སྐད་བརྡ་རིག་པའི་གལ་གནད་འགའ།

 

སྐད་བརྡ་རིག་པའི་གལ་གནད་འགའ།

 

༈སྤྱིར་སྐད་བརྡ་རིག་པ་ནི་སྐད་དང་བརྡའི་རང་བཞིན་ནམ་ཆོས་ཉིད་ལ་ཚན་རིག་གི་རང་བཞིན་གྱིས་ཞིབ་འཇུག་བྱེད་པའི་རིག་ཚན་ཞིག་ལ་བྱ་བ་ཡིན།

སྐད་བརྡ་རིག་པ་ལ་རིགས་གཞུང་སྐད་བརྡ་རིག་པ་དང་། དངོས་བཀོལ་སྐད་བརྡ་རིག་པ་གཉིས་ཡོད་དེ། སྔ་མ་ནི་སྐད་བརྡའི་སྣང་ཚུལ་དང་། ཁྱད་ཆོས། ཆོས་ཉིད་སོགས་ཕྱོགས་གཅིག་ཏུ་བསྡུས་ཤིང་། རིགས་ལམ་ཡང་དག་གིས་གཏན་ལ་ཕབ་པའི་སྐད་བརྡའི་གཞུང་ལུགས་ཀྱི་ཆར་གཏོགས་པ་རྣམས་ཡིན་ཏེ། སྒྲ་དོག་འཇུག་ལྟར་ན། སྤྱིར་བཏང་སྐད་བརྡ་རིག་པ་ཙམ་དང་། སྒྲ་ཡངས་འཇུག་ལྟར་ན། བྱེ་བྲག་སྐད་བརྡ་རིག་པའི་གཞུང་ལུགས་ཀྱི་ཆ་རྣམས་ཀྱང་འདིའི་ཁོངས་སུ་འདུ་བར་བྱེད།

དངོས་བཀོལ་སྐད་བརྡ་རིག་པ་ནི་ལས་སྒོ་སོ་སོ་ནས་སྐད་བརྡའི་བེད་སྤྱོད་རང་བཞིན་དང་། ལག་ལེན་དངོས་ཕན་རང་བཞིན་ལ་དམིགས་ནས་ཞིབ་འཇུག་རྒྱ་ཆེར་གནང་བའི་མཐའ་འབྲས་རྣམས་ཏེ།

མདོར་ན། གོང་གསལ་ལྟར་ཟུར་མི་འདྲ་བ་ནས་སྐད་བརྡ་རིག་པར་རིགས་དང་རྣམ་གྲངས་སོ་སོར་ཕྱེ་བ་མ་གཏོགས། དེ་དག་ཕན་ཚུན་འབྲེལ་མེད་རང་རྐྱ་འཕེལ་བར་མངོན་པར་བསྟན་པ་མ་ཡིན་ཏེ། གཅིག་དང་ཐ་དད་པའམ་སྤྱི་དང་བྱེ་བྲག་ལྟར་སྣང་བ་དང་། ཡང་ན་ཕན་ཚུན་ལྟོས་གྲུབ་དང་བསྣོལ་མར་འབྲེལ་ནས་སྣང་ཕྱིར། དེ་དག་གིས་ཕན་ཚུན་ལ་གཞོགས་འདེགས་དང་ཁ་གསབ་ཀྱི་ནུས་པ་ཐོན་བཞིན་ཡོད། དེ་བཞིན་དུ་སྤྱིར་བཏང་སྐད་བརྡ་རིག་པ་ལའང་བྱེ་བྲག་ཏུ་སྒྲ་གདངས་རིག་པ་དང་། བརྡ་དོན་རིག་པ། ཐ་སྙད་རིག་པ། མིང་ཁུངས་རིག་པ། མིང་མཛོད་རིག་པ། བརྡ་སྤྲོད་རིག་པ། ཚིག་རྒྱན་རིག་པ། ཡི་གེ་རིག་པ། ཡུལ་སྐད་རིག་པ་སོགས་སུ་དགར་རུང་ལ།

སྐད་བརྡ་རིག་པའི་སྤྱི་དོན་ནི་སྤྱིར་བཏང་སྐད་བརྡ་རིག་པའི་འཇུག་སྒོ་ལྟ་བུར་ངེས་ཤིང་། རིག་པ་དེ་དག་གི་རྩ་བའི་རིགས་ལམ་དང་རྨང་གཞིའི་ཤེས་བྱ་རྣམས་ཧྲིལ་གྱིས་བསྟན་པའི་སྐད་བརྡའི་རིག་གཞུང་ཞིག་ཡིན་ནོ། །

༈ཞིབ་འཇུག་བྱེད་ཐབས་མི་འདྲ་བ་ལས་རིགས་དབྱེ་དགར་བ།

སྐད་བརྡ་རིག་པ་ལ་ནང་གསེས་སུ་ལོ་རྒྱུས་སྐད་བརྡ་རིག་པ་དང་། ཞིབ་སྡུར་སྐད་བརྡ་རིག་པ། ལོ་རྒྱུས་ཞིབ་སྡུར་སྐད་བརྡ་རིག་པ། ཞིབ་འབྲི་སྐད་བརྡ་རིག་པ་བཅས་ཡོད་དེ།

ལོ་རྒྱུས་སྐད་བརྡ་རིག་པ་ནི། གཙོ་བོ་ལོ་རྒྱུས་ཞིབ་དཔྱོད་ཀྱི་ཐབས་ལམ་བརྒྱུད་དེ་སྐད་བརྡ་ག་གེ་མོའི་དུས་ཡུན་རིང་ཐུང་ཅི་རིགས་ཀྱི་བྱུང་རིམ་ཁྲོད་ཀྱི་ཁྱད་ཆོས་སྣ་ཚོགས་དང་། འཕེལ་འགྱུར་གྱི་ཆོས་ཉིད་ཇི་བཞིན་འཚོལ་ཞིབ་དང་ཞིབ་འཇུག་བྱེད་པ་ཞིག་སྟེ། དཔེར་ན། ལེགས་སྦྱར་སྐད་ཀྱི་ལོ་རྒྱུས་དང་། བོད་སྐད་ཀྱི་ལོ་རྒྱུས་ལྟ་བུ།

༈སྐད་བརྡ་རིག་པ་གཉིས་ཀྱི་ཐབས་ལམ་སྦྲགས་མར་སྤེལ་བའམ། ལོ་རྒྱུས་ཞིབ་སྡུར་ཀྱི་བྱེད་ཐབས་སྤྱད་ནས་སྐད་བརྡ་གཉིས་སམ་དུ་མའི་ལོ་རྒྱུས་ཀྱི་འཕེལ་རིམ་ཁྲོད་དུ་ཕན་ཚུན་དོ་མཉམ་ཞིང་། གཞི་མཐུན་གྱི་ཆོས་རྣམས་འཚོལ་ཞིབ་དང་། ཐུན་མོང་བའི་ཆོས་ཉིད་ལ་རྐང་བཙུགས་ནས་དེ་དག་གི་གཉེན་ཚན་གྱི་འབྲེལ་བ་གཏན་ཁེལ་དང་། གདོད་མའི་སྐད་རྒྱུད་ཀྱི་ཁུངས་ཐག་གཅོད་བྱེད་པ་རྣམས་ཡིན།

༈ཞིབ་འབྲི་སྐད་བརྡ་རིག་པ་ལ་མཚོན་ན། ལོ་རྒྱུས་སྐད་བརྡ་རིག་པ་དང་ལྟོས་གྲུབ་ཏུ་སྣང་སྟེ། ལོ་རྒྱུས་ཀྱི་དུས་རིམ་ག་གེ་མོའི་ངོས་ནས་སྐད་བརྡ་ཞིག་གི་སྒྲ་གདངས་དང་། མིང་གི་རྣམ་གཞག བརྡ་སྤྲོད་པའི་ཁྱད་ཆོས་བཅས་ལ་སྒོ་ཀུན་ནས་དབྱེ་ཞིབ་དང་དཔྱད་གཞིག་གནང་སྟེ། དེ་དག་གི་རང་བཞིན་ནམ་ཁྱད་ཆོས་དང་ཆོས་ཉིད་ཇི་ལྟར་ཡིན་པ་དེ་ཇི་བཞིན་དུ་ཞིབ་འབྲི་མཛད་པ་ཞིག་སྟེ། དཔེར་ན། གནའ་རབས་རྒྱ་སྐད་ཀྱི་ཞིབ་འབྲི་དང་། དེང་རབས་བོད་སྐད་ཀྱི་ཞིབ་འབྲི་སྣ་ཚོགས་པ་ལྟ་བུའོ། །

༈ཞིབ་འཇུག་བྱ་ཡུལ་ལྟར་དགར་བ།

སྐད་བརྡ་རིག་པ་ལ་བྱེ་བྲག་སྐད་བརྡ་རིག་པ་དང་། སྤྱིར་བཏང་སྐད་བརྡ་རིག་པ་གཉིས་ཡོད་དེ། སྔ་མ་ནི་སྐད་བརྡ་བྱེ་བྲག་ཆེ་གེ་མོ་ཆེད་དུ་ཞིབ་འཇུག་བྱ་ཡུལ་དུ་དམིགས་ནས་དེ་དག་གི་སྣང་ཚུལ་དང་། བྱུང་འཕེལ་གྱི་ཆོས་ཉིད་འཚོལ་ཞིབ་བྱེད་པ་རྣམས་ཏེ། དཔེར་ན། བོད་སྐད་ཀྱི་སྐད་བརྡ་རིག་པ་དང་། དབྱིན་སྐད་ཀྱི་སྐད་བརྡ་རིག་པ་ལྟ་བུ།

ཕྱི་མ་ནི་སྐད་བརྡ་གཉིས་སམ་དུ་མའམ་འགྲོ་བ་མིའི་རིགས་ཀྱི་སྐད་བརྡ་སྤྱི་ཞིབ་འཇུག་བྱ་ཡུལ་དུ་བཟུང་སྟེ། དེ་དག་གི་ཐུན་མོང་གི་ཁྱད་ཆོས་དང་སྤྱིར་བཏང་གི་ཆོས་ཉིད་རྣམས་མཚན་མཚོན་གྱིས་མཐར་དཔྱད་དེ་རིགས་པ་ཡང་དག་གིས་གཏན་ལ་ཕབ་པའི་གཞུང་ལུགས་ཤིག་ཏུ་ངེས་པས། སྔ་ཕྱི་གཉིས་ཀྱི་འབྲེལ་བ་སྤྱི་དང་བྱེ་བྲག་ལྟར་རྟོགས་པར་བྱའོ། །

༈ཞིབ་འཇུག་གི་ཁྱབ་ཁོངས་ལྟར་དགར་བ།

སྐད་བརྡ་རིག་པ་ལ་ཡངས་དོག་གཉིས་ཡོད་དེ། སྔ་མ་ནི་སྐད་བརྡ་རིག་པ་དང་། བསྣོལ་མར་འབྲེལ་བའི་བསྡུས་གྲུབ་རིག་གཞུང་རྣམས་ཏེ། དཔེར་ན། སྤྱི་ཚོགས་སྐད་བརྡ་རིག་པ་དང་། སེམས་ཁམས་སྐད་བརྡ་རིག་པ། རིག་གནས་སྐད་བརྡ་རིག་པ། རྩིས་ལུགས་སྐད་བརྡ་རིག་པ་ལྟ་བུའོ། །

ཕྱི་མ་ནི་སྐད་བརྡ་ནང་ཁུལ་གྱི་སྒྲིག་གཞི་དང་གྲུབ་ཆ་སྣ་ཚོགས་ལ་ཞིབ་འཇུག་བྱེད་པའི་རིག་པ་སྣ་ཚོགས་ཏེ། དཔེར་ན། སྒྲ་གདངས་རིག་པ་དང་། བརྡ་དོན་རིག་པ། བརྡ་སྤྲོད་རིག་པ། ཚིག་རྒྱན་རིག་པ་ལྟ་བུ།

༈ སྐད་བརྡ་རིག་པའི་འཕེལ་རིམ།

·        སྐད་ཡིག་རིག་པ།

·        ལོ་རྒྱུས་ཞིབ་སྡུར་སྨྲ་བ།

·        སྒྲིག་གཞི་སྨྲ་བ།

·        བརྗེ་གྲུབ་བརྡ་སྤྲོད་སྨྲ་བ།

·        བསྡུས་གྲུབ་བརྡ་སྤྲོད་སྨྲ་བ།

༈སྐད་བརྡ་རིག་པའི་དབྱེ་བ་དགར་ཚུལ།

·        ཞིབ་འཇུག་བྱེད་ཐབས།            ལོ་རྒྱུས་ཞིབ་སྡུར། ཞིབ་འབྲི་སྐད་བརྡ་རིག་པ།

·        ཞིབ་འཇུག་གི་དུས་ཚད།             གཞུང་ལྟོས། (དུས་རིམ)  འཕྲེད་ལྟོས། (དུས་མཚུངས)

·        ཞིབ་འཇུག་བྱ་ཡུལ།                  བྱེ་བྲག སྤྱིར་བཏང་།

·        ཞིབ་འཇུག་ཁྱབ་ཁོངས།                ཡངས་པ། དོག་པ།  

·        ཞིབ་འཇུག་གི་གནད་ལ་གཞོལ་ཚུལ།        རིགས་གཞུང་དང་། དངོས་བཀོལ་གཉིས་སོ། །

༈སྐད་བརྡ་རིག་པ་དང་རིག་པ་གཞན་དག་བར་གྱི་འབྲེལ་བ།

སྐད་བརྡ་རིག་པ་ནི་གནའ་དུས་སུ་ཡེ་ཤུའི་ཁ་ཆད་དང་ཡིག་ཚང་སྣ་ཚོགས་པའི་ཞིབ་འཇུག་དང་སྦྲགས་ནས་མངོན་པ་དང་། རང་བཞིན་སྤྱི་ཚོགས་ཀྱི་འཕེལ་འགྲོས་དང་བསྟུན་ནས་སྤྱི་ཚོགས་ཚན་རིག་དང་རང་བྱུང་ཚན་རིག་གི་ཞིབ་འཇུག་སྣ་ཚོགས་ལ་འབྲེལ་བ་དམ་ཟབ་ཏུ་ཡོད་དེ།

སྤྱི་ཚོགས་ཚན་རིག་གི་སྟེང་ནས་བཤད་ན། སྐད་བརྡ་རིག་པ་ནི་མཚན་ཉིད་རིག་པ་དང་། གཏན་ཚིགས་རིག་པ། མིའི་རིགས་རིག་པ། ལོ་རྒྱུས་རིག་པ། གནའ་དཔྱོད་རིག་པ། སྤྱི་ཚོགས་རིག་པ། མི་རིགས་རིག་པ་སོགས་ལ་འབྲེལ་བ་དམ་པོར་སྣང་སྟེ། མཚན་ཉིད་རིག་པའི་གྲུབ་མཐའ་ཕལ་མོ་ཆེ་དག་གི་རྩ་བའི་ལྟ་བ་དང་རིགས་པའི་ཁུངས་གནད་དག་རྒྱུན་པར་སྐད་བརྡའི་ཤེས་རྟོགས་ལ་འབྲེལ་བཞིན་ཡོད་པ་དང་།  གཏན་ཚིགས་རིག་པ་ལྟར་ནའང་སྐད་བརྡ་ནི་བསམ་གཞིག་གི་ཡོ་བྱད་གལ་ཆེན་ཞིག་དང་། འགྲོ་བ་མིའི་སེམས་རྒྱུད་ཀྱི་ཀུན་རྟོག་དང་གཏན་ཚིགས་ཀྱི་རིགས་སྒོ་མཐའ་ཡས་པའི་བརྡ་ཐབས་སུ་མཐོང་ཞིང་། སྐད་བརྡ་སྨྲ་བ་རྣམས་ཀྱིས་ཀྱང་རྟོག་གེ་བའི་གཞུང་གི་རིགས་ལམ་དང་། རྟོགས་ཐབས། བརྡ་ཆད་སོགས་སྤྱད་ནས་སྐད་བརྡའི་སྒྲིག་གཞི་སྦྱོར་སྟངས་སྣ་ཚོགས་ལ་ཞིབ་དཔྱོད་གནང་བཞིན་ཡོད་པས། འདི་དག་ཕན་ཚུན་གཅིག་ལ་གཅིག་རྟེན་གྱི་ཚུལ་དུ་སྣང་། 

༈གནའ་རབས་མིའི་རིགས་ཀྱི་སྤྱི་ཚོགས་འཕེལ་རིམ་ཁྲོད་ཀྱི་གནད་དོན་སྣ་ཚོགས་ལ་རྟོག་ཞིབ་གནང་བ་དང་། གནའ་རྫས་རྟོག་ཞིབ་ཀྱི་དཔྱད་འབྲས་ལས་ཀྱང་འགྲོ་བ་མིའི་རིགས་ཀྱི་སྐད་བརྡའི་འབྱུང་ཁུངས་དང་། འཕེལ་རྒྱས་ཀྱི་ཞིབ་འཇུག་ཐད་ཡིད་རྟོན་འཕེར་བའི་རྒྱུ་ཆ་ལེགས་པར་བཏོན་ཡོད།

དུས་མཚུངས་སུ་ལོ་རྒྱུས་མཁན་པོ་རྣམས་ཀྱིས་ཀྱང་སྐད་བརྡའི་རྒྱུ་ཆའམ་ལོ་རྒྱུས་ཀྱི་ཡིག་ཚང་འབོར་ཆེན་ལ་རྐང་བཙུགས་ནས་སྤྱི་ཚོགས་ལོ་རྒྱུས་ཀྱི་འཕེལ་འགྱུར་ལ་ཞིབ་དཔྱོད་གནང་བ་དང་། སྐད་བརྡ་སྨྲ་བ་རྣམས་ཀྱིས་ཀྱང་སྐད་བརྡ་རང་སྟེང་གི་འཕེལ་འགྱུར་དེ་སྤྱི་ཚོགས་ཀྱི་འཕེལ་རྒྱས་དང་འགྱུར་ལྡོག་ལ་འབྲལ་ཐབས་མེད་པར་དགོངས་ཤིང་། སྔར་འདས་ལོ་རྒྱུས་ཀྱི་དོན་དངོས་དང་ཡིག་ཚང་ལ་གཞི་བཅོལ་ནས་སྐད་བརྡའི་བྱུང་འཕེལ་གྱི་ཆོས་ཉིད་ལ་འཚོལ་ཞིབ་གནང་བས། འདི་དག་གི་དཔྱད་འབྲས་ཕན་ཚུན་ཏིལ་ལ་ཏིལ་མར་གྱི་ཚུལ་དུ་སྣང་།

༈སེམས་ཁམས་རིག་པ་ལྟར་ནའང་། སྐད་བརྡ་རིག་པ་དང་དཔུང་ཤུགས་མཉམ་སྦྲེལ་གྱིས་སེམས་ཁམས་ཀྱི་ངོ་བོ་སྣང་ཚུལ་དང་སྨྲ་བརྗོད་ཀྱི་ཡིད་ཀྱི་བྱེད་རྩོལ་དང་ནུས་པ་སོགས་ལ་ཞིབ་དཔྱོད་གནང་ཞིང་། ཚོད་ལྟའི་རྒྱུ་ཆ་དང་ཐབས་ལམ། དཔྱད་འབྲས་གང་ཐད་ནས་ཕན་ཚུན་ལ་གཞོགས་འདེགས་དང་། ར་སྤྲོད་ཁུངས་འདྲེན་གང་ལེགས་བྱས་པའི་ཆ་ནས་སེམས་ཁམས་སྐད་བརྡ་རིག་པ་ཞེས་པ་ཞིག་ཀྱང་གྲུབ་ལ། ནོམ་ཆོམ་སི་ཀི་ལྟ་བུས་སྐད་བརྡ་རིག་པ་མཐར་གཏུགས་ན་སེམས་ཁམས་སྐད་བརྡ་རིག་པ་དང་། དེ་མཐར་དེད་ན་མིའི་སེམས་ཁམས་ལ་ཐུག་ཡོད་ཚུལ་གྱི་དགོངས་ཚུལ་ཡང་བཏོན་ཡོད་པ་དེ། སྒྲ་ནི་བརྗོད་འདོད་རྗེས་འབྲངས་ཕྱིར།། ཞེས་པའི་བརྗོད་འདོད་དམ་ཞེ་འདོད་བྱ་བ་དང་ཆུ་ལ་ཆུ་བཞག་ལྟ་བུར་གྱུར་བར་སྙམ།

༈སྤྱི་ཚོགས་རིག་པ་ལྟར་ན། སྐད་བརྡའི་གནད་དོན་དེ་སྤྱི་ཚོགས་ཡོངས་ཀྱི་གནད་དོན་གལ་ཆེན་ཞིག་ཏུ་མཐོང་ཞིང་། མི་ཡི་སྤྱོད་ལམ་ལ་ཤན་ཞུགས་པའི་རྒྱུ་རྐྱེན་ལ་ཞིབ་དཔྱོད་བྱེད་པའམ། མི་དང་མིའི་འབྲེལ་བ། མི་དང་སྤྱི་ཚོགས་བར་གྱི་འབྲེལ་བར་ཞིབ་འཇུག་བྱེད་པ། སྤྱི་ཚོགས་ཀྱི་སྒྲིག་གཞི་དང་སྤྱི་ཚོགས་ཀྱི་འཕེལ་འགྱུར། སྤྱི་ཚོགས་ཀྱི་འགལ་ཟླ་དང་ཟིང་འཁྲུག་ལ་ཞིབ་འཇུག་བྱེད་པ་སོགས་གང་ལགས་ཀྱང་ཚང་མ་ཚད་མ་མི་འདྲ་བའི་སྒོ་ནས་སྐད་དང་ཡི་གེའི་བཀོལ་སྤྱོད་ལ་འབྲེལ་བ་དམ་པོ་ཡོད།

སྐད་བརྡའི་ཞིབ་འཇུག་ལ་མཚོན་ནའང་། སྐད་བརྡ་ནི་སྤྱི་ཚོགས་ཀྱི་སྣང་ཚུལ་ཞིག་ཡིན་པ་གཞིར་བྱས་ཏེ། སྐད་བརྡ་དང་མི་རིགས་བར་གྱི་འབྲེལ་བ་དང་། སྐད་བརྡ་དང་རིག་གནས་བར་གྱི་འབྲེལ་བ། སྐད་བརྡའི་སྒྲིག་རིམ་སྦྱོར་སྟངས་ཐད་ཀྱི་སྤྱི་ཚོགས་ཀྱི་དབྱེ་བ། སྤྱི་ཚོགས་བྱེད་ནུས་ཀྱིས་ཚོད་འཛིན་ཐེབས་པའི་སྐད་བརྡའི་སྣང་ཚུལ་གྱི་རྣམ་གྲངས། སྤྱི་ཚོགས་ཀྱི་རྒྱུ་རྐྱེན་སྣ་ཚོགས་དང་འབྲེལ་བའི་སྐད་གཉིས་སམ་སྐད་མང་གི་སྣང་ཚུལ་དང་ཡུལ་སྐད་མང་བའི་སྣང་ཚུལ། དེ་འབྲེལ་གྱི་སྐད་བརྡའི་སྲིད་ཇུས་དང་འཆར་འགོད་སྣ་ཚོགས་བཟོ་བ་སོགས་སྤྱི་ཚོགས་ཀྱི་བདག་རྐྱེན་དང་འབྲལ་ཐབས་མེད་པ་དང་། དེ་དག་ཕན་ཚུན་འབྲེལ་བའི་རྩ་བའི་རིགས་ལམ་ལ་བརྟེན་ནས་སྐད་བརྡ་དང་སྤྱི་ཚོགས་འཚོ་བའི་བར་གྱི་རྒྱུ་རྐྱེན་དང་། ཕན་ཚུན་ལྟོས་གྲུབ་ཀྱི་འབྲེལ་བར་ཞིབ་ཏུ་དཔྱད་པའི་རིག་པ་ཞིག་སྟེ། སྤྱི་ཚོགས་སྐད་བརྡ་རིག་པ་ཞེས་པ་གྲུབ་ཅིང་། སྐད་དང་ཡི་གེ་ལ་འབྲེལ་བའི་སྤྱི་ཚོགས་ཀྱི་གནད་དོན་ཕལ་མོ་ཆེ་རྣམས་མིའི་རིགས་རིག་པ་དང་། སྤྱི་ཚོགས་རིག་པ། སྐད་བརྡ་རིག་པ། སློབ་གསོ་རིག་པ་སོགས་ཀྱི་ཐུན་མོང་གི་དཔྱད་གཞིར་མངོན་པས་ན། རིག་པ་དེ་དག་ཀྱང་ཕན་ཚུན་ལ་ཚྭ་ཆུ་བཞིན་འདྲེས་པ་ལས་རང་རྐྱ་འཕེར་བར་མངོན་པ་ཞིག་མ་ཡིན་ནོ། །

༈མིའི་རིགས་ཀྱི་སྨྲ་བརྗོད་ཀྱི་ནུས་པ་དང་། རྣམ་རྟོག་གམ་རིག་སྟོབས་དང་ཀླད་དབང་གི་རྒྱུད་འཛིན་ལ་ཞིབ་དཔྱོད་གནང་བས་སྐྱེ་ཁམས་སྐད་བརྡ་རིག་པ་བྱུང་བ་དང་། སྐད་བརྡ་རིག་པ་དང་གསོ་བཅོས་ཀྱི་ཐབས་ལམ་སྦྲགས་ནས་མིའི་རིགས་ཀྱི་སྐད་ཆའི་ནུས་པ་དང་། ཀླད་དབང་གི་འབྲེལ་བ་གསེད་བཀྲོལ་དང་སྐད་ཉམས་ན་ཚ་སོགས་ལ་ཞིབ་འཇུག་གནང་བའི་ཆ་ནས་གསོ་དཔྱད་སྐད་བརྡ་རིག་པ་བྱུང་བ་དང་།  གློག་རྡུལ་རྩིས་འཁོར་གྱི་རྣམ་པའི་དཔེ་གཞི་བརྒྱུད་ནས་སྐད་བརྡར་དབྱེ་ཞིབ་དང་། གོ་གསེད། ཐག་གཅོད་གནང་བའི་ཆ་ནས་རྩིས་འཁོར་སྐད་བརྡ་རིག་པ་སོགས་བྱུང་།

མདོར་ན། སྐད་བརྡ་རིག་པ་དང་། གཏན་ཚིགས་རིག་པ། རྩིས་འཁོར་ཚན་རིག མཚན་ཉིད་རིག་པ། མིས་བཟོས་རིག་སྟོབས། རྩིས་རིག་པ། སྡོམ་རྩིས་རིག་པ་བཅས་ཀྱི་ཞིབ་འཇུག་གི་འབྲས་བུ་དྲ་བར་འབྲེལ་ནས་གྲུབ་ཅིང་། ཁྱད་པར་དུ་སྐད་བརྡ་རིག་པ་ནི་གཞན་པའི་རིག་པ་ཀུན་གྱི་གཞི་འཛིན་ཅིང་ཕྱི་མོར་གྱུར་བའམ་སྔོན་འགྲོའི་བསླབ་བྱ་ཞིག་ཏུ་གྱུར་བ་དང་། དེའི་ཞིབ་འཇུག་གི་ལས་ཀ་ལ་ཁྱབ་རྒྱ་ཆེ་ཞིང་སྣ་ཚོགས་པ་དང་སྔོན་སྐྱོད་ཀྱི་འགན་ནུས་ཁྱད་པར་བ་ཞིག་ཀྱང་ལྡན་པས། རིག་པ་སྣ་ཚོགས་པའི་ཞིབ་འཇུག་ཁྲོད་དུ་གོ་གནས་གལ་ཆེན་ཟིན་ཡོད་དོ། །

༈སྐད་བརྡ་རིག་པ་བསླབ་པའི་དགོས་པ།

སྐད་བརྡ་ནི་འགྲོ་བ་མིའི་རིགས་ཀྱི་རྣམ་པར་རྟོག་པ་དང་འབྲེལ་འདྲིས་ཀྱི་ཡོ་བྱད་གལ་ཆེན་ཡིན་ཞིང་། འདུ་ཚོགས་འཚོ་བའི་ཕྱོགས་ཐམས་ཅད་ལ་ཐད་ཀར་གྱི་འབྲེལ་བ་དམ་པོ་ལྡན། སྐད་བརྡ་ལ་ཞིབ་འཇུག་བྱེད་དགོས་ན། གཙོ་བོ་སྐད་བརྡ་དེ་འགྲོ་བ་མིའི་རྣམ་པར་རྟོག་པའམ་བསམ་གཞིག་དང་འབྲེལ་འདྲིས་ཀྱི་བརྡ་ཐབས་སུ་ཇི་ལྟར་བྱུང་བའི་ཚུལ་དང་། སྐད་བརྡ་རིག་པ་དེ་ཧ་ལམ་འགྲོ་བ་མིའི་རིགས་ཀྱི་སྤྱི་ཚོགས་དང་འབྲེལ་བའི་ཞིབ་འཇུག་སྣ་ཚོགས་དང་རིག་པ་མཐའ་དག་ལ་འབྲེལ་བ་དམ་ཟབ་ཏུ་ལྡན་པ་ཤེས་པར་བྱེད་དགོས་སོ། །

༈རྒྱལ་དབང་ལྔ་བས། ཚིག་དོན་ལ་འཁྲུལ་བ་ཚར་གཅོད་པ་བརྡ་སྤྲོད་དང་གཏན་ཚིགས། གཞན་ལ་ཕན་ཞིང་རྗེས་སུ་འཛིན་པར་བྱེད་པར་བཟོ་དང་གསོ་བ། རང་ཉིད་ཆོས་ཀུན་ཤེས་པར་བྱེད་པ་ནང་དོན་རིག་པ་སྟེ། ལྔ་བོ་འདི་ནི་ཁོང་དུ་ཆུད་པ་ལ་འཕགས་པའི་ཡུལ་དུ་མ་ཧཱ་པཎྜིཏ་ཞེས་གྲགས་ཤིང་། ལྔ་བོ་དེའི་ནང་ནང་ཀྱང་ཐོག་མར་བསླབ་པར་བྱ་བ་ནི། ཐོག་མར་སྒྲ་ལ་མཁས་པ་ཡིས། །ཚིག་དོན་རྣམ་པར་ཕྱེ་སྟེ་བསྟན། །དེ་ནས་དོན་ལ་མཁས་པ་ཡིས། །ལྷག་ཆད་འཁྲུལ་བ་མེད་པར་བཤད། ཅེས་གསུངས་པ་དང་།

བོད་ཀྱི་བརྡ་སྤྲོད་ཀྱི་རྩ་བ་ལས་ཀྱང་། བསླབ་པ་ཀུན་གྱི་གཞི་འཛིནད་ཅིང་། །རིག་བྱེད་སྨྲ་བ་རྣམས་ཀྱི་རྒྱུ། །ཞེས་པ་དང་། བསླབ་པའི་རིམ་པ་འདི་ཡིས་ནི། །གང་ཞིག་འབད་པ་ཆུང་ངུས་ཀྱང་། །ཤེས་རབ་མྱུར་དུ་གྲོལ་བར་འགྱུར། །དེ་ཕྱིར་དང་བོར་འདི་ཉིད་བསླབ། །ཅེས་གསུངས་པ་ནང་བཞིན། འདི་ནི་གཞན་པའི་བསླབ་བྱ་རིག་གཞུང་ཀུན་གྱི་འཇུག་སྒོར་ངེས་པར་མ་ཟད། རིག་བརྒྱའི་སྒོ་འཕར་འབྱེད་པའི་དགེ་མཚན་མཆོག་ཏུ་ལྡན་ནོ། །

༈སྐད་བརྡ་རིག་པའི་གཞུང་དག་ལས་སྐད་བརྡའི་གོ་དོན་དང་ངོ་བོ། སྐད་བརྡའི་བྱུང་འཕེལ་གྱི་རྒྱུ་རྐྱེན་དང་ཆོས་ཉིད། སྐད་བརྡར་ཞིབ་འཇུག་དང་སྐད་བརྡའི་སྒྲིག་གཞི་ལ་དབྱེ་ཞིབ་བྱེད་པའི་ཐབས་ལམ། སྐད་བརྡའི་ལོ་རྒྱུས་དང་སྐད་བརྡ་ཕན་ཚུན་བར་གྱི་འབྲེལ་བ་ལ་ཞིབ་དཔྱོད་བྱེད་པའི་རྩ་བའི་རིགས་ལམ། སྐད་བརྡ་རིག་པའི་ནང་ཁུལ་གྱི་ཚན་ཁག་སོ་སོའི་གྲུབ་ཚུལ་དང་། དེ་དག་གི་ལྟ་བ་དང་ནང་དོན། ཁྱབ་ཁོངས། རྟོག་ཐབས། ཆེད་སྤྱོད་ཀྱི་བརྡ་དོན་སོགས་རྩ་བའི་ཤེས་བྱ་དང་། གཞུང་ལུགས་རང་གིས་དེང་རབས་ཀྱི་ཚན་རིག་ཁྲོད་དུ་ཟིན་པའི་གོ་གནས་དང་རིག་པ་ཕན་ཚུན་བར་གྱི་འབྲེལ་བ་བཅས་རྩ་བའི་གཞུང་ལུགས་ཀྱི་དོན་གནས་རྣམས་མཐའ་དཔྱད་ནས་ཕྱོགས་གཅིག་ཏུ་བསྡུས་ཤིང་། རིགས་པ་ཡང་དག་གིས་ཆོས་ཉིད་ལྡན་པ་རྣམས་མཚན་མཚོན་གཏན་ལ་ཕབ་ཡོད་པས། རིག་པ་འདི་བསླབས་ན། སྐད་བརྡའི་གཞུང་ལུགས་དང་བེད་སྤྱོད་ཀྱི་ཕན་ནུས་ལ་འབྲེལ་བའི་གནད་དོན་སྐོར་ཞིག་ཐག་གཅོད་པར་བྱེད་ནུས་སོ།།

༈མདོར་ན། སྐད་བརྡ་རིག་པ་ནི་མིའི་རིགས་ཀྱི་སྐད་དང་ཡི་གེ་ཆེད་དུ་ཞིབ་འཇུག་བྱེད་པའི་རིག་གཞུང་ཞིག་ཡིན་པར་མ་ཟད། གཞན་པའི་རིག་གཞུང་ཕལ་མོ་ཆེ་རྣམས་ཀྱི་རྨང་གཞིའི་ཤེས་བྱ་ཡིན་ཞིང་། དེ་དག་ལ་འབྲེལ་བ་དམ་ཟབ་ལྡན་པ་དང་། ལྷག་པར་དུ་དེང་རབས་ཚན་རྩལ་གྱི་འཕེལ་རྒྱས་ཁྲོད་དུ་དེ་ལ་སྔར་ལས་ལྷག་པའི་དགེ་མཚན་ཁྱད་པར་བ་ལྡན་པས། རིག་པ་འདི་སློབ་པ་ལ་རིག་བརྒྱའི་སྒོ་འཕར་འབྱེད་པའི་གཞུང་ལུགས་ཀྱི་རིན་ཐང་དང་། ལག་ལེན་དངོས་ལ་ཕན་པའི་བེད་སྤྱོད་ཀྱི་རིན་ཐང་མཆོག་ཏུ་ལྡན་ནོ། །

༈སྐད་བརྡ་རིག་པ།   

༡། གཞུང་ལུགས་སྐད་བརྡ་རིག་པ། ༢། དངོས་སྤྱོད་སྐད་བརྡ་རིག་པ།

༡།༡ ཆེད་གཉེར་སྐད་བརྡ་རིག་པ། ༡།༢ སྤྱིར་བཏང་སྐད་བརྡ་རིག་པ།

༡།༡།༡འཕྲེད་ངོས་སྐད་བརྡ་རིག་པ། ༡།༡།༢ གཞུང་ངོས་སྐད་བརྡ་རིག་པ།

༡།༡།༡།༡ཞིབ་འབྲི་སྐད་བརྡ་རིག་པ། ༡།༡།༡།༢ཞིབ་སྡུར་སྐད་བརྡ་རིག་པ།

༡།༡།༢།༡ལོ་རྒྱུས་སྐད་བརྡ་རིག་པ། ༡།༡།༢།༢ལོ་རྒྱུས་ཞིབ་སྡུར་སྐད་བརྡ་རིག་པ།

༡།༢།(སྤྱིར་བཏང་སྐད་བརྡ་རིག་པ) སྒྲ་གདངས་རིག་པ། སྐྱེ་གནས་རིག་པ། བརྡ་དོན་རིག་པ། ཐ་སྙད་རིག་པ། མིང་མཛོད་རིག་པ། བརྡ་སྤྲོད་རིག་པ། ཚིག་རྒྱན་རིག་པ། ཡི་གེ་རིག་པ་སོགས།

༢།༡སྒྲ་དོག་འཇུག    སྐད་བརྡའི་སློབ་ཁྲིད་ཀྱི་གཞུང་ལུགས་དང་བྱེད་ཐབས་སྐོར།

༢།༢སྒྲ་ཡངས་འཇུག  བསྡུས་གྲུབ་རིག་གཞུང་སྐོར།

༈སྐད་བརྡའི་འབྱུང་ཁུངས་ཀྱི་གོ་དོན།

༡། གདོད་མའི་འགྲོ་བ་མིའི་རིགས་ཀྱི་སྐད་བརྡའི་འབྱུང་ཁུངས།

༢། ཕྱི་དུས་ཀྱི་སྐད་བརྡ་བྱེ་བྲག་པའི་འབྱུང་ཁུངས། རྒྱ་གར་སྐད། བོད་སྐད།  

༈སྐད་བརྡའི་འབྱུང་ཁུངས། སྐད་བརྡའི་ངོ་བོ། སྐད་བརྡ་དང་སྐད་ཆ། (སྐ་ཅ)

༈སྔ་མ་ནི་ཕྱི་མ་རྣམས་ཀྱི་དངོས་བརྒྱུད་ཀྱི་སྐྱེད་བྱེད་ཡིན་ལ། ཕྱི་མ་ནི་གདོད་མའི་ཚོགས་པའི་གྱེས་འདུམ་དང་རིགས་རུས་མཆེད་ཁུངས་འཕེལ་འགྲོས་དང་བསྟུན་ནས་ཐོག་མའི་སྐད་བརྡ་དང་ཡུལ་སྐད་དུ་མའི་རྨང་གཞི་ལས་རིམ་གྱིས་འཕེལ་འགྱུར་བྱུང་ཞིང་། སྐད་བརྡ་རང་ཚུགས་ཅན་དུ་གྲུབ་པ་ཡིན་པས། སྔ་ཕྱི་དག་ཕན་ཚུན་ལ་དུས་སྔ་ཕྱིའི་ཁྱད་པར་དང་རྒྱུ་དངོས་བརྒྱུད་ཀྱི་འབྲེལ་བ་ངེས་ཅན་ལྡན། འདིར་སྐབས་སུ་བབ་པའི་དོན་སྔ་མ་ལ་མཚོན་ན། ཡ་ཐོག་མིའི་རིགས་ཀྱི་མེས་པོ་རྣམས་ཀྱིས་ཐོག་མར་སྨྲ་བརྗོད་མི་ཤེས་པ་ལས་ལུས་ཉམས་འགུལ་སྟངས་དང་བཞིན་གྱི་ཉམས་འགྱུར་ཅི་རིགས་སུ་སྤེལ་ཏེ། ཕན་ཚུན་བརྡ་དོན་ཙམ་སྟོན་པ་ལྟ་བུ།

༈གཅིག་ནི་སྐད་བརྡ་དེ་དུས་ནམ་ཞིག་ལ་རྒྱུ་རྐྱེན་ཇི་ལྟ་བུ་ཞིག་གི་དབང་གིས་འགྲོ་བ་མིའི་འབྲེལ་འདྲིས་ཀྱི་བརྡ་ཐབས་སུ་གྱུར་བ། ཅིག་ཤོས་ནི་མིའི་རིགས་ཀྱི་སྐད་བརྡ་དེ་ཐོག་མར་དངོས་རྒྱུ་གང་ལས་འཕེལ་འོངས་པའོ། །

སྔ་ཕྱི་གང་ཡིན་ཡང་ཡ་ཐོག་མིའི་རིགས་ཀྱི་བྱུང་རབས་ངེས་ཅན་ལ་འབྲེལ་ཞིང་། མ་མཐའ་ཡང་ལོ་ངོ་ས་ཡའི་སྔོན་གྱི་ལོ་རྒྱུས་ཀྱི་དོན་རྩར་ངེས་པས། ཕྱིས་ཀྱི་མཁས་དབང་རྣམ་པས་དཔྱད་སྟོབས་ཡོད་རྒུ་རྩལ་སྤྲུགས་བྱས་ཏེ། སྐད་བརྡའི་འབྱུང་ཁུངས་ཐད་ལ་ཞིབ་འཇུག་གི་གྲུབ་འབྲས་གཟེངས་སུ་ཐོན་པ་བླངས་ཏེ། སྐད་བརྡའི་འབྱུང་ཁུངས་སྨྲ་བ་འགའ་ཤས་ཡོད་པ་ནི།

༡། ལྷས་གནང་བར་སྨྲ་བ།

ལྷས་གནང་སྨྲ་བ་རྣམས་ཀྱིས་སྐད་བརྡ་དང་བརྡ་སྤྲོད་པའི་གཞུང་སོགས་སྟོན་པའམ་ལྷ་གོང་མ་རྣམས་ཀྱིས་འཇིག་རྟེན་མི་ཡུལ་དུ་གནང་བར་འདོད་དེ། རྒྱ་གར་གྱི་བྲམ་ཟེའི་རིག་བྱེད་ཀྱི་གཞུང་དུ་རིག་བྱེད་བཞི་ལྷ་ཚངས་པའི་གདོང་བཞི་ལས་བྱུང་བའམ་ཚངས་པའི་བུ་བཞིས་བྱས་པར་འདོད་པ་དང་། ཚངས་པའི་མཚོ་ཞེས་བྱ་བ་ལས་རིག་བྱེད་ཀྱི་ཡི་གེའི་སྒྲ་རྣམས་གདངས་ཀྱི་ཚུལ་དུ་འབྱུང་བར་འདོད་པ་སོགས་སྣང་ལ། ལེགས་སྦྱར་སྐད་ཀྱི་སྒྲ་གཞུང་ལྟར་ནའང་སརྦཛྙ་བྱཱ་ཀ་ར་ཎ་དང་། ཨིནྡྲ་བྱཱ་ཀ་ར་ཎ། ཀ་ལཱ་བ་བྱ་ཀ་ར་ཎ། དབྱངས་ཅན་བྱཱ་ཀ་ར་ཎ་སོགས་རིམ་པ་བཞིན་ལྷ་ཐམས་ཅད་མཁྱེན་པ་དང་། དབང་བོ། གཞོན་ནུ། དབྱངས་ཅན་མ་སོགས་ཀྱིས་གནང་བར་བཞེད་པ་ལྟ་བུའོ།།

༈ཡེ་ཤུ་ཆོས་ལུགས་ཀྱི་ཁ་ཆད་ནང་དུ་ལྷའི་དབང་བོ་ཡ་ཧོ་བས་མིའི་རིགས་ཀྱི་མེས་པོ་ཡ་ཏང་གསར་དུ་བསྐྲུན་ཞིང་། དེས་ཀྱང་བརྟན་གཡོའི་ཤེས་བྱ་ཀུན་ལ་མིང་གདགས་པར་མཛད་པའི་བཞེད་ཚུལ་སོགས་ལས་ཀྱང་སྐད་བརྡ་ལྷས་གནང་བར་ཤུགས་ཀྱིས་བསྟན། མིའི་རིགས་ཀྱི་ངག་རྒྱུན་དུའང་ཡུལ་ལྷ་གཞི་བདག་གིས་མིའི་རིགས་གསར་དུ་བསྐྲུནད་ཅིང་སྐ་ཅའི་བརྡ་ཐབས་སྤེལ་བར་གྲགས་སོ། །

༢། མིས་བསྐྲུན་པར་སྨྲ་བ།

འདིས་སྐད་བརྡ་ནི་ལྷས་གནང་བ་མ་ཡིན་པར་མི་རང་ཉིད་ཀྱིས་བསྐྲུན་པར་འདོད་ཅིང་། འདི་ལའང་ནང་གསེས་སུ་རིགས་ལྔ་ཡོད་དེ།

ཀ༽ ལད་ཟློས་སྨྲ་བ།

ཁ༽ འབོད་སྒྲོག་སྨྲ་བ།

ག༽ ལག་བརྡ་སྨྲ་བ།

ང༽ གན་རྒྱ་སྨྲ་བ།

ཅ༽ སྐད་ཅོར་སྨྲ་བའམ་ཧང་ཡོ་སྨྲ་བ།

༈འཛམ་གླིང་སྟེང་གནའ་བོའི་རྒྱ་གར་དང་གྷི་རིག་གམ་རོ་མ། རྒྱ་ནག་བཅས་ནི་སྐད་ཡིག་རིག་པའི་འབྱུང་གནས་གསུམ་དུ་འདོད་དེ།

རྒྱ་གར་འཕགས་ཡུལ་དུ་གནའ་བོའི་དུས་སུ་ལྷའི་དབང་བོས་མཛད་པའི་ཨིནྡྲ་བྱཱ་ཀ་ར་ཎ་ཞེས་པའི་བརྡ་སྤྲོད་ཀྱི་གཞུང་འཇིག་རྟེན་མི་ཡུལ་དུ་དར་བར་བཞེད་པ་དང་། དེའི་རྗེས་སུ་སྤྱི་ལོ་སྔོན་གྱི་དུས་རབས་བཞི་བ་ཡས་མས་སུ་བྱུང་བར་བཞེད་པའི་བྲམ་ཟེ་པ་ཎི་བས་རིག་བྱེད་ཀྱི་བསྟན་བཅོས་ཆེན་པོ་དག་སྒྲིག་དང་། སྔ་རབས་མཁས་པ་རྣམས་ཀྱི་དགོངས་པ་གཅིག་ཏུ་བཏུས་ཤིང་། དགོངས་འགྲེལ་མཛད་པའི་ཞོར་དུ་སྒྲའི་བསྟན་བཅོས་པ་ཎི་བའམ་ལེའུ་བརྒྱད་མ་བརྩམས་པར་གྲགས་པ་དག་ནི་འཛིམ་གླིང་སྟེང་ཆེས་སྔ་བའི་བརྡ་སྤྲོད་པའི་བསྟན་བཅོས་ཡིན།

༈གནའ་བོའི་གྷི་རིག་གི་མཁས་པ་ཨ་རི་སི་ཋར་ཁུ་སིས་རོ་མའི་ལོ་རྒྱུས་ཀྱི་སྙན་རྩོམ་རིང་མོ་རྩོམ་སྒྲིག་མཛད་པ་དང་བསྟུན། ཁོང་གི་སློབ་མ་ཏི་ཨེ་ནེ་ཞུས་ཐི་ལ་ཁི་སིས་མཛད་པའི་བརྡ་སྤྲོད་པའི་བསྟན་བཅོས་ནི་གྷི་རིག་གི་ཆེས་ཐོག་མའི་ཚད་ལྡན་གྱི་བརྡ་སྤྲོད་དུ་འདོད། དེ་བཞིན་དུ་གནའ་བོའི་རོ་མའི་མཁས་དབང་རྣམས་ཀྱིས་ཀྱང་གྷི་རིག་གི་ཉམས་མྱོང་ལྟར་ལ་ཋིན་སྐད་ལ་ཞིབ་དཔྱོད་གནང་བ་དང་། ཝ་རོས་མཛད་པའི་<<ལ་ཋིན་སྐད་ཀྱི་རྣམ་བཤད>>དང་། ཏོ་ཎ་ཐུ་སིས་མཛད་པའི་<<བརྡ་སྤྲོད་རིག་འཕྲུལ>>བཅས་ནི་ཀུན་གྱིས་ཁས་འཆེས་ཤིང་། ཡུན་རིང་ལ་བརྡ་སྤྲོད་པའི་ཁྲིད་གཞི་ཚད་ལྡན་དུ་བཀོལ་བ་ལྟར་ཡིན།

༈བོད་དུ་དུས་རབས་བདུན་པར་སློབ་དཔོན་ཐོན་མིས་བརྡ་སྤྲོད་པའི་བསྟན་བཅོས་བརྒྱད་མཛད་པ་ནས་བཟུང་། བཙན་པོ་ཁྲི་སྲོང་ལྡེ་བཙན་གྱི་དུས་སུ་ལོ་ཙཱ་བ་ལྕེ་ཁྱི་འབྲུག་གིས་མཛད་པར་གྲགས་པའི་<<གནས་བརྒྱད་ཆེན་མོ་རྩ་འགྲེལ>>དང་། དྲན་པ་ཡེ་ཤེས་གྲགས་པས་མཛད་པར་བཤད་པའི་<<དག་ཡིག་སྨྲ་སྒོ་མཚོན་ཆ>>དང་། དཔང་ལོས་བརྩམས་པའི་<<ཚོགས་གསུམ་གསལ་བ>>དང་། ས་སྐྱ་བསོད་ནམས་རྩེ་མོ་དང་ས་པཎ་གྱིས་མཛད་པའི་<<ཡི་གེ་བཀླག་ཐབས་བྱིས་པ་བདེ་བླག་ཏུ་འཇུག་པ་རྩ་འགྲེལ>>དང་། <<ཡི་གེའི་སྦྱོར་བ>>སོགས་གཙོར་བྱས། མཁས་དབང་དང་ལོ་ཙཱ་བ་རིམ་བྱོན་གྱིས་མཛད་པའི་བརྡ་དག་དང་བརྡ་སྤྲོད་པའི་བསྟན་བཅོས་མཐའ་ཡས་པར་བྱུང་ཞིང་། སུམ་རྟགས་དག་གསུམ་གྱི་རྩ་འགྲེལ་གྱི་གཞུང་ཕལ་མོ་ཆེ་རྣམས་སྐད་ཡིག་རང་སྟེང་གི་ཞིབ་འཇུག་ཙམ་དུ་མ་ཟད། ཆོས་སྲིད་ལུགས་གཉིས་ཀྱི་དགོས་དབང་དང་འགྲོ་བའི་རྣམ་རྟོག་གི་འཕྲོ་འདུའམ་སེམས་ཁམས་རིག་གནས་ཀྱི་འབྲེལ་འདྲིས་རྒྱུན་འཛིན་དང་བསྟུན། སྔ་དོན་ཕྱི་འགྲེལ་དང་སྔར་མེད་གསར་སྟོན་གྱིས་རྒྱས་པར་སྤེལ་བས། འཛམ་གླིང་གི་སྐད་ཡིག་རིག་པའི་ཁྱབ་ཁོངས་སུའང་མཛད་རྗེས་མི་དམན་པ་བཞག་ཡོད།

ཀ༽ ལོ་རྒྱུས་ཞིབ་སྡུར་སྐད་བརྡ་རིག་པ།

དུས་རབས་བཅུ་དགུ་བའི་དུས་མགོར། ནུབ་ཕྱོགས་ཀྱི་མཁས་དབང་རྣམ་པར་ལོ་རྒྱུས་ཞིབ་སྡུར་གྱི་དཔྱད་ཐབས་སྤྱད་དེ་འགྲོ་བ་མིའི་རིགས་ཀྱི་སྐད་ཆའི་བརྡ་ཐབས་ལ་ཞིབ་འཇུག་གནང་བ་ནས་བཟུང་། ལོ་རྒྱུས་ཞིབ་སྡུར་སྨྲ་བའི་སྐད་བརྡ་རིག་པ་བྱུང་བ་དང་། དེ་ནི་གསལ་བོར་བརྗོད་ན། དབྱིན་ཇིའི་མཁས་པ་འཇོན་སིས་གྷི་རིག་གི་སྐད་དང་། ལ་ཋིན་གྱི་སྐད། ལེགས་སྦྱར་གྱི་སོགས་ཕན་ཚུན་ཞིབ་ཏུ་བསྡུར་ནས་ཞིབ་འཇུག་གནང་བ་ལས་དེ་དག་གི་མཚུངས་ཆོས་ཐུན་མོང་བ་མང་དུ་རྟོགས་པ་དང་། ཡང་འཇར་མན་གྱི་མཁས་པ་སི་ལེ་ཀོར་གྱིས་ཀྱང་ལེགས་སྦྱར་སྐད་དང་། ཡོ་རོབ་གླིང་གི་སྐད་བརྡ་མང་ཙམ་ལ་དེ་མཚུངས་ཀྱི་དཔྱད་ཐབས་སྤྱད་དེ་ཕན་འབྲས་གང་ལེགས་བཏོན་པས། ཁོང་རྣམ་གཉིས་ཞིབ་སྡུར་བརྡ་སྤྲོད་ཀྱི་སྲོལ་འབྱེད་མཁན་དུ་གྲགས།

རྗེས་སུའང་རིམ་བྱོན་མཁས་པ་མང་བོ་སྟེ། ཌན་མག་གི་ལཱ་སི་ཁུ་དང་། འཇར་མན་གྱི་ཕོ་ཕུ་དང་ཀི་ལུན། ཨུ་རུ་སུའི་ཨི་ཐོ་ཁུ་ཧྥུ་བཅས་ཀྱིས་ཀྱང་སྐད་བརྡ་ཞིབ་སྡུར་གྱི་རྟོག་ཐབས་དང་དཔྱད་འབྲས་ལས་ཡོངས་གྲུབ་ཀྱི་ལྟ་ཚུལ་མང་དུ་བཏོན་ཞིང་། ལོ་རྒྱུས་ཞིབ་སྡུར་སྨྲ་བའི་སྐད་བརྡ་རིག་པར་རྨང་གཞི་ལེགས་པོ་བཏིང།

ཁ༽ སྤྱིར་བཏང་སྐད་བརྡ་རིག་པ།

དུས་རབས་བཅུ་དགུ་བའི་བར་སྐབས་སུ། འཇར་མན་གྱི་ཧོང་པོ་ཐི་དང་སུད་སིའི་སི་སོར་རྣམ་གཉིས་ཀྱིས་གཞུང་ལུགས་ཀྱི་ཐད་ནས་འགྲོ་བ་མིའི་རིགས་ཀྱི་སྐད་བརྡའི་སྤྱི་འགྲོས་ཀྱི་ཆོས་ཉིད་ལ་ཞིབ་འཇུག་གནང་བ་ནས་བཟུང་། སྤྱིར་བཏང་སྐད་བརྡ་རིག་པ་དབུ་བརྙེས། ཁྱད་པར་དུ་མཁས་དབང་སུ་སོར་ཉིས་ཀྱིས་<<སྤྱིར་བཏང་སྐད་བརྡ་རིག་པའི་གཞུང>>དུ། སྐད་ཆ་དང་སྐ་ཅ། འཕྲེད་ངོས་དང་གཞུང་ངོས། ནང་ཁུལ་དང་ཕྱི་ཁུལ། འཕྲེད་སྦྱོར་དང་གཞུང་འདུས་བཅས་ཀྱི་ཁྱད་པར་དང་འབྲེལ་བ་ལེགས་པར་བསྟན་ཞིང་། ཁོང་ཉིད་ཀྱི་སྐད་བརྡའི་ལྟ་ཚུལ་ཉིང་བསྡུས་སུ་མཚོན་པ་འདིས་སྐད་བརྡ་རིག་པའི་འཕེལ་རྒྱས་ཀྱི་ལོ་རྒྱུས་སྟེང་དགེ་མཚན་མཆོག་ཏུ་ཐོན་ཡོད།

ག༽  སྒྲིག་གཞི་རིང་ལུགས་ཀྱི་སྐད་བརྡ་རིག་པ།

སུ་སོར་གྱི་སྤྱིར་བཏང་སྐད་བརྡ་རིག་པའི་གཞུང་གི་ཤུགས་རྐྱེན་ལས། སེམས་ཁམས་སྤྱི་ཚོགས་སྨྲ་བ་དང་། སྒྲིག་གཞི་སྨྲ་བ་བཅས་སྐད་བརྡ་རིག་པའི་གྲུབ་མཐའ་གཉིས་བྱུང་ཞིང་། ཕྱི་མ་ལའང་པུ་ལ་ཀིས་གཙོས་བྱེད་ནུས་སྨྲ་བ་དང་། ཁོ་ཕན་ཧེ་རྒན་གྱིས་གཙོས་བརྡ་རྟགས་སྨྲ་བ་དང་། ཨ་རིས་གཙོས་ཞིབ་འབྲི་སྨྲ་བ་བཅས་རིང་ལུགས་གསུམ་ཙམ་བྱུང་། འདི་དག་ལ་སྐད་བརྡ་རིག་པའི་ལོ་རྒྱུས་སྟེང་དུ། སྒྲིག་གཞི་རིང་ལུགས་ཀྱི་སྐད་བརྡ་རིག་པ་ཞེས་གྲགས།

ང༽  བརྗེ་གྲུབ་བརྡ་སྤྲོད་སྨྲ་བ།

ཨ་རིའི་མཁས་པ་ཆོམ་སི་ཀིས་རྩིས་རིག་གཏན་ཚིགས་སོགས་ལ་བརྟེན་ནས་བརྗེ་གྲུབ་བརྡ་སྤྱོད་སྨྲ་བའི་སྲོལ་བཏོད་དེ། སྒྲིག་གཞི་སྨྲ་བ་རྣམས་ཀྱི་ཕྱི་ངོས་ཀྱི་སྒྲིག་གཞི་གཙོ་ཞིང་གཏིང་རིམ་གྱི་སྒྲིག་གཞིར་སྣང་ཆུང་བྱས་པའི་ཞན་ཆ་ཁྱད་དུ་བསད་ཅིང་། བརྡ་དོན་གྱི་བརྗེ་སྤོར་དང་གྲུབ་སྟངས་དག་རྣམ་པ་མངོན་གསལ་ཅན་གྱི་བརྡ་རྟགས་ལས་མཚོན་པས་ན། འདི་ལ་རྣམ་པའི་སྐད་བརྡ་རིག་པ་ཞེས་ཀྱང་བྱའོ།།

༈དེང་དུས་ཀྱི་སྤྱི་ཚོགས་འཕེལ་རྒྱས་དང་བསྟུན་ནས། སྐད་བརྡ་རིག་པ་ནི་གཞན་པའི་སྤྱི་ཚོགས་ཚན་རིག་དང་། རང་བྱུང་ཚན་རིག་ལ་བསྣོལ་མར་འབྲེལ་ནས་བསྡུས་གྲུབ་ཀྱི་རིག་པ་སྣ་ཙོགས་པའི་ཚུལ་མངོན་ཡོད་དེ། དཔེར་ན། སྤྱི་ཚོགས་སྐད་བརྡ་རིག་པ་དང་། སེམས་ཁམས་སྐད་བརྡ་རིག་པ། རིག་གནས་སྐད་བརྡ་རིག་པ། རྩིས་ལུགས་སྐད་བརྡ་རིག་པ་སོགས་མང་བོ་སྣང་བ་རྣམས་བསྡུས་གྲུབ་སྐད་བརྡ་རིག་པའི་དུས་རིམ་དུ་ངེས་སོ། །

མདོར་ན། སྐད་བརྡ་རིག་པའི་འཕེལ་རྒྱས་ཀྱི་གོམ་ཁ་ནི་ནམ་ཡང་འཇགས་མཚམས་མེད་པར་ད་ལྟའི་བར་དུ་སྐད་ཡིག་རིག་པ་དང་། ལོ་རྒྱུས་ཞིབ་སྡུར་སྨྲ་བ། སྒྲིག་གཞི་སྨྲ་བ། བརྗེ་གྲུབ་བརྡ་སྤྲོད་སྨྲ་བ། བསྡུས་གྲུབ་སྐད་བརྡ་རིག་པ་བཅས་དུས་རིམ་ཆེན་པོ་ལྔ་བརྒྱུད་པ་དང་། དུས་རབས་ད་ལྟའང་གཞན་པའི་རིག་གཞུང་སྣ་ཚོགས་དང་སྦྲེལ་ཏེ་འཕེལ་བཞིན་པ་ལྟར་རོ།།