ལེགས་སྦྱར་གཅེས་པའི་གནད་བསྡུས།

  

ལེགས་སྦྱར་གཅེས་པའི་གནད་བསྡུས་མགྲིན་པའི་ལྕགས་སྒྲོགས་རང་གྲོལ་ཞེས་བྱ་བ་བཞུགས་སོ། །

 

ཀུན་མཁྱེན་འཇམ་དབྱངས་བཞད་པ།

 

ན་མཿ སྭ་ར་སྭ་སྟྱཻ། གང་ཞིག་ཤེས་པ་ཡིས་ཀྱང་སྒྲ་རིག་སྨྲ་རྣམས་ཀྱི། །མགྲིན་པ་འཆིང་བའི་སྒྲོག་ནི་རང་སར་གྲོལ་བྱེད་མཁན། །ཡིག་སོགས་བཅུ་ཕྲག་དོན་འདི་ཐབས་མཁས་ལྡེ་མིག་སྟེ། །ཇི་བཞིན་འཆད་པོ་འདི་ན་ཉེ་བར་བཞུགས་སོ་ཀྱཻ། །བློ་གྲོས་གོམ་གྱིས་བཅལ་ཚེ་ཤེས་བྱའི་ཁྱོན། །རྡུལ་གཅིག་གོ་སར་བསྒྲིལ་བའི་སྒྱུ་མ་མཁན། །རྨོངས་པའི་སྟོབས་ལྡན་ས་འོག་འཆིང་བྱེད་པའི། །ཀུན་ལས་རྣམ་པར་རྒྱལ་བ་འདི་ངོ་མཚར། །

བརྗེད་བྱང་བདུད་རྩིའི་ཐིགས་པའི་སྙིང་བོ་ལས། །སྡོམ་ནི། ཡི་གེ་བྱིངས་དང་རྐྱེན་དང་རྟགས་། །མིང་ཚིག་ཉེར་བསྒྱུར་ཨཱ་ག་མ། །མི་ཟད་རྗེས་འབྲེལ་རྣམ་འགྱུར་དང་། །ཚིག་སྡུད་ཅེས་བྱ་བཅུ་གཉིས་སོ། །

    ༈ དང་བོ་ནི། སྐྱེ་བའི་གནས་ནི། མགྲིན་པ་རྐན་དང་སྤྱི་བོ་སོ། །མཆུ་དང་སྣ་ཡི་གནས་ཏེ་དྲུག །སྨྲ་སྒོ་སོགས་སུ་ཁོག་པ་དང༌། །ལྕེ་སྟེ་བརྒྱད་དུ་འདྲེན་པ་ཡང༌། །ཁོག་པ་ནི་ཐུན་མོང་བ་དང༌། ལྕེ་ནི་སྤྱིའི་བྱེད་པ་འཇུག་པའི་གཞི་ཡིན་གྱི་གནས་སུ་མི་རིགས་སོ་ཞེས་དཔལ་ལྡན་བླ་མ་དམ་པ་གསུངས་སོ། །ཞེས་དང༌། ངོ་བོ་ནི། སྨྲ་སྒོ་ལས། རྣམ་གྲངས་འགྱུར་བ་མེད་པ་དང༌། །མིང་ཚིག་གསལ་བར་བྱེད་པ་དང༌། །དོན་རྣམས་རྗོད་པར་བྱེད་པའི་ཕྱིར། །ཡི་གེ་ཞེས་ནི་བརྗོད་པ་ཡིན། །ཞེས་གསུངས་པའི་དོན། ཨ་ཀྵ་ར། བྱཉྫ། ཝརྞ། ཞེས་པའོ། ། དབྱེ་བ་ནི། ཀ་ལཱ་བར། དབྱངས་གསལ་གཉིས། ཙནྡྲ་བར། ཨཙ྄་དང༌། ཧལ྄་དང་གཉིས་སུ་བྱེད། གཞན་ཡང་གསལ་བྱེད་ཀྱི་ཡི་གེ །མིང་ཡིག། ཕོ་ཡིག། ཕྱི་ཡིག་རྣམས་དོན་གཅིག ། དབྱངས་ཡིག། སྒྲའི་ཡི་གེ། མོ་ཡིག། ནང་ཡིག་རྣམས་དོན་འདྲ་སྟེ། སྨྲ་སྒོ་ལས། ཀ་སོགས་སྡེ་ནས་རིམ་བཞིན་དུ། །སྡེ་ལྔ་དག་དང་ཨནྟ་སྠ། །ཨུཥྨ་ཎ་དང་མཐར་ཟད་དེ། །གནས་ཀྱི་ཡི་གེ་སུམ་བཅུ་བཞི། །མིང་དང་ཕོ་ཞེས་གྲགས་པ་སྟེ། །ཞེས་དང༌། མུན་སྒྲོན་ལས། སྡེ་ཚན་བརྒྱད་དང་ཕོ་ཡིག་དང༌། །མོ་ཡིག་མ་ནིང་ཡི་གེ་རྣམས། །ཞེས་སོ། །འདིའི་དོན་གཅིག་ལུགས་མི་འཐད་པ་འདྲ། ཀྲྀ་ཀྲི། གཉིས་ལ། སྔ་མ་ཁ་ཅིག་ཀ་རྀ་དང་ཀྲི་ཞེས་རིམ་བཞིན་འདོན། སྔ་མ་ཕྲལ་བ་མི་འཐད་པ་དང༌། ཕྱི་མ་ཕྲལ་དགོས་པ་ལ་མ་བྲལ་བའི་སྐྱོན་དང༌། ཡང་ཁ་ཅིག་སྔ་མ་ཀི་རྀ་དང༌། ཕྱི་མ་ཀ་རི་ཞེས་འདོན་པ་ཡང་སྔ་མ་ཕྲལ་མི་རིགས་ཏེ་གསལ་བྱེད་གཅིག་གི་ཁོག་ཏུ་དབྱངས་གཅིག་ལས་མེད་པའི་ཕྱིར་གསུངས་ཤིང༌། གསལ་བྱེད་གཅིག་ལ་ཨཻ་ཀེ་ཤ་ཅན་ཞུགས་ན་ཨེ་ཨེ་ཞེས། ཀློག་མི་རིགས་པར་ཐལ་བ་ལ་མི་མཚུངས་ཏེ། ཨིའི་ཡོན་ཏན་ཨེ་དང་འཕེལ་བ་ཨཻ་ཀེ་ཤ་ཅན་དུ་འགྱུར་ལ། ཨིའི་ཡོན་ཏན་འཕེལ་བ་རྀ་རུ་འགྱུར་བའི་སྐབས་མེད་པའི་ཕྱིར་གསུངས་སོ། །ཏཱ་ར་ནཱ་ཐའི་རྗེས་འབྲང་ཁ་ཅིག། ཨ་ཨི་ཨུ་རྀ་ལྀ་ལྔ་དབྱངས་ཀྱི་ཆར་གྲགས་ཤིང༌། དེ་དག་ལས་ཨ་ཐུང་གི་ཡོན་ཏན་རང་གནས་ཉིད་ཡིན་ཞིང༌། གཞན་རྣམས་ཕ་རོལ་རྐྱེན་ཀྱི་ཁྱད་པར་ལ་བརྟེན་ནས་ཨི་ནི་ཨེ། ཨུ་ནི་ཨོ། རྀ་ནི་ཨར྄། ལྀ་ནི་ཨལ྄་རྣམས་སུ་འགྱུར་བ་ལ་ཡོན་ཏན་གྱི་མིང་ཅན་དང༌། དེ་བཞིན་དུ་ཨ་ནི་ཨཱ་དང༌། ཨི་ནི་ཨཻ། ཨུ་ནི་ཨཽ། །རྀ་ནི་ཨཱར྄་རྣམས་སུ་འགྱུར་བ་ལ་འཕེལ་བ་ཞེས་འདོད་པ་ཡིན་ཞེས་གསུངས། ཡི་གེ་སོང༌།

    ༈ གཉིས་པ་བྱིངས་ནི། སྐད་དོད་དྷཱ་ཏུ་སྟེ། དོན་བརྒྱད་ལ་འཇུག་པ་ནི། འཆི་མེད་མཛོད་ལས། བད་ཀན་སོགས་དང་རོ་དང་ནི། །ཁྲག་སོགས་འབྱུང་བ་ཆེན་པོ་དང༌། །དེ་ཡི་ཡོན་ཏན་དབང་བོ་ལྔ། །རྡོ་ཡི་བྱེ་བྲག་སྒྲ་སྐྱེ་གནས། །དྷཱ་ཏུ་ཡིན་ཏེ་ཁམས་ཞེས་བྱ། །ཞེས་དང༌། གཞན་ཡང༌། ཆོས་དབྱིངས་སོགས་དུ་མ་ལ་འཇུག། དེའི་ངོ་བོ་ནི། བྱ་བ་རྟོགས་བྱེད་ནི་བྱིངས་སོ། །ཞེས་པ་ལྟར། དེ་ཡང་གྲུབ་ཟིན་གྱི་དོན་གང་དང་ཡང་མ་འབྲེལ་བར་བསྒྲུབ་པར་བྱ་བའི་གཞི་ཙམ་ཞིག་གོ་བར་བྱེད་པ་སྟེ། དཔེར་མཚོན་ན། ཌུཔཙཥ྄་འཚེད་པ་ལའོ། །ཞེས་པའི་བྱིངས་ཀྱི་ཐོག་མཐའ་གཉིས་རྗེས་འབྲེལ་ཡིན་པས་ཕྱིས། དེའི་ཚེ་འཚེད་པའི་སྒྲ་དེ་ལས་སུ་བྱ་བ་འབྲས་བུ་དང༌། བྱེད་པ་མེ། བྱེད་པ་བོ་སྐྱེས་བུ་ལྟ་བུ་ལ་འཇུག་པའི་གཞི་གང་ཡང་གོ་བར་མི་བྱེད་པར། འཚེད་པའི་བྱ་བ་ཙམ་ཞིག་གོ་བར་བྱེད་ལ། དེ་ཉིད་རྐྱེན་གྱིས་བསྒྱུར་ན། མིང་ཚིག་མཐའ་ཡས་པའི་ཚོགས་སུ་འགྱུར་ལ། ས་བོན་གྱི་དོན་གྱི་ཁམས་ཞེས་ཀྱང་བྱ། རྐྱེན་སོགས་ཀྱིས་བསྒྱུར་བའི་མིང་ཚིག་རྣམས་ལ་དེ་ལ་ལྟོས་པའི་རྣམ་དབྱེ་ཞེས་བྱའོ། །དབྱེ་བ་ལ། མདོའི། མིང་གི །གླེགས་བམ་གྱི། དེ་ལས་གཞན་པའི་བྱིངས་དང་བཞི། དང་བོ་ནི། མཉྫུ་དང༌། རཏྣ་ལྟ་བུ་བསྒྲུབ་པའི་ཚེ། མཉྫུ་མདོའི་བྱིངས་སོ། །ཞེས་དང༌། ར་ཏི་མདོའི་བྱིངས་སོ། །ཞེས་པ་ལ་སོགས་པའོ། །གཉིས་པ་ནི། བྱིངས་ལས་མིང་དུ་བསྒྲུབ་པའི་ཚེ། ཀྭིཔ྄་བྱིན། རྐྱེན་རང་གི་བྱ་བ་བྱས་འཁོར་བཅས་ཞིག་ནས་རང་རང་གི་ཟླ་མེད་དུ་གནས་པའི་བྱིངས་ལྟ་བུ་སྟེ། སློབ་ཕན་ལས། ཀྭིཔ྄་མཐའ་ཅན་ནི་བྱིངས་མཐའ་ཅན་དུ་གཏོགས་པ་མ་ཡིན་ཞིང༌། རྟགས་ཉིད་དུའང་རྟོགས་པར་བྱེད་དོ། །ཞེས་གསུངས། གསུམ་པ་ནི། ད་ལྟ་ཡོངས་སུ་གྲགས་པ་ཀ་ལཱ་བའི་བྱིངས་མདོ་ལྟ་བུ་སྟེ། དུརྒ་སིངྷས་སྦྱར་བ་ཡི། །དགུ་ཡི་གྲངས་ཀྱི་བྱིངས་ཀྱི་གཞུང༌། དེ་ནི་སུམ་ཅུ་རྩ་ལྔ་ཡིས། །ལྷག་པའི་སུམ་བརྒྱར་ཤེས་པར་བྱ། །ཞེས་གསུངས་པ་ལྟར། བྷཱུ་སོགས་དང༌། ཨད྄་སོགས་དང༌། དིཝ྄་སོགས། སུ་སོགས། རུ་ཏ་སོགས། རུ་དྷ་སོགས། ཏ་ན་སོགས། ཀྲཱི་སོགས། ཙུར྄་སོགས་དང་སྡེ་ཚན་དགུའོ། །དེ་ལྟར་དགུར་བསྡུས་པའི་གཙོ་བོ་ནི། བི་ཀ་ར་ཎ་བདུན་གྱི་འབྱུང་བ་ཤེས་པའི་ཕྱིར་ཡིན་ལ། དེ་ཡང༌། བྷཱུ་སོགས། ཨད྄་སོགས། རུད྄་སོགས། ཙུར྄་སོགས་བཞི་ལ་ཨན྄་བི་ཀ་ར་ཎ་འབྱུང༌། དི་ཝ་སོགས་ལ་ཡན྄། སུ་སོགས་ལ་ནུ། ཏ་ན་སོགས་ལ་ཨུ། ཀྲཱི་སོགས་ལ་ན། རུ་ངྷ་སོགས་ལ་ན་བི་ཀ་ར་ཎ་འབྱུང་ལ་བི་ཀ་ར་ཎ་སྟེར་བ་ཡང༌། བྱིངས་ཐམས་ཅད་པའི་རྣམ་དབྱེ་ལ་ངེས་པར་ལྟོས་དགོས་ཀྱི། རྣམ་དབྱེ་མེད་པས་ནི་མ་ཡིན་ཏེ། བྱིངས་ཐམས་ཅད་པ་ལ་ཡ་ཎའོ། །བྱེད་པ་བོ་ལ་ཨཏ྄་པི་ཀ་ར་ཎའོ། །བྱེད་པ་བོ་མེད་པ་ལ་ཨན྄་སྟེ། ལ་བི་ཀ་ར་ཎའོ། །ཞེས་སོགས་འབྱུང་ལ་བྱིངས་ཐམས་ཅད་པ་ཞེས་པ་ཐོག་མའི་གསལ་བྱེད་ཡིན་པའི་ཕྱིར། སྡེ་ཚན་དགུར་ཕྱེ་བ་ཡང་ཚོགས་ཆེ་བའི་དབང་དུ་བྱས་ཀྱི། བྷཱུ་སོགས་ལྟ་བུ་ནང་ཚན་སོ་སོ་ལ་ཡང༌། ཌུ་ཏ་སོགས། གྷ་ཊ་སོགས། ཛྭ་ལ་སོགས། ཡཛ྄་སོགས་མང་དུ་ཡོད་དོ། །བཞི་བ་ནི། སན྄་སོགས་བདུན་དུ་གྲགས་པ་སྟེ། གུཔ྄། ཏིཔ྄། ཀིཏ྄་རྣམས་ལས་སན྄འོ། །ཞེས་དང༌། མིང་ལས་བདག་ཉིད་འདོད་པ་ལ་ཡིན྄འོ། །ཞེས་སོགས། སན྄། ཡིན྄། ཀཱ་མྱ། ཨཱ་ཡི། ཨིན྄། ཡ་སྒྲ། ཨཱ་ཡ་རྣམས་ཏེ། མདོ་ཉིད་ལས། དེ་རྣམས་བྱིངས་སོ་ཞེས་བཤད་དོ། །

    ༈ གསུམ་པ་རྐྱེན་ནི། འགྲེལ་བ་ལས། མངོན་པར་འགྲུབ་པའི་དོན་གྱིས་རྐྱེན་ནོ། །ཞེས་སོ། །དེའི་དོན་ནི། ས་བོན་ལས་མྱུ་གུ་འགྲུབ་པ་རྐྱེན་ཆུ་ལུད་སོགས་ལ་ལྟོས་པ་བཞིན་དུ། ས་བོན་ཁམས་ཀྱི་དོན་ཅན་གྱི་བྱིངས་ལས་མིང་ཚིག་སོགས་མངོན་པར་འགྲུབ་པར་བྱེད་པ་བོ་ལ་རྐྱེན་ཅེས་གདགས་སུ་རུང་ངོ༌། །དབྱེ་ན་རྣམ་དབྱེ་དང་རྣམ་དབྱེ་མིན་པའི་རྐྱེན་གཉིས། དང་བོ་ལ། དངོས་དང༌། མིང་ཅན་གཉིས། དང་བོ་ནི། བྱིངས་དང་རྣམ་དབྱེ་བོར་བའི་དོན་དང་ལྡན་པ་རྟགས་སོ། །ཞེས་མིང་གི་དུས་སུ་དོན་ལྡན་ཙམ་ཡོད་ཀྱང༌། སི་སོགས་ཀྱིས་ཁྱད་པར་དུ་འབྱེད་པས་རྣམ་དབྱེ་ཞེས་དང༌། བྱ་བ་རྟོགས་བྱེད་ནི་བྱིངས་སོ། །ཞེས་བྱིངས་ཀྱི་དུས་སུ་བྱ་བ་ཙམ་མཚོན་ནས་ཀྱང༌། དུས་ལའོ། །ཞེས་ད་ལྟར་བ་སོགས་ཀྱི་བྱེ་བྲག་འབྱེད་པའི་རྣམ་དབྱེ་ཞེས་རྣམ་པ་ཀུན་ཏུ་ཤེས་པར་བྱ་རྒྱུ་ཡིན་ལ། དེ་ཉིད་ལ་སི་སོགས་དང༌། ཏི་སོགས་གཉིས་སུ་ངེས་སོ། །གཉིས་པ་མིང་ཅན་ནི། འདི་ནས་ཕྱི་མར་འཆད་པ་གང༌། །རྣམ་དབྱེའི་མིང་དུ་ཤེས་པར་བྱ། །ཞེས་སོགས་སོ། །གཉིས་པ་རྣམ་དབྱེ་མིན་པའི་རྐྱེན་ལ། མིང་དུ་བསྒྲུབ་པའི་རྐྱེན་དང་། ཏི་སོགས་དང་འབྲེལ་བའི་རྐྱེན་ནོ། །དང་བོ་ལ་མིང་ཙམ་དུ་བསྒྲུབ་པ་ཀྲྀཏ྄འི་རྐྱེན་དང༌། དེའི་སྟེང་དུ་ཁྱད་ཆོས་གཞན་བསྒྲུབ་པ་དེ་ཕན་གྱི་རྐྱེན་དང༌། མོ་རྟགས་ཀྱི་རྐྱེན་རྣམས་སོ། །དང་བོ། བྱིངས་ལས་མིང་བསྒྲུབ་ཀྲྀཏ྄འི་རྐྱེན། །ཞེས་པ་ལྟར། གམླི་འགྲོ་བ་ལའོ། །ཞེས་པའི་བྱིངས་ལ། ག་མི་ལས་ཌོའོ། །ཞེས་པས་ཀྲིཏ྄འི་རྐྱེན་བྱིན་པས་གོ་ཞེས་པའི་མིང་ཙམ་འགྲུབ་བོ། །གཉིས་པ་ནི། མིང་དང་རང་ལས་འབྲེལ་བ་ཡི། །མིང་གཞན་བསྒྲུབ་པ་དེ་ཕན་རྐྱེན། །ཅེས་གསུངས་པ་ལྟར། དངོས་པོ་ལ་ཏ་ཏྭ་དག་གོ །ཞེས་པས་དེ་ཕན་གྱི་རྐྱེན་བྱིན་པས་ཁྱད་ཆོས་གོ་ཉིད་ཅེས་པའི་མིང་འགྲུབ་བོ། །གསུམ་པ་ནི། བུད་མེད་ལས་ཨ་ལས་ཨཱཔ྄འོ། །ཞེས་སོ། །གཉིས་པ་ནི། སན྄་སོགས་བདུན། བི་ཀ་ར་ཎ་བདུན། ཨི་དཾ་སོགས་བདུན་ཡང་རུང༌ངོ་། །

    ༈ བཞི་བ་རྟགས་བཤད་པ་ལ། འཆི་མེད་མཛོད་ལས། ཤེས་བྱ་ཕོ་མོ་མ་ནིང་ལ། །ཕལ་ཆེར་གཟུགས་ཀྱིས་དབྱེ་བ་དང༌། །ཁ་ཅིག་ལྷན་ཅིག་སྤྱོད་ལས་ཀྱང༌། །ལ་ལར་དེ་ཁྱད་སྒྲུབ་ལ་སོགས། །ཞེས་མདོར་བསྡུས་ནས་གསུངས་ལ། དེའི་དོན་ནི། མིང་གཅིག་དོན་མང་སྟོན་པ་དང༌། །དོན་གཅིག་རྣམ་གྲངས་མང་བོ་ཅན། །ཞེས་སོགས་ཀྱི་སྒོ་ནས་མིང་དང་རྟགས་གསུམ་རྣམ་གཞག་རྒྱས་པར་གཏན་ལ་འབེབས་ཤིང༌། དེ་ལ་རྟགས་གསུམ་མ་འདྲེས་པ་དང༌། འདྲེས་པའི་ཚུལ་ལོ། །དང་བོ་ནི། ཕལ་ཆེར་གཟུགས་ཀྱིས་དབྱེ་བ་དང༌། །ཞེས་པའི་རྐང་བ་གསུམ་གྱིས་སྟོན་ཏེ། ཤྲདྡྷཱ་དང༌། ནཱ་དཱ་སོགས་མོ་རྟགས་གཟུགས་ཀྱིས་འབྱེད་པ་དང༌། སྐབས་ཁ་ཅིག་ཏུ། ཟླ་བོའི་སྟོབས་ཀྱིས་ཤེས་ཏེ། པུཥྤཾ་མ་ནིང་གི་རྟགས་སུ་ཤེས་པས། དྷུ་པཾ་སོགས་ཀྱང་མཚོན་ནུས་པ་དང༌། ལ་ལར་རྟགས་ཀྱི་རྣམ་གཞག་ཁྱད་པར་དང་བཅས་ཏེ་རྒྱས་པར་འཆད་དོ། །ཞེས་པའོ། །གཉིས་པ་ནི། རྟགས་གསུམ་པ་ལ་གསུམ་ཞེས་བྱ། །ཞེས་པས་གསུམ་ཞེས་པའི་བརྡས་མཚོན་པ་དང༌། འཁྲིག་པའི་ཚིག་ལ་གཉིས་ཞེས་བྱ། །ཞེས་པས་ཕོ་དང་མོ་འདྲེས་ཞེས་པ་དང༌། རྟགས་བཀག་པ་ལྷག་མའི་དོན་ཡིན་ཞེས་པས་ཕོ་ཡིན་ཞེས་པ་ལྟ་བུ། མོ་མ་ནིང་གཉིས་མཚོན་པར་ནུས་པ་སོགས་སོ། །རྒྱུ་མ་མཐའ་དང་ཞེས་པ་ལ། །རྒྱུ་ནི་དབྱེ་བ་དམིགས་འཛིན་པ། །ཞེས་པ་ལྟར་གོང་འོག་གི་དམིགས་འཛིན་དང༌། ཨ་ཐ་དང་བོ་སྔོན་ཆ་མིན། །ཞེས་པས་གོང་མ་རྣམས་སྤངས་ནས་འདི་མན་ཆད་ཅེས་པ་ལྟ་བུའི་ས་གཅོད་པར་བྱེད་དོ། །

    ༈ ལྔ་བ་མིང་བཤད་པ་ལ། སྨྲ་སྒོ་ལས། ཇི་ལྟར་རྡུལ་ལས་གོང་བུ་བཞིན། །ཡི་གེ་འདུས་པར་གྱུར་བ་ན། །གང་ཞིག་རྣམ་ཆ་འདུས་པ་ཡིས། །དོན་གྱི་ངོ་བོ་ཉིད་བརྗོད་ན། །རྣམ་ཆ་མང་ངམ་ཉུང་གྱུར་ཡང༌། །དེ་ནི་མིང་ཞེས་རབ་ཏུ་བརྗོད། །ཅེས་དང༌། གསལ་བ་ལས་ཀྱང༌། ཡི་གེ་གཉིས་སམ་མང་འདུས་པ། །དོན་གྱི་ངོ་བོ་རྗོད་བྱེད་པ། །མིང་ཡིན་དོན་ལ་བློ་གཞོལ་ཕྱིར། །དེ་ཡང་དངོས་དང་བཏགས་པ། ཞེས་སོ། །འདི་ལ་ཡི་གེ་འདུས་པ་མི་དགོས་ཏེ། ཨ་ཁྱབ་འཇུག །ཨི་བདུད། ཨུ་དབང་ཕྱུག་གི་མིང་ཡིན་པའི་ཕྱིར། །

    ༈ དྲུག་པ་ཚིག་ནི། སྨྲ་སྒོ་ལས། གལ་ཏེ་མིང་གཉིས་འདུས་པའམ། །འོན་ཏེ་མང་བོ་འདུས་ཀྱང་རུང༌། །དེ་དག་ཁྱད་པར་རྗོད་བྱེད་ན། །ཚིག་ཅེས་རབ་ཏུ་བརྗོད་པ་དེ། །ཕྲད་རྣམས་དག་དང་བཅས་པའང་ཡིན། །ཞེས་དང༌། གསལ་བ་ལས། མིང་གཉིས་སམ་ནི་མང་ཡང་རུང༌། །དོན་གྱི་ཁྱད་པར་རྗོད་བྱེད་པ། །དམ་ཆོས་མངོན་པར་གསུངས་པ་ཡི། །ཚིག་ཡིན་ཡི་གེ་འདུས་པ་ཉིད། །ཅེས་ཕྱི་མ་འདིས་མངོན་པའི་ལུགས་ཀྱི་ཚིག་བཤད། བྱཱ་ཀ་ར་ཎའི་ཚུལ་ནི། གསལ་བ་ལས། མིང་ལ་རྣམ་དབྱེ་བརྒྱད་ཕྱེ་བ། །ཉི་ཤུ་རྩ་བཞིར་སྦྱར་བ་དང༌། །བྱིངས་ལ་ཏི་སོགས་སྦྱར་བ་ཡིས། །རང་རང་དོན་རྣམས་སྟོན་བྱེད་ཚིག །ཅེས་སོ། །རྣམ་དབྱེ་བརྒྱད་ཀྱང༌། གསལ་བ་ལས། དངོས་པོ་ལས་དང་བྱེད་པ་ཆེད། །འབྱུང་ཁུངས་འབྲེལ་བ་རྟེན་གཞི་དང༌། །བོད་པའི་དོན་ལ་རྣམ་དབྱེ་བརྒྱད། །རེ་རེའང་གཅིག་གཉིས་མང་ཚིག་གསུམ། །ཞེས་སོ། །ལོ་ཙཱ་བ་ཆེན་པོ་ནམ་མཁའ་བཟང་བོའི་གསུང་ལས། བདུན་པོ་མ་གཏོགས་བརྒྱད་པ་འབོད་པ་ཞེས་པ་ཚད་ལྡན་གྱི་གཞུང་གང་ལས་ཀྱང་མི་འབྱུང་ཞིང༌། བོད་པ་ལའང་དང་བོའི་རྣམ་དབྱེ་འབའ་ཞིག་སྟེར་བར་བཤད་པའི་ཕྱིར། རྣམ་དབྱེ་བརྒྱད་པ་ཟུར་དུ་འཆད་མི་རིགས་སོ། །ཞེས་གསུངས་སོ། །

     ༈ བདུན་པ་ཉེར་བསྒྱུར་ནི། ངོ་བོ་ལ། པྲ། པཱ་ར། ནི། ནིར྄། ཨུཏ྄། དུར྄། སཾ། བི། ཨ་པ། ཨ་ནུ། པ་རི། ཨ་བྷི། ཨ་ངྷི༌། པྲ་ཏི། སུ། ཨཱང྄༌། ཨ་ཏི། ཨ་བ། ཨ་པི། ཨུ་པ་རྣམས་ནི་ངོ་བོའི་གྲངས་སོ། །ཞེས་དང༌། ཏཱ་ར་ནཱ་ཐཱའི་རྗེས་འབྲང་གིས་གསུངས་པའི་ཉེར་བསྒྱུར་ནི་ཉི་ཤུ་འབྱུང་སྟེ།

པྲ་(རབ)པཱ་ར་(མཆོག)ནི་(བྲལ་བ)ནིར྄་(ངེས་པ)ཨུཏ྄་(ཤིན་ཏུ)དུར྄་(ངན་པ)སཾ་(ཡང་དག)།། 

བི་(རྣམ་པར)དང་ཨ་པ་(ངེས་པར)ཨ་ནུ་(རྗེས་སུ)པ་རི་(ཡོངས་སུ)དང༌།།

ཨ་བྷི་(མངོན་པར)ཨ་དྷི་(ལྷག་པར)པྲ་ཏི་(སོ་སོ)སུ་(བདེ)དང་ཨཱང྄༌(ཀུན)།། 

ཨ་ཧི་(ཤིན་ཏུ)ཨ་བ་(བྲལ་བ)ཨ་པི་(ཀྱང་འང)ཨུ་པ(ཉེ་བ)འོ།། ཞེས་སོ། །འདི་ལ་དོགས་པ་ནི། པྲ་སོགས་ཉེར་བསྒྱུར་བརྗོད་དོན་དང་མི་ལྡན་ན་དོན་བཅུ་བདུན་ལ་འཇུག་པ་སོགས་མི་རིགས་ལ། ལྡན་ན་བྱིངས་སམ། རྟགས་སམ། ཚིག་གསུམ་པོ་གང་ཡིན་སྙམ་མོ། །དེ་ལ་བརྡའ་སྤྲོད་པ་ཆེན་པོ་དབང་བོས་བྱིན་གྱིས་མཛད་པའི་འགྲེལ་བ་ལས། གསུམ་པོ་གང་ཡང་མ་ཡིན་ཞིང་མིང་ཚིག་ལ་ཕན་པ་སྦྱོར་བའི་བརྗོད་བྱ་རྒྱ་ཆེ་བ་ཞིག་ཡིན་ཞེས་བཤད་པར་བྱེད་དོ། །དེ་ཉིད་ལས། འཆད་པར་འགྱུར་བའི་ཉེར་བསྒྱུར་རྣམས་ནི་བྱིངས་མ་ཡིན་ཞིང་རྟགས་མ་ཡིན་ལ་ཚིག་མ་ཡིན་ཞིང་མིང་དང་ཀུན་བཤད་ཀྱི་ཁྱད་པར་དག་ལ་དོན་སྣ་ཚོགས་སྨྲ་བ་སྟེ། པྲ་ལ་སོགས་པ་ཉི་ཤུ་བོ་འདི་ཉེར་བསྒྱུར་རྣམས་སུ་འགྱུར་རོ། །ཞེས་མདོར་བསྟན་ནས་དེ་ཉིད་འཆད་པ་ནི། དེ་ཉིད་ལས། དེ་ལ་ལྷག་མ་རྣམས་སམ་དེ་ལྟ་བུ་རྣམས་ཀྱི་ནང་དུ་མ་འདུས་པའི་ཕྱིར་བྱིངས་མ་ཡིན་ནོ། །བུད་མེད་དང༌། སྐྱེས་པ་དང༌། མ་ནིང་གི་རྟགས་རྣམས་ཀྱི་ཕྱི་རོལ་ཏུ་གྱུར་བའི་ཕྱིར་རྟགས་མ་ཡིན་ནོ། །གཅིག་ཉིད་དང༌། མང་བོ་ཉིད་དང༌། གཉིས་ཉིད་དང་མི་ལྡན་པའི་ཕྱིར་ཚིག་མ་ཡིན་ནོ། །མིང་དང་ཀུན་བཤད་ལ་ཉེ་བར་སྦྱོར་ཞིང༌། དོན་དུ་མ་སྟོན་པར་བྱེད་པའི་ཕྱིར། མིང་དང་ཀུན་བཤད་ཀྱི་ཁྱད་པར་རྣམས་སོ། །ཞེས་པས་མིང་དང་ཀུན་བཤད་དེ་བྱིངས་ལ་ཏི་སོགས་ཀྱི་རྣམ་དབྱེ་བྱིན་ནས་ཚིག་ཏུ་བསྒྲུབ་པའི་ཚེ་ཉེར་བསྒྱུར་རྣམས་གོང་དུ་སྦྱར་བས་དེའི་དབང་གིས་བརྗོད་བྱ་མཐའ་ཡས་པ་རྣམས་སུ་འགྱུར་རོ། །ཞེས་པའོ། །

    ༈ བརྒྱད་པ་ཨཱ་ག་མ་ནི། ངོ་བོ་གློ་བུར་བའམ། མགྲོན་ཐབས་ཀྱི་དོན་ཏེ། ལུང་ལ་ཡང་འཇུག་གོ །འབྱུང་བ་ནི། དཔང་ལོའི་ཤོག་གཅིག་མ་ལས། རང་བཞིན་རྐྱེན་ཀྱི་བར་དུ་འམ། །རང་བཞིན་དབྱངས་མཐའི་གཞན་དུ་འང༌། །ཇི་ལྟར་བཤད་བཞིན་ཨཱ་ག་མ། །དཀྱུས་མིན་དགོས་ལྡན་རྟགས་ཀྱི་དོན། །ཞེས་གསུངས་ལ། རང་བཞིན་ནི་མིང་དང་བྱིངས་སོ། །

    ༈ དགུ་བ་མི་ཟད་པ་ནི། གྲངས་མེད་པ་ཞེས་པ་སྟེ་ནི་པཱ་ཏ་དང༌། ཉེར་བསྒྱུར། བསྡུ་བའི་མཐར་གྱུར་བའི་མི་ཟད་པ་སྟེ་ལ་སོགས་པ། མིང་ཙམ་གྱིས་གོ་བར་བྱའོ། །

    ༈ བཅུ་བ་རྗེས་འབྲེལ་ལ། ངོ་བོ་ནི། སྐབས་དེར་དགོས་པའི་དབང་གིས་འོང་ཞིང༌། འོང་བའི་ཡུལ་དེ་དང་ལྷན་ཅིག་ཏུ་སྦྱར་བར་བྱ་བ་མ་ཡིན་པའི་ཆོས་སོ། །དབྱེ་ན། མིང་ངམ་ཁྱད་པར་གྱི་དོན། བརྗོད་པའི་དོན། དབྱངས་ཀྱི་དོན། ངོ་བོའི་དོན། རྣམ་པ་སྣ་ཚོགས་པའི་དོན་རྣམས་སོ། །དང་བོ་ལ། བྱིངས་རྐྱེན་རྟགས་དང་ཨཱ་ག་མ། མི་ཟད་ཚིག་གི་རྗེས་འབྲེལ་དྲུག །དང་བོ་ལ། དབྱངས་ཀྱི་དོན། གསལ་བྱེད་ཀྱི་དོན། བྱིངས་སྲོག་ཅན་གྱི་དོན། དབྱངས་གསལ་སྦྱར་མའི་དོན་རྣམས་སོ། །དང་བོ་ལ། ཨཱ་རིང་བོ། ཨི་རིང་ཐུང༌། ཨེ་རྀ་ལི། ཨོ་ཨུ་རིང་ཐུང་གཉིས་རྣམས་གཞུང་ལས་གསལ་བས་དེར་བལྟ་བར་བྱའོ། །གཉིས་པ་གསལ་བྱེད་རྗེས་འབྲེལ་ནི། ཀ྄་ད྄་ཉ྄་ཊ྄་ཎ྄་པ྄་མ྄་དྲོ་བའི་ཥ྄་རྣམས་ཏེ། དེ་རྣམས་ཀྱང་གཞུང་སོ་སོར་བསྟན་ནོ། །གསུམ་པ་བྱིངས་སྲོག་ཅན་ནི། ཌུ་ཊུ་ཉེ་དང་གསུམ། བཞི་བ་ནི། ཨིཏ྄་འགྲོ་བ་ལ་ཡང་ངོ༌། །ཞེས་པའོ། །གཉིས་པ་རྐྱེན་ཀྱི་རྗེས་འབྲེལ་ལ། ཀྲྀཏ྄་དང༌། མོ་རྟགས། དེ་ཕན་དང༌། སི་སོགས། སན྄་སོགས། ཏི་སོགས། ཏི་སོགས་དང་འབྲེལ་བའི་རྗེས་འབྲེལ་དང་བདུན། དང་བོ་ལ། དབྱངས་གསལ་གཉིས། དང་བོ། ཀྭིཔ྄འི་ཨི་དང༌། རིཏ྄་དང༌། ཨུཏ྄་རྗེས་སུ་འབྲེལ་བ་དག་གི་ཨུའོ། །ཞེས་དང༌། རྀཏ྄་གཉིས་སོ། །གཉིས་པ་ལ། ཀ྄་ཁ྄་ག྄་གྷ྄་ང྄༌། ཉ྄་ཌ྄་ཊ྄་ན྄་སམ྄་ཤ྄་ཥ྄་རྣམས་ཏེ། བཅུ་གཉིས་སོ། །མོ་རྟགས་ལ། ཀ་ལཱ་བར། བུད་མེད་ལ་ཨ་ལས་ཨཱཔ྄འོ། །ཞེས་དང༌། ཙནྡྲ་བར། བུད་མེད་ལ་ཨུ་ཏ྄་ཨད྄་ཨུད྄འོ་ཞེས་པའི་ད་གཉིས་སོ། །དེ་ཕན་ནི། ཏ་ཌ་ཊ་ཎ་དང་བཞིའི་རྗེས་འབྲེལ་ལོ། །སི་སོགས་ལ་གོ་སླའོ། །སན྄་སོགས་ལ་སན྄་གྱི་ན་དང༌། མིང་ལས་བདག་ཉིད་འདོད་པ་ལ་ཡིན྄འོ་ཞེས་པའི་ཨིན྄་དང༌། ཨཱ་ཡིའི་ཨི་དང༌། ཀཱ་རི་ཏའི་ན་རྣམས་སོ། །ཏི་སོགས་ལ། དེའི་ཨི་དང༌། པ་རོ྅ཀྵའི་ཊ་ཐལ་གྱི་གཉིས་སོ། །ཏི་སོགས་དང་འབྲེལ་བའི་རྗེས་འབྲེལ་ལ། པི་ཙིའི་ཨི་དང་ཙ་གཉིས། ཙན྄འི་གཉིས་ཨན྄་འདྲ། ཡན྄འི་ན་གཉིས་རྣམས་སོ། །གཉིས་པ་བརྗོད་པའི་དོན་ལ། བྱིངས་ཀྱི་ཨ་ཐུང་དང་བསྒྱུར་བའི་ཨི་གཉིས་སོ། གསུམ་པ་དབྱངས་ཀྱི་དོན་ལ། ན་ཙ་གཉིས་སོ། (བཞི་བ་ལ་མི་འདུག་གོ །)ལྔ་བ་ས་ཡིག་རྣམ་པ་སྣ་ཚོགས་པའི་དོན་ནོ། །

    ༈ བཅུ་གཅིག་པ་རྣམ་འགྱུར་ནི། སྐད་ཀྱི་དོན་ནི། བི་ཀ་ར་ཎ་ཞེས་པ་ཡིན་ལ། དེ་ཡང་རང་མིང་གིས་བསྟན་པའི་བི་ཀ་ར་ཎ་བདུན་ལས་དངོས་སུ་མ་གསུངས་ཀྱང༌། ལྷན་ཅིག་བྱེད་རྐྱེན་གྱིས་ས་བོན་གནས་སྐབས་གཞན་དུ་སྒྱུར་བར་བྱེད་པས་རྣམ་འགྱུར་ཞེས་བཤད་པ་ལྟར། རྣམ་དབྱེ་དང་རྣམ་དབྱེ་མ་ཡིན་པའི་རྐྱེན་གྱིས། བྱིངས་དང༌། རྟགས་དང༌། གཟུགས་དང༌། བརྗོད་བྱ་གཞན་ཡང་གཞན་དུ་སྒྱུར་བར་བྱེད་པ་ལ་རྣམ་འགྱུར་ཞེས་བྱ་དགོས་སོ། །

    ༈ བཅུ་གཉིས་པ་ཚིག་སྡུད་ནི། སྨྲ་སྒོས་བཅུར་གསུངས་ཏེ། དེ་ལ་ཚིག་གི་སྦྱོར་བ་བཅུ། །འབྲུ་མང་བོ་དང་ཚིག་སྡུད་དང༌། །ཁྱད་པར་དག་དང་ཡན་ལག་དང༌། །གཞི་དང་གཅིག་ཉིད་བསྡུ་བ་དང༌། །གཞི་མཐུན་བསྡུ་དང་དེའི་སྐྱེས་བུ། །ཟླས་དབྱེ་བ་དང་ཕྱོགས་ཙམ་མོ། །ཞེས་གསུངས་སོ། །

 

འདིར་སྨྲས་པ།

སྐྱེས་རབས་མང་བོའི་སྟོང་ཕྲེང་བགྲངས་མིན་ཡང༌། །མདོ་རྒྱུད་བསྟན་བཅོས་ཡོད་དོ་ཅོག་ཀུན་གྱི། །ཚིག་དང་དོན་གྱི་མེ་ཏོག་ཕྲེང་སྤེལ་བར། །ཞག་ཟླ་ལོ་ཡིས་འཁྱུད་མིན་འདི་ཀོ་གཟིགས། །ཕྱོགས་རེའི་རྒྱུ་སྐར་ཕྲེང་ལྡན་སྙེམས་པའི་འོད། །རབ་དཀར་བསིལ་བའི་བློ་གཞོན་ཀུ་མུད་ཁ། །ཕྱེ་བའང་ཀྱེ་མ་མང་ཐོས་གཟའི་བདག་པོའི། །མདུན་སར་མི་སྨྲའི་མུན་པ་ངང་གིས་འཇུག །རྣམ་དཀར་དམར་བོས་རབ་བསྐྲུན་བློ་གྲོས་ཀྱི། །ལྕགས་གོང་སྨོངས་པས་ཚལ་བ་བརྒྱར་གཏུབ་པའི། །ལྷག་ལུས་སྨིན་པ་སྒྲིབ་གཉིས་ཁྱབ་འཇུག་དཔུང༌། །མཐར་བྱས་གཏན་བདེའི་གྲགས་སྙན་འབྱམས་སུ་ཀླས། །དོན་བྲལ་གྲགས་པའི་ཅལ་གྱིས་བླུན་པོའི་མགོ །མགལ་མེའི་རང་བཞིན་ལས་ཀྱིས་བྱས་མོད་ཀྱང༌། །རྣམ་དཔྱོད་གདོང་ལྔའི་རྩལ་རྫོགས་འཇིགས་མེད་ཁྱོད། །མ་བརྟགས་འགྲེལ་བའི་ངལ་བ་འདིས་ཅི་སྙམ། །གང་གི་སྙིང་ནི་ཆོས་ཀྱི་གན་མཛོད་དུ། །ཐུབ་བསྟན་དཔལ་སྡུག་བླ་ན་རབ་མངར་བའི། །ཆོས་སྦྱིན་གཏན་པ་མེད་གཏོང་སླད་དུ་འདིར། ཆེ་ཆུང་ཚིག་སྦྱོར་ནོར་བུ་རྒྱུ་སྐར་བཞིན། །འཇམ་དཔལ་ཐུགས་རྗེའི་ཟེག་མ་སྙིང་པད་དུ། །གསུང་དབང་སྦྲང་རྩིར་མངར་ལ་དབྱངས་ཅན་ལྷའི། །བཞད་པ་འབུམ་དུ་གྱེར་བའི་རྡོ་རྗེའི་གླུ། །འཇིགས་མེད་སྤོབས་ལྡན་རྣམ་པར་རྒྱལ་བའི་སྡེས། །བཀོད་པས་མི་ཤེས་དྲི་མ་མ་ལུས་དྲུངས། །ཕྱུང་སྟེ་ནམ་ཡང་མཁའ་མཉམ་འགྲོ་འདི་དག །རྒུད་པའི་དཔུང་གིས་ནམ་ཡང་མི་བརྫི་བར། །ཀུན་མཁྱེན་རྒྱལ་བོ་མཆོག་དེར་གྱུར་ཅིག་གུ། །མངྒ་ལཾ།

*འདི་ཡང་ཟླ་བ་གཞོན་ནུའམ་སི་ནཱི་བཱ་ལཱིའམ་རྡོ་རྗེ་སྐྱབས་ཀྱིས་གསུང་འབུམ་ཤིང་དཔར་མ་ལས་འཕྲུལ་གྱི་ཡི་གེར་བཀོད་པ་ཀུན་ལ་ཕན་པར་གྱུར་ཅིག་གུ