་ཡོད་པ་ལ་ཡུལ་མི་ཐམས་ཅད་ནས་ཞིག་གསོས་ཀྱི་འབད་རྩོལ་དྲག་པོ་ལོ་དྲུག་ཅུའི་བར་བྱས་པ་འབྲུག་ལོ་(༡༩༤༠)འདིར་ལས་མཇུག་རྫོགས་ཏེ་མཆོད་རྟེན་གསར་དུ་བཞེངས་པ་བཞིན་བལྟ་བས་ཆོག་མི་ཤེས་པར་གྱུར།
དེ་ནས་བྷར་མའི་ཡུལ་གྱི་སངས་རྒྱས་པ་སྤྱི་ནས་མན་ཤེལ་ཁྲུ་ཚད་ཙམ་པ་ཞིག་ལ་ཕ་ལམ་རྡོག་ཆེན་དུ་མས་སྤྲས་ཤིང་གསེར་གྱིས་བརྒྱན་པ་སྒོར་ཉིས་འབུམ་རི་བའི་ཏོག་ཅིག་སྐྱེས་སུ་སྤྲིངས། ཧོར་ཟླ་ལྔ་པའི་ཚེས་བཅོ་ལྔ་ནས་དུས་སྟོན་ཚུགས་ཏེ་ཏོག་སྒྲོན་ཞིང་ཟླ་བ་གཅིག་གི་བར་དུས་སྟོན་བྱས། ཕལ་ཆེར་གླིང་གང་པོའི་ཁྱིམ་དང་དགེ་སློང་ཀུན་དེར་འཛོམས། འདི་འདྲའི་དུས་སྟོན་ཆེན་པོ་མི་ཐོག་དུ་མའི་བར་མ་བྱུང་བ་ཡིན་ཟེར།
བྷར་མ། ཤྱམ་དང་། ཀམྦོ་ཛ་སོགས་ནང་པའི་རྒྱལ་ཁམས་རྒྱང་རིང་པོ་ནས་ཀྱང་མི་མང་པོ་ལྟད་མོར་སླེབས། ངེད་ཀྱང་སྟབས་ལེགས་སུ་དེ་ལ་སླེབས་པར་བོད་ཀྱི་ཡུལ་ནས་ཀྱང་ཐོས་ཏེ་འོངས་འདུག་སོགས་གྲགས། རེ་ཞིག་མཆོད་རྟེན་ཉིད་ཀྱང་མ་ཐོས་ན་དེའི་དུས་སྟོན་ལྟ་ག་ལ་ཞིག དེའི་ཚེ་གློག་གི་འཇའ་འོད་ཁ་དོག་སྣ་ལྔ་པས་མཆོད་རྟེན་གྱི་རྩེའི་བར་དུ་གཡོགས་ཤིང་། ཕྱོགས་བཞི་ནས་སངས་རྒྱས་སྤྱོད་ལམ་བཞི་མཛད་པའི་སྣང་བ་དང་། ནམ་མཁའ་སྟོང་པ་ལས་མདོའི་ཚིགས་བཅད་དང་། སྒྲ་སྙན་སྣ་ཚོགས་སྒྲོག་པ་དང་། སྤྲིན་གྱི་གསེབ་ནས་གནམ་གྲུ་བཏང་སྟེ་མཆོད་རྟེན་ལ་གཡས་སུ་སྐོར་བཞིན་མེ་ཏོག་དཀར་པོའི་ཆར་འབེབས་པ་སོགས་དེང་སང་གི་བརྫུས་མའི་རྫུ་འཕྲུལ་སྣ་ཚོགས་པ་བསྟན། སངས་རྒྱས་རང་གིས་ཀྱང་དེ་ཀུན་གཟིགས་ན་ཧ་ལས་པ་སྙམ་བྱེད། སེར་སྦྲེང་གི་སྐབས་གླང་ཆེན་རྣམས་ཀྱིས་མཆོད་རྟེན་ལ་པུས་མོ་བཙུགས་ནས་ཕྱག་འཚལ་བ་སོགས་བྱེད་ཀྱིན་འདུག ད་ལྟ་མ་ཞིག་པ་ཡོད་པ་ཞིག་ལ་ས་སྟེང་ན་འདི་ལས་མཐོ་བའི་མཆོད་རྟེན་མེད་པར་གྲགས། བལ་ཡུལ་གྱི་བྱ་རུང་ཁ་ཤོར་སོགས་ཀྱང་འདི་དང་བསྡུར་ན་སླ་ངའི་ཟུར་དུ་ཕོར་པ་སྦུབ་པ་ཙམ་ཞིག་འོངས་ཏེ་མཆི། འོན་ཀྱང་འཇིགས་མེད་རི་བོའི་མཆོད་རྟེན་ཞིག་པོ་དེ་འདི་ལས་ཀྱང་ཅུང་མཐོ། ད་དུང་པོ་ལོན་ན་རུ་ཝ་ན་རྒྱལ་པོ་པ་རཱ་ཀྲ་མས་བཞེངས་པའི་མཆོད་རྟེན་འདི་ལས་ཉིས་འགྱུར་ལྷག་ཆེ་བ་ཞིག་ལ་ཕྱེད་ལས་མ་ཟིན་པ་ཞིག་ཀྱང་འདུག སིངྒ་ལའི་རྒྱལ་པོ་རྣམས་ཀྱིས་མཆོད་རྟེན་བཞེངས་པའི་ཧམ་པ་དེ་ལ་སུས་ཀྱང་འགྲན་དཀའ། བུམ་སྟེགས་དམའ་བོ་གསུམ་གྱི་སྟེང་ན་གུར་གྱི་དབྱིབས་བཞིན་ཡོད་པ། བལ་ཡུལ་གྱི་ཤིང་ཀུན་མཆོད་རྟེན་དང་འདྲ་བར་འདུག
མཆོད་རྟེན་འདིའི་ཞིག་གསོས་ལ་གླིང་གང་པོའི་མིས་འབད་རྩོལ་བྱས་པ་ཚད་ཀྱིས་མི་ལངས། རྒད་པོ་འགའ་རེས་ངེད་ཅག་བྱིས་པ་ཡིན་དུས་མཆོད་རྟེན་འདིའི་ཞིག་གསོ་མགོ་ཚུགས། མཆོད་རྟེན་འདི་ནམ་གྲུབ་པ་ན་འུ་ཅག་སིངྒ་ལ་པ་རྣམས་ཀྱིས་ཁུར་ཐམས་ཅད་འཕོ་བ་ཡིན་ཞེས་ཕ་མེས་རྣམས་ཀྱིས་ཡང་ཡང་གླེང་བ་ཞིག་ཡོད་ཟེར།
 |
| བུ་དུ་རུ་བ་ག་ལ། |
དེ་ཡང་མཆོད་རྟེན་སླར་གྲུབ་ཚེ། རྒྱལ་པོ་དུ་ཊུ་ག་མུ་ནུ་དེ་དགའ་ལྡན་ནས་སླར་ཡང་ལན་གཅིག་སིངྒ་ལར་འབྱོན། དེ་ནས་སངས་རྒྱས་ཀྱི་བསྟན་པ་སྔོན་གྱི་དུས་འདྲ་བ་ཞིག་དར་བ་ཡིན་སྐད། རྒྱལ་པོ་དེ་དེང་སང་དགའ་ལྡན་ན་རྗེ་བཙུན་གྱི་དྲུང་དུ་བཞུགས་ཤིང་། འདི་དང་འདིའི་སྤུན་སངྒ་ཏི་ཥྱ་གཉིས་མ་འོངས་པ་ན་བྱམས་པའི་ཉན་ཐོས་མཆོག་ཟུང་དུ་འགྱུར་དགོས་པ་ཡིན་ཟེར། སིངྒ་ལའི་གཙུག་ལག་ཁང་རྣམས་ན་བྱམས་པའི་སྐུ་གང་ཡོད་ཀྱི་གཡས་གཡོན་དུ་རྒྱལ་པོ་སྐུ་མཆེད་འདི་གཉིས་ཀའི་སྐུ་འདྲ་རེ་ཡང་བཞེངས་ནས་འདུག དེ་ལྟར་ན་གླིང་འདིར་བོད་ཀྱི་བླ་མ་རྫུ་འཕྲུལ་གྱིས་བྱོན་པ་ནི་སྔར་འགའ་ཙམ་བྱུང་འདུག་མོད། རྫུ་འཕྲུལ་མ་ཐོབ་པའི་ནང་ན་ངེད་རང་སླེབས་སྔ་བ་ཞིག་ཏུ་སེམས། ལོ་གཅིག་དང་ཞག་ཤས་མ་ཚང་བའི་ཟླ་བ་བཞི་བསྡད། དེའི་རིང་ལ་གནས་གཅིག་ཏུ་མ་ཆགས་པར། ལྭ་བ་གཡང་ལུགས་ཤིག་གྱོན་ཏེ་དགེ་བསྙེན་གྱི་ཟོབ་ཏུ་ཞུགས་ནས་རྟག་ཏུ་རྒྱུ་འགྲུལ་ཁོ་ན་བྱས་པས་ཕལ་ཆེར་གླིང་གང་པོ་འཁོར་ཙམ་བྱས། གནས་རྟེན་འགངས་ཆེན་རིགས་ཡོད་ཚད་ལ་མཇལ། ས་མཐར་ལྷུང་བའི་སྙིང་རླུང་དང་སྡེབ་པའི་མིག་ཆུ་འཁྲིགས་པའི་དད་པ་ཡང་ལན་དུ་མར་སྐྱེས། ནགས་ཚལ་དུ་ལམ་གྲོགས་མེད་པར་སོང་བས་གླང་ཆེན་གྱིས་དངངས་སྐྲག་ཙམ་དང་། ཉིན་གཉིས་ལ་ཆུ་དང་ཟས་མ་འབྱོར་པ་ཞིག་ཀྱང་བྱུང་། ཤས་ཆེར་རྒྱ་མཚོའི་འགྲམ་དུ་ཉུལ་ཞིང་། ཉ་པའི་གྲོང་རྣམས་སུ་བསྡད་པས་ལོ་བཞི་བཅུའི་བར་མ་ཤེས་པའི་ཆུའི་རྐྱལ་ཡང་ལེགས་པར་ལོབས། སྡིག་སྲིན་གྱི་རྐང་མར་འཇིབ་པ་དང་། ལྕོང་མོ་ཁྱུར་མིད་བྱེད་པ་ལ་སོགས་པའི་སྔོན་མེད་པའི་ནུས་པའི་ཁྱད་པར་མང་པོ་རྙེད། གཞན་དགོན་པ་རེར་སླེབས་ཚེ་དགེ་སློང་རྣམས་ཀྱིས་གྲོགས་ཏན་ཚད་མེད་པ་བྱས། གྲོང་ཁྱེར་རྣམས་སུ་ཡང་བོད་ཀྱི་ཡུལ་ནས་སྲོག་ཆགས་གསར་པ་ཞིག་སླེབས་པའི་སྙན་གྲགས་ཀྱིས་ལྟད་མོ་བལྟ་བའི་མི་ལམ་དུ་མི་ཤོང་བ་ཙམ་ཡང་བྱུང་། མདོར་ན་གླིང་འདིར་ནང་པའི་གནས་སྐོར་བ་སུ་འདྲ་ཞིག་སླེབས་ཀྱང་ཟས་གོས་གནས་མལ་སོགས་ཀྱི་དཀའ་ལས་ཅུང་ཟད་ཀྱང་མ་དགོས་པ་ཞིག་འདུག་གོ།
དེས་ན་ད་ནི་རང་ཅག་རྣམས་ཀྱི་གནའ་བོའི་ཕ་ཁྱིམ་དུ་གྱུར་པའི་མ་ག་ངྷ་ནི། མུ་སྟེགས་ཀྱི་མནའ་མ་དང་། ཕྱི་གླིང་པའི་མག་པ་གཉིས་ཀྱིས་བཟུང་སྟེ། ཉམས་མི་ཕེབས་ཤིང་། བག་མི་བྲོ་བར་བྱས། འོ་ན་ད་ནི་རང་རེ་རྣམས་ལྷོ་ཕྱོགས་རྒྱ་མཚོའི་གླིང་ཕྲན་སིངྒ་ལ་དེའི་ཚབ་ཏུ་བཅོལ་བ་སྐབས་སུ་བབས་པས། རྡོ་རྗེ་འཆང་དང་ཤཱཀྱ་ཐུབ་པའི་བདག་གཅིག་འབྲེལ། ཡོད་སྨྲ་པ་དང་གནས་བརྟན་སྡེ་པའི་རྟེན་བྱུང་འབྲེལ། དེས་མ་ཚད། བྱང་གི་ཐེག་ཆེན་དང་ལྷོའི་ཐེག་དམན་པ་གཉིས་ཀའི་བར་ན། ལྟ་བ་བཀའ་བཏགས་ཀྱི་ཕྱག་རྒྱ་བཞི་ཡི་འབྲེལ་བ་སྟེ། གཉན་ཞིང་ཟབ་པའི་འབྲེལ་བ་འདི་རྣམས་ཐམས་ཅད་ཀུན་གྱིས་བརྩི་དགོས་པ་ལགས། འོན་ཀྱང་ལྷུང་བཟེད་ནག་པོ་ཅན་རྣམས་ནི་ཅི་ལ་ཡང་འཁུ་འཕྲིག་ཟ། མི་རྐང་གླིང་བུ་ཅན་རྣམས་ནི་གང་ལ་ཡང་ཐོག་བརྫིས་ཆེ། ལར་ཁོང་གཉིས་པོ་སུ་ཡང་མགོ་མཁྲེགས་ཨུ་ཚུགས་ཅན་གྱི་ཡང་རྩེར་སོན་པས། རེ་ཞིག་རང་རང་སོ་སོའི་ས་ནས་ཕན་ཚུན་དགའ་མགུ་དུང་སེམས་ཀྱི་ངང་དུ་བཞུགས་ཤིང་། སྟོན་པ་དང་བསྟན་པ་གཅིག་པའི་གཉེན་རྩིས་ཙམ་ཞིག་མ་ཡལ་བ་ནི་གནད་དུ་ཆེ་བ་ལགས་སོ།། ཞེས་ཁ་ཏ་རིང་མོ་འདི་ཙམ་ཞིག་བྱས་སོ།།
བཙུན་པའི་ཆ་ལུགས་རིང་ནས་ཡལ་གྱུར་ཅིང་།།
འདུལ་བའི་སྤྱོད་ལམ་ཤུལ་དུ་མ་ལུས་ཀྱང་།།
གནས་བརྟན་དགེ་སློང་ཚོགས་དང་མཇལ་བ་འདི།།
ཚེ་རབས་སྔ་མའི་ལས་ཀྱི་འབྲས་བུར་ངེས།།
ཞེས་བྱ་བ་ནི་ཁ་བརྡ་ཚར་བའི་མཇུག་ཏུ་གླུ་ཞིག་བླངས་པ་ཙམ་མོ།།
མཁས་དབང་དགེ་ཆོས་ཀྱི་གསེར་ཐང་ལས་ཕྱུང་སྟེ་ཟླ་བ་གཞོན་ནུས་གཅིག་ཞུས་པ་དགེའོ། །
དེ་ཡང་མཁས་དབང་དགེ་ཆོས་མཆོག་གིས། རྒྱ་གར་གྱི་གླིང་ཟུར་གསུམ་སོག་གའི་དབྱིབས་ཅན་གྱི་མཆུ་རིང་བོ་ལྷོ་ཕྱོགས་སུ་བསྟན་པའི་སྣེ། ལྷོ་ཕྱོགས་ཀྱི་རྒྱ་མཚོའི་མཐར་ཐུག་པར་ཆགས་པའི་ནང་བའི་རྒྱལ་ཁམས་ཆེན་པོ་གསུམ་ལས་སིངྒ་ལ་འདི་ནི་ཡུལ་གཞན་གཉིས་སུ་ཡང་ཉན་ཐོས་ཀྱི་སྡེ་སྣོད་དར་བའི་རྩ་བའི་འབྱུང་ཁུངས་ཉིད་དུ་གྱུར་བ་འདིར་སླེབས་པ་ན། རི་ལྡིང་ནག་ཡོམ་མེ་བའི་གསེབ་ན་ཕར་ལ། མཆོད་རྟེན་དཀར་སེང་ངེ་བ་དང་། དགེ་སློང་མགོ་སྐྱ་རིལ་ལེ་བ་ཉེ་མར་ལྡེ་བ་སོགས་མཐོང་བས། ཨཱ་ད་ནི་རང་ཡུལ་གྱི་ཕྱོགས་ཤིག་ལ་སླེབས་སམ་སྙམ་པ་ཙམ་གྱི་དགའ་སྐྱོ་ལྷང་ངེ་བ་བྱུང་གསུངས་པ་ལྟར། ཁོང་དང་ཧ་ལམ་ལོ་མཉམ་ཙམ་དུ་ཕྲན་བུ་ཡང་ཡུན་རིང་གི་རྨི་ལམ་མངོན་དུ་གྱུར་བ་ལྟར་གླིང་འདིར་བགྲོད་པའི་སྐལ་བ་བྱུང་།
ཁོང་རིག་གླིང་འདིར་ལོ་གཅིག་དང་ཞག་ཤས་མ་ཚང་བའི་ཟླ་བ་བཞི་བཞུགས་ཤིང་། དེའི་རིང་ལ་གནས་གཅིག་ཏུ་མ་ཆགས་པར། ལྭ་བ་གཡང་ལུགས་ཤིག་གྱོན་ཏེ་དགེ་བསྙེན་གྱི་ཟོབ་ཏུ་ཞུགས་ནས་རྟག་ཏུ་རྒྱུ་འགྲུལ་ཁོ་ན་བྱས་པས་ཕལ་ཆེར་གླིང་གང་བོ་འཁོར་ཙམ་བྱས། གནས་རྟེན་འགངས་ཆེན་རིགས་ཡོད་ཚད་ལ་མཇལ་གསུངས་པ་བཞིན། རང་ཉིད་ཀྱང་ཟླ་ངོ་གཅིག་གི་རིང་ལ། འཕྲུལ་རྟ་རྐྱང་རྒོད་གཡེར་བ་འདྲ་ཞིག་གླས་ཤིང་། རྒྱལ་ས་ནས་ལམ་ལ་ཆས་ཏེ། གནས་མཇལ་གྱི་མགོ་མ་འགགས་པའི་གྲོང་ནས་བཙུགས་ཤིང་། མཐའ་ཀེ་ལ་ནི་ཡ་ནས་བསྡུས་ཏེ། གནས་འགངས་ཆེ་ཆུང་ཅི་རིགས་མཇལ་ནས་གླིང་རིལ་བོ་འཁོར་ཙམ་བྱས།
ནོར་རྒྱུན་མའི་བཀའ་དྲིན་གྱིས་ཆུ་དང་ཟས་མི་འབྱོར་བའི་དཀའ་ངལ་ཅུང་ཟད་ཀྱང་མ་འཕྲད། བདག་ཀྱང་དབུས་ཁུལ་གྱི་གནས་མཇལ་གྲུབ་མཚམས། ཤས་ཆེར་ལྷོ་ཕྱོགས་རྒྱ་མཚོའི་འགྲམ་དུ་ཉུལ་ཞིང་། ལྗོངས་རྒྱུ་བ་དང་ལྷན་དུ་མཚོ་ཁ་ནས་ཆུ་རྐྱལ། ངལ་གསོ་དང་ཁམས་གསེང་ཡང་དགའ་རབ་བྱས། སྡིག་སྲིན་གྱི་རྐང་མར་འཇིབ་པ་དང་། ལྕོང་མོ་ཁྱུར་མིད་བྱེད་པ་སོགས་མ་ཕོད་པས། ཕལ་ཆེར་འབྲས་ཆན་དང་སྲན་ཚོད་རིགས་ཟོས་ཏེ་ནམ་ཚ་ཕུད། སྟོན་པ་དང་བསྟན་པ་གཅིག་པའི་གཉེན་རྩིས་ཡིན་ནམ་གང་ལྟར་སིངྒ་ལ་བ་དག་གི་སོ་འཛུམ་དང་དུང་ཀ་རིག་ན་རང་ཡུལ་དུ་སླེབས་པ་འདྲ་བའི་སྣང་བ་བཅོས་མིན་དུ་སྟེར་བར་བྱེད་དོ། །
དེ་ཡང་དགེ་ཆོས་མཆོག་གིས། ཆོས་ཀྱི་ཚིགས་སུ་བཅད་པ་པཱ་ལིའི་སྐད་ནས་བོད་སྐད་དུ། གླིང་འདིའི་དཔལ་རལ་གྲིའི་རི་བོ་དགོན་པར་རྫོགས་པར་བསྒྱུར་བ་ཡིན་ལ། ཕྲན་གྱིས་ཀྱང་མི་ལིནྡས་ཞུས་པ་བོད་སྐད་དུ་བསྒྱུར་དང་སྒྱུར་གྱིན་པ། གླིང་འདིའི་གནས་འགངས་ཆེ་ཆུང་ཅི་རིགས་སྐོར་བཞིན་འགྱུར་གྱི་མཇུག་དེ་ལྟར་ཡོངས་སུ་རྫོགས་པར་འགྲུབ་པའི་རྟེན་འབྲེལ་ཡང་ཞོར་ལ་བསྒྲིགས་པ་དགེའོ། ། ཤྲཱི་ལངྐ་ནས་སོ། །
