ཀོང་ཙེ་ལ་ཁྱེའུས་ལན་བཏབ་པ།
 |
ཏུང་ཧྭོང་ཡིག་རྙིང་།
༅།། །། གནའ་ཀོང་ཙེ་ཤིང་རྟ་ལ་ཞུགས་ཏེ། ཤར་ཕྱོགས་སུ་འཁྱམས་ཏེ་མཆིས་པ་དང་། ཤུལ་ཀར་ཁྱེའུ་ཆུང་གསུམ་འདུག་པ་མཇལ་བ་དང་། གཉིས་ནི་རྩེ། གཅིག་ནི་རྩེ་མི་རྩེ། ངོ་འཛུམ་ཡང་གནག་ཅི་ལས་གྱུར་ཞེས་དྲིས་པ་དང་། ཁྱེའུ་གཅིག་གི་མཆིད་ནས། བདག་གིས་ཐོས་པ་ལས། ཟུང་དུ་རྩེ་ཞིང་དགའ་བ་ལས་གཅིག་སྣད་ན། འཐབ་མོའི་གཞི་སྟེ། གོས་རལ་བ་ལས་དོན་མ་མཆིས་ཏེ། གཅིག་གིས་གཅིག་སྣད་དེ་ཤི་ན། ཡར་ཏེ། ཡབ་ཡུམ་གྱི་སྙན་སྙུངས་ལ། མར་ཏེ། ཕ་ཁུའི་རྐང་འདྲེན་དུ་མཆི་བས་དེའི་ཕྱིར་མི་རྩེའོ། །ཁྱེའུ་ཁྱོད་དེ་ནས་གཞོན་ལ། དོན་མང་དུ་རིག་པ་ཅི་ལས་གྱུར། ཁྱེའུ་ན་རེ། འབྲུག་གི་བུ་བྱུང་ནས། ཞག་གསུམ་ལོན་ན། རྒྱ་མཚོ་འཕྱོ། རྟའི་བུ་བཙས་ནས། ཞག་གསུམ་ལོན་ན། ལི་བར་སྟོང་གཅོད། རི་བོང་བུ་བཙས་ནས། ཞག་གསུམ་ལོན་ན། དམྱིག་རྒྱང་གསུམ་གྱི་ས་ན། རྗེས་བཀང་། མིའི་བུ་ཞག་གསུམ་ལོན་ན། ཕ་མ་གཉིས་ངོ་ཤེས་ཏེ། དེ་ཡང་སྲིད་པ་ལགས་པ་ལ་དོན་མང་ཅི་མཆིས། ཀོང་ཙེས་སྨྲས་པ། དགེའོ། དགེའོ། ཁྱེའུ་ཁྱོད་ཅིའི་རུས། ཅིའི་མིང་ཞེས་སྨྲས་པ་དང་། ཁྱེའུ་ན་རེ། བདག་ལ་རུས་དང་། མིང་ཡང་མ་མཆིས་སོ། ཀོང་ཙེ་ན་རེ། མི་གང་ལ་མིང་མྱེད། རི་གང་ལ་རྡོ་མེད། ཆུ་གང་ལ་ཉ་མེད། ཕོ་གང་ལ་ནི་མོ་མེད། ཤིང་གང་ལ་ནི་ཡལ་ག་མེད། བུད་མེད་གང་ལ་ནི་ཁྱོ་མེད། གླང་གང་ལ་ནི་བེའུ་མེད། རྟ་གང་ལ་ནི་རྟེའུ་མེད། སྒྲོ་གང་ལ་ནི་གདན་པ་མེད། ཤིང་རྟ་གང་ལ་ནི་ཕང་ལོ་མེད། མེ་གང་ལ་ནི་དུ་བ་མེད། གྲི་གང་ལ་ནི་ཤུབས་མེད། མི་གང་ལ་ནི་མིང་མེད་རི་ཞེས་སྨྲ་བྱས་པ་དང་། ཁྱེའུ་ན་རེ། ས་སྤུང་གི་རི་ལ་ནི་རྡོ་མེད། ཁྲོན་པའི་ཆུ་ལ་ཉ་མེད། སྤྲུལ་བའི་དྲང་སྲོང་ལ་ཆུང་མ་མེད། ཤེལ་གྱི་བུ་མོ་ལ་ཁྱོ་མེད། སའི་གླང་ལ་བེའུ་མེད། ཤིང་གི་རྟ་ལ་ནི་རྟེའུ་མེད། འགྲོན་པོ་ཡན་གར་འགྲོ་བ་ལ་ཆུང་མ་མེད། ཤིང་སྐམ་པོ་ལ་ཡལ་ག་མེད། ཆན་འབའ་ལ་ཤུབས་མེད། མི་གཉིས་ཡང་པོ་ཐེག་བྱེར་བའི་ཤིང་རྟ་ལ་ཕང་ལོ་མེད། དུར་སྒྲོ་ལ་གདན་པ་མེད། སྲིན་འབུ་མེ་ཁྱེར་ལ་དུ་བ་མེད། དུར་ཁྲོད་ཀྱི་ཚོང་འདུས་ལ་ཁེ་མེད། བདག་ཀྱང་དེ་དང་འདྲ་སྟེ། རུས་དང་མིང་ཡང་མ་མཆིས་སོ་ཞེས་བྱས་པ་དང་། ཀོང་ཙེ་ན་རེ་ལེགས་སོ་ལེགས་སོ། ། བདག་གི་ཤིང་རྟ་འདིའི་ནང་ན་མིག་མངས་ཀྱང་ཡོད། བསྟེན་ཅིང་འགྲོགས་པར་དགའ་ན། དེ་ལྟར་རུང་མི་རུང་ཞེས་བྱས་པ་དང་། ཁྱེའུ་ན་རེ། བདག་གིས་ཐོས་པ་ལས། རྒྱལ་བོ་བསྟེན་ལ་དང་ཆེས་དང་། །འབངས་ཀྱི་ཁོད་མི་སྙོམས། །བློན་པོ་བསྟེན་ལ་དང་ཆེས་པས། །རླུང་ཆར་དུས་སུ་མི་འབབ། །ཚོང་བ་བསྟེན་ལ་དང་ཆེས་པས། །ཆགས་དམ་ཤོར། ཞིང་བ་བསྟེན་ལ་དང་ཆེས་དང་། །རྨོ་རྐོ་དུས་ལས་ཡོལ། །འགྲོན་པོ་བསྟེན་ལ་དང་ཆེས་དང་། །སྟོར་རླག་འབྱུང་། །བྲན་བུ་རྨོངས་པས་དང་ཆེས་པས། །གཤུལ་ཤ་ཆད། བདག་ཀྱང་དེ་བས་ན། །བསྟེན་ཅིང་འགྲོགས་པའི་ཤུགས་ཀྱང་མི་ཐུབ་ཅེས་བྱས་པ་དང་། ཀོང་ཙེ་ན་རེ། བཟང་ངོ་བཟང་ངོ་། །ཁྱེའུ་ཁྱོད་དང་ཤིང་རྟ་གཅིག་གི་ནང་དུ་ཞུགས་ཏེ། ཡུལ་ཁམས་བརྒྱུད་ཅིང་འགྲོ་ན། དེ་ལྟར་རུང་ངམ་མི་རུང་ཞེས་སྨྲས་པ་དང་། །ཁྱེའུ་ན་རེ། བདག་གི་ཕ་མ། ནན་ཐུར་ཆེའོ། །ཕའི་ཤི་བདུར་ཡང་མ་ཡིས་འཚལ། མ་སྙིང་རྗེ་ཅན་གྱི་བསོད་ནམས་བགྱི་འཚལ། ནུ་བྱུགས་ངན་པའི་སློབས་སྦྱངས་ཀྱང་བགྱི་འཚལ། ཁམས་རྒྱུ་ཞིང་མཆི་རྔོ་ཡང་མི་ཐོགས་ཞེས་བྱས་པ་དང་། ཀོང་ཙེ་ན་རེ། དགེའོ་དགེའོ་ཞེས་བྱས་ནས། ཁྱོད་འོ་སྐོལ་གཉིས་མནའ་ཐོམ་བཅད་དེ། །གསང་བས་ཀྱང་བཅད་དོ། །སྐྱེམས་གང་བྱུང་ན་ཡང་གཅིག་གིས་གཅིག་འབོད་ལ་གསོལ། །འཐབ་མོ་ཞིག་བྱུང་ན་ཡང་། གཅིག་གི་ར་མདའ་གཅིག་གིས་བྱས། ཡན་མན་དུ་འདྲུལ་ན་ཡང་ཕྲད་པར་དགའ་ན། དེ་ལྟར་རུང་མི་རུང་ཞེས་བྱས་པ་དང་། ཁྱེའུ་ན་རེ། སྐྱེམས་གདའ་བ་ལ་ཡུན་རིངས་དང་སྙན་སྙུངས་ཀྱི་གཞི་ཆེ་ལ། འཐབ་མོའི་དན་རོགས་སུ་འགྱུར་ནས། སླ་ད་རྫས་སུ་ཞེས་དྲིས་པ་དང་། ཁྱེའུ་ན་རེ། ཕ་མ་ཉེའོ། །ཀོང་ཙེས་སྨྲས་པ། ཆུང་མ་ཉེའོ། །ཆུང་མ་ཇི་ལྟར་ཉེ་ཞེས་བྱས་ན། གསོན་གྱི་ཚེ་ན་ཁྲི་སྔས་གཅིག །ཤི་བའི་ཚེ་ན་དུར་སྒོ་གཅིག་ཅེས་བྱས་པ་དང་། ཁྱེའུ་ན་རེ། ཕ་མ་ཉེ་བའི་དཔེ་ཅི་དང་འདྲ་ཞེ་ན། ཤིང་རྩ་གཅིག་དང་འདྲའོ། །ཆུང་མ་མི་ཉེ་བའི་དཔེ་ཅི་དང་འདྲ་ཞེས་ན། ཤིང་རྟ་ལ་ཕང་ལོ་བཏགས་པ་དང་འདྲའོ། །ཤིང་དྲུང་གཅིག་འགྱེལ་ན། ཡལ་ག་བརྒྱ་བསྐམས། མ་གཅིག་ཤི་ན་བུ་བཅུ་ཐང་(ལར?)་་ལུས། ཤིང་རྟ་རྙིང་བ་བཅོས་ན་གསར། ཆུང་མ་གཅིག་ཤི་སྟེ་ཡང་གཅིག་བླངས་ན། མཛངས་མ་རྙེད་ཀྱང་སྲིད། སྐར་མ་མང་བོ་འདུས་ཀྱང་ཟླ་བ་གཅིག་གི་འོད་མེད་དོ། །སྐར་ཁུང་གློ་སྐར་དྲུག་པས་སྒོ་གཅིག་འོད་གསལ་ལོ། །ཆིག་སྟོང་གི་སྐུད་པ་ཡང་། ཁབ་མིག་གཅིག་ལ་ཟད་དོ། །ནང་པོ་ཆུང་མ་ཉེ་ལ། ཕ་མ་རིང་ཞེས་རྩི་བ་ནི། མི་བླུན་པོའི་ཁམས་སུ་གཏོགས་སོ། །དཔེར་ན་ཕ་མའི་དྲིན་གླེང་ན། བརྗེད་པའི་དུས་མེད་དོ་ཞེས་བྱས་པ་དང་། ཀོང་ཙེ་ན་རེ། རབ་ཏུ་དགེ་ངས་ཁྱེའུ་ཁྱོད་ལ་སྨྲས་པ་འཇིག་རྟེན་ན་བདག་དང་སྲིད་པ་གང་འབྱུང་། ཕ་ནི་གང་། མ་ནི་གང་། ཕོ་ནི་གང་། མོ་ནི་གང་། གང་ནི་གཡོན། གང་ནི་གཡས། གང་ནི་ཕྱི། གང་ནི་ནང་། རླུང་ནི་གང་ནས་ལྡང་། ཆར་ནི་གང་ལས་འོང་། སྟོད་རིས་ནི་གང་། སྨད་རིས་གང་། གནམ་ས་གཉིས་ཀྱི་བར་དུ། ལེ་བར་དུ་སྟོང་། ཉེ་རེབ་གྱི་ལེ་བར་དུ་སྟོང་ཞིག་ཡང་ཅི་ཕྱིར་དྲིས་པ་དང་། ཁྱེའུ་ན་རེ། ཕ་འདི་ལྟར་གུད་དུ་དྲི་བའི་དོན་མེད་དོ། །གནམ་ནི་ཕའོ། །ས་ནི་མའོ། །ཉི་མ་ནི་ཁྱོའོ། །ཟླ་བ་ནི་ཆུང་མའོ། །ཤར་ཕྱོགས་ནི་གཡས་སོ། །ལྷོ་ཕྱོགས་ནི་ཕྱིའོ། །བྱང་ཕྱོགས་ནི་ནང་ངོ་། །རླུང་ནི་ཁོད་ལེན་གྱི་རི་ལས་ཀྱང་བྱུང་ངོ་། །ཆར་ནི་ཤར་བྱང་གི་རི་ལས་ཀྱང་འབྱུང་ངོ། །ཕྱུག་པོ་ནི་ཡ་རབས་ལ། དབུལ་བོ་ནི་མ་རབས་སོ། །གནམ་ས་གཉིས་ཀྱི་བར་དུ་རིང་ཐུང་ནི། སྟོང་འབུམ་ཕྲག་དགུ་བརྒྱ་དགུ་བཅུ་ཡོད་དེ། ཕྱོགས་བཞི་ཡང་གྲུ་བཞི་མཆིས་ཏེ། ནང་པོ་རྒན་རབས་ལགས་ན། བདག་ལ་དོན་སྔར་སྨྲ་བ་ཅི་ལས་ཀྱང་ཞེས་བྱས་པ་དང་། ཀོང་ཙེ་ན་རེ། ཤགས་མ་མཆིས་ནས། ལན་མ་ལོན་ཏེ། སླར་ཤིང་རྟ་བ་བསྒྱུར་ཏེ་སོང་ནས། ལི་བར་གསུམ་གྱི་བར་དུ་ཕྱིན་པ་དང་ཤུལ་ཀར་ཁྱེའུ་ཆུང་ངུ་གཅིག་ཤིང་མཛེར་གཅིག། ཆར་བྱེའུ་བཤོར་ཞིང་གསོད་དུ་རྒོལ་བ་མཐོང་ནས། ཀོང་ཙེ་ཤིང་རྟ་བསྒྱིངས་ནས། སྨྲས་པ། ཁྱེའུ་ཁྱོད་ཆར་བྱེའུ་འདི་འབྲུ་སྣ་ལྔ་མི་ཟའོ། །ཁོས་ཉེས་པ་ཅི་བྱས་ན། བུ་ཁྱོད་གསོད་དུ་རྒོལ། ཁྱེའུས་ལན་བཏབ་པ། ནང་པོ་དོན་རྨམ་གཅིག་མཁྱེན་གྱིས། རྨམ་གཉིས་མི་མཁྱེན་ནོ། །བདག་གིས་ཐོས་པ། ཁྱེའུ་ལོ་བཅོ་ལྔ་ལོན་ན། ཕའི་དམག་སྐྱིན་བགྱིད། བུ་མོ་ལོ་བཅུ་ལོན་ན། མའི་བྱན་སྐྱིན་རྔོ་ཐོགས། བྱ་བཅུ་སྐྱེས་ཞག་བརྒྱད་ལོན་ན། ཕ་མ་ཚང་བུར་བཅུག་སྟེ། ཟས་ཀྱི་ལན་འགྱོན་ནོ། །ཆར་བྱེའུ་འདི་ནི། མའི་ལྟོ་བ་ནས་བྱུང་ནས། ཉེས་པ་སེམས་ཅན་གང་ཡང་མི་འདྲ་སྟེ། ཁོང་བར་མའི་གློ་སྙིང་ཟོས་ནས་གཟོད་མའི་རྒྱབ་དྲལ་ནས་བྱུང་སྟེ། མའི་ཤི་བདུར་ནི་བགྱིད་ཀྱི། ཤི་ཁར་བྱུང་ནས། སྨྲེ་སྔག་འབའ་ཞིག་མང་། ད་ལྟར་ཁྱེའུ་ཤ་དད་ཆེ་བ་ནི་མ་ལགས་ཏེ། སྲི་ཞུ་ཆུང་བའི་བུ་ཚ་གསོད་པ་ཙམ་དུ་ཟད་ཅེས་སྨྲས་པ་དང་། ཀོང་ཙེ་ཐོས་ནས། ཤིན་བྲིད་ནས། རྔུལ་ཆུ་བཞི་བབ་སྟེ། ཤིང་རྟ་ཁ་བསྒྱུར་ཏེ་སླར་ལོག་ནས།ལོ་ཟླ་བདམས་ནས། གཟོད་ཕ་མའི་ཤི་བདུར་གླགས་བཙལ་ཏེ། གཟོད་ཕ་མ་ལ་སྲི་ཞུ་ཆེ་བའི་མིང་ཐོབ་བོ། །
ཀོང་ཙེ་ལ་ཁྱེའུས་ལན་བཏབ་པ་རྫོགས་སོ། །
༅།ཞིག་ཧྭ་ཡན་གྱིས་བྲིས་སོ། །
ཟླ་བ་གཞོན་ནུས་ཏུན་ཧྭོང་ཡིག་རྙིང་ལས་ཁོལ་དུ་ཕྱུང་སྟེ་ཅུང་ཟད་ཅིག་ཞུས་ཤིང་གོ་བདེར་བཅོས་པ་དགེའོ། །
