ཀ་ལཱ་པའི་མཚམས་སྦྱོར་ལྔ་བའི་ལག་ལེན་བདུད་རྩིའི་ཉིང་ཁུ་ཞེས་བྱ་བ་བཞུགས་སོ། །
༄༅།།བྱཱཀརཎཀཱཏནྟྲཱཎཱཾཔཉྩསནྡྷེཡཔརྱཡོཿམྲྀཏསཱརནཱམབིཧརཏིསྨ།
༄༅། །ལུང་སྟོན་པ་ཀ་ལཱ་པའི་མཚམས་སྦྱོར་ལྔ་བའི་ལག་ལེན་བདུད་རྩིའི་ཉིང་ཁུ་ཞེས་བྱ་བ་བཞུགས་སོ། །
༈སྡེབ་སྦྱོར་མི་མཉམ་པའི་བྲྀཏྟ་ལས། ཁ་སྒོ་ཕན་པ་ཞེས་བྱའི་པྲ་སྟཱ་རས་མཛེས་པར་བྱས་པའོ། །
ཨོཾསྭསྟིཤྲེཡསྟུ།
༄༅། །བདེ་ལེགས་སུ་གྱུར་ཅིག
ཛྙཱེཡཏཏྭབིཏཱདྲཀྵཱིཏ྄། །མཁྱེན་པས་ཤེས་བྱའི་དེ་ཉིད་གཟིགས། །
ཀྲྀཔཱབྷིརྫྫགཏོཏྱཀྱྀཏ྄། །བརྩེ་བས་འགྲོ་ཀུན་འདོར་མི་མཛད། །
ཤཀྟིནཱམདནཾགྷཱཏཻ། །ནུས་པས་ལོག་འདྲེན་གཞོམ་མཛད་པ། །
ཤྩིཏྟེཤྲཱིགུརུམརྩྩཏི། །དཔལ་མགོན་བླ་མ་སྙིང་དབུས་མཆོད། །
གང་མཚན་ངོ་མཚར་ནོར་བུའི་ཏམྦུ་ར། །སུ་ཞིག་སྒྲ་འཛིན་བཅུད་དུ་སིམ་ཙམ་གྱིས། །དགེ་མཚན་ཕན་བདེའི་དགའ་སྟོན་རྒྱས་མཛད་པའི། །དཀོན་མཆོག་རིན་ཆེན་གསུམ་གྱིས་དགེ་ལེགས་སྩོལ། །མཁྱེན་རབ་རལ་གྲི་འབར་བའི་གཟི་བྱིན་གྱིས། །རྨོངས་ཆེན་བློ་ཡི་དྲ་བ་ཀུན་གཅོད་ཅིང་། །བློ་མཆོག་སྤོབས་པའི་གཏེར་མཛོད་དབྱེ་མཛད་པའི། །འཇམ་དཔལ་སྨྲ་བའི་སེང་གེ་སྙིང་དབུས་རོལ། །ཇི་སྙེད་སྒྲ་དབྱངས་དྭངས་མ་བསྡུས་པའི་དཔྱིད། །སྙན་ངག་ཆུ་བོ་སྟོང་གི་འབྱུང་ཁུངས་མཆོག །ཤེས་རབ་ཕར་ཕྱིན་འཕགས་མ་དབྱངས་ཀྱི་རྒྱལ། །མགྲིན་པའི་འོ་མཚོར་རྟག་པར་བཞུགས་མཛོད་ཀྱེ། །རྣམ་དག་སྒྲ་གཞུང་ཚངས་པའི་རལ་ཀླུང་འབུམ། །རྣམ་དཔྱོད་ལྟོ་བར་ཧུབ་ཀྱིས་བསྐྱིལ་ནས་སླར། །ལེགས་བཤད་རྒྱུན་བཟང་ཕྱོགས་མཐར་ཁྱབ་མཛད་པ། །པཎ་ཆེན་མཐུ་སྟོབས་ཡབ་སྲས་སྤྱི་བོས་མཆོད། །སྒྲ་གཞུང་རྒྱ་མཚོ་བསྲུབས་ལས་ཉེར་ཐོན་པའི། །ལེགས་བཤད་ཆ་ཤས་ཡོངས་རྫོགས་རི་བོང་ཅན། །བློ་གསལ་ཡིད་ཀྱི་ཀུ་མུད་བཞད་ནུས་པའི། །མཚམས་སྦྱོར་ལག་ལེན་མཁས་པའི་གསུང་བཞིན་བྲི། །
ཞེས་མཆོད་པར་བརྗོད་པ་དང་དམ་བཅའ་བ་སྔོན་དུ་སོང་ནས། གཞུང་དོན་དངོས་ལ་འཇུག་པ་ལས། དང་བོ་འདི་ལྟར་ཐོས་ཏེ། སྔོན་ལྷའི་ཡུལ་ན། སརྦ་ཛྙཱ་ཞེས་ཐམས་ཅད་མཁྱེན་པར་གྲགས་པའི་སྒྲ་མཁན་ཆེན་པོ་ཞིག་བྱུང་བར་བརྟེན། དབང་བོས་བརྡའ་སྤྲོད་པའི་གཞུང་ལུགས་བྱས་ནས། དྲང་སྲོང་ཕུར་བུ་ལ་བསླབས་ཏེ། གཞོན་ནུའི་ཚོགས་ཀྱི་སློབ་དཔོན་དུ་བསྐོས་པ་ལྷའི་བླ་མར་གྲགས། དེ་ལས་མང་དུ་མཆེད་པའི་གཙོ་བོ་ནི། གཞོན་ནུ་གདོང་དྲུག་ཡིན་པ་གང་ཞིག འཕགས་ཡུལ་ན་རྒྱལ་བོ་བདེ་སྤྱོད་ཀྱི་ཞང་བོ་དབང་ཕྱུག་གོ་ཆས་གྲུབ་ནས། སྒྲ་རིག་པའི་ཡ་གྱལ་ཉི་ཟླ་ལྟར་གྲགས་ཆེ་བ་ཆ་བསགས་ཀྱི་མདོའི་མཆོག་བྱིན་ཏེ་མི་ཡུལ་དུ་དར་བར་བྱས་པ་ནས་བཟུང་དེང་གི་བར་དུ་འཆད་ཉན་གྱི་སྲོལ་མ་ནུབ་བོ་ཞེས་དཔྱོད་ལྡན་རྣམས་ཀྱི་གཏམ་དུ་སྙན་པ་འདི་བརྗེད་དུ་ཕངས་ནས་འཆད་པ་ལ་དྲན་པ་ཉེ་བར་གཞག་པར་བྱའོ། །
དེ་ལ་རྒྱ་གར་སྐད་དུ། ཀ་ལཱ་པ་སཱུ་ཏྲ། བོད་སྐད་དུ། ཀ་ལཱ་པའི་མདོ་ཞེས་བྱ་བ་སྒྲ་རང་སོར་བཞག་པ་སྟེ། ད་ལམ་རྟེན་འབྲེལ་གྱི་ཆེད་དུ་སྒྲའི་ཁམས་བྱིངས་སྒྲུབ་བྱེད་ན། ཀ་ལ་ཆ་ཤས་ལའོ། །ཞེས་པའི་བྱིངས་བཞག བྱིངས་མཐར་དབྱངས་རྣམས་མི་སྦྱོར་རོ། །ཞེས་པས། བྱིངས་མཐའི་ཨ་ཕྱིས། ཧ་ལནྟ་བྱས། ཨཙ྄འོ། །ཞེས་པས། ཀྲྀཏ྄་རྐྱེན་ཨཙ྄་བྱིན་ཙ྄་དབྱངས་དོན་ཡིན་པས་ཕྱིས། གསལ་བྱེད་དབྱངས་མེད་པ་ཕ་རོལ་གྱི་ཡི་གེར་དྲོངས་ཞེས་པས། ཀ་ལའི་ལ྄་སྲོག་མེད་དེ་ཨའི་སྟེང་དུ་དྲངས་པས། ཀ་ལ་གྲུབ། ཨཱཔླྀ་ཁྱབ་པ་ལའོ། །ཞེས་ཁྱབ་པ་ལའོ་ཞེས་པའི་བྱིངས། ལྀ་རྗེས་འབྲེལ། ཨཙ྄་སྦྱར། ཙ྄་ཕྱིས། པ྄་དབྱངས་མེད་ཨ་ལ་དྲངས་པས། ཨཱ་པ་གྲུབ། དེ་དང་སྔ་མའི་ཀ་ལ་ལ་མཚམས་སྦྱོར་བའི་མདོར། རིམ་པ་ལས་མ་འདས་པར་ཕྲལ་བར་བྱའོ། །ཞེས་པས། ལའི་སྲོག་གི་དབྱངས་ཨ་ཕྱིར་ཕྲལ། མཚུངས་པ་འདྲ་བའི་ཡི་གེ་ལ་རིང་བོར་འགྱུར་ཏེ། ཞེས་པས། ཨཱ་སྔ་མ་རིང་། ཕ་རོལ་ལའང་དབྱིའོ། །ཞེས་པས། ཕ་རོལ་གྱི་ཨཱ་ཕྱིས། ཨཱ་སྔ་མ་དེར། ལ྄་དབྱངས་མེད་དྲངས་པས། ཀ་ལཱ་པ་གྲུབ་པ། བོད་སྐད་ཕྱོགས་གཅིག་ལ། ཆ་བསགས་ཏེ་ལུང་དུ་སྟོན་ནུས་པའི་བརྗོད་བྱ་ལེགས་པའི་ཆ་ཤས་ཐམས་ཅད་བསགས་པའོ། །
སཱུ་ཏྲ་དཀྲི་བ་ལའོ། །ཞེས་པའི་བྱིངས་བཞག བྱིངས་མཐའི་ཨ་རྗེས་འབྲེལ་ཡིན་པས་ཕྱིས། ཙུ་ར་སོགས་ཀྱི་ཨཏ྄་མཐའ་ལས་ཨིན྄འོས། ཨིན྄་བི་ཀ་ར་ཎ་བྱིན། ཨི་ལས་ཨ་ཙ྄འོ། །ཞེས་པས་ཨ྄ིནའི་ཕ་རོལ་ཏུ་ཨཙ྄་བྱིན། དེའི་དོན་གྱིས་ཨིན྄་ཕྱིས། ཨཙ྄འི་ཙ྄་ཡང་རྗེས་འབྲེལ་ཡིན་པས་བསུབ། ཏ྄་སྲོག་མེད་དེ་ཨའི་སྟེང་དུ་དྲངས་པས་སཱུ་ཏྲ་གྲུབ་པ། མདོ་ཞེས་བྱ་སྟེ་སྒྲའི་རབ་བྱེད་མང་བོ་ཕྱོགས་གཅིག་ཏུ་བསྡོམས་པའི་ཕྱིར་ན་མདོའོ། །དེས་ན། ཀ་ལཱ་པ་སཱུ་ཏྲ་བསྒྱུར་ན། ཆ་བསགས་ཀྱི་མདོའམ། ཀཱ་ཏནྟྲ་སྟེ། གཞུང་འདིར་རྒྱུད་ཉུང་ངུར་ཡང་འབོད་པ་ཡིན་ནོ། །
གཉིས་སུ་མེད་པར་གསུངས་པ་སངས་རྒྱས་ལ་ཕྱག་འཚལ་ལོ། །
ཞེས་པ་གཞུང་འདི་ཐོག་མར་བསྒྱུར་པའི་ཚེ་མཁས་པ་ཤོང་ལོ་རྡོ་རྗེ་རྒྱལ་མཚན་གྱིས་འགྱུར་ཕྱག་མཛད་པ་སྟེ། རྫུན་མེད་དྲང་བོར་གསུངས་པ་སངས་རྒྱས་བཅོམ་ལྡན་འདས་ཏེ་བདག་ཅག་གི་སྟོན་པ་མཆོག་ལ་འདུད་ཕྱག་བཙལ་བའོ། །དགོས་ཆེད་གནས་སྐབས་བར་ཆད་སེལ་བ་དང་མཐར་ཐུག་བདེ་བར་གཤེགས་པའི་གོ་འཕང་སྒྲུབ་པའོ། །གྲུབ་པའི་ཡི་གེ་ཡང་དག་པའི་མན་ངག་གོ །ཞེས་སྔོན་བཤད་ལྟར་གྲགས་ཤིང་གྲུབ་པའི་ཡི་གེ་དབྱངས་དང་གསལ་བྱེད་ལས་འཕྲོས་པའི་བྱིངས་རྣམས། རང་བཞིན་དང་། རྐྱེན་དང་། རྣམ་འགྱུར་གསུམ་གྱིས་ཡང་དག་པར་བརྗོད་པའི་མན་ངག་གོ །ཞེས་པས་བཤད་བྱའི་ངོ་བོ་བཀོད་ནས། བཤད་པར་དམ་བཅས་པའི་དགོས་འབྲེལ་སྟོན་པའོ། །
རྐང་བ་དང་བོ་ཡི་གེའི་བརྡ་ཁྱད་བཤད་པ།
༈མཚམས་སྦྱོར་རྐང་བ་དང་བོ་ཡི་གེའི་བརྡ་ཁྱད་བཤད་པ་ནི། སྤྱིར་སྒྲ་གཞུང་གཞན་དུ་དབྱངས་དང་གསལ་བྱེད་ཀྱི་བགྲང་ཚུལ་མི་འདྲ་བ་དུ་མ་འབྱུང་ཡང་། དེ་ལ་དང་བོར་བཅུ་བཞི་རྣམས་དབྱངས་སོ། །ཞེས་པས། འདིར་དབྱངས་བཅུ་བཞི་ཡིན་ཏེ། གང་ཞེ་ན། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། རྣམས་སོ། །དེའི་ནང་གསེས་བཅུ་རྣམས་མཚུངས་པའོ། །ཞེས། ཨ་ཡིག་ནས་ལཱྀའི་བར་ཏེ། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། རྣམས་ཐུང་རིང་མཚུངས་པའོ། །དེ་རྣམས་ཀྱི་གཉིས་གཉིས་དག ཕན་ཚུན་གྱི་འདྲ་བའི་ཡི་གེ་དག་གོ །ཞེས་པས། མཚུངས་པའི་དབྱངས་བཅུ་བོ་དེའི་ནང་ཕན་ཚུན་གཉིས་རེ་འདྲ་བའི་ཡི་གེར་བརྗོད་པ་ཡིན་ལ། སྔ་མ་ཐུང་ངུའོ། །ཕྱི་མ་རིང་བོའོ། །དེ་ཡང་སྔ་མ་རྣམས་ཐུང་བ་དང་། ཕྱི་མ་ཀུན་རིང་ཆ་ཡོད་པ་ནི་སྨོས་མ་དགོས་སོ། །ཨའི་ཡི་གེ་བོར་བའི་དབྱངས་ནཱ་མིན྄འོ། །ཞེས་པ་ཐོག་མའི་ཨ་ཐུང་རིང་གཉིས་མི་བརྩི་བའི་དབྱངས། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། བཅུ་གཉིས་པོར་མིང་ལ་ནཱ་མིན྄འི་ཡི་གེ་ཞེས་བྱའོ། །ཨེ་ཡིག་ལ་སོགས་པ་མཚམས་སྦྱོར་གྱི་ཡི་གེའོ། །ཨེ་ཡིག་ཐོག་མར་སྨོས་པའི་སོགས་ཁོང་ནས། ཨཻ་ཨོ་ཨཽ་བཞི་ལ་མཚམས་སྦྱོར་གྱི་ཡི་གེ་བཞི་ཞེས་པ། ཨ་དང་ཨི་མཚམས་སྦྱོར་བས་ཨེ། ཨ་དང་ཨེ་འགྲེང་བུ་གཅིག་ཅན་དང་གཉིས་ཅན་གང་རུང་མཚམས་སྦྱར་བས་ཨཻ། དེ་བཞིན་དུ། ཨ་དང་ཨུ་མཚམས་སྦྱར་བས་ཨོ། ཨ་དང་ཨོ་ཀེ་ཤ་ཅན་དག་སྦྱོར་བས། ཨཽ་གྲུབ་པ་སྟེ། དུས་རྒྱུན་པར་ལེགས་སྦྱར་ལ་འགྲེང་བུ་དང་ན་རོ་ཡོད་པར་འ་ཆུང་མི་འབྱུང་བ་སྟེ། ཇི་སྐད་དུ། འགྲེང་བུ་ན་རོ་བྱུང་གྱུར་ན། །རིང་བོ་ཉིད་ཕྱིར་འ་འདོགས་འཁྲུལ། །ཞེས་བཤད་པས་སོ། །གཉིས་པ། ཀ་ལ་སོགས་པ་རྣམས་གསལ་བྱེད་དོ། །ཞེས་པས། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ། སྟེ་གྲངས་སོ་གསུམ་མོ། །དེ་རྣམས་ཀྱི་ལྔ་ལྔ་བ་རྣམས་སྡེ་པའོ། །ཞེས་པ། ཀ་སྡེ། ཙ་སྡེ། ཊ་སྡེ། ཏ་སྡེ། པ་སྡེ་ལྔ་རྣམས་ལ་ནང་ཚན་ཡི་གེ་ལྔ་ལྔ་ཡོད་པས་དེ་ལྟར་སྨོས་པའོ། །སྡེ་པ་རྣམས་ཀྱི་དང་བོ་དང་། གཉིས་པ་དང་། ཤ་ཥ་ས་རྣམས་སྒྲ་མེད་པའོ། །ཞེས་སྨོས་མ་ཐག་པའི་སྡེ་པ་དེ་རྣམས་ཀྱི་དང་བོ། ཀ་ཙ་ཊ་ཏ་པ་ལྔ། གཉིས་པ་ཁ་ཚ་ཋ་ཐ་ཕ། ལྔ་བསྡོམས་པས་བཅུ། དེའི་ཁར་ཤ་ཥ་ས་གསུམ་བསྣན་པས་སྒྲ་མེད་པའི་ཡི་གེ་བཅུ་གསུམ་སྟེ། ཁ་ནས་བརྗོད་ཚེ་སྒྲ་ཤུགས་ཆུང་བས་དེ་ལྟར་བཏགས་པའོ། །གཞན་རྣམས་སྒྲ་དང་ལྡན་པའོ། །ཞེས་པས། དེ་འཕྲོས། ག་གྷ་ང་། ཛ་ཛྷ་ཉ། ཌ་ཌྷ་ཎ། ད་ངྷ་ན། བ་བྷ་མ། ཡ་ར་ལ་ཝ་ཧ་རྣམས་སྒྲ་ལྡན་གྱི་ཡི་གེ་ཉི་ཤུ་ཡིན། དེ་ཡང་འདོན་དུས་སྒྲ་ཤུགས་ཆེ་བས་དེ་ལྟར་བརྗོད་དོ། །ང་ཉ་ཎ་ན་མ་རྣམས་རྗེས་སུ་སྣ་ལྡན་ནོ། །ཞེས་ང་ཉ་ཎ་ན་མ་ལྔ་བོ་བརྗོད་པའི་ཚེ་སྣ་ནང་ནས་སྒྲ་འབྱིན་པས་སྣ་ལྡན་ཟེར་རོ། །ཡ་ར་ལ་ཝ་རྣམས་མཐར་གནས་སོ། །ཞེས་ཡ་ར་ལ་ཝ་བཞི་ནི། ཡ་བཏགས་ཀྱ། ར་འདོགས་ཀྲ། ལ་བཏགས་ཀླ། ཝ་ཟུར་ཀྭ་བྱས་པ་ལྟ་བུ་རྣམས་ཏེ་ཡི་གེའི་མཐར་གནས་པ་བཞིའོ། །ཤ་ཥ་ས་ཧ་རྣམས་དྲོ་བའོ། །ཞེས་པ། ཤ་ཥ་ས་ཧ་བཞི་བརྗོད་པའི་ཚེ་དབུགས་ཕྱིར་འབྱིན་པའི་ཚེ་ཁ་རླངས་ཀྱིས་དྲོ་བས་དྲོ་བའི་ཡི་གེར་གྲགས་སོ། །ཨཿཞེས་པ་རྣམ་པར་བཅད་བྱའོ། །ས྄་དང་ར྄་སྲོག་མེད་ཀྱིས་ཐིག་ལེ་བྱས་པ་ནུ་མ་ཟུང་གི་རྣམ་པ་ཅནཿའདི་འདྲ་བ་ལ་རྣམ་བཅད་ཅེས་བྱ་སྟེ། ཕྱི་མ་རྗེས་སུ་ང་རོའི་ༀ་དང་འདིའི་ཨ་ནི་བརྗོད་པའི་རྟེན་ཙམ་དུ་བཞག་པའོ། །ྈྐ་ཞེས་པ་ལྕེ་རྩ་ཅན་ནོ། །ྉྤ་ཞེས་པ་མཆུ་ཅན་ནོ། །རྣམ་བཅད་དེ་ཀ་ཁ་དང་མཚམས་སྦྱོར་དུས་ྈ་ཌ་མ་རུའི་དབྱིབས་ཅན་ྈྐ་ྈྑ་ནི་ལྕེ་རྩ་ཅན་དང་། པ་ཕ་དང་འཕྲད་དུས་གླང་བོའི་མྱོས་བུམ་གྱི་རྣམ་པ་ཅན་ལ་འ་མཆུ་ཅན་ཞེས་བརྗོད། ྈྐྉྤ་འདོན་དུས་ྈྐ་ཨཀ྄་དང་། ྉྥ་པོབ་ལྟ་བུར་ཀློག་པར་འཐད་དོ། །ཨཾ་ཞེས་པ་རྗེས་སུ་ང་རོའོ། །ཀི་དབྱངས་གསལ་བྱེད་གང་གི་སྟེང་དུའང་མ྄་ན྄་སྲོག་མེད་ལས་བྱུང་བའི་ཀླད་ཀོར་བྱས་པ་བུག་པའི་རྣམ་པ་ཅན། འདི་འདྲ་ལ་རྗེས་སུ་ང་རོ་ཟེར། དེའི་འོག་ཏུ་ཟླ་ཚེས་ཕྱེད་པ་ཨཱུྃ་ཀྲུྃ་ལྟ་བུ་ཡང་སྒྲ་གཞུང་གཞན་དུ་བཤད་དོ། །དེ་ལྟར་རྣམ་བཅད་དང་། ལྕེ་རྩ་ཅན། མཆུ་ཅན། རྗེས་སུ་ང་རོ་རྣམས་ལ་གསལ་བྱེད་ཙམ་པོ་བ་ཞེས་གཞན་དུ་མིང་འདོགས་ཡོད་འདུག འདི་ཡན་གྱི་བརྡ་ཁྱད་རྣམ་གྲངས་རྣམས་བློ་ལ་བྱང་ཆུབ་པར་བྱས་ན་གདོད་རི་མོ་འབྲི་དུས་ཕན་བསྐྱེད་ཆེ་བ་ལགས་སོ། །
སྔ་མ་དང་ཕྱི་མ་དག་གི་དོན་ཉེ་བར་དམིགས་པ་ན་ཚིག་གོ །དེ་ཡང་བྱིངས་ལ་ཀྲྀཏ྄་རྐྱེན་སྟེར་བས་མིང་ངམ་རྟགས་སུ་གྲུབ་པའི་སྐད་དོད་དེའི་མཐར། ཕྱི་མ་སི་སོགས་ཀྱི་རྣམ་དབྱེ་ཉེར་བཞི་གང་རུང་རྣམས། རྟགས་གསུམ་སོ་སོའི་མཐའ་མ་ནོར་བའི་སྦྱོར་ལུགས་གང་དགོས་བྱས་པ་ཚིག་ཏུ་གྲུབ་པ་དང་། སྔ་མ་བྱིངས་སྡེ་ཚན་གང་ཡིན་དེ་ལ། བརྟ་མཱ་ན་སོགས་བྱིངས་ཐམས་ཅད་པ་བཞི་ལ་བར་རྐྱེན་རྣམས་སྦྱོར་ཚུལ། ཨདྱ་ཏ་ནཱི་སོགས་ཀུན་བཤད་ཀྱི་རྣམ་དབྱེ་བརྒྱ་བརྒྱད་ཅུ་བོ་སྦྱོར་ཚུལ་མ་འཁྲུགས་པ་རྟོག་དཔྱོད་ཞིབ་མོར་བྱས་ནས་ཚིག་ཏུ་གྲུབ་པ་ཡིན་ཏེ། འཆད་འགྱུར་གྱི་མིང་ལེ་རྐང་བ་དྲུག ཀུན་བཤད་རྐང་བ་བརྒྱད་རྣམས་ཀྱི་སྐབས་སུ་རྒྱས་པར་སྟོན་ནོ། །གསལ་བྱེད་དབྱངས་མེད་པ་ཕ་རོལ་གྱི་ཡི་གེར་དྲོངས། །ཞེས་པས་ཚུ་རོལ་ཏུ་གསལ་བྱེད་སྲོག་མེད་བྱུང་ན། དེའི་ཕ་རོལ་ཏུ་དབྱངས་ཡིག་འདུག་ཚེ་ངོ་ཐོག་དེའི་སྟེང་དུ་ཕར་དྲངས། དབྱངས་དེ་སྲོག་ཏུ་བཅུག་པས། འ་ཆུང་། གི་གུ། འགྲེང་བུ། ན་རོ་སོགས་ཅི་འདུག་ནའང་གསལ་བྱེད་དེར་འདོགས། ཡང་གསལ་བྱེད་དབྱངས་མེད་དེའི་ཕ་རོལ་ཏུ་གསལ་བྱེད་སྣང་ན་དེའི་མགོ་བོར་དྲངས་པ་སྟེ། དཔེར་ན། སམ྄་ཡང་དག་པ། ཨིནྡྲ་དབང་བོ། སཏ྄་དམ་པ། ངྷརྨ་ཆོས་རྣམས་མདོ་དེས་དྲངས་པས། སམིནྡྲ་ཡང་དག་དབང་བོ། སདྡྷརྨ་དམ་པའི་ཆོས་ལྟ་བུའོ། ། (སདྡྷརྨ་དང་མཚམས་སྦྱོར་བའི་ཚེ། ཏ྄་ཡིག་ནི་སྡེ་བའི་ཚིག་མཐའ་རྣམས་དབྱངས་དང་སྒྲ་ལྡན་རྣམས་ལ་གསུམ་པ་རྣམས་སོ། །ཞེས་པས། ཏ྄་དར་བསྒྱུར་ནས་དྲངས་པའི་ལུགས་ཡིན།) རིམ་པ་ལས་མ་འདས་པར་ཕྲལ་བར་བྱའོ། །ཚུ་རོལ་གསལ་བྱེད་ཀྱི་ཁོངས་སུ་དབྱངས་བཅུ་བཞི་གང་རུང་ཡོད་པ། དེའི་ཕ་རོལ་ཏུ་ཡང་། དབྱངས་བཅུ་བཞི་ཐོག་མ་ཅན་གང་རུང་སྣང་ན། སྔོན་མའི་དབྱངས་དེ་ཡར་མར་གང་དུའང་མི་བྲི་བར་ཐད་ཀ་དེར་ཕྱིར་ཕྲལ་ནས་བྲི་བ་སྟེ། དཔེར་ན། ཛ་ཡ་རྒྱལ་བ། ཨཱི་ཤྭ་ར་དབང་ཕྱུག་མདོ་དེས་ཕྲལ་ནས། ཛ་ཡ྄་ཨ་ཨཱི་ཤྭ་ར་ལྟ་བུའོ། །གསལ་བྱེད་དབྱངས་མེད་རྟགས། ཧ་ལནྟ་སྦྱར་བ་ལ། རིམ་པ་ལས་མ་འདས་པ་ཟེར། ཧ་ལནྟ་ཟེར་བ་བོད་སྐད་དུ་སྲོག་མེད་མཐའ་ཡིན་ཏེ། ཙནྡྲའི་སྒྲ་གཞུང་གི་བསྡུ་བའི་སྐབས། དབྱངས་ལ་ཨཙ྄་དང་། གསལ་བྱེད་ལ་ཧལ྄་ཟེར་བ་དང་། ཨནྟ་མཐའ་སྟེ། ཧལ྄འི་ལ྄་དེ་ཨནྟའི་ཨ་ལ་དྲངས་པའི་གཟུགས་སོ། །འཇིག་རྟེན་པའི་ཉེ་བར་སྤྱོད་པ་ལས་འཛིན་པ་གྲུབ་བོ། །ཀ་ལཱ་པའི་སྒྲ་མདོ་འདིའི་ནང་ནས་མ་བཤད་པ། འཕགས་ཡུལ་གྱི་སྒྲ་གཞུང་། པཱ་ཙཱན྄་སོགས་སུ་བཤད་པའི་བྱ་བ་གང་འོས་པའང་འཇིག་རྟེན་པའི་ཉེ་བར་སྤྱོད་པ་སྟེ་དེ་རྣམས་ཀྱང་འདིར་བྱེད་ཆོག་པ་ཡིན་ཞེས་གཞན་དུ་ཁ་འཕང་བའོ། །ཞེས་པ་མཚམས་སྦྱོར་རྐང་བ་དང་བོ་རྫོགས་སོ། །
རྐང་བ་གཉིས་པ་དབྱངས་ཀྱི་མཚམས་སྦྱོར།
༈རྐང་བ་གཉིས་པ་དབྱངས་ཀྱི་མཚམས་སྦྱོར་ལས། ཐོག་མར་མཚུངས་འདྲའི་མཚམས་སྦྱོར་མདོར། མཚུངས་པ་འདྲ་བའི་ཡི་གེ་ལ་རིང་བོར་འགྱུར་ཏེ་ཕ་རོལ་ཡང་དབྱིའོ། །ཞེས་པའི་ལག་ལེན་ནི། དཔེར་ན། བུདྡྷ་སངས་རྒྱས། ཨཱཀར་འབྱུང་གནས་ལ། མདོ་སྔ་མ། རིམ་པ་ལས་མ་འདས་པར་ཕྲལ་བར་བྱའོ། །ཞེས་པས། ངྷའི་སྲོག་གི་དབྱངས་ཨ་ཕྲལ། དྷ྄་སྲོག་མེད་དུ་སོང་། དེ་ནས་མདོ་དངོས། མཚུངས་པ་འདྲ་བའི་ཡི་གེ་ལ་རིང་བོར་འགྱུར་ཏེ། ཞེས་པས། ཨ་སྔ་མ་རིང་། ཕ་རོལ་ཡང་དབྱིའོ། །ཞེས་པས་ཕ་རོལ་གྱི་ཨ་ཕྱིས་པར། བུད྄དྷ྄+ཨཱཀར་དེ་ནས་གསལ་བྱེད་དབྱངས་མེད་ཕྱིར་དྲངས་པས། བུདྡྷཱ་ཀ་ར་གྲུབ་པ། རྒྱལ་བའི་འབྱུང་གནས་ཡིན་པས་མཚོན། ཚུ་རོལ་ཏུ་དབྱངས་ཨ་ནས་ལཱྀ་བར་བཅུ་བོ་ཐུང་རིང་གང་རུང་ཡོད་པར། ཕ་རོལ་ཏུ་དེ་དང་གཟུགས་འདྲ་བའི་མཚུངས་པའི་དབྱངས་རིང་ཐུང་གང་ཡོད་ཀྱང་མཚུངས་འདྲ་སྟེ་སྔ་མ་རིང་། ཕྱི་མ་ཕྱིས་པས་ཆོག་པ་ལྟ་བུའི་འཕྲུལ་ཤེས་པར་བྱས་ནས། ༼ཨ༽བུདྡྷ་སངས་རྒྱས། ཨངྷིཥྛཱན྄+ཤས྄་བྱིན་རྗེས། བྱིན་རླབས་རྣམས་ལ། ༈སིངྷ་སེངྒེ་། ཨཱ་ས་ན་གདན་ནམ་ཁྲི། ཛྭ་ལ་འབར་བ། ཨ་ན་ལ་མེ། ༈མ་མ་བདག་གི། ཨཱཡུས྄་ཚེ། པདྨ་པདྨ། ཨཱ་ཀ་ར་འབྱུང་གནས། ༈ངྷརྨ་ཆོས། ཨ་ཏྲ་(རྣམ་དབྱེ་བདུན་པའི་དོན་དེ་ཕན་གྱི་ཏྲ་བྱིན་པ་ཡིན)འདིར། ཤྲདྡྷཱ་དད་པ། ཨསྟི་ཡོད་རྣམས་མཚུངས་འདྲ་བྱས་པས། བུདྡྷཱདྷིཥྛཱན྄་སངས་རྒྱས་བྱིན་རླབས་རྣམས་ལ། སིཾཧཱསན་སེང་ཁྲི། ཛྭལཱནལ་འབར་བའི་མེ། མམཱཡུས྄་བདག་གི་ཚེ། པདྨཱ་ཀ་ར་པདྨ་འབྱུང་གནས། ངྷརྨཱཏྲ་ཆོས་འདིར། ཤྲདྡྷཱསྟི་དད་པ་ཡོད། ༼ཨི༽ མུ་ནི་ཐུབ་པ། ཨིནྡྲ་དབང་བོ། ནྲྀཏིགར། ཨཱིཤྭར་དབང་ཕྱུག དདྷི་ཞོ། ཨིཥུ་འདོད་པ། སྭསྟི་བདེ་ལེགས། ཨིདཾ་འདི། ཨཽཥདྷི་སྨན། ཨིཀྵུ་བུར་ཤིང་། པཀྵི་འདབ་ཆགས། ཨིནྡྲ་དབང་བོ། དེ་བི་ལྷ་མོ། ཨིནྡྲནཱི་དབང་མོ་རྣམས་མཚམས་སྦྱར་བས། མུནཱིནྡྲ་ཐུབ་དབང་། ནྲྀཏཱིཤྭར་གར་གྱི་དབང་ཕྱུག དདྷཱིཥུཿཞོ་འདོད་པ། སྭསྟཱིདཾ་ལེགས་པ་འདི། ཨཽཥདྷཱིཀྵུ་སྨན་བུར་ཤིང་། པཀྵཱིནྡྲ་འདབ་ཆགས་དབང་བོ། དེབཱིནྡྲཎཱི་ལྷ་མོའི་དབང་བོའོ། ༈༼ཨུ༽བ་ཡུ་རླུང་། ཨུ་ད་ཡ་དར་བ། མདྷུ་མངར་བ། ཨུ་ད་ཀ་ཆུ། གུ་རུ་བླ་མ། ཨུཏྟར་མཆོག སུ(ཉེར་བསྒྱུར)བཟང་བོ། ཨུཀྟི་སྨྲས། ཨཾཤུ་འོད་ཟེར། ཨུ་ཤན་པ་སངས། རྣམས། བ་ཡཱུ་ད་ཡ་རླུང་དར་བ། མདྷཱུ་ད་ཀ་མངར་བའི་ཆབ། གུརཱུཏྟར་བླ་མ་མཆོག སཱུཀྟཾ་བཟང་བོར་སྨྲས། ཨཾཤཱུཤན་འོད་ཟེར་པ་སངས། ༈༼རྀ༽པིཏྲྀ་ཕ། རྀཥབྷ་ཁྱུ་མཆོག ཤསྟྲྀ་སྟོན་པ། རྀཥབྷ་ཁྱུ་མཆོག ཧོཏྲྀ་སྲེག་བླུགས་མཁན། རྀཥི་དྲང་སྲོང་། པོཏྲྀ་དག་བྱེད། རྀཀཱར་རྀ་ཡིག ནྲྀ་མི། རྀཥབྷ་ཁྱུ་མཆོག་རྣམས་མཚུངས་འདྲ་མཚམས་སྦྱོར་བས། པིཏྲཱྀཥབྷ་ཕ་ཁྱུ་མཆོག ཤསྟྲཱྀ་ཥབྷ་སྟོན་པ་ཁྱུ་མཆོག ཧོཏྲཱིཥིདྲང་སྲོང་སྲེག་བླུགས་མཁན། པོཏྲཱྀ་ཀཱར་དག་བྱེད་རྀ་ཡིག ནྲཱྀཥབྷ་མི་ཁྱུ་མཆོག ༈༼ལྀ༽ཀླྀ་ནུས་པ། ལྀ་ཀཱར་ལྀ་ཡིག མཚུངས་འདྲ་བྱས་པས། ཀླཱྀཀཱར་ནུས་པའི་ལྀ་ཡིག ལཱྀཀཱར་ལྀ་ཡིག་སྟེ། ལཱྀ་འདིའི་དཔེར་བརྗོད་དཀོན་ཞིང་གཞན་དུ་ལྀ་ཡིག་རིང་བོ་མི་བཞེད་ཀྱང་། འདིའི་འགྲེལ་པ་སློབ་ཕན་ལས་རིང་བོ་བཤད་པའང་འགལ་བར་མི་སེམས་སོ། །(༈ ཡང་དབྱངས་ཡིག་ཨ་ཐུང་རིང་དང་། དབྱངས་གཞན་རྣམས་མཚམས་སྦྱོར་བའི་མདོ། དེ་བཞིན་དུ་འོག་མ་རྣམས་ཀྱི་མགོར་ཡང་། ཨའི་ཡི་གེ་ཞེས་སྦྱོར་ན་གོ་བ་ཆགས་པར་འདུག)༈ཨའི་ཡི་གེ་ཨིའི་ཡི་གེ་རྣམས་ལ་ཨེའོ། །ཨུའི་ཡི་གེ་ལ་ཨོའོ། །རྀའི་ཡི་གེ་ལ་ཨར྄་རོ། །ལྀའི་ཡི་གེ་ལ་ཨལ྄་ལོ། །ཨེ་ཡིག་ལ་ཨཻ་སྟེ། ཨཻ་ཡིག་ལའང་ངོ་། ཨོ་ཡིག་ལ་ཨཽ་སྟེ། ཨཽ་ཡིག་ལའང་ངོ་། །ཞེས་ཚུ་རོལ་ཏུ་དབྱངས་ཨ་རིང་ཐུང་གང་རུང་ཡོད་ལ། དེའི་ཕ་རོལ་ཏུ། ཨི་རིང་ཐུང་། ཨུ་རིང་ཐུང་། རྀ་རིང་ཐུང་། ལྀ་རིང་ཐུང་། ཨེ། ཨཻ། ཨོ། ཨཽ་རྣམས་ཐོག་མ་ཅན་གང་རུང་བྱུང་ན། སྔོན་མའི་རྟགས་མཐའི་ཨ་རིང་ཐུང་གང་ཡོད་དེ་རིམ་བཞིན། ཨེ། ཨོ། ཨར྄། ཨལ྄། ཨཻ། ཨཽ། སོ་སོར་བྱེད་ཅིང་། ཕྱི་མ་དབྱི་བ་དང་། སྔ་མའི་ཨ་ལ་འ་ཆུང་འདུག་ན་དབྱི་དགོས་སོ། །དེ་རྣམས་ཀྱི་དཔེར་བརྗོད་པ་ཡང་རིམ་བཞིན་འབྲི་བར། ལོཀ་འཇིག་རྟེན། ཨཱིཤྭར་དབང་ཕྱུགསུར་ལྷ། སུར་ལྷ། ཨིནྡྲ་དབང་བོ། ཡཐཱ་ཇི་ལྟར། ཨིདཾ་འདི། ལོཀེཤྭར་འཇིག་རྟེན་དབང་ཕྱུག སུརེནྡྲ་ལྷའི་དབང་བོ། ཡཐེདཾ་ཇི་ལྟར་འདིའོ། ༈ པདྨ་པདྨ། ཨུཥྞཱིཥ་གཙུག་ཏོར། ལོ་ཀ་འཇིག་རྟེན། ཨུཏྟར་མཆོག མ་མ་བདག་གི། ཨུདཀ་ཆུ། པདྨོཥྞཱིཥ་པདྨ་གཙུག་ཏོར། ལོཀོཏྟར་འཇིག་རྟེན་མཆོག མམོདཀབདག་གི་ཆུའོ། ༈ མཧཱ་ཆེན་པོ། རྀཥི་དྲང་སྲོང་། པུརུཥ་སྐྱེས་བུ། རྀཥབྷ་ཁྱུ་མཆོག མཧཪྵི་དྲང་སྲོང་ཆེན་པོ། པུརུཥཪྵབྷ་སྐྱེས་བུའི་ཁྱུ་མཆོག ༈ཏབ་ཁྱོད། ལྀཀཱར་ལྀ་ཡིག ཏབལ྄ཀཱར་ཁྱོད་ཀྱི་ལྀ་ཡིག ཨེཀ་གཅིག ཏབ་ཁྱོད། ཨཻཌིཀ་ལུག ཨེཀཻཀ་རེ་རེའམ་གཅིག་གཅིག ཏབཻཌིཀཁྱོད་ཀྱི་ལུག་གོ ། ༈ཤུདྡྷ་དག་པ། ཨོདན་ཟས། ཁཊྭཱ་ཁྲི། ཨོཔ་ག་བ་ཉེ་བའི་བ་ལང་། ཤུདྡྷཽདན་ཟས་གཙང་སྲས། ཁཊྭཽཔ་ག་བ་ཁྲི་དང་ཉེ་བའི་བ་ལང་ངོ་། །ཡང་། ཨིའི་ཡི་གེ་འདྲ་བའི་ཡི་གེ་མ་ཡིན་པ་ལ་ཡ྄་སྟེ། ཕ་རོལ་དབྱི་བའང་མ་ཡིན་ནོ། །ཨུའི་ཡི་གེ་བ྄འོ། །འདྲ་བའི་ཡི་གེ་མ་ཡིན་པ་ལ་རིམ་བཞིན་འགྲེ། རྀའི་ཡི་གེ་ར྄འོ། །ལྀའི་ཡི་གེ་ལ྄འོ། །ཨེ་ཨཡ྄འོ། །ཨཻ་ཨཱཡ྄འོ། །ཨོ་ཨབ྄འོ། །ཨཽ་ཨཱབ྄འོ། །ཞེས་པས། ཕ་རོལ་ཏུ་དབྱངས། ཨི་རིང་ཐུང་། ཨུ་རིང་ཐུང་། རྀ་རིང་ཐུང་། ལྀ་རིང་ཐུང་། ཨེ་ཨཻ་ཨོ་ཨཽ་རྣམས་ཡོད་པར་ཕ་རོལ་ཏུ་རང་གཟུགས་དེ་མིན་པ་ལ་ཨ་རིང་ཐུང་སོགས་དབྱངས་གཞན་བཅུ་གཉིས་གང་རུང་བྱུང་ན། རིམ་པ་ལྟར། སྔ་མའི་དབྱངས་རྣམས། ཡ྄། བ྄། ར྄། ལ྄། ཨཡ྄། ཨཱཡ྄། ཨབ྄། ཨཱབ྄་རྣམས་སུ་གོང་གི་མདོ་སོ་སོས་བསྒྱུར་ནས། འདི་ཕྱིན་ཆད་ཕ་རོལ་དབྱངས་མ་ཕྱིས་པའི་ཐོག་ཏུ་དྲངས་པ་སྟེ། དཔེར་ན། ཨཱདི་གདོད་མ། ཨནུཏྤནྣ་མ་སྐྱེས་པ། ཧརི་སེདྒེ་། ཨཱསན་གདན། ནརཱི་མི་མོ། ཨརོཀྵ་དབང་བོའི་སྤྱོད་ཡུལ་མིན་པ། དེབཱི་ལྷ་མོ། ཨུཔསྠཱན་ཉེ་བར་གནས་པ། དེ་རྣམས་མཚམས་སྦྱོར་བས། ཨཱདྱནུཏྤནྣ་གདོད་ནས་མ་སྐྱེས་པ། ཧཪྱཱསན་སེང་ཁྲི། ནཪྱརོཀྵ་མི་མོ་དབང་ཡུལ་མིན་པ། དེབྱུཔསྠཱན་ལྷ་མོ་ཉེ་བར་གནས་པའོ། །ངྷཏུ་ཁམས། ཨཱཡཏན་སྐྱེ་མཆེད། ཨཐཁལུ་དེ་ནས། ཨཱཡུསྨཱན྄་ཚེ་དང་ལྡན་པ། སམནུ་ཡང་དག་པར་རྗེས་སུ། ཨཱཧརནྟུ་དགོངས་སུ་གསོལ། གུརུ་བླ་མ། ཨེཀ་གཅིག མནུ་ཡིད། ཨིནྡྲ་དབང་བོ། སུ་བཟང་བོ། ཨཏི་ཕུལ་བྱུང་། སུ་བདེ་ལེགས། ཨསྟི་ཡོད་པ། ཏནུ་རྒྱས་པ། ཨཻཌིཀ་ལུག པཊུ་མཁས་པ། ཨདྒ་ཡན་ལག་རྣམས་སྦྱར་ཚེ། ངྷཏྭཱ་ཡ་ཏན་ཁམས་དང་སྐྱེ་མཆེད། ཨཐཁལྭཱཡུསྨཱན྄་དེ་ནས་ཚེ་དང་ལྡན་པ། སམནྭཱཧརནྟུ་ཡང་དག་པར་རྗེས་སུ་དགོངས་སུ་གསོལ། གུརྭེཀ་བླ་མ་གཅིག་པུ། མནྭིནྡྲ་ཡིད་ཀྱི་དབང་བོ། སྭཏི་བཟང་བོ་ཕུལ་བྱུང་། སྭསྟི་བདེ་ལེགས་ཡོད་པ། ཏནྭཻཌིཀ་ཕྱུག་པོའི་ལུག པཊྭཱངྒ་མཁས་པའི་མན་ངག་གོ ༈ བིཤྭམཏྲྀ་སྣ་ཚོགས་ཡུམ། ཨུདཡ་དར་བ། པིཏྲྀ་ཕ། ཨིཧ་འདིར། མཏྲྀ་ཡུམ། ཨེཀ་གཅིག པིཏྲྀཕ། ཨོཔགབ་ཉེ་བའི་བ་ལང་རྣམས་མཚམས་སྦྱོར་འབྲས། བིཤྭམཏྲུདཡ་སྣ་ཚོགས་ཡུམ་དར་བ། པིཏྲཱིཧ་ཡབ་འདིར། མཏྲེཀ་ཡུམ་གཅིག པིཏྲོཔགབ་ཕ་དང་ཉེ་བའི་བ་ལང་ངོ་། ༈ ལྀ། ཨནུབནྡྷ་རྗེས་སུ་འཆིང་བ། ལྀཨཱཡུཿཚེ། ལྀཨིཥུ་འདོད་པ། ཀླྀ་ནུས་པ། ཨཱིཤྭར་དབང་ཕྱུག ཀླྀ་ནུས་པ། ཨུཔ་ཉེ་བ། ཀླྀ་ནུས་པ། ཨེཏཿའདི། རྣམས་མཚམས་སྦྱར་བས། ལནུབནྡྷ་ལྀ་རྗེས་སུ་འཆིང་བ། ལཱཡུཿལྀའི་འཚོ་བ། ལིཥུ་ལྀ་འདོད་པ། ཀླཱིཤྭར་ནུས་པའི་དབང་ཕྱུག ཀླུཔ་ནུས་པ་ཉེ་བ། ཀླེཏཿནུས་པ་འདིའོ། ༈ ཏེ་དེ་རྣམས། ཨཧུ་སྨྲས་པ། རཻ་ནོར། ཨིཤྭར་དབང་ཕྱུག་རྣམས་བསྒྲུབས་འབྲས། ཏ་ཡ་ཧུ་དེ་རྣམས་སྨྲས། རཱཡིཤྭར་ནོར་གྱི་དབང་ཕྱུག་གོ །༈ཡང་གཽ་བ་ལང་། ཨཀྵ་མིག ཏཽ་དེ་དག ཨིཧ་འདིར། གཱབཀྵ་བ་ལང་མིག ཏཱབིཧ་དེ་འདིར། དེ་བཞིན་དུ་དབྱངས་གཞན་ལའང་རིགས་བསྒྲེ་བའོ། །ཨཡ྄་ལ་སོགས་པ་རྣམས་ཀྱི་ཡ྄་བ྄་དབྱི་བ་ཚིག་མཐའ་ལ་ཏེ་ཡང་ན་མ་ཡིན་ཞིང་ཕྱིས་པ་ལ་ནི་རང་བཞིན་ནོ། །ཞེས་བྱིངས་ལ་ཀྲྀཏ྄་བྱིན་པའི་རྟགས་མཐར། མིང་ལེའི་རང་བཞིན་སི་སོགས་ཀྱི་རྣམ་དབྱེ་བྱིན་པས། ཨེ་ཨཻ་ཨོ་ཨཽའི་མཐའ་བྱུང་ན་ཚིག་མཐའ་ཟེར། དེའི་ཕ་རོལ་དབྱངས་བཅུ་གཉིས་གང་བྱུང་ཡང་རུང་མཚམས་སྦྱོར་གྱི་སྐབས། སྨོས་མ་ཐག་པའི། ཨཡ྄། ཨཱཡ྄། ཨབ྄། ཨཱབ྄་བྱས་པ་ལ། སྐབས་འགར། ཡ྄་བ྄་ཕྱིས་ན། སླར་ཕ་རོལ་གྱི་དབྱངས་དང་མཚམས་མི་སྦྱོར་བ། རང་བཞིན་དུ་འཇོག་པའི་དོན་ཡིན། དཔེར་ན། མོ་རྟགས། ཤྲདྡྷཱ་ལ་རྣམ་དབྱེ་གཉིས་པའི་ཨཽ་དང་། བཞི་བའི་ངེ་བྱིན། ཚིག་ཏུ་བསྒྲུབས་པས། ཤྲདྡྷཽ་དད་པ་དག་ལ། ཤྲདྡྷཱཡཻ་དད་པའི་ཆེད་དུ། ༈ཡང་སྐྱེས་པའི་རྟགས་ཨ་ཐུང་མཐའ། ཛཡ་ལ་རྣམ་དབྱེ་དང་བོའི་གཉིས་ཚིག་ཨཽ་སྦྱར་བས། ཛཡཽ་རྒྱལ་བ་དག ཨཽ་ཨཱིའོས་ཨཱིར་བསྒྱུར་མཚམས་སྦྱོར། ང་ལྡན་རྣམས་ཡེཡཱས྄་ཡཱས྄་ཡཱམ྄་མོ་ཞེས་པས། ངེ་ཡཻ་རུ་བསྒྱུར་བ་རེད། གྲུབ་པ་རྣམས་ཏེ། ཤྲདྡྷཱ་ཚིག་ཏུ་བསྒྲུབས་པ་དེ་གཉིས། ཨཱཧུ་དང་། ཛཡཽ་ཨཱ་ཀར་དང་མཚམས་སྦྱོར་བ། གོང་གི་མདོས། ཡ྄་བ྄་དབྱི་ཚར་རྟིང་མཚམས་སྦྱོར་མི་ཐོབ་པས་འདི་ལྟར་བཞག ཤྲདྡྷཱཨཱཧུ་དད་པ་དག་ལ་སྨྲས། ཛཡཱཨཱ་ཀར་རྒྱལ་བ་དག་གི་འབྱུང་གནས། ཛཡཱབཱ་ཀར་རྒྱལ་བ་དག་གི་འབྱུང་གནས་ལྟ་བུར་འགྲེ་བར་བྱའོ། །ཚིག་མཐའ་ཡིན་ན། རྟགས་མཐར་ཡ྄་བ྄་དབྱི་རྒྱུ་མེད་དོ། །ཚིག་མཐར་ཨེཏ྄་ཨོཏ྄་ལས་ཕ་རོལ་གྱི་ཨ་ཡིག་དབྱིའོ། །ཞེས་པ་ཨི་ཐུང་མཐར་སི་དང་། ཨུ་ཐུང་མཐར་བོད་སི་བྱིན་པའི་ཨེཏ྄་མཐའ་སྟེ་ཚིག་ཏུ་གྲུབ་པ་དེའི་ཕ་རོལ་ཏུ་ཨ་ཐུང་བྱུང་ན་དབྱི་ཞིང་པླུ་ཏ་བྲི་བའོ། །དཔེར་ན། བུདྡྷ་ལ་རྣམ་དབྱེ་དང་བོའི་སི་བྱིན། སིའི་ཨི་ཡིག་རྗེས་འབྲེལ་ཡིན་པས་ཕྱིས། ས྄་དེ་རེ་ཕ་དང་ས་དག་གི་རྣམ་པར་བཅད་བྱའོ། །ཞེས་རྣམ་བཅད་བྱས་པས། བུདྡྷཿགྲུབ། དེའི་ཕ་རོལ་ཏུ། ཨཏ྄་ཡོད་པ་ལྟ་བུར། འོག་ནས་འབྱུང་བའི་རྣམ་བཅད་ཀྱི་མཚམས་སྦྱོར་བས། རྣམ་པར་གཅད་བྱ་ཨ་ཡིག་དག་གི་བར་དུ་ཨུའོ། །ཞེས་པས། རྣམ་བཅད་ཀྱི་ས྄་ཨུ་བྱས། ངྷའི་དབྱངས་ཨ་ཕྱིར་ཕྲལ། ཨ་དང་ཨུ་འཕྲད་པས་ཨོ། ངྷ་དེའི་སྟེང་དུ་དྲངས་པས། བུདྡྷོ་གྲུབ། དེ་ཚིག་མཐར་ཨེཏ྄་ཨོཏ྄་ཀྱི་ཨོ་ཡིན། མདོ་དེས། ཨཏ྄འི་ཨ་ཕྱིས། འཇིག་རྟེན་པའི་ཉེ་བར་སྤྱོད་པ་ལས་འཛིན་པ་གྲུབ་བོས། པླུཏ་སྟེ་གསུམ་འཁྱོགས་བྱས་པས། བུདྡྷོ྅ཏྲ་སངས་རྒྱས་འདིར། ཞེས་པ་ལྟ་བུ་སྟེ། འཕྲོས་དོན། ངྷའི་སྲོག་གི་ཨ། རྣམ་བཅད་ཨུ། ཕ་རོལ་གྱི་ཨ་གསུམ་ཀ་འདུས་པས་དོན་དུ་྅་འཁྱོགས་བྲི་ཡང་། དབྱངས་གསུམ་འདུས་པའི་རྟགས་ཡིན་ནོ། །དེའི་དོན་གྱིས་སྔགས་ཀློག་རྣམས་སུ། པླུཏ་ནི་མིག་འཛུམ་གསུམ་གྱི་ཡུན་དུ་བཀླག་ཅེས་གསུངས་པའོ། །ཚིག་མཐའི་ཨེཏ྄་ཨོཏ྄འི་ཏ྄་ནི། ཨེ་འགྲེང་བུ་གཅིག་ཅན་དང་། ཨོ་རྣ་རུ་གཅིག་ཅན་ཁོ་ན་རེ་ངེས་བཟུང་དགོས་ཆེད་ཏ྄་ཡིག་གིས་མཐའ་འགེགས་པ་ཡིན་ནོ། །དེ་ལྟར། ཨནག་ཏེ། མ་འོངས་པའི། ཨདྡྷཱ་དུས། ཤུདྡྷོ་དག་པ། ཨཧཾ་ངའོ། ཨཏྨཀོ་བདག་ཉིད། ཨ་ཧཾ་ངའོ་རྣམས་བསྒྲུབས་འབྲས། ཨནགཏེ྅དྷཱ་མ་འོངས་པའི་དུས་ན། ཤུདྡྷོ྅ཧཾ་དག་པ་ངའོ། །ཨཏྨཀོ྅ཧཾ་བདག་ཉིད་ངའོ་ཞེས་པ་ལྟ་བུས་མཚོན་པར་བྱའོ། །གསལ་བྱེད་ལ་དབྱངས་རྣམས་མཚམས་སྦྱོར་མི་བྱའོ། །གསལ་བྱེད་དང་། གསལ་བྱེད་དབྱངས་ཡོད་གཉིས་ནང་འཕྲད་པའི། སྔ་མའི་གསལ་བྱེད་དབྱངས་ཡོད་ཀྱི་དབྱངས་ཕ་རོལ་ཏུ་ཡོད་ཀྱང་རྗེས་མའི་གསལ་བྱེད་ལ་དབྱངས་དེ་མཚམས་སྦྱོར་རྒྱུ་མེད་པས་མི་བྱ་སྟེ། དཔེར་ན། བུདྡྷ་དང་། ངྷརྨ་གཉིས་འཕྲད་ཚེ། བུདྡྷ་ངྷརྨ་ཞེས་རང་སར་འཇོག་པ་ལས། བུདྡྷའི་དབྱངས་ཨ་ཕྲལ་ནས། ངྷརྨ་ལ་མཚམས་སྦྱོར་རྒྱུ་མེད་པ་བཞིན་ནོ། །ཞེས་མཚམས་སྦྱོར་ལས་རྐང་བ་གཉིས་པ་རྫོགས་སོ། །
རྐང་བ་གསུམ་པ་མཚམས་སྦྱོར་མི་ཐོབ་པ།
༈རྐང་བ་གསུམ་པ་དབྱངས་ཀྱི་མཚམས་སྦྱོར་དེ་རྣམས་ཀྱི་དམིགས་བསལ་ཚིག་ཟིན་འགའ་ཞིག་མཚམས་སྦྱོར་མི་ཐོབ་པ་ནི། ཨོཏ྄་མཐའ་རྣམས་དང་། ཨ་ཨི་ཨུ་ཨཱ་ནི་པཱ་ཏ་རྣམས་དབྱངས་ལ་རང་བཞིན་གྱིས་སོ། །འདིར་དབྱངས་ཨོཏ྄་མཐའ་མི་ཟད་པ་ཡིན་པ། ངོ་མཚར་བ་དང་། སྐྱོ་བ་དང་། འདྲི་བ་དང་། རྣམ་པར་དཔྱད་པ་ལ་འཇུག་པའི། ཨཧོ་ཨུཏ྄་དང་། ཨཧོ་དེ་མཚམས་སྦྱར་བ། ཨུཏཧོ་སྟེ་ཡང་ན་ལ་འཇུག་པ། བཀྲ་ཤིས་པ་དང་། དེ་མ་ཐག་རྩོམ་པ། འདྲི་བ། མཐའ་དག་རྣམས་ལ་འཇུག་པ། ཨཐོ་སྟེ་ཨོཏ྄་མཐའ་དང་། ཉེར་བསྒྱུར་ཨཱང་ལས་གཞན་པའི་ནི་པཱ་ཏ་སྟེ་མི་ཟད་པའི་ཚིག་ཕྲད་དབྱངས་གཅིག་པ་རྣམས་མཚམས་མི་སྦྱོར་ཏེ། ཅུང་ཟད་དང་དངོས་མེད་བརྗོད་པའི་ཨ། སྐྱོ་བ་དང་ཁྲོས་ཚིག་གི་ཨེ། ཡང་དག་པར་རྟོགས་པ་དང་། ཁྲོ་ཚིག་གི་ཨུ། དྲན་པའི་དོན་དང་། ངག་སྦྱོར་གྱི་ཨཱ་རྣམས་དང་། ཤུགས་བསྟན་དུ། སྲུང་བ་དང་། སྲུང་བྱེད་དང་། གཙང་བ་དང་། བྱ་བ་དང་། རྩོམ་པ་དང་། གྲངས་མེད་པ་རྣམས་ལ། ཨཱུ་ལྷའི་མ་དང་། སྨན་པའི་དོན་ལ། རྀ་ལྀ་ལྷ་མ་ཡིན་གྱི། ལ་དང་། སྨད་པའི་དོན་ལ། རཱྀ་དྲན་པ་དང་། གླུ་ལེན་པ་རྣམས་ལ། ཨི་དྲན་པ་དང་། འགྲན་པ་རྣམས་ལ། ཨཽ་ཕྱག་དར་ལ། ཨཿའཇུག་པ་འདི་རྣམས་ཀྱི་ཕ་རོལ་ཏུ་དབྱངས་གང་བྱུང་ཡང་། མཚམས་མི་སྦྱོར་བར་འཇོག་དགོས་པའོ། །གཉིས་ཀྱི་ཚིག་ཨཽ་མ་ཡིན་པའོ། །ཞེས་མོ་རྟགས་ཨཱ་རིང་མཐར་དང་། མ་ནིང་ཨ་ཐུང་མཐར། རྣམ་དབྱེ་དང་བོའི་ཨཽ་དང་། གཉིས་པའི་ཨཽ་བྱིན་པ། ཤྲདྡྷེ་གཉིས་ཛ་ལེ་གཉིས་ལྟ་བུ། ཨགྣིའི་རྟགས་ཨི་ཐུང་དང་། ཨུ་ཐུང་མཐར། ཨཽ་ཡིག་སྔ་མ་ལའོས། ཨི་དང་། ཨུ་བྱེད་མཚམས་སྦྱོར་བའོ། །ཨཽ་གཉིས་བྱིན་པས་ཚིག་ཏུ་གྲུབ་པ། ཨཽ་ཨིའོ་ཞེས་མཚམས་སྦྱོར་བའོ། །ཧརཱི་གཉིས། པཊཱུ་གཉིས་རྣམས་ཀྱིས་མཚོན། ཨཽའི་རང་གཟུགས་འགྱུར་བ་དེའི་ཕ་རོལ་ཏུ་དབྱངས་གང་བྱུང་ཡང་མཚམས་མི་སྦྱོར་བ་སྟེ། དཔེར་ན་འདི་བཞིན་འཇོག ཤྲདྡྷེཨསྟི་དད་པ་དག་ཡོད། ཤྲདྡྷེཨཱཤྲམ་དད་པ་དག་ལ་གནས། ཛལེཨིནྡྲ་ཆུ་དག་དབང་བོ། ཛལེཨོདན་ཆུ་དག་ལ་ཟས། ཧརཱིཨིདཾ་སེང་གེ་དག་འདི། པཊཱུཨཽཥདྷི་མཁས་པ་དག་ལ་སྨན་ལྟ་བུའོ། །མང་བོའི་ཚིག་ཨ་མཱིའོ། །ཞེས་པ། སརྦནཱམའི་ཏྱད྄་ནང་ཚན། ཨདས྄་ལ་མང་ཚིག་ཛས྄་བྱིན། ཨདས྄་ཛས྄་བྱིན། དྷུ་ཊ་མང་བོ་ཉིད་ལ་ནི་ཨེའོ་ཞེས་པས། དེའི་སྲོག་གི་དབྱངས་ཨ་ཨིར་བྱེད། མང་བོ་ཉིད་ལ་ཨེཏ྄་ཨཱི་ཉིད་དོ་ཅེས་པས་ཨེ་ཨཱི་བྱེད། ཏྱཏ྄་ཆོ་ག ཏྱད྄་སོགས་ཀྱི་རྣམ་དབྱེ་ལ་ཨའོས་ས྄་ཨར་བསྒྱུར། ཨ་ཡིག་ལ་དབྱིའོས། དའི་སྲོག་གི་དབྱངས་ཨ་ཕྱིས། གསལ་བྱེད་དབྱངས་མེད་ཕྱིར་དྲངས་པས། ཨད་གྲུབ་པའོ། །ཛས྄་ཐམས་ཅད་ཨཱིའོས། ཛས྄་ཨི་བྱེད། དེ་ནས་ཛས྄འི་ཨཱི་དང་མཚུངས་འདྲ་བྱས་པས། ཨདཱི་གྲུབ། དེས་ཚིག་ཏུ་གྲུབ་ཚར་བ་ཡིན་པས། ཨདས྄འི་ཚིག་ལ་མའོ། །ཞེས་པས། ད་མར་བསྒྱུར་བས། ཨམཱི་འདི་རྣམས། དེ་ལྟར་གྲུབ་པའི་ཨཱ་མཱི་འདི་ཁོ་ན་ཉིད། ཕ་རོལ་གྱི་དབྱངས་དང་མཚམས་མི་སྦྱོར་བ་མཚོན་ན། ཧེཨམཱིཨཽཥངྷི། ཀྱེ་འདི་རྣམས་སྨན། ལྟ་བུ་རང་སར་འཇོག་གོ །ཉེ་བར་མ་བསྟན་པ་རྣམས་ཀྱང་ངོ་། །སྒྲ་གཞུང་འདིར་ཉེ་བར་མ་བསྟན་པ། སྐབས་ཐོབ་སྦྱོར་དུ་རུང་བ་གཞུང་གཞན་ནས་བཤད་པ་རྣམས་ཀྱང་ཆོག་པར། ཀྱང་ཞེས་སྡུད་པའི་སྒྲས་བསྟན་པ་སྟེ། གཞན་དུ། རྒྱང་རིང་བོ་ནས་འབོད་པ་དང་། ངུ་བ་དང་། གླུ་ལེན་པ་ལ་སོགས་པའི་དོན་ལ་པླུ་ཏ་སྦྱར་བ་སོགས། འདིར་མ་བཤད་པ། མཚམས་མི་སྦྱོར་རྒྱུ་ཡང་ཡོད་དོ། །ཧེདེབདཏྟ྅ཨཏྲ་ཀྱེ་ལྷས་བྱིན་འདིར། ལྟ་བུ། ཡི་གེ་ཤིན་ཏུ་མང་བོ་ནི་ཡུན་དུ་བརྗོད་པ་ཡང་ཡོད་དོ། །འགའ་ཞིག་གིས་དེ་འདྲའི་ཡི་གེ་མེད་ཟེར་བ་ནི། མ་བསླབས་པའི་ཤེས་བྱ་ལ་རྣམ་གཞག་བྱེད་པ་ཙམ་དུ་ཟད་དོ། །ཞེས་པ་མཚམས་སྦྱོར་ལས་རྐང་བ་གསུམ་པ་རྫོགས་སོ། །
རྐང་བ་བཞི་བ་གསལ་བྱེད་ཀྱི་མཚམས་སྦྱོར།
༈རྐང་བ་བཞི་བ་གསལ་བྱེད་ཀྱི་མཚམས་སྦྱོར་བསྟན་པ་ནི། སྡེ་བའི་ཚིག་མཐའ་རྣམས་དབྱངས་དང་སྒྲ་ལྡན་རྣམས་ལ་གསུམ་པ་རྣམས་སོ། །ཞེས་པ། སྡེ་བའི་དང་བོའི་ཚིག་མཐར་སྟེ། ཀ྄་ཙ྄་ཊ྄་ཏ྄་པ྄་འདི་རྣམས་ཀྱི་མཐའ་ཅན་ལ་རྣམ་དབྱེ་དང་བོའི་སི་སོགས་འཇིག་པ་དེ་རྣམས་ཀྱི་ཕ་རོལ་ཏུ་དབྱངས་བཅུ་བཞི་ནས། སྒྲ་ལྡན་ཉི་ཤུ་གང་རུང་བྱུང་ན་སྡེ་པ་རང་རང་གི་གསུམ་པར་མདོ་དེས་བསྒྱུར་བ་སྟེ། ཚིག་མཐའ་མིན་ན་མི་འགྱུར་བའང་ཤེས་དགོས་སོ། །དཔེར་ན། བཱཀ྄་ངག ཨཱིཤྭར྄་དབང་ཕྱུག བཱཀ྄་ངག ངྷཏུ་ཁམས། སྦྱོར་བས་བཱགཱིཤྭར་ངག་གི་དབང་ཕྱུག བཱགྔྷཏུ་ངག་གི་ཁམས། ཨཙ྄་དབྱངས། ཨནྟ་མཐའ། ཨཙ྄་དབྱངས། གམྦྷིར་ཟབ་མོ་སྦྱོར་བས། ཨ་ཛནྟ་དབྱངས་མཐའ། ཨཛ྄གམྦྷིར་དབྱངས་ཟབ་མོ། ཥཊ྄་དྲུག ཨངྒ་ཡན་ལག ཥཊ་དྲུག བཱསུ་ནོར། སྦྱོར་བས། ཥཌངྒ་ཡན་ལག་དྲུག ཥཌ྄བསུ་ནོར་དྲུག ཏཏ྄་དེ། ཨེཥཿའདིར། ཏཏྲ་དེ། ངྷརྨ་ཆོས། སྦྱོར་བས། ཏདེཥཿདེ་འདིར། ཏདྡྷརྨ་དེ་ཆོས། ཏྲིཥ྄ཊུཔ྄་གསུམ་བསྔགས། ཨ་བ་ལི་ཕྲེང་བ། ཏྲིཥ྄ཊུཔ྄་གསུམ་བསྔགས། ལཏཱ་འཁྲི་ཤིང་། སྦྱར། ཏྲིཥ྄ཊུཔབལི་གསུམ་བསྔགས་ཕྲེང་བ། ཏྲིཥ྄ཊུཔླཏཱ་གསུམ་བསྔགས་འཁྲི་ཤིང་། ལྟ་བུ། དབྱངས་དང་སྒྲ་ལྡན་གཞན་ཐམས་ཅད་ལ་དེས་འཕྲུལ་ལོ། །སྡེ་བའི་དང་བོ་ཚིག་མཐའ་རྣམས། ལྔ་བ་རྣམས་སུ་སྟེ། ཡང་ན་མ་ཡིན་པར་གསུམ་པ་རྣམས་སོ། །སྡེ་བའི་དང་བོ། ཀ྄་ཙ྄་ཊ྄་ཏ྄་པ྄་དེ་རྣམས་ཀྱི་ཚིག་མཐའི་ཕ་རོལ་ཏུ། སྡེ་བ་དེ་རྣམས་ཀྱི་ལྔ་བ། ང་ཉ་ཎ་ན་མ་རྣམས་སྣང་ན། ཚུ་རོལ་གྱི་ཚིག་མཐའི་སྡེ་བའི་དང་བོ་དེ། རང་རང་གི་ལྔ་བར་མདོ་འདིས་བསྒྱུར་བའམ། ཡང་ན་སྔ་མ་ལྟར་རང་རང་གི་གསུམ་པ་བྱེད་པ་གདམ་གའོ། །དཔེར་ན། བཱཀ྄་ངག མན་ཡིད་ལ། བཱངྨནའམ། བཱགྨན་ངག་ཡིད་དོ། ཨཙ྄་དབྱངས། ཉཀཱར་ཉ་ཡིག་ལ། ཨཉྙ་ཀཱརའམ། ཨཛྙཀཱར་དབྱངས་དང་ཉ་ཡིག་གོ །ཥཊ྄་དྲུག ཎཀཱར་ཎ་ཡིག་ལ། ཥཎྞཀཱརའམ། ཥཌྞཀཱར་ཎ་ཡིག་དྲུག་གོ །ཏཏ྄་དེ། ནཱ་ཐ་མགོན་པོ་ལ། ཏནྣཱཐའམ། ཏཏྣཱཐ་དེ་མགོན་པོའོ། །ཏྲིཥ྄ཊུཔ྄་གསུམ་བསྔགས། ངཀཱར་ང་ཡིག་ལ། ཏྲིཥ྄ཊུངྐཱརའམ། ཏྲིཥ྄ཊུཀྐཱར་གསུམ་བསྔགས་ང་ཡིག་གོ །ལྟ་བུས་མཚོན་པར་བྱའོ། །སྡེ་བའི་དང་བོ་རྣམས་ལས་ཤ་ཡིག་དབྱངས་དང་ཡ་བ་ར་ཕ་རོལ་ཅན་ནི་ཚ་ཡིག་སྟེ། ཡང་ན་མ་ཡིན་ནོ། །ཡང་སྡེ་བའི་དང་བོར། དཔེར་ན། བཱཀ྄་སི་བྱིན། གསལ་བྱེད་མཐའ་ལ་སི་དབྱིའོས། སི་བྱིན་པའི་རྗེས་མེད་ཀྱང་ཚིག་ཏུ་གྲུབ་པ་ལྟ་བུའོ། །སི་བྱིན་མཐར། ཀ྄་ཙ྄་ཊ྄་ཏ྄་པ྄་སྲོག་མེད་ལ། དེའི་ཕ་རོལ་ཏུ། ཤ་ཡིག་ལ་དབྱངས་ཁོག་ཞུགས་དང་། ཡ་བ་རའི་འདོགས་ཅན་བྱུང་ན། མདོ་འདིས་ཤ་ཚ་རུ་འགྱུར་བ་འམ། ཡང་ན་མ་ཡིན་ནོས་མི་འགྱུར་བ་གདམ་ག་བྱེད་པ་སྟེ། དཔེར་ན། བཱཀ྄་ངག ཤཱུར་དཔའ་བོ་ལ། བཱཀྪཱུརའམ། བཱཀྴཱུར་ངག་གི་དཔའ་བོ། ཥཊ྄་དྲུག ཤྱཱམ་སྔོ་བསངས། ཥཊ྄ཚ྄ཡཱམ་ཥཊ྄ཤྱཱམ། སྔོ་བསངས་དྲུག ཏཏ྄་དེ། ཤྭེཏ་དཀར་བོ། ཏཏ྄་ཀྱི་ཏ྄་དང་། ཏྲིཥ྄ཊུ་པ྄འི་པ྄་དེ་ཤ་ཚ་རུ་བསྒྱུར་བའམ་ཤ་དངོས་ཀྱི་མགོ་བོར་དྲངས་པས། སྒྲ་མེད་པ་ལ་དང་བོའོས་ཏ྄་དང་པ྄་སྟེང་མ་ཚ་རུ་བསྒྱུར་བ་རེད། ཏཙྪྭེཏ་འམ། ཏཙ྄ཤྭེཏ་དེ་དཀར་བོ། ཏྲིཥ྄ཊུཔ྄་གསུམ་བསྔགས། སྲུཏི་ཐོས་པ། ཏྲིཥ྄ཊུཙ྄ཚ྄རུཏིའམ། ཏྲིཥ྄ཊུཚ྄ཤ྄རུཏཾ་གསུམ་བསྔགས་ཐོས་པའོ། །དེ་རྣམས་ཉིད་ལས་ཧ་ཡིག་སྔ་མའི་བཞི་བ་སྟེ་ཡང་ན་མ་ཡིན་ནོ། །ཞེས་པ། སྡེ་བའི་དང་བོ་དང་། ཚིག་མཐའ་ཡིན་པར། ཕ་རོལ། ཧ་ལ་དབྱངས་ཡོད་བྱུང་ན། སྡེ་བ་སྔོན་དུ་གང་ཡོད་དེའི་བཞི་པར། ཧ་ཉིད་མདོ་འདིས་བསྒྱུར་ཞིང་། སྡེ་བའི་དང་བོ་དེ་ཡང་རང་སྡེའི་གསུམ་པར་བསྒྱུར་ནས་ཕར་དྲངས། ཡང་ན་ཧ་ཡིག་སྔ་མའི་བཞི་བར་མ་བསྒྱུར་ཀྱང་། དང་བོའི་ཚིག་མཐའ་གསུམ་པར་བསྒྱུར་ནས་ཕར་དྲངས་པ་གང་བྱས་འདྲ་ཞིང་། དཔེར་ན། བཱཀ྄་ངག ཧིཏ་ཕན་པ་བསྒྲུབས་འབྲས། བཱགྒྷིཏའམ་ཏའམ་བཱགྷིཏཾ་ངག་ལ་ཕན་པ། ཏཏ྄་དེ། ཧེ་ཏུ་རྒྱུ་ལ། ཏདྡྷེཏུའམ་ཏངྷེཏུ་དེ་རྒྱུ། ཨཙ྄་དབྱངས། ཧེརུཀ་ཁྲག་འཐུང་ལ། ཨཛྫྷེརུཀའམ་ཨཛྷེརུ་ཀ་དབྱངས་ཀྱི་ཁྲག་འཐུང་། ཥཊ྄་དྲུག ཧིམན྄་གངས་ཅན། ཥཌྜྷིམན྄་ནམ་ཥཌྷིམན྄་གངས་ཅན་དྲུག། ཨཔ྄་ཆུ། ཧརི་སྦལ་བ། ཨབ྄བྷརིའམ་ཨབྷརི་ཆུ་ཡི་སྦལ་བ། ལྟ་བུས་མཚོན་ནོ། །འདི་ཐད་དཔྱད་པར་བྱ་བ། དཔེར་བརྗོད་ཕྱི་མ་འདི་རྣམས་ཀྱི། ཚིག་མཐའ་སྡེ་བ་དང་བོ་དེ་རྣམས་སྡེབ་སྦྱོར་གྱི་སྐབས་བརྩེགས་པའི་ཕྱིར། འབྲུ་སྔོན་མ་ལྕི་དགོས་པ་ག་དང་ཧ་བརྩེགས་པའི་ཡིག་གཟུགས། གྷ་བྲིས་པ་དེ་འདྲ་མ་གཏོགས། སྡེ་བ་དང་བོའི་བཞི་བ་གྷ་སོགས་ཀྱི་ཡིག་གཟུགས་སུ་འབྲི་བས་འཁྲུལ་གཞི་མི་བསྐྱེད་དོ། །ཏ་ཡིག་ལ་དང་། ཙ྄་ཊ྄འི་སྡེ་བ་རྣམས་ལ་ཕ་རོལ་གྱི་གཟུགས་སོ། །ཤ་ལ་ཙའོ། །དེ་ལ་སྡེ་བ་བཞི་བའི་དང་བོ། ཏ་ཡིག་མཐའ་སི་བྱིན་པས་ཚིག་མཐའ་ལ། ཕ་རོལ་ཏུ། ལ་དང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ་རྣམས་བྱུང་ན། སྔ་མའི་ཏ་དེ། ཕྱི་མར་གང་ཡོད་དེའི་གཟུགས་སུ་མདོ་ཚིག་གིས་བསྒྱུར་ནས་དྲངས། ཕ་རོལ་སྒྲ་མེད་ཚ་ཋ་ཡིན་ན། སླར་ཡང་ཚ་ཋ་དེ་སྒྲ་མེད་པ་ལ་དང་བོའོ། །ཙ྄་ཛྷ྄་དང་ཊ྄་ཌྷ྄་བྱས་ནས་ཕར་དྲངས་དང་། ཏ་ཡིག་དེའི་ཕ་རོལ་ཏུ་ཤ་ཡོད་ན་ཏ་དེ་ཙ་བྱས་ནས་ཕར་དྲངས་པ་སྟེ། དཔེར་ན། ཏཏ྄་ལུནཏི་དེ་གཅོད་པར་བྱེད། ཏལླུན་ཏི་དེ་གཅོད་པར་བྱེད། ཏཏ྄་ཙརཏི་དེ་སྤྱོད་པར་བྱེད། ཏཙྩརཏི་དེ་སྤྱོད་པར་བྱེད། ཏཏ྄་ཚཱཏྲཾ་དེ་གདུགས། ཏཙྪཏྲཾ་དེ་གདུགས། ཏཏ྄་ཛཡ་དེ་རྒྱལ་བ། ཏཛྫཡ་དེ་རྒྱལ་བ། ཏཏ྄་ཛྷཥཡཏི་དེ་ཉ་རུ་བྱེད། ཏཛྫྷཥཡཏི་དེ་ཉ་རུ་བྱེད། ཏཏ྄་ཉཀཱར་དེ་ཉ་ཡིག ཏཉྙཀཱར་དེ་ཉ་ཡིག ཏཏ྄་ཊཱིཀྐ་དེ་འགྲེལ་བ། ཏཊྚཱིཀྐ་དེ་འགྲེལ་བ། ཏཏ྄་ཋཱཀུར་དེ་ཕྱུག་པོ། ཏཊྠཱཀུར་དེ་ཕྱུག་པོ། ཏཏ྄་ཌཱམརུ་དེ་ཅང་ཏེའུ། ཏཌྜམརུ་དེ་ཅང་ཏེའུ། ཏཏ྄ཌྷོཀཏི་དེ་འབུལ་བར་བྱེད། ཏཌྜྷོཀཏི་དེ་འབུལ་བར་བྱེད། ཏཏ྄་ཎཱཀར་དེ་ཎ་ཡིག ཏཎྞཀཱར་དེ་ཎ་ཡིག ཏཏ྄་ཤཱསན་དེ་བསྟན་པ། ཏཙ྄ཤཱསན་དེ་བསྟན་པ། ཏཏ྄ཤརབྷ་དེ་སེང་གེ་རྐང་བརྒྱད་པ། ཏཙ྄ཤར་བྷ་དེ་སེང་གེ་རྐང་བརྒྱད་པའོ། །ཞེས་པས་མཚོན་ནོ། །ང྄་ཎ྄་ན྄་ཨུཔདྷཱ་ཐུང་ངུ་ཅན་རྣམས་དབྱངས་ལ་གཉིས་སོ། །ཡང་ཚིག་མཐའ་ང྄་ཎ྄་ན྄་སྲོག་མེད་ཀྱི་སྔ་མ་དེ་ལ་ཨུ་པ་དྷཱ་ཟེར་ཞིང། དེ་ཉིད་དབྱངས་ཨ་ནས་ལྀ་བར་ཐུང་བ་དང་། གསལ་བྱེད་ཁོག་ཏུ་ཞུགས་པ་འདུག་ན། མདོ་འདིས། ཕ་རོལ་དབྱངས་ལ་དྲང་རྒྱུའི་ང྄་ཎ྄་ན྄་གང་ཡིན་གཉིས་ལྡབས་སུ་བྲིས་ནས་དྲངས་པ་སྟེ། དཔེར་ན། ཀྲུང྄་ཁྲུང་ཁྲུང་། ཨཏྲ་འདིར། ཆོ་ག་བྱས་པས། ཀྲུདྔཏྲ་ཁྲུང་ཁྲུང་འདིར། སུགཎ྄་(ག་འདི་ཨུ་པ་དྷཱ་ཡིན) ལེགས་བྱས། ཨི་དཾ་འདི། སུགཎྞིདཾ་ལེགས་བྱས་འདི། པཉྩན་ལྔ་ཨུཀྟཾ་སྨྲས། པཉྩནྣུ་ཀྟཾ་ལྔ་སྨྲས་སོ། །ཨུཔདྷཱ་དེ་ཐུང་ངུ་མིན་ན། ང྄་ཎ྄་ན྄་རྣམས་གཉིས་སུ་མི་འགྱུར་བའང་ཤེས་དགོས་སོ། །དེ་ནས་གསལ་བྱེད་ན་མཐའ་མཚམས་སྦྱོར་བའི་མདོ། ན་མཐའ་ཙ་ཚ་དག་ལ་ཤ་ཡིག་སྟེ་སྔ་མར་རྗེས་སུ་ང་རོའོ། །ཊ་ཋ་དག་ལ་ཥ་ཡིག་གོ །ཏ་ཐ་དག་ལ་ས྄་ཡིག་གོ །ལ་ལ་ལའོ། ཛ་ཛྙ་ཉ་ཤ་ཡིག་རྣམས་ལ་ཉ྄་ཡིག་གོ །ཤ་ལ་ཉྩ་དག་ཡང་ནའོ། །ཌ་ཌྷ་ཎ་ཕ་རོལ་ཅན་ནི་ཎ྄་ཡིག་གོ །ཞེས་ཚུ་རོལ་གསལ་བྱེད་ན྄་སྲོག་མེད་སི་ཕྱིས་པ་དེའི་ཕ་རོལ་ཏུ། ཙ་ཚ་ཊ་ཋ་ཏ་ཐ་ལ་རྣམས་བྱུང་ན་སྲོག་མེད་ན྄་དེ། མདོ་ཚིག་གིས་རིམ་པར། ཤ྄་ཥ྄་ས྄་ལ྄་རྣམས་སུ་བསྒྱུར་ནས་དྲང་ཞིང་སྔ་མ་ཨུ་པ་དྷཱ་རིང་ཐུང་གང་ཡོད་དེར་རྗེས་སུ་ང་རོའི་མཚན་མ་བྱེད། ལ྄་ལ་བསྒྱུར་དུས་སྔ་མར་ང་རོ་མི་བཞེད་པའང་འདོད་དོ། །དེ་བཞིན་དུ་ན྄་མཐའི་ཕ་རོལ་དུ། ཛ་ཛྷ་ཉ་ཤ་ཡིག་རྣམས་བྱུང་ན། ན྄་དེ་ཉ་བྱེད། ཡང་ན་དམིགས་བསལ་དུ། ཤ་ལ་ན྄་དེ་ཉྩར་བསྒྱུར། ཌ་ཌྷ་ཎ་ཕ་རོལ་ཡོད་ན། ན྄་དེ་ཎ྄་ཡིག་ཏུ་མདོ་སོ་སོས་བསྒྱུར་ནས་དྲངས་པས་འཐུས་ཤིང་། སྔ་མར་ང་རོ་མི་དགོས་སོ། །དཔེར་བརྗོད་ཀྱང་རིམ་པ་ལྟར་འདྲི་ན། བྷབཱན྄་ཁྱོད། ཙར་ཏི་སྤྱོད་པར་བྱེད། བྷབཱཾཤྩར་ཏི་ཁྱོད་སྤྱོད་པར་བྱེད། བྷབཱན྄་ཁྱོད། ཚདྱཏི་ཁྱོད་སྒྲིབ་པར་བྱེད། བྷབཱཾཤྪདྱཏི་ཁྱོད་སྒྲིབ་པར་བྱེད། བྷབཱན྄་ཁྱོད། ཊཱིཀཏེ་ཁྱོད་འགྲེལ་བར་བྱེད། བྷབཱཾཥྚིཀཏེ་ཁྱོད་འགྲེལ་བར་བྱེད། བྷབཱན྄་ཁྱོད། ཋཀུར་ཕྱུག་པོ། བྷབཱཥྠཀུར་ཁྱོད་ཕྱུག་པོའོ། །བྷབཱན྄་ཁྱོད། ཏརཏི་ཁྱོད་སྒྲོལ་བར་བྱེད། བྷབཱཾསྟརཏི་ཁྱོད་སྒྲོལ་བར་བྱེད། བྷབཱན྄་ཁྱོད། ཐུཌཏི་རྡེག་པར་བྱེད། བྷབཱཾས྄ཐུཌཏི་ཁྱོད་རྡེག་པར་བྱེད་དོ། །བྷབཱན྄་ཁྱོད། ལུན་ཏི་གཅོད་པར་བྱེད། བྷབཱཾལླུནཏི་ཁྱོད་གཅོད་པར་བྱེད་དོ། བྷབཱན྄་ཁྱོད། ལཀྵྨཱི་ཁྱོད་ཕུན་སུམ་ཚོགས་པ། བྷབཱལླཀྵྨཱི་ཁྱོད་ཕུན་སུམ་ཚོགས་པ། བྷབཱན྄་ཁྱོད། ཛཡཏི་རྒྱལ་བར་བྱེད། བྷབཱཉྫཡཏི་ཁྱོད་རྒྱལ་བར་བྱེད། བྷབཱན྄་ཁྱོད། ཛྷཥཡཏི་ཉ་རུ་བྱེད། བྷབཱཉྫྷཥཡཏི་ཁྱོད་ཉ་རུ་བྱེད། བྷཝཱན྄ཁྱོད། ཉཀཱརེཎ་ཉ་ཡིག་གིས། བྷབཱཉྙཀཱརེཎ་ཁྱོད་ཉ་ཡིག་གིས། བྷབཱན྄་ཁྱོད། ཤེཏེ་ཉལ་བར་བྱེད། བྷབཱཉྴེཏེ་ཁྱོད་ཉལ་བར་བྱེད་དོ། །བྷབཱན྄་ཁྱོད། ཤེཏེ། བྷབཱཉ྄ཙ྄ཤེཏེ་ཁྱོད་ཉལ་བར་བྱེད་དེ་ཡང་ན་ཉལ་བའོ། །བྷབཱན྄་ཁྱོད། ཌཱིནཾ་ཁྱོད་འཕུར་རོ། བྷབཱཎྜིནཾ་ཁྱོད་འཕུར་རོ། །བྷབཱན྄་ཁྱོད། ཌྷོཀཏི་འགུལ་བར་བྱེད། བྷབཱཎྜྷོཀ་ཏི་ཁྱོད་འགུལ་བར་བྱེད། བྷབཱན྄་ཁྱོད། ཎཀཱར་ཎ་ཡིག བྷབཱཎྞཀཱར་ཁྱོད་ཎ་ཡིག་གོ །ཞེས་པས་མཚོན་ཏེ་དཔག་པར་བྱའོ། །གསལ་བྱེད་མ་མཐའ་ཕ་རོལ་གྱི་ཡི་གེ་དང་མཚམས་སྦྱོར་བའི་མདོ། །མ་གསལ་བྱེད་ལ་རྗེས་སུ་ང་རོའོ། །སྡེ་བ་ལ་དེའི་སྡེ་བའི་ལྔ་བར་ཡང་ནའོ། །ཞེས་པས། ཚུ་རོལ་ཏུ་དབྱངས་དང་གསལ་བྱེད་གང་ཡིན་ཡང་དེའི་མཐར་མ་སྲོག་མེད་འདུག་ན། མདོ་སྔ་མ་དེས། རྗེས་སུ་ང་རོར་བསྒྱུར་ཞིང་། ཚུ་རོལ་ཏུ་སྡེ་བ་ལྔ་བོ་གང་རུང་སྣང་ན། མདོ་ཕྱི་མ་དེའི་ལྔ་བར་བསྒྱུར་ནས་ཕར་དྲངས་པ་གདམ་ག་བྱེད་པ་སྟེ། དཔེར་ན། སམ྄་ཡང་དག་པ། བྷཱར། ཚོགས་པ་མཚམས་སྦྱར་བས། སཾབྷཱརའམ་སམ྄བྷཱར་ཡང་དག་པར་ཚོགས་པ། ཀམ྄་སྡིག་པ། ཀནི་བཀག་པ། སྦྱར་བས། ཀཾ་ཀནིའམ། ཀངྐནི་སྡིག་པ་བཀག་པ། སམ྄་ཡང་དག་པ། གཏེ་འགྲོ་བ། སཾགཏེའམ་སངྒཏེ་ཡང་དག་པར་འགྲོ་བ། སམ྄་ཡང་དག་པ། ཙར་ཏི་སྤྱོད་པར་བྱེད། སཾཙརཏིའམ་སཉྩརཏི་ཡང་དག་པར་སྤྱོད་པར་བྱེད། སམ྄་ཡང་དག་པ། ཊཱིཀཏེ་འགྲེལ་བར་བྱེད། སཾཊཱིཀ་ཏེའམ་སཎ྄ཊཱིཀཏེ་ཡང་དག་པར་འགྲེལ་བྱེད། སམ྄་ཡང་དག་པ། ཏཐཱ་དེ་བཞིན། སཾ་ཏཐཱའམ་སནྟཐཱ་ཡང་དག་དེ་བཞིན། སམ྄་ཡང་དག་པ། ཕལ་བྷདྲ་འབྲས་བུ་བཟང་བོ། སཾ་ཕལ་བྷདྲའམ་སམྥལ་བྷདྲ་ཡང་དག་འབྲས་བཟང་། ལྟ་བུས་རིགས་འགྲེའོ། །ཞེས་པ་མཚམས་སྦྱོར་ལས། རྐང་བ་བཞི་བ་རྫོགས་སོ། །
རྐང་བ་ལྔ་བ་རྣམ་པར་བཅད་པའི་མཚམས་སྦྱོར།
༈རྐང་བ་ལྔ་བ་རྣམ་པར་བཅད་པའི་མཚམས་སྦྱོར་བསྟན་པ་ནི། རྣམ་པར་གཅད་བྱ་ཙའམ་ཚ་ལ་ཤ྄འོ། །ཊའམ་ཋ་ལ་ཥ྄འོ། །ཏའམ་ཐ་ལ་ས྄འོ། །ཀ་ཁ་དག་ལ་ལྕེ་རྩ་ཅན་ཏེ་ཡང་ན་མ་ཡིན་ནོ། །པ་ཕ་དག་ལ་མཆུ་ཅན་ཏེ་ཡང་ན་མ་ཡིན་ནོ། །ཤ་ཥ་ས་ལ་ཕ་རོལ་གྱི་གཟུགས་སུ་ཡང་ནའོ། །ཞེས་པ་སྔ་མར་སྐྱེས་པའི་རྟགས་མཐའ་ལ་སི་སོགས་བྱིན་ནས་ཚིག་ཏུ་བསྒྲུབས་པའི་རྗེས་རྣམ་བཅད། དེའི་ཕ་རོལ་ཏུ་སྒྲ་མེད་པའི་ཡི་གེ་བཅུ་གསུམ་སྟེ། ཙ་ཚ་ཊ་ཋ་ཏ་ཐ་རྣམས་སྣང་ན་རིམ་བཞིན་མདོ་སོ་སོས། ཤ་ཥ་སར་བསྒྱུར་ནས་ཕ་རོལ་གྱི་མགོར་དྲངས། ཀ་ཁ་པ་ཕ་ཤ་ཥ་ས་རྣམས་ཕ་རོལ་ལ་རིམ་བཞིན། ལྕེ་རྩ་ཅན་མཆུ་ཅན་ཤ་ཥ་སའི་རང་གཟུགས་སུ་མདོ་ཚིག་གིས་བསྒྱུར་ནས་ཕར་དྲངས་པའམ། རྣམ་བཅད་དེ་ཀ་ལྟར་འཇོག་པ་གདམ་ག་ཡིན་ལ། སྡེབ་སྦྱོར་སྐབས་དེ་འདྲའི་རྒྱ་ཡིག་གཟུགས་བརྩེགས་པ་མིག་སྔར་མཛེས་མིན་སྟབས་ཀྱིས་ཕལ་ཆེར་རྣམ་བཅད་རང་སར་བཞག་པ་མང་ངོ་། །དཔེར་ན། ནམཿཕྱག་འཚལ་ལོ། །ཙནྡྲབྷདྲཱཡ་ཟླ་བ་བཟང་བོའི་ཆེད་དུ། དེ་མཚམས་སྦྱོར་བས། ནམཤྩནྡྲབྷདྲཱཡཟླ་བ་བཟང་བོའི་ཆེད་དུ་ཕྱག་འཚལ་ལོ། །ནམཿཕྱག་འཚལ་ལོ། །ཚཱཏྲཤུཀླཱཡ་གདུགས་དཀར་བོའི་ཆེད་དུ། ནམཤ྄ཚཱཏྲཤུཀླཱཡ་གདུགས་དཀར་བོའི་ཆེད་དུ་ཕྱག་འཚལ་ལོ། །ནམཿཕྱག་འཚལ་ལོ། །ཊཱཀྐིརཱཛྙེ་འདོད་པའི་རྒྱལ་བོའི་ཆེད་དུ། ནམཥྚཱཀྐིརཱ་ཛྙེ་འདོད་པའི་རྒྱལ་བོ་ལ་ཕྱག་འཚལ་ལོ། །ནམཿཕྱག་འཚལ་ལོ། །ཋཀུར་བཻཤྲབཎཱ་ཡ་ཕྱུག་པོ་རྣམ་སྲས་ཆེད་དུ། རྣམ་དབྱེ་བཞི་བའི་ངེ་བྱིན། དེ་ལའོ། །དེ་ཡ་ཨ་ཡིག་སྒྲ་ལྡན་ལ་རིང་བོའོ། །རྟགས་མཐའ་རིང་བའོ། །ནམཥྛཀུར་བཻཤྲབཎཱཡ་ཕྱུག་པོ་རྣམ་སྲས་སྲས་ལ་ཕྱག་འཚལ་ལོ། །ནམཿཕྱག་འཚལ་ལོ། །ཏཱརཱཡཻ། སྒྲོལ་མ་ལ། ནམསྟཱརཱཡེ་སྒྲོལ་མ་ལ་ཕྱག་འཚལ་ལོ། །ནམཿཕྱག་འཚལ་ལོ། །ཐརཐརཀྲྀཏྭཱ་འདར་འདར་བྱས་ནས། ནམསྠར་ཐརཀྲྀཏྭ་འདར་འདར་བྱས་ནས་ཕྱག་འཚལ་ལོ། །ནམཿཕྱག་འཚལ་ལོ། །ཀན་ཀམུནཡེ་གསེར་ཐུབ་ཆེད་དུ། ནམྈྐནཀམུནཡེའམ་ནམཿཀནཀམུནཡེ་གསེར་ཐུབ་ཀྱི་ཆེད་དུ་ཕྱག་འཚལ་ལོ། །ནམཿཕྱག་འཚལ་ལོ། །ཁགར྄བྷཱཡ་ནམ་མཁའི་སྙིང་བོའི་ཆེད་དུ། ནམྈྑགར྄བྷཱཡ་ནམ་མཁའི་སྙིང་བོ་ལ་ཕྱག་འཚལ་ལོ། །ནམཿཕྱག་འཚལ་ལོ། །པརྞྞཤབཪྱཻ་ལོ་མ་གྱོན་མ་ཅན་གྱི་ཆེད་དུ་། ནམྉྤརྞྞཤཝཪྱེའམ། ནམཿཔརྞྞཤབཪྱཻ། ལོ་མ་ཅན་ལ་འདུད་དོ། །ཀཿཅི། ཕལཾ་འབྲས་བུ། ཀཀྥལལཾའམ། ཀཿཕལཾ་ཅི་འབྲས་བུ། ནམཿཕྱག་འཚལ་ལོ། །ཤཱཀྱམུ་ན་ཡེ་ཤཱཀྱ་ཐུབ་པ་ལ། ནམཤ྄ཤཱཀྱ་མུ་ན་ཡེའམ་ན་མཿཤཱཀྱམུནཡེ་ཤཱཀྱ་ཐུབ་པ་ལ་ཕྱག་འཚལ་ལོ།། ནམཿཕྱག་འཚལ་ལོ།། ཥཌངྒཱ་ཡན་ཡག་དྲུག་པ། ནམཥྵཌངྒཱཡའམ་ནམཿཥཌངྒཱཡ་ཡན་ལག་དྲུག་པ་ལ་འདུད་དོ། །ནམཿཕྱག་འཚལ་ལོ། །སཾགྷཱཡ་དགེ་འདུན་ལ། ནམསྶངྒཱཡའམ་ནམཿསངྒཱཡ་དགེ་འདུན་ལ་ཕྱག་འཚལ་ལོ། །ལྟ་བུའོ། ༈ རྣམ་པར་གཅད་བྱ་དེ། ཨ་ཡིག་དག་གི་བར་དུ་ཨུའོ། །ཨ་དང་སྒྲ་ལྡན་དག་གིའང་ངོ་། །ཞེས་པས་ཚུ་རོལ་ཏུ་གསལ་བྱེད་ལ་ཨ་ཐུང་ཁོག་ཞུགས་མཐར་སི་བྱིན་པས། རྣམ་བཅད་དེའི་ཕ་རོལ་ཏུ་ཨ་ཐུང་དང་། སྒྲ་ལྡན་ཉི་ཤུ་གང་རུང་བྱུང་ན། མདོ་ཚིག་གིས་རྣམ་བཅད་ཨུ་ལ་བསྒྱུར་ནས། སྔ་མ་དང་མཚམས་སྦྱོར་ནས་དྲངས། ཕ་རོལ་ཨ་ཐུང་ཡིན་ན་སྔར་བཤད་ལྟར། ཚིག་མཐར་ཨེཏ྄་ཨོཏ྄་སོགས་ཀྱི་ཕ་རོལ་གྱི་ཨ་ཕྱིས། འཇིག་རྟེན་པའི་ཉེར་སྤྱོད་ཀྱིས་པླུ་ཏར་བསྒྱུར་བ་སྟེ། དཔེར་ན། ཤུངྷཿདག་པ། ཨཧཾ་ངའོ། །མཚམས་སྦྱོར་བས། ཤུདྡྷོ྅ཧཾ་དག་པ་ངའོ། །ཡཿགང་། ཨཏྲཾ་འདིར། ཡོ྅ཏྲཾགང་འདིར། ནམཿཕྱག་འཚལ་ལོ། །ཨམོགྷསིདཾདྷཱཡ་དོན་ཡོད་གྲུབ་པའི་ཆེད་དུ། ནམོ྅མོགྷསིདྡྷཡ་དོན་ཡོད་གྲུབ་པ་ལ་ཕྱག་འཚལ་ལོ།། ནམཿཕྱག་འཚལ་ལོ། །ཨཀྵརབཛྲཱཡ་འགྱུར་མེད་རྡོ་རྗེ་ལ། ནམོ྅ཀྵར་བཛྲཱ་ཡ་འགྱུར་མེད་རྡོ་རྗེ་ལ་འདུད་དོ། །ནམཿཕྱག་འཚལ་ལོ། །བུདྡྷཱ་ཡ་སངས་རྒྱས་ལ། ན་མོ་བུདྡྷཱ་ཡ་སངས་རྒྱས་ལ་ཕྱག་འཚལ་ལོ། །ནམཿཕྱག་འཚལ་ལོ། །ངྷརྨཱཡཆོས་ལ། ནམོདྷཱརྨཱཡ་ཆོས་ལ་ཕྱག་འཚལ་ལོ། །ནམཿཕྱག་འཚལ་ལོ། །རཏྣཱརཱཛཱཡ་དཀོན་མཆོག་རྒྱལ་བོ་ལ། ནམོརཏྣརཱཛཱཡ་དཀོན་མཆོག་རྒྱལ་བོར་ཕྱག་འཚལ་ལོ། །ལྟ་བུས་མཚོན་ནོ། །ཨ་ལས་ཕ་རོལ་དབྱངས་གཞན་ལ་དབྱི་བའམ་ཡང་ན་ཡ྄འོ། །ཨཱཿབྷོ་དག་ལས། དབྱངས་ལ་འདི་ལྟ་ཉིད་དོ། །སྒྲལྡན་ལ་དབྱིའོ། །ཞེས་པ་ཚུ་རོལ་ཨ་ཐུང་རྟགས་མཐར་སི་བྱིན་པ་དང་། ཕ་རོལ་ཏུ་དེ་མིན་པའི་དབྱངས་གཞན་རྣམས་བྱུང་ན་རྣམ་བཅད་དབྱི་བའམ་ཡང་ན་ཡ྄་བསྒྱུར་ནས་དབྱངས་གང་ཡིན་པ་དེའི་སྟེང་དུ་དྲངས་པ་གདམ་ག་དང་། སྐྱེས་པའི་རྟགས་ཨ་ཐུང་ལ་ཛས྄། ཤྲདྡྷཱའི་རྟགས་མཐར། ཛས྄་ཤས྄་སིའོས། ནདཱི་ཨཱིཨཱུ་ལ། ངསི་བྱིན་པ། དཔེར་ན། དེབཱཿཛས྄། ལྷ་རྣམས། ཏཱརཱཿཛས྄། སྒྲོལ་མ་རྣམས། ཏཱརཱཡཱཿསྒྲོལ་མ་རྣམས་ལ། ཏཱརཱཡེཨཱམཿལ་སྒྲོལ་མའི་ཆེད་དུ། དེབྱཱཿལྷ་མོའི། དེབྱངསི་ལྷ་མོ་ལས། བདྷཱངསི་བུད་མེད་ལས། འདི་རྣམས་ཨཱ་རིང་མཐར་རྣམ་བཅད་བྱས་པ། གཽ་ལ། ཤས྄་བྱིན་པ། གཿ བ་ལང་རྣམས་ལ། སྐྱེས་པའི་རྟགས་ཨཱ་རིང་མཐར། སི་བྱིན་པས། སོམཔཱཿསྐྱེས་པ་ལྟ་བུ་འདི་རྣམས་ལ་ཨཱ་ཟེར། བྷབན྄ཏ྄། སི་བྱིན། བརྩེགས་པའི་མཐའ་དབྱི་འོས། ཏ྄་ཕྱིས། ཨནུཥྐང་དང་ཀྲུཉྩ་དང་། ཨིཏ྄་མ་ཡིན་པའིའོས། ན྄ཨནུཥངྒ་ཕྱིས། བྷབནྟའི་ཝ་ལ་སོགས་པའི་སཾབུདྡྷི་ལ་ཨུ་ཉིད་དོས་བ་ཨུ་བྱས། མཚམས་སྦྱོར་བས། བྷོཿགྲུབ་པའོ། །ལ་བོད་སི་བྱིན་པས། བྷོཿཀྱེ་ཁྱོད་དེ། ཨཱཿབྷོཿདག་གི་ཕ་རོལ་ཏུ་དབྱངས་བཅུ་གཉིས་གང་བྱུང་ཡང་། རྣམ་བཅད་ཕྱིས་པའོ་། །ཡང་ན་ཡ྄་རུ་བསྒྱུར་ནས་དྲངས་པ་ལ་དེ་ལྟ་ཉིད་དོ། །ཞེས་མདོ་སྔ་མ་ལ་ཁ་འཕང་བ་ཡིན། ཕྱིས་པ་ལ་སླར་མཚམས་མི་སྦྱོར་རོ། །ཕ་རོལ་སྒྲ་ལྡན་ཉི་ཤུ་བྱུང་ན་རྣམ་བཅད་དེ་དབྱི་བ་ཡིན། སྒྲ་མེད་བཅུ་གསུམ་བྱུང་ན་རྣམ་བཅད་དེ་མཚམས་སྦྱོར་ལྟར་བྱེད་ཆོག དེ་དག་ཀྱང་མདོ་སོ་སོས་རིམ་བཞིན་བསྒྲུབས་འབྲས། དཔེར་བརྗོད་ན། ནམཿཕྱག་འཚལ་ལོ། །ཨིནྡྲཡ་དབང་བོའི་ཆེད་དུ། ནམཨིནྡྲཡ་ཕྱག་འཚལ་ལོ་དབང་བོའི་ཆེད་དུ། ནམཿཕྱག་འཚལ་ལོ། །ཨཱརྱཱཡ་འཕགས་པའི་ཕྱིར། ནམཨཱཪྱཱཡའམ། ནམཡཱཪྱཱཡ་འཕགས་པའི་ཕྱིར་དུ་ཕྱག་འཚལ་ལོ། །ནམཿཕྱག་འཚལ་ལོ། །ཨཱིཤྭརཱཡ་དབང་ཕྱུག་ལ། ནམཨིཤྭརཱཡའམ་ནམཡཱིཤྭརཱལ་དབང་ཕྱུག་ལ་ཕྱག་འཚལ་ལོ། །དེབཱཿལྷ་རྣམས། ཨཱཧུ་སྨྲས་པ། དེབཱཨཱཧུའམ་དེབཱཡཱཧུ་ལྷ་རྣམས་སྨྲས། ཏཱརཱ་སྒྲོལ་མ་རྣམས། ཨཱཀར་འབྱུང་གནས། ཏཱརཱཨཱཀརའམ་ཏཱརཱཡཱཀར་སྒྲོལ་མ་རྣམས་ཀྱི་འབྱུང་གནས། ཏཱརཱཡ་སྒྲོལ་མ་ལས། ཨཱཡུརྫྙཱ་ན་ཚེ་དང་ཡེ་ཤེས། ཏཱརཱཡཱཨཱཡུརྫྙཱནའམ་ཏཱརཱཡཱཡཱཡུརྫྙཱན། སྒྲོལ་མ་ལས་ཚེ་དང་ཡེ་ཤེས། དེབྱཱཿལྷ་མོའོ།། ཨིནྡྲ་དབང་བོ། དེབྱཱཨིནྡྲའམ། དེབྱཱཡིནྡྲ་ལྷ་མོའི་ཕྱིར་དབང་བོ། དེབྱཱཿལྷ་མོ་ལས། ཨུམ། ཨུམ། དེབྱཱཨུམའམ་དེབྱཱཡུམ། ལྷ་མོ་ལས་ནི་ཨུ་མ། བདྷྭཱཿབུད་མེད་ཀྱི། ཨིཥུ་འདོད་པ། བདྷྭཱཨིཥུའམ་བདྷྭཱཡིཥུ་བུད་མེད་ཀྱི་འདོད་པ། གཱཿབ་ལང་རྣམས་ལ། ཨཔ྄་ཆུ། གཱཨཔ྄འམ་གཱཡཔ྄་བ་ལང་རྣམས་ལ་ཆུ། སོམཔཱཿསྐྱེས་པ། ཨེཥཿའདི། སོམཔཱཨེཥཿའམ། སོམཔཱཡེཥཿསྐྱེས་པ་འདིའོ། །བྷོཿཁྱོད། ཨཏྲ་འདིར། བྷོཨཏྲའམ། བྷོཡཏྲ་ཁྱོད་ནི་འདིར། བྷོཿཀྱེ། ཨཱིཤྭར་དབང་ཕྱུག བྷོཨཱིཤྭརའམ། བྷོཡིཤྭ་ར། ཀྱེ་དབང་ཕྱུག་གོ །ཡེངྷརྨཿགང་ཆོས་རྣམས། ཧེཏུ་རྒྱུ། ཡེངྷརྨཱཧེཏུ། ཆོས་རྣམས་གང་དག་རྒྱུ། བུདྡྷཱཿསངས་རྒྱས་རྣམས། བལ་སྟོབས། བུདྡྷཱབལ་སངས་རྒྱས་ཐམས་ཅད་སྟོབས། བྷོཿཁྱོད། ཨཱསི་ཐོབ་བྱེད། བྷོཨཱསིའམ། བྷོཡཱསི། ཁྱོད་ཐོབ་པར་བྱེད། ཅེས་པ་ལྟ་བུ་རིགས་པས་སྤྲོ་བར་བྱའོ། །ནཱ་མིན྄འི་ཕ་རོལ་ར྄འོ། །སྒྲ་ལྡན་དང་དབྱངས་ཕ་རོལ་ལོ། །ར྄འི་རང་བཞིན་ཅན་ན་ནཱ་མིན྄འི་ཕ་རོལ་མ་ཡིན་པའང་ངོ་། །རེ་ཕ་དང་ས྄་དག་གི་རྣམ་པར་གཅད་བྱའོ། །ཞེས་པའི་ཚུ་རོལ་ནཱ་མིན྄འི་དབྱངས་བཅུ་གཉིས་དངོས་སམ་གསལ་བྱེད་ཀྱི་ཁོག་ཏུ་ཞུགས་པ་དེའི་མཐར་སི་བྱིན་པའི་རྣམ་བཅད་དེ། ཕ་རོལ་ཏུ་དབྱངས་དང་སྒྲ་ལྡན་གང་བྱུང་ཡང་། མདོ་སྔ་མ་དག་གིས་ར྄་རུ་བསྒྱུར་ནས་དྲངས་པ་དང་། ཡང་རྣམ་བཅད་དེ་ར྄་སྲོག་མེད་ལས་གྲུབ་པ་ཡིན་ན། ནཱ་མིན྄་ཚུ་རོལ་ཏུ་ཡོད་མེད་ལ་མི་ལྟོས་པས་ར྄་རུ་བསྒྱུར། འདིའི་ཕ་རོལ་ལ་སྒྲ་ལྡན་ཀྱང་ཡོད་མེད་འདྲ་བ་ཡིན། སྤྱིར་རྣམ་བཅད་ནི་ར྄་སྲོག་མེད་དང་ས྄་སྲོག་མེད་དག་ལས་འབྱུང་བས་ན། རེ་ཕ་དང་ས་དག་གིའོ། །ཞེས་པའོ། །དཔེར་བརྗོད་པ་ཡང་། ཨགྣི་ལ་སི་བྱིན་རྣམ་བཅད་བྱས་པས། ཨགྣིཿམེ། བཡཱུ་རླུང་མཚམས་སྦྱོར་བས། ཨགྣིརྦཡཱུ་མེ་རླུང་། བདྷུཿབུད་མེད། གརྦྷ་སྙིང་བོ། བདྡྷུརྒརྦྷ་བུད་མེད་སྙིང་བོ། གུརུཿབླ་མ། བུདྡྷ་སངས་རྒྱས། གུརུརྦུདྡྷ་བླ་མ་སངས་རྒྱས། གླཽཿཟླ་བ། ཨུདཡ་དར་བའམ། འཆར་བ། གླཽརུདཡ་ཟླ་བ་འཆར་བ། ཧརིཿའཕྲོག་བྱེད། ཨཱུཧ་བཀོད་པ། ཧརིརཱུཧ་སེང་གེ་བཀོད་པ། པཏིཿབདག་པོ། ཨཱིཤྭར་དབང་ཕྱུག པཏིརཱིཤྭར་བདག་པོ་དབང་ཕྱུག མུནིཿཐུབ་པ། ལྀཀཱར་ལིཡིག མུནིརླྀཀཱར་ཐུབ་པའི་ལྀ་ཡིག ཧརེཿསཻངྒའི། ཨལཾཀར་རྒྱན། ཧརེརཱལཾཀར་སེངྒེའི་རྒྱན། པཊོཿམཁས་པ་ལས། ཛྙེཡཾ་ཤེས་བྱ། པཊོརྫྙེ་ཡཾ་མཁས་པ་ལས་ཤེས་བྱའོ། །ཨནྟར྄་ཡི་ར྄་རྣམ་བཅད་བྱས་པས། ཨནྟཿནང་། གཏ་འགྲོ་བ། ཨཾཏརྒཏ་ནང་དུ་འགྲོ་བ། སྭར྄་སྭར་དབྱངས་སམ་མཐོ་རིས། ཨཏྲ་འདིར། སྭརཏྲམཐོ་རིས་འདིར། སྒྲ་མེད་པ་ལའང་འགྱུར་ཏེ། ཨཧར྄་ཨཧཿཉི་མ། པ་ཏི་བདག་པོ། ཨཧཪྤ་ཏི་ཉིན་མོའི་བདག་པོ་ལྟ་བུའོ། །ཨེཥཿསཿལས་ཕ་རོལ་གསལ་བྱེད་ལ་དབྱིའོ། །རྣམ་པར་བཅད་བྱ་ཕྱིས་པ་ལ་སླར་མཚམས་སྦྱོར་མི་བྱའོ། །ཞེས་པ་འཆད་འགྱུར་སརྦནཱ་མ་ཞེས་མིང་ཐམས་ཅད་པའི་ཏཏ྄་སོགས་བརྒྱད་ཀྱི་བྱེ་བྲག ཨེཏཏ྄་ལ་སི་བྱིན། ཨེཏཏ྄་སྔར་སྨོས་བཞིན་ཏྱད྄་ཆོ་ག་བྱས། སིལ་ས྄འོ། །ཏའིའང་འོས། ཨཏའི་ཏ་དེ་ས་ཡིག་གི་གཟུགས་སུ་བསྒྱུར། སི་རྣམ་བཅད་བྱས་པས། ཨེཥཿའདི་དང་། ཡང་ཏྱད྄་ལ་སི་བྱིན། སྔ་མ་ལྟར་བསྒྲུབས་པས། སཿདེ། འདི་གཉིས་ཀྱི་རྣམ་བཅད་ཕ་རོལ་ཏུ་གསལ་བྱེད་སྒྲ་ལྡན་ཡོད་མེད་ལ་མི་ལྟོས་པར་གང་བྱུང་ཡང་ཕྱིའོ། །རྣམ་བཅད་ཕྱིས་ཟིན་ནས་གོང་འོག་ཏུ་དབྱངས་ཡོད་ཀྱང་མཚམས་སྦྱོར་མི་ཐོབ་པས་མི་བྱ་ཞིང་། དཔེར་ན། ཨེཥཿའདི། ཙརཏི་སྤྱོད་པར་བྱེད། ཨེཥཙརཏི་འདི་སྤྱོད་པར་བྱེད། ཨེཥཿའདི། གཏ་འགྲོ་བ། ཨེཥགཏ་འདི་འགྲོ་བ། ཨེཥཿའདི། བྷདྲ་བཟང་བོ། ཨེཥབྷདྲ་འདི་བཟང་བོ། སཿདེ། དཱད་ཏི་སྦྱིན་པར་བྱེད། སདཱདཏི་དེ་སྦྱིན་པར་བྱེད། སཿདེ། པཱུརྞྞ་གང་བ། སཔཱུརྞྞ་དེ་གང་བ། སུཨེཥཙརཏི་བཟང་བོ་འདི་སྤྱོད་པར་བྱེད། སཨེཥ་དེ་འདི་ལྟ་བུའོ། །ཞར་བྱུང་དུ། ར྄འི་ར་ལ་དབྱི་ཞིང་དབྱངས་སྔ་མའང་རིང་བའོ། །དབྱངས་ལས་ཕ་རོལ་ཚ་ཡིག་གཉིས་སུ་འགྱུར་རོ། །འདིར། ར྄་ཡིག་སྲོག་མེད་ཕ་རོལ་ཏུ་རའི་མགོ་བོར་དྲངས་པ་གཟུགས་མི་མཛེས་པས་ར྄་སྔོན་མ་ཕྱིས། སྔ་མར་དབྱངས་ཐུང་བ་རྣམས་ལ་རིང་ཆ་འདོགས། མཚམས་སྦྱོར་དབྱངས་ཡིག་བཞི་ནས་ཡིན་ན་རིང་ཆ་མི་དགོས། ཡང་ཚུ་རོལ་ཏུ་དབྱངས་རིང་ཐུང་གང་བྱུང་ཡང་། དེའི་ཕ་རོལ་ཏུ་ཚ་ཡོད་པ་དེ་མདོ་ཚིག་གིས་གཉིས་སུ་བསྒྱུར་ནས། སྒྲ་མེད་པ་ལ་དང་བོའོ། །ཚ་སྔོན་མ། ཙར་བསྒྱུར་ཏེ་དྲངས་དགོས་སོ་ཅེས་པ་སྟེ། དཔེར་ན། ཨགྣིར྄་མེ། རཐ་ཤིང་རྟ། ཨགྣིརཐ་མེའི་ཤིང་རྟ། པུནར྄་སླར། རཱཛ་རྒྱལ་བོ། པུནཱརཱཛ་སླར་ཡང་རྒྱལ་བོ། ཧརིཿསེངྒེ་། རཱཛ་རྒྱལ་བོ། ཧརཱིརཱཛ། སེངྒེའི་རྒྱལ་བོ། ཧྲཱིཚ། ཧཱིཙྪ། མླེ། ཚ། མླེཙྪ་དགའ་འཇོམས་ཏེ་ཀླ་ཀློ་ལྟ་བུའོ། །སྭསྟིསིད྄དྷྱཱཏ྄། བདེ་ལེགས་གྲུབ་པར་མཛོད་ཅིག །ཅེས་པ་མཚམས་སྦྱོར་ལས་རྐང་བ་ལྔ་བ་རྫོགས་སོ། །
དེ་ལྟར་མཚམས་སྦྱོར་ལྔའི་རི་མོའི་ལག་ལེན་གོ་དོན་བཅས་དཔྱིས་ཕྱིན་པར་བཤད་པ་འདི་ཉིད་སྒྲ་རིག་ལ་སློབ་པར་འདོད་པའི་ལས་དང་བོ་བ་རྣམས་ལ་ཕན་པའི་ཕྱིར་དུ་ཞེ་ཆེན་པ་འཇམ་དབྱངས་བློ་གྲོས་རྒྱ་མཚོས་བྲིས་པ་མངྒལཾ།། དགེའོ། །དགེའོ། །དགེའོ། །ཟླ་ཚེས་བཟང་བོར་སི་ནཱི་བཱ་ལཱིའམ་ཟླ་བ་གཞོན་ནུས་ཞེ་ཆེན་གསུང་འབུམ་དབུ་ཅན་ལག་བྲིས་མ་པོད་༡༦པ་ལས་ཁོལ་དུ་ཕྱུང་ཞིང་ལན་གཉིས་དག་པར་ཞུས་པ་དོན་གཉེར་ཅན་ལ་ཕན་པར་ཤོག
No comments:
Post a Comment