ཐང་སན་ལམ་ཡིག་ཏུ་འབྱུང་བའི་བརྡ་སྤྲོད་སྨྲ་བ་གཞན་གྱི་དྲིང་མི་འཇོག་པ་དྲང་སྲོང་པཱ་ཎི་ནིའི་སྐོར།

 

#འགྱུར་ཁྱད། (གུང་འགྱུར་དང་རྨེ་འགྱུར་དང་རྡོ་འགྱུར་གྱི་ཁྱད)

ཐང་གི་བཙུན་པ་ཞོན་ཙང་(༦༠༠?-༦༦༤)མཆོག་གིས་མཛད་པའི་ཏ་ཐང་ཞི་ཡུས་ཅིས་(大唐西域記)བྱ་བ་ཐང་གི་ནུབ་ལྗོངས་ཟིན་ཐོ་འདི་སྤྱི་ལོ་༦༤༦ལོ་སྟེ་དུས་རབས་བདུན་པའི་ནང་མཛད། དེ་ནི་ཡིད་ཆེས་འཕེར་ཞིང་སྒྲོ་སྐུར་དང་བྲལ་བའི་ལོ་རྒྱུས་ཟིན་ཐོ་ཞིག་ཏུ་བརྩི་ལ། ཁོང་སྐུ་མ་འདས་སྔོན་འབྲིར་མཛད་ཡོད་པ་དེས་རྒྱ་གར་གྱི་བྱུང་རབས་སྔ་མ་ཁག་རྟོགས་པར་ཧ་ཅང་ཕན་རླབས་ཆེན་པོ་བྱུང་ཡོད་པ་ཤར་ནུབ་མཁས་པ་ཁག་ཁ་གཅིག་གྲགས་དང་། དེ་བཞིན་དུ་རྒྱ་གར་གྱི་ནང་བའི་གནས་ཤུལ་གྲགས་ཅན་ཡུན་རིང་སའི་འོག་ཏུ་ནུབ་པ་ཁག་ཀྱང་ཐང་སིན་ལམ་ཡིག་གཞིར་བཟུང་བསྔོགས་པས་རྙེད་སོན་བྱུང་ཡོད།

པཱ་ཎི་ནི།

“烏鐸迦漢荼城西北行二十餘里，至娑羅睹邏邑，是制《聲明論》波你尼仙本生處也。遂古之初，文字繁廣，時經劫壞，世界空虛，長壽諸天，降靈導俗，由是之故，文籍生焉。自時厥後，其源泛濫。梵王、天帝作則隨時，異道諸仙各制文字。人相祖述，競習所傳，學者虛功，難用詳究。人壽百歲之時，有波你尼仙，生知博物，湣時澆薄，欲削浮偽，刪定繁猥，遊方問道，遇自在天，遂申述作之志。自在天曰：「盛矣哉！吾當祐汝。」仙人受教而退，於是研精覃思，捃摭群言，作為字書，備有千頌，頌三十二言矣。究極今古，總括文言，封以進上。王甚珍異，下令國中，普使傳習，有誦通利，賞千斤錢。所以師資傳授，盛行當世。故此邑中諸婆羅門碩學高才，博物強識。”

#玄奘：大唐西域記，881页。

 

༈ གྲོང་ཁྱེར་དེའི་ནུབ་བྱང་མཚམས་སུ་རྒྱང་གྲག་ཉི་ཤུའི་སྐོར་ན་བ་ར་ཏུ་རའི་[ཤཱ་ལཱ་ཏུ་རའི་(娑羅睹邏邑)] ལྗོངས་སྟེ། འདི་ནི་བྲམ་ཟེ་པ་ཎིའི་འཁྲུངས་ཡུལ་སྟེ། བྲམ་ཟེ་པ་ཎི་ཞེས་བྱ་བ་བསྐལ་པ་དང་པོའི་དུས་ལྷ་ཚངས་པ་དེར་བྱོན་ཏེ་སྔོན་གྱི་དྲང་སྲོང་རྣམས་ལ་སྨྲ་བའི་བསྟན་བཅོས་བཤད་པས་དེར་གནས་པའི་སྐྱེ་བོ་ཕལ་ཆེར་སྒྲ་རིག་ལ་དགའ་བ་དང་སྦྱངས་པ་མང་ངོ་། །རེ་ཞིག་ན་སྒྲ་ནུབ་ནས་ཧོར་ཁོངས་སུ་ལུས་པ་ལ་ལོ་བརྒྱ་བའི་དུས་སུ་བྲམ་ཟེ་པ་ཎི་སྐྱེས་ནས་དབང་ཕྱུག་ཆེན་པོ་བསྒྲུབ་པས་འགྲུབ་སྟེ་ཞལ་མངོན་སུམ་དུ་མཐོང་། དབང་ཕྱུག་གིས་སྨྲ་བའི་བསྟན་བཅོས་ཀྱི་ས་བོན་བསྩལ། ཊིཀྐ་བརྩོམ་ཞིག་ཅེས་ལུང་བསྟན་ལྟར་བརྩམས་པས་ཚིག་རྐང་བཞི་དེར་ཡི་གེ་སུམ་ཅུ་རྩ་གཉིས་རེ་ཡོད་པའི་ཤླཽ་ཀ་སྟོང་ཚང་བ་ཞིག་མཛད་དོ། །དེའི་གདུང་འཛིན་བྲམ་ཟེ་སྒྲ་ལ་མཁས་པ་མང་པོ་བྱུང་ཞིང་འབྱུང་བར་འགྱུར་བཞིན་པ་དང་ད་དུང་ཡང་འབྱུང་བར་འགྱུར་བར་སྣང་ངོ་།།”

#གུང་མགོན་པོ་སྐྱབས། (༢༠༠༦ ཤ༥)

ཞོན་ཙང་གི་ལམ་ཐིག   སིན་ཐན་སིན། ༢༠༠༦

“ཨུད྄ཀ་ཁནྜའི་གྲོང་ནས་ནུབ་ཕྱོགས་སུ་ལེ་དབར་ཉི་ཤུ་ལྷག་སོང་བས་ཤ་ལཱ་ཏུ་རའི་གྲོང་བརྡལ་ལོ། །དེ་ནི་སྒྲའི་བསྟན་བཅོས་མཛད་པ་པོ་དྲང་སྲོང་པཱ་ཎི་ནི་འཁྲུངས་པའི་གནས་ཡིན། བསྐལ་བ་ཐོག་མའི་དུས་མི་མཇེད་ཀྱི་ཞིང་ཆེན་པོ་འདིར་ཡི་གེའི་རིགས་མང་ཞིང་རྙོགས་ལ་དུས་ཀྱི་འཕེལ་འགྲིབ་ཁྲོད་དེ་དག་རེ་རེ་བཞིན་རྒུད་པའི་ཚེ། སུམ་ཅུ་རྩ་གསུམ་གྱི་ལྷའི་ཚོགས་མི་ཡུལ་དུ་བྱོན་ནས་འཇིག་རྟེན་མི་རྣམས་འདྲེན་པའི་དུས་སུ་སྐད་དང་ཡི་གེ་བྱུང་བ་ཡན་ལག་དུ་མར་གྱེས། རིམ་པར་ཚངས་པ་དང་བརྒྱ་བྱིན་གྱིས་སྐབས་དེའི་ཡུལ་དུས་ལ་གཞིགས་ཏེ་བརྡ་སྤྲོད་ཀྱི་སྲོལ་གཏན་ལ་ཕབ། དེ་མུར་ཕྱི་རོལ་པའི་སྟོན་པ་དག་གིས་རང་རང་གི་ཡི་གེ་གསར་དུ་བཟོས་པ་དེ་དག་ལུ་གུ་རྒྱུད་དུ་སྤེལ་ཡང་བྱཱ་ཀ་ར་ཎའི་རིགས་ལམ་རྣམ་དག་ཤིན་ཏུ་རྟོགས་དཀའ་བའི་གནས་སུ་ལུས། ཕྱིས་ཚེ་ལོ་བརྒྱ་པའི་སྐབས་དྲང་སྲོང་པཱ་ཎི་ནི་ཞེས་བྱ་བ་ཆུང་དུས་ནས་བློ་དང་རིག་པ་རྣོ་ཞིང་འཇིག་རྟེན་གྱི་ཆོས་ཀུན་ལ་ཐོགས་པ་མེད་པ་ཞིག་བྱུང་བ་དེས་མི་ཡུལ་ན་ཡོད་པའི་བརྡ་སྤྲོད་ཀྱི་སྐད་དང་རིག་པ་སྤྱིར་བཏང་བ་མང་ཞིང་སླ་བས་ཡིད་འབྱུང་སྟེ་ཡུལ་ཁམས་གང་སར་མྱུལ་བ་ལས་ལྷ་ཆེན་དབང་ཕྱུག་དང་མཇལ་ཏེ་རྒྱུ་མཚན་ཇི་བཞིན་ཞུས། ལྷ་ཆེན་པོས་ལེགས་སོ་ངས་ཁྱོད་ལ་བྱིན་གྱིས་བརླབས་ངེས་ཞེས་ལུང་བསྟན་པ་ན་བྲམ་ཟེ་པཱ་ཎི་ནི་རང་གནས་སུ་ཞིབ་ཏུ་བསམས་ནས་བརྟུན་པ་བསྐྱེད་དེ་ཡུལ་དུ་མའི་སྐད་དང་ཐ་སྙད་བསྡུར་ཞིང་ཡི་གེར་ཕབ་པའི་བརྡ་སྤྲོད་ཀྱི་བསྟན་བཅོས་སྔ་དེང་ཡིག་སྲོལ་ཟུང་དུ་སྦྲེལ་བ་ཁྱོན་ཤོ་ལོ་ཀ་ཆིག་སྟོང་ཡོད་པ། ཤོ་ལོ་ཀ་རེར་ཡིག་འབྲུ་སུམ་ཅུ་རྩ་གཉིས་མངའ་བ་ཞིག་ཡུལ་གྱི་རྒྱལ་པོའི་སྤྱན་སྔར་བསྟར། རྒྱལ་པོ་རབ་ཏུ་དགྱེས་ནས་བཀའ་ཕབ་སྟེ་ཆབ་འབངས་སུ་ཞིག་གིས་བསྟན་བཅོས་དེ་ཉིད་ཚེགས་མེད་ངག་ནས་འདོན་ནུས་ན་གསེར་ཞོ་ཆིག་སྟོང་ཐམ་པ་བདག་རྐྱེན་དུ་གནང་རྒྱུའི་གཏམ་བསྒྲགས་པར་མཛད། དེ་ལྟར་དགེ་སློབ་རིམ་པར་བརྒྱུད་དེ་བསྟན་བཅོས་དེ་ཤིན་ཏུ་དར་ཆེ་བར་གྱུར་པས་གྲོང་གི་དབུས་ན་བློ་རིག་བཀྲ་ལ་ཤེས་བྱར་མཁས་པའི་བྲམ་ཟེ་ཧ་ཅང་མང་པོ་བྱུང་།”

#རྨེ་རུ། (༢༠༡༨ ཤ༨༧-༨)

 

ཞོན་ཙང་གི་ལམ་ཐིག   ཝི་ཁི།

“ཨུཌ་ཁཎྜའི་གྲོང་ནས་ནུབ་བྱང་ཕྱོགས་སུ་ལེ་དབར་ཉི་ཤུ་ལྷག་སོང་ན་ཤཱ་ལཱ་ཏུ་རའི་ཡུལ་ཡོད་ཅིང་། དེ་སྒྲའི་གཞུང་མཛད་པོ་པཱ་ཎི་ནིའི་འཁྲུངས་ཡུལ་ལོ། ། སྔོན་བྱུང་བ་འདས་པའི་དུས་ཡི་གེ་ཤིན་ཏུ་དར་མོད། འཇིག་པའི་བསྐལ་བ་བརྒྱུད་པས་རིམ་གྱིས་རྒུད་དེ་སྟོང་བར་གྱུར་བའི་ཚེ། འཆི་མེད་ལྷ་རྣམས་མི་ཡུལ་དུ་འཕོས་པར་བརྟེན་ཡི་གེ་དང་བསྟན་བཅོས་དར་བར་མཛད་པ་དུ་མར་གྱེས་པ་ན། སླད་མར་ཚངས་པ་དང་ལྷའི་དབང་བོས་རྗེས་སུ་བསྟན་པར་མཛད་མོད།  སྟོན་པ་སོ་སོས་ཡི་གེ་ལོགས་སུ་མཛད་ཅིང་། གཞུང་སྤེལ་བས་སློབ་པ་རྣམས་ལོབས་དཀའ་བར་གྱུར་རོ། ། 

སླད་ཀྱིས་ཚེ་ལོ་བརྒྱ་བའི་ཚེ། སྐྱེས་སྟོབས་ཀྱི་ཤེས་རབ་ཆེ་བ་བྲམ་ཟེ་པཱ་ཎི་ནི་བྱ་བ་བྱོན་ཞིང་།  སྦྱང་བ་ཆུང་བ་རྣམས་ལ་ཐུགས་མུག་སྟེ་སྒྲའི་རྙོག་མ་དྲུངས་ནས་འབྱིན་པར་འདོད་དེ། ཕྱོགས་བཞིར་རྨེད་ཅིང་བྱོན་པ་དབང་ཕྱུག་གི་ཞལ་གཟིགས་ཅིང་ལྷའི་བཞིན་གཞུང་བརྩམ་པར་འཚལ་བ་ན། ལྷས་ལེགས་ཀྱིས་བདག་གནང་ངོ་ཞེས་གནང་བ་ཐོབ་ཅིང་ལོག་གོ ། དེ་ནས་ལེགས་པར་དགོངས་ཤིང་ཚིགས་བཅད་རེར་ཡིག་འབྲུ་སོ་གཉིས་རེ་ཅན་གྱི་ཤོ་ལོ་ཀ་ཆིག་སྟོང་ཡོད་པ་འཇིག་རྟེན་ལས་འདས་མ་འདས་གཉིས་ཀའི་ལུགས་མ་ལུས་པར་ལེགས་པར་བརྟག་པའི་གཞུང་མཛད་དེ་རྒྱ་དང་བཅས་གོང་ལ་ཕུལ་བར། རྒྱལ་བོས་ལེགས་པར་བཀུར་ཏེ་ཡོངས་ལ་ལེགས་པར་སློབས་ཤིག་པའི་བཀའ་བསྒྲགས་ཤིང་སུས་བློར་ངེས་ན་གསེར་སྲང་ཆིག་སྟོང་གི་སྐྱེས་གྱ་ནོན་པ་ཡོད་པར་བསྩལ་ལོ། ། དེ་ལྟར་བླ་སློབ་བརྒྱུད་དེ་གཞུང་འདི་ཤིན་ཏུ་དར་བར་གྱུར་བས།  གྲོང་དེའི་བྲམ་ཟེ་ཐམས་ཅད་ཤེས་རབ་ཀྱི་རྩལ་དང་ལྡན་པར་གྱུར་ལ་མཁས་ཤིང་དྲན་པ་རབ་ཏུ་བརྟན་པར་གྱུར་རོ། །”

#ཟླབཞོནུ  (༢༠༢༢)

གསེར་ཐང་ལས་འབྱུང་བའི་ཁ་ཆེའི་ལོ་རྒྱུས།

     

མ་ཁ

ད་ནི་དུས་ཕྱིས་རྒྱ་གར་ཡུལ་དུ་ཡུན་རིང་བོར་སྲིད་བཟུང་བའི་ཀླ་ཀློ་རྣམས་ཀྱི་འབྱུང་ཁུངས་དང་ལོ་རྒྱུས་དག་ལ་རང་གི་གཤིས་ལུགས་ཀྱིས་སྐྱོན་བརྗོད་ཕྲ་མོ་ཡང་མ་ཤོར་བར། རྒྱལ་རབས་སུ་གསལ་བ་དེ་ཁོ་ན་ལྟར་བྲི་བར་བྱའོ། །དེ་ཡང་འདི་དག་ལ་རྒྱ་གར་བ་རྣམས་མླེ་ཙྪ་སྟེ་ཀླ་ཀློའམ་ཇག་པར་འབོད་པ་ངན་སྨྲས་ཀྱི་མིང་ཡིན་ཞིང་། རང་བཞིན་གྱི་མིང་ལ་མུ་སལ་མན་དང༌། ཆོས་ལུགས་ལ་ཨི་ས་ལེམ་དང་། འདི་དག་གི་རྒྱལ་བོ་རྒྱ་གར་དུ་སྲིད་བཟུང་བ་ཕྱིས་ཤས་རྣམས་ལ་མུངྒལ་གྱི་རྒྱལ་བོར་འབོད། ཡེ་ཤུ་མ་བྱུང་བའི་སྔོན་གྱི་འཇིས་བོའམ་ཡ་ཧུ་དར་བྲིས་པ་དེ་དག་གི་ཆོས་ལུགས་དང་། མུ་སལ་མན་གྱི་ལུགས་གཉིས་རྩ་བ་གཅིག་ཡིན་པས། ཡེ་ཤུའི་ལུགས་དང་། ཨི་ས་ལེམ་གཉིས་ཀྱི་དང་བོའི་འབྱུང་ཁུངས་ཀྱང་གཅིག་ཡིན་ཞིང་། ཅུང་ཟད་ཅིག་བཅོས་ན་རྒྱ་གར་གྱི་མུ་སྟེགས་པའི་ལྟ་བའི་རྩ་བ་དང་ཡང་བསྲེས་ནུས་པས། དུས་ཕྱིས་རྒྱ་གར་བའི་སྟོན་པ་ནཱ་ན་ཀ་དང་། དགའ་བྱེད་ནག་པོ་སོགས་ཀྱིས་ཀྱང་ཆོས་དེ་གསུམ་ག་གཅིག་ཏུ་བསྲེས་ནས་ལུགས་གསར་བའི་སྲོལ་ཞིག་ཀྱང་ཕྱེས་སོ། །

དེ་ཡང་ཡེ་ཤུ་བ་དང་། ཡ་ཧུ་ད་བ་དང་། མུ་སལ་མན་གསུམ་གས་ཀྱང་སྣང་སྲིད་ཀུན་གྱི་བྱེད་པོ་བདེ་སྡུག་ཀུན་གྱི་སྟངས་འཛིན་པའི་ལྷ་གཙོ་བོ་གཅིག་བུ་ཞིག་ཡོད་ཅིང་། དེ་ཁོ་ན་སྐྱབས་གནས་སུ་འཛིན་དགོས་སོ་ཞེས་སྨྲ་བ་ཡིན་ཞིང་། རྒྱ་གར་གྱི་མུ་སྟེགས་རྣམས་ཀྱང་ཚངས་པ་ལ་དེ་ལྟར་ཤེས་པ་ཡིན་ལ། འོན་ཀྱང་སངས་རྒྱས་པའི་ཤན་ཞུགས་ཏེ་ཚངས་པ་དེ་རེ་འགའ་ཆོས་ཀྱི་དབྱིངས་ལྟ་བུར་བཤད་པས། ཤེས་རབ་ཅན་རྣམས་ལ་སྒོམ་རྒྱུ་དང་དཔྱད་རྒྱུ་མང་དུ་ཡོད་པ་ཞིག་བྱས་སོ། །དེ་ལྟར་ན་འདི་དག་གི་སྐྱབས་ཡུལ་གྱི་ལྷ་དེ་ལ་བྱེད་པ་བོ་ཞེས་ཐ་སྙད་བྱས་ན་རང་རེ་འཆད་བདེ་བས་དེ་ལྟར་བྱ་ལ། ཡ་ཧུ་ད་བ་དང་། ཡེ་ཤུ་རྣམས་ཀྱིས་ཡ་ཧོ་ཝའམ་ཇ་ཧོ་ཝར་འབོད། མུ་སལ་མན་རྣམས་ཨ་ལླ་ཞེས་འབོད་དེ་ངོ་བོའམ་བསམ་ས་དེ་གཅིག་ཡིན་ནོ། །

ཡ་ཧུ་དའི་ཆོས་ནི་ཀླ་ཀློ་རྣམས་ཀྱིས་ཀྱང་ཚད་མར་འདོད་ཅིང་། དུས་འཁོར་ཁམས་ལེར་སྦྲང་རྩི་བློ་གྲོས་གོང་དུ་བྱི་བ་བྱ་བའི་ཀླ་ཀློའི་སྟོན་པའི་མིང་བྱུང་བ་དེ་ཡང་། ཡ་ཧུ་དའི་ཐོག་མའི་སྟོན་པ་མུ་ཥའི་མིང་ལ་ཀླ་ཀློ་རྣམས་ན་བཱི་མཱུ་ཥཱ་ཞེས་འབོད་པས་དེ་བསྒྱུར་བ་ཡིན་ནམ་སྙམ་ཞིང་། དེར་ཀླ་ཀློའི་སྟོན་པ་སྔ་མ་རྣམས་འདྲེན་པ་ན། ཨ་ད་མ་ནོ་གྷ་དང་། ཕག་ལྡན་སོགས་བྱུང་བ་ཡང་གདོན་མི་ཟ་བར་རྒྱ་དཔེ་ལ་ཨདཾཨནོགྷབཱརཧྨ་ཞེས་བྱུང་བ་ལ་བྱ་ཞིང་མིང་སྔ་ཕྱིའི་མཚམས་ནོར་ནས་ཨོ་གྷ་བྱ་བ་རླབས་ལྡན་དུ་བསྒྱུར། ལར་རྒྱ་གཞུང་ཞིག་ནས་བྱུང་ཕྱིན་མིང་ཐམས་ཅད་ལེགས་སྦྱར་ཡིན་སྙམ་པ་འདི་རང་རེ་རྣམས་ཀྱི་ནོར་ཆེན་དུ་སྣང་། ཨ་དཱཾ་དང་། ནོ་ཨཱ། ཨབྲཧམ་རྣམས་ཀྱི་མིང་ཡིན་པར་འདུག་སྟེ། མ་མ་ཐར་གྱི་སྔོན་དུ་བྱུང་བའི་སྟོན་པ་གྲགས་ཆེན་འདི་དག་ཡིན་པས་སོ། །དེས་ན་ཚིག་ཕྱི་མ་ལ་གཅོད་མཚམས་ནོར་ཏེ། བ་རཱ་ཧཱི་ཕག་ལྡན་དུ་བསྒྱུར་སྙམ། 

ཀླ་ཀློ་རྣམས་ཀྱི་དང་བོའི་སྟོན་པ་ནི་མུ་ཧམ་མད་ཡིན་ཞིང་། མ་མ་ཐར་བྱ་བ་ཡང་འདི་ཟུར་ཆག་པར་མངོན་ལ། དུས་འཁོར་དུ་སྦྲང་རྩི་བློ་གྲོས་བྱུང་བ་ཡང་། རྒྱུད་ཕྱི་མ་ན། ཀླ་ཀློའི་མགོན་པོ་མ་དྷུ་མ་ཏི་ཞེས་དངོས་སུ་འཐོན་འདུག་པས་དེ་ལེགས་སྦྱར་རང་དུ་བསམ་ནས་བསྒྱུར་བར་ཐེ་ཚོམ་མེད་དེ། དེར་བག་དཱ་ལ་ངག་སྦྱིན་སོགས་ཨ་རབ་ཀྱི་ཀླ་ཀློའི་གྲོང་འགའ་ཞིག་གི་མིང་ཡང་རྒྱ་སྐད་བཞིན་བྲིས་ནས་བསྒྱུར་བས་སོ། ། དེ་བཞིན་མ་ཁ་ཡང་རྒྱ་གར་ན་ཡོད་པར་བཤད་མོད། ད་ལྟའི་ས་མཚམས་འདིའི་དབང་དུ་བྱས་ཚེ་ཏ་ཟིག་གི་ཡང་ཕར་ངོས་སུ་ཡིན་པས་མདོ་སྨད་ནས་རྒྱ་གར་ཙམ་གྱི་ཐག་ཡོད་དོ། ། དེས་ན་མུ་ཧ་མྨ་ད་བྱ་བ་དོན་ལ་ཨ་རབ་བྷིའི་སྐད་ཡིན་ཞིང་། མ་དྷུ་མ་ཏི་དང་། མ་མ་ཐར་གཉིས་ཀ་ཚིག་དེ་ཉིད་ཀློག་ཉམས་པ་ཙམ་མོ། །

འདི་དག་གི་སྟོན་པའི་ལོ་རྒྱུས་ལ་རང་རེས་ཀླུ་སྒྲུབ་ཀྱི་སློབ་མ་ཞིག་ཁྲིམས་འཆལ་ནས་ཆོས་ལོག་བརྩམས་པ་ཡིན་སོགས་བྲིས་པ་ཡང་ཕལ་ཆེར་ཆགས་སྡང་གི་གཏམ་མིན་ནམ་སྙམ་ལ། དེ་བཞིན་དགེ་སློང་ཞིག་གནས་ནས་ཕྱུངས་པར་རྔ་མ་བརྡུང་བར་ང་འགྲོ་ཆོག་སྨྲས་ཀྱང་མ་ཉན་པས་སྙིང་ནད་ཀྱིས་ཀླ་ཀློའི་ཆོས་བརྩམས་ཟེར་བ་ཡང་། དུས་འཁོར་གྱི་བོད་འགྲེལ་རྙིང་བ་ཞིག་ཏུ། སཉྩཱི་བི་ཧཱ་རའི་མཁན་པོ་བསླབ་པ་ཉམས་པ་ལ་དེ་ལྟར་བྱུང་ནས་སྙིང་ནད་ཀྱིས་ཆོས་ལོག་བྲིས་ཏེ་རྒྱལ་བོ་ལ་སྦྲན་པར་དར་སོགས་བྲིས་ནས། དེ་ལི་ཡུལ་དུ་ཀླ་ཀློ་ཐོག་མར་དར་བའི་ཚུལ་ལ་སྦྱར་ཞིང་། དེ་གོང་ལོ་དྲུག་བརྒྱ་ཙམ་ནས་ཀླ་ཀློའི་ཆོས་ཡོད་པ་བར་སྐབས་སུ་ཉམས་པ་དེ་སླར་གསོས་སོ་བྱ་བ་སྣང་སྟེ་དེ་བདེན་ནམ་སྙམ་པ་ཞིག་གོ།

དེ་ལ་མུ་ཧམ་མད་ནི་ཨ་རབ་ཀྱི་ཡུལ་མ་ཁའམ་མེ་ཁ་བྱ་བའི་གྲོང་ཁྱེར་དུ། རིགས་མཐོན་པོ་དབུལ་བོར་སོང་བ་ཞིག་ལ། ཕ་ཨབ་རྡུ་ལ་དང་མ་ཨ་མི་ནཱ་བྱ་བ་གཉིས་ཀྱི་བུར་སྐྱེས། ད་དུང་མངལ་ན་ཡོད་དུས་ཕ་ཤི། སྐྱེས་ནས་ཅུང་ཟད་ཅིག་གི་རྗེས་སུ་མ་ཡང་ཤི། དེ་ནས་དྭ་ཕྲུག་ཏུ་ལུས་པ་མེས་པོས་བསྐྱངས། དེ་ཡང་ཤི། དེ་ནས་ཞང་བོས་བསྐྱངས་ཏེ་ཆེན་པོར་གྱུར། ཁ་དི་ཛ་བྱ་བའི་ཡུགས་མོ་ནོར་ལྡན་ཞིག་གི་གཡོག་བྱས་ཏེ་རྔ་བོང་དེད་ནས་ས་ཡི་རི་ཡ་དང་། ཏ་ཟིག  ཨེ་རྗིབ་སོགས་སུ་ཚོང་ལ་ཕྱིན། རིམ་གྱིས་ཡུགས་མོ་དེ་དང་བཟའ་ཚང་དུ་འདུས། དེའི་ཚེ་མུ་ཧམ་མད་ལོ་ཉེར་ལྔ་དང༌། མོ་ལོ་བཞི་བཅུ་ལོན་ཟེར།  མི་རིང་བར་ཁོའི་རྣ་ལམ་དུ་མུ་ཧམ་མད་ཅེས་མིང་ནས་བཟུང་སྟེ་འབོད་མཁན་ཞིག་བྱུང་། སྒྲ་དེ་ཐོས་རེས་ཀྱིས་བརྒྱལ་ནས་སྡུག་བསྔལ་མྱང་བས་ཁྱིམ་དུ་མ་ཚུགས་པར་ཧི་ར་བྱ་བའི་བྲག་ཕུག་ཏུ་བྲོས་ཏེ། སྒོམ་ལྟ་བུ་ཞིག་ལ་གནས་ནས་ཡུན་རིང་སོང་། འོན་ཀྱང་པཻ་གམ་བྷར་སྟེ་བཀའི་ཕོ་ཉར་དངོས་སུ་གྱུར་བ་ནི་ལོ་ཞེ་གཉིས་ཙམ་ནས་ཡིན་ཟེར། དེར་ཁོས་འཇིག་རྟེན་འདིར་སྐྱབས་གནས་གཅིག་ཁོ་ན་ཡོད་ཅིང་། དེ་ཨལླ་ཡིན། དེའི་ཕོ་ཉ་མུ་ཧམ་མད་ང་རང་ཡིན་ཞེས་སྨྲས་པས་ཕལ་ཆེར་གྱིས་སྨྱོན་པར་བརྩིས། འོན་ཀྱང་རེ་ཞིག་ན་སྔོན་གྱི་ཆུང་མ་ཡིད་ཆེས་ནས་སློབ་མའི་དང་བོར་གྱུར། དེའི་ཚེ་ཨ་རབ་རྣམས། མེ་དང༌། ཉི་མ་དང་། སྐུ་བརྙན་སྣ་ཚོགས་ལ་ཕྱག་བྱེད་པའི་ཆོས་ལུགས་པ་ཡིན་པས། ཡུལ་གྱི་མི་རྣམས་ཀྱིས་འཛིན་བཟུང་བཙོན་འཇུག་སོགས་བྱས་ཏེ་སྡུག་མང་བོ་བཏང་། དེ་ནས་ཁོ་སྡོད་མ་བདེ་བར་ཡ་ཐྲིབ་བམ་དེང་སང་མེ་དི་ན་ཞེས་འབོད་པའི་གྲོང་དེར་བྲོས། བྲོས་པའི་ལོ་དེ་ནི་ཧི་ཇ་རཱ་སྟེ་གནས་འཕོས་པ་ཞེས་བྱ་བ་ཀླ་ཀློ་རྣམས་ཀྱི་ལོ་ཚིགས་ཀྱི་རྩིས་གཞི་དེ་ཡིན་ཞིང་། རང་རེའི་སྟོན་པ་འདས་རྗེས་ཀྱི་ལོ་༡༡༦༦[སྤྱི་ལོ་༦༢༢]ལ་ཡིན་པས། ད་བར་༡༣༢༤སོང་། མེ་དི་ནར་སྡོད་པ་རྣམས་མྱུར་དུ་ཆོས་གསར་བ་དེ་ལ་བསྒྱུར། དེ་ནས་དེ་ཐམས་ཅད་དམག་ཏུ་བྱས་ནས་མུ་ཧམ་མད་ཀྱིས་མགོ་དྲངས་ཏེ་ཁོ་མ་ཤི་བའི་གོང་ལ་ཨ་རབ་ཀྱི་ཡུལ་གྲུ་ཆེན་པོ་དེ་ཐམས་ཅད་འོག་ཏུ་དབང་ཤུགས་ཀྱིས་བསྡུས།

ཆོས་ཀྱི་ཕྱིར་དུ་གསོད་པོ་དང༌། གསད་བྱ་གཉིས་ཀ་ལ་མཐོ་རིས་སུ་མཆོག་ཐོབ་པར་བཤད་པས། ཐམས་ཅད་སྲོག་ལ་འཕང་བའམ་དགྲ་ལ་སྙིང་རྗེ་ཅུང་ཟད་ཀྱང་མེད་པར་གཡུལ་དུ་ཞུགས་པས་དམག་ལ་དེ་ལས་སྟོབས་ཆེ་བ་ཞིག་མ་བྱུང་སྐད། སྟོན་པ་རང་གི་ཚ་བོ། ཧུ་ཟེན་ཡང་དམག་ལ་འགྲོ་ཁར་ལུས་བཀྲུས་ནས་དྲི་བཟང་བྱུགས་པར་དྲིས་པས། རང་རེ་དང་། ལྷའི་བུ་མོ་མིག་ནག་མ་རྣམས་ཀྱི་བར་ན་ཅང་མེད་པས་དེ་ལྟར་བྱས་ཟེར་ཏེ་གཡུལ་དུ་ཤི་ཚར་ན་མཐོ་རིས་སུ་སྐྱེས་པ་ལ་ཡིད་ཆེས་པ་ཡིན། མུ་ཧམ་མད་ཆུང་མ་ལ་བྱམས་པས་མོའི་སེམས་སྲུང་སྟེ་མོ་མ་ཤིའི་བར་དུ་ཆུང་མ་གཞན་མ་བླངས་པར་གྲགས་ཤིང་། ཤི་ནས་བུད་མེད་ཤིན་ཏུ་གཞོན་ནུ་སྔ་ཕྱི་བདུན་ཙམ་བླངས། ཨ་ལླ་ནས་གནང་བ་བྱིན་ནོ་ཞེས་གཞན་གྱི་ཆུང་མ་དང་རང་གི་མནའ་མ་ལ་ཡང་སྤྱད་དེ། ང་ལས་གཞན་ལ་འདི་འདྲ་བྱེད་པའི་གནང་བ་མེད་ཅེས་སྨྲས། ཁོ་ན་རེ་ང་ལྷ་གནས་བདུན་པའི་སྟེང་དུ་སོང་ནས་ཨ་ལླ་མཇལ། ཁོང་གིས་རྗེས་འཇུག་རྣམས་ཉིན་རེ་བཞིན་ཕྱག་ལན་ལྔ་བཅུ་དགོས་སྨྲས། མ་མ་ཐར་ནས་དེ་མང་དྲགས་སྨྲས་ཏེ་མཐར་ཉིན་རེ་ལ་ལན་ལྔ་རེ་ཕྱག་བྱེད་པར་ཐག་བཅད་པར་ལྷ་[ལ་ཉིན་རེར་ཕྱག་ལན་ལྔ་རེ་]ཁོང་རྣམས་བྱེད། ཁོ་བོ་ལ་འཇིག་རྟེན་འདིར་དྲི་བཟང་དང་བུད་མེད་དང༌། ཕྱག་འཚལ་བ་གསུམ་ལས་ལྷག་པའི་བདེ་བ་མེད་ཅེས་སྨྲས། འདས་རྗེས་ཀྱི་ལོ་༡༡༧༦[སྤྱི་ལོ་༦༣༢]ལ་ཁོ་ཤི་ཞིང་། དེའི་ཚེ་རང་ལོ་༦༢ཡིན་ཟེར་བས་འདས་རྗེས་ཀྱི་ལོ་༡༡༡༤[སྤྱི་ལོ་༥༧༠]ལ་སྐྱེས་པ་ཡིན། 

འདིའི་ཧི་ཛ་རཱའི་ལོ་མ་ཁའི་ཡུལ་དུ་ཀླ་ཀློའི་ཆོས་དར་བའི་ཐོག་མར་བྱས་ན། འདིར་སིངྒ་ལ་བའི་སངས་རྒྱས་མྱ་ངན་ལས་འདས་པའི་ལོ་གཞིར་བཞག་བྱས་པའི་རྐྱེན་གྱིས་སངས་རྒྱས་འདས་ནས་ལོ་དུ་སོང་ལ་ཀླ་ཀློའི་མགོ་ཟུག་ལ་མི་མཐུན་ཀྱང་། འདས་ལོའི་རབ་བྱུང་རྣམས་མེ་མཁའ་རྒྱ་མཚོ་ལ་བསྲེས་པའི་ཀླ་ཀློའི་ཐོག་མ་དང་ལོ་གཉིས་ཙམ་མ་གཏོགས་འགྲིགས་པར་སྣང་། ཀོང་ཇོ་བོད་དུ་བརྫངས་ཚེ་ཀླུ་ཀློའི་སྟོན་པ་འདི་ཤི་ནས་ལོ་གསུམ་སོང་ཟེར། དེས་ན་སྲོང་བཙན་གྱི་སྐུ་དུས་ཡིན་ལ། འོན་ཀྱང་སྲོང་བཙན་དགུང་ལོ་བཅུ་དྲུག་པར་དེ་ཁབ་ཏུ་བཞེས་ཞེས་བཤད་མོད། རྒྱལ་རབས་ཕན་ཚུན་བསྡུར་ཚེ་དགུང་ལོ་ཤིན་ཏུ་མཐོ་བའི་སྐབས་སུ་སྣང་བས་དཔྱད་པར་བྱའོ། །

བྱེད་པ་བོས་མུ་ཧམ་མད་ལ་སྨྲས་པར་གྲགས་པའི་ཚིག་རྣམས། ཨ་རབ་ཡུལ་དུ་རྩིག་ངོས་དང་། རྡོ་དང་། གླེགས་བམ། རུས་པ་སོགས་ལ་བྲིས་པ་དེ་ཐམས་ཅད་ཕྱིས་སུ་ཨ་བྷུ་བྷ་ཀར་གྱིས་ཆེ་ལོང་བསྡུས་ཤིང་། ཀ་ལིབ་ཨོ་ཐ་མན་གྱིས་ཆ་ཚང་བར་བསྡུས་པ། ཀོ་རན་བྱ་བ་མུ་སལ་མན་རྣམས་ཀྱི་རྩ་བའི་ལུང་དེ་ཡིན་ཞིང་། ལེའུ་བརྒྱ་དང་བཅུ་བཞི་མཆིས། དེ་ཡང་ཀོ་རན་ནི་རྩ་བ་གཅིག་པུ་མིན་པར་དེའི་འགྲེལ་བ་གཅིག་ཀྱང་མཉམ་དུ་ཡོད་ལ། གཙོ་བོར་ཆོས་ཀྱི་སྤྱོད་ལམ་དང་། ཁྲིམས་ལུགས་ཙམ་སྟོན་ཞིང་། ཡེ་ཤུ་ལ་ཡང་བྱེད་པ་བོའི་སྲས་སུ་སྨྲ་བ་དང༌། སྐྱབས་གནས་བཤད་པ་མི་འཐད་ཅིང་། ཤི་ནས་སླར་ལངས་ཟེར་བ་ཡང་རྫུན་ཡིན་སོགས་རིགས་པ་འདྲ་བ་དུ་མ་ཞིག་བཀོད་ནས། འོན་ཀྱང་བྱེད་པོའི་བཀའ་བབས་པའི་ཕོ་ཉ་ཙམ་དུ་ཤེས་དགོས་ཞེས་བྲིས་སོ། ། ཀོ་རན་འདི་ཨ་རབ་ཀྱི་སྐད་ཡིག་ཁོ་ནར་བྲི་བ་ལས་གཞན་གྱི་སྐད་དུ་བསྒྱུར་བ་སོགས་མི་རུང་བ་ཁོང་རྣམས་ཀྱི་དམ་ཚིག་ཡིན་མོད། ཉེ་དུས་སུ་པ་ཤ་བྱ་བའི་མི་དབང་ཅན་དེས་ཏུ་རུ་ཀའི་རང་སྐད་དུ་བསྒྱུར་ཞིང་། དེ་མཚུངས་དབྱིན་སྐད་དུ་ཡང་བསྒྱུར་བ་ཁོ་བོས་ཀྱང་ཞིབ་ཏུ་བལྟས་སོ། ། 

རྗེས་སུ་འབྲང་བའི་ཀླ་ཀློ་རྣམས་སུ་ནི་དང་སི་ཡ་བྱ་བའི་སྡེ་གཉིས་སུ་གྱེས་པའི་ཡུལ་གཞན་དུ་དར་བ་ཕལ་ཆེར་སུ་ནི་དང་། རྒྱ་གར་དང༌། པར་ཤིའི་ཡུལ་དུ་སི་ཡའི་སྡེ་ཡང་ཡོད་ཟེར། ཀླ་ཀློ་དེ་ཐམས་ཅད་ཀྱི་ཡང་གནས་ཆེན་གཙོ་བོ་དེ་མེ་ཁ་ཡིན་ལ། དེའི་ཡང་སྙིང་བོ་ནི། དེར་གནམ་ནས་བབས་པའི་རྡོ་ཡིན་ཟེར་བའི་ཀ་བྷ་བྱ་བའི་རྡོ་ནག་ཆེན་པོ་ཞིག་ཡོད་པ་དེ་ལ་འཛམ་གླིང་ཀླ་ཀློ་ཐམས་ཅད་ཀྱིས་ཕྱག་འཚལ་ཞིང་། མ་མ་ཐར་རང་ཡང་རྡོ་དེ་ལ་གནས་སྐོར་ལན་བདུན་བྱས་ཟེར། རྒྱ་ནག་སོགས་ཀྱི་ཀླ་ཀློ་རྣམས་ཀྱང་ནུབ་ཏུ་ཁ་ཕྱོགས་ཏེ་རྡོ་དེའི་ཕྱོགས་སུ་ཕྱག་འཚལ་བ་ཡིན་ནོ། །

མུ་ཧམ་མད་ཤི་བའི་རྗེས་སུ་སློབ་མ་རྣམས་ཀྱིས་སྔར་བཞིན་བྱས་ཏེ་དམག་མོ་ཆེ་དྲངས་ཤིང་། ཨབ་རི་ཀའི་བྱང་ཕྱོགས་ཀྱི་ཨེ་རྗིབ་སོགས་དང་། དེ་བཞིན་ས་ཡི་རི་ཡ་དང་། ཏ་ཟིག རྒྱ་མཚོ་བརྒལ་ནས་ཕྱི་གླིང་གི་ཡུལ་མཐའ་སི་པཻན་སོགས། ལོ་བཅུ་བསྐོར་གཅིག་ཙམ་གྱི་ནང་དུ་དབང་བསྒྱུར་ཏེ་ཆོས་འོག་ཏུ་ཚུད་པར་བྱས་ཤིང༌། ལོ་དྲུག་ཅུ་སྐོར་གྱི་ནང་ལ་རྒྱ་གར་གྱི་ནུབ་ཕྱོགས་ཨོ་རྒྱན་དང་། སིནྡྷུའི་ཡུལ་དུ་ཡང་སླེབས་སོ། །དེའི་ཚེ་ཨ་རབ་ནས་སིནྡྷུ་ལ་ཐུག་གི་བར་ཀླ་ཀློའི་རྒྱལ་ཁམས་སུ་གྱུར་ཞིང་། ཀ་ལིབ་ཨུ་མར་སྔོན་གྱི་མུ་ཧམ་མད་ཀྱི་ཚབ་ཏུ་ཁྲི་བཟུང་། ཆབ་འོག་ལ་ཡང་ཀ་ལིབ་ཀྱི་རྒྱལ་ཁམས་སུ་གྲགས། དེའི་གོང་ནས་རྒྱ་གར་ནུབ་ངོས་ཀྱི་ཕྱོགས་མང་བོ་བཅོམ་ཙམ་བྱས་ཀྱང་ལག་རྗེས་ཤར་བ་ཆེར་མ་བྱུང་། སིནྡྷུའི་ཡུལ་མཐའ་གཏན་ཆགས་སུ་འོག་ཏུ་ཚུད་པ་ནི་རང་རེའི་སྟོན་པ་འདས་རྗེས་ཀྱི་ལོ་༡༢༥༦[སྤྱི་ལོ་༧༡༢]པ་ཙམ་ན་ཡིན། དེ་ཡང་ཨ་རབ་ཀྱི་གྲུ་འགའ་ཞིག་སིནྡྷུ་བ་རྣམས་ཀྱིས་བཅོམ། ཀ་ལིབ་རྒྱལ་ཁམས་ཤར་ངོས་ཀྱི་བློན་པོ་ཧུ་ཟེན་གྱིས་སིནྡྷུའི་རྒྱལ་བོ་དཱ་ཧིར་ལ་ཕོ་ཉ་བཏང་སྟེ་མི་དང་། ཟོང་སླར་སྤྲོད་དགོས་སྨྲས་པ་ལ་མ་ཉན་པས་དམག་གི་རྐྱེན་དུ་སོང་། མུ་སལ་མན་རྣམས་ཀྱིས་དམག་ལན་གཉིས་སུ་བཏང་བ་རྒྱ་གར་བ་ཕམ། སླར་ཀ་ཟིམ་གྱི་བུ་མུ་ཧམ་མད་དམག་དཔོན་དུ་བྱས་ཏེ་བཏང་། དེ་གོང་ནས་སིནྡྷུའི་ཡུལ་གྱི་སངས་རྒྱས་པ་རྣམས་མུ་སྟེགས་ཀྱི་ལག་འོག་ཏུ་ཉམ་ཐག་པར་ཡོད་པ་འུ་ཐུག་ནས་ཀླ་ཀློ་ལ་སྐྱབས་བཙལ། མཐར་དཱ་ཧིར་གྱི་བློན་པོ་མགོ་བྱེད་དང་བཅས་པ་རྣམས་ཀྱང་དགྲའི་ཕྱོགས་སུ་ཆས། དཱ་ཧིར་རང་ཉིད་དམག་དཔོན་དུ་བྱས་ཏེ་ཨ་རཽར་བྱ་བའི་གྲོང་ལྕགས་རི་ཅན་གྱི་ཉེ་འདབས་སུ་འཐབ་འཛིང་བྱས་ཀྱང་མཐར་རྒྱལ་བོ་ཁོ་རང་དམག་ནང་དུ་ཤི། བཙུན་མོས་མགོ་བསྡུས་ནས་མཁར་སྲུང་ཐབས་བྱས་ཀྱང་མ་ཚུགས་པས་མེ་ལ་ལྕེབས་ཏེ་ཤི། གྲོང་ཁྱེར་རྣམས་དམག་གིས་བཅོམ། མི་རིང་བར་རྒྱལ་ས་ཨེ་ལོར་བྱ་བ་ཡང་ཤོར། དེ་ལྟར་སིནྡྷུ་འོག་ཏུ་ཆུག འོན་ཀྱང་དཱ་ཧིར་གྱི་བློན་མུ་ཧམ་མད་ཀྱི་གྲོགས་སུ་སོང་བ་དེས་རྒྱལ་བོ་ལ་ཞུས་ཏེ་རེ་ཞིག་ཧིན་དུ་རྣམས་ལ་རང་རང་གི་ཆོས་ལུགས་བྱས་ཆོག་པའི་གནང་བ་ཐོབ་ཅིང་། ལྷ་ཁང་ཉམས་པ་དག་ཀྱང་གསོས། འོན་ཀྱང་སངས་རྒྱས་པ་རྣམས་ལ་ནི་མགོན་ཅི་ཡང་མེད་པས་ཞིག་རོ་དེ་གར་ལུས་སོ། །ཀ་ཟིམ་གྱི་བུ་མུ་ཧམ་མད་ལ་ལྷ་ཁང་གཅིག་པུ་ཞིག་ནས་ཀྱང་མན་ཆིག་ཁྲི་སུམ་སྟོང་ལོངས་པའི་གསེར་ཐོབ་པ་སོགས་བཅོམ་རྫས་ཀྱི་ནོར་མཐའ་མེད་པ་ཐོབ་ཅིང་། རྒྱ་གར་གྱི་ཡུལ་འབྱོར་བ་ཆེ་བའི་གྲགས་པ་ཡུལ་གཞན་དུ་མཆེད། དེ་ལྟར་ཡུན་རིང་ཙམ་ཞིག་ན་ཨ་རབ་ཀྱི་མུ་སལ་མན་རྣམས་དང་། སིནྡྷུ་ན་གནས་པའི་རྒྱ་གར་བ་རྣམས་རང་རང་གི་ཆོས་ལུགས་སྤྱོད་ཅིང་། ཕན་ཚུན་གནོད་འཚེ་ཆེར་མེད་པར་མཉམ་དུ་འགྲོགས་ཏེ་བསྡད། 

རྒྱ་གར་གྱི་ཡུལ་དང་བོར་འཛིན་པ་ནི་ཏུ་རུ་ཀ་རྣམས་ཀྱིས་བྱས། དེ་ཡང་ས་མ་ནི་རྒྱལ་བོའི་འཁོལ་བོ་ཏུ་རུ་ཀའི་བུ་ཆུང་ཨ་ཕ་ཏེ་ཇིན་བྱ་བ་རིམ་གྱིས་རྒྱལ་བོའི་སྤྱན་གཟིགས་སུ་གྱུར། གྷ་རྗ་ནིའི་ཡུལ་དུ་རྒྱལ་སྲིད་ཆུང་ངུ་ཞིག་བཙུགས་ཏེ་རྒྱལ་ཕྲན་གྱི་ཚུལ་དུ་བསྡད། དེ་སྟོན་པ་འདས་རྗེས་ཀྱི་ལོ་༡༢༠༦[སྤྱི་ལོ་༦༦༢]པ་ལ་ཡིན། དེ་ནས་ལོ་བཅོ་ལྔ་ཙམ་གྱི་རྗེས་སུ་ཨ་ཕ་ཏེ་ཇིན་གྱི་སྙིང་ཉེ་བའི་འཁོལ་བོ་ཕྱིས་མག་པར་བྱས་པར། སུ་བུག་ཏ་ཇིན་ལ་རང་གི་ཇོ་བོ་ཤི་བའི་རྗེས་སུ་ཁྲི་ཐོབ་ནས་རྒྱ་གར་ནུབ་བྱང་གི་ངོས་སུ་དམག་ཐེངས་ཁ་ཤས་དྲངས་ནས་མཁར་རྫོང་འགའ་ཙམ་འཕྲོག

དེ་ལ་ཏུ་རུ་ཀ་དང་ཨ་རབ་བྷི་གཉིས་ཀ་ཡང་ཀླ་ཀློའམ་ཨི་ས་ལེམ་གྱི་ཆོས་ལུགས་སུ་གཅིག་ཅིང་། ཏུ་རུ་ཀ་རྣམས་ནི་ཆོས་ལུགས་དེ་ལ་ལྷག་པར་དུ་ཡང་བརྩི་བས།  རྒྱ་གར་བ་སོགས་ལ་གཟུགས་བརྙན་ལ་ཕྱག་འཚལ་མཁན་ཞེས་ཤིན་ཏུ་ལྟ་ངན་འཛིན་པའི་གྲས་སུ་བརྩི། རང་ལུགས་མིན་པའི་ཆོས་གཞན་གྱི་ཕྱོགས་སུ་སྙིང་རྗེ་ཕྲ་མོ་ཡང་སྤངས་ཏེ་མནར་གཅོད་སོགས་གཏོང་ཅི་ཐུབ་བྱེད། ཨ་ལླ་ལ་སྐྱབས་སུ་མི་འགྲོ་བར་སྐུ་བརྙན་ལ་ཕྱག་འཚལ་མཁན་རེ་ཙམ་སྲོག་གཅོད་ཐུབ་ཀྱང་། དགེ་བ་དེ་ལས་མི་དགོས་པར་ཐག་གཅོད་པ་སོགས་ལུང་ལ་མི་ལྡོག་པའི་དད་པ་མཆིས་པས་སྙིང་སྟོབས་སྲིན་པོ་ལས་ཀྱང་ཆེ། དམག་དྲངས་ཐེངས་རེ་བཞིན་དུ་སྐྱེས་པ་བུད་མེད་བྱིས་པ་སོགས་ཉེས་མེད་ཀྱི་འགྲོ་བ་གྲངས་ལས་འདས་པ་དག་ལ་འདི་དག་ཨ་ལླ་སྤངས་ནས་སྟོན་པ་གཞན་གྱི་རྗེས་སུ་འབྲང་བ་དག་ཡིན་པས་ཉེས་ཅན་ལས་ཀྱང་ཉེས་ཅན་ཡིན་ནོ་སྙམ་དུ་ཕ་གསོད་པའི་ལག་དམར་མཐོང་བ་བཞིན་སྙིང་རྗེ་མེད་པར་བསད་ནས་མཐར་རྒྱ་གར་ཧྲིལ་བོ་དབང་དུ་བྱས་པ་ཡིན། མ་མ་ཐར་རང་ཉིད་ཀྱིས་ཀྱང་ཉིན་གཅིག་ལ་འཇིས་བོ་དྲུག་བརྒྱ་རྐང་ལག་བཅད།  མིག་ཕྱུངས་ཏེ་བྱེ་ཚན་དུ་བོར་ནས་ཆུ་སྟེར་མི་ཆོག་པའི་ཁྲིམས་བྱས་ཟེར། འོག་ཏུ་འཆད་འགྱུར་གྱི་རྒྱལ་བོ་རྣམས་ཀྱི་སྙིང་རྗེ་མེད་པའི་སྤྱོད་པ་དག་ལ་ཡང་འདི་ལྟ་བུའི་ལུང་ལ་བློ་གཏད་ཡོད་པ་ཡིན་ནོ་ཞེས་ཤེས་པར་བྱའོ། །

ལུང་དེའི་ནང་ན་མཐོང་བ་མངོན་གྱུར་གང་ཡོད་ལ་མངོན་སུམ་གྱི་གནོད་པ་མེད། ཅུང་ཟད་ལྐོག་གྱུར་གྱི་སྐོར་ནི་གང་ཡང་མ་བཤད། དེ་ནས་ཤིན་ཏུ་ལྐོག་གྱུར་རྐྱང་ཡིན་ལ། དེ་ལ་ཡང་རང་ཚིག་སྔ་ཕྱི་འགལ་བ་ཡེ་མེད་དོ་ཞེས་ཀྱང་ཤེས་པར་བྱའོ། །གཞན་ཡང་ཡེ་ཤུ་དང་། ཀླ་ཀློའི་ལུང་དུ་སྙིང་རྗེ་སྦྱིན་པ་ཁྲེལ་ཡོད་སོགས་ཅི་བཤད་པ་ཐམས་ཅད་ཀྱང་ཁོང་ཅག་གི་ཆོས་སུ་ཞུགས་པའི་སྤུན་དུ་གྲགས་པ་ནང་ཕན་ཚུན་ཁོ་ན་ལ་བྱེད་དགོས་པར་བསྟན་གྱི། ཆོས་ལུགས་གཞན་གྱིས་བསྡུས་པའི་སྐྱེ་བོ་རྣམས་ལ་གསོད་རྡུང་མགོ་སྐོར་བྱས་པ་སོགས་ལ་ཉེས་དམིགས་ཕྲ་མོ་ཡང་ཡོད་པར་གང་དུ་ཡང་བསྟན་པ་མེད་དོ། ། 

དེའི་ཚེ་ཨ་ཕ་ག་ནི་སྟན་དང་། པཉྩའི་ཕྱོགས་ཆ་བཅས་ལ་དབང་བསྒྱུར་བའི་རྒྱ་གར་བའི་རྒྱལ་བོ་ཛ་ཡ་པཱ་ལ་བྱ་བ་ཞིག་སིནྡྷུའི་ཡུལ་ཨུ་ད་བྷནྡའི་གྲོང་ཁྱེར་དུ་སྡོད་པར་སུ་བུག་ཏ་ཇིན་གྱིས། རྒྱ་གར་འཛིན་འདོད་པའི་བསམ་པས་དམག་ཚན་ཆེན་པོ་སྡུད་པའི་ཐོག་ནས་རང་གི་ཡུལ་དང་ཆོས་བསྲུང་བའི་སླད་དུ་ཀླ་ཀློ་དང་གཡུལ་འགྱེད་དགོས་ཞེས་རྒྱལ་བོ་གཞན་ལ་ཡང་སྦྲན་པས། ཀནྱ་ཀུབྫ་དང་། ཙཎྜེལ་སོགས་པའི་ཡུལ་དུ་མའི་རྒྱལ་བོ་རྣམས་ཕྱོགས་གཅིག་ཏུ་བྱས་ཏེ། སིནྡྷུའི་ནུབ་འགྲམ་དུ་ཏུ་རུ་ཀ་དང་གཡུལ་སྤྲད་ཀྱང་མ་ཐུབ་པར་ཆུ་དེས་བཅད་པའི་ནུབ་ཐམས་ཅད་ཤོར། འོན་ཀྱང་ཏུ་རུ་ཀ་རྣམས་སིནྡྷུ་བརྒལ་ནས་རེ་ཞིག་མ་སླེབས་པའི་སྔོན། འདས་རྗེས་ཀྱི་ལོ་༡༥༤༡[སྤྱི་ལོ་༩༩༧]པ་ལ་ཏུ་རུ་ཀའི་རྒྱལ་བོ་སུ་བུག་ཏ་ཇིན་ཤི། སུ་བུག་ཏ་ཇིན་ལ་ཆུང་མ་མི་གཅིག་པའི་བུ་གཉིས་ལས་རྒན་པ་ནི་མ་ཧ་མུ་ད་དང་། གཞོན་པ་ཨི་ས་མེལ་ཡིན་ཞིང་། ཨི་ས་མེལ་ཆུང་མ་གཙོ་བོའི་བུ་ཡིན་པས་ཕ་ཤི་ཁར་ཁྲི་ལ་བཞག དེ་མ་ཧ་མུ་ད་ཡིས་མ་འདོད་པར་གཡུལ་བཀྱེས་ཏེ། འདས་རྗེས་ཀྱི་ལོ་༡༥༤༢པའི་ཟླ་བ་གསུམ་པའི་ནང་སྤུན་ཕམ་ཏེ་ཁྲི་ཐོབ། རང་ཉིད་སུལ་ཏན་དུ་བསྒྲགས་ཏེ་ས་མ་ནིའི་རྒྱལ་བོ་རྣམས་ལ་ཡང་འདུད་པ་བོར། དེ་ནས་ལོ་གཉིས་ཀྱི་རྗེས་ལ་རྒྱ་གར་དུ་དམག་དང་བོ་དྲངས་སོ། །སྟོན་པ་འདས་རྗེས་ཀྱི་ལོ་༡༥༤༥[སྤྱི་ལོ་༡༠༠༡]པའི་ནང་ལ་སུལ་ཏན་མ་ཧ་མུ་ད་ཡིས་རྟ་དམག་ཁྲི་ཕྲག་གཅིག་དང་བཅས་པའི་དཔུང་ཆེན་པོ་རྒྱ་གར་དུ་དྲངས། རྒྱལ་བོ་བགྲེས་པོ་ཛ་ཡ་པཱ་ལས་དམག་ཁྲིད་དེ་པེ་ཤ་ཝར་གྱི་ཉེ་འདབས་སུ་གཡུལ་སྤྲད་ཀྱང་མི་རིང་བར་ཕམ། ཛ་ཡ་པཱ་ལ་ཆབ་འོག་གི་རྒྱལ་ཕྲན་དུ་བྱས་ཏེ་སྡོད་པར་ཁས་བླངས་ནས་སྲོག་ཐར་ཡང་རྒྱལ་སར་ལོག་ནས་བསམ་བློ་བཏང་སྟེ་ཆེས་ངོ་ཚ་བར་གྱུར་ནས། རང་ཉིད་ཀྱིས་ལག་གིས་སྤར་བའི་མེ་ལ་ཆུང་མ་རྣམས་དང་ལྷན་གཅིག་ཏུ་ཞུགས་ཏེ་གསོན་སྲེག་བྱས་ནས་ཤི། དེ་ནས་བཟུང་སུལ་ཏན་མ་ཧ་མུ་དས་ལོ་རེ་བཞིན་སིནྡྷུའི་ཕྱོགས་སུ་དམག་དྲངས། ལྷ་ཁང་རྣམས་བཅོམ་སྟེ་ནོར་མང་དུ་རྙེད། 

སངས་རྒྱས་འདས་རྗེས་ཀྱི་ལོ་སྟོང་དང་ལྔ་བརྒྱ་ཞེ་བརྒྱད་པ་ལ་[སུལ་ཏན་མ་ཧ་མུ་དས་](༡༥༤༨)[སྤྱི་ལོ་༡༠༠༤]སིནྡྷུ་བརྒལ་ནས་དམག་དྲངས། ཛྙེ་ལུམ་ཆུ་བོའི་འགྲམ་གྱི་གྲོང་ཁྱེར་བྷེ་ར་བཅོམ་ཞིང་། དེའི་ལོ་རྗེས་མར་མུལ་ཏན་དུ་ཡང་དམག་དྲངས་སོ། །དེའི་རྒྱལ་བོ་གོང་དུ་སྨྲས་པའི་ཛ་ཡ་པཱ་ལའི་བུ་ཨཱ་ནནྡ་པཱ་ལས་དམག་བྱེད་པ་ལས་སྐྲག་སྟེ་བྲོས་ཤིང་། གྲོང་ཁྱེར་ཀླ་ཀློས་བཟུང་། འདས་རྗེས་ཀྱི་ལོ་ཆིག་སྟོང་ལྔ་བརྒྱ་ང་གཉིས་པ་(༡༥༥༢)[སྤྱི་ལོ་༡༠༠༨]ཨཱནནྡ་པཱ་ལ་རྗེས་འདེད་དུ་སོང་། ཨཱནནྡ་པཱ་ལས་རྒྱ་གར་ཡུལ་དབུས་ཀྱི་རྒྱལ་བོ་རྣམས་ལ་སྦྲན་པས། ཐམས་ཅད་ཀྱིས་ཀླ་ཀློ་འགོག་པའི་ཐབས་བྱེད་པར་ཁ་འཆམ། ཡུལ་གང་བོའི་འདུན་པ་གཅིག་ཏུ་གྱུར་ཞིང་། ཐ་ན་བུད་མེད་རྣམས་ཀྱང་རང་རང་གི་རྒྱན་ཆ་བཙོངས་ནས་དམག་གི་ཆ་རྐྱེན་དུ་བསྐུར། དེ་ལྟར་དམག་མོ་ཆེ་བསྡུས་ཏེ་ཨུ་ད་བྷནྡ་ཉེ་བར་དྲངས། སུལ་ཏན་མ་ཧ་མུ་དས་འདུན་མ་བྱས་ཏེ་འཐབ་པས། རྒྱ་གར་བ་རྣམས་ཀྱིས་སྲོག་ལ་ཕངས་མེད་དུ་རྒོལ་བས་ཡུན་ཐུང་ངུ་ཞིག་ལ་ཀླ་ཀློ་བཞི་སྟོང་ལྷག་བསད་དེ་སླར་བྲོས་ལ་ཉེ་སྐབས། གློ་བུར་དུ་ལྟས་ངན་གྱི་རྣམ་པར་རྒྱ་གར་བའི་དམག་དཔོན་གྱིས་བཞོན་པའི་གླང་ཆེན་དེ་ལ་སྐྲག་སྣང་ཆེན་པོ་ཞིག་བྱུང་ནས་བྲོས་པར་གླང་རྫིས་ཐབས་ཅི་བྱས་ཀྱང་མ་ཆུན། དམག་དཔོན་བྲོས་པར་མཐོང་ནས་ཐམས་ཅད་ཀྱི་སྙིང་སྟོབས་ཆག དེ་མ་ཐག་སུལ་ཏན་གྱིས་རྟ་དམག་བཟང་བོ་ཁྲི་ཙམ་ཞིག་ཁྲིད་དེ་དྲག་ཤུལ་ཆེན་པོས་འཛིངས་པས། རྒྱ་གར་བ་སྟོང་ཕྲག་དུ་མ་དེ་ཉིད་དུ་བསད་ཅིང་། ས་གཞི་ཁྲག་གིས་ཁྱབ་པའི་དུར་ཁྲོད་དུ་བྱས་ཏེ་གཡུལ་ལས་རྣམ་པར་རྒྱལ་ལོ། །

དེ་ནས་མི་རིང་བར་ཀང་རའི་ཡུལ་ན་གར་ཀོ་ཊི་བྱ་བའི་མུ་སྟེགས་ཀྱི་གནས་གཞི་འབྱོར་བ་ཅན་དེ་བཅོམ། གསེར་དི་ནཱ་ར་འབུམ་བརྒྱད་ལྷག་དང་། མི་འདྲ་བའི་རིན་པོ་ཆེ་རིགས་མི་ཁུར་ལོངས་པ་དུ་མ་ཐོབ། དེ་ནས་བཅོམ་བརླག་ཏུ་བསླེབས། ཕྱི་ནང་གི་ལྷ་ཁང་རྣམས་བཅོམ། ནོར་མང་དུ་རྙེད་པས་ཁོ་རང་ཡང་ཧ་ལས། སུལ་ཏན་རང་གིས་བྲིས་པའི་ཡི་གེ་ཞིག་ཏུ་ཡང་བཅོམ་བརླག་ཏུ་ལྷ་ཁང་ཞིག་ཏུ་བསླེབས། དེར་གསེར་གར་བླུགས་ཀྱི་ལྷ་སྐུ་མི་ཚད་ལྷག་པ་ལྔ་མཆིས། མིག་འབྲས་རྣམས་ཕ་ལམ་དང་པདྨ་རཱ་ག་ལས་བྱས། ལྷ་ཁང་དེ་འདྲ་ཞིག་གསར་དུ་བཞེངས་དགོས་བྱུང་ན། གསེར་དབྱིག་དོ་བོ་ཁྲི་ལོངས་པའི་འགྲོ་སོང་དང་། མི་བཟོ་ལ་བྱང་བ་སྟོང་ཕྲག་དུ་མ་བསྡུས་ཏེ་ལོ་ཉིས་བརྒྱ་ལྷག་ཙམ་བརྩིགས་ན་འགྲུབ་ནུས་སམ་སོགས་བྲིས། དེ་ལ་སོགས་པའི་ནོར་རྣམས་འཕྲོག མུལ་ཏན་དང་། ཀནྱ་ཀུབྫ་ཡང་དེ་ལྟར་བཅོམ། ཙཎྜེ་ལའི་རྒྱལ་བོས་ཐེངས་འགར་གཡུལ་སྤྲད་ཀྱང་མ་ཐུབ་པས་མཐར་སྐྱེས་དང་བཅས་ཏེ་འདུད་དགོས་པ་བྱུང་། པྲ་ཏི་ཧཱ་རའི་རྒྱལ་བོ་རྣམས་ཀྱང་བཏུལ། པཉྩའི་ཧྲིལ་བོ་ཆབ་འོག་ཏུ་བྱས། ཤར་དུ་ཀུ་རུ་ཀྵེ་ཏྲའི་ཡུལ་ལ་ཐུག

སུལ་ཏན་འདིས་སྔ་ཕྱི་བསྡོམས་པའི་རྒྱ་གར་དུ་དམག་ལན་བཅུ་བདུན་དྲངས་པ་ཐམས་ཅད་ལ་རྒྱབ་ཁ་ཐོབ། ཀུན་གྱི་རྗེས་སུ་མུ་སྟེགས་ཀྱི་གནས་ཆེན་སའི་སྟེང་ན་གྲགས་ཆེ་བ་སོ་མ་ནཱ་ཐ་ལ་དམག་དྲངས། རྒྱ་གར་གྱི་རྒྱལ་བོ་མང་བོ་ཁ་མཐུན་ནས་གནས་གཞི་དེ་བསྲུང་བའི་ཐབས་བྱས་ཀྱང་ཉིན་གསུམ་ལས་ལྷག་མ་ཐུབ། ལྷ་ཁང་བཅོམ། དགེ་སྦྱོང་རྣམས་བསད། དབང་ཕྱུག་གི་ལིངྒ་རང་བྱུང་དུ་གྲགས་པ་དེ་ལ་བསླུ་ཡོན་ཇི་ཙམ་འདོད་པ་ཕུལ་ཆོག་པས་མི་གཅོག་པར་ཞུས་པ་ལ། སུལ་ཏན་གྱིས་ང་སྐུ་བརྙན་ཚོང་མཁན་གྱི་མིང་ལས་གཅོག་མཁན་གྱི་མིང་འདོད་ཅེས་རང་ཉིད་ཀྱི་ལག་པས་བསྣུན་ཏེ་བཅག (སོ་མ་ནཱ་ཐ་འཇིག་པའི་ལོ་འདི་སངས་རྒྱས་འདས་ནས་སྟོང་དང་ལྔ་བརྒྱ་བདུན་ཅུ་པ་[སྤྱི་ལོ་༡༠༢༦]ལ་ཡིན་པར་ཤེས། དེ་ནས་གནས་ཤུལ་དེ་སླར་གསོས་པ་ནི་སྲིད) སླར་དམག་ལོག་ཚེ་ར་ཛ་པུ་ཏའི་བྱེ་ཐང་དུ་སླེབས་ནས་དཀའ་ལས་མང་དུ་བྱུང་ཞིང་། དམག་མང་བོ་ཤི་བ་མུ་སྟེགས་ཀྱི་ཛོ་ཀི་ཞིག་གིས་མཐུ་བཏང་བར་གླེང་། གང་ལྟར་ཀྱང་སུལ་ཏན་རང་ཉིད་ལ་ཉེ་ཞོ་མེད་པར་གྷ་ཇ་ནིའི་རྒྱལ་སར་བསླེབས། དེ་ནས་ལོ་དེའི་རྗེས་མར་ཏ་ཟིག་ཕྱོགས་ལ་དམག་འདྲེན་པའི་གྲབས་བྱེད་པ་ན་ཁོ་རང་ཤི། 

སུལ་ཏན་འདི་ཡོན་ཏན་ཅན་ལ་དགའ་ཞིང་། རྒྱ་གར་ནས་འཕྲོག་པའི་ནོར་རྣམས་ཀྱང་རང་ཡུལ་གྱི་མཁས་པ་དག་ལ་ཆ་རྐྱེན་དུ་སྦྱར་བ་སོགས་ཡོན་ཏན་གྱི་བག་ཙམ་ཡང་མཆིས་པར་གླེང་། སྙན་དངགས་མཁན་འགའ་རེས་ཚིགས་བཅད་བྲིས་པ་ཤོ་ལོ་ཀ་རེ་རེ་ལ་གསེར་སྒོར་ཉི་ཤུ་རེ་སྦྱིན་པ་སོགས་ཀྱང་བྱས། རྒྱ་གར་ཆབ་འོག་ཏུ་བཅུག་པ་རྣམས་ལའང་ནོར་འཕྲོག་པ་ལས་ཆོས་ལུགས་བསྒྱུར་བ་སོགས་ཀྱི་བརྩོན་པ་ནི་དེ་ཙམ་དུ་མ་བྱས། འདི་དང་དུས་མཉམ་དུ་མུ་སལ་མན་གྱི་སྙན་དངགས་མཁན་ཆེན་པོ་ཨལ་བཱི་རཱུ་ནཱི་ཡང་རྒྱ་གར་དུ་སླེབས། ཁོས་རྒྱ་གར་གྱི་ལོ་རྒྱུས་ཞིག་ཀྱང་བྱས་པར་རྒྱ་གར་བ་རྣམས་སེམས་རྒྱ་ཆུང་ཞིང་། རང་གི་རིགས་མིན་པ་ཐམས་ཅད་ལ་མླེ་ཙྪ་སྟེ་ཀླ་ཀློར་འབོད། ཤིན་ཏུ་དམན་པར་བརྩི། དེ་དག་གིས་རེག་པའི་མེ་དང་ཆུ་ལ་སོགས་པ་ཡང་བཙོག་པར་བྱེད། རྒྱ་གར་འདྲ་བའི་ཡུལ་ཆེན་པོ་ཞིག་ཕྱོགས་གང་ན་ཡང་མེད་པར་རློམས། རང་གི་རྒྱལ་བོ་ལས་གཞན་པའི་རྒྱལ་བོ། རང་གི་ཆོས་ལས་གཞན་པའི་ཆོས། རང་གི་རིགས་ལས་གཞན་པའི་རིགས་སོགས་ཅི་ཡང་མ་ཡིན་པར་བརྩི་ཞིང་བརྙས་ཐབས་བྱེད། དེ་ཁོང་ཚོ་ཡུལ་གཞན་དུ་རྒྱུ་འགྲུལ་མ་བྱས་པས་ལན། གཞན་དུ་ན་ཕྱོགས་གཞན་གྱི་རྒྱལ་བོ་དང་། རྒྱལ་ཁམས་འབྱོར་བ་སོགས་མཐོང་ནས། ཁོང་ཚོའི་མཆོག་འཛིན་གྱི་ང་རྒྱལ་དེ་ཆག་ངེས་སོགས་བྲིས། ཇོ་ནང་ཆོས་འབྱུང་དུ་མུལ་ཏན་དུ་ཀླ་ཀློའི་རྒྱལ་བོ་ཧལ་ལུ་བསླེབས་པ་རྒྱ་གར་དུ་ཀླ་ཀློའི་ཐོག་མ་ཡིན་སོགས་བྲིས་པ་ཡང་སྙན་དངགས་མཁན་འདིའི་མིང་ཨ་ལླ་བྱ་བ་འདྲ་གསན་པ་ཡིན་ནམ་སྙམ། འདི་[ཨལ་བཱི་རཱུ་ནཱི་]མཁས་པ་ཆེན་པོ་ཡིན་ཞིང་། ལེགས་སྦྱར་ཀྱང་ཤེས། མུ་སྟེགས་ཀྱི་རིག་བྱེད་དང་སྔོན་རབས་རྣམས་ལ་མཁས། ལེགས་ལྡན་གྱི་གླུ་ལ་བརྩི་ཆེར་བྱས། རིག་གནས་དུ་མའི་བསྟན་བཅོས་བརྩམས། ཁོས་བྲིས་པ་ཞིག་ཏུ་ད་ལྟའི་ལོ་བརྒྱ་ཙམ་གྱི་སྔོན་དུ་ཀླུ་སྒྲུབ་བྱ་བའི་སྨན་པ་ཆེན་པོ་ཞིག་བྱུང་སྟེ་དེས་བྲིས་པའི་སྨན་གྱི་གཞུང་ཞིག་ཀྱང་སྣང་ཞེས་བཤད་པས་ཡན་ལག་བརྒྱད་པ་རྩོམ་མཁན་གྱི་ཀླུ་སྒྲུབ་དེ་ཉེ་དུས་ཀྱི་མཁས་པ་ཞིག་ཡིན་པ་ཡང་སྲིད་དམ་སྙམ། འོན་ཀྱང་། རང་རེའི་ཁྲོད་ན་ཀླུ་སྒྲུབ་ཀྱི་མིང་ཐོགས་ཚད་རྩ་ཤེའི་རྩོམ་པ་བོ་དང་དོན་གཅིག་གིས་ཁྱབ་པ་ཞིག་རྟག་པ་ཐེར་ཟུག་ཏུ་འདུག་པས་དེ་གར་ཟད།

དེ་ལྟར་ཀླ་ཀློའི་ཆོས་ལུགས་ནི་མཚོན་ཆ་ཐོགས་པའི་དམག་དཔུང་དག་གིས་ཁྱེར་ཏེ་ཁྲག་གི་རྫིང་བསྐྱིལ་ནས་འཇིག་རྟེན་དུ་དར་བར་བྱས་ཤིང་། དེ་བཞིན་ཡེ་ཤུ་བའི་ཆོས་ལུགས་ཀྱང་ཡང་དག་པའི་དམག་ཅེས་བྱ་བའི་དཔུང་ཆེན་པོ་བཤམས་ཏེ་སྔར་བཞིན་སྤེལ་བ་སྔོན་གྱི་ཚེ་བྱུང་ལ། རང་རེའི་གནས་བརྟན་སྙིང་རྗེ་ཅན་དེའི་བསྟན་པ་ནི་དགེ་སློང་སྲིན་བུ་མི་གསོད་པ་དག་གིས་ཁྱེར་ཏེ་ཤར་ནུབ་ཀྱི་རྒྱ་མཚོ་ཆེན་པོ་ཡང་བརྒལ་ནས་དར་བ་ཡིན་ནོ་ཞེས་མི་འདྲ་བའི་ཆོས་འབྱུང་རྣམས་ཤེས་པར་བྱའོ། །

འདིར་སུལ་ཏན་ཧན་བྱ་བ་ཀླ་ཀློའི་སོག་རྒྱལ་རྣམས་ལ་ཞེ་སའི་འབོད་པ་སྟེ། རང་རེའི་ལོ་རྒྱུས་རྣམས་སུ་ཀླ་ཀློའི་རྒྱལ་བོ་ཤིང་སྟག་ཅན་བྱ་བ་བྱུང་བ་དང་། ལྷག་པར་མི་ཏྲ་ཛོ་ཀིའི་ངོ་མཚར་ཉི་ཤུ་བ་ལས་རྒྱལ་བོ་ཤིར་སྟག་མཁན་བྱ་བ་གཉིས་ཀ་ཡང་གདོན་མི་ཟ་བར་ཟུར་ཆགས་པ་ཡིན་འདུག་པས་ང་དང་ར་གཉིས་ནོར་བར་འདུག

དེ་ལྟར་ཀླ་ཀློའི་དམག་གིས་ཡུལ་ཀནྱ་ཀུབྫ་བཅོམ་པས་ས་ཁད་ཉེ་བ་པྲ་ཏི་ཧཱ་རའི་རྒྱལ་བོ་རྣམས་ཀྱང་སྟོབས་ཆེར་ཉམས། རྒྱ་གར་གྱི་རྒྱལ་སྲིད་རང་རྐྱ་བར་འཕྱིས་ཤས་སུ་བྱུང་བ་རྣམས་ཤས་ཆེར་ར་ཛ་པུ་ཏའི་[ར་ཛ་སྟན་]ཕྱོགས་སུ་བྱུང་། དེ་དག་ཀྱང་ནང་ཕན་ཚུན་འཁྲུག་ལོང་མང་དུ་བྱས། སངས་རྒྱས་འདས་རྗེས་ཀྱི་ལོ་བརྒྱ་ཕྲག་བཅུ་བདུན་པའི་ཕྱེད་སྔ་མའི་ནང་ཙམ་ན་ཀནྱ་ཀུབྫའི་ཡུལ་དུ་ཙནྡྲ་དེ་བ་བྱ་བའི་རྒྱལ་བོ་གྷ་ཧ་དྭ་ལའི་རིགས་ཡིན་པ་ཞིག་གིས་རྒྱལ་སྲིད་གསར་དུ་བཟུང་ཞིང་། དེའི་རྒྱུད་ལ་ཟླ་བའི་རིགས་སུ་གྲགས་པ་དག་བྱུང༌། ཐམས་ཅད་ཀྱང་མ་ཧཱ་རཱ་ཛ་ཨ་དྷི་རཱ་ཛ་སྟེ། རྒྱལ་བོ་ཆེན་པོ་དང་བོའི་རྒྱལ་བོའམ། གོང་མ་རྒྱལ་བོའི་ཆོ་ལོ་ཅན་དུ་གྱུར། ཙནྡྲ་དེ་བའི་ཡང་ཚ་གོ་བིནྡ་ཙནྡྲ་ནི་རྒྱལ་རྒྱུད་དེའི་རྒྱལ་བོ་གྲགས་ཆེ་ཤོས་སུ་གྱུར་ཞིང་། ཀནྱ་ཀུབྫ་དང་། མ་ག་དྷ་ཡོངས་ལ་དབང་བསྒྱུར། ཕྱི་ནང་གི་གནས་ཆེན་མང་བོ་ཏུ་རུ་ཀའི་འཇིགས་པ་ལས་བསྐྱབས། དེའི་བཙུན་མོ་ཀུ་མཱ་ར་དེ་བཱི་དཀོན་མཆོག་གསུམ་ལ་བླ་མར་འཛིན་པ་བྱུང་། ཉེ་དུས་སུ་དྲང་སྲོང་ལྷུང་བ་རི་དྭགས་ཀྱི་ནགས་སུ་ས་བསལ་བ་ན་བཙུན་མོ་འདིས་བཞེངས་པའི་གཙུག་ལག་ཁང་རྫ་ཕག་ལས་བྱས་པའི་ཁྲོན་པ་ཅན་ཞིག་ཀྱང་རྙེད། ཁ་བྱང་གི་ཡི་གེ་བཅས་པ་རྡོ་ལ་བརྐོས་ནས་སྣང་། འགའ་ཞིག་གིས་བཙུན་མོ་འདི་མི་ཏྲ་ཛོ་ཀི་ལ་སོགས་མཉན་པའི་སློབ་མ་ཡང་ཡིན་ཟེར། གོ་བིནྡའི་ཚ་བོ་ཛ་ཡ་ཙནྡྲ་སྟེ་འདས་རྗེས་ཀྱི་ལོ་ཆིག་སྟོང་བདུན་བརྒྱ་བཅུ་བཞི་[སྤྱི་ལོ་༡༡༧༠]ལ་ཁྲི་བཟུང་ཞིང་། ཕྱིས་ཀླ་ཀློ་རྣམས་ཀྱིས་བསད། འདི་ལ་ཀླ་ཀློའི་ལོ་རྒྱུས་སུ་ཡང་རྒྱལ་བོ་ཆེན་པོའི་མཐོང་བསྐྱེད་དེ་བྲིས་པ་མང་བར་གྲགས།

ཀླ་ཀློའི་སྲིད་ཀྱི་སྐབས་ལྷོ་ལམ་ཆུ་བོ་དུངྒ་བྷ་དྲའི་ལྷོ་ངོས་སུ་རྣམ་རྒྱལ་གྲོང་ཁྱེར་བྱ་བའི་རྒྱལ་ཁབ་སྟོབས་ལྡན་ཞིག་བྱུང་ཞིང་། དེ་རྒྱ་གར་རང་གི་རྒྱལ་བརྒྱུད་ཕྱིས་ཀྱི་སྟོབས་ཆེ་བ་དྲག་པ་དག་གིས་བཟུང་། ཀླ་ཀློ་དང་རྟག་ཏུ་འཐབ། ཕྱིས་ཀྱི་རྒྱལ་བོའི་ནང་ན་ཤིན་ཏུ་གྲགས་ཆེ་བའི་ཤི་བཱ་ཛཱི་བྱ་བ་ཡིན་ཞིང་། ལོ་རྒྱུས་ཅུང་ཟད་འོག་ཏུ་འཆད།  ནུབ་ཕྱོགས་རཱ་ཛ་པུ་ཏ་ན་རྣམས་རང་མགོ་འཛིན་ཞིང་། ཀླ་ཀློའི་རྒྱལ་བོ་དང་དགྲ་གྲོགས་རེས་མོས་སུ་བྱས་ཏེ་ཡུན་རིང་བསྡད། འདི་དག་རྒྱ་གར་གྱི་མི་དཔའ་བོའི་ཚད་འཛིན་ས་ཡིན་ཞིང་། ད་ལྟའི་བལ་ཡུལ་གོརྵའི་རྒྱལ་བོ་སོགས་ཀྱང་རིགས་འདི་ལས་མཆེད།

ཀ་ལིངྒ་དང་ཨོ་ཌི་བི་ཤའི་ཕྱོགས་སུ་གངྒའི་རྒྱལ་རྒྱུད་དུ་གྲགས་པ་ཞིག་གིས་འཛིན། སྟོན་པ་འདས་ནས་ལོ་སྟོང་དང་ལྔ་བརྒྱ་[སྤྱི་ལོ་~༩༥༦]ལྷག་ཙམ་ན་ཨནནྟ་ཝརྨན་བྱ་བས་སྲིད་འཛིན་ཞིང་རིགས་དེ་ནང་ནས་གྲགས་ཆེ་ཤོས་ཡིན། ཛགནྣཱ་ཐ་བྱ་བའི་ལྷ་ཁང་ཡ་མཚན་ཅན་དེ་ཡང་འདིས་བཞེངས་ཟེར་ཞིང་། ལོ་བདུན་ཅུ་ལྷག་རྒྱལ་སྲིད་བསྐྱངས། དེ་ནས་ལྷ་མིའི་སེངྒེ་བྱ་བའི་སྐབས་བྷངྒ་ལའི་ཀླ་ཀློ་རྣམས་དང་འཛིངས་ཏེ་ཡུལ་ཐུབ་པར་བསྲུང་། ཀོ་ཎརྐ་བྱ་བའི་ལྷ་ཁང་གྲགས་ཆེན་དེ་བཞེངས་པ་ཞིག་རལ་དུ་གྱུར་ནས་ད་ལྟའི་བར་ལུས། རྡོ་བརྐོས་ཀྱི་རི་མོ་རྒྱ་གར་ན་འདི་ལས་ལྷག་མེད་ཟེར་ཏེ། ངེས་པར་མིག་འཁྲུལ་ལྟ་བུར་ཡོད། དེ་ནས་ལྷ་སེར་སྐྱའི་དབང་བོ་བྱ་བས་གངྒཱ་ནས་ཀ་བེ་རིའི་བར་དུ་བཟུང་བ་སོགས་གྲགས། ཡུན་རིང་བོའི་བར་དུ་ཀལིངྒ་རྣམས་དབང་སྟོབས་ཆེ་བར་གནས་པ་ལས་ཕྱིས་འདས་རྗེས་ཀྱི་ལོ་ཉིས་སྟོང་ལྷག་པ་[སྤྱི་ལོ་~༡༤༥༦]ཇོ་ནང་ཀུན་མཁྱེན་སོགས་ཀྱི་སྐབས་ཙ་ན་ཀླ་ཀློའི་འོག་ཏུ་ཚུད། འོན་ཀྱང་ཆེས་ཕྱིས་སུ་ཡང་མཀུནྡྲ་དེ་ཝ་བྱ་བའི་རྒྱལ་བོ་བྱུང་ནས་སངས་རྒྱས་པ་ལ་གུས་ཚུལ་སོགས་སུམྦྷ་མཁན་པོས་(༡༧༠༤-༡༧༨༨)བཤད་པ་འདིར་སྨོས་ཙམ་བྱས་སོ།།

 

ཨི་ས་ལམ་མམ་ཧྭོས་ཧྭོས་སམ་ཧེ་ཙི་བའམ་ཁ་ཆེའི་ལོ་རྒྱུས་འདི་ཡང་རིག་པ་དོན་གཉེར་བ་དུ་མར་སྤྲོ་བ་བསྐྱེད་ཕྱིར་གསེར་ཐང་ལས་ཁོལ་དུ་ཕྱུང་ཞིང་ཞུས་དག་ཞིབ་མོ་གཅིག་སོང་བ་སྤེལ་བ་བོ་ནི་ཟླ་བ་གཞོན་ནུའོ། ། ཚན་པ་འདིའི་ནང་དུའང་ལོ་རྒྱུས་མི་སྣ་གྲགས་ཅན་དང་བྱུང་བ་མཚར་བོ་རེ་འགར་མཆན་འདེབས་དགོས་པ་ཡོད་ཀྱང་། གསེར་ཐང་མཆན་སྦྲགས་མར་དཀྱུས་གཅིག་ཏུ་དགོད་པར་འདོད་པས་འདིར་མ་སྤེལ་ལོ། །

རི་མོའི་སྒྱུ་རྩལ་ལ་བྱང་བའི་དགེ་འདུན་ཆོས་འཕེལ།

 

རི་མོའི་སྒྱུ་རྩལ་ལ་བྱང་བའི་དགེ་འདུན་ཆོས་འཕེལ།

དགེ་འདུན་ཆོས་འཕེལ།

༡༩༠༣ལོའི་ཧོར་ཟླ༣པའི་ཚེས༢༣ཉིན་མདོ་སྨད་རེབ་གོང་ཞོ་འོང་དཔྱི་གྲོང་ཚོ་རུ་སྐུ་འཁྲུངས། ༡༩༠༩ལོར་གཡའ་མ་བཀྲ་ཤིས་འཁྱིལ་དགོན་པར་སློབ་གཉེར་གནང་བར་ཕེབས། ༡༩༢༡ལོར་མདོ་སྨད་བླ་བྲང་བཀྲ་ཤིས་འཁྱིལ་དུ་སློབ་གཉེར་གནང་བར་ཕེབས། ༡༩༢༧ལོར་དབུས་གཙང་དུ་ཕེབས་ཏེ་འབྲས་སྤུངས་དགོན་པའི་སྒོ་མང་གྲྭ་ཚང་གི་ཀླུ་འབུམ་ཁམས་ཚན་དུ་སློབ་གཉེར་གནང་། ༡༩༣༤ལོ་ནས༡༩༤༦ལོའི་བར་རྒྱ་གར་ལ་ལན་གཉིས་ཕེབས། ༡༩༤༧ལོ་ནས༡༩༥༠ལོའི་བར་བཙོན་དུ་བཞུགས། ༡༩༥༡ལོའི་ཧོར་ཟླ༨པའི་ཚེས༡༤ཉིན་གྲོང་ཁྱེར་ལྷ་སའི་དགའ་རུ་ཤག་གི་ཡང་སྟེང་དུ་སྐུ་གཤེགས། སྐབས་དེར་དགུང་ལོ༤༩ཡིན། གསུང་རྩོམ་ལ《རྒྱལ་ཁམས་རིགས་པས་བསྐོར་བའི་གཏམ་རྒྱུད་གསེར་གྱི་ཐང་མ》དང་། 《དེབ་ཐེར་དཀར་པོ》《ཀླུ་སྒྲུབ་དགོངས་རྒྱན》《འདོད་པའི་བསྟན་བཅོས》སོགས་ཡོད།

  

རི་མོའི་སྒྱུ་རྩལ་ལ་བྱང་བའི་དགེ་འདུན་ཆོས་འཕེལ།

 

བདེ་ནུབ་རྡོ་རྗེ་དགྲ་འདུལ།

 

མཁས་དབང་དགེ་འདུན་ཆོས་འཕེལ་ནི（1903—1951）དུས་རབས་ཉི་ཤུ་པར་བོད་ཀྱི་ཁྱད་དུ་འཕགས་པ་དང་རྩོད་གླེང་ཡོད་པའི་མི་སྣའི་གྲས་ཤིག་ཡིན། འདིར་དམ་པ་གང་ཉིད་ཀྱི་མཁྱེན་ཡངས་རྒྱ་མཚོ་ལྟ་བུ་ལས་ཆུ་ཐིགས་ཙམ་ཞིག་ངོ་སྤྲོད་ཞུ་ན། གང་ཉིད་ནི་འབྲི་རྩལ་བྱང་ཆུབ་པའི་རི་མོ་མཁས་ཅན་ཞིག་ཡིན་ཁར། ཡིག་སྒྱུར་དང་མཚན་ཉིད་རིག་པ། ལོ་རྒྱུས། སྙན་ངག ཡུལ་སྐོར་སོགས་གང་ཐད་ལ་མཁས་པའི་ཡང་རྩེར་སོན་ཞིང་། ཕྱིས་སུ་ད་དུང“གསར་བརྗེའི”ལས་འགུལ་ཀྱང་སྤེལ་མྱོང་། ཁོང་སྐུ་ཚེའི་འཕེན་པ་རྫོགས་སྔ་བ་དེས་གང་གི་རྩོམ་རིག་གསར་རྩོམ་གྱི་མཛད་འཕྲིན་ལ་བར་ཆད་བྱུང་ཡོད་ཀྱང་ད་ལམ་དཔེ་སྐྲུན་དུ་བཏབ་པའི་གྲགས་ཅན་གྱི་ཕྱག་རྩོམ་ཇི་སྙེད་ཅིག་མཆིས་པ་དེ་དག་ལས་གང་ཉིད་ལ་ལྷན་སྐྱེས་ཀྱི་མཁྱེན་སྟོབས་མངའ་བ་རྟོགས་ཐུབ།

1951ལོར་ཁོང་ལྷ་སར་སྐུ་ཚེ་མ་ཟིན་ཞིང་། གལ་སྲིད་ད་ལྟའང་སྐུ་འཚོ་ཞིང་བཞུགས་ཡོད་ན། ད་ལོ་སྐུ་ན་དོན་བཞིར་སྨིན་ཡོད།（ལོ་འདི1974ཡིན་པར་སྣང་། — རྩོམ་སྒྲིག་པས） ཁོང་གི་ངོ་ཤེས་མི་མང་པོ་ཞིག་ད་ལྟ་ཡང་རྒྱ་གར་དང་བལ་ཡུལ་སོགས་འཛམ་གླིང་ས་ཕྱོགས་གང་སར་འཚོ་ཞིང་བཞུགས་འདུག་པས། ངས་ལོ་གཅིག（1974—1975）གི་དུས་ཚོད་ནང་ཁོང་དང་དུས་མཉམ་པའི་མི་དང་ཁོང་གི་གྲོགས་པོ། སློབ་མ་བཅས་མི་གྲངས་བཞི་བཅུ་ལྷག་ཙམ་ཐུག་འཕྲད་བྱས་ནས། ཁ་རྒྱུན་ལ་གྲགས་པའི་མཛད་འཕྲིན་དང་བོད་ཡིག་གི་རྣམ་ཐར་དེབ་གསུམ། དེ་མིན་རྒྱ་གར་གྱི་དུས་དེབ་དང་དབྱིན་ཇི་སྲིད་གཞུང་གི་ཡིག་ཚགས་ཀྱི་ནང་བསྡུས་པའི་དཔྱད་གཞིའི་ཡིག་རིགས་བཅས་ལག་སོན་བྱུང་བ་དེ་དག་གིས་རྣམ་ཐར་རྒྱས་ཙམ་ཞིག་དང་ཁོང་གིས་བརྩམས་པའི་རྩོམ་ཡིག་དང་གསུང་རྩོམ་བཞི་བཅུ་ལྷག་ཙམ་ཞིག་གི་དཀར་ཆག་ཡང་འབྲི་ཆོག་པ་འདུག དེའི་ནང་ནས་རྩོམ་ཐུང་བཅུ་གཉིས་དང་། གསུང་རྩོམ་བརྒྱད། སྙན་ངག་ཁག་གཅིག་བཅས་ཁོང་གི་ཡིན་པར་མི་རྣམས་ཀྱིས་ངོས་འཛིན་པའམ་དཔར་སྐྲུན་ཞུས་ཟིན་ཞིང་། གཞན་རྩོམ་ཡིག་ཉི་ཤུ་རྩ་གཉིས་ཡོད་པའང་ཁོང་གི་ཕྱག་རྩེ་ལས་ཐོན་པའི་ངོས་འཛིན་བྱེད་ཀྱི་ཡོད།

བོད་ཕུད་པའི་འཛམ་གླིང་ཡུལ་གྲུ་གཞན་དུ་དགེ་འདུན་ཆོས་འཕེལ་ནི་གཙོ་བོར་རིག་པ་བ་ཞིག་ཏུ་ངོས་འཛིན་བྱེད་ཀྱི་ཡོད། ཁོང་ནི་རྒྱ་གར་དུ་ལོ་བཅུ་གཉིས་བཞུགས་ཤིང་། གང་སར་གནས་གཟིགས་དང་ཞིབ་འཇུག་བསླབ་སྦྱངས་བཅས་རྒྱ་ཆེར་མཛད། ད་དུང་ཁོང་གི་གྲོགས་པོ་ར་ཧུ་ལར་ཕེབས་རོགས་གནང་སྟེ། 1934ལོ་དང1936ལོ། 1938ལོ་བཅས་ཐེངས་གསུམ་བོད་དུ་ཕྱིར་ཕེབས་གནང་ནས་འཕགས་ཡུལ་དུ་ཉམས་རྒུད་སོང་ཟིན་པའི་གནའ་རབས་ལེགས་སྦྱར་སྐད་ཀྱི་དཔེ་ཆ་བཙལ་འཚོལ་དུ་ཕེབས་པ་མ་ཟད། བོད་ཡིག་གི་དཔེ་ཆ་བསྡུ་སྒྲིག་གི་གལ་ཆེའི་མཛད་འཕྲིན་བསྐྱངས། དཔེ་ཆ་དེ་དག་ནི་ད་ལྟ་ཕཱ་རན་སིའི་དངོས་མང་བཤམས་སྟོན་ཁང་དུ་ཉར་ཚགས་བྱས་ཡོད། ཁོང་ཀ་ལི་ཀ་ཏར་རྒྱ་གར་བྱང་ཆུབ་ཆེན་པོའི་ཆོས་ཚོགས་ནང་ཕྱག་ལས་གནང་མྱོང་ལ་ཁོང་ཚོའི་ཕྱག་རོགས་འོག་སྦེ་ན་ལ་སི་དང་སིདྒ་ལའི་གྲོང་ཁྱེར་པ་ལིར་ལེགས་སྦྱར་སློབ་སྦྱོང་གནང་བ་མ་ཟད། དབྱིན་ཡིག་ཀྱང་སློབ་སྦྱོང་གནང་སྟེ། དབྱིན་ཡིག་གི་ཐོག་ནས་སྙན་ངག་དང་རྩོམ་ཡིག་འགའ་ཞིག་ཀྱང་བརྩམས་གནང་མཛད། ལ་པིང་ཏ་ན་དྷ་ཀཱ་ལི་ཡི་གདན་ཞུས་ལྟར་སན་ཐི་ནེ་ཁེ་ཐན་དུ་བོད་ཡིག་སློབ་ཁྲིད་ཀྱི་ཕྱག་ལས་ཀྱང་གནང་། འོན་ཀྱང་ཁོང་རང་གི་དགོངས་པར་བག་ཕེབས་ཀྱི་ལས་གནས་དོར་ཏེ། བསམ་པ་གུ་ཡངས་པོས་གནས་སྐོར་དང་ཞིབ་འཇུག་གི་ཕྱག་ལས་མཛད་རྒྱུ་ཁོ་ན་མཉེས་པ་གནང་གི་ཡོད་ཚུལ་ཐོས་ཤིང་། ཨུ་རུ་སུ་དང་ཨ་རི། ཡོ་རོབ་བཅས་སུ་གནས་གཟིགས་ལ་ཕེབས་འདོད་གནང་མུས། 1939ལོར་གྲགས་པ་དེ་ཙམ་མེད་པའི་ཨ་རིའི་རིག་པ་མཁས་ཅན་ཞིག་གིས་ཨ་རིའི་གྲོང་ཁྱེར་ཉིའུ་ཡོག་ལ་འཚམས་འདྲི་དང་གནས་གཟིགས་ལ་གདན་ཞུ་བྱས་ཀྱང་། ཕལ་ཆེར་འཛམ་གླིང་འཁྲུག་ཆེན་གཉིས་པའི་རྐྱེན་གྱིས་དེ་སྐབས་ཁོང་ཕེབས་མ་ཐུབ་པས་ཐུགས་ཕམ་ཆེན་པོ་བྱུང་། ཁོང་དང་བྷ་བུ་མཐར་ཕྱིན་ལགས（harch nabu）གཉིས་ཀ་ལོན་སྦུག་ཏུ་བར་སྐབས་ཤིག་རིང་ལྷན་དུ་ཕྱག་ལས་གནང་། བྷ་བུ་མཐར་ཕྱིན་ལགས་བརྒྱུད་ཁོང་དང་ཡ་ཁ་མ་ཀོ་དབར་འབྲེལ་བ་གནང་ཞིང་། ཁོང་གིས་ཡ་ཁ་མ་ཀོར་ཏུན་ཧོང་ནས་ཐོན་པའི་བོད་ཡིག་ཡིག་ཆ་ལྟ་ཀློག་གི་ཕྱག་རོགས་ཞུས། ཁོང་གིས་འཇོར་ཇི་རོལ་རིག་གིས《དེབ་སྔོན》ཡིག་སྒྱུར་བྱེད་སྐབས་ཁོ་པ་དང་དུས་ཡུན་རིང་པོ་ཞིག་བར་ལས་འཕྲིན་བསྐྱངས། ཁོང་དགོངས་པ་གཞན་དོན་དུ་ཕེབས་ཉེར་ཡོད་སྐབས་བདག་ཅག་གི་བླ་ན་མེད་པའི་ལས་རོགས་སྐབས་དེར་ལྷ་སར་བཅའ་བཞུགས་རིང་ཅར་སན་ནས་ཁོང་ལ་རྡོ་རིང་གི་ཡི་གེའི་སྐོར་ཡང་བཀའ་འདྲི་ཞུས་མྱོང་།

དགེ་འདུན་ཆོས་འཕེལ་ནི་བླ་ན་མེད་པའི་མཁས་དབང་ཞིག་སྟེ། ཕ་རོལ་པོ་རྩོད་པས་འདུལ་བར་སྤྲོ་བའི་རིག་པའི་དཔའ་བོ་ཞིག་ཡིན་པ་ཙམ་མ་ཟད། གཞན་དྲིང་མི་འཇོག་པའི་སློབ་དཔོན་ཞིག་ཡིན་ལ། བདེན་འཚོལ་ཕོད་པའི་རིག་པ་སྨྲ་བ་ཞིག་དང་ཕུགས་བསམ་རིང་ལུགས་ཀྱི་གསར་བརྗེ་པའང་ཡིན། གཞན་ཡང་གསར་གཏོད་རང་བཞིན་གྱིས་ཕྱུག་པའི་མི་ཞིག་ཡིན་ལ་སྙན་ངག་པ་དང་རི་མོ་བ། དེ་བཞིན་ཆང་དང་བུད་མེད་ལ་དགའ་བའི་མི་ཞིག་ཀྱང་ཡིན། ཟེར་སྒྲོས་ལ་ཁོང་ལ་ཐུན་མོང་མ་ཡིན་པའི་མགུར་དབྱངས་ཀྱི་རྣམ་པ་ཞིག་ཀྱང་གཏོང་རྒྱུ་ཡོད་སྐད། གང་གི་མཛད་སྤྱོད་ཡ་མཚན་ཅན་དེ་དག་མི་ཚོའི་ཁ་རྒྱུན་ལ་ཆགས་ཏེ་ཁོང་གི་མཐའ་འཁོར་དུ་རྒྱུན་ཆད་མེད་པར་ཁྱབ་ཅིང་། དགེ་འདུན་ཆོས་འཕེལ་གྱིས་ལས་འགུལ་འདྲ་མིན་གྱི་ནང་དུ་བོད་མིའི་བསམ་པའི་གནས་སྟངས་སམ་ལྟ་བའི་འཁྱེར་སོ་དང་རང་ཉིད་ཀྱི་རྣོ་ངར་ལྡན་ལ་དགག་སྒྲུབ་རང་བཞིན་གྱི་ཡང་བསྐྱར་གདེང་འཇོག་མཛད་པ་གཉིས་ཟུང་དུ་འབྲེལ་གྱི་ཡོད།

ཁོང་ནི་ཨ་མདོ་རེབ་གོང་གསེར་མོ་ལྗོངས་ཞོ་འོང་དཔྱི་རུ་སྐུ་འཁྲུངས། ཁོང་གི་དགེ་རྒན་ལ་སྔ་བ་ནི་ཁོང་གི་ཡབ་ཉིད་ཡིན། ཡབ་ནི་གསང་སྔགས་རྙིང་མའི་རྣལ་འབྱོར་པ་ཞིག་ཡིན། ཁོང་གིས་ཡབ་ཀྱི་དྲུང་ནས་ཡི་གེ་འབྲི་ཀློག་གི་རྨང་གཞིའི་ཤེས་བྱ་དང་། སྙན་ངག   རྙིང་མའི་ལུགས་ཀྱི་ཆོ་ག་སོགས་སྦྱངས། བླ་བྲང་དགོན་དུ་ཧ་ལམ་ལོ་དྲུག་རིང་སློབ་གཉེར་གནང་ཞིང་། ཟེར་སྒྲོས་ལྟར་ན་ཁོང་གིས་རང་འགུལ་གྲུ་ཆུང་ཞིག་བཟོས་པ་མ་ཟད་དེས་དགོན་པའི་ཉེ་འགྲམ་གྱི་ཆུ་བོ་འཕྲེད་བཅད་བཏང་བ་རེད་ཅེས་ཟེར། ཁ་ཅིག་གིས་གྲུ་ཆུང་དེ་ནི་སྒྲོན་མེའི་ཚ་ནུས་ལ་བརྟེན་ནས་འགུལ་སྐྱོད་བྱེད་ཟེར་ཞིང་། ཡང་འགའ་ཞིག་གིས་དེ་ནི་ཆུ་ཚོད་རྙིང་པ་ཞིག་གི་ལྷུ་ལག་ཡོངས་སུ་བཤིགས་ནས་བཟོས་པ་ཡིན་ཞེས་ཀྱང་ཟེར་སྲོལ་འདུག

དགོན་པར་ཚེ་མདོ་ཚེ་བུམ་སློབ་སྦྱོང་གནང་སྐབས《བཀའ་འགྱུར》གྱི་ནང་ཁོང་གིས་འབྲེལ་ཡོད་བཟོ་རྩལ་གྱི་དུམ་བུ་འགའ་ཀློག་པ་ལས་ཁོང་ལ་བློ་སྒོ་འབྱེད་ཐུབ་པ་བྱུང་བ་མ་ཟད། ཤེས་རབ་དར་འཕེལ་གྱི་མདུན་ནས་ཀྱང་ཁག་གཅིག་ཤེས་པ་ཡིན་ཟེར་སྐད། ཤེས་རབ་དར་འཕེལ་ནི་ཨ་རིའི་ཆོས་སྤེལ་མཁན་ཞིག་ཡིན། དགེ་འདུན་ཆོས་འཕེལ་ནི་དགོན་པའི་ཉེ་འདབས་ཀྱི་བླ་བྲང་འདབས་འོག་ཏུ་ལོ་མང་ཞིག་རིང་བཞུགས། ཡིན་ནའང1927ལོར་ཁོང་ལྷ་སར་འབྱོར་རྗེས་ང་ཚོས་གཞི་ནས་ཁོང་རི་མོ་བ་མཁས་ཅན་ཞིག་ཡིན་པ་གོ་ཐོས་བྱུང་། འབྲས་སྤུངས་དགོན་པར་བཞུགས་པའི་གྲྭ་པ་རྣམས་ལ་གལ་སྲིད་དད་ལྡན་རྣམས་ཀྱི་མང་འགྱེད་མེད་ན་འཚོ་བར་དཀའ་ངལ་ཡོད་མོད། དགེ་འདུན་ཆོས་འཕེལ་གྱིས་རི་མོ་སྣ་ཚོགས་བྲིས་པ་ནི་ལྟོ་གོས་ཀྱི་ཆེད་དུ་ཡིན་ཞེས་གསུངས། འོན་ཀྱང་ལྷ་སར་སྟོན་པའི་སྐུ་འདྲ་ནི་ཡེ་ནས་འབྲི་མྱོང་མེད། ཀླུ་འབུམ་ཁམས་ཚན་དུ་ཁོང་གི་གྲོགས་པོའི་སྒོ་རྭའི་ནང་། ཁོང་གིས་རི་མོ་ཞིག་བྲིས་ཡོད་དེ། ཁྱད་དུ་འཕགས་པའི་གྲྭ་པ་གཞོན་ནུ་ཞིག་དང་རྒྱ་ནག་གོང་མ་ཞིག་ལྷན་དུ་བཞུགས་པ་ཞིག་བྲིས་ཡོད་པ་ནི་རང་བྱོན་ལྟ་བུར་སྣང་སྟེ། ཧ་ལམ་ཁོང་གཉིས་བཀའ་མོལ་གནང་བཞིན་པ་ལྟར་ཡོད། གྲོགས་པོ་ཚོས་ཁོང་གི་རི་མོའི་ཉམས་འགྱུར་ཐད་ཀྱི་ཕུགས་བསམ་རིང་ལུགས་དང་མཚོན་རིས་ཀྱི་ཐུན་མོང་མ་ཡིན་པའི་སྐོར་གླེང་ཞིང་། ཁོ་པ་ཚོས་ད་དུང་ཁོང་གིས་བྲིས་པའི་རྩི་ཤིང་དང་ལུས་ལ་བོད་ཆས་གྱོན་ཞིང་ལག་གཉིས་ཀྱིས་བདུག་སྤོས་བཟུང་བའི་བུད་མེད། གཞན་ཡང་མི་ལ་རས་པ་དང་ཨ་ཏི་ཤའི་སྐུ་བརྙན། མི་དཔོན་སྐུ་དྲག་གི་འདྲ་རིས་སོགས་མང་པོ་ཞིག་བྲིས་པའང་དྲན། 1927ལོར་ཁོང་ལྷ་སར་འབྱོར་བ་ནས1947ལོར་བཙོན་བཅུག་མ་བྱས་བར་རི་མོ་བྲིས་ནས་རྒྱུ་དངོས་འབོར་ཆེན་རག་ཡོད། དེས་ཁོང་གཞན་ལ་བརྟེན་མི་དགོས་པར་འཚོ་སྡོད་བྱེད་ཐུབ་ངེས་ཡིན་ལ་དངུལ་ཡོད་པའི་རྐྱེན་གྱིས་ད་གཟོད་ཁོང་གནས་གཟིགས་ལ་གང་སར་ཕེབས་ཐུབ་པའང་བྱུང་།

འབྲས་སྤུངས་དགོན་དུ་བཞུགས་དུས་སྐབས་དེར་སྙན་གྲགས་ཆེན་པོ་ཡོད་པའི་ལྷ་རམས་པ་དགེ་བཤེས་ཤེས་རབ་རྒྱ་མཚོ་སློབ་དཔོན་དུ་བསྟེན། དགེ་བཤེས་ཤེས་རབ་རྒྱ་མཚོ་དང་ཏཱ་ལའི་བླ་མ་སྐུ་ཕྲེང་བཅུ་གསུམ་པ་གཉིས་དབར་འབྲེལ་ལམ་ཟབ་མོ་ཡོད། ཁོང་ནི་བོད་དུ་མི་སྒེར་གྲགས་པ་ཆེ་བའི་གྲས་ཤིག་ཡིན་ཞིང་། ཕྱིས་སུ་ཀྲུང་གོའི་ནང་བསྟན་མཐུན་ཚོགས་ཀྱི་ཚོགས་གཙོ་དང་མཚོ་སྔོན་ཞིང་ཆེན་མི་དམངས་སྲིད་གཞུང་གི་ཀྲུའུ་ཞི་གཞོན་པའི་གདན་ཐོབ་འཛིན་མྱོང་། དགེ་འདུན་ཆོས་འཕེལ་ནི་འབྲས་སྤུངས་དགོན་དུ་སྔ་ས་ནས་ཁོང་གི་མཁྱེན་སྟོབས་དང་ཐུན་མོང་མ་ཡིན་པའི་རྩོད་པའི་རྩལ་ནུས་ལ་ཉེ་རིང་གང་སར་གྲགས་པ་ཇེ་ཆེར་འཕེལ།  དགེ་སློབ་གཉིས་དབར་གྱི་འབྲེལ་བར་ཁོན་ཐོག་གང་ཙམ་བྱུང་ཡོད་དེ། དགེ་འདུན་ཆོས་འཕེལ་གྱིས་ཤེས་རབ་རྒྱ་མཚོས་བཤད་པའི་སྐད་ཆ་ཚང་མ་དགག་ཐུབ་ཅེས་ཟེར་ཞིང་། ཤེས་རབ་རྒྱ་མཚོས་ཀྱང་རྟག་ཏུ་ཁོང་སྨྱོན་པ་ཞིག་ཏུ་བརྩི་ཡི་ཡོད། ཁོང་གཉིས་ཀ་ནང་རིག་པའི་ཐད་ལ་ཤིན་ཏུ་བྱང་ཆུབ་པ་ཞིག་ཡིན་ཞིང་། གཉིས་ཀ་རི་མོ་མཁས་པ་ཡིན་ལ་རང་གཤིས་གྱོང་པོ་ཡང་ཡོད་པའི་མི་ཡིན། འོན་ཀྱང་ཁོང་གཉིས་ཀྱི་ལྟ་བ་ནི་ཐ་དད་དུ་སྣང་ཞིང་། བར་སྐབས་ཤིག་རིང་དགེ་འདུན་ཆོས་འཕེལ་གྱིས་ཤེས་རབ་རྒྱ་མཚོའི་སློབ་ཁྲིད་ལ་མ་ཉན་པས། དགེ་བཤེས་ཤེས་རབ་རྒྱ་མཚོ་ཐུགས་ཁྲོས་ནས་མི་བཏང་སྟེ་དགེ་འདུན་ཆོས་འཕེལ་གྱི་སར་རྒྱུ་མཚན་དྲིས། དགེ་འདུན་ཆོས་འཕེལ་གྱིས་སྤོབས་སེམས་ཆེན་པོའི་ངང་ནས“ཁོས་ཤེས་པ་ནི་ངས་ཀྱང་ཤེས། ངས་མི་ཤེས་པ་རྣམས་ནི་ཁོས་ཀྱང་མི་ཤེས”ཞེས་གསུངས་ནས་མུ་མཐུད་རི་མོ་འབྲི་གནང་མཛད།

ཀླུ་འབུམ་ཁམས་ཚན་དུ་ལྷ་རིས་མཁས་པ་ཞིག་གི་སྐོར་ཁ་རྒྱུན་དུ་འདི་ལྟར་གྲགས་ཏེ། ལྷ་རིས་པ་དེ་ཡང་མདོ་སྔགས་ཟུང་འབྲེལ་གྱི་སློབ་དཔོན་གཙོ་གྲས་ཤིག་ཡིན། ཉིན་ཞིག་ཁོང་གིས་ནམ་ཀུན་ལྟར་སློབ་ཁྲིད་མ་གནང་བར། རི་མོའི་ཐད་ཁོང་རང་ལས་ཀྱང་མཁས་ཙམ་ཡོད་པར་གྲགས་པའི་སློབ་མ་ཞིག་དང་འགྲན་བསྡུར་བྱས། ཁོང་གཉིས་ཀ་ཡིས་ཙི་ཙི་རེ་བྲིས་ཤིང་། སློབ་དཔོན་དེས་སློབ་མ་རྣམས་ལ་གདེང་འཇོག་བྱེད་དུ་བཅུག་པས། སློབ་བུ་ཁག་གཅིག་གིས་སློབ་ཕྲུག་དེས་བྲིས་པའི་རི་མོ་དེ་མཛེས་པར་ངོས་འཛིན་བྱེད་ཀྱང་ཁོ་པ་ཚོས་ཕུགས་འཕེར་བ་ཞིག་ཁ་མཚོན་གཅོད་མ་ནུས། སྐབས་དེར་སློབ་དཔོན་གྱིས་ཞུམ་བུ་ཞིག་འཁྱེར་ནས་དབྱེ་འབྱེད་བྱས་པས། བྱི་ལ་དེས་སློབ་མས་བྲིས་པའི་ཙི་ཙིར་སྣང་འཇོག་སྤུ་ཙམ་ཡང་མ་བྱས། དེ་ལས་ལྡོག་སྟེ་ཀླུ་འབུམ་ལྷ་རིས་མཁས་པས་བྲིས་གནང་བའི་ཙི་ཙི་དེར་མིག་ཅེར་རེར་ལྟ་ཞིང་ཙོག་པུར་བསྡད། མ་ཟད་རི་མོར་མཆོངས་གྲབས་བྱེད། …… དགེ་འདུན་ཆོས་འཕེལ་མ་སླེབས་གོང་ལ་ཀླུ་འབུམ་ཁམས་ཚན་གྱི་གྲྭ་པ་ཚོས་ཤེས་རབ་རྒྱ་མཚོ་ནི་དུས་རབས་བཅོ་བརྒྱད་པའི་གྲགས་ཅན་སློབ་དཔོན་དེའི་སྤྲུལ་སྐུར་རྩི་ཡི་ཡོད། ཟེར་སྒྲོས་ལ་དགེ་བཤེས་ཤེས་རབ་རྒྱ་མཚོ་རང་ཉིད་ཀྱིས་ཀྱང་ཁོང་གཉིས་ཐབས་རྩལ་རྣམ་པ་ལྔ་སློབ་སྦྱོང་གནང་སྐབས། དགེ་འདུན་ཆོས་འཕེལ་གྱི་རི་མོའི་ཐོག་ཁྱད་ཆོས་དེ་བས་མངོན་གསལ་དོད་པོ་ཡོད་པར་ཞལ་བཞེས་གནང་གི་ཡོད། ཁོང་ནི་རིམ་བཞིན་མི་རྣམས་ཀྱིས་ཤེས་རྟོགས་བྱུང་བས། ཁོང་དང་དུས་མཉམ་པའི་མི་དང་མ་ཟད། སེར་སྐྱ་ནས་མི་དྲག་བར་གྱི་རིམ་པ་མི་འདྲ་བའི་སྦྱིན་བདག་རྣམས་ཀྱི་བསྔགས་བརྗོད་ཐོབ་ཅིང་། རྗེས་ཀྱི་ལོ་ཤས་ནང་ཁོང་ལ་ད་དུང་སྲིད་སྐྱོང་དང་སྟག་བྲག་སྤྲུལ་སྐུའི་གཟིགས་སྐྱོང་ཐོབ།

1934ལོར་པཎྜི་ཏ་ར་ཧུ་ལ་ཟེར་བ་ཞིག་ལྷ་སར་བོད་ཀྱི་དགོན་སྡེ་ཁག་ཏུ་གནའ་རབས་ལེགས་སྦྱར་གྱི་མ་ཡིག་འཚོལ་རྒྱུར་རོགས་མི་འཚོལ་བར་ཕེབས། དགེ་བཤེས་ཤེས་རབ་རྒྱ་མཚོའི་ཤག་ནང་ཁོང་དང་དགེ་འདུན་ཆོས་འཕེལ་ཐོག་མར་མཇལ་འཕྲད་བྱུང་ཞིང་། མི་རིང་བར་ཁོང་གཉིས་མཛའ་མཐུན་གྲོགས་པོར་གྱུར།  ཁོང་གཉིས་ལྷན་དུ་རྭ་སྒྲེང་དུ་གནས་གཟིགས་སུ་ཕེབས་པ་དང་། དེ་རྗེས་སླར་བོད་ཀྱི་ལྷོ་ཕྱོགས་དང་། བལ་ཡུལ། རྒྱ་གར་བཅས་སུ་ལྷན་ཕེབས་གནང་། ཁོང་ཚོས་ནང་པའི་གནས་ཤུལ་རྩ་ཆེན་མང་དག་ཅིག་ལ་ལྟ་སྐོར་གནས་གཟིགས་གནང་ཞིང་། གང་དུ་སླེབས་ཀྱང་དགེ་འདུན་ཆོས་འཕེལ་གྱིས་འདྲ་རིས་འབྲི་གནང་གི་ཡོད། རྭ་སྒྲེང་དགོན་དུ་ཁོང་ལྷག་པར་སེམས་འགུལ་ཐེབས་པ་ཞིག་བྱུང་བ་སྟེ། གནའ་རབས་རྒྱ་གར་གྱི་རི་མོ་ཞིག་མཇལ་བ་འདྲ་བཤུས་གནང་ཞིང་། དཔྱད་གཞིའི་ཡིག་རིགས་དེ་དག་བམ་པོ་སྒྲིག་དགོས་དགོངས་ཀྱང་དེ་གའི་དཀོར་གཉེར་གྱིས་དེ་ལྟར་བྱེད་དུ་མ་བཅུག  ལྷོ་ཁའི་གྲ་ནང་དགོན་པར་ཁོང་གིས་ཁ་ཆེ་པཎྜི་ཏ་ཤཱཀྱ་ཤྲིའི་འཇིམ་སྐུའི་འདྲ་རིས་ཤིག་འབྲི་གནང་མཛད་པ་ཤིན་ཏུ་གཙིགས་ཆེར་འཛིན། ཁོང་གིས་ཐོག་མར་འཇིམ་སྐུ་ལ་མཇལ་སྐབས་བརྗོད་མི་ཤེས་པའི་ཡ་མཚན་ཚོར་སྣང་ཞིག་སྐྱེས་བྱུང་གསུངས། ད་དུང་སྐྱིལ་ཀྲུང་གི་སྤྱན་རས་གཟིགས་ཀྱི་སྐུའི་འདྲ་རིས་ཀྱང་བྲིས་གནང་མཛད། བལ་ཡུལ་དུ་འབྱོར་རྗེས་ཁོང་ཚོ་བལ་པོའི་འབྱོར་ལྡན་ཚོང་པ་ཐ་ལ་ནའི་ཁྱིམ་དུ་ཟླ་བ་དྲུག་བཞུགས། ཁྱིམ་ཚང་དེས་ལོ་བརྒྱ་དང་ལྔ་བཅུའི་གོང་ལ་ལྷ་སར་ཚོང་ཁང་ཞིག་གཉེར་མྱོང་བའི་ཚོང་ལས་གཙོ་བོ་ནི་བལ་སྤུ་ཡིན། ཁོང་ཚོ་བཞུགས་སའི་ཁང་པའི་གྱང་ལྡེབས་ཐོག་དགེ་འདུན་ཆོས་འཕེལ་གྱིས་སྟོན་པའི་མཛད་པ་བཅུ་གཉིས་ལས་སྟོན་པའི་སྐུ་གསུམ་བྲིས་གནང་མཛད། ཡིད་ཕངས་པ་ཞིག་ལ་ཁང་པ་དེ་ལོ་མང་རིང་གསོལ་ཐབ་ཏུ་བེད་སྤྱོད་བྱས་ཡོད། འོན་ཀྱང་མི་རྣམས་ཀྱིས་སྟོན་པའི་སྐུ་དེ་དག་ལ་ཉམས་གསོ་ཐེངས་གཉིས་བྱེད་མྱོང་།

1938ལོར་ར་ཧུ་ལ་ཡིས་པེ་ཧར་དང་ཨོ་ཊི་སའི་ཞིབ་འཇུག་ལྷན་ཚོགས་ཀྱི་རོགས་སྐྱོར་འོག   རྟ་ཞོན་ནས་རྒྱང་བསྐྱོད་གལ་ཆེན་ཐེངས་ཤིག་བྱས། ར་ཧུ་ལ་དང་དགེ་འདུན་ཆོས་འཕེལ་ཕུད་གཞན་མི་གཉིས་ཡོད་པ་ནི་རྒྱང་བསྐྱོད་རུ་ཁག་གི་དཔར་པ（པར་རྒྱག་མཁན）མུ་ཁ་ཅི་ཧྥན་ནཱ་དང་རི་མོ་བ་མཁས་ཅན་ཀན་ཝལ་ཀྲིཥྞ་རྣམ་གཉིས་ཡིན། ཁོང་གཉིས་ཀ་ད་ལྟ་ལྡི་ལིར་འཚོ་བཞིན་བཞུགས། ཁོང་ཚོ་ལྷན་རྒྱས་སུ་བོད་ཀྱི་ལྷོ་ཕྱོགས་སུ་གནས་སྐོར་དུ་ཟླ་བ་དྲུག་ལ་ཕེབས། ཕྱག་ལས་མེད་པའི་སྐབས་དགེ་འདུན་ཆོས་འཕེལ་དང་ཁོང་རྣམ་གཉིས་ཀྱིས་བར་གསེང་དུས་ཚོད་མང་ཆེ་བ་མཉམ་སྐྱེལ་གནང་། ཀན་ཝལ་ཀྲིཥྞ་གྱིས་དགེ་འདུན་ཆོས་འཕེལ་གྱིས་གནས་སྐོར་སྐབས་འབྲི་གནང་མཛད་པའི་འདྲ་རིས་ཀྱི་དེབ་ཆུང་ཞིག་ཉར་ཚགས་གནང་འདུག

 

1974ལོར་ཁོང་གི་དགོངས་ཁྲོལ་བྱུང་ནས་ངས་པར་བརྒྱབ་པ་ཡིན། དཔར་པ་མུ་ཁ་ཅིས་གཤམ་གྱི་སྒྲུང་དེ་གསུངས་བྱུང་། དེས་དགེ་འདུན་ཆོས་འཕེལ་ནི་འཇིག་རྟེན་གྱི་བྱ་བར་མཐོང་ཆུང་གནང་མཁན་ཞིག་ཡིན་པ་གསལ་པོར་མངོན།

“ང་ཚོས་རྟག་པར་སྒྱུ་རྩལ་གྱི་སྐོར་མང་པོ་ཞིག་གླེང་གི་ཡོད། ང་ལ་ཐོབ་པ་ནི་ནུབ་ཕྱོགས་ཀྱི་སྲོལ་རྒྱུན་སློབ་གསོ་ཡིན། སློབ་གསོ་དེ་རིགས་ཀྱིས་སྒྱུ་རྩལ་ནི་དུས་ནམ་བྱུང་ལ་སྤངས་བླང་བྱེད་ཆོག་པའི་བགྱི་བ་ཞིག་ཏུ་ངོས་འཛིན་བྱེད། འོན་ཀྱང་དགེ་འདུན་ཆོས་འཕེལ་གྱིས་གལ་ཆེ་ཤོས་ནི་གཟབ་ནན་བྱ་རྒྱུ་དེ་ཡིན་པས་ངེས་པར་བློ་རྩེ་གཅིག་སྒྲིམ་བྱ་དགོས་ཞེས་གསུངས། ཉིན་ཞིག་སྐུ་རྩེད་ཀྱི་ཚུལ་དུ་ཁོང་གིས་ང་ལ་ཁོང་རང་གི་ནང་དོན་དེ་གསལ་པོར་མཚོན་པར་བྱེད་ཀྱི་ཡིན་ཞེས་གསུངས་བྱུང་། ཁོང་གིས་ཁྲོམ་ལ་ཕེབས་ནས་ཨ་རག་ཤེལ་དམ་གང་གཟིགས་ཏེ་ལམ་སང་མཆོད་འགོ་ཚུགས་སོང་། ཁོང་གིས་ཤེལ་བུམ་ཕྱག་དང་བྲལ་མེད་ཀྱིས་ཨ་རག་མཆོད་ཅིང་། ང་ལ་ཁོ་པའི་ཞལ་རས་དམར་པོར་གྱུར་ཡོད་མེད་སྐད་ཆ་འདྲི་ཡི་འདུག  མཐར་ཁོང་སྐུར་བད་པས་གྱོན་པ་གཙང་མར་ཕུད་ནས་གཅེར་བུར་བཞུགས་ཏེ་རི་མོ་འབྲི་འགོ་བརྩམས། ཁོང་གིས་བྲིས་པ་ནི་སྐྱེས་པའི་ལུས་སྒྲོམ་གྱི་སྤྱི་ཁོག་ཅིག་ཡིན། ཁོང་གིས་སོར་མོའི་རྩེ་གཅིག་ནས་འགོ་བརྩམས་ཏེ་དབུགས་ཐེངས་གཅིག་ལ་བྲིས་གནང་ཞིང་། བྲིས་གྲུབ་རྗེས་པིར་གྱི་རྩེ་མོ་སླར་ཡང་སྔར་གྱི་མཛུབ་རྩེར་སྣེ་སྤྲད་པས་རྫོགས་པར་བྱས་སོ།།”

རྒྱ་གར་དུ་ཁོང་ལ་རི་མོའི་སྒྱུ་རྩལ་རིགས་མང་དག་ཅིག་གི་ཤུགས་རྐྱེན་ཐེབས་ཡོད་དེ། མ་དུ་ལ་ཡི་སྟོན་པའི་སྐུ་དང་ཨན་ཊན་བྲག་ཕུག་གི་རི་མོ་ནས་རོ་ལི་ཧཱ་ཉི་ཀུ་ལ་ཡི་བརྩམས་བྱ་དྭངས་གསལ་ཞེས་བྱ་བ་དང་། ལྐོག་གྱུར་རིང་ལུགས་ཀྱི་ཧེ་མ་ལ་ཡའི་ཆུ་ཚོན་རི་མོ།  ཐ་ན་ཨུ་རུ་སུའི་འཕགས་པའི་སྐུ་བརྙན་བཅས་ཚང་མས་ཁོང་ལ་ཤུགས་རྐྱེན་ཐེབས་ཡོད། འདྲ་རིས་འབྲི་དེབ་ཐོག་གི་མི་སྣའི་སྣང་བརྙན་ནི་ཁོང་གི་གསུང་རྩོམ་ནང་མཐོང་དཀོན་པའི་ཆ་ཚང་ཤོས་ཀྱི་རི་མོ་ཡིན། རི་མོ་དེ་དག་ནི་བསྡུས་གསལ་དང་བྱང་ཆུབ་པའི་ཐིག་རིས་བེད་སྤྱོད་བྱས་ཡོད་ཅིང་། དེས་ཧ་ལམ་སྲོལ་རྒྱུན་གྱི་བོད་ལུགས་རི་མོའི་རྣམ་པར་སྐུལ་འདེད་བཏང་ཡོད་ལ་མི་སྣའི་སྣང་བརྙན་འཚོལ་ཞིབ་གང་ཟབ་བྱ་རྒྱུར་ཡང་སྐུལ་འདེད་བཏང་ཡོད། རྒྱ་གར་དུ་བཞུགས་རིང་ཁོང་གིས་གསུང་རྩོམ་ཁག་གཉིས་ཙམ་བརྩམས་པར་གྲགས་ཀྱང་དེ་དག་ལག་སོན་མ་བྱུང་། གསུང་རྩོམ་དེ་གཉིས་ནི་རྒྱ་གར་དང་སིངྒ་ལའི་ལོ་རྒྱུས་སྐོར་ཡིན་པ་མ་ཟད། ཁོང་རང་ཉིད་ཀྱིས་བྲིས་གནང་མཛད་པའི་ས་ཆ་དེ་གའི་མི་དམངས་ཀྱི་འཚོ་བ་དང་ཡུལ་སྲོལ་ངོ་སྤྲོད་བྱས་པའི་བར་བཅུག་རི་མོའང་བཀོད་ཡོད།

1945ལོའི་དགུན་དུས་ཁོང་ལྷ་སར་ལོག་པར་སླར་ཡང་སྐུ་དྲག་མི་དཔོན་རྣམས་ཀྱི་བསྔགས་བརྗོད་དང་རོགས་རམ་ཐོབ། ཁོང་གིས་ཁོ་པ་ཚོའི་ཆེད་དུ་སྐུ་དཔར་འབྲི་བ་མ་ཟད་ཁོ་ཚོའི་ཁང་པར་མཛེས་རྒྱན་སྤྲོད་པ་སོགས་བྱས། ཁོང་གི་ཕྱག་རྩལ་ཆེ་ཤོས་ཤིག་ནི་སྟག་འབྲི་རྒྱུ་དེ་ཡིན། ཁོང་གིས་ཀ་ཤོད་པའི་གཟིམ་ཤག་གི་གྱང་ལྡེབས་སུ་སྟག་མང་པོ་ཞིག་བྲིས་ཡོད། བསམ་གྲུབ་ཕོ་བྲང་གིས་ལྷ་སའི་གྲོང་འདབས་སྒེར་གྱི་སྐྱེད་མོས་ཚལ་ཞིག་ཡོད་པར་འགྲེམས་སྟོན་ཁང་ཞིག་གསར་བཞེངས་བྱས། དགེ་འདུན་ཆོས་འཕེལ་གྱིས་རྒྱལ་སྒོའི་གཞོགས་གཉིས་སུ་ཤྭ་བ་བཟུང་བཞིན་པའི་སེང་གེ་ཞིག་བྲིས་ཡོད་ཅིང་། སྦུག་ཏུ་བོད་ཀྱི་ལོ་རྒྱུས་མཚོན་པའི་ལྡེབས་རིས་རིང་མོ་ཞིག་ཀྱང་བྲིས་ཡོད་དེ། བོད་ཀྱི་བཙན་པོ་རིམ་བྱོན་དང་དུས་རབས་ཉི་ཤུ་པའི་རླངས་འཁོར་དང་དེང་རབས་ཀྱི་འཛུགས་སྐྲུན་བཟོ་རིས་བཀོད་ཡོད། འགྲེམས་སྟོན་ཁང་གི་ནང་ད་དུང་འཇིག་རྟེན་མཛེས་པའི་རྒྱན་དྲུག་ཏུ་གྲགས་པའི་སློབ་དཔོན་རྣམས་ཀྱི་སྐུ་བརྙན་བྲིས་ཡོད་པ་ལས་མགོན་པོ་ཀླུ་སྒྲུབ་ཀྱི་སྐུ་བརྙན་དེ་བས་མཚར་ཉམས་དོད་པ་བྱུང་ཡོད་སྐད། 1947ལོའི་སྟོན་ཀར་ཁོང་དོ་དམ་བཀག་ཉར་བྱས་པ་ཡིན། དུས་རབས་ཉི་ཤུ་པའི་ལོ་རབས་བཞི་བཅུའི་བོད་ཀྱི་མི་སྣ་ཆེ་གྲས་ཟུར་ཁང་དང་ཁོང་ལ་ཉེས་འགེལ་བྱེད་མཁན་ལས་ཁུངས་ཀྱི་འགོ་པས་ཁོང་ལ་རང་དགར་རི་མོ་ཞིག་འབྲིར་བཅུག   ཁོང་གིས་སྒོར་མོ་ཞིག་དང་ཐིག་དུམ་ཁ་ཤས་བྲིས་རྗེས་མཐར་བོང་བུ་ཞིག་རང་ཆགས།

བཙོན་ཁང་ནང་དུ་ཟ་ཆས་ཐོབ་པ་འདྲ་དང་ཐ་མག་འདྲ་ཐོབ་རེའི་སླད་དུ་མུ་མཐུད་དུ་རི་མོ་བྲིས། འོན་ཀྱང་ཁོང་གློད་བཀྲོལ་ཐོབ་རྗེས། བགྱི་བ་གཞན་དག་འཕྲོ་ཆད་པ་ཇི་བཞིན་རི་མོའང་འབྲི་མཚམས་བཞག  ཡིན་ནའང་སྐབས་དེའི་བོད་ཀྱི་རྒྱལ་ཚབ་དང་སྟག་བྲག་སྤྲུལ་སྐུས་ཁོང་སྟོད་ལུང（དེང་དུས་ཀྱི་སྟོད་ལུང་བདེ་ཆེན་རྫོང）སྐྱོ་མོ་ལུང་ཁུལ་གྱི་སྟག་བྲག་དགོན་གསར་དུ་ལཉྫའི་ཡི་གེ་འབྲི་བར་གདན་ཞུས་ལྟར་ཕེབས། དེར་ཁོང་ལ་ལྟ་རྟོག་བྱ་མི་རྒྱལ་ཚབ་ཀྱི་ཕྱག་མཛོད་དང་ལྷན་དུ་ཟླ་བ་གཉིས་ཙམ་བཞུགས། ལྷ་སར་ཁོང་བཟང་བཙོན་དུ་བཅུག་ཡོད་ཀྱང་ཁོང་གིས་བོད་ཀྱི་གནའ་རབས་རིག་གནས་ལ་འཛིན་པའི་དགའ་སྣང་དེར་ཉམས་ཆག་དང་འགྱུར་བ་སྤུ་ཙམ་ཡང་བྱུང་མེད་ཅིང་། སྐད་ཅིག་གི་དད་འདུན་དྲག་པོས་སྐུལ་བས་ཁོང་གཙུག་ལག་ཁང་ལ་གཟིགས་སྐོར་དུ་ཕེབས་པ་མ་ཟད།  གཟབ་ནན་གྱིས་གནའ་རབས་ཀྱི་འཇིམ་སྐུ་དང་ལྡེབས་རིས། ལྷ་ཁང་གི་ཀ་གདུང་ཐོག་གི་རི་མོ་བཅས་ལ་གཟིགས། ལྷག་པར་དུ་ཁོང་ནི་ཐོག་ཁའི་མཆོད་བཤོམས་ཆུང་ངུའི་ནང་བཞུགས་པའི་སྲོང་བཙན་སྒམ་པོའི་སྐུ་བརྙན་ལ་མཇལ་རྒྱུར་དེ་བས་དགའ་པོ་གནང་གི་ཡོད། དམ་པ་གང་ཉིད་ནི་སྐད་གྲགས་ཤིན་ཏུ་ཆེ་བས་ན། ངས་འཚོལ་བསྡུ་བྱེད་པའི་བརྒྱུད་རིམ་ནང་སྟེས་དབང་གིས་འདྲ་རིས་དང་རི་མོ་འགའ་ཞིག་མཇལ་བ་རྣམས་ལ་ཚབ་བྱེད་རང་བཞིན་ལྡན་ཡོད་པར་ཁ་ཚོན་གཅོད་དཀའ་ཡང་དེ་དག་གིས་གཅིག་ནས་བོད་ཀྱི་སྲོལ་རྒྱུན་རི་མོའི་དགེ་མཚན་མངོན་ཐུབ་པ་དང་། གཞན་ཡང་བོད་ཀྱི་ཁྱད་ཆོས་ལས་འདས་པའི་གསར་བྱུང་ངམ་རྣམ་མང་ཕུན་སུམ་ཚོགས་པའི་རི་མོར་འཚོལ་ཞིབ་གནང་བ་ཞིག་ཀྱང་མངོན་ནོ།།

མི་རྒོད་རྩོམ་རིག་འཕྲིན་སྟེགས་ལས་དྲངས།

བོད་དུ་རིག་གནས་དར་ཚུལ་མདོར་བསྡུས་བཤད་པ།

བོད་དུ་རིག་གནས་དར་ཚུལ་མདོར་བསྡུས་བཤད་པ།

མཛད་པ་བོ། རྗེ་དམུ་དགེ་བསམ་གཏན་རྒྱ་མཚོ།

རྨད་བྱུང་ཐུགས་བསྐྱེད་མཚོ་ལས་ལེགས་འཁྲུངས་ཤིང་།།

ལུང་རྟོགས་རིན་ཆེན་རྡུལ་མང་རབ་ཏུ་སྤུངས།།

སྐུ་བཞིའི་བང་རིམ་མཆོག་ཏུ་མཛེས་པ་ཡི།།

བཤེས་གཉེན་ལྷུན་པོ་རྟག་ཏུ་རྒྱལ་གྱུར་ཅིག།

སྔོན་བྱོན་མཁས་པའི་འཕྲིན་ལས་རླབས་ཀྱི་ཕྲེང་།།

བླུན་རྨོངས་བྱིས་པ་སྐྲག་པའི་རྒྱུར་གྱུར་མོད།།

དོན་ལྡན་གཟིགས་པ་རྣོ་བའི་སྐྱེས་བུ་དག།

དགའ་བས་ལག་པད་སྙིང་གའི་ངོས་སུ་ཟུམ།།

དེ་ལྟའི་བྱུང་བ་ཕྱུགས་རྫིའི་གླིང་བུའི་སྒྲ།།

རྒན་པོ་སྐྱོ་བ་སངས་པའི་གྲོགས་སུ་སྦྲན།།

སྐལ་མཉམ་ཁྱོད་ཀྱང་རྣ་བ་ཅུང་གཏོད་ལ།།

དགའ་བའི་འཛུམ་ཞལ་ཅུང་ཟད་སྟོན་ཅིག་ཨང་།།

དེ་ལ་འདིར་བོད་ཀྱི་རིག་གནས་དར་ཚུལ་བཤད་པ་ལ།

 

བསྟན་པ་སྔ་དར་གྱི་སྐབས་སུ་བོད་དུ་རིག་གནས་དར་ཚུལ།

བོད་སྤྱི་ལ་དབང་བའི་རྒྱལ་བོའི་ཐོག་མ་གཉའ་ཁྲི་བཙན་པོ་ཡིན་ལ། དེ་ནས་མུ་ཁྲི་བཙན་པོ། དེང་ཁྲི་བཙན་པོ། ཤོ་ཁྲི་བཙན་པོ(སོ་ཁྲིའང་ཟེར)། མེ་ཁྲི་བཙན་པོ། གདགས་ཁྲི་བཙན་པོ། སྲིབ་ཁྲི་བཙན་པོ་སྟེ་གནམ་གྱི་ཁྲི་བདུན་དུ་གྲགས་པ་འདི་དག་གི་དུས་སུ་རིག་གནས་ སོགས་དར་ཚུལ་གྱི་ལོ་རྒྱུས་མ་མཐོང༌། དེ་ནས་གྲི་གུམ་བཙན་པོ། རྒྱལ་བོ་འདིས་བློན་པོ་དང་འཐབ་པའི་དུས་སུ་ཁྲབ་བླངས་པས་ཁྲབ་སྤྱོད་པའི་ཐོག་མ་ཡིན་ཟེར། དེ་ནས་སྤུ་དེ་གུང་རྒྱལ། དེའི་བློན་པོ་རུ་ལས་སྐྱེས་ནི་འཕྲུལ་བློན་མཛངས་པའི་མི་བདུན་གྱི་ཐོག་མ་ཡིན་ལ། རྒྱལ་བློན་དེ་གཉིས་ཀྱི་རིང་ལ་ཐོང་གཤོལ་བཟོ་བ་དང་ཞིང་ལ་ཆུ་འདྲེན་པ་སོགས་ཞིང་ལས་དར་བའི་མགོ་ཚུགས་པ་དང༌། གསེར་དངུལ་ཟངས་ལྕགས་ཀྱི་རྡོའི་གཏེར་ཁ་ཕུད་དེ་བཞུ་ལེན་སོགས་བཟོ་ལས་ཅུང་དར་བ་དང༌། ཆུ་ལ་ཟམ་འཛུགས་པ་སོགས་འགྲིམ་འགྲུལ་གྱི་ལམ་སོགས་ལའང་ཡར་རྒྱས་ཆེ་ཙམ་བྱུང་བ་དང༌། ཡང་འདིའི་དུས་བོན་སྒྲུང་ལྡེའུ་གསུམ་བྱུང་བ་རིག་གནས་ཀྱི་གྲངས་སུ་བརྩི། བོན་ནིདགེ་སྒྲུབ་ལྷ་མཆོད་འདྲེ་འདུལ་མོ་རྩིས་སོགས་དང༌། སྒྲུང་ནི། རོ་ལངས་གསེར་སྒྲུབ་ཀྱི་སྒྲུང་དང༌། མ་སངས་སྒྲུང་དང༌། མཆིལ་བའི་སྒྲུང་སོགས་ཉན་བཤད་དང༌། ལྡེའུ་ནི་ཁེད་འཇོག་པ་སྟེ། དཔེར་ན། ཐེམ་གཉེར་ཝ་བ་ཆེ་(སྲང)ཅི་ཡིན་ཞེས་འདྲི་བ་ལྟ་བུའོ།།

དེ་ནས་ཨེ་ཤོ་ལེགས། འདིའི་བློན་པོ་ལྷ་བུ་མགོ་དཀར་ནི། འཕྲུལ་བློན་མཛངས་མི་བདུན་གྱི་གཉིས་པ་ཡིན། ཞིང་ལ་དོར་ཁ་བརྩིས། འབྲོག་ལ་ཐུར་རྩིས་བྱས། ཕུ་ཆུ་མདའ་རུ་དྲངས་ཏེ་མདའ་ཞིང་ཆུ་མ་རྒྱ་ཆེར་བཟོས། ཨེ་ཤོ་ལེགས། དེ་ནས་དེ་ཤོ་ལེགས། ཐི་ཤོ་ལེགས། གུ་རུ་ལེགས། འབྲོང་ཞི་ལེགས། ཨི་ཤོ་ལེགས་ཏེ་སའི་ལེགས་དྲུག་དང༌། དེ་ནས་ཟ་ནམ་ཟིན་ལྡེ། ལྡེ་འཕྲུལ་ནམ་གཞུང་བཙན། སེ་སྣོལ་ནམ་ལྡེ། སེ་སྣོལ་བོ་ལྡེ། ལྡེ་སྣོལ་ནམ། ལྡེ་སྣོལ་བོ། ལྡེ་རྒྱལ་བོ། ལྡེ་སྤྲིན་བཙན་ཏེ་ལྡེ་བརྒྱད་དང༌། དེ་ནས་རྒྱལ་ཏོ་རི་ལོང་བཙན། ཁྲི་བཙན་ནམ། ཁྲི་སྒྲ་དཔུང་བཙན། ཁྲི་ཐོག་རྗེ་བཙན་ཏེ་འོག་གི་བཙན་བཞི། དེ་ནས་ལྷ་ཐོ་ཐོ་རི་ཡིན་ལ། འདིའི་དུས། སྤང་སྐོང་ཕྱག་རྒྱ་བ་དང༌། མདོ་སྡེ་ཟ་མ་ཏོག་གི་གླེགས་བམ་འབྱོར་ཡང་དོན་མ་གོ་བར་གཉན་པོ་གསང་བ་ཞེས་མིང་བཏགས་ནས་ཕྱག་མཆོད་བྱས།

ཡང་རྒྱལ་བོ་འདིའི་དུས། འཕགས་ཡུལ་གྱི་སྨན་པ་སྙན་གྲགས་ཤིན་ཏུ་ཆེ་བ་སྨན་པ་བྲམ་ཟེ་རྒྱུན་ཤེས་ཞེས་བྱ་བའི་སློབ་མ། རྒྱལ་བོ་རྔ་ཆེན་པོའི་བུ་བི་བྱི་དགའ་བྱེད་དང༌། བྲམ་ཟེ་དྲིལ་བཟོ་མའི་བུ་མོ་བི་ལྷ་དགའ་མཛེས་གཉིས་བོད་ཡུལ་དུ་བྱོན་ཏེ་གསོ་དཔྱད་སྨན་གྱི་རིག་པ་སྤེལ་བས། སྙན་གྲགས་རྒྱས་ཏེ་རྒྱལ་བོ་ལྷ་ཐོ་ཐོ་རིས་གསན་ནས། ཕོ་བྲང་ཡུམ་བུ་བླ་སྒང་དུ་སྤྱན་དྲངས། བསྙེན་བཀུར་ཕུན་སུམ་ཚོགས་པ་བྱས། རྒྱལ་བོའི་བུ་མོ་ལྷ་ལྕམ་ཡིད་ཀྱི་རོལ་ཆ་ཞེས་བྱ་བ། སྨན་པ་བི་བྱི་དགའ་བྱེད་ལ་ཡུམ་དུ་ཕུལ། ལྷ་ལྕམ་ཡིད་ཀྱི་རོལ་ཆ་ལ་སྨན་པ་དུང་གི་ཐོར་ཅོག་ཅན་འཁྲུངས། སྨན་པ་མཁས་པར་གྱུར། སྨན་པ་བི་བྱི་དགའ་བྱེད་དང༌། བི་ལྷ་དགའ་མཛེས་གཉིས་ཀྱིས། རེག་པ་རྩའི་མདོ། འཚོ་བ་ཟས་ཀྱི་མདོ། སྦྱོར་བ་སྨན་གྱི་མདོ། གཏར་སྲེག་དཔྱད་ཀྱི་མདོ། རྨ་ཆས་བཟོའི་མདོ་རྣམས་དང༌། གཞན་ཡང་རྩ་འགྲེལ་འགྲེལ་བཤད་ཁོག་དབུག  དཔྱད་ལག་ལེན་དང་བཅས་པ་གནང་སྟེ། གསོ་རིག་དར་བར་མཛད་ནས་སླར་རྒྱག་ར་དུ་ཕྱིར་བཞུད།

སྨན་པ་དེ་གཉིས། རྒྱ་གར་ཤར་ནུབ། རྒྱ་ནག ལི་ཡུལ། བལ་ཡུལ་རྣམས་སུ་ཕེབས་པའི་རྗེས་སུ། བོད་ཡུལ་དུ་ཕེབས་པར་གཡུ་ཐོག་རྣམ་ཐར་ལས་གསུངས་པས། ཁོང་གཉིས་ཀྱིས་སྐད་ཡིག་མང་བོ་ཞིག་མཁྱེན་པ་འདྲ་ལ། དེ་དུས་བོད་རང་གི་ཡི་གེ་འབྲི་བའི་སྲོལ་མེད་གཤིས། ལེགས་སྦྱར་གྱི་ཡི་གེ་དང༌། ཡིག་རིགས་གཞན་གྱི་སྟེང་ནས་ཀྱང་གསོ་རིག་སྤེལ་བ་ཡིན་འདུག་གོ།

དེ་ནས་ཁྲི་གཉན་གཟུངས་བཙན། སྨན་པ་དུང་གི་ཐོར་ཅོག་ཅན་རྒྱལ་བོ་འདིའི་ཡང་བླ་སྨན་པ་མཛད་དེ་གསོ་རིག་གི་རྒྱུན་འཛིན་སྤེལ་གནང༌། དེ་ནས་འབྲོང་གཉན་ལྡེའུ། རྒྱལ་བོ་འདིའི་སྐུ་ཚེའི་སྨད་ཀྱི་བླ་སྨན་ནི། དུང་གི་ཐོར་ཅོག་གི་སྲས་བློ་གྲོས་ཆེན་པོས་མཛད། དེ་ནས་སྟག་རི་གཉན་གཟིགས། འདི་ཆུང་དུས་དམུས་ལོང་ཡིན་ལ། མིང་ལ་དཀོན་པ་བཀྲ་ཟེར། ཕྱིས་སུ་བོད་ཀྱི་རྒྱལ་ཕྲན་འ་ཞ་ཞེས་པའི་ཁམས་རྒྱལ་འ་ཞ་རྗེ་བྱ་བའི་སྨན་པ་མཁས་པ་ཞིག་ཡོད་པ་བོས་ནས། སྨན་དཔྱད་ཀྱིས་སྤྱན་ལོང་བ་སོས། མིག་ལོང་བ་སོས་ནས་སྟག་མོའི་རི་ལ་རི་དྭགས་གཉན་ཡོད་པ་གཟིགས་པས། སྟག་རི་གཉན་གཟིགས་སུ་གྲགས། དེ་ནས་རྒྱལ་སར་འཁོད་དུས་སྨན་པ་བློ་གྲོས་མཚུངས་མེད་ཀྱི་བུ་བློ་གྲོས་རབ་གསལ་བླ་སྨན་པ་མཛད། འདི་དུས་ཁྲི་ངོར་སྣང་གི་བུས་བློན་བྱས་ཏེ་བྲེ་དང་སྲང་བཅོས། འབྲུ་མར་འཇལ་བྱེད་བཟོས། ལས་སྡེབ་དང་ཚོང་བྱེད་སོགས་དར་རྒྱས་བཏང༌། བློན་འདི་ནི་མཛངས་མི་བདུན་གྱི་གསུམ་པ་ཡིན། དེ་ནས་གནམ་རི་སྲོང་བཙན། འདི་དུས་དཔའ་སྣང་བཞེར་སོགས་ཀྱིས་བློན་བྱས་ཏེ། མི་ཁ་ཤས་རྒྱ་ནག་ཏུ་མངགས་ནས་རྩིས་དང་སྨན་བསླབས། བྱང་གི་ཚྭ་གཏེར་ཕུད། བློ་གྲོས་རབ་གསལ་གྱི་བུ་བློ་གྲོས་རྒྱལ་མཛོད་རྒྱལ་བོ་འདིའི་བླ་སྨན་པ་མཛད། སྨན་རྩིས་ཀྱི་རིག་གནས་དར་རྒྱས་བྱུང་ངོ༌།།

དེ་ནས་སྲོང་བཙན་སྒམ་པོས་རྒྱལ་སྲིད་བཟུང༌། བློ་གྲོས་རྒྱལ་མཛོད་ཀྱི་བུ་བློ་གྲོས་བཤེས་གཉེན་རྒྱལ་བོའི་བླ་སྨན་པ་མཛད། ཐོན་མི་སམ་བྷོ་ཊ་དང༌། སྟག་ལོ་དེ་ཁྲོང་སོགས་མི་བཅུ་དྲུག་ཡི་གེ་སློབ་ཏུ་བཏང༌། དེ་རྣམས་འཕགས་ཡུལ་དུ་སླེབས་ནས། ཐོན་མི་སམ་བྷོ་ཊས་བྲམ་ཟེ་ལི་བྱིན་ཀ་ར་དང་སློབ་དཔོན་ལྷ་རིག་པའི་སེང་གེ་སོགས་པཎྜི་ཏ་མང་བོ་བསྟེན་ནས་སྐད་ཡིག་མང་བོ་དང་སྒྲ་ཚད་སོགས་ཕྱི་ནང་གི་རིག་གནས་མང་བོ་བསླབས། ཕྱིར་བོད་ཡུལ་དུ་ཕེབས་ནས་བོད་ཀྱི་ཡིག་གཟུགས་གསར་བཟོ་གནང་སྟེ། བོད་རང་གི་སྐད་ཀྱི་སྟེང་ནས་ཡི་གེ་འབྲི་བའི་སྲོལ་བཏོད། དབྱངས་གསལ་སྔོན་རྗེས་མགོ་འདོགས་སོགས་ལེགས་པར་གཏན་ལ་ཕབ་སྟེ། བརྡ་སྤྲོད་པའི་གཞུང་བརྒྱད་མཛད་དོ།།

དེ་ནས་བཟུང་སྟེ་ཡོན་ཏན་གྱི་རྩ་བ་བོད་རང་གི་ཡི་གེ་འབྲི་བའི་སྲོལ་ཡོད་པར་གྱུར་ནས། ཡུལ་ཁམས་གཞན་ལ་ཡོད་པའི་རིག་པའི་གནས་དག་བོད་རང་གི་སྐད་ཡིག་ཏུ་བསྒྱུར་བའི་མགོ་བརྩམས་སོ།།

དེ་ནས་རྒྱལ་བོ་ཆེན་པོ་སྲོང་བཙན་གྱིས་གཙུག་ལག་ཁང་མང་བོ་བཞེངས་ནས། ལོ་ཙཱ་བའི་ཐོག་མ་ཐོན་མི་སམ་བྷོ་ཊས་སྤྱན་དྲངས་པའི་ཆོས་དང་རིག་པའི་གནས་མཐའ་དག་བོད་སྐད་ལ་སྒྱུར་ཅིག་གསུངས་པ་བཞིན། རྒྱ་གར་གྱི་སློབདཔོན་ཀུ་ས་ར་དང༌། བྲམ་ཟེ་ཤང་ཀ་ར། སློབ་དཔོན་ལི་བྱིན། བལ་བོའི་སློབ་དཔོན་ཤཱི་ལ་མཉྫུ། ཁ་ཆེའི་སློབ་དཔོན་ཏ་ནུ་ཏ་དང༌། གྷ་ནུ་ཏ། རྒྱ་ནག་གི་སློབ་དཔོན་ཧྭ་ཤང་མ་ཧཱ་དེ་བ་ཚེ་རྣམས་སྤྱན་དྲངས་ཏེ། བོད་ཀྱི་ལོ་ཙཱ་བ་ཐོན་མི་སམ་བྷོ་ཊ་དང༌། དེའི་མཆན་བུ་ངྷརྨ་ཀོ་ཤ ཨ་ལོ་ཀ ཡེ་ཤེས་དཔལ་སོགས་ཀྱིས་ལོ་ཙཱ་བྱས། དེ་རྣམས་ལས་རྒྱ་གར་གྱི་སློབ་དཔོན་ཀུ་ས་རའི་ཡོན་བདག་བལ་བཟའ་ཁྲི་བཙུན་གྱིས་བྱས། ལོ་ཙཱ་བ་ཐོན་མིས་བྱས། བྲམ་ཟེ་ཤང་ཀ་རའི་ཡོན་བདག་རྒྱལ་བོས་བྱས། ལོ་ཙཱ་བ་ངྷརྨ་ཀོ་ཤས་བྱས། རྒྱ་ནག་གི་མཁན་པོའི་ཡོན་བདག་རྒྱ་བཟའ་ཀོང་ཇོས་བྱས། ལོ་ཙཱ་བ་ཡང་ཀོང་ཇོ་ཉིདདང་ལྷ་ལུང་རྡོ་རྗེ་དཔལ་གྱིས་བྱས། བལ་བོ་དང་ཁ་ཆེའི་ཡོན་བདག་བལ་བཟའ་ཁྲི་བཙུན་གྱིས་བྱས། ལོ་ཙཱ་བ་ཡང་ཁྲི་བཙུན་ཉིད་དང་ཐོན་མིས་བྱས་སོ།།

རྒྱལ་བོའི་བཀའ་བཞིན། སློབ་དཔོན་ཀུ་ས་རས་མངོན་པའི་སྡེ་དང༌། ཕ་རོལ་ཏུ་ཕྱིན་པའི་སྐོར་བསྒྱུར། བལ་བོའི་སློབ་དཔོན་སོགས་ཀྱིས་མདོ་སྡེའི་སྡེ་དང༌། ཕལ་ཆེན་དང༌། སྤྱན་རས་གཟིགས་ཀྱི་མདོ་རྒྱུད་རྣམས་བསྒྱུར། བྲམ་ཟེ་ཤང་ཀ་རས་འདུལ་བའི་སྡེ་དང་ཀྲི་ཡའི་མདོ་རྒྱུད་རྣམས་བསྒྱུར། རྒྱ་ནག་གི་མཁན་པོས་སྨན་དང་དཔྱད་ལ་སོགས་པ་བསྒྱུར། དེ་དག་གི་སྐབས་སུ་ལོ་པཎ་རྣམས་ལ་གསེར་དངུལ་གྱི་འབུལ་བ་སོགས་བསྙེན་བཀུར་རྨད་དུ་བྱུང་བ་བྱས་སོ།།

སྐྱེ་བོ་བློ་དམན་པ་རྣམས་ལ་ལུང་གི་ཆོས་གོ་བར་བྱ་བའི་ཕྱིར་གཟུངས་ཀྱི་སྙེ་མ་སོགས་སྒྲུང་བསླབས། རིགས་པའི་ཆོས་གོ་བར་བྱ་བའི་ཕྱིར་ལྡེའུ་(ཁེད)བསླབས། ཞང་ཞུང་ཡུལ་ནས་བོན་པོ་ཞང་ཞུང་ལྷ་སྡེ་སྤྱན་དྲངས་ནས། བོན་པོ་ཨ་བ་རྣམ་གསལ་ཞེས་བྱ་བ་ལ་སློབ་ཏུ་བཅུག་སྟེ། མོ་རྩིས། ལྷ་གསོལ། འདྲེ་འདུལ་སོགས་ཀྱང་བྱེད་དུ་བཅུག་གོ།

གཞན་ཡང་ཐོན་མིས་དཀོན་མཆོག་སྤྲིན། ཤེར་ཕྱིན་སྟོང་ཕྲག་བརྒྱ་བ་ཡང་བསྒྱུར་བར་བཤད། གཙོ་བོ་ཐུགས་རྗེ་ཆེན་པོའི་མདོ་རྒྱུད་ཉི་ཤུ་རྩ་གཅིག་བསྒྱུར་བ་བཀའ་ཆེམས་ཀྱི་ལོ་རྒྱུས་ཆེན་མོ་ལྟར་ཡིན་ཏེ། ༡། ཟ་མ་ཏོག་བཀོད་པ། ༢། ཕྱག་སྟོང་སྤྱན་སྟོང་གི་གཟུངས། ༣། པདྨའི་སྙིང་བོའི་མདོ། ༤། ཞལ་བཅུ་གཅིག་པའི་མདོ། ༥། བཅུ་གཅིག་ཞལ་གྱི་གཟུངས། ༦། དོན་ཡོད་ཞགས་པ། ༧། དོན་ཞགས་ཕྱི་མ། ༨། པད་མ་མཆོག ༩། དབང་བསྒྱུར་འཁོར་ལོ། ༡༠། ཆོ་ག་སྔགས་ཀྱི་རྒྱུད། ༡༡། ཡིད་བཞིན་ནོར་བུའི་གཟུངས། ༡༢། སྙིང་རྗེ་ཆེན་པོ་མི་གཤོལ་བ། ༡༣། འོད་ཟེར་རྣམ་བཀོད། ༡༤། པད་མ་ཅོད་པན་གྱི་རྒྱུད། ༡༥། ཡི་གེ་དྲུག་པའི་མདོ། ༡༦། དམ་ཆོས་པད་དཀར། ༡༧། པུཎ་ཌ་རཱི་ཀའི་མདོ། ༡༨། ཆུ་ཀླུང་སྣ་ཚོགས་པའི་མདོ། ༡༩། སྣང་བ་རོལ་བའི་མདོ། ༢༠། མཚན་བརྒྱ་རྩ་བརྒྱད་པ། ༢༡། མཚན་རབ་ཡོངས་སུ་བསྟན་པའི་མདོ་རྣམས་སོ།།

འདི་དག་ལས། འོད་ཟེར་རྣམ་བཀོད། ཆུ་ཀླུང་སྣ་ཚོགས། སྣང་བ་རོལ་བ། མཚན་རབ་ཡོངས་སུ་བསྟན་པ་རྣམས་དེང་སང་བཀའ་འགྱུར་ན་མི་སྣང་ལ། གཞན་དོན་ཞགས་ཆོ་ག་ཞིབ་མོ་ལ་ཆོ་ག་སྔགས་ཀྱི་རྒྱུད། ཅེས་པ་ལྟ་བུ་འགྱུར་ཁྱད་མ་གཏོགས་དེང་སང་བཞུགས། ཞེས་དེབ་ཐེར་མཁས་པའི་དགའ་སྟོན་ལས་གསུངས་པ་ལྟར་རོ།།

གཞན་ཡང་རྒྱལ་བོའི་བཀའ་ལྟར་ཐོན་མིས་གཉན་པོ་གསང་བ་ཞེས་པའི་སྒྲོམ་གྱི་ཁ་ཕྱེས་ཏེ། དཔང་སྐོང་ཕྱག་རྒྱ་བ། མདོ་སྡེ་ཟ་མ་ཏོག ཙིན་ཏ་མ་ཎིའི་གཟུངས། མདོ་སྡེ་ལས་རྣམ་པར་འབྱེད་པའི་གཟུངས་རྣམས་བླངས་ནས་བསྒྱུར། དཔང་སྐོང་ཕྱག་རྒྱ་བ་ནི། བཀའ་འགྱུར་སྡེ་དགེའི་པར་གྱི་ཡ་པོད་ཀྱི་ཐོག་མར། དཔང་སྐོང་ཕྱག་རྒྱ་བ་ཐོན་མི་སམ་བྷོ་ཊའི་འགྱུར། ཞེས་དཀར་ཆག་ན་ཡོད་པ་དེ་ཡིན། འོན་ཀྱང་སྲོང་བཙན་གྱི་དུས་མ་ཟད། སྔ་དར་དང་ཕྱི་དར་སྐབས་གང་འགྱུར་ཐམས་ཅད་ད་ལྟ་ཡོད་པའི་ངེས་པ་མེད་དེ། གླང་དར་གྱི་བྱེད་སྤྱོད་ཀྱི་དབང་གིས་བརླགས་སྟོར་དང༌། དེ་མིན་དཔེ་རྒྱུན་སྟོར་ནས་མ་རྙེད་པ་ཡང་དུ་མ་ཞིག་ཡོད་པ་བཀའ་བསྟན་གྱི་དཀར་ཆག་དག་ན་གསལ་ལོ།།

དེ་ནས་རྒྱལ་བོ་སྲོང་བཙན་རང་གིས་ཀྱང་ཡི་གེ་དང་སྒྲ་སྙན་སོགས་རིག་པའི་གནས་དང་ཆོས་ལ་བརྩོན་པ་ཆེར་བསྐྱེད་ནས་སྦྱངས་པ་མཛད་པས་མཁས་པ་ཆེན་པོར་གྱུར་ཏེ་བསྟན་བཅོས་མང་བོ་མཛད། དཔེར་ན། བཀའ་ཆེམས་ཀྱི་ལོ་རྒྱུས་ཆེན་མོ་རྣམས་དང༌། ཐུགས་རྗེ་ཆེན་པོའི་སྒྲུབ་ཐབས་ཆོ་གའི་རིམ་པ་བརྒྱད། མདོ་སྐོར་ལེའུ་སུམ་ཅུ་རྩ་དྲུག སྒྲུབ་སྐོར་ཆེ་ཕྲན་གཉིས། ཆེན་མོ་ལ་དྲུག་སྐོར་དང་གསུམ་སྐོར་གཉིས། དེ་གཉིས་ཀྱི་བཤད་ཆོས། སྤྱིའི་ཁོག་དབུག སྒོས་ཀྱི་བཤད་འགྲེལ། ཊཱི་ཀ་དང་བསྡུས་དོན་རྣམས། སྒྲུབ་ཕྲན་ལ་རྒྱས་འབྲིང་བསྡུས་གསུམ། གཞན་ཡང༌། ཐོན་མི་སམ་བྷོ་ཊ་དང༌། ལོ་ཙཱ་བ་ཨརྱ་ཨ་ལོ་ཀས་ཞུས་པ་སོགས་ཞལ་གདམས་བརྒྱ་དང་ལྔ་བཅུ་ཡོད། འདི་དག་མ་ཎི་བཀའ་འབུམ་དུ་བཞུགས་ལ། ལུགས་ཀྱི་བསྟན་བཅོས་མང་བོ་མཛད་པ་རྒྱལ་རབས་དེབ་ཐེར་སོགས་ན་བཞུགས་སོ།།

ཡོན་ཏན་ཀུན་གྱི་གཞི་མ་བྲིས་ཀློག་གིས།།

བོད་ཡུལ་རྨོངས་པའི་མུན་པ་ཀུན་བསལ་ཏེ།།

ཆོས་དང་སྲིད་ཀྱི་རྒྱལ་ཁམས་བདེ་བར་མཛད།།

ཅེས་གསུངས་པ་ལྟར། རིག་གནས་དར་བའི་སྟོབས་ཀྱིས། ཆབ་སྲིད་ཀྱི་བྱ་བའང་དར་ཞིང་རྒྱས་ཏེ། བཀའི་བློན་པོ་སུམ་བརྒྱ། དེའི་ནང་དུ་གཙོ་བོ་འཕྲུལ་བློན་དྲུག འཕྲུལ་གྱི་གནའ་ཆེན་རིགས་བཟང་དང༌། ཞང་བོ་རྒྱལ་གྱི་ཁྲོམ་བཟང་སོགས་ནང་བློན་བརྒྱས་ནང་གི་བྱ་བ་བྱས། བྱང་གི་ཁྱུང་བོ་ཕུན་བཟང་བཙན་དང༌། ལམ་ཁྲི་བདེ་བླག་བཙན་སོགས་ཕྱི་བློན་བརྒྱས་ཕྱི་ཡི་བྱ་བ་ཐམས་ཅད་བྱས་ཏེ། ཤར་ཕྱོགས་རྒྱ་དང་མི་ཉག་གི་ཡུལ་ནས་བཟོ་དང་རྩིས་ཀྱི་རིག་པ་བླངས། ནུབ་ཕྱོགས་སྟག་གཟིག་བལ་བོ་སོགས་ནས་ཟས་ནོར་ལོངས་སྤྱོད་དྲངས། བྱང་ཕྱོགས་ཧོར་དང་ཡུ་གུར་ནས་ཁྲིམས་དང་ལས་ཀྱི་དཔེ་རྣམས་བླངས་ཏེ་ཕྱིའི་བྱ་བ་བྱས། མཁས་པ་ཐོན་མི་སམ་བྷོ་ཊ་དང༌། མགར་སྟོང་བཙན་སོགས་བློན་པོ་བརྒྱས། བར་གྱི་ཁོད་སྙོམས་པ་དང་ཆོས་དང་སྲིད་ཁྲིམས་བསྐྱངས། ཐོན་མི་སམ་བྷོ་ཊ་ནི་བོད་ཀྱི་བློན་པོ་མཛངས་མི་བདུན་གྱི་བཞི་བ་ཡིན་ལ། མཛངས་པའི་ལས་བོད་རང་གི་སྐད་ཀྱི་སྟེང་ནས་ཡི་གེ་འབྲི་བའི་སྲོལ་གསར་དུ་བཏོད་པ་སོགས་རིག་གནས་ཀྱི་བྱ་བ་རྒྱ་ཆེར་སྤེལ། ཁྲི་བཟང་ཡང་སྟོན་སྙགས་ཀྱི་བུ་ནི་མཛངས་མི་བདུན་གྱི་ལྔ་བ་ཡིན་ཏེ། མཛངས་པའི་ལས་སུ། སྔར་བོད་མིའི་ཁང་ཁྱིམ་རི་ལ་ཡོད་པ་ལ། འདིས་ཀླུངས་སུ་ཕབ། མཁར་བརྩིགས་ནས་གྲོང་ཁྱེར་བཅོས་སོ། །

གཞན་ཡང་ཁྲིམས་མེད་ན་འབངས་རྣམས་སྡུག་བསྔལ་བར་དགོངས་ནས། བཀའ་ཁྲིམས་ཡིག་ཆེན་པོ་དྲུག་མཛད་པ་དང༌། འཁོས་དྲུག་ཀྱང་མཛད། གཞན་ཡང་བཀའ་གྲོས་ཆེན་པོ་དྲུག ཡིག་ཚང་དྲུག བཀའི་ཕྱག་རྒྱ་དྲུག རྐྱེན་དྲུག་དཔའ་མཚན་དྲུག དེ་རྣམས་ཀྱི་སྟེང་དུ་ཁྲིམས་ཡིག་དྲུག་པོ་བསྣན་པས་བོད་ཀྱི་འཁོས་སུམ་ཅུ་རྩ་དྲུག་ཅེས་གྲགས་ལ(འཁོས་ཞེས་པ་ཐབས་ཀྱི་དོན་ནོ)། གཞན་ཡང་མཛད་པ་གསུམ། མི་མཛད་པ་གསུམ། བསྟོད་པ་གསུམ། སྨད་པ་གསུམ། མི་མནར་བ་གསུམ་སྟེ་རྒྱལ་ཁྲིམས་བཅོ་ལྔ༌། ཞེས་པ་ཡང་མཛད།

སྲོག་མི་གཅོད་པའི་ཁྲིམས་གཤིན་སྟོང་དང་གསོན་སྟོང༌། མ་བྱིན་པར་མི་ལེན་པའི་ཁྲིམས་བརྒྱ་འཇལ་དང་བརྒྱད་ཅུ་འཇལ་དང་བརྒྱད་འཇལ། ལོག་པར་མི་གཡེམ་པའི་ཁྲིམས་སྨད་འཇལ་དང་བྱི་ཆད(བྱི་ཕྲུག་གསོས་པའི་ཆད་པ)། རྫུན་སྤོང་བའི་ཁྲིམས་ལྷ་སྲུང་དཔང་དུ་བྱས་ནས་མནའ་སྤོབས་པ། ཆང་ལ་ཚོད་ཟིན་པ་དང༌། ཁེང་མི་ལྡོག་པ(གྱེན་རྒོལ་མི་བྱེད་པ)། བང་སོ་མི་འབྲུ་བ་སྟེ་ཁྲིམས་ཆེན་བདུན་དང༌། མི་ཆོས་གཙང་མ་བཅུ་དྲུག་གི་ཁྲིམས་གཉིས་བཅས་ཤིང༌། དང་བོ་ནི། མི་དགེ་བ་བཅུ་སྤོང་བའི་སྟེང་དུ། མ་ལ་མར་འཛིན་པ། ཕ་ལ་ཕར་འཛིན་པ། དགེ་སྦྱོང་ལ་དགེ་སྦྱོང་དུ་འཛིན་པ། བྲམ་ཟེ་ལ་བྲམ་ཟེར་འཛིན་པ(བྲམ་ཟེ་ཞེས་པ་འཕགས་ཡུལ་དུ་རིགས་བཞིའི་ཡ་གྱལ་ལ་གོ་དགོས་ཤིང༌། འདིའི་སྐབས་སུ་ཡོནཏན་ཅན་ལ་ཟེར་བ་ཡིན་ནོ)། རིགས་ཀྱི་རྒན་རབས་ལ་བཀུར་བ། དྲིན་དུ་གཟོ་བ་གཞན་ལ་ངན་གཡོ་སྤང་བ་སྟེ་བཅུ་དྲུག་དང༌། ཕྱི་མ་ནི། དཀོན་མཆོག་ལ་གུས་པ། དམ་ཆོས་སྒྲུབ་པ། ཕ་མ་ལ་བཀུར་བ། ཡོན་ཏན་ཅན་ལ་གོང་དུ་བཀུར་བ། རིགས་མཐོ་དང་རྒན་པ་ལ་ཕུ་དུད(བཀུར་སྟི)། མཛའ་བཤེས་ལ་གཞུང་བསྲིང་བ། ཡུལ་མི་ལ་ཕན་འདོགས་པ། ཡིད་དྲང་བ། མི་ཡ་རབས་ལ་བལྟ་བ། ཟས་ནོར་ལ་སྤྱོད་ཤེས་པ། དྲིན་ཅན་ལ་ཕན་ལན། བྲེ་སྲང་ལ་གཡོ་སྒྱུ་མེད་པ། སྤྱི་སྙོམས་ཆེ་ཞིང་ཕྲག་དོག་མེད་པ། ཚུལ་མིན་བུད་མེད་ཀྱི་ཁ་ལ་མི་ཉན་པ། ངག་འཇམ་ཞིང་སྨྲ་མཁས་པ། ཐེག་པ་ཆེ་ཞིང་བློ་ཁོག་ཡངས་པ་སྟེ་བཅུ་དྲུག་གོ །འདི་དག་ནི་སྲིད་ཀྱི་བྱ་བ་ཡིན་མོད། སྤྱི་ཚོགས་དང་རིག་གནས་འཕེལ་བའི་ཚད་ངེས་ཅན་ཞིག་ལ་མ་སླེབས་ན། འདི་ལྟ་བུའི་ཁྲིམས་ཡིག་སོགས་ཀྱང་འབྱུང་མི་སྲིད་པས། འདིར་མདོ་ཙམ་ཞིག་ཞར་བྱུང་དུ་གླེང་བའོ།།

སྲོང་བཙན་གྱི་སྲས་གུང་རུ་གུང་བཙན་རྒྱལ་སར་བཞག་ཀྱང་ལོ་བཅོ་བརྒྱད་ཐོག་གཤེགས་པས་སླར་སྲོང་བཙན་ཉིད་རྒྱལ་སར་བཞུགས། སྲོང་བཙན་དགུང་ལོ་གྱ་གཉིས་པ་ལ་གཤེགས་རྗེས། མང་སྲོང་མང་བཙན་གྱིས་སྲིད་བཟུང༌། སྨནཔ་བློ་གྲོས་བཤེས་གཉེན་གྱི་བུ་འདྲེ་རྗེ་བཛྲ་གྱིས་གུང་སོང་གུང་བཙན་དང་མང་སྲོང་མང་བཙན་གཉིས་ཀའི་བླ་སྨན་པ་མཛད།

དེ་རྗེས་འདུས་སྲོང་མང་རྗེ་རྒྱལ་སར་བཞུགས། སྨན་པ་འདྲེ་རྗེ་བཛྲ་གྱི་བུ་ཁྱུང་བོ་རྡོ་རྗེ་རྒྱལ་བོའི་བླ་སྨན་པ་མཛད། མང་སྲོང་དང་འདུས་སྲོང་གཉིས་ཀའི་དུས་སུ་ཆབ་སྲིད་རིག་གནས་སྔར་བཞིན་དར་ཞིང༌། འདུས་སྲོང་མང་རྗེ་འདིའིདུས་སུ། བོད་དུ་ཇ་འདེབས་པ་དང༌། རོལ་མོའི་རྣམ་གྲངས་མང་བོ་ཞིག་དར་ལ། རྩལ་བོ་ཆེའི་མི་བདུན་བྱུང་སྟེ། རྔོག་རིང་ལ་ནག་པོས་གླང་བོ་ཆེ་ཐེག རྔོག་གླིང་ཁམས་ཀྱིས་གཡག་གྲུས་པོ་ཆེ་ཐེག གནོན་རྒྱལ་མཚན་གྱིས་མདའ་སྟེ་ཁ་མས་བྱ་ཁྲའི་སྐེད་པ་བཅད། སྦས་མདོངས་ཅན་གྱིས་མིག་རྒྱང་གསུམ་ལ་མདའ་རྒྱང་སླེབ། མགོས་གཡག་ཆུང་གིསཤ་བའི་རླིད་བུ་བྱེ་མས་བཀང་སྟེ་ཀླད་ལ་བསྐོར། ཅོག་རོ་འབྲོང་གཤོར་གྱིས་འབྲོང་ཐུར་དུ་རྒྱུག་པ་གྱེན་དུ་འཐེན་ནུས། གནོན་ཁྲི་བདུན་གཡུ་བྱིན་གྱིས་རྟ་བཟང་བོ་གཡང་ལ་མཆོངས་པ་གྱེན་ལ་འདྲེན་ནུས་སོ།།

འདི་དག་ལ་དཔག་ན། རྒྱལ་བོ་འདི་དག་གི་རིང་ལ། གླུ་གར་དང་ཟློས་གར། སྒྱུ་རྩལ་སོགས་དར་རྒྱས་ཆེ་བར་སྣང༌། བློན་པོ་མགར་གྱི་བུ་བཙན་གཉན་ལྡེམ་བུ་དང་དབས་ཏ་ར་ཁོང་ལོད་ཀྱིས་བློན་གཙོ་བོ་བྱས་ཏེ་མཐའ་བཞིདབང་དུ་བསྡུས་ཚུལ་དེབ་དམར་སོགས་ན་གསལ་ལོ།།

དེ་ནས་ཁྲི་ལྡེ་གཙུག་བརྟན་རྒྱལ་སར་འཁོད། སྨ་ར་ཡོད་པ་དང་བགྲེས་ཉམས་ཆེ་བས། རྒྱལ་བོ་མེས་ཨག་ཚོམ་ཞེས་གྲགས། སྨན་པ་ཁྱུང་བོ་རྡོ་རྗེའི་བུ་གཡུ་ཐོག་ཡོན་ཏན་མགོན་པོ་གཞོན་དུས། རྒྱལ་བོ་འདིའི་བླ་སྨན་པ་མཛད། འདིའི་རིང་ལ་ལི་ཡུལ་ནས་རབ་ཏུ་བྱུང་བ་མང་བོ་བྱོན་པ་དང༌། རྒྱ་ནག་ནས་ཀྱང་ཧྭ་ཤང་མང་བོ་བྱོན། ཆོས་འགའ་དང་སྨན་དཔྱད་སོགས་བསྒྱུར། བྲན་ཀ་མུ་ལ་ཀོ་ཤ་དང་གཉགས་ཛྙཱ་ན་ཀུ་མ་ར་གཉིས་ཀྱིས་མདོ་སྡེ་ལས་བརྒྱ་བ་དང་གསེར་འོད་དམ་པ་དང་ཀྲི་ཡ་དང༌། སྨན་དཔྱད་སོགས་བསྒྱུར། རྒྱལ་བོས་དེ་དག་བཞུགས་པའི་ལྷ་ཁང་ལྔ་བཞེངས། ཆོསདང་རིག་གནས་སྔར་བཞིན་དར་བར་མཛད། མངའ་ཐང་བླ་ལྷག་ཏུ་འཕེལ་ཏོ།།

དེ་རྗེས་རྒྱལ་བོ་ཁྲི་སྲོང་ལྡེ་བཙན་གྱི་དུས་སུ། གཡུ་ཐོག་ཡོན་ཏན་མགོན་པོ་སྔ་མ། རྒྱལ་བོའི་བླ་སྨན་པ་མཛད། གཡུ་ཐོག་ཡོན་ཏན་མགོན་པོ་རྒྱ་གར་བལ་བོ་རྒྱ་ནག་སོགས་སུ་ལན་དུ་མར་ཕེབས་ཏེ། བོད་ཡུལ་འདིར་གསོ་བ་རིག་པ་དར་ཞིང་རྒྱས་པར་མཛད། བོད་ཀྱི་མཁས་པ་མི་དགུ་ཞེས་པའི་སྨན་པ་མཁས་པ་གྲགས་པ་ཅན་དགུ་བྱུང༌། རྒྱལ་བོ་འདི་གཞོན་དུས་ཡབ་ཀྱིས་སང་ཤི་དང་མི་བཞི་རྒྱ་ནག་ཏུ་ཆོས་སོགས་རིག་པའི་གནས་ལེན་དུ་མངགས། ཡབ་འདས་ནས་ཁྲི་སྲོང་ལྡེ་བཙན་ནར་མ་སོན་པའི་སྐབས་སུ། བློན་པོ་མ་ཞང་གྲོམ་པ་སྐྱེས་དབང་ཆེ་ཞིང་ཆོས་ལ་གནག་པས། རྒྱའི་ཧྭ་ཤང་རྣམས་རང་ཡུལ་དུ་སྤྱུགས་ཏེ། ཆོས་བྱས་མི་ཆོག་པའི་ཁྲིམས་བུ་ཆུང་མང་བོ་ཞིག་བྱས་སྟབས། སང་ཤིས་རྒྱ་ནག་ནས་གླེགས་བམ་བམ་པོ་སྟོང་ལོངས་པ་ཞིག་ཁྱེར་ནས་བོད་ཡུལ་དུ་སླེབས་ཀྱང༌། མ་ཞང་ལ་སྐྲག་ནས་གླེགས་བམ་རྣམས་མཆིམས་ཕུའི་རྫ་གསེབ་ཏུ་སྦས། ཕྱིས་ཁྲི་སྲོང་ནར་སོན་པའི་ཚེ། རྒྱ་ནག་ནས་ཁྱེར་ཡོང་བའི་དགེ་བ་བཅུའི་མདོ་དང༌། རྡོ་རྗེ་གཅོད་པ། ས་ལུ་ལྗང་བའི་མདོ་ལ་སོགས་པ་སང་ཤི་དང་རྒྱ་མེ་མགོ་དང་ཁ་ཆེ་ཨ་ནན་ཏ་རྣམས་ཀྱིས་བསྒྱུར་ཏོ།།

གཞན་ཡང༌། འདི་དུས་རྒྱ་ནག་ནས་ཧྭ་ཤང་ནེ་ལེ་དང༌། དར་ཆེན་ཧ་ར་དང༌། ཨི་པ་བྷ་བོ་སོགས་རྒྱ་ནག་གི་མཁས་པ་མང་བོ་བོད་ཡུལ་དུ་བྱོན་ཏེ། བོད་ཀྱི་ལོ་ཙཱ་བ་བྷི་ལ་ཤོང་ཀུན་དང༌། དར་ཆེན་དཔལ་སོགས་ཀྱིས་ལོ་ཙཱ་བྱས་ནས་རྩིས་དང་གསོ་བ་རིག་པ་སོགས་ཀྱི་གཞུང་ལུགས་མང་བོ་བོད་སྐད་དུ་བསྒྱུར། གསོ་བ་རིག་པའི་ཕྱོགས་ལ་དེའི་སྐབས་སུ་བོད་འདིར་ཕྱོགས་རིགས་ཀྱི་སྨན་པ་གྲགས་པ་ཅན་དགུ་ཡོད་དེ། རྒྱ་གར་བ་ཤན་ཏི་གར་བྷ། རྒྱ་ནག་པ་སྟོང་གསུམ་གང་བ། ལི་ཡུལ་བ་མ་ཧཱ་དེ་བ། བལ་བོ་བ་ད་ན་ཤི་ལ། ཁ་ཆེ་བ་ཁུ་ན་བཛྲ། སོག་པོ་བ་ན་ལ་ཤན་དིར། དོལ་བོ་བ་ཁྱོམ་རུ་རྩེ། གྲུ་གུ་བ་སེང་གེ་འོད་ཅན། ཁྲོམ་པ་ཤི་ལ་ན་སྟེ་དགུ་ཡོད་ལ། དེ་དག་གིས་རང་རང་གི་ལུགས་ཀྱི་སྨན་དཔྱད་ཀྱི་རིག་གནས་རྣམས་སྤེལ་ཞིང༌། གཡུ་ཐོག་པ་ཆེན་པོ་དང༌། བགྲོ་གླེང་བྱས་ཏེ། གཡུ་ཐོག་པ་རྒྱལ་ནས་ཀུན་གྱིས་གཡུ་ཐོག་པ་ལ་བཀུར་བཟོ་ཆེར་བྱས། གཡུ་ཐོག་པ་ཆེན་པོས། ཀོང་བོའི་ཡུལ་དུ་སྨན་ལུང་ཞེས་བྱ་བའི་ས་ཆར་སྨན་སློབ་པའི་དགོན་པ་བཏབ་སྟེ། དཔོན་སློབ་སྟོང་ཙམ་དེར་བཞུགས་ནས་རྒྱུད་བཞི་རྩ་འགྲེལ་ཆ་ལག་ཁ་སྐོང་དང་བཅས་པ་དང༌། ཕྱོགས་རིགས་ཀྱི་སྨན་པ་དགུས་བསྒྱུར་བའི་སྨན་གཞུང་རྣམས་དང༌། བོད་ཀྱི་མཁས་པ་མི་དགུས་མཛད་པའི་སྨན་གཞུང་རྣམས་དང༌། སྨན་དཔྱད་ཟླ་བའི་རྒྱལ་བོ། བདུད་རྩི་བུམ་པ། ཡན་ལག་བརྒྱད་པའི་སྙིང་བོ་བསྡུས་པ། དྲང་སྲོང་སྙན་བརྒྱུད། ཚིག་དོན་ཟླ་ཟེར་ལ་སོགས་པའི་སྨན་གཞུང་རྣམས་ལ་སྦྱངས་པ་དང་སྤེལ་བར་མཛད་པས་གསོ་བ་རིག་པ་འདི་བོད་ཡུལ་དུ་ཆེས་ཆེར་དར་བ་བྱུང་ངོ༌།།

གཞན་ཡང༌། རྒྱ་གར་ནས་སློབ་དཔོན་ཞི་བ་འཚོ་དང༌། པདྨ་འབྱུང་གནས་རྣམ་གཉིས་སྤྱན་དྲངས། བསམ་ཡས་ཀྱི་གཙུག་ལག་ཁང་ཆེན་པོ་བཞེངས། དེ་ནས་སློབ་དཔོན་ཞི་བ་འཚོས་རྒྱ་གར་ནས་དགེ་སློང་བཅུ་གཉིས་གདན་དྲངས། མཆིམས་ཨ་ནུའི་བུ་ཤཱཀྱ་པྲ་བྷ་དང༌། པ་གོར་ཧེ་འདོད་ཀྱི་བུ་བཻ་རོ་ཙ་ན། སྦ་ཁྲི་བཞེར་གྱི་བུ་སྦ་རཏ་ནའམ་སང་ཤི་ཏའམ་ཁྲི་གཟིགས་ཀྱང་ཟེར། ཞང་ཉང་བཟང་གི་བུ་ལྷ་བུ་ལྷ་བསེ་བཙན། ཤུད་པུ་ཁོང་སླེབ། འཁོན་ཀླུའི་དབང་བོ་བསྲུང་བ། ངན་ལམ་རྒྱལ་མཆོག གཙང་ལེགས་གྲུབ། འཇམ་དཔལ་གོ་ཆ། པྲན་ཀ་མུ་ཏིཀ གླང་ཀ་ཏ་ན། རྩངས་དེ་ཝེན་དྲ། རླངས་ཁམས་པ་གོ་ཆ། འཁོན་ན་གེན། རྨ་རིན་ཆེན་མཆོག ལ་གསུམ་རྒྱལ་བ་བྱང་ཆུབ། སྦ་གསལ་སྣང༌། སྦ་ཁྲི་བཞེར། སྦྲང་རྒྱར་ལེགས་གཟིགས། སེང་གོང་ལྷ་ལུང་གཟིགས། སྣ་ནམ་རྡོ་རྗེ་བདུད་འཇོམས། ཤུད་པུ་དཔལ་གྱི་སེང་གེ། རྩངས་ས་ལེའི་བུ་རིན་ཆེན་ལེགས་གྲུབ་སོགས་ལ་ལེགས་སྦྱར་གྱི་སྐད་ཡིག་དང༌། རྒྱ་ནག་དང་བལ་བོ་ཟ་ཧོར་ཁ་ཆེ་ལི་ཡུལ་སོགས་ཀྱི་སྐད་ཡིག་དང་བརྡ་སྤྲོད་པའི་གཞུང་དང་རིག་པའི་གནས་དུ་མ་བསླབས་པས་ཆེས་མང་ཆེ་བ་མཁས་པ་ཆེན་པོར་གྱུར་ནས་ལོ་ཙཱ་བ་མང་བོ་བྱོན། དེ་དག་ལས་ཐོག་མར་སད་མི་མི་བདུན་རབ་ཏུ་བྱུང་བ་དང༌། དེ་རྗེས་ཡང་རབ་བྱུང་གི་སྡེ་ཆེར་འཕེལ་ཏོ།།

གཞན་ཡང་བོད་རང་དུ་ཀ་ཅོག་ཞང་གསུམ་སོགས་ལོ་ཙཱ་བ་འབོར་ཆེན་བྱུང་སྟེ། བསམ་ཡས་ཀྱི་སྒྲ་བསྒྱུར་ལོ་ཙཱ་གླིང་དུ་ཆོས་བསྒྱུར། འདུད་འདུལ་སྔགས་པ་གླིང་དུ་དབང་བསྐུར། རྣམ་དག་ཁྲིམས་ཁང་གླིང་དུ་སོ་ཐར་གྱི་སྡོམ་ཁྲིམས་འཕོག དགའ་ལྡན་སེམས་བསྐྱེད་གླིང་དུ་བྱང་སྡོམ་འཕོག མི་གཡོ་བསམ་གཏན་གླིང་དུ་རྒྱའི་ཧྭ་ཤང་ལ་སོགས་པས་བསམ་གཏན་བྱེད། བརྡ་སྤྲོད་ཚང་བའི་གླིང་དུ་བརྡ་སྦྱོར། བཻ་རོ་ཙ་ནའི་གླིང་དུ་ཆོས་འཆད། དཀོར་མཛོད་བེ་ཧར་གླིང་དུ་ནོར་བཞག་གོ །རྒྱལ་བོ་འདིའི་རིང་ལ་ཁམས་ཡན་ཆད་དུ་ཆོས་ཀྱི་གྲྭ་ཆེན་པོ་བཅུ་གཉིས་བཙུགས། ཡེར་བ་དང་མཆིམས་ཕུར་སྒོམ་གྲྭ་བཙུགས། རྒྱའི་ཧྭ་ཤང་མ་ཀོ་ལ་སྤྱན་དྲངས་ནས། སྦ་རཏ་ནས་ཤེས་རབ་འབུམ་པ་ཐོག་མར་བསྒྱུར། བྲན་ཀ་ལེགས། ལྷ་ལུང༌། ཀླུ་གོང༌། དབུས་གོང༌། ཆུང་བོ་རྩེ་སོགས་ཀྱིས་རྒྱ་ནག་པོའི་ལོ་ཙཱ་བྱས་སོ།།

གཞན་ཡང༌། རྒྱ་གར་གྱི་སློབ་དཔོན་བི་མ་ལ་མི་ཏྲ་དང༌། སངས་རྒྱས་གསང་བ་དང༌། ཤཱན་ཏི་གར་བྷ་དང༌། བི་ཤུད་ངྷ་སིང་ཧ་ལ་སོགས་པ་དང༌། བོད་ཀྱི་ལོ་ཙཱ་བ་སད་མི་མི་བདུན་དང༌། ཆོས་ཀྱི་སྣང་བ་དང༌། བན་དེ་ནམ་མཁའ་དང༌། སྒྲོན་རིན་ཆེན་སྡེ། རྣམ་པར་མི་རྟོག་པ། ཤཱཀྱ་འོད་ལ་སོགས་པས་ལོ་ཙཱ་བྱས་ཏེ། རྒྱ་གར་རྒྱ་ནག་ཁ་ཆེ་ཟ་ཧོར་ལི་ཡུལ་སོགས་ནས་བཀའ་དང་བསྟན་བཅོས་ཤིན་ཏུ་མང་བོ་བསྒྱུར། དེ་ནས་ཕོ་བྲང་ལྡན་དཀར་ན་བཞུགས་པའི་སྒྲ་བསྒྱུར་ཀ་བ་དཔལ་བརྩེགས་དང༌། ཀླུའི་དབང་བོ་ལ་སོགས་པས་བོད་ཁམས་སུ་འགྱུར་རོ་འཚལ་གྱི་གཞུང་གི་མཚན་བྱང་བཅོས་ཏེ་དཀར་ཆག་བྲིས་པ་ལ་དཀར་ཆག་ལྡན་དཀར་མ་ཟེར་རོ།།

རྒྱལ་བོ་དང་བློན་འབངས་ལོ་ཙཱ་བ་རྣམས་ཀྱིས་ཀྱང་དམ་པའི་ཆོས་སོགས་རིག་པའི་གནས་ལ་སྦྱང་བ་ཆེར་མཛད་པས་མཁས་པ་ཆེན་པོར་གྱུར་ཏེ། རྒྱལ་བོ་ཁྲི་སྲོང་ལྡེ་བཙན་རང་ཉིད་ཀྱིས། བཀའ་ཡང་དག་པའི་ཚད་མ་བམ་པོ་བདུན། དེའི་མདོར་བསྟན་བམ་པོ་གཅིག དེ་བཞིན་གཤེགས་པའི་སྐད་བརྡ་བམ་པོ་ལྔ། བྱམས་པའི་བསྟོད་ཆེན་བམ་པོ་གཅིག་ལྷག་པ་སོགས་བསྟན་བཅོས་གཞུང་ཚད་ཆེ་བ་(འདི་སྡེ་དགེའི་བསྟན་འགྱུར་གྱི་པོ་ཏི་ཅོ་བ་ན་བཞུགས)དང༌། གྲུབ་པའི་མཐའ་དགྲོལ་བ། དབུ་མའི་གཟེར་བུ། བསམ་གཏན་གྱི་དོགས་པ་བརྒྱད་བསལ་བ། ལྷ་བཙན་པོས་བཀས་བཅད་སོགས་དང༌། འཕགས་པ་རྣམ་སྣང༌། ཤཱཀྱ་ཐུབ་པ། འཇམ་དཔལ། བྱམས་པ། མི་གཡོ་མགོན། བྱང་ཆུབ་སེམས་དཔའ་བརྒྱ་ལ་བསྟོད་པ་སོགས་གཞུང་ཚད་ཆུང་བའི་བསྟན་བཅོས་དུ་མ་མཛད་དོ། །ཡུམ་སྟོང་ཕྲག་བརྒྱ་བའི་འགྲེལ་བ་འབུམ་རྐྱང་བའི་གནོད་འཇོམས་སུ་གྲགས་པ་ཡང་ཁྲི་སྲོང་གིས་མཛད་པ་དཀར་ཆག་འཕང་ཐང་མར་བཤད་པ་ལྟར་ཡིན་ལ། དཀར་ཆག་མཆིམས་མ་དང་ལྡན་དཀར་མར་བཤད་པའི་ཡུམ་གྱི་འགྲེལ་བ་གནོད་འཇོམས་སུ་གྲགས་པ་རྒྱ་གར་མ་ཡིན་པར་བཤད་པ་དེ་ནི། དཾཥྜ་སེ་ནའམ་ཁ་ཆེ་མཆེ་བའི་སྡེ་ཡང་ཟེར་བ་དེས་བརྩམས་པའི་ཡུམ་གསུམ་གནོད་འཇོམས་ཡིན་ནོ།།

གཞན་ཡང་མུ་ཏིག་བཙན་པོས་མཛད་པའི་དགོངས་པ་ངེས་འགྲེལ་གྱི་འགྲེལ་པ་དང༌། ཇོ་བོ་བྱང་ཆུབ་རྗེའི་སྨོན་ལམ་སོགས་ལྷ་སྲས་དང༌། བཙུན་མོས་མཛད་པ་དང༌། བཻ་རོ་ཙ་ནས་མཛད་པའི་དོན་གསལ་སྒྲོན་མ(འདི་ཡང་སྡེ་བསྟན་ཅོ་པར་བཞུགས)། རིགས་པ་དྲུག་ཅུ་བ་ལས་མདོར་བསྡུས་ཏེ་བཤད་པ། སྣང་མཐའི་མཚན་བརྗོད་ལ་སོགས་པ་དང༌། དཔལ་དབྱངས་ཀྱིས་མཛད་པའི་གཅེས་པ་བསྡུས་པའི་ཕྲིན་ཡིག ཀ་བ་དཔལ་བརྩེགས་ཀྱིས་མཛད་པའི་གསུང་རབ་རིན་པོ་ཆེའི་གཏམ། ཕྱིའི་ཡུལ་དྲན་རྒྱུད་དུ་ཡོད་པར་འདོད་པ་སེལ་བ། མཚན་ཉིད་གསུམ་མདོར་བསྟན། ཆོས་ཀྱི་རྣམ་གྲངས་རྩ་འགྲེལ་གཉིས་(འདི་སྡེ་བསྟན་སྣ་ཚོགས་སྐོར་དུ་བཞུགས)། ཞང་ཡེ་ཤེས་སྡེས་མཛད་པའི་ལྟ་བའི་ཁྱད་པར། བཟང་སྤྱོད་ཀྱི་འགྲེལ་བ་བཞིའི་དོན་བསྡུས(འདི་ཡང་སྡེ་བསྟན་ཆོ་བར་བཞུགས)། འཇིག་རྟེན་ཕ་རོལ་སྒྲུབ་པ་དགོངས་ལྡེམ་དགོངས་གཞིའི་བརྗེད་བྱང་རྣམས་དང༌། ཅོག་རོ་ཀླུའི་རྒྱལ་མཚན་གྱིས་མཛད་པའི་དགོངས་པ་ངེས་འགྲེལ་གྱི་རྒྱ་ཆེར་འགྲེལ(འདི་ཡང་སྡེ་བསྟན་ཆོ་པར་བཞུགས)། ངེས་པའི་དོན་དབུ་མ། ཤེར་ཕྱིན་མདོར་བསྡུས། ཕྲེང་བའི་རྒྱན། ཆོས་གཏན་ལ་དབབ་པ། དཔལ་བརྩེགས་དང་ཀླུའི་རྒྱལ་མཚན་གྱི་བརྒལ་ལན་བཞི་ཕྲུགས། གཞན་ཡང་དཔལ་བརྩེགས་ཀྱིས་མཛད་པའི་ལྟ་བའི་རིམ་པའི་མན་ངག་དང༌། གསུང་རབ་རིན་པོ་ཆེའི་གཏམ་རྒྱུད་དང་ཤཱཀྱའི་རབས་རྒྱུད(འདི་གཉིས་ཀྱང་སྡེ་བསྟན་དུ་བཞུགས)། སློབ་དཔོན་ཤེས་རབ་སྙིང་བོའི་དགོངས་འགྲེལ་བྱམས་ལེའི་བརྗེད་བྱང༌། པྲ་ཤ་སེ་ནའི་ཤེར་སྙིང་ཊཱིཀ སློབ་དཔོན་བཀྲ་ཤིས་ཀྱི་དབུ་མ་རྒྱན་གྱི་བརྗེད་བྱང་དང༌། སྡོམ་པ་ཉི་ཤུ་པའི་འགྲེལ་བ། དཔལ་གྱི་ལྷུན་པོའི་དགེ་སློང་མའི་སོ་ཐར་གྱི་འགྲེལ་བ། ཨ་ཙཱརྱ་ཀ་ལ་ཡ་ན་དང༌། རིན་ཆེན་ཟླ་འབྱུང་དང༌། ཀོང་ཨུད་པལ་ཀོ་ཥ་སོགས་ཀྱི་དྲིས་ལན། ལྕེ་ཁྱི་འབྲུག་གི་སྒྲའི་གནས་བརྒྱད་རྩ་འགྲེལ་དང་(འདི་ཡང་སྡེ་བསྟན་དུ་བཞུགས)། མ་བྱིན་ལེན་གྱི་སྐབས་ནས་མཁན་པོ་བཞིས་དཔྱད་པ་སོགས་ལོ་ཙཱ་བ་ཆེན་པོ་རྣམས་ཀྱིས་ཀྱང་བསྟན་བཅོས་མང་དུ་མཛད།

བཻ་རོ་ཙ་ན། ལྡན་མ་རྩེ་མང༌། ཁ་ཆེ་ཨ་ནན་ཏ་སྟེ་ལོ་ཙཱ་བ་རྒན་གསུམ། གཉགས་ཛྙ་ན་ཀུ་མ་ར། འཁོན་ཀླུའི་དབང་བོ། རྨ་རིན་ཆེན་མཆོག་སྟེ་བར་བ་གསུམ། ཀ་བ་དཔལ་བརྩེགས། ཅོག་རོ་ཀླུའི་རྒྱལ་མཚན། ཞང་ཡེ་ཤེས་སྡེ་སྟེ་གཞོན་གསུམ་བཅས་དགུ་དང༌། ཕྱིས་སུ་བརྒྱ་ཕྲག་ལྷག་བྱུང་ཞིང༌། གཞན་ཡང་སློབ་དཔོན་ཀ་མ་ལ་ཤི་ལ་སོགས་པཎྜི་ཏ་མང་བོ་སྤྱན་དྲངས་ནས་རྒྱ་གར་སོགས་ནས་ནང་དོན་རིག་པ་སོགས་མང་བོ་བསྒྱུར་བས་དམ་པའི་ཆོས་སོགས་རིག་པའི་གནས་དར་ཞིང་རྒྱས་སྟབས་ཆབ་སྲིད་དང་དཔལ་འབྱོར་ཡང་སྔར་ལས་ལྷག་པར་དར་ཏེ་མཐའ་བཞི་དབང་དུ་འདུས་ཚུལ་སོགས་དེབ་ཐེར་རྣམས་སུ་གསལ། བཀའ་གཙིགས་ཀྱི་ཡི་གེ་དང་ཁྲིམས་ཡིག་སོགས་མང་བོ་བཟོས། བློན་ཆེན་མགོས་རྒན་གྱི་བུ་མགོས་ཁྲི་བཟང་ཡབ་ལྷག་གིས། སྔར་ཞལ་ལྕེ་གསོས་ཐང་སྟོང་ཐང་དུ་བཅད་པ་མེད་པ་ལ་ཁྲིམས་སུ་བཅད་ནས་ཁྲིམས་ཡིག་ཆེན་མོ་བཟོས་པས་བློན་པོ་ཕྱི་མ་རྣམས་ལའང་དྲིན་ཆེ་བས། བོད་ཕྲུག་མཛངས་པའི་མི་བདུན་གྱི་དྲུག་པར་འདྲེན་ནོ། །བློན་སྟག་བཙན་གདོང་གཟིགས་གཉེར་གྱི་བུ། གཉེར་སྟག་བཙན་གདོང་གཟིགས་ཀྱིས་ཀྱང༌། འབངས་མི་ཁྱིམ་རེ་ལ་རྟ་གླང་མཛོ་གཡག་སོགས་བགོས་ནས། རྩྭ་སྔོན་དགུན་དུས་སུ་བསྐམ་པ་སོགས་ཀྱི་ལག་རྗེས་བཞག་པས། བོད་ཕྲུག་མཛངས་པའི་མི་བདུན་པ་ཟེར་རོ།།

དེ་རྗེས་ཁྲི་སྲོང་གི་སྲས་ཆེ་བ་མུ་ནེ་བཙན་པོའི་དུས་སུ། ལྷ་ས། ཁྲ་འབྲུག བསམ་ཡས་རྣམས་སུ་མཆོད་པ་ཆེན་པོ་བཙུགས་ཤིང༌། པཎྜི་ཏ་དང་ལོ་ཙཱ་བ་དང་དགེ་འདུན་པ་རྣམས་ལ་བསྙེན་བཀུར་མཛད་དེ་སྔར་བཞིན་དམ་པའི་ཆོས་སོགས་བསྒྱུར་ཞིང་སྤེལ་བར་མཛད། འབངས་ཀྱི་དབུལ་ཕྱུག་སྙོམས་པ་སོགས་མཛད་དོ།།

དེ་རྗེས་ཁྲི་སྲོང་གི་སྲས་ཐ་ཆུང་ཁྲི་ལྡེ་སྲོང་བཙན་སད་ན་ལེགས་མཇིང་ཡོན་དུ་གྲགས་པ་རྒྱལ་སར་འཁོད།

གཡུ་ཐོག་ཡོན་ཏན་མགོན་པོའི་སྲས། འབུམ་སེང༌། དཔལ་འབུམ། དགའ་དགའ་གསུམ་གྱིས། མུ་ནེ་བཙན་པོ་དང༌། སད་ན་ལེགས་འདི་གཉིས་ཀའི་བླ་སྨན་པ་མཛད་ཅིང་འཕྲིན་ལས་ཀྱང་ཡབ་ཀྱི་གདན་ས་གནོན་པ་བྱུང༌། འདི་དུས་བློན་པོ་གླང་སྣ་ཅན་གྱིས་བོད་ཀྱི་མཁས་པ་རྣམས་ལ་སྐྱོན་ཕབ། གཡུ་ཐོག་པ་བཙོན་དུ་བཅུག དེ་ནས་ཀློ་ཁ་ཁྲའི་ཡུལ་དུ་སྤྱུགས་པ། རྒྱལ་བོ་སད་ན་ལེགས་འདིས་ཀློ་ཡུལ་ནས་གདན་དྲངས། རྒྱལ་བོའི་ཕོ་བྲང་དུ་ཟ་འོག་དགུ་བརྩེགས་ཀྱི་སྟེང་དུ་སྤྱན་དྲངས་ཏེ། རིན་པོ་ཆེའི་འབུལ་བ་མང་བོ་ཕུལ་ཞིང་བོད་ཀྱི་རྒྱལ་བོ་བརྒྱུད་པ་ནས་བརྒྱུད་པར་གཡུ་ཐོག་བརྒྱུད་པར་བཅས་པ་བླ་སྨན་པ་བྱེད་དགོས་པའི་བཀའ་དང་དཔྱ་ཁྲལ་གྱི་འབུལ་བ་དང་བཅས་པ་ཐག་བཅད། གཡུ་ཐོག་པས་ཀྱང་སྔར་བཞིན་གསོ་བ་རིག་པ་རྒྱ་ཆེར་སྤེལ་ཏེ། གསུང་རྩོམ་ཡང་རིག་གནས་ཕྱི་ནང་ཞེས་པའི་གཞུང་ལེའུ་སོ་གསུམ། རྡེ་སྐོར་ཕྱི་ནང་གསང་གསུམ་ཞེས་པར་ལེའུ་ང་ལྔ། རིག་པའི་གནས་བཅོ་བརྒྱད་ཀྱི་འགྲེལ་བ་ཁ་སྐོང་དང་བཅས་པ། རྒྱུད་འགྲེལ་སྟོང་དང་རྩ་གཅིག་ལ་ལེའུ་སྟོང་དང་སུམ་བརྒྱ། མན་ངག་ཕན་བྱེད་དང་གནོད་བྱེད་ཀྱི་གཞུང་ཕྲན་མང་བོ། དམར་འདེད་ཀྱི་མན་ངག་ལེའུ་བརྒྱ་དང་དགུ་བཅུ། རོ་བཀྲ་འཕྲུལ་གྱི་མེ་ལོང་ལ་ལེའུ་ཉེར་ལྔ། བྱང་ཁོག་གསང་དབྱེ་ལེའུ་བརྒྱད། ཐུར་དཔྱད་གནད་ཀྱི་ལྡེའུ་མིག་ལ་ལེའུ་སོ་ལྔ། མངོན་ཤེས་གནད་ཀྱི་འཕྲུལ་འཁོར་ལ་ལེའུ་བཅོ་ལྔ། གསང་ཐིག་རིན་ཆེན་སྒྲོན་མེ་ལ་ལེའུ་བཅོ་བརྒྱད། ནག་རྩིས་འཁོར་འདས་གཏན་འབེབས་ལ་ལེའུ་བརྒྱ་དང་ཉི་ཤུ། འབྲས་རྩིས་ལ་ལེའུ་ཉེར་ལྔ། དཀར་རྩིས་རི་བོ་རྡུལ་འབེབས་ལ་ལེའུ་དྲུག་ཅུ། རྒྱུད་བཞིའི་ཐེམ་ཡིག གབ་པ་གསལ་བྱེད། ཐོ་བྱང༌། རྒྱུད་ཀྱི་ཁ་སྐོང༌། དཀར་ཆག ཆ་ལག མེ་རྩ་མདོ་ཆོད་ནག་པོ། གཏར་ཁ་ལག་ལེན་འཕྱུགས་མེད། གྱེན་འདྲེན་ལྕགས་ཀྱུས་ཉ་འཛིན། ཐུར་འབེབས་རི་བོ་རྦབ་སྒྲིལ། ཉམས་ཡིག་མཐོང་བ་དོན་ལྡན། ཁྲིད་ཡིག་བརྒྱ་དང་ཉེར་གཅིག ནད་པ་ལ་གཅེས་པ་སྲོག་འཚོ་དཔལ་སྐྱེད་ཀྱི་གདམས་པ། སྨན་པ་ལ་གཅེས་པ་བསྐྲད་པ་ལྔ་ལྡན་གྱི་གདམས་པ་ལ་སོགས་པ་མང་བོ་བརྩམས་སོ།།

བསམ་ཡས་ལ་ཞིག་གསོ་དང༌། བསམ་ཡས་སོགས་ཀྱི་མཆོད་པ་མུ་ནེ་བཙན་པོས་བཙུགས་པ་དེ་བར་སྐབས་སུ་རེ་ཞིག་ཉམས་པ་དེ་སླར་གསོས། སྐྱིད་ཤོད་དུ་དཀར་ཆུང་རྡོ་རྗེ་དབྱིངས་ཀྱི་ལྷ་ཁང་བཞེངས། པཎྜི་ཏ་བི་མ་ལ་མི་ཏྲ། ཛྙཱ་ན་སེ་ན། བལ་བོ་ཧཱུཾ་ཀ་ར། པྲ་ཛྙཱ་ངྷརྨ། ཤཱཀྱ་སིང་ཧ། སུ་རེན་དྲ་བོ་ངྷི། ཛི་ན་མི་ཏྲ། ད་ན་ཤི་ལ། བུད་ངྷ་སིང་ཧ་སོགས་སྤྱན་དྲངས། སྔར་གྱི་ལོ་ཙཱ་བ་རྣམས་ལའང་བསྙེན་བཀུར་ཆེན་པོ་བྱས་ཏེ། མཚན་ཉིད་དང༌། གསང་སྔགས་ཀྱི་བཀའ་བསྟན་བཅོས་མང་བོ་བསྒྱུར། རྒྱལ་བོ་འདིས་ཡབ་མེས་ཀྱི་དུས་བཞིན་བྱེད་དགོས་པའི་ཐུགས་དམ་བཞེས་ཏེ། དབུ་སྙུང་བོར་ནས། བཀའ་གཙིགས་ཀྱི་ཡི་གེ་སྔ་ཕྱི་ཤོག་གུ་མཐིང་ག་ལ་གསེར་གྱིས་བྲིས་ཏེ། རིན་པོ་ཆེ་ཁྲ་མེན་གྱི་སྒྲོམ་དུ་བཅུག་ནས་བསམ་ཡས་ཀྱི་ཡབ་ཁྲི་སྲོང་གི་བཀའ་གཙིགས་ཆེན་མོའི་འགྲམ་དུ་བཞག་གོ།

དེ་རྗེས་ཁྲི་ལྡེ་སྲོང་བཙན་སད་ན་ལེགས་ཀྱི་སྲས། ཁྲི་གཙུག་ལྡེ་བཙན་རལ་བ་ཅན་གྱིས་རྒྱལ་སྲིད་བཟུང༌། འདིའི་རིང་ལ་འུ་ཤང་རྡོའི་དཔེ་མེད་བཀྲ་ཤིས་དགེ་འཕེལ་གྱི་གཙུག་ལག་ཁང་བཞེངས། གཙུག་ལག་ཁང་དུ་པཎྜི་ཏ་དང་ལོ་ཙཱ་བ་རྣམས་བཞུགས་ནས། མཚན་ཉིད་དང་རྡོ་རྗེ་ཐེག་པའི་བཀའ་བསྟན་བསྒྱུར་ཅིང་འཆད་རྩོམ་གྱིས་དུས་འདའ་བར་བྱེད། སྔར་ལྷ་སྲས་ཡབ་ཀྱི་རིང་ལ་ཆོས་ཀྱི་བརྡ་བོད་སྐད་ལ་མ་གྲགས་པ་མང་བོ་ཞིག་བྱུང་ཞིང༌། རྒྱ་ནག་དང་ལི་དང་རྒྱ་གར་ཡུལ་དབུས་དང་ཟ་ཧོར་དང་ཁ་ཆེ་སོགས་སྣ་ཚོགས་ནས་བསྒྱུར་བའི་བརྡ་མི་འདྲ་བ་དག་མང་བོ་མི་གོ་ཞིང་བསླབ་དཀའ་བར་གཟིགས་ནས། དྲིན་ཅན་གྱི་ལོ་པཎ་རྣམ་གསུམ་ཞེས་གྲགས་པ་ཛི་ན་མི་ཏྲ་དང༌། དན་ཤཱི་ལ་དང༌། ཞང་ཡེ་ཤེས་སྡེ་གསུམ་སོགས་ལོ་པཎ་རྣམས་ཀྱིས་སྔར་བསྒྱུར་བ་ཐམས་ཅད་དག་པར་བྱས་ཤིང་གསར་བཅད་ཀྱིས་གཏན་ལ་ཕབ་སྟེ་གོ་བདེ་བར་བྱས། གཞུང་ཚད་རྣམས་ཀྱང་བམ་གྲངས་སོགས་ངེས་པར་བྱས་ཏེ། དཀར་ཆག་ཏུ་བསྣན་ནས། སྤྱིར་ཁྲི་སྲོང་གི་དུས་ཀྱི་དཀར་ཆག་ཕོ་བྲང་ལྡན་དཀར་མ་དང༌། ཕྱིས་ཀྱི་མཆིམས་ཕུ་མ་དང་འཕང་ཐང་མ་སྟེ་གསུམ་བྱུང་བ་དཀོར་མཛོད་ཀྱི་ཟླ་ལ་བཞག་གོ །ཡང་སྐད་གསར་བཅད་ཀྱི་སྐབས་ལོ་པཎ་རྣམས་ཀྱིས་བྱེ་བྲག་རྟོགས་བྱེད་ཆེ་འབྲིང་ཆུང་གསུམ་མཛད། ཆེན་མོ་དང་འབྲིང་བའམ་སྒྲ་སྦྱོར་བམ་གཉིས་སྡེ་དགེའི་བསྟན་འགྱུར་ཅོ་བའི་ནང་སྣ་ཚོགས་སྐོར་དུ་བཞུགས། ཇི་ལྟར་བརྩམས་ཚུལ་སྒྲ་སྦྱོར་བམ་གཉིས་ཀྱི་དབུར་བཤད་པ་ཡོངས་རྫོགས་འདིར་འདྲེན་པར་བྱ་སྟེ་འདི་ལྟར།།

རྟའི་ལོ་ལ་བཙད་པོ་ཁྲི་ལྡེ་སྲོང་བཙན(འདི་ཡི་གེ་ནོར་བ་ཡིན་ཏེ། ཁྲི་གཙུག་ལྡེ་བཙན་ཡིན་ནོ)། ཕོ་བྲང་གིའི་འོན་ཅང་རྡོ་(འུ་ཤང་རྡོ་དང་གཅིག་རེད)ན་བཞུགས། སྟོད་སྨད་ཀྱི་དམག་རྙིད་རྗེད་དང་རྐུན་ཆེན་བཏུལ། གར་ལོག་གི་ཕོ་ཉས་ཕྱག་བཙལ། བློན་ཆེན་པོ་ཞང་ཁྲི་ཟུར་རམ་ཤག་དང༌། མང་རྗེ་ལྷ་འོད་ལ་སོགས་པས་རྒྱལ་ས་གནད་མང་བོ་བཅད་དེ། རྔ་རྟ་དང་བ་མར་མང་བོ་ཕྱག་ཏུ་ཕུལ། ཞང་བློན་སོ་སོར་བྱ་དགའ་བསྩལ་བའི་ལན་ལ། ཉི་འོག་གི་མཁན་པོ་ཨ་ཙཱརྱ་ཛི་ན་མི་ཏྲ་དང༌། སུ་རེནྡྲར་བོ་ངྷི་དང༌། ཤཱི་ལེན་དྲ་བོ་ངྷི་དང༌། ད་ན་ཤཱི་ལ་དང༌། བོ་ངྷི་མི་ཏྲ་དང༌། བོད་ཀྱི་མཁན་པོ་རཏ་ན་ར་ཀྵི་ཏ་དང༌། ངྷརྨ་ཏ་ཤཱི་ལ་དང༌། ལོ་ཙཱ་བ་མཁས་པ་ཆུད་པ་ཛྙཱ་ན་སེ་ན་དང༌། ཛ་ཡ་རཀྵི་ཏ་དང༌། མཉྫུ་ཤྲཱི་ཝརྨ་དང༌། རཏ་ནེན་དྲ་ཤཱི་ལ་ལ་སོགས་པས་ཐེག་པ་ཆེ་ཆུང་ལས་འབྱུང་བའི་རྒྱ་གར་གྱི་སྐད་ལས་བོད་ཀྱི་སྐད་དུ་བསྒྱུར་ཞིང་མིང་དུ་བཏགས་པ་རྣམས་དཀར་ཆག་ཏུ་བྲིས་ཏེ། ནམ་དུ་ཡང་གཞུང་ལུགས་དེ་ལས་མི་བསྒྱུར་ཞིང་ཀུན་གྱིས་བསླབ་ཏུ་རུང་བར་གྱིས་ཤིག་ཅེས་བཀའ་བསྩལ་ནས། སྔོན་ལྷ་སྲས་ཡབ་ཀྱི་རིང་ལ། ཨ་ཙཱརྱ་བོ་ངྷི་ས་ཏྭ་དང༌། ཡེ་ཤེས་དབང་བོ་དང༌། ཞང་རྒྱལ་ཉེན་ཉ་བཟང་དང༌། བློན་ཁྲི་བཞེར་སང་ཤི་དང་(འདི་ཡང་ཡི་གེ་ནོར་བ་འདྲ་སྟེ། ཁྲི་བཞེར་གྱི་བུ་སང་ཤི་ཏ་ཡིན་ལ། སང་ཤི་ནི་རྒྱ་ཕྲུག་ཡིན་པར་གསུངས།)། ལོ་ཙཱ་བ་ཛྙཱ་ན་དེ་བ་ཀོ་ཥ་དང༌། ཁྱི་འབྲུག་དང༌། ལྕེ་བྲམ་ཟེ་ཨ་ནན་ཏ་ལ་སོགས་པས་ཆོས་ཀྱི་སྐད་བོད་ལ་མ་གྲགས་པ་ལས་མིང་དུ་བཏགས་པ་མང་དག་ཅིག་མཆིས་པའི་ནང་ནས་ཁ་ཅིག་ཆོས་ཀྱི་གཞུང་དང༌། བྱཱ་ཀ་ར་ཎའི་ལུགས་དང་མི་མཐུན་ཏེ། མི་བཅོས་སུ་མི་རུང་བ་རྣམས་ཀྱང་བཅོས། སྐད་ཀྱི་མིང་གཅེས་སོ་འཚལ་གྱིས་ཀྱང་བསྣན་ནས་ཐེག་པ་ཆེ་ཆུང་གི་གཞུང་ལས་ཇི་ལྟར་འབྱུང་བ་དང༌། གནའི་མཁན་པོ་ཆེན་པོ་ནཱ་གཱ་རྫུ་ན་དང༌། བ་སུ་བན་ངྷེ་ལ་སོགས་པས་ཇི་ལྟར་བཤད་པ་དང༌། བྱཱ་ཀ་ར་ཎའི་སྒྲའི་ལུགས་ལས་ཇི་སྐད་དུ་འདྲེན་པ་དང་ཡང་བསྟུན་ཏེ། མཇལ་དཀའ་བ་རྣམས་ཀྱང་ཚིག་སོ་སོར་ཕྲལ་ནས་གཏན་ཚིགས་ཀྱིས་བཤད་དེ་གཞུང་དུ་བྲིས། སྐད་རྐྱང་བ་བཤད་མི་འཚལ་བ་སྒྲ་བཞིན་དུ་བསྒྱུར་བར་རིགས་པ་རྣམས་ཀྱང་སྒྲ་བཙན་པར་བགྱིས་ཏེ་མིང་དུ་བཏགས། སྐད་ཁ་ཅིག་དོན་བཞིན་དུ་གདགས་པར་རིགས་པ་རྣམས་ཀྱི་དོན་བཙན་པར་བགྱིས་ཏེ་མིང་དུ་བཏགས་ནས། བཙད་པོའི་སྤྱན་སྔར་བན་དེ་ཆེན་པོ་དཔལ་གྱི་ཡོན་ཏན་དང༌། བན་དེ་ཆེན་པོ་ཏིང་ངེ་འཛིན་ལ་སོགས་པ་ཡང་འཚོགས་ཏེ། རྗེ་བློན་གདན་འཛོམས་པ་ལ་ཞུས་ནས་ངྷརྨ་བསྒྱུར་བའི་ཐབས་དང༌། རྒྱ་གར་གྱི་སྐད་ལ་བོད་ཀྱི་སྐད་དུ་མིང་བཏགས་པ་རྣམས་གཏན་ལ་ཕབ་སྟེ། བཀས་བཅད་པ། དམ་པའི་ཆོས་བསྒྱུར་བའི་ལུགས་ནི་དོན་དང་ཡང་མི་འགལ་ལ་བོད་སྐད་ལ་ཡང་གར་བདེ་བར་གྱིས་ཤིག ངྷརྨ་བསྒྱུར་བ་ལ་རྒྱ་གར་གྱི་སྐད་ཀྱི་གོ་རིམ་ལས་མི་བསྣོར་བ་བོད་ཀྱི་སྐད་དུ་བསྒྱུར་ན་དོན་དང་ཚིག་ཏུ་འབྲེལ་ཞིང་བདེ་ན་མ་བསྣོར་བར་སྒྱུར་ཅིག བསྣོར་ན་བདེ་ཞིང་གོ་བ་བསྐྱེད་པ་ཞིག་ཡོད་ན། ཚིགས་བཅད་ལ་ནི་རྩ་བ་བཞི་བའམ། དྲུག་པའང་རུང་སྟེ། ཚིགས་སུ་བཅད་པ་གཅིག་གི་ནང་ན་གང་བདེ་བ་བསྣོར་ཞིང་སྒྱུར་ཅིག རྐྱང་བ་ལ་ནི་དོན་གང་སྙེགས་པ་ཡན་ཆད་ཀྱི་ཚིག་དང་དོན་གཉིས་ཀ་ལ་གར་བདེ་བར་བསྣོར་ཞིང་སྒྱུར་ཅིག སྐད་གཅིག་ལ་མིང་དུ་མར་འདྲེན་པ་ནི། ལྟག་འོག་དང་བསྟུན་ལ་གར་སྙེགས་པ་བཞིན་དུ་མིང་ཐོགས་ཤིག གཽ་ཏ་མྱ་ལྟ་བུ་གཽའི་སྒྲ་ལས་ཚིག་དང༌། ཕྱོགས་དང༌། ས་དང༌། འོད་དང༌། རྡོ་རྗེ་དང༌། བ་ལང་དང༌། མཐོ་རིས་ལ་སོགས་པ་རྣམ་པ་དུ་མར་སྙེགས་པ་དང༌། ཀཽ་ཤི་ཀ་ལྟ་བུའི་རྩ་ཀུ་ཤ་ཐོགས་པ་དང༌། མཁས་པ་དང༌། པད་མ་ལ་དགའ་བ་དང༌། འུག་པ་དང་། མཛོད་ལྡན་ལ་སོགས་པའི་སྒྲའི་ལུགས་ལས་དྲངས་ཤིང་བསྒྱུར་ན་སྣ་གྲངས་མང་བོ་ཞིག་ཏུ་སྙེགས་ལ། བསྒྱུར་བ་རྣམས་གཅིག་གི་ནང་དུ་ནི་སྣ་གྲངས་དེ་ཀུན་འདུར་ཡང་མི་བཏུབ་སྟེ། གཅིག་ཏུ་ཆད་པར་བྱར་ཡང་གཏན་ཚིགས་ཆེན་པོ་མེད་པ་རྣམས་ནི་མི་བསྒྱུར་བར་རྒྱ་གར་སྐད་སོ་ན་ཞོག་ཅིག གར་ཡང་དྲང་དུ་རུང་བའི་ཚིག་བྱུང་ན། ཕྱོགས་གཅིག་ཏུ་ཆད་པར་མི་བསྒྱུར་བར་སྤྱིར་སྙེགས་སུ་རུང་བར་གྱིས་ཤིག ཡུལ་དང༌། སེམས་ཅན་དང༌། མེ་ཏོག་དང༌། རྩི་ཤིང་ལ་སོགས་པའི་མིང་བསྒྱུར་ན་ཡིད་གོལ་ཞིང་ཚིག་མི་བདེ་བ་དང༌། འོལ་ཕྱིར་བསྒྱུར་དུ་རུང་བ་དོན་དེ་ལྟར་ཡིན་ནམ་མ་ཡིན་གཏོལ་མེད་པ་རྣམས་ལ། མགོ་ལ་ཡུལ་ཞེའམ། མེ་ཏོག་ཅེས་པ་ལ་སོགས་པ་གང་ལ་བྱ་བའི་མིང་གཅིག་བླ་ཐབས་སུ་སྣོན་ལ་རྒྱ་གར་སྐད་སོ་ན་ཞོག་ཅིག གྲངས་ལ་རྒྱ་གར་སྐད་བཞིན་དུ་བསྒྱུར་ན་དགེ་སློང་བརྒྱ་ཕྲག་ཕྱེད་དང་བཅུ་གསུམ་ཞེས་འབྱུང་བ་ལ་སོགས་པ་ནི། སྟོང་ཉིས་བརྒྱ་ལྔ་བཅུ་ཐམ་པར་བོད་ཀྱི་སྐད་བཞིན་བསྒྱུར་ན་དོན་དང་མི་འགལ་བ་བོད་ཀྱི་སྐད་ལ་ཡང་བདེ་བས་གྲངས་བསྡོམ་དུ་རུང་བ་རྣམས་བོད་སྐད་ཀྱི་ལུགས་བཞིན་ཐོགས་ཤིག པ་རི་དང༌། སམ་དང༌། ཨུ་བ་ལྟ་བུ་ལ་སོགས་ཏེ། ཚིག་གི་ཕྲད་དང་རྒྱན་ལྟ་བུར་འབྱུང་བ་རྣམས་བསྒྱུར་ན་དོན་དང་མཐུན་ཞིང་འབྱོར་བའི་ཐབས་ནི། ཡོངས་སུ་ཞེའམ། ཡང་དག་པ་ཞེའམ། ཉེ་བ་ཞེས་སྒྲ་བཞིན་དུ་སྒྱུར་ཅིག དོན་ལྷག་པར་སྙེགས་པ་མེད་པ་རྣམས་ནི་ཚིག་གི་ལྷད་ཀྱིས་བསྣན་མི་དགོས་ཀྱིས་དོན་བཞིན་དུ་ཐོགས་ཤིག རྣམ་གྲངས་སུ་གཏོགས་པའི་ཚིག་རྣམས་ནི་མ་འདོམས་ན་མིང་གང་བོད་སྐད་དུ་སྤྱིར་གྲགས་ཤིང་ཚིག་ཏུ་གར་བདེ་བར་གདགས་སོ། །འདོམས་ན་སོ་སོར་བཏགས་པ་བཞིན་དུ་ཐོགས་ཤིག སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་ལ་སོགས་པ་ཞེ་ས་དང་སྐོ་ལོང་གི་ཚིག་གི་རིམ་པ་ནི་སངས་རྒྱས་ལ་ཞེ་སའི་ཚིག་ཏུ་བསྒྱུར། གཞན་ལ་ཚིག་འབྲིང་བོ་མན་ཆད་ཙམ་དུ་བྱས་ཏེ། སྔོན་ལྷ་སྲས་ཡབ་ཀྱི་སྤྱན་སྔར་མཁན་པོ་དང་ལོ་ཙཱ་བ་མཁས་པ་འཚོགས་ནས། ངྷརྨ་དཀོན་མཆོག་སྤྲིན་དང༌། ལང་ཀར་གཤེགས་པ་བསྒྱུར་ཏེ། གཏན་ལ་ཕབ་པའི་ལུགས་བཞིན་སྒྱུར་ཅིག སྐད་ཀྱི་ལུགས་འདི་ལྟར་བཀས་བཅད་པ་ལས་སོ་སོ་ནས་སུ་ཡང་འཆོས་ཤིང་འོག་ཏུ་མིང་གསར་དུ་འདོགས་སུ་མི་གནང་གིས། བསྒྱུར་བ་དང་འཆད་པའི་གྲྭ་སོ་སོ་ནས་སྐད་གསར་དུ་མིང་གདགས་དགོས་པ་ཞིག་ཡོད་ན་ཡང༌། སོ་སོའི་གྲྭ་གྲྭར་མིང་ཆད་པར་མི་གདགས་པར་ཆོས་ཀྱི་གཞུང་དང་སྒྲའི་ལུགས་ལས་ཇི་སྐད་དུ་འབྱུང་བའི་གཏན་ཚིགས་དང༌། ཆོས་ལ་ཇི་སྐད་དུ་གདགས་པ་དཔྱད་དེ། ཕོ་བྲང་དུ་བཅོམ་ལྡན་འདས་ཀྱི་རིང་ལུགས་ཀྱི་འདུན་ས་དང༌། ངྷརྨ་ཞུ་ཆེན་འཚལ་བའི་གྲྭར་ཕུལ་ལ། སྙན་དུ་ཞུས་ཏེ་བཀས་བཅད་ནས་སྐད་ཀྱི་དཀར་ཆག་གི་དཀྱུས་སུ་བསྣན་ནོ། །གསང་སྔགས་ཀྱི་རྒྱུད་རྣམས་གཞུང་གིས་གསང་བར་བྱ་བ་ཡིན་ཏེ། སྣོད་དུ་མ་གྱུར་བ་རྣམས་ལ་བཤད་ཅིང་བསྟན་དུ་ཡང་མི་རུང་ལ། བར་དུ་བསྒྱུར་ཞིང་སྤྱོད་དུ་གནང་གིས་ཀྱང༌། ལྡེམ་པོ་དག་ཏུ་བཤད་པ་མ་ཁྲོལ་ནས་སྒྲ་ཇི་བཞིན་དུ་འཛིན་ཅིང་ལོག་པར་སྤྱོད་པ་དག་ཀྱང་བྱུང༌། སྔགས་ཀྱི་རྒྱུད་ཀྱི་ནང་ནས་ཐུ་ཞིང་བོད་སྐད་དུ་བསྒྱུར་བ་དག་ཀྱང་བྱུང་ཞེས་གདགས་ཀྱི། ཕྱིན་ཆད་གཟུངས་སྔགས་དང་རྒྱུད་བླ་ནས་བཀའ་བསྩལ་ཏེ། སྒྱུར་དུ་བཅུག་པ་མ་གཏོགས་པ། སྔགས་ཀྱི་རྒྱུད་དང༌། སྔགས་ཀྱི་ཚིག་ཐུ་ཞིང་བསྒྱུར་དུ་མི་གནང་ངོ༌། །སྐད་ཀྱི་མིང་སྔོན་གཏན་ལ་མ་ཕབ་པ་དང་མིང་དུ་མ་ཐོགས་པ་ལས་ཐེག་པ་ཆེ་ཆུང་གི་གཞུང་དང་སྒྲའི་གཞུང་ལས་འབྱུང་བ་སྦྱར་ཏེ་བཤད་པའི་དང་བོའོ། །ཞེས་གསུངས་སོ།།

གོང་གི་མཆན་བུ་དག་བདག་གིས་བཏབ་པ་ཡིན་ལ། བཀས་བཅད་འདི་ལ་དཔག་ན་སྔོན་རིག་གནས་ཇི་ལྟར་དར་བ་ཤེས་པར་འགྱུར་བས། ལུང་ཚིག་འདི་དྲངས་པ་ཡིན་ནོ། །རྒྱལ་བོ་འདིས་བཀས་བཅད་གསུམ་མཛད་དེ། སྐད་གསར་བཅད་ཀྱི་བཀས་བཅད་དང༌། འདུལ་བ་ཐམས་ཅད་ཡོད་པར་སྨྲ་བའི་སྡེ་ལས་གཞན་པའི་སྡེ་བ་དག་གི་སྡེ་སྣོད་མི་བསྒྱུར་བར་བཀས་བཅད། གསང་སྔགས་མ་རྒྱུད་རྣམས་མ་བསྒྱུར་ཅིག་ཅེས་བཀས་བཅད་པ་སྟེ་གསུམ་མོ། །བྲེ་སྲང་སོགས་ཀྱང་རྒྱ་གར་ཡུལ་དབུས་འགྱུར་ཚུལ་དང་མཐུན་པར་བཅོས། བོད་འབངས་ཀྱི་ཁྲིམས་ཡིག་དང༌། ཡིག་ཚང་སོགས་ཞིག་གསོ་དང་ལེགས་བཅོས་མཛད་ཅིང༌། མངའ་ཐང་རབ་ཏུ་རྒྱས་ཏེ་ནུབ་ཕྱོགས་སྟག་གཟིག་ཚུན་ཆོད་དབང་དུ་འདུས། བོད་འབངས་རབ་ཏུ་སྐྱིད་པ་བྱུང་ཟེར་རོ།།

ལྷ་ཐོ་ཐོ་རི་ནས་རྒྱལ་བོ་འདིའི་བར་ལ་སྐྱིད་པའི་གདུང་རབས་ཕྱེད་དང་བཅུ་གསུམ་ཞེས་ཟེར། མུ་ནེ་བཙན་པོ་ཡུན་ཐུང་བས་ཕྱེད་དུ་བརྩིས། མང་སྲོང་མ་བགྲངས་པར་དེ་ལྟར་གྲགས་ལ། མེས་ཨག་ཚོམ་ནས་འདིའི་བར་ལ་ཤིན་ཏུ་སྐྱིད་པའི་གདུང་རབས་ལྔ་ཞེས་སྔ་རབས་ལ་གྲགས་སོ།།

དེ་ནས་བློན་གདུག་པ་ཅན་དབས་སྟག་རྣ་ཅན་སོགས་ཀྱིས། རྒྱལ་བོ་དང༌། བློན་བྲན་ཀ་དཔལ་ཡོན་བཀྲོངས་ནས། གླང་དར་མ་འུ་དུམ་བཙན་རྒྱལ་སར་བཞག འདི་ནི་ཆུང་དུས་ནས་གཟུགས་བ་ལང་གི་ཤ་ཚུགས་དང་འདྲ་ཞིང༌། བློ་རྟུལ་ལ་རྒྱུད་གྱོང་བས། འབངས་རྣམས་ཀྱིས་གླང་དར་མ་(གླང་ཕྲུག)ཞེས་བཏགས། མིང་དངོས་ནི། འུ་དུམ་བཙན་ཟེར། རྒྱའི་ལོ་རྒྱུས་རྒྱའི་ལོ་ཙཱ་བ་བ་ཧུ་གྱང་ཇུ་ཟེར་བས་བོད་ཡིག་ཏུ་བསྒྱུར་བ་ལས། རྒྱལ་བོ་འདི་ཆང་ལ་དགའ་ཞིང་སྤྱོད་པ་ངན་པས། བོད་ཀྱི་རྒྱལ་ཁམས་ཐམས་ཅད་འཁྲུགས། སི་ཧ་ཅེའུ་ལ་བོད་དབང་བའི་རི་བརྩིགས་ཡོད་པ་འགྱེལ། ཀླུ་ཆུ་ཞག་གསུམ་གྱེན་ལ་ལོག ལྟས་ངན་བྱུང་ཞིང་རྒྱལ་ཁམས་ཞིག་པ་ཡིན་ནོ། །ཞེས་བཤད་དོ།།

དེ་ནས་གླང་དར་ཁོ་རང་ཡང་བློ་རྨོངས་ཤིང་ཡོན་ཏན་མེད་པར་མ་ཟད། ཡོན་ཏན་ཅན་ལ་སྙིང་ནས་མི་དགའ་བས། ཆོས་བྱས་པ་བཀྲ་མི་ཤིས་ཟེར་ནས། རྨ་རིན་ཆེན་མཆོག་དང་ཉང་ཏིང་འཛིན་སོགས་ལོ་ཙཱ་བ་ཆེན་པོ་མང་བོ་བཀྲོངས། པཎྜིཏ་རྣམས་ས་མཐར་བསྐྲད་པ་དང་ལ་ལ་རང་རང་སོ་སོའི་ཡུལ་དུ་བྲོས། རབ་ཏུ་བྱུང་བ་ལ་ལ་ས་མཐར་བྲོས། མ་ཐར་བ་རྣམས་ཁྱིམ་སར་ཕབ། མི་ཉན་པ་རྣམས་བསད། ལ་ལ་ཁྲིད་ནས་རྒྱལ་བློན་རྣམས་ཀྱིས་རྟ་ལ་འབབ་འཛེག་གི་ཚེ་སྒུར་དུ་བཅུག་ནས་སྟེགས་བྱས། ལ་ལའི་ལག་ཏུ་མདའ་གཞུ་དང་རྔ་གཤང་(རི་དྭགས་དཀྲོག་བྱེད་རྔ་དང་སི་ལི)བཞག་སྟེ་རྔོན་པ་བྱེད་དུ་བཅུག ལྷ་ས་དང༌། བསམ་ཡས་བཤས་ར་བྱས། གཙུག་ལག་ཁང་མང་བོ་བཤིགས། དཔེ་ཆ་རྣམས་མེ་ལ་བསྲེགས་པ་དང་ཆུ་ལ་བསྐུར་བ་དང་ས་འོག་ཏུ་གནོན་པ་སོགས་བྱས། འབངས་རྣམས་ཀྱི་འཚོ་བའང་ཇེ་སྡུག་ཇེ་སྡུག་ལ་སོང༌། བོད་འབངས་རྣམས་སྡུག་བསྔལ་གྱི་གནས་སུ་བཅར་ཏོ།།

དེའི་ཚེ་ལྷ་ལུང་དཔལ་གྱི་རྡོ་རྗེ་ཡེར་བ་བྲག་ལྷ་རི་སྙིང་བོ་ཞེས་བྱ་བ་ན་སྒོམ་གྱིན་ཡོད་པ། ཉིན་གཅིག་སྒོམ་ཁང་ཕྱི་ལ་ཕེབས་ནས་གཟིགས་པས། བཙུན་པའི་མགོ་ལ་བྱ་སྒྲོ་བཙུགས། ལག་ཏུ་རྔ་གཤང་(རྔ་དང་སི་ལི་རི་དྭགས་སྐྲོག་བྱེད)ཐོགས་ཏེ་ལིངས་(རྒྱའམ་རྙི་) བྱེད་པ་མཐོང་བས་རྒྱལ་བོས་བསྟན་པ་བསྣུབས་ཤིང༌། འབངས་རྣམས་སྡུག་བསྔལ་བར་ཤེས་ནས་སྙིང་རྗེ་ཆེན་པོ་སྐྱེས་ཏེ། རྒྱལ་བོ་མ་བསྒྲལ་ན་འབངས་རྣམས་སྡུག་བསྔལ་གྱིས་མནར་ཞིང༌། རྒྱལ་བོ་རང་ཉིད་ཀྱང་ལས་ངན་པ་བསགས་ནས་ཕྱི་མར་དམྱལ་བར་ལྟུང་བར་འགྱུར་སྙམ་ནས། རྟ་བཞོན་མདའ་གཞུ་ཐོགས་ཏེ་རྒྱལ་བོ་གསོད་དུ་ཆས། དེའི་ཚེ་འབངས་ཆེས་མང་བོ་འདུས་ནས་ངུ་འབོད་བྱེད་ཅིང་མྱ་ངན་བྱས། རྒྱལ་བོ་ནུབ་ཕྱོགས་གླ་བའི་ཚལ་ན་མིག་མང་རྩེ་ཞིང་འདུག་པའི་ཐག་ཉེར་སོང་ནས་ངུ་འབོད་(ཁྲོམ་སྐོར་རེད)བྱས་ཏེ། རྒྱལ་བོ་ཆེན་པོ་ལགས་ཁྱེད་ཀྱིས་ཆོས་བསྣུབས་པ་སོགས་འདི་འདྲ་མཛད་པ་ཤིན་ཏུ་ནས་ཀྱང་མི་རིགས་ཏེ། ཡབ་མེས་ཀྱི་ཡིག་ཚང་དང་དཀོར་མཛོད་ཀྱི་སྒྲོམ་བུ་རྡོ་རིང་གི་ཡི་གེ་ཐམས་ཅད་ལ་གཟིགས་ཤིག་ཅེས་མགྲིན་གཅིག་ཏུ་ངུ་འབོད་ཆེན་པོ་བྱས་པའི་འུར་སྒྲ་རྒྱལ་བོས་ཐོས་ནས་སེམས་མི་བདེ་བར། རྡོ་རིང་གི་རྩར་སོང་ནས་ཡི་གེ་ཀློག་གིན་ཡོད་པའི་སྐབས། ལྷ་ལུང་དཔལ་གྱི་རྡོ་རྗེ་སླེབས་ཏེ། རྒྱལ་བོ་ལ་ཕྱག་འབུལ་ཁུལ་གྱིས་ཕུ་དུང་ནང་ནས་མདའ་གཞུ་བླངས་ཏེ་ལྕགས་ཀྱི་མདའ་འཕངས་ཏེ་རྒྱལ་བོའི་སྙིང་ཁར་ཕོག་ནས་ཚེའི་དུས་བྱས་སོ། །འདིས་རྒྱལ་སྲིད་ལོ་དྲུག་ལ་བཟུང༌། འདི་མན་ནས་བོད་སྤྱི་ལ་དབང་བའི་རྒྱལ་བོ་ཞིག་མ་བྱུང་ཟེར་རོ།།

དེའི་བུ་གནམ་ལྡེ་འོད་སྲུང་དང༌། བུ་རྫུན་མ་རེད་ཟེར་རྒྱུའི་ཁྲི་ཡུམ་བརྟན་ལྡེ་གཉིས་ཡོད་པས་མ་འཆམས་པར་ཡུམ་བརྟན་གྱིས་དབུ་རུ། འོད་སྲུང་གིས་གཡོ་རུ་བཟུང་ནས། སྲིད་ཁག་གཉིས་སུ་གྱེས། ཡབ་གླང་དར་གྱི་བྱེད་སྤྱོད་ལ་འབངས་ཁ་ལོག་པ་དང༌། ཆབ་སྲིད་དང་དཔལ་འབྱོར་གང་ཐད་ནས་ཉམས་དམས་སུ་སོང་བ་ཚོར་ནས། རྒྱལ་བློན་ཀུན་གྱིས་གྲོས་ཐོག་ནས་ཇོ་བོ་རྣམ་གཉིས་དང༌། བྱམས་པ་ཆོས་འཁོར་མ་སོགས་ཁྲི་ཐོག་ཏུ་སྤྱན་དྲངས་ནས་མཆོད་པ་བྱས། ལ་ལ་བཙུན་པ་བྱེད་ཁུལ་བྱས་ཏེ། འཆད་ཉན་གྱི་གཟུགས་བརྙན་ཙམ་རེ་བྱས། འོན་ཀྱང༌། འབངས་རྣམས་ཀྱི་སྙིང་ནད་མ་ཞི་བར་ས་གླང་ལོ་ནས་བཟུང་ཁེང་ལོག་(གྱེན་ལོག)རྣམས་རིམ་པར་བྱུང༌། དེ་ཡང༌། དང་བོར། དབས་ཁོ་བཞེར་ལེགས་སྟེང་ཟེར་བས་མགོ་ཁྲིད་དེ་མདོ་ཁམས་སྨད་ནས་ཁེང་ལོག་བྱུང༌། དེ་རྗེས་དབས་ལོ་ཕོ་ལོ་ཆུང་གིས་མགོ་ཁྲིད་དེ་དབུ་རུ་ནས་ཁེང་ལོག་བྱུང༌། དེ་རྗེས་གཡོན་རུར་ཞང་རྗེ་གསས་སྣེ་བཙན་གྱིས་དཔོན་གཡུ་སྣེ་བསད། མཆིམས་ཀོང་མི་དྲུག་གིས་མགོ་ཁྲིད་དེ་འོད་འབར་ཁེང་ལྡོག་(གྱེན་ལོག་)ཏུ་གྲགས་པ་བྱས་པ་སོགས། དེ་ནས་ཁེང་ལོག་ལོ་དགུ་བ་མེ་བྱ་ལ་ཤུད་པུ་སྟག་རྩེ་སོགས་ཀྱིས་གྲོས་བྱས་ནས་བང་སོ་(རྒྱལ་དུར་)རྣམས་བགོ་བཤའ་བྱས། གཉགས་ཀྱིས་དོན་མཁར་མདའི་བང་སོ་བྲུས། ཤུད་པུས་སེང་གེ་ཅན་གྱི་བང་སོ་བྲུས། གྲེང་འཕྱོས་ཁུས་འཕྲུལ་རྒྱལ་བང་སོ་བྲུས་པ་སོགས་ཀྱིས། བོད་རྒྱལ་གདུང་རབས་ཀྱི་བང་སོ་ཐམས་ཅད་མེད་པར་བཟོས། དེ་ནས་བོད་སིལ་བུར་འཐོར་བའི་དུས་སྐབས་བྱུང་ངོ༌།།

གླང་དར་སྐབས་བོད་ཀྱི་མཁས་པ་མི་གསུམ་མདོ་སྨད་དུ་བྱོན་ཚུལ་ནི། ཀློང་ཆེན་ཆོས་འབྱུང་ལས། འཇད་པ་གཙང་རབ་གསལ། བོ་དོང་བ་གཡོ་དགེ་འབྱུང༌། སྟོང་ལུངས་པ་དམར་ཤཱཀྱ་མུ་ནེ་དང་གསུམ། དཔལ་ཆུ་བོ་རི་ལ་སྒོམ་ཞིང་ཡོད་པའི་དུས་སུ། བཙུན་པ་ཁྱི་ཁྲིད་རྔ་གཤང་(རྔ་དང་སི་ལི་)རྡུང་ཞིང་མགོ་ལ་བྱ་སྒྲོ་བཙུགས་ཤམ་ཐབས་སྔ་ལོག་ཕྱི་ལོག་བྱས་ནས་རི་དྭགས་ལ་མདའ་འཕེན་པ་ཐབ་ཁ་བས་མཐོང་བས། མ་བྱན་(ཇ་མ་)ནས་བན་རྒན་འཁྲུལ་ལམ་བཙུན་པ་སྨྱོ་ཟེར་ཞིང་གཟིགས་པས། མཐོང་བ་བཞིན་སྨྲས་སོ། །སློབ་དཔོན་མ་འཁྲུལ་བཙུན་པ་མ་སྨྱོས། རྒྱལ་བོས་ཆོས་བསྣུབས་པའི་ལོ་རྒྱུས་ཞིབ་ཏུ་བསྙད་པས། འོ་ན་བན་དེ་འདིར་བོས་དང་གསུངས་ནས། གཏམ་དྲིས་པས། ཁྱེད་ལ་བཀའ་ཆད་ཀྱིས་མ་ཐོགས་པ་ཁ་རྗེ་ཆེ་ཟེར་ནས་ཞེས་གསུངས། རྒྱལ་རབས་གསལ་མེ་ལས་ཀྱང་འདི་བཞིན་འབྱུང༌། དེང་སང་འགའ་ཞིག་གིས། མགོ་ལ་བྱ་སྤུ་འཛུགས་པའི་རྒྱུ་མཚན་གྱིས་བོད་མ་ཡིན་ནོ་ཟེར་བ་ནི། བོད་ཀྱི་གནའ་རབས་ཀྱི་ལོ་རྒྱུས་མི་ཤེས་པར་བྱུང་རྒྱལ་དུ་སྨྲ་བའོ།།

དེ་ནས་གཙང་རབ་གསལ། གཡོ་དགེ་འབྱུང༌། དམར་ཤཱཀྱ་མུ་ནེ་གསུམ་གྱིས་འདུལ་མངོན་སོགས་ཀྱི་དཔེ་ཆ་དྲེལ་ཁལ་གཅིག་བཀལ་ནས། ཉིན་ཡིབ་མཚན་འགྲོས་ཀྱིས་བྲོས་ནས་མངའ་རིས་སྟོད་དུ་སླེབས། དེར་ཡང་སྡོད་མ་ནུས་པར་བྱང་ལམ་བརྒྱུད་ཧོར་ཡུལ་དུ་བྱོན་ནས། དགེ་བསྙེན་ཤཱཀྱ་ཤེས་རབ་ལ་བརྟེན་ཏེ་རེ་ཞིག་བཞུགས་ཀྱང་སྐད་མི་འདྲ་བས་བསྟན་པ་སྤེལ་མ་ནུས་ལ། དེ་ནས་སླར་མདོ་སྨད་དུ་ཕེབས་ནས་རྨ་ཆུ་དང་ཉེ་བའི་ས་ཆ་རྨ་ལུང་རྡོ་རྗེ་བྲག་ར་ཨན་ཆུང་གནམ་རྫོང། དན་ཏིག་ཤེལ་གྱི་ཡང་དགོན་སོགས་སུ་སྒོམ་གྱིན་བཞུགས། དེ་གསུམ་ལ་བོད་ཀྱི་མཁས་པ་མི་གསུམ་ཟེར་ཞིང་སྙན་གྲགས་བླ་རུ་འཕགས། སྐུ་གདུང་སྔར་ཟི་ལིང་དུ་བཞུགས། དེ་དག་གི་སློབ་མ་བླ་ཆེན་པོ་དགོངས་པ་རབ་གསལ་ནི། བསྟན་པའི་མེ་རོ་སྨད་ནས་གསོ་བ་བོ་ཡིན་ཞེས་སྙན་པ་དབྱར་སྐྱེས་ཀྱི་རྔ་གསང་རབ་ཏུ་ལྡིར་རོ།།

འདི་ཡན་ལ་སྔ་དར་གྱི་སྐབས་སུ་རིག་གནས་ཇི་ལྟར་དར་བའི་ཚུལ་བརྗོད་པ་ཡིན་ལ། ལོ་ཚིགས་སོགས་ལ་དེབ་ཐེར་རྣམས་མི་མཐུན་ས་རེ་ཡོད་མོད། གོང་དུ་བཤད་པ་འདི་དག་ནི་སྤྱིར་བཤད་ན་དེབ་ཐེར་རྣམས་སུ་མི་མཐུན་པ་མེད། དེབ་ཐེར་རྙིང་བའི་བཤད་ཚུལ་གྱི་ཚིག་སྦྱོར་འགའ་ཞིག་དང་བརྡ་རྙིང་འགའ་རེ་སོར་བཞག་བྱས་ཡོད། དེ་ལྟར་མ་བྱས་པར་བརྡ་རྙིང་རྣམས་གཏན་བསྐྱུར་བྱས་ན། ཕྱི་རབས་རྣམས་ཀྱིས་གཏན་ནས་མི་ཤེས་པར་འགྱུར་བས། ཅུང་ཟད་རེ་བེད་སྤྱད་ན་བཟང་སྙམ་པ་ཡིན། སྔ་དར་གྱི་མགོར་མིང་དང་ཚིག་རྣམས་ཀྱི་འབྲི་ལུགས་ལ་དེ་ཙམ་གཏན་ཁེལ་མ་བྱུང་བའི་སྟབས་ཀྱིས། འབྲི་ལུགས་ལ་སྣ་ཚོགས་ཤིག་བྱུང་བ་ཡིན་ཏེ། དཔེར་ན། སྦ་བཞེད་ལ། ས་སྦ་དང་ར་རྦ་དང༌། དཔའ་ཞེས་བྲིས་པ་ཡོད་པ་དང༌། རལ་པ་ཅན་གྱིས་བཞེངས་པའི་གཙུག་ལག་གི་ཕོ་བྲང་ཆེན་པོ་ལ། འུ་ཤང་རྡོ། འོན་ཅང་རྡོ། གཉིས་ཀ་ཡོད་པ་དང༌། གླང་དར་མིང༌། ཨུ་དུམ་བཙན། འུ་དུམ་བཙན་བྲིས་པ་སོགས་མི་འདྲ་བ་མང༌། ཕྱིས་སུ་རིག་གནས་ཕྱི་དར་སྐབས་རིམ་གྱིས་མིང་ཚིག་གི་འབྲི་ལུགས་རྣམས་གཅིག་མཐུན་བྱུང་བ་དང༌། ཁྱད་པར་དུ་རྗེ་ཡབ་སྲས་བྱོན་པའི་སྐབས་སྔ་ཕྱི་ནས། མཁས་ཆེན་མང་དུ་བྱོན་ཞིང་རྩོམ་ལུགས་ཀྱང་བརྡ་སྤྲོད་པའི་གཞུང་དང་མཐུན་ལ་བོད་ཀྱི་སྤྱི་འགྲོས་སྐད་དང་མཐུན་ཞིང༌། ཚིག་སྦྱོར་ལེགས་ལ་གོ་སླ་བ་ཤ་སྟག་བྱུང་བར་མ་ཟད། ཤིང་པར་ཡང་འབོར་ཆེན་དར་སྟབས་མིང་དང་ཚིག་གི་འབྲི་ལུགས་གཞི་རྩའི་ཐོག་ནས་གཅིག་གྱུར་གཏན་ཁེལ་བྱུང་ངོ༌།།

འོན་ཀྱང་བྲིས་ནོར་ལ་བརྟེན་མ་དག་རྒྱུན་འབྱམས་སུ་སོང་བའང་མང་སྟེ། དཔེར་ན། བུ་སྟོན་ཆོས་འབྱུང་དུ་སད་ན་ལེགས་ཀྱི་མཚན་ལ། ཁྲི་ལྡེ་སྲོང་བཙན་ཟེར་རྒྱུ་ལ། ཁྲི་ལྡེ་བཙན། ཞེས་སྲོང་ཆད་པ་དང༌། རལ་བ་ཅན་གྱི་མཚན་ལ་ཁྲི་གཙུག་ལྡེ་བཙན་ཟེར་རྒྱུ་ལ་ཁྲི་ལྡེ་སྲོང་བཙན་ཞེས་བྲིས་པ་ལྟ་བུ། འདི་ནི་ཡིག་ནོར་ཡིན་ཏེ། གོང་དུ་སྡེ་པར་ཤོག་གྲངས་དགུ་བཅུའི་ཉིན་ལ་བོད་ཀྱི་རྒྱལ་བོ་ཁྲི་གཙུག་ལྡེ་བཙན་རལ་བ་ཅན། ཞེས་ཡོད་པ་ལྟར་ཡིན་ནོ། །ཡང་གོང་དུ་རྦ་ཁྲི་བཞེར། སང་ཤི་ཏ་ཞེས་མི་གཉིས་བྱས་པ་དང༌། འོག་ཏུ། འབའ་ཁྲི་བཞེར་སང་ཤི་ཏ། ཞེས་གཅིག་བྱས་པ་ལྟ་བུས་མཚོན། ཡི་གེ་མ་དག་པ་ཡོད་ལ། ཕྱིས་སུ་འགའ་ཞིག་གིས་ཡི་གེ་དག་མ་དག་མ་དཔྱད་པར། ཀུན་མཁྱེན་བུའི་ཆོས་འབྱུང་གི་ཡིག་ནོར་ལྟར་བྲིས་པ་ཡོད། བདག་གིས་ཀྱང་སྔར་བློ་གསལ་དགའ་སྟོན་རྩོམ་དུས་མ་དཔྱད་པར། ཁྲི་ལྡེ་སྲོང་བཙན་རལ་བ་ཅན་ཞེས་བྲིས་པ་ནི་ནོར་བ་ཡིན། ཁྲི་སྲོང་ལྡེ་བཙན་གྱི་ཡབ་མེས་ཨག་ཚོམ་གྱི་མཚན་ལ། ཁྲི་ལྡེ་གཙུག་བརྟན་དང༌། ཁྲི་སྲོང་ལྡེ་བཙན་གྱི་སྲས་སད་ན་ལེགས་ཀྱི་མཚན་ལ་ཁྲི་ལྡེ་སྲོང་བཙན་དང༌། དེའི་སྲས་རལ་བ་ཅན་གྱི་མཚན་ལ་ཁྲི་ལྡེ་གཙུག་ལྡེ་བཙན་ཟེར་བ་ཡིན་ཏེ། འདི་ནི་བུ་སྟོན་ཆོས་འབྱུང༌། དེབ་དམར། དེབ་སྔོན། མཁས་པའི་དགའ་སྟོན། ས་སྐྱའི་བསྟན་པ་སྤྱིའི་ཆོས་འབྱུང༌། ཀློང་ཆེན་ཆོས་འབྱུང༌། བཀའ་གཙིགས་ཆེན་མོ། རྡོ་རིང་གི་ཡི་གེ། ཏུན་ཧོང་གི་གཏེར་ཡིག་སོགས་གཅིག་མཐུན་རེད་དོ།། །།

 

བསྟན་པ་ཕྱི་དར་གྱི་སྐབས་སུ་བོད་དུ་རིག་གནས་དར་ཚུལ།

 

བསྟན་པ་ཕྱི་དར་གྱི་སྐབས་སུ་རིག་གནས་དར་ཚུལ་བཤད་པ་ལ། སྤྱིར་སྔ་དར་དང་ཕྱི་དར་ཟེར་བ་ནི། གླང་དར་མས་དབུས་གཙང་དུ་བསྟན་པ་བསྣུབས་པའི་སྔོན་ལ་སྔ་དར་དང༌། དེས་བསྟན་པ་བསྣུབས་ནས་ལོ་བདུན་ཅུ་ཡར་མར་ཞིག་ལ། རིག་གནས་དང་ཆོས་ལ་སྦྱང་བརྩོན་བྱེད་པ་ཆེར་མེད་ལ། སྟོད་མངའ་རིས་ཀྱི་དཔོན་བཙུན་ལྷ་བླ་མ་ཡེ་ཤེས་འོད་ཀྱི་རིང་ཡར་མར་ནས་རིམ་གྱིས་རིག་པའི་གནས་དང་མདོ་རྒྱུད་ཀྱི་བསྟན་པ་ཆེས་ཆེར་དར་བ་མན་ལ་ཕྱི་དར་ཟེར། དེ་ཡང་དབུས་གཙང་དུ་ཡིན་གྱི། མདོ་ཁམས་སོགས་ས་མཐའ་དག་བོད་ཀྱི་རྒྱལ་བོ་དང་ས་ཐག་རྒྱང་གཤིས་རིག་པའི་གནས་དང་མདོ་སྔགས་ཀྱི་བཤད་པ་སོགས་ཀྱང་ནམ་དར་བ་ནས་བཟུང༌། ད་ལྟའི་བར་དུ་བར་མ་ཆད་པར་ཡོད་པ་འདི་ཡིན་སྟབས། དེའི་དུས་སུའང་མདོ་སྨད་དུ་བོད་རྒྱལ་གྱིས་གནོད་འཚེ་བྱེད་མི་ཐུབ་སྟབས། བོད་ཀྱི་མཁས་པ་མི་གསུམ་ཡང་མདོ་ཁམས་སྨད་ཀྱི་གནས་དན་ཏིག་ཏུ་བཞུགས། དེའི་སྐབས་ཙོང་ཁ་བདེ་ཁམས་སུ་མུ་ཟུ་གསར་འབར་ཞེས་བྱ་བའི་བྱིས་པ་རིག་པ་ཅན་ཞིག་འཁྲུངས་པ་ནར་སོན་ནས་ཡིག་རྩིས་སོགས་རིག་པའི་གནས་སྦྱངས་ཏེ་མཁས་པར་གྱུར། ནོན་འཇམ་དཔལ་ཞེས་བྱ་བའི་སློབ་དཔོན་ཞིག་ཡོད་པའི་མདུན་ནས་ཆོས་དང་རིག་པའི་གནས་དུ་མ་ཞིག་གསན། ཁང་རིན་ཆེན་རྡོ་རྗེ་ཞེས་བྱ་བའི་བླ་མ་སྙན་གྲགས་ཅན་ཞིག་ཡོད་པ་དེའི་མདུན་ནས་སེམས་བསྐྱེད་ཞུས། སྐྱི་རྒྱལ་བའི་གཙུག་ཏོར་ཞེས་བྱ་བའི་མཁས་པ་ཆེན་པོ་ཞིག་ཡོད་པ་དེའི་མདུན་ནས་དབུ་མ་དང་ཚད་མའི་གཞུང་སོགས་ལ་སྦྱངས། དེ་ནས་ཕྱུགས་རྫི་ཞིག་གིས་བོད་དབུས་ནས་བྱོན་པའི་སྒོམ་པ་བ་གསུམ་(མཁས་པ་མི་གསུམ)ཡོད་ཚུལ་བཤད་པས། དེར་བྱོན་ནས་མཇལ་བས་དད་པ་སྐྱེས་ཏེ་རབ་ཏུ་བྱུང༌། མཚན་དགེ་བ་རབ་གསལ་དུ་བཏགས། ཕྱིས་ཐུགས་རབ་ཤིན་ཏུ་ཆེ་བསདགོངས་པ་རབ་གསལ་ཞེས་གྲགས་སོ།།

རབ་ཏུ་བྱུང་བའི་ཕྱི་ལོར་བསྙེན་པར་རྫོགས། གྲུམ་ཡེ་ཤེས་རྒྱལ་མཚན་དང༌། སྣུབས་བྱང་ཆུབ་རྒྱལ་མཚན་སོགས་མདོ་ཁམས་པ་མང་བོ་རབ་ཏུ་བྱུང་ཞིང་བསྙེན་པར་རྫོགས་ནས་འདུལ་བ་དང་མངོན་པ་ལ་སོགས་པའི་བཤད་པ་མནོས། བླ་ཆེན་པོ་དགོངས་པ་རབ་གསལ་ཞེས་སྙན་གྲགས་ཀྱིས་བོད་ཡུལ་ཁྱབ།

དེ་ནས་མདོ་སྨད་དུ་སངས་རྒྱས་ཀྱི་བསྟན་པ་ཡོད་པའི་གཏམ་དེ་དབུས་གཙང་དུ་ཁྱབ་པས། དབུས་གཙང་ནས་མི་བཅུ་སྔ་ཕྱིར་འོངས་ཏེ་བླ་ཆེན་གྱི་མདུན་ནས་བསྙེན་པར་རྫོགས། མི་བཅུ་ནི། དབུས་ནས་ཀླུ་མེས་ཚུལ་ཁྲིམས་ཤེས་རབ། འབྲིང་ཡེ་ཤེས་ཡོན་ཏན། སྦ་ཚུལ་ཁྲིམས་བློ་གྲོས། རག་ཤི་ཚུལ་ཁྲིམས་འབྱུང་གནས། སུམ་པ་ཡེ་ཤེས་བློ་གྲོས་ཏེ་དབུས་པ་ལྔ། གཙང་གི་མགུར་མོ་རབ་ཁ་བ་ལོ་སྟོན་རྡོ་རྗེ་དབང་ཕྱུག ཤབ་སྒོ་ལྔའི་ཚོང་བཙུན་ཤེས་རབ་སེང་གེ། བོ་དོང་བ་ཨུ་བ་དེ་དཀར་བ་སྟེ་གཙང་བ་གསུམ། མངའ་རིས་པ་འོད་བརྒྱད་སྤུན་གཉིས་ཏེ་བཅུའོ། །ཀླུ་མེས་ཀྱིས་གྲུམ་ཡེ་ཤེས་རྒྱལ་མཚན་ལས་འདུལ་བ་གསན། གཞན་རྣམས་དབུས་གཙང་དུ་བྱོན། ཕྱི་ལོར་ཀླུ་མེས་ཀྱང་ཡར་བྱོན་ནས་རིམ་གྱིས་གནས་གཞི་བཟུང་ཞིང༌། དེ་བཞིན་དུ་གཞན་རྣམས་ཀྱིས་ཀྱང་གཙུག་ལག་ཁང་བརྩིགས་ཏེ་དགེ་འདུན་གྱི་སྡེ་སྤེལ། ཕྱི་ནང་གི་རིག་པའི་གནས་དག་ལ་སྦྱང་བའི་སྲོལ་དབུས་གཙང་མངའ་རིས་སོགས་སུ་ཁྱབ་པར་མཛད། བརྒྱུད་པ་འདི་ལ་སྨད་འདུལ་བ་ཞེས་གྲགས་སོ།། གཞན་ཡང་མངའ་རིས་སྟོད་དུ་ལྷ་བླ་མ་ཡེ་ཤེས་འོད་ཀྱིས་ཐོ་ལིང་གི་དཔེ་མེད་ལྷུན་འགྲུབ་གཙུག་ལག་ཁང་བཞེངས། རྒྱ་གར་ཤར་ཕྱོགས་ནས་པཎྜི་ཏ་ངྷརྨ་པཱ་ལ་དང༌། དེའི་མཁན་བུ་སཱ་དྷུ་པཱ་ལ་དང༌། གུ་ཎ་པཱ་ལ། པྲ་ཛྙཱ་པཱ་ལ་སྟེ་པཱ་ལ་རྣམ་གསུམ་དུ་གྲགས་པ་དང་བཅས་པ་སྤྱན་དྲངས་ནས་མང་བོ་བསྙེན་པར་རྫོགས། ཞང་ཞུང་བ་རྒྱལ་བའི་ཤེས་རབ་ཀྱིས་པཎྜི་ཏ་མང་བོ་བསྟེན་ཏེ། སྒྲ་དང་སྐད་སོགས་རིག་པའི་གནས་མང་བོ་ལ་སྦྱངས་ནས་མཁས་པ་ཆེན་པོར་གྱུར་བ་དེས་ངྷརྨ་པཱ་ལའི་མདུན་ནས་འདུལ་བ་བསླབས། པྲ་ཛྙཱ་པཱ་ལ་ལས་བསྙེན་པར་རྫོགས། ཕྱིས་སུ་ཡང་ཁོང༌། ནེ་པ་ལ་སྟེ་བལ་ཡུལ་དུ་ཕེབས་ནས་འདུལ་འཛིན་བྲེ་ཏ་ཀ་ར་ལས་འདུལ་བའི་ལག་ལེན་ཐམས་ཅད་བསླབས་ཤིང༌། ཁ་ཆེ་ཛྙཱ་ན་ཤྲཱི་དང༌། ཁ་ཆེ་པཎ་ཆེན་དུ་གྲགས་པཤྲཱི་སུ་ཏི་ཤནྟི་དང༌། ས་མནྟ་ཤྲཱི་ཛྙཱ་ན་དང༌། ན་ར་མ་དེ་ཝ་རྣམས་ལས་ཀྱང་འདུལ་བ་གསན་ནས་སྤེལ་བ་ལ་སྟོད་འདུལ་བ་ཞེས་གྲགས་སོ།།

གཞན་ཡང་མངའ་རིས་ཀྱི་ལྷ་བླ་མ་ཡེ་ཤེས་འོད་ཀྱིས་རིན་ཆེན་བཟང་བོ་ལ་སོགས་པའི་བྱིས་པ་ཉི་ཤུ་རྩ་གཅིག་རྒྱ་གར་དུ་སློབ་གཉེར་ལ་བཏང་བ་ལས། རིན་ཆེན་བཟང་བོ་དང་ལེགས་པའི་ཤེས་རབ། ལོ་ཆུང་གྲགས་འབྱོར་གསུམ་མ་གཏོགས་གཞན་རྣམས་ས་མ་ཐུབ་པས་ཤི། ལོ་ཙཱ་བ་རིན་ཆེན་བཟང་བོ་ནི་མེ་མཁའ་རྒྱ་མཚོའི་འདས་ལོ་༢༢༤ས་རྟ་ལོ་(༩༥༨)ལ་འཁྲུངས། ཁོང་ཁ་ཆེར་ལན་གསུམ་བྱོན། པཎྜི་ཏ་བདུན་ཅུ་རྩ་ལྔ་བསྟེན། སྔགས་མཚན་ཉིད་ཀྱི་གཞུང་ལུགས་མང་བོ་ལ་སྦྱངས། མཁྱེན་རབ་ཤིན་ཏུ་ཆེ་བས་མདོ་སྔགས་ཀྱི་ཆོས་མང་བོ་བསྒྱུར། འདི་ནས་བཟུང་སྟེ་བསྒྱུར་བའི་སྔགས་ལ་གསང་སྔགས་གསར་མ་ཟེར། གནས་གཞི་དང་གཙུག་ལག་ཁང་མང་དུ་བཞེངས། གུར་ཤིང་བརྩོན་འགྲུས་ལ་སོགས་པའི་སློབ་མ་མཁས་གྲུབ་མང་བོ་དང༌། ཞུ་ཆེན་ཕེར་བའི་ལོ་ཙཱ་བ་ཡང་བཅུ་ལྷག་བྱུང༌། ཁོང་དགུང་ལོ་གྱ་ལྔ་བཞེས་པའི་དུས། ཇོ་བོ་རྗེ་བོད་དུ་བྱོན། སྤྱིར་ལོ་ཆེན་འདིའི་ཕྱག་རྗེས་གཞན་ལས་ཆེ། དགུང་ལོ་གོ་བརྒྱད་ཐོག་སྐུ་མྱ་ངན་ལས་འདས་སོ། །ལོ་ཆེན་གྱི་སློབ་མ་མཁས་ཆེན་མང་བོ་བྱུང་བ་རྣམས་ཀྱིས་གཞུང་ལུགས་མང་བོ་བསྒྱུར། ཁྱད་པར་དུ་རྨ་དགེ་བའི་བློ་གྲོས་ཀྱིས་ཚད་མ་རྣམ་འགྲེལ་དང༌། དེའི་རང་འགྲེལ་དང༌། ལྷ་དབང་བློའི་འགྲེལ་བ་དང༌། ཤཱཀྱ་བློའི་འགྲེལ་བཤད་ལ་སོགས་པ་མང་དུ་བསྒྱུར་ཅིང༌། འཆད་ཉན་གྱིས་གཏན་ལ་ཕབ། དེ་ལས་མཆེད་ནས་དབུས་གཙང་གི་ཕྱོགས་སུ་ཚད་མའི་འཆད་ཉན་བྱུང་ཞིང༌། དེའི་ཚེ་ཁྱུང་བོ་གྲགས་སེ་ཞེས་བྱ་བ་མཁས་པར་གྲགས་པ་དེས་ཚད་མའི་བཤད་པ་མང་དུ་མཛད། ལོ་དག་ལ་ཚད་མ་རྙིང་མ་ཞེས་ཟེར། ཕྱིས་ལོ་ཙཱ་བ་བློ་ལྡན་ཤེས་རབ་ནས་ཚད་མ་གསར་མར་གྲགས་པ་རྣམས་བྱུང་བར་གྲགས་ལ་ཁྱུང་བོ་དེ་བོ་ཏོ་བ་དང་དུས་མཚུངས་པར་སྣང་གསུངས་སོ།།

ཡང་ལྷ་བླ་མ་ཡེ་ཤེས་འོད་ཀྱི་དུས་སུ་པཎྜི་ཏ་སྨྲྀ་ཏི་དང་ཕྲ་ལ་རིང་བ་བྱ་བ་གཉིས་བལ་བོ་པད་མ་རུ་རྩེ་བ་ཞེས་བྱ་བའི་ལོ་ཙཱ་བ་དེས་གདན་དྲངས་འོངས་པས། ལོ་ཙཱ་བ་བལ་བོར་ཕོ་ལོག་གིས་ཤི་སྟེ། པཎྜི་ཏ་གཉིས་པོས་བོད་སྐད་མི་ཤེས་པས་དབུས་གཙང་ན་མར་འཁྱམས་ཏེ། སྨྲྀ་ཏིས་རྟ་ནག་ཏུ་ལུག་རྫི་མཛད། ཕྱིས་དཔྱལ་སེ་ཙ་བསོད་ནམས་རྒྱལ་མཚན་གྱིས་སྨན་ལུང་དུ་སྤྱན་དྲངས་ཏེ་ཆོས་ཞུས། ཁམས་སུ་བྱོན་ནས་འདན་ཀློང་ཐང་དུ་མངོན་པ་མཛོད་ཀྱི་བཤད་པ་བཙུགས། ཕྱིས་བོད་སྐད་མཁས་པར་མཁྱེན་ཏེ། གདན་བཞི་དང་འཇམ་དཔལ་གསང་ལྡན་ལ་སོགས་པ་འགྱུར་མང་བོ་མཛད། ཕྱིས་ལིང་ཆུ་གསེར་ཁབ་ཏུ་བྱོན་ཏེ་སྨྲ་སྒོ་མཚོན་ཆ་ཞེས་བྱ་བའི་བརྡ་སྤྲོད་པའི་གཞུང་དེ་བརྩམས། ལོ་ཙཱ་བ་རིན་ཆེན་བཟང་བོ་དགུང་ལོ་ལྔ་བཅུར་ཉེ་བའི་སྐབས་སུ་འབྲོག་མི་དང་སྟག་ལོ་གཞོན་ནུ་བརྩོན་འགྲུས་གཉིས་རྒྱ་གར་དུ་ཆས། དེ་གཉིས་ཀྱིས་བོད་དུ་བི་ཝར་ཏ་ལ་ཅུང་ཟད་ཀྱང་བསླབས། བལ་བོར་ལོ་གཅིག་བཞུགས་ནས་ཤཱནྟི་བའི་སློབ་མ་བལ་བོའི་པཎྜི་ཏ་ཤཱནྟི་བྷ་དྲ་ལས་སྐད་ལེགས་པར་བསླབས། ཁོང་གིས་ཞལ་བརྡ་མཛད་པ་བཞིན་བི་ཀྲ་མ་ལ་ཤཱི་ལའི་མཁས་པ་སྒོ་དྲུག ཤར་ན་ཤཱནྟི་བ། ལྷོ་ན་ངག་གི་དབང་ཕྱུག་གྲགས་པ། ནུབ་ན་ཤེས་རབ་འབྱུང་གནས་བློ་གྲོས། བྱང་ན་ནཱ་རོ་པཎ་ཆེན། དབུས་ན་རིན་ཆེན་རྡོ་རྗེ་དང༌། ཛྙཱ་ན་ཤྲཱི་རྣམས་བཞུགས་པ་ལས། ཤཱནྟི་བ་ལ་གཏུགས་ཤིང་སྟག་ལོ་རྡོ་རྗེ་གདན་དུ་སྐོར་བ་བྱེད་ཅིང་བཞུགས་ཏེ། སློབ་གཉེར་ཆེར་མ་བྱས། འབྲོག་མིས་པཎྜི་ཏ་མང་བོའི་མདུན་ནས་གཞུང་ལུགས་མང་བོར་སྦྱངས། ལྷོ་བལ་དུ་ལོ་བཅུ་གསུམ་ལ་སློབ་གཉེར་བྱས་ཏེ་སླར་བོད་དུ་ཕེབས། མཁས་པ་ཆེན་པོར་གྱུར་ཡོད་པས་འཆད་སྤེལ་གྱིས་སློབ་མ་ཤིན་ཏུ་མང་བོ་བསྐྱངས་པ་ནི་ས་སྐྱ་འདེབས་པ་བོ་འཁོན་དཀོན་མཆོག་རྒྱལ་བོ་སོགས་སོ།། (ཇོ་བོ་བོད་དུ་ཕེབས་དུས་འབྲོག་མི་ལོ་ལྔ་བཅུ) མངའ་རིས་ཀྱི་རྗེ་བོ་ལྷ་བླ་མ་ཡེ་ཤེས་འོད་དང་བྱང་ཆུབ་འོད་ཀྱི་རིང་ལ་རྒྱ་གར་ནས་པཎྜི་ཏ་མང་བོ་སྤྱན་དྲངས་ཀྱང་བསྟན་པ་སྤྱི་ལ་དག་ཐེར་མཐའ་ཆོད་པ་ཞིག་བྱེད་མཁན་མ་བྱུང་བས། ལོ་ཙཱ་བ་རྒྱ་བརྩོན་སེང་སོགས་མི་ལྔ་རྒྱ་གར་དུ་མངགས་ནས་བི་ཀྲ་མ་ལ་ཤཱི་ལའི་པཎྜི་ཏ་ཆེན་པོ་ཇོ་བོ་རྗེ་དཔལ་ལྡན་ཨ་ཏི་ཤ་མཚན་དངོས་མར་མེ་མཛད་དཔལ་ཡེ་ཤེས་བྱ་བ་སྤྱན་དྲངས། ཁོང་ནི་རྒྱ་གར་ཤར་ཕྱོགས་བྷང་ག་ལའི་ཡུལ་གྱི་ཟ་ཧོར་རྒྱལ་བོའི་སྲས་སུ་རབ་བྱུང་གོང་གི་ཆུ་རྟ་(༩༨༢)ལ་འཁྲུངས། དགུང་ལོ་ཉེར་གཅིག་ཚུན་ལ་ཐུན་མོང་གི་རིག་གནས་སྒྲ་ཚད་བཟོ་གསོ་ལ་མཁས་པར་གྱུར་ནས་ལོ་བཅོ་ལྔའི་དུས་རྟོག་གེ་བ་མཁས་པ་ཞིག་ཀྱང་རྩོད་པས་ཚར་བཅད། དེ་རྗེས་རྒྱལ་སྲིད་སྤངས་ནས་མདོ་སྔགས་ཀྱི་གཞུང་ལ་སྦྱངས། རབ་ཏུ་བྱུང་སྟེ་བསྙེན་པར་རྫོགས། གསེར་གླིང་བ་སོགས་བླ་མ་མང་བོ་བསྟེན། སྙན་གྲགས་ཀྱིས་འཛམ་གླིང་ཁྱབ་པ་དེ་ཉིད་ལྷ་བླ་མ་བྱང་ཆུབ་འོད་ཀྱི་རིང་ལ་ནག་ཚོ་ལོ་ཙཱ་བ་ཉེར་བདུན་ཐོག་སླར་རྒྱ་གར་དུ་མངགས་ཏེ་སྤྱན་དྲངས། བྱང་ཆུབ་འོད་ཀྱིས་བསྐུལ་ངོར་ཆོས་མཛད་ཡོངས་ཀྱི་ལམ་ཡིག་ལྟ་བུའི་བྱང་ཆུབ་ལམ་གྱི་སྒྲོན་མ་མཛད། ཁུ་རྔོག་འབྲོམ་གསུམ་སོགས་སློབ་མ་ཤིན་ཏུ་མང་བོ་བསྐྱངས། གསུང་རྩོམ་ཀྱང་སྨན་དཔྱད་འཚོ་བའི་སྙིང་བོ་དང་དྲི་མ་མེད་པའི་ཕྲིན་ཡིག ས་ད་པྱད་ལས་རྣམ་འབྱེད། ལམ་སྒྲོན་དཀའ་འགྲེལ། དབུ་མའི་མན་ངག་སོགས་མང་བོ་བརྩམས། དགུང་ལོ་དོན་གསུམ་ཐོག་སྙེ་ཐང་དུ་གཤེགས་ཏེ་སྐུ་གདུང་དེ་གར་བཞུགས། ཇོ་བོ་ལ་བརྟེན་ནས་ལོ་ཆེན་དང་ལོ་ཆུང་གྲགས་འབྱོར་ཤེས་རབ། ནག་ཚོ་ལོ་ཙཱ་བ། ཤཱཀྱ་འོད། ཡོལ་ལྕགས་རྡོ་རྗེ་དབང་ཕྱུག དགེ་བློ་སོགས་ཀྱིས་གཞུང་ལུགས་མང་བོ་བསྒྱུར་ཏོ། །ཇོ་བོ་རྗེའི་སློབ་མ་གྲགས་ཆེ་བ་ནི། གཙང་ན་འགར་འགོས་ཡོལ་གསུམ། དབུས་ན་ཁུ་རྔོག་འབྲོག་གསུམ་ཟེར། གཙོ་བོ་འབྲོམ་སྟོན་པ་ནི་རྟེན་དགེ་བསྙེན་ཡིན་ལ་རབ་བྱུང་གོང་གི་ཤིང་འབྲུག་(༡༠༠༤)ལ་འཁྲུངས། དགུང་ལོ་བཅུ་དགུའི་ཐོག་ཁམས་འདན་མར་བྱོན་ནས་ཇོ་བོ་སེ་བཙུན་དབང་ཕྱུག་གཞོན་ནུ་ཞེས་པ་ལོ་ཉི་ཤུར་བསྟེན་ནས་གཞུང་ལུགས་མང་བོར་སྦྱངས་ཤིང༌། པཎྜི་ཏ་སྒྲའི་ཚེར་མ་(སྨྲ་སྒོ་རྩོམ་པ་བོ་སྨྲྀ་ཏིའི་མཚན་གཞན)ལས་བི་ཝར་ཏ་སོགས་དང་སྒྲ་ལ་སྦྱངས། འདི་བ་ལོ་སོ་དགུའི་ཐོག་ཇོ་བོ་བོད་དུ་ཕེབས་ཟེར། ལོ་ཞེ་གཅིག་གི་སྟེང་ཇོ་བོ་དང་མཇལ། ལོ་བཅུ་གཅིག་གི་བར་དུ་བསྟེན་ཏེ་ཇོ་བོའི་གདམས་པ་མ་ལུས་པ་བུམ་པ་གང་བྱོའི་ཚུལ་དུ་གསན་ནས་ཇོ་བོའི་ཡོན་ཏན་ཐམས་ཅད་རྫོགས་པར་མཁྱེན་པའི་མཁས་པ་ཆེན་པོར་གྱུར། དགུང་གྲངས་ང་བཞིའི་ཐོག རྭ་སྒྲེང་དགོན་བཏབ་སྟེ་སློབ་མ་མང་བོ་བསྐྱངས་པས་བཀའ་གདམས་སྐུ་མཆེད་གསུམ་སོགས་མཁས་པ་ཤིན་ཏུ་མང་བོ་བྱུང་སྟེ་ཇོ་བོ་བཀའ་གདམས་པ་ཞེས་བྱ་བའི་གྲུབ་མཐའ་དེ་བྱུང༌། རེ་གཅིག་ཐོག་རབ་བྱུང་དང་བོའི་ཤིང་འབྲུག་(༡༠༦༤) ལོར་འདས་སོ།། ཇོ་བོའི་སློབ་མ་ཁུ་སྟོན་བརྩོན་འགྲུས་གཡུང་དྲུང་གིས་ཀྱང་ཐང་བོ་ཆེར་བཞུགས་ནས་སློབ་མ་ཤིན་ཏུ་མང་བོ་བསྐྱངས། རྔོག་ལེགས་པའི་ཤེས་རབ་ཀྱིས་གསང་ཕུ་ནེའུ་ཐོག་གི་དགོན་པ་བཏབ། དེའི་དབོན་པོའམ་ཚ་བུ་ནི་རྔོག་ལོ་བློ་ལྡན་ཤེས་རབ་བོ། །ཇོ་བོའི་སློབ་མ་གཙང་སྨད་རྟ་ནག་གི་འགོས་ལོ་ཙཱ་བ་འགོས་ཁུག་པ་ལྷས་བཙས་ཞེས་གྲགས་པ་དེ་དང་བོར་འབྲོག་མི་དང་ཟུར་ཆེན་ལ་གཏུགས་ཤིང་ཐུགས་ཚིམ་པ་ཞིག་མ་བྱུང་བས་རྒྱ་བལ་དུ་ལན་བཅུ་གཉིས་བྱོན། ལོ་མང་བོར་བཞུགས། པཎྜི་ཏ་བདུན་ཅུ་རྩ་གཉིས་བསྟེན་ཏེ་གདམས་པ་མང་བོ་གསན་ནས་བོད་དུ་བྱོན་ཏེ་འདུས་པ་སོགས་དར་བར་མཛད། སློབ་མ་མདར་སེང་རྒྱན་སོགས་དྲུག སྟོད་ལུང་གནམ་གྱི་རྫིང་ཁ་བ་དང་ཡོལ་མཆེད་གསུམ་སོགས་མང་ལ། ས་སྐྱ་བ་འཁོན་དཀོན་མཆོག་རྒྱལ་བོས་ཀྱང་བླ་མར་བསྟེན་ཏེ་འདུས་པའི་སྐོར་སོགས་གསན་ནོ། །བྱང་ཆུབ་འོད་ཀྱི་སྤུན་ཟླ་མངའ་བདག་འོད་སྡེས་པཎྜི་ཏ་སུཎྱ་ཤྲཱི་སྤྱན་དྲངས། དེའི་སྲས་རྩེ་ལྡེས་ཁ་ཆེ་ཛྙཱ་ན་ཤྲཱི་སྤྱན་དྲངས་ཏེ། ཁྱུང་བོ་ཆོས་བརྩོན་གྱིས་ལོ་ཙཱ་བྱས་ནས། ཚད་མ་རྣམ་ངེས། དེའི་ཊཱིཀ་ཁོང་ཉིད་ཀྱི་མཛད་པ་ལ་སོགས་པ་མང་བོ་བསྒྱུར། གཞན་ཡང་ཙནྡྲ་རཱ་ཧུ་ལ་སྤྱན་དྲངས་ཏེ་ལོ་ཙཱ་བ་ཏིང་ངེ་འཛིན་བཟང་བོས་ཚད་མ་ཀུན་ལས་བཏུས་པ་ལ་སོགས་བསྒྱུར། གྱི་ཇོ་ཟླ་བའི་འོད་ཟེར་གྱིས་ཀྱང་དུས་འཁོར་སོགས་མང་བོ་བསྒྱུར། ལྷོ་བྲག་མར་བ་ཆོས་ཀྱི་བློ་གྲོས་རྒྱ་གར་དུ་ལན་གསུམ་ཕེབས་ཏེ་ནཱ་རོ། མཻ་ཏྲི། ཞི་བ་བཟང་བོ། ཕམ་ཐིང་བ་སོགས་བསྟེན་ནས་མན་ངག་མང་བོ་ཞུས་ཤིང་བསྒྱུར་བས་སློབ་མ་ཀ་ཆེན་བཞི་སོགས་བྱུང་བ་གྲགས་ཆེ། འདི་བ་རབ་བྱུང་དང་བོའི་གོང་གི་ཤིང་བྱི་(༡༠༢༤)ལོར་འཁྲུངས། ཟངས་དཀར་ལོ་ཙཱ་བ་འཕགས་པ་ཤེས་རབ་ཀྱིས་ཀྱང་པཎྜི་ཏ་ཁ་ཆེ་དགོན་པ་བ་དང༌། ཏེ་ཛ་དེ་བ། པ་ར་ཧི་ཏ་བྷ་དྲ་ལ་སོགས་པ་བསྟེན་ནས་སྤྱོད་འཇུག་གི་འགྲེལ་ཆེན་དང་ཡོ་ག་སོགས་མང་བོ་བསྒྱུར། གཉན་དར་མ་གྲགས་རྒྱ་གར་དུ་ལོ་བཅུ་གཉིས་བཞུགས་ཏེ་པཎྜི་ཏ་མ་ཏི་བསྟེན། པཎྜི་ཏ་སུཎྱ་ཤྲཱི་སྤྱན་དྲངས་ཏེ་སྤྱོད་འཇུག་འགྲེལ་ཆེན་དང་སྒྲོལ་མ་སོགས་བསྒྱུར། ཁྱེའུ་གད་པ་འཁོར་ལོ་གྲགས་དང༌། སྤང་ཞོ་གསལ་བ་གྲགས། རྩོད་ཀ་མི་ཉག རྩ་མི་སངས་རྒྱས་གྲགས་རྣམས་ཀྱིས་པཎྜི་ཏ་ཨ་བྷ་ཡ་ཀཱ་ར་བསྟེན་ནས་དུས་འཁོར་ཕྲེང་བ་སྐོར་གསུམ། ཐུབ་པ་དགོངས་རྒྱན། མན་ངག་སྙེ་མ་ལ་སོགས་པ་བསྒྱུར། ཀྲེ་བོ་ལོ་ཙཱ་བ་ཤེས་རབ་དཔལ་གྱིས་ཀྱང་ཨ་བྷ་ཡ་ཀཱ་ར་བསྟེན་ནས་གནད་ཀྱི་ཟླ་ཟེར་ལ་སོགས་པ་བསྒྱུར། བ་རི་ལོ་ཙཱ་བ་རིན་ཆེན་གྲགས་ཀྱིས་པཎྜི་ཏ་དོན་ཡོད་རྡོ་རྗེ་སྤྱན་དྲངས་ཏེ་དོན་ཞགས་ལ་སོགས་པ་བསྒྱུར། ཀློག་སྐྱ་ཤེས་རབ་གྲགས་ཀྱིས་མཚན་བརྗོད་དང་དབུ་མ་འཇུག་པ་སོགས་བསྒྱུར་རོ།།

པ་ཚབ་ལོ་ཙཱ་བ་ཉི་མ་གྲགས་ཁ་ཆེར་ཕེབས་ནས་ལོ་ཉི་ཤུ་རྩ་གསུམ་ལ་གཞུང་ལུགས་མཐའ་དག་ལ་སྦྱངས། བོད་དུ་ཕེབས་ནས་པཎྜིཏ་ཀ་ན་ཀ་ཝརྨ་སྤྱན་དྲངས་ནས་དབུ་མའི་སྐོར་རྣམས་བསྒྱུར། བཤད་པ་རྒྱ་ཆེར་མཛད་པས་སློབ་མ་པ་ཚབ་བུ་བཞི་ལ་སོགས་པ་བྱུང་ངོ༌།།

འབྲོ་ལོ་ཙཱ་བ་ཤེས་རབ་གྲགས་ཁ་ཆེར་བྱོན་ཏེ་སློབ་གཉེར་མཛད། པཎྜི་ཏ་ཟླ་བ་མགོན་པོ་སྤྱན་དྲངས་ཏེ་དུས་འཁོར་ཆ་ལག་རྒྱས་པ་དང༌། རྡོ་རྗེ་སྙིང་འགྲེལ། ཕྱག་རྡོར་སྟོད་འགྲེལ་ལ་སོགས་པ་བསྒྱུར། བ་རེག་ཐོས་པ་དགའ། རྨ་བན་ཆོས་འབར། མཚུར་ལོ་ཙཱ་བ་རྣམས་ཀྱིས་རྒྱ་གར་ཕྱག་ན་རྡོ་རྗེ་བསྟེན་ནས་ཆོས་མང་བོ་བསྒྱུར། དཔྱལ་ལོ་ཙཱ་བ་ཀུན་དགའ་རྡོ་རྗེས་བལ་བོ་ཧང་དུ་དཀར་བོ་བསྟེན། པཎྜི་ཏ་སྟོང་ཉིད་ཏིང་ངེ་འཛིན་སྤྱན་དྲངས་ཏེ་མན་ངག་མང་བོ་ཞུས་སོ། །རྭ་རྡོ་རྗེ་གྲགས་ཀྱིས་བལ་བོ་བྷ་རོ་བསྟེན། བལ་བོ་ཐུགས་རྗེ་ཆེན་པོ་ཡང་སྤྱན་དྲངས་ཏེ་གཤེད་སྐོར་དང་ཧེ་རུ་ཀ་མངོན་འབྱུང་གི་སྐོར་སོགས་བསྒྱུར། དེའི་དབོན་པོ་ཆོས་རབ་ཀྱིས་པཎྜི་ཏ་ས་མནྟ་ཤྲཱི་སྤྱན་དྲངས་ཏེ་དུས་འཁོར་སོགས་བསྒྱུར། ཞང་ཤེས་རབ་བླ་མས་པཎྜི་ཏ་ཨ་མོ་གྷ་བཛྲ་སྤྱན་དྲངས་ཏེ་ཆོས་མང་བོ་བསྒྱུར། རྒྱུས་ལོ་ཙཱ་བ་སྨོན་ལམ་གྲགས་ཀྱིས་པཎྜིཏ་གཞན་ལ་ཕན་པ་བསྟེན་ཏེ་སྡོམ་འབྱུང་སོགས་བསྒྱུར། ལོ་ཙཱ་བ་ཞ་མ་སེང་རྒྱལ་གྱིས་པཎྜིཏ་ནོར་བཟང་སྲུང་བ་ལ་སོགས་པ་བསྟེན་ནས་ཚད་མ་ཀུན་ལས་བཏུས་པ་རྩ་འགྲེལ་སོགས་བསྒྱུར་རོ།།

རྔོག་ལེགས་པའི་ཤེས་རབ་ཀྱི་དབོན་པོ་རྔོག་ལོ་ཙཱ་བ་བློ་ལྡན་ཤེས་རབ་ནི། ལོ་ཆེན་རིན་ཆེན་བཟང་བོ་ལོ་ལྔ་བཅུ་རྩ་བཞིའི་ཐོག་ནག་ཚོ་ལོ་ཙཱ་བ་འཁྲུངས། ནག་ཚོ་ལོ་བཞི་བཅུ་ཞེ་དགུའི་ཐོག་(༡༠༥༩)རྔོག་ལོ་བློ་ལྡན་ཤེས་རབ་འཁྲུངས་པ་ཡིན་གསུངས། ཁོང་གཞོན་ནུའི་དུས་ནས་ཁུ་བོ་ལེགས་པའི་ཤེས་རབ་ཀྱི་དྲུང་ནས་ཡོན་ཏན་ལ་སྦྱངས། ཁོང་ཤེས་རབ་མཆོག་ཏུ་གྱུར་པ་དེ་ལ་ཁུ་བོ་མཉེས་ནས་ལོ་བཅུ་བདུན་ལོན་ཚེ་ཁ་ཆེར་སློབ་གཉེར་ལ་བརྫངས། དེའི་ཚེ་རྭ་ལོ། གཉན་ལོ། ཁྱུང་བོ་ཆོས་བརྩོན། རྔོ་སྟོན། བཙན་ཁ་བོ་ཆེ་རྣམས་དང་འགྲོགས་ནས་ཁ་ཆེར་བྱོན། པཎྜི་ཏ་དྲུག་ཙམ་བསྟེན་ནས་སློབ་གཉེར་གནང༌། བར་སྐབས་སུ་རྒྱགས་ཆད་ནས་མངའ་རིས་སུ་གསེར་སློང་བའི་ཡི་གེ་བཏང༌། རྩེ་ལྡེའི་སྲས་དབང་ལྡེས་གསེར་མང་བོ་བསྐུར། ཚད་མ་རྒྱན་སྒྱུར་ཅིག་ཅེས་བསྐུལ་བས་པཎྜི་ཏ་སྐལ་ལྡན་རྒྱལ་བོ་དང་ཁོང་གཉིས་ཀྱིས་ལེགས་པར་བསྒྱུར། ཁ་ཆེར་ལོ་བཅུ་བདུན་དུ་ཡང་དག་པར་སྦྱངས་ནས་སླར་བོད་དུ་ཕེབས། བོད་དུ་ཡངཔཎྜི་ཏ་འབུམ་ཕྲག་གསུམ་པ་དང་སུ་མ་ཏི་ཀཱིརྟིཿགཉིས་ལ་ཡང་ཆོས་གསན་ཞིང༌། ཡང་བལ་བོར་བྱོན་ཏེ། ཨ་ཏུ་ལྱ་བཛྲ་དང་བ་རེན་དྲ་རུ་ཙི་ལ་སོགས་པ་ལ་གདམས་པ་མང་བོ་གསན། སླར་བོད་དུ་བྱོན། འགྱུར་མང་བོ་མཛད་པ་ཡང་དག་ཅིང་ཤིན་ཏུ་བཟང༌། འགྱུར་མཛད་པའི་ཚད་ནི་གྲོ་ལུང་བའི་གསུང་ལས། དམ་ཆོས་བསྒྱུར་ལ་མངའ་བརྙེས་པས། །རྒྱལ་ཡུམ་གཉིས་དང་བསྟན་བཅོས་གཞུང༌། །འབུམ་ཕྲག་གཅིག་དང་ཁྲི་ཕྲག་གསུམ། །སྟོང་ཕྲག་བདུན་ནི་ལྷག་བཅས་བསྒྱུར། །ཞེས་པ་ལྟར་རོ། །ཚད་མ། བྱམས་ཆོས། དབུ་མ་སོགས་ཀྱི་རྣམ་བཤད་སོགས་གསུང་རྩོམ་མང༌། སློབ་མ་བུ་ཆེན་བཞི་སོགས་ཤིན་ཏུ་མང༌། བུ་ཆེན་བཞི་ནི། ཞིང་ཚེ་སྤོང་བ་ཆོས་ཀྱི་བླ་མ། ཞིང་གྲོ་ལུང་བ་བློ་གྲོས་འབྱུང་གནས། ཁྱུང་རིན་ཆེན་གྲགས། འབྲི་ཤེས་རབ་འབར་བཞིའོ།།

གྲོ་ལུང་བ་བློ་གྲོས་འབྱུང་གནས་ཀྱི་སློབ་མ་ཆ་བ་ཆོས་ཀྱི་སེང་གེ་ནི་རབ་བྱུང་གཉིས་པའི་ཆུ་མོ་ལུག་(༡༡༠༩)ལ་འཁྲུངས། ཁྱུང་རིན་གྲགས་ཀྱི་སློབ་མ་རྒྱ་དམར་བ་དང་གྲོ་ལུང་བ་ཆེན་པོ་ལ་སོགས་པ་བླ་མ་དུ་མ་བསྟེན། ལུང་རིགས་ཀྱིས་སྒྲོ་འདོགས་བཅད། གཙང་ནེའུ་ཐོག་གི་གདན་ས་ལོ་བཅོ་བརྒྱད་ཀྱི་བར་དུ་མཛད། ཚད་མ་རྣམ་ངེས་ལ་སོགས་པའི་གཞུང་མང་བོ་ལ་འགྲེལ་པ་བརྩམས། མདོ་སྡེ་བའི་རིགས་པ་ལ་བསྟེན་པའི་བསྡུས་གྲྭ་ཞེས་པའི་རིགས་ལམ་གྱི་སྲོལ་འབྱེད་པ་བོ་ཡང་སློབ་དཔོན་འདི་ཡབ་སྲས་ཡིན་ཟེར། ཚད་མའི་བསྡུས་པ་ཡིད་ཀྱི་མུན་སེལ་རྩ་འགྲེལ་ལ་སོགས་པའི་རང་གཞུང་མང་དུ་བརྩམས། སྙན་གྲགས་ཀྱི་གདུགས་དཀར་བོ་བླ་ན་འཁོར་བ་དེའི་སྲས་ཀྱི་གཙོ་བོ་སེང་ཆེན་བརྒྱད་དུ་གྲགས་པ་ནི། གཙང་ནག་པ་བརྩོན་འགྲུས་སེང་གེ། དན་འབག་པ་སྨྲ་བའི་སེང་གེ། འབྲུ་ཤ་བསོད་ནམས་སེང་གེ། རྨ་བྱ་རྩོད་པའི་སེང་གེ། རྩགས་དབང་ཕྱུག་སེང་གེ། ཉིང་བྲན་ཆོས་ཀྱི་སེང་གེ། ལྡན་མ་དཀོན་མཆོག་སེང་གེ། གཉལ་བ་ཡོན་ཏན་སེང་གེ་སྟེ་བརྒྱད། འཁོན་ཇོ་སྲས(ས་སྐྱ་དཀར་བོ་རྣམ་གསུམ་གྱི་གཉིས་པ་ས་སྐྱ་སློབ་དཔོན་བསོད་ནམས་རྩེ་མོ་ཡིན་ལ་ཁོང་གཙང་ནེའུ་ཐོག་གི་གྲྭ་སར་ལོ་བཅུ་གཅིག་ལ་བཞུགས་གསུངས)། རྔོག་ཇོ་སྲས་ར་མོ། ཁུ་ཇོ་སྲས་ནེ་ཙོ། གཉོས་ཇོ་སྲས་དཔལ་ལེ་དང་བཞི་ལ་ཇོ་སྲས་(ཇོ་སྲས་རྣམས་གོས་སྦུ་གུ་ཅན་དེ་རབ་བྱུང་མིན་འདུག)བཞི་ཟེར། འགར་བ་དབང་གྲུབ། ཀོང་བོ་འཇག་ཆུང༌། ལྷོ་བ་སྒོག་ཟན། བར་ཕུ་བ་དང་བཞི་ལ་ཤེས་རབ་ཅན་བཞི་ཟེར། གཞན་ཡང་འཛད་པ་སྟོན་སྐྱབས་དང་རྡོ་རྗེ་འོད་ཟེར་ལ་སོགས་པ་དང༌། ཀརྨ་དུས་གསུམ་མཁྱེན་པ་ཡང་སློབ་མ་ཡིན། ཁོང་ནེའུ་ཐོག་གི་གྲྭ་སར་ལོ་དགུར་བཞུགས། གཞན་ཡང་བླ་མ་ཞང་ཚལ་བ་ལ་སོགས་པ་སློབ་མ་ཤིན་ཏུ་མང་ངོ༌། །ཡང་ཡར་འབྲོག་གི་མར་བ་དོ་བ་ཆོས་ཀྱི་དབང་ཕྱུག་གིས་ཀྱང་གཞུང་མང་བོ་བསྒྱུར། དཔྱལ་ལོ་ཙཱ་བ་ཆོས་ཀྱི་བཟང་བོ་རྒྱ་གར་དུ་ལོ་བཅུར་བཞུགས། བླ་མ་རྡོ་རྗེ་གདན་པ་དང་ཁ་ཆེ་པཎ་ཆེན་སོགས་བསྟེན། ཆོས་མང་བོ་བསྒྱུར། ཁྲོ་ཕུ་ལོ་ཙཱ་བ་བྱམས་པ་དཔལ་གྱིས་སྔ་ཕྱིར་ཤྲཱི་ཛཱ་ག་ཏ་མི་ཏྲ་ཨཱ་ནནྡ་ཞེས་པ་མི་ཏྲ་ཛོ་གི་ཞེས་གྲགས་པ་དང་པཎྜི་ཏ་བུད་དྷ་ཤྲཱི་ཛྙཱ་ན། ཁ་ཆེ་པཎ་ཆེན་ཤཱཀྱ་ཤྲཱི་བྷ་དྲ་རྣམས་སྤྱན་དྲངས་ཏེ་གཞུང་མང་བོ་བསྒྱུར། པཎ་ཆེན་ཤཱཀྱ་ཤྲཱི་ལ་འཁོར་པཎ་ཆུང་བི་བྷཱུ་ཏི་ཙནྡྲར་དང་ད་ན་ཤཱི་ལ་དང་བལ་བོ་སཾ་གྷ་ཤྲཱི་དང་སུ་ག་ཏ་ཤྲཱི་ལ་སོགས་པ་དགུ་བྱོན་ཏེ། བི་བྷུ་ཏི་དང་ད་ན་ཤཱི་ལ་གཉིས་བོད་དུ་ཡུན་རིང་བོར་བཞུགས། བོད་ཀྱི་སྐད་ཡིག་ལ་ཡང་མཁས་པར་གྱུར་ནས་རང་འགྱུར་ཡང་མཛད་དོ། །ཆག་དགྲ་བཅོམ་དང་དེའི་དབོན་པོ་ཆག་ཆོས་རྗེ་དཔལ་གཉིས་ཀྱང་རྒྱ་གར་དུ་བྱོན་པཎྜི་ཏ་མང་བོ་བསྟེན་ནས་སློབ་གཉེར་གནང༌། གསར་འགྱུར་དང་འགྱུར་བཅོས་མང་བོ་བྱས་སོ།།

གཡུ་ཐོག་གསར་མ་ཡོན་ཏན་མགོན་པོའང་རྒྱ་གར་དུ་ལན་དྲུག་ཕེབས། སྨན་དང་རིག་གནས་སྤེལ་བའི་ལོ་རྒྱུས་ལོགས་སུ་བྲིས་ཡོད་ལ། ཕྱིས་སུ་བྱང་ཟུར་རྣམ་གཉིས་ཀྱིས་ཀྱང་གསོ་རིག་རྒྱ་ཆེར་སྤེལ་བའི་ལོ་རྒྱུས་ལོགས་སུ་འབྲི་འདུན་ཡོད་དོ།།

ས་སྐྱ་པཎ་ཆེན་ནི་རབ་བྱུང་གསུམ་པའི་ཆུ་སྟག་(༡༡༨༩)ལ་འཁྲུངས། ཁ་ཆེ་པཎ་ཆེན་དང་ད་ན་ཤཱི་ལ་ལས་སྒྲ་དང་རྣམ་འགྲེལ་བསླབས་ཏེ་རྣམ་འགྲེལ་ལ་འགྱུར་བཅོས་བྱས། མཁས་པ་ཆེན་པོར་གྱུར་ནས་ཆོས་མ་དག་པ་སུན་ཕྱུང་ངོ༌། །ཁོང་གིས་རིག་གནས་སྦྱངས་པ་ནི། རྣམ་ཐར་ལས། སྡེབ་སྦྱོར་རིན་ཆེན་འབྱུང་གནས་དང༌། །དམར་སེང་དངནི་རྒྱལ་བའི་ལྷ། །བདེ་བར་གཤེགས་པའི་དཔལ་ལ་ཐོས། །རྒྱན་གྱི་བསྟན་བཅོས་དཎ་ཌཱི་དང༌། །དབྱངས་ཅན་མགུལ་རྒྱན་ལ་སོགས་པ། །དགེ་འདུན་དཔལ་ལ་ལེགས་པར་བསླབས། །མངོན་བརྗོད་བསྟན་བཅོས་འཆི་མེད་མཛོད། །དེ་ཡི་རྒྱ་ཆེར་འགྲེལ་བ་བཅས། །མཁས་པ་གསུམ་ལ་ལེགས་པར་གཏུགས། །ནག་མོ་ཁོལ་གྱི་སྙན་ངག་གསུམ། །བདེ་བར་གཤེགས་པའི་དཔལ་གྱིས་བཤད། །བྱང་ཆུབ་སེམས་དཔའི་སྐྱེ་བའི་རབས། །བདག་ཉིད་ཆེན་པོ་གཉིས་ལས་ཐོས། །ཞེས་སོགས་གསུངས། འདི་དག་གི་གཞུང་ནི་དེ་སྐབས་བོད་དུ་མ་འགྱུར་བས་ལེགས་སྦྱར་གྱི་ཡི་གེའི་སྟེང་ནས་བསླབས་ཏེ་དར་བར་མཛད་ནའང་དེ་དག་གི་གཞུང་ཡོངས་རྫོགས་བསྒྱུར་བ་ནི་མེད་དོ། །ཁོང་གི་གསུང་རིག་གནས་ལ་ཡང་དམ་པའི་ཆོས་ཀྱི་ལམ་སྟོན་པ། ས་སྐྱའི་ལེགས་བཤད། སྒྲ་འཇུག སྒྲ་ཉེ་བར་བསྡུ་བ། སྡེབ་སྦྱོར་མེ་ཏོག་ཆུན་པོ། ཚིག་གཏེར། རོལ་མོའི་བསྟན་བཅོས། ཤེས་རབ་འཕྲོ་བ། ཤེས་རབ་ལ་འཇུག་པ། མཁས་འཇུག སྙན་ངག་མཁས་པའི་ཁ་རྒྱན། ཟློས་གར་རབ་དགའི་འཇུག་པ། སྐུ་གཟུགས་ཀྱི་བསྟན་བཅོས། བཟོའི་བསྟན་བཅོས། ས་བརྟག་པ། བསྟན་རྩིས། སྨན་དཔྱད་བསྡུས་དོན། སྨྲ་སྒོའི་བསྡུས་དོན། ཡི་གེའི་སྦྱོར་བ། བྱིས་འཇུག་འགྲེལ་བ། རིགས་གཏེར་སོགས་དང་གཞན་ཡང་མདོ་སྔགས་ཀྱི་བསྟན་བཅོས་མང་བོ་བརྩམས་སོ།།

ཤོང་ལོ་ཙཱ་བ་རྡོ་རྗེ་རྒྱལ་མཚན་ནི། བལ་ཡུལ་དུ་བྱོན་ནས་པཎྜི་ཏ་མ་ཧེན་དྲ་བྷ་དྲ་ལོ་ལྔར་བསྟེན་ནས་རིག་གནས་ཆུང་བ་ལྔ་ལ་བསླབས། ཁྱད་པར་སྒྲ་རིག་པ་ལ་ཤིན་ཏུ་བྱང་བར་མཛད། པཎྜི་ཏ་ལ་ཥ་ཤྲཱི་སྤྱན་དྲངས་ཏེ་སྙན་ངག་མེ་ལོང༌། དཔག་བསམ་འཁྲི་ཤིང༌། ཀླུ་ཀུན་ཏུ་དགའ་བའི་ཟློས་གར། བསྟོད་པ་བརྒྱ་བ། དུས་འཁོར་སོགས་འགྱུར་དང་འགྱུར་བཅོས་ཀྱང་མཛད་དེ་རིག་པའི་གནས་ཤིན་ཏུ་དར་བར་མཛད། དེའི་གཅུང་བོ་ཤོང་བློ་གྲོས་བརྟན་པས་ཀྱང་གཞིའགྱུར་དང་འགྱུར་བཅོས་ཀྱང་བྱས། ཡར་ལུང་གྲགས་པ་རྒྱལ་མཚན་གྱིས་བྱ་བ་བསྡུས་པ་ལ་སོགས་པ་བསྒྱུར་ཏོ། །བུ་སྟོན་རིན་པོ་ཆེའི་བླ་མ་ཉི་མ་རྒྱལ་མཚན་བཟང་བོས་བལ་བོར་ལོ་བཅུ་བཞིར་སྦྱངས་པ་མཛད། རིའི་ཀུན་ཏུ་དགའ་བའི་མདོ་ལ་སོགས་པ་ལོ་བཅུ་གསུམ་ཙམ་ལ་པཎྜི་ཏ་ཨཱནནྟ་སྤྱན་དྲངས་ཏེ་བསྒྱུར་བ་དང་གཞན་ཡང་འགྱུར་དང༌། འགྱུར་བཅོས་ཀྱང་མང་བོ་མཛད་དོ།།

ཤོང་ལོའི་སློབ་མ་དཔང་ལོ་ཙཱ་བ་བློ་གྲོས་བརྟན་པ་ནི་རབ་བྱུང་ལྔ་པའི་མེ་བྱི་(༡༢༧༦)ལ་ལ་སྟོད་ལྷོ་རུ་འཁྲུངས། གཞོན་དུས་ནས་སྟག་སྡེ་བ་སོགས་བཤེས་གཉེན་དུ་མ་བསྟེན་ནས་རིག་གནས་དུས་འཁོར་སོགས་ལ་སྦྱངས། ལོ་བཅུ་དགུའི་ཐོག་ལོ་ཙཱ་བ་མཆོག་ལྡན་ལས་སྒྲ་ཀ་ལཱ་པ་དང་ཙན་དྲ་བ་བསླབས། སྙན་ངག་མེ་ལོང་ཡང་གསན། ཨ་ཙ་ར་འཕྲད་ཚད་ལ་འཕྲལ་སྐད་བསླབས། ཡུད་ཙམ་གྱིས་ཞུ་ཆེན་གྱི་ལོ་ཙཱ་བར་གྱུར། བལ་བོར་ལན་གསུམ་བྱོན། རིག་གནས་དང་སྔགས་མཚན་ཉིད་ཀྱི་གཞུང་ཤིན་ཏུ་མང་བོ་ལ་འགྱུར་དང་འགྱུར་བཅོས་མཛད། གཞུང་མང་བོའི་ཊཱི་ཀ་ཡང་མང་དུ་བརྩམས། ཐུགས་རབ་ཤིན་ཏུ་ཆེ་སྟེ་ཁོང་གི་གསུང་ལས། སྔོན་ཚེ་སྦྱངས་པས་སྐྱེ་བ་འདིར། །གཞུང་རྣམས་རྩེད་མོའི་ཞར་ལ་ཤེས། །ཤོང་སྟོན་ལེགས་བཤད་ལྡེ་མིག་བླངས། །ལེགས་སྦྱར་སྐད་ཀྱི་གཏེར་ཁ་ཕྱེ། །སྣ་ཚོགས་གཞུང་ལུགས་རིན་ཆེན་བླངས། །ལེགས་བཤད་དགའ་སྟོན་འབྱེད་ལ་དབང༌། །ཞེས་གསུངས་པ་དང༌། མདོར་ན། ཁོང་ཞལ་བཞུགས་པའི་ཚེ་ཁོང་ལས་མགོ་འཕང་མཐོ་བའི་མཁས་པ་སུ་ཡང་མེད་ཟེར། དེའི་དབོན་པོ་ལོ་ཙཱ་བ་བྱང་ཆུབ་རྩེ་མོས་ཀྱང་བསྒྱུར་བཤད་སོགས་ཀྱིས་ཁུ་བོའི་ལུགས་ལེགས་པར་བསྐྱངས་སོ།།

བུ་སྟོན་རིན་པོ་ཆེ་ནི་རབ་བྱུང་ལྔ་བའི་ལྕགས་སྟག་(༡༢༩༠)ལ་འཁྲུངས། དང་བོར་ཐར་བ་ལོ་ཙཱ་བ་ལས་ཙན་དྲ་བ་བསླབས་ནས་ལོ་ཙཱ་མཁས་པར་མཁྱེན། བླ་མ་རྡོ་རྗེ་རྒྱལ་མཚན་སོགས་ཀྱི་མདུན་ནས་དུས་འཁོར་སོགས་མདོ་རྒྱུད་མཐའ་ཡས་པ་གསན། རྩིས་སོགས་ལའང་ལེགས་པར་སྦྱངས། དབང་མདོར་བསྟན་གྱི་འགྲེལ་བ་སུམ་བརྒྱ་དྲུག་ཅུ་བ་ཡང་བསྒྱུར། དུས་འཁོར་ཤོང་འགྱུར་ལ་འགྱུར་བཅོས་མང་དུ་གནང༌། བོད་དུ་འགྱུར་བའི་གཞུང་མཐའ་དག་ལ་ཞིབ་བརྟག་མཛད། ཆོས་འབྱུང་རིན་པོ་ཆེ་དང་རྩིས་གཞུང་མཁས་པ་དགའ་བསྐྱེད་སོགས་གསུང་རྩོམ་པོད་སུམ་ཅུར་ཉེ་བ་བརྩམས། འདི་བའི་གསུང་འབུམ་གྱི་པར་སྔར་མེད་ལ་རྒྱལ་དབང་བཅུ་གསུམ་པའི་རིང་ལ་རྩེ་པོ་ཏ་ལའི་ཤོད་དུ་པར་གསར་བཞེངས་གནང་སྐབས་དགེ་བཤེས་རིན་པོ་ཆེ་འབྲས་སྒོ་ཤེས་རབ་རྒྱ་མཚོས་ཞུ་ཆེན་མཛད་དོ། །བུའི་སློབ་མ་ལོ་ཙཱ་བ་རིན་ཆེན་རྣམ་རྒྱལ་(སྒྲ་ཚད་པ་རིན་ཆེན་རྣམ་རྒྱལ་ཡང་ཟེར)གྱིས་ཀྱང་འགྱུར་དང་འགྱུར་བཅོས་འཆད་སྤེལ་སོགས་ཀྱི་སྒོ་ནས་བུ་རིན་པོ་ཆེའི་རྒྱུན་བསྐྱངས་སོ། །གཞན་ཡང་སྣར་ཐང་ལོ་ཙཱ་བ་སཾ་གྷ་ཤྲཱི། ཞ་ལུ་ལོ་ཆེན་ཆོས་སྐྱོང་བཟང་བོ(དག་ཡིག་ཟ་མ་ཏོག་རྩོམ་པ་བོ)། སྐྱོགས་སྟོན་ལོ་ཙཱ་བ་ངག་དབང་རིན་ཆེན་བཀྲ་ཤིས(སྨིན་གྲུབ་ལོ་ཙཱ་བ་ཡང་ཟེར་ལ་ལི་ཤིའི་གུར་ཁང་རྩོམ་པ་བོ་ཡིན)། ལོ་ཆེན་སྐྱབས་མཆོག་དཔལ། སྟག་ལོ་ཤེས་རབ་རིན་ཆེན་སོགས་རིག་གནས་རྒྱ་མཚོའི་ཕྲེང་བ་འཛིན་པའི་ལོ་ཙཱ་བ་དང་མཁས་པ་ཤིན་ཏུ་མང་བོ་བྱུང་མོད་ཐམས་ཅད་བརྗོད་ཀྱིས་མི་ལང་ངོ༌།།

ཁྱད་པར་དུ་རྗེ་ཙོང་ཁ་བ་བློ་བཟང་གྲགས་པའི་དཔལ་བྱོན་ནས་མདོ་སྔགས་རིག་གནས་ཀྱི་བཤད་སྒྲུབ་ལྷག་པར་འཕེལ་ཏེ། བོད་ཡུལ་འདིར་སློབ་གཉེར་བས་ས་སྟེང་ཁྱབ་པ་བྱུང༌། ཁོང་ཤར་ཕྱོགས་ཙོང་ཁའི་ཡུལ་དུ་རབ་བྱུང་དྲུག་པའི་མེ་བྱ་(༡༣༥༧)ལ་སྐུ་འཁྲུངས། དགུང་ལོ་གསུམ་བཞེས་པ་ན་ཀརྨ་པ་རོལ་བའི་རྡོ་རྗེ་ལས་དགེ་བསྙེན་བསྒྲུབས་ཏེ། མཚན་ཀུན་དགའ་སྙིང་བོར་གསོལ། དགུང་ལོ་བརྒྱད་པའི་དུས་ཤར་ཕྱོགས་རིག་པའི་དཔའ་བོ་ཞེས་གྲགས་པའི་མཁས་པ་ཆེན་པོ་ཆོས་རྗེ་དོན་འགྲུབ་རིན་ཆེན་ལས་རབ་བྱུང་དང་དགེ་ཚུལ་གྱི་སྡོམ་པ་བཞེས་ཏེ་བློ་བཟང་གྲགས་པ་ཞེས་པའི་མཚན་གསོལ། བླ་མ་དེ་ཉིད་ལས་ཀློག་དང་རིག་གནས་མདོ་སྔགས་ཀྱི་གདམས་པ་མང་དུ་གསན་ནས། དགུང་ལོ་བཅུ་དྲུག་གི་ཐོག་བོད་དུ་བྱོན། དམ་པ་ཆེན་པོས་གཞན་དོན་བྱེད་པ་ལ་རིག་གནས་མཐའ་དག་སྦྱང་དགོས་དགོངས་ནས་ཚལ་གུང་ཐང་ནས་ཚེ་ཡི་རིག་བྱེད་པ་དཀོན་མཆོག་སྐྱབས་ལས་གསོ་དཔྱད་ཀྱི་གཞུང་ལ་སྦྱངས་ཤིང༌། ཡན་ལག་བརྒྱད་པ་ཐུགས་ལ་བཟུང༌། ལོ་ཙཱ་བ་ནམ་མཁའ་བཟང་བོ་ལས་སྙན་ངག་མེ་ལོང་སོགས་བསླབས། བོ་དོང་ལོ་ཆེན་ཞམ་བཟང་བ་ལས་སྒྲ་ཀ་ལཱ་པ་དང༌། སྒྲ་ཙནྡྲར་བ་དང༌། སྡེབ་སྦྱོར་སོགས་ལ་སྦྱངས། ས་བཟང་མ་ཏི་པཎ་ཆེན་སོགས་ལས་ཀྱང་བསླབས། ཚལ་པ་རྟོགས་ལྡན་ཡེ་ཤེས་རྒྱལ་མཚན་ལས་རྩིས་ཀྱི་ལག་ལེན་མཐར་ཕྱིན་པར་སྦྱངས་སོ།།

རིག་གནས་ཆེ་བ་ལྔའི་ཡ་གྱལ་ཚད་མ་རིག་པ་ལ་ཐོས་པ་མཛད་ཚུལ་ནི། རྗེ་བཙུན་བླ་མ་དམ་པ་རེད་མདའ་བ་དང༌། ལོ་ཙཱ་བ་དོན་བཟང་ལས་ཚད་མའི་གཞུང་རྣམས་ལེགས་པར་གསན་ཏེ་སྡེ་བདུན་མདོ་དང་བཅས་པ་རྣམས་ལ་གཟིགསརྟོག་མཛད་ཅིང༌། གུང་བསྒྲིགས་ནས་ལེགས་པར་གཏན་ལ་ཕབ། བོད་ཀྱི་བཤད་སྲོལ་ཕལ་ཆེར་འགྲེལ་བ་དང་མི་མཐུན་པར་གཟིགས་ནས། ཚད་མ་ཀུན་ལས་བཏུས་ཀྱི་རང་འགྲེལ་འགྲེལ་བཤད་དང་བཅས་པ་དང༌། རྣམ་འགྲེལ་གྱི་འགྲེལ་བ་ལྷ་ཤཱཀ་གཉིས་དང༌། བྲམ་ཟེ་གཉིས་ཀྱི་འགྲེལ་བ་དང༌། རྒྱན་གྱི་འགྲེལ་བ་དང༌། དེའི་འགྲེལ་བཤད་གཉིས་དང༌། རྣམ་ངེས་རང་འགྲེལ་དང༌། དེའི་འགྲེལ་བཤད་སོགས་ཆོས་མཆོག་གིས་མཛད་པ་དང༌། རིགས་ཐིགས་ཀྱི་འགྲེལ་བ་ཆོས་མཆོག་གིས་མཛད་པ་སྟེ། འགྲེལ་བ་འགྲེལ་བཤད་གཞུང་ཕྲན་དང་བཅས་པ་ལེགས་པར་གཏན་ལ་ཕབ་ནས་ཐུགས་སྦྱང་མཛད་པས་ད་པྱིས་ཕྱིན་པར་ཐུགས་སུ་ཆུད་དོ།།

ནང་དོན་རིག་པའི་ནང་ཚན་ཕར་ཕྱིན་ལ་ཐོས་པ་མཛད་ཚུལ་ནི། ཆོས་གྲྭ་ཆེན་པོ་བདེ་བ་ཅན་དུ་བྱོན་ནས། སྙེ་ཐང་བ་བཀྲ་ཤིས་སེང་གེ་དང༌། སློབ་དཔོན་ཡོན་ཏན་རྒྱ་མཚོ། བླ་མ་རིན་པོ་ཆེ་ཨུ་རྒྱན་པ་རྣམས་ལས་མངོན་པར་རྟོགས་པའི་རྒྱན་རྩ་འགྲེལ་དང་བཅས་པ་གསན་པ་དང༌། བླ་མ་འཇམ་རིན་པ་ལས་ཀྱང་བྱམས་ཆོས་རྒྱུད་བླ་མ། མདོ་སྡེ་རྒྱན་དབུས་མཐའ་རྣམ་འབྱེད། ཆོས་ཉིད་རྣམ་འབྱེད་རྣམས་གསན་པ་དང༌། ཉ་དཔོན་ཀུན་དགའ་དཔལ་བའི་དྲུང་ནས་ཕར་ཕྱིན་གྱི་གཟབ་བཤད་ཚར་གཅིག་གསན་པས་ཐུགས་ཡིད་ཤིན་ཏུ་ཚིམ་པ་བྱུང་བ་དང༌། གཞན་ཡང་མངོན་རྟོགས་རྒྱན་གྱི་འགྲེལ་བ་འགྲེལ་བཤད་ཤིན་ཏུ་མང་བོ་ལ་སྦྱངས་པས་མཁས་པའི་མཐར་སོན་ཏེ་འགྲེལ་བ་ལེགས་བཤད་གསེར་གྱི་ཕྲེང་བ་ལྗགས་རྩོམ་མཛད་དོ།།

ནང་དོན་རིག་པའི་གཞུང་དབུ་མ་ལ་སྦྱངས་པ་མཛད་ཚུལ་ནི། རྗེ་བཙུན་རེད་མདའ་བ་སོགས་ཀྱི་མདུན་ནས། ཀླུ་སྒྲུབ་ཀྱི་རིགས་ཚོགས་དྲུག་རྩ་འགྲེལ་དང་བཅས་པ་དང༌། དབུ་མ་བཞི་བརྒྱ་བ་རྩ་འགྲེལ། དབུ་མ་འཇུག་པ་རྩ་འགྲེལ་སོགས་ཀླུ་སྒྲུབ་ལུགས་ཀྱི་གཞུང་མཐའ་དག་ལ་སྦྱངས་པས་དགོངས་པ་མཐར་ཐུག་པ་ཐུགས་སུ་ཆུད་ནས། དབུ་མའི་རྣམ་བཤད་དགོངས་པ་རབ་གསལ། རྩ་ཤེ་ཊཱིཀ་ཆེན་དྲང་ངེས་ལེགས་བཤད་སྙིང་བོ་སོགས་མཛད་དོ།།

གཞན་ཡང༌། ནང་དོན་རིག་པའི་སྡེ་སྣོད་འདུལ་མངོན་དང་གསང་སྔགས་ལ་སྦྱངས་ཤིང་ཉམས་སུ་བླངས་པས། མཁྱེན་རྟོགས་ཀྱི་རྒྱ་མཚོ་བརྡོལ། སྙན་གྲགས་ཀྱིས་འཛམ་གླིང་ཁྱབ་སྟེ་རབ་བྱུང་བདུན་པའི་ས་གླང་(༡༤༠༩)ལ་དགའ་ལྡན་རྣམ་པར་རྒྱལ་བའི་གླིང་ཕྱག་འདེབས་མཛད་དོ།།

རྗེའི་གདན་ས་དགའ་ལྡན་ནི། རྒྱལ་ཚབ་དར་མ་རིན་ཆེན་ནས་བཟུང་སྟེ། དགའ་ལྡན་ཁྲི་བ་རིམ་བྱོན་གྱིས་བསྐྱངས་པ་ལས། རྗེ་རིན་པོ་ཆེ་ལ་སྤྲུལ་སྐུ་བླུ་བའི་སྲོལ་མ་བྱུང༌། རྗེའི་སློབ་མ་འཇམ་དབྱངས་ཆོས་རྗེས་རབ་བྱུང་བདུན་པའི་མེ་སྤྲེལ་(༡༤༡༦)ལ་འབྲས་སྤུངས་བཏབ། བྱམས་ཆེན་ཆོས་རྗེས་རབ་བྱུང་བདུན་པའི་ས་ཕག་(༡༤༡༩)ལ་སེ་ར་བཏབ། པཎ་ཆེན་དགེ་འདུན་གྲུབ་ཀྱིས་རབ་བྱུང་བརྒྱད་པའི་མེ་ཡོས་(༡༤༤༧)ལ་བཀྲ་ཤིས་ལྷུན་པོ་བཏབ། དགོན་ཆེན་འདི་བཞི་ལ་གདན་ས་ཆེན་པོ་བཞི་ཟེར་རོ།།

པཎ་ཆེན་དགེ་འདུན་གྲུབ་ཀྱི་གདན་ས་བཀྲ་ཤིས་ལྷུན་པོར་ཡང་དེ་སྐབས་སྤྲུལ་སྐུ་བླུ་རྒྱུའི་སྲོལ་མེད་སྟབས། གདན་ས་སྐྱོང་མཁན་པཎ་ཆེན་བཟང་བོ་བཀྲ་ཤིས། པཎ་ཆེན་ལུང་རིགས་རྒྱ་མཚོ། པཎ་ཆེན་ཡེ་ཤེས་རྩེ་མོ་རྣམས་རིམ་པར་བཞུགས། རྒྱལ་བ་དགེ་འདུན་རྒྱ་མཚོ་རབ་བྱུང་བརྒྱད་པའི་མེ་སྤྲེལ་(༡༤༧༦)ལོར་སྐུ་འཁྲུངས། པཎ་ཆེན་ཡེ་ཤེས་རྩེ་མོའི་དུས་སུ། རྒྱལ་བ་དགེ་འདུན་རྒྱ་མཚོ་རྗེ་དགེ་འདུན་གྲུབ་ཀྱི་སྤྲུལ་སྐུ་ཡིན་རྒྱུ་བྱས་ནས་བཀྲ་ཤིས་ལྷུན་པོར་བཞུགས་པ་ལ། པཎ་ཆེན་ཡེ་ཤེས་རྩེ་མོས་ཕྲག་དོག་གི་རྣམ་པ་མཛད་པས་དེར་མ་བཞུགས་པར་འབྲས་སྤུངས་སུ་ཕེབས། མཁས་ཚུལ་ཆེས་ཆེར་བཞེས། འབྲས་སྤུངས་ཐམས་ཅད་མཁྱེན་པ་ཞེས་གྲགས་ཤིང་སྙན་གྲགས་རྒྱས། དེ་ནས་ཆོས་འཁོར་རྒྱལ་གྱི་དགོན་པ་བཏབ་ཅིང་འཕྲིན་ལས་ཤིན་ཏུ་རྒྱས་པའི་སྐབས། པཎ་ཆེན་ཡེ་ཤེས་རྩེ་མོས་ནན་ཏན་མཛད་པ་བཞིན་བྱོན་ནས་བཀྲ་ཤིས་ལྷུན་པོའི་གདན་སར་ལོ་ཁ་ཤས་ལ་བཞུགས། དེ་ནས་ཕྱིར་འབྲས་སྤུངས་སུ་ཕེབས། དགེ་ལུགས་པའི་སྤྲུལ་སྐུའི་ཐོག་མ་འདི་བ་ཡིན་ཟེར། དེ་ནས་བཀྲ་ཤིས་ལྷུན་པོའི་གདན་སར། མངའ་རིས་ཆོས་ལྷ་བཙུན་བསྟན་པའི་ཉི་མ་བཞུགས། དེ་ནས་པཎ་ཆེན་བློ་བཟང་ཆོས་རྒྱན་བར་དུ་གདན་རབས་བཅུ་སོང་ལ། པཎ་ཆེན་བློ་བཟང་ཆོས་ཀྱི་རྒྱལ་མཚན་བཀྲ་ཤིས་ལྷུན་པོའི་གདན་སར་སྐུ་མྱ་ངན་ལས་འདས་རེག་གི་བར་དུ་བཞུགས་པས། དེ་ནས་བཟུང་སྟེ་པཎ་ཆེན་སྐུ་ཕྲེང་རིམ་བྱོན་གྱིས་བཀྲ་ཤིས་ལྷུན་པོའི་གདན་ས་བཟུང་ངོ༌།།

པཎ་ཆེན་བློ་བཟང་ཆོས་རྒྱན་ནི། རབ་བྱུང་བཅུ་བའི་ལྕགས་རྟ་(༡༥༧༠)ལ་འཁྲུངས། དབེན་ས་བ་བློ་བཟང་དོན་འགྲུབ་ཀྱིས་སྤྲུལ་སྐུར་ངོས་འཛིན་བྱས་ནས་བཀྲ་ཤིས་ལྷུན་པོར་སློབ་གཉེར་གནང་སྟེ་གཞོན་དུས་ནས་མཁས་ཆེན་དུ་གྱུར། དབེན་ས་པཎ་ཆེན་ཐམས་ཅད་མཁྱེན་པ་ཞེས་སྙན་གྲགས་ཀྱིས་ས་སྟེང་ཁྱབ། དགེ་ལུགས་པའི་སྤྲུལ་སྐུ་གཉིས་པ་འདི་བ་ཡིན་པར་གྲགས། སྤྱིར་སྤྲུལ་སྐུ་བླུ་བའི་ཐོག་མ་ཀརྨ་པཀྵི་ཆོས་ཀྱི་བླ་མ་ནས་བྱུང་ལ། དགེ་ལུགས་པའི་སྤྲུལ་སྐུའི་ཐོག་མ་རྒྱལ་བ་དགེ་འདུན་རྒྱ་མཚོ་དང༌། དེ་ནས་པཎ་ཆེན་བློ་བཟང་ཆོས་རྒྱན་ཡིན་འདུག་མོད། འོན་ཀྱང་དེ་རྣམ་པ་གཉིས་ཀའང་འབད་པས་བཙལ་ཏེ་ཨང་གྲངས་བསྒྲིགས་ནས་གསེར་བུམ་དཀྲུག་པ་ལྟ་བུ་དེང་དུས་ཀྱི་སྤྲུལ་སྐུ་ངོས་འཛིན་ལྟ་བུ་མིན་ཏེ། རྒྱལ་བ་དགེ་འདུན་རྒྱ་མཚོ་ནི་བྱིས་པའི་དུས་ནས་ལུང་རྟོགས་ཀྱི་ཡོན་ཏན་ཕྱིར་མངོན་པས། ཀུན་གྱིས་རྒྱལ་བ་དགེ་འདུན་གྲུབ་ཀྱི་སྐྱེ་བར་ཡིད་ཆེས་བྱས་པ་དང༌། པཎ་ཆེན་བློ་བཟང་ཆོས་རྒྱན་གྱིས་ཀྱང་བྱིས་པའི་དུས་ནས་ལུང་རྟོགས་ཀྱི་ཡོན་ཏན་ཕྱིར་མངོན་པས། དབེན་ས་བ་སངས་རྒྱས་ཡེ་ཤེས་ཀྱིས་དབེན་ས་བློ་བཟང་དོན་འགྲུབ་ཀྱི་སྐྱེ་བར་ངོས་བཟུང་ནས་སློབ་གཉེར་ལ་མཐུན་རྐྱེན་བསྒྲུབས་པས་ཕྱིས་སུ་མཁས་གྲགས་ཀྱིས་ས་སྟེང་ཁྱབ་པ་བྱུང་བ་གོང་སྨོས་ལྟར་རོ།།

ན་ནིང༌། ༡༩༨༠ལོར་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི་《བོད་ལྗོངས་ནི་ཀྲུང་གོའི་ཆ་ཤས་ཤིག་ཡིན》ཞེས་པའི་དཔེ་དེབ་ཀྱི་ཤོག་གྲངས་བརྒྱ་བར་“ཏཱ་ལའི་བླ་མ་ཡང་སྲིད་ཕེབས་པ་དེ་ནི། ཙོང་ཁ་པས་གཏན་ལ་ཕབ་པ་ཞིག་རེད། ཙོང་ཁ་པས་སྲོལ་གཏོད་གནང་བའི་དགེ་ལུགས་པའི་བསྟན་པ་ལྟར་ན་གཉེན་བསྒྲིགས་ནས་བུ་རྒྱུད་སྤེལ་མི་ཆོག་པར་བརྟེན། ཁོང་གིས་སློབ་མ་ཆེན་པོ་གཉིས་ལ་ཡང་སྲིད་ཡོང་སྟེ་ཐེག་ཆེན་གྱི་ཆོས་ལུགས་བཤད་ནས་ཆོས་རྒྱུན་མི་ཆད་པའི་འགན་ལེན་བྱེད་དགོས་པའི་ཞལ་ཆེམས་གནང་ཡོད་པ་རེད།” ཅེས་བྲིས་འདུག འདི་ནི་ནོར་བ་རེད། དེ་ལྟ་བུའི་ཞལ་ཆེམས་གཏན་ནས་མེད། རྗེ་ཙོང་ཁ་བ་ཡབ་སྲས་ཀྱི་རིང་ལ་དགེ་ལུགས་པར་སྤྲུལ་སྐུ་བླུ་བའི་སྲོལ་མེད། རྗེ་འདས་ནས། རྒྱལ་བ་དགེ་འདུན་རྒྱ་མཚོ་འཁྲུངས་པའི་བར་ལ་ལོ་ངོ་ང་དྲུག་སོང༌། རྗེ་འདས་ནས་པཎ་ཆེན་བློ་བཟང་ཆོས་རྒྱན་འཁྲུངས་པའི་བར་ལ་ལོ་ངོ་བརྒྱ་དང་ལྔ་བཅུ་སོང༌། “ཏཱ་ལའི་བླ་མའི་ཡང་སྲིད་ཕེབས་པ་ཙོང་ཁ་པས་གཏན་ལ་ཕབ་པ་རེད།” ཟེར་མཁན་གྱི་བཤད་ཚུལ་ལ་བལྟས་ན་རྒྱལ་བ་པཎ་ཆེན་གཉིས་རྗེ་ཙོང་ཁ་པའི་སྲས་ཀྱི་ཐུ་བོ་རྒྱལ་ཚབ་རྗེ་དང་མཁས་གྲུབ་རྗེའི་སྤྲུལ་སྐུ་རེད་སྙམ་པ་ཡིན་འདུག དེ་ལྟ་བུའི་ནོར་འཁྲུལ་གྱི་གཏམ་སྔོན་དུས་ནས་རྒྱའི་ཡིག་ཐོག་ལ་ཡོད་ཟེར་བ་ཐོས་མྱོང༌།།

རྗེ་བདག་ཉིད་ཆེན་པོ་དེའི་སློབ་མ་ནི། བླ་མ་ཆོས་འབྲེལ་གསན་པ་བཞི། སྔ་ཚར་བཞི། འཁོར་དག་པ་རྣམ་བརྒྱད། སྲས་ཀྱི་ཐུ་བོ་གཉིས། འཁོར་ཁྱད་པར་དུ་འཕགས་པ་བཞི། ནང་ཐུགས་ཀྱི་སྲས་གཅིག འཕྲིན་ལས་ནམ་མཁའ་དང་མཉམ་པའི་བུ་ཆེན་བཞི། དབུས་གཙང་བསྟན་པའི་སྒྲོན་མེ་བཅུ། གཞན་དོན་ལྷུན་གྱིས་གྲུབ་པའི་སེམས་དཔའ་དྲུག མི་དབང་གཙུག་ན་མཛེས་པའི་ཏི་ཤྲཱི་གཉིས། རྒྱ་ཆེན་མང་དུ་ཐོས་པའི་དཔོན་སྲས་གཉིས། སྦྱངས་པའི་ཡོན་ཏན་འཛིན་པའི་ཅོག་ཆེ་ཆུང་གཉིས། རྣམ་དཔྱོད་ཕུལ་དུ་བྱུང་བའི་མཁས་པ་གཉིས། བསྟན་པ་ཕྱོགས་མཐར་སྤེལ་བའི་དར་ཆེན་དྲུག སྐད་གཉིས་སྨྲ་བའི་ལོ་ཙཱ་བ་གཉིས། ས་སྐྱོང་ཆོས་རྗེ་དྲུག གསུང་རབ་མང་དུ་མཁྱེན་པའི་བསྟན་འཛིན་བརྒྱད། མདོ་རོང་གི་མཁས་པ་བཞི། མཁའ་སྤྱོད་གྲུབ་པའི་གདུང་རྒྱུད་གཉིས། སྐྱེས་བུ་ཡ་མཚན་ཅན་གཉིས། སྤྱན་སྔ་བརྒྱད། ཁྲི་སྟེང་མཛེས་པའི་བླ་ཆེན་བཞི། ཚོགས་པ་སྐྱོང་བའི་མཁན་པོ་བཞི། སྡེ་དགོན་ཕྲ་མོའི་ཆེན་པོ་ལྔ། ཆོས་སྒོ་བ་གཉིས། འཆད་ཉན་གྱི་རྒྱལ་མཚན་སྒྲེང་བའི་སློབ་དཔོན་བཞི། རིགས་པ་སྨྲ་བའི་དཀའ་བཅུ་བ་བཞི། ཚིག་དོན་འཛིན་པའི་དཀའ་བཞི་བ་བཅུ། རྣམ་པར་དག་པའི་གནས་བརྟན་དྲུག ཚེ་བློས་བཏང་གི་རྟོགས་ལྡན་ལྔ་ལ་སོགས་པ་ལུང་རྟོགས་ཀྱི་ཡོན་ཏན་ལ་མངའ་བརྙེས་པའི་མཁས་པ་ཆེན་པོ་སྙན་གྲགས་ཅན་མཐའ་ཡས་པ་ཡོད་དོ།།

སློབ་མ་དེ་དག་གི་ནང་ནས་ཀྱང་མཁས་གྲུབ་དགེ་ལེགས་དཔལ་བཟང་དང་ཞང་ཞུང་བ་ཆོས་དབང་གྲགས་པ་གཉིས་ནི་སྙན་ངག་གི་ཚིག་རྒྱན་ལ་ཆེད་དུ་མཁས་པར་གྲགས་ཤིང་མཁས་གྲུབ་རྗེས་མཛད་པའི་འཇམ་དབྱངས་སྨྲ་སེང་གི་བསྟོད་པ་ལས། འདི་འདྲའི་སྙན་ངག་མུ་ཏིག་དོ་ཤལ་གང་གི་ཁ་ལས་རབ་འཕྱང་བ། །བདེར་གཤེགས་གསུང་གི་ལེགས་བཤད་ཕྲེང་བས་ལྕེ་རྩེ་རྣམ་པར་བརྒྱན་པ་ནི། །བློ་གྲོས་ཤེས་བྱའི་ཕ་མཐའ་ལ་འགྲན་ཤཱཀྱའི་དགེ་སློབ་དགེ་ལེགས་དཔལ། །བཟང་བོ་ཞེས་བྱ་འཇམ་པའི་རྡོ་རྗེའི་ཞབས་པད་བསྟེན་ལ་མངོན་དགའ་ཡིན། །ཞེས་དང༌། གངས་ཅན་མཁས་པ་ཀུན་གྱི་མགོ་བོ་ལ། །ཚིག་གི་གོམ་པ་འགོད་མཁས་དགེ་ལེགས་དཔལ། །བཟང་བོས་ཚིག་གི་སྦྱོར་བ་སྤངས་ཏེ་སྨྲས། །ཞེས་གསུངས་པ་ལྟར་སྙན་ངག་གི་རྩོམ་ཆེས་མང༌། ཞང་ཞུང་བ་ཆོས་དབང་གྲགས་པས་སྙན་ངག་རཱ་མ་ཎའི་རྟོགས་བརྗོད་སོགས་གཞུང་མང་བོ་བརྩམས་སོ། །དེ་བཞིན་དུ་རྗེའི་སློབ་མ་སློབ་རྒྱུད་དང་བཅས་པས་ནང་དོན་རིག་པར་མ་ཟད་ཐ་སྙད་རིག་གནས་ཀྱང་ཆེས་ཆེར་དར་བར་མཛད་དོ།།

ཇོ་ནང་ཀུན་དགའ་གྲོལ་མཆོག་གི་སྤྲུལ་སྐུ་ཏཱ་ར་ནཱ་ཐ་སྟེ་སྒྲོལ་བའི་མགོན་པོ་ནི་རབ་བྱུང་བཅུ་བའི་ཤིང་ཕག་(༡༥༧༥)ལོར་འཁྲུངས། ཁོང་གིས་ཀྱང་རིག་གནས་སོགས་ཀྱི་བསྟན་བཅོས་མང་བོ་བརྩམས། འཕགས་ཡུལ་ནས་བྱོན་པའི་པཎྜི་ཏ་ཁ་ཤས་བསྟེན་པས། ལེགས་སྦྱར་གྱི་སྐད་དང་སྒྲ་རིག་པ་ལའང་མཁས་པ་ཆེན་པོར་གྱུར། སྒྲ་མདོ་དབྱངས་ཅན་མ་བསྒྱུར་བ་དང༌། འགྲེལ་བ་མཆོག་ཏུ་གསལ་བ། ཞེས་བྱ་བ་བརྩམས་པ་དེ་ལ། ཏཱ་ར་ན་ཐའི་སྒྲ་ཊཱིཀ་ཞེས་གྲགས་ཆེ། གཏེར་བདག་གླིང་པ་འགྱུར་མེད་རྡོ་རྗེ་སྟེ་སྨིན་གླིང་གཏེར་ཆེན་དུ་གྲགས་པའང་ཀུན་གཟིགས་ལྔ་བ་ཆེན་མོས་རིག་གནས་ཀྱི་སློབ་དཔོན་དུ་བསྟེན། རིག་གནས་རྒྱ་མཚོའི་ཕྲེང་བ་འཛིན་པ་སྨོན་གྲོ་བ་ཡབ་སྲས་ཞེས་བསྔགས་བརྗོད་ཆེར་མཛད། ཁྱད་པར་དུ་གཏེར་ཆེན་གྱི་གཅུང་ལོ་ཆེན་ངྷརྨ་ཤྲཱི་བྱ་བ་མདོ་སྔགས་གསར་རྙིང༌། ཐ་སྙད་རིག་གནས་མཐའ་དག་ལ་མཁས་པ་ཞིག་བྱུང་བས་བསྟན་བཅོས་མང་དུ་བརྩམས་སོ།།

རྒྱལ་དབང་ལྔ་བ་ཆེན་པོ་ནི་རབ་བྱུང་བཅུ་བའི་མེ་སྦྲུལ་(༡༦༡༧)ལ་འཁྲུངས། ཁོང་གིས་མདོ་སྔགས་གསར་རྙིང་དང༌། ཐ་སྙད་རིག་གནས་མཐའ་དག་ལ་སྦྱངས་ཏེ་བསྟན་བཅོས་ཆེས་མང་བོ་བརྩམས། སྙན་འགྲེལ་དབྱངས་ཅན་དགྱེས་གླུ་སོགས་ཐ་སྙད་རིག་གནས་ཀྱི་གསུང་རྩོམ་ཡང་མང༌། སྡེ་སྲིད་སངས་རྒྱས་རྒྱ་མཚོས་ཀྱང་བཻ་དཀར། བཻ་སེར། བཻ་སྔོན་སོགས་རིག་གནས་ཀྱི་གཞུང་མང་བོ་བརྩམས། ཁྱད་པར་དུ་སྨན་ལ་མཁས་པར་གྲགས་སོ།།

རྒྱལ་དབང་ལྔ་བའི་དུས་སུ། འདར་ལོ་ངག་དབང་ཕུན་ཚོགས་ལྷུན་འགྲུབ་ཀྱིས། པཎྜི་ཏ་བཱ་ལ་བྷཱ་དྲ་དང༌། དེའི་གཅུང་པཎྜི་ཏ་གོ་ཀུ་ལ་ནཱ་ཐ་མི་ཤྲ་གཉིས་ལ་བརྟེན་ནས་ལོ་ཙཱ་བ་ཁོང་དགུང་ལོ་ཉེར་ལྔའི་ཐོག་རབ་བྱུང་བཅུ་གཅིག་པའི་ས་ཁྱི་(༡༦༥༨)ལོ་ལ་དཔལ་ལྡན་འབྲས་སྤུངས་སུ་སྒྲ་པཱ་ཎི་བའི་འགྲེལ་ཆེན་ནོར་གྱི་ཤིང་རྟ་ཞེས་བྱ་བ་བརྩམས། དེ་རྗེས་རྒྱལ་དབང་ལྔ་བའི་བཀའ་བཞིན། པཎྜི་ཏ་སྐུ་མཆེད་དང་ལོ་ཙཱ་གསུམ་རྩེ་ཕོ་བྲང་ཆེན་མོར་བཞུགས་ཏེ། སྒྲ་མདོ་དབྱངས་ཅན་མ་དང་འགྲེལ་བ་གསལ་ལྡན་བསྒྱུར་རོ།།

རྒྱལ་དབང་ལྔ་བའི་དངོས་སློབ་ཀུན་མཁྱེན་ཆེན་པོ་འཇམ་དབྱངས་བཞད་པའི་རྡོ་རྗེ་ནི་རབ་བྱུང་བཅུ་གཅིག་པའི་ས་བྱི་(༡༦༤༨) ལ་སྐུ་བལྟམས། ཁོང་གིས་མདོ་སྔགས་ཐ་སྙད་རིག་གནས་དང་བཅས་པའི་གཞུང་མང་དུ་བརྩམས་ཤིང༌། མདོ་སྨད་ལྷོ་རྒྱུད་དུ་ཆོས་སྡེ་ཆེན་པོ་བླ་བྲང་བཀྲ་ཤིས་འཁྱིལ་ཞེས་ཡོངས་སུ་གྲགས་པ་དེ་ཉིད་བཏབ། ཆོས་སྡེ་འདི་ཉིད་དར་ཞིང་རྒྱས་ཏེ་བོད་གངས་ཅན་གྱི་བཅུ་ཕྲག་རིག་པའི་གནས་ཀྱི་ལྟེ་གནས་སུ་གྱུར། བདག་གིས་ཀྱང་ཆོས་སྡེ་ཆེན་པོ་དེའི་མཐུ་ལ་བརྟེན་ནས་ཕྱི་ནང་གི་རིག་པའི་གནས་དག་ལ་བག་ཆགས་ཅུང་ཟད་ཅིག་འཇོག་ཐུབ་པའི་སྐལ་བ་ཐོབ། རྒྱལ་དབང་བདུན་པའི་དུས་སུ། ཁམས་སྡེ་དགེར་སི་ཏུ་གཙུག་ལག་ཆོས་ཀྱི་སྣང་བ་བྱོན་ཏེ་དཔལ་སྤུངས་དགོན་བཏབ། སྒྲ་དང་སྙན་ངག་སྡེབ་སྦྱོར་སོགས་ཀྱི་གཞུང་གསར་འགྱུར་དང་འགྱུར་བཅོས་ཡང་མང་དུ་མཛད། སློབ་མ་མཁས་པ་མང་བོ་བྱོན།

འཇམ་དབྱངས་བཞད་པའི་ཡང་སྤྲུལ་ཀུན་མཁྱེན་འཇིགས་མེད་དབང་བོས་མདོ་དབུས་ཀུན་ནས་སློབ་དཔོན་མང་བོ་བསྟེན་ཏེ་གསན་སྦྱངས་མཛད་པས་མཁས་གྲགས་ཀྱིས་ས་སྟེང་ཁྱབ། ཀུན་མཁྱེན་འཇམ་དབྱངས་བཞད་པའི་དངོས་སློབ་དབྱིག་གྱ་པཎྜི་ཏ་དང༌། བྲ་ཏི་རིན་ཆེན་དོན་འགྲུབ་ཀྱི་དངོས་སློབ་དགེ་བཤེས་བློ་བཟང་དགེ་ལེགས་སི་ཏུའི་དངོས་སློབ་ཀུན་དགའ་སངས་རྒྱས་ལས་ཀྱང་གསན་ཏེ་ཐ་སྙད་རིག་གནས་ཀྱང་དར་སྤེལ་མཛད་པས། མདོ་སྨད་ལྷོ་བྱང་སོགས་ས་ཕྱོགས་ཀུན་ཏུ་འདི་བའི་ཁྲིད་རྒྱུན་དང་ཞལ་རྒྱུན་གྱི་རིག་པའི་གནས་ཀྱི་མེ་ཏོག་དགེ་མཚན་གྱི་དྲི་བསུང་འཐུལ་བ་ད་ལྟའི་བར་དུ་གནས་པ་འདི་བཞིན་ལགས་སོ། །དུས་ཕྱིས་ཁམས་སྡེ་དགེ་ཕྱོགས་སུའང་མཁས་པ་ཆེན་པོ་འགའ་ཞིག་བྱོན་ཏེ། རྫོགས་ཆེན་དཔལ་སྤྲུལ། འཇམ་དབྱངས་མཁྱེན་བརྩེའི་དབང་བོ། ཀོང་སྤྲུལ་ཡོན་ཏན་རྒྱ་མཚོ། འཇུ་མི་ཕམ་སོགས་བྱོན་ཏེ་ཕྱི་ནང་རིག་པའི་གནས་ཀྱི་ལེགས་བཤད་ཀྱི་བདུད་རྩིས་སྐལ་བ་དང་ལྡན་པ་དག་ཚིམ་པར་བྱས་སོ། །འདི་དག་ནི་ཆེ་རགས་ཙམ་བཤད་པ་ཡིན་གྱི་རྒྱས་པར་ནི། རྒྱལ་རབས་དེབ་ཐེར་རྣམས་དང༌། མཁས་པ་རང་རང་གི་རྣམ་ཐར་ལས་ཤེས་པར་བྱའོ།།

 

བོད་ཀྱི་རིག་གནས་རྒྱ་ཡུལ་དུ་དར་ཚུལ།

 

བོད་ཀྱི་རིག་གནས་རྒྱ་ཡུལ་དུ་དར་ཚུལ་ནི། ཆོས་རྒྱལ་མེས་དབོན་གྱི་སྐུ་རིང་ལ། རྒྱ་ནག་གི་བཙུན་པ་དང༌། རིག་པའི་གནས་ལ་མཁས་པ་མང་བོ་བོད་ཡུལ་དུ་བྱོན་ནས། ཆོས་དང་རིག་གནས་སྤེལ་བའི་མཛད་རྗེས་རླབས་ཆེ་ལ། དུས་རབས་ཉི་ཤུ་པའི་མགོ་ཙམ་ནས་བོད་ཀྱི་རིག་གནས་རྒྱ་ཡུལ་དུ་དར་བའི་མགོ་བརྩམས། འཇམ་དབྱངས་བཞད་པ་སྐུ་ཕྲེང་ལྔ་བའི་ཡོངས་འཛིན་གཙང་བ་ཡོངས་འཛིན་ཞེས་གྲགས་པའི་མཁས་པ་ཆེན་པོ་དེ་རྒྱ་ནག་ཏུ་ཕེབས་ཏེ་བྱང་ཆུབ་ཆོས་ཚོགས་ཞེས་པའི་ཚོགས་པ་བཙུགས། ཚོགས་པ་དེ་ལྷོ་ཧྲང་ཧེ་ནས་ཁྲུང་ཆིང་དང་ཁྲིན་ཏུ་བར་དང༌། བྱང་པེ་ཅིན་ནས་ལན་གྲུ་བར་དུ་དར་ཞིང་རྒྱས་ཏེ། ཚོགས་མི་མང་ཆེ་བས་བོད་ཡིག་དང་བོད་ཀྱི་སུམ་རྟགས་སོགས་རིག་གནས་ལ་སྦྱངས། རྒྱའི་བཙུན་པ་དང་མཁས་པ་མང་བོ་དབུས་གཙང་གི་སེ་འབྲས་དང༌། མདོ་སྨད་ཀྱི་བླ་བྲང་སྐུ་འབུམ་སོགས་སུ་ཕེབས་ནས་བོད་ཀྱི་རིག་གནས་ལ་སྦྱངས། དཔེར་ན་བློ་བཟང་ཆོས་འཕགས་ཆོས་ཀྱི་བླ་མ་ཞེས་བྱ་བའི་ལོ་ཙཱ་བ་ཆེན་པོ་དེ་ཉིད་༡༩༠༢ལོར་པེ་ཅིན་གྲོང་ཁྱེར་ཉེ་འདབས་སུ་སྐུ་འཁྲུངས། ཆུང་དུས་ནས་ཡི་གེར་སྦྱངས། དགུང་ལོ་ཉི་ཤུའི་སྐབས་པེ་ཅིན་ཧྥ་ཡོན་དགོན་དུ་བཞུགས། དེ་རྗེས་ཨུ་ཧན་ནང་བསྟན་སློབ་གྲྭར་ཞུགས། དེ་རྗེས་བོད་ཡུལ་ཁམས་སུ་བྱོན་ནས་ལོ་ཤས་ལ་བོད་ཀྱི་སྐད་ཡིག་སྦྱངས། དེ་རྗེས་དབུས་གཙང་དུ་ཕེབས་ཏེ་འབྲས་སྤུངས་སོགས་སུ་བཞུགས། བྲག་དཀར་དགེ་བཤེས་བླ་མར་བསྟེན་ཏེ་བོད་ཀྱི་རིག་པའི་གནས་མང་བོར་སྦྱངས། བསྟན་བཅོས་མངོན་རྟོགས་རྒྱན། ལམ་རིམ་ཆེན་མོ། དྲང་ངེས་རྣམ་འབྱེད་རྒྱ་ཡིག་ཏུ་བསྒྱུར། བོད་རིགས་ཀྱི་ཆོས་སྲིད་ལོ་རྒྱུས་ཞེས་པ་དང་ང་འགྲོ་སའི་བོད་ཡུལ་ཞེས་པ་བརྩམས། ལོ་ངོ་བཅུ་ཕྲག་ལྷག་ལ་བོད་ཡུལ་དུ་བཞུགས། དེ་རྗེས་རྒྱ་ཡུལ་དུ་ཕེབས། ཁྲུང་ཆིང་རྒྱ་བོད་གཞུང་ལུགས་སློབ་གྲྭ་ཆེན་མོ་བཙུགས། སྔ་ཕྱིར་རྣམ་བཤད་དགོངས་པ་རབ་གསལ། སྔགས་རིམ་ཆེན་མོ། རིམ་ལྔ་གསལ་སྒྲོན་སོགས་རྗེའི་གསུང་མང་བོ་དང་དབུ་མ་བཞི་བརྒྱ་བ་སོགས་བསྒྱུར། ཀློང་ཆེན་མཛོད་བདུན་ཡང་བསྒྱུར། དེ་རྗེས་པེ་ཅིན་དུ་ཕེབས་ནས་བཞུགས། བྱེ་བྲག་བཤད་མཛོད་ཆེན་མོ་（大毗婆沙论）བམ་པོ་ཉིས་བརྒྱ་རྒྱ་ཡིག་ནས་བོད་ཡིག་ཏུ་བསྒྱུར། ཉེ་ཆར་༡༩༧༩དང་༡༩༨༠ལོ་གཉིས་རིང་ཚད་མ་རྣམ་འགྲེལ་（释量论释）དང་སྤྱི་དོན་རིགས་རྒྱན་ཡང་བསྒྱུར། ཁོང་ལོ་ཙཱ་བ་ཕྱག་རྗེས་ཅན་ཞིག་རེད། ན་ནིང་(༡༩༨༠)ལོའི་ཟླ་༡༢ པའི་ཚེས་༡༤ ལ་སྐུ་འདས། བཙུན་པ་ཀོང་ཁུང（观空）ཞེས་པའང་བོད་ཡུལ་དུ་ལོ་མང་བོར་སྦྱངས་ནས་ཉེ་ཆར་༡༩༧༩དང་ ༡༩༨༠ལོ་གཉིས་རིང་ལ་རྒྱའི་སློབ་དཔོན་ཝེན་ཚེགས་（圆测大师）ཀྱིས་མཛད་པའི་མདོ་དགོངས་འགྲེལ་གྱི་འགྲེལ་བ་རྒྱ་ཡིག་ཏུ་མི་ཚང་བ་བོད་ཡིག་གི་ཐོག་ནས་བསྒྱུར་ཏེ་ཁབ་སྐངས། ལོ་ཙཱ་བ་དེ་ད་ལྟ་པེ་ཅིན་དུ་ཀྲུང་གོ་ནང་བསྟན་སློབ་གྲྭ་ཆེན་མོའི་སློབ་དཔོན་དུ་བཞུགས་ཡོད། གཞན་ཡང༌། ཀྲང་ཡིས་སུན་（张怡荪）ཞེས་པའི་དགེ་རྒན་ཆེན་མོ་དེས། བོད་རྒྱ་ཚིག་མཛོད་ཆེན་མོའི་རྨང་དང་བོད་རྒྱ་ཤན་སྦྱར་དང༌། རྒྱ་བོད་སྐད་ཚོགས་རྣམས་སྐད་གཉིས་ཤན་སྦྱར་དུ་སྒྲིག་རྩོམ་མཛད། ཐུའུ་བཀྭན་གྲུབ་མཐའི་དུམ་གཅིག་ཀྱང་རྒྱ་ཡིག་ཏུ་བསྒྱུར། ཁོང་ད་ལྟ་དགུང་ལོ་གྱ་བརྒྱད་རེད། ལིའུ་ལི་ཆན་（刘立千）གྱིས་མི་ལ་རས་པའི་རྣམ་ཐར་དང༌། ཐུའུ་བཀྭན་གྲུབ་མཐའ། རྒྱལ་རབས་གསལ་བའི་མེ་ལོང་རྣམས་བསྒྱུར། ཁོང་ད་ལྟ་ཁྲིན་ཏུར་ངལ་གསོས་ནས་བཞུགས་ཡོད། གཞན་ཡང་ཁྲིན་ཏུ་དང༌། དར་མདོ། མཚོ་སྔོན། བླ་བྲང་སོགས་སུ་རྒྱའི་མཁས་པ་མང་བོས་བོད་ཡིག་དང་བོད་ཀྱི་རིག་གནས་སྦྱངས་སོ། །ད་ལྟ་བོད་ཡུལ་ཡོངས་ཁྱབ་ཏུ་སློབ་གྲྭ་བཙུགས་ཏེ་རྒྱ་ཡིག་སློབ་བཞིན་པ་ཡིན་པས། རྒྱའི་རིག་གནས་མཐའ་དག་བོད་ཡུལ་དུ་དར་བའི་མགོ་ཚུགས་ཡོད་དོ།།

 

སོག་ཡུལ་དུ་བོད་ཀྱི་རིག་གནས་དར་ཚུལ།

 

སོག་ཡུལ་དུ་བོད་ཀྱི་རིག་གནས་དར་ཚུལ་ནི། རབ་བྱུང་བཞི་བའི་མེ་ཡོས་ལོར། སོག་རྒྱལ་སྟོབས་ལྡན་ཆིངགི་སི་བོད་དུ་བྱོན་ནས་སྟོད་མངའ་རིས་སྐོར་གསུམ། དབུས་གཙང་རུ་བཞི། ལྷོ་ཁམས་སྒང་གསུམ་ཐམས་ཅད་དབང་དུ་བསྡུས། ས་ཆེན་ཀུན་དགའ་སྙིང་བོ་དང་ཡོན་མཆོད་དུ་གྱུར། དེ་རྗེས་ཆིང་གི་སིའི་ཚ་བོ་གུ་ཡུག་དང་གོ་ཏན་གཉིས་ཀྱིས་ལང་ཀྲུའུ་སོགས་ཁམས་ཀྱི་རྒྱལ་བོ་བྱེད་སྐབས་གོ་ཏན་གྱིས་ས་སྐྱ་པཎ་ཆེན་གྱི་སྙན་གྲགས་ཐོས་ནས། མི་སྣ་བཏང་སྟེ་ས་སྐྱ་པཎ་ཆེན་སོག་ཡུལ་དུ་གདན་དྲངས། དེ་ཡན་ཆད་སོག་པོ་ལ་ཡི་གེ་མེད་པས། ས་པཎ་གྱིས་ཡི་གེ་གསར་བ་བཟོ་བར་བཞེད་པ་ན་བུད་མེད་ཅིག་གིས་པགས་པ་མཉེས་པའི་ཤིང་སོག་ལེའི་ཁ་ལྟ་བུ་ཞིག་ཐོགས་པ་གཟིགས་ནས་སོག་ཡིག་དེའི་དབྱིབས་ཅན་བཟོས་ཏེ། ཨ་ཨེ་ཨི། ན་ནེ་ནི། ས་སེ་སི། ཧ་ཀེ་ཁི། གྷ་གྷེ་གྷི། མ་མེ་མི། ལ་ལེ་ལི། ར་རེ་རི། འ་འེ་འི། ཏ་ཏེ་ཏི། ཐ་ཐེ་ཐི། ཙ་ཙེ་ཙི། ཚ་ཚེ་ཚི། ཡ་ཡེ་ཡི། ཝ་ཝེ་ཝི། རྣམས་ཕོ་མོ་མ་ནིང་ངམ་གྲིམ་ལྷོད་ཞན་གསུམ་དུ་བསྡུས་ནས་ཀློག་པའི་སྲོལ་བཏོད། དེ་རྗེས་རབ་བྱུང་ལྔ་བའི་ས་རྟ་ལོར་ཆོས་རྒྱལ་འཕགས་པས་སོག་ཡིག་འཁོར་མ་གྲུ་བཞི་མ་བཟོས། འོན་ཀྱང་འདི་ཐམ་ཀའི་ངོས་ལ་བེད་སྤྱོད་པ་ལས་སོག་ཡིག་དངོས་གཞི་ནི་ས་པཎ་གྱིས་བཟོས་པའི་པགས་ཤད་ཀྱི་སོ་དབྱིབས་ཅན་དེང་སང་གི་བར་བེད་སྤྱོད་བཞིན་པ་དེ་རེད། དེ་རྗེས་ས་སྐྱ་པ་ཆོས་སྐུ་འོད་ཟེར་སོག་ཡུལ་དུ་བྱོན་ནས་སྔར་ས་པཎ་གྱིས་བཟོས་པའི་ཡི་གེ་ལ་ཡི་གེ་མཇུག་མ་ཅན་མང་བོ་ཅན་མང་བོ་བསྣན་ནས་བོད་ཡིག་གི་ཐོག་ནས་གཞུང་ལུགས་སོག་ཡིག་ཏུ་བསྒྱུར་བའི་མགོ་ཚུགས། དེ་རྗེས་ཤི་རེ་ཐུ་གུ་ཤྲཱིས་ཡུམ་གསུམ་བོད་ཡིག་ལས་སོག་སྐད་དུ་བསྒྱུར། ཆ་ཧར་ལེགས་ལྡན་ཧོ་ཐོག་ཐུའི་དུས་སུ། ཀུན་དགའ་འོད་ཟེར་གཙོ་བྱས་པའི་ལོ་ཙཱ་བ་མང་བོས་བཀའ་འགྱུར་ཡོངས་རྫོགས་སོག་སྐད་དུ་བསྒྱུར། ཁང་ཤི་བདེ་སྐྱིད་རྒྱལ་བོའི་དུས་སོག་ཡིག་གི་བཀའ་འགྱུར་ཞུ་དག་མཛད་ནས་པར་དུ་བསྒྲུབས། གོང་མ་ཆེན་ལུང་རྒྱལ་བོའི་དུས་བསྟན་འགྱུར་ཡོངས་སུ་རྫོགས་པ་སོག་སྐད་དུ་བསྒྱུར་ནས་པར་དུ་བསྐྲུན། འདི་དུས་ལྕང་སྐྱ་རོལ་བའི་རྡོ་རྗེས་སོག་སྐད་དུ་བསྒྱུར་ལ་མེད་མི་རུང་གི་དག་ཡིག་མཁས་པའི་འབྱུང་གནས་ཞེས་བྱ་བ་བོད་སོག་ཤན་སྦྱར་གྱི་མིང་མཛོད་དེ་བརྩམས་སོ། །འོན་ཀྱང་སོག་ཡུལ་དུ་མཚན་ཉིད་ཀྱི་གཞུང་བཀའ་པོད་ཆེན་པོ་ལྔ་དང༌། རྒྱུད་སྡེ་བཞི། སྒྲ་རིག སྨན་རིག སྐར་རྩིས། སྙན་ངག ཟློས་གར་སོགས་བོད་ཡིག་གི་ཐོག་ནས་སློབ་སྦྱོང་བྱེད་པར་མ་ཟད། སུའུ་ལེན་གྱི་མངའ་ཁོངས་པུ་རད་སོགས་སུ་བོད་ཡིག་གི་ཤིང་པར་འབོར་ཆེན་དར་ཏེ། ཧལ་ཧ་（乌兰巴托）རྗེ་བཙུན་དམ་པའི་དགོན་པར་བཀའ་འགྱུར་སོགས་ཀྱི་ཤིང་པར་འབོར་ཆེན་ཡོད་པ་དང༌། དེ་བཞིན་ནང་སོག་མཁར་སྔོན་པོ་（呼和浩特）སོགས་སོག་ཡུལ་དུ་བོད་ཡིག་གི་རིག་གཞུང་མང་བོའི་ཤིང་པར་ཡོད། སོག་པོའི་མཚན་ཉིད་སོགས་རིག་པའི་གནས་སློབ་འདོད་ཀྱི་བཙུན་པ་ཆེས་མང་བོ་དབུས་གཙང་དང༌། བླ་བྲང༌། སྐུ་འབུམ་སོགས་སུ་བྱོན་ནས་སློབ་གཉེར་བྱས་ཏེ་སླར་རང་ཡུལ་དུ་ལོག་ནས་འཆད་ཉན་སྤེལ་བ་ད་ལྟའི་བར་དུ་ཡོད། དེ་ལྟར་སོག་པོ་ལ་རང་གི་ཡི་གེ་ཡོད་མོད། དེ་སྔོན་རིག་གནས་སྣ་ཚོགས་ཀྱི་རྨང་གཞིའི་ཡི་གེ་ནི་བོད་ཡིག་རང་ཡིན་ནོ།།

དེ་བཞིན་དུ་འབྲུག་ཡུལ་（不丹）ཡང་གཞི་རྩའི་ཐོག་བོད་རིགས་ཡིན་གཤིས། ཡི་གེ་ཡང་རྩའི་ཐོག་བོད་ཡིག་རེད། འབྲས་ལྗོངས་（锡金）ཡང་སྔར་བོད་རིགས་ཡིན་གཤིས་སྐད་ཡིག་ཀྱང་བོད་ཀྱི་སྐད་ཡིག་ཡིན་མོད། ད་ལྟ་ཅི་ཡིན་མ་ཤེས། རི་པིན་སོགས་ཡ་གླིང་གི་རྒྱལ་ཁབ་སྟོབས་ལྡན་རྣམས་དང༌། ནུབ་ཕྱོགས་ཀྱི་རྒྱལ་ཁབ་རྣམས་སུའང་བོད་ཀྱི་རིག་གནས་ལ་ཞིབ་འཇུག་བྱེད་པའི་གྲྭ་མང་བོ་བཙུགས་ཏེ་དར་རྒྱས་འབྱུང་བཞིན་པར་འདུག དེས་ན་བོད་རང་ལ། ལེགས་སྦྱར་དང་སུམ་རྟགས་རྩ་བར་བཟུང་བའི་སྒྲ་རིག་པ་ཕུལ་བྱུང་ཆ་ཚང་རང་ཚུགས་ཐུབ་པ་ཞིག་ཡོད། ཚད་མ་རིག་པའང་སློབ་དཔོན་ཆོས་གྲགས་ཡབ་སྲས་ཀྱི་ཚད་མ་རིག་པ་རྩ་བར་བཟུང་བའི་སྟེང་དུ། བོད་རང་གི་མཁས་པ་རྣམས་ཀྱིས་གསར་བསྐྲུན་གྱི་རིག་པ་བསྡུས་གྲྭ་ལྟ་བུས་ཕུན་སུམ་ཚོགས་པར་བྱས་ཏེ་དར་ཞིང་རྒྱས་ནས་རྒྱལ་ཁབ་གཞན་དང་མི་རིགས་གཞན་ལ་མེད་པའི་ཕུན་སུམ་ཚོགས་པ་ཞིག་ཡོད། གསོ་རིག་ཀྱང་ཕྱིའི་གསོ་རིག་དག་གི་ཁར་རང་གི་ཉམས་མྱོང་བསགས་པའི་སྨན་དཔྱད་ལག་རྩལ་བླ་ན་མེད་པ་ཞིག་ཡོད། བར་སྐབས་སུ་ཉམས་མོད། འོན་ཀྱང་ད་ལྟའང་རྨང་འཐུག་པོ་ཡོད། བཟོ་རིག་སྐོར་ལ་བསྟན་འགྱུར་ཁྲོད་ཀྱི་བཟོ་པ་ཊ་དང་མི་ཕམ་གྱིས་མཛད་པའི་བཟོ་པ་ཊ་སོགས་གཞུང་མང་བོ་ཡོད་སྟབས། རྡོ་བཟོ། ཤིང་བཟོ། ལྕགས་བཟོ། དངུལ་བཟོ། གསེར་བཟོ། ལྷ་བཟོ། གོས་ལྷམ་བཟོ་བ། སྣམ་ཕྲུག ས་གདན། ཕྱིང་འཇོག པར་རྐོ། རྡོ་རྐོ། ཤིང་རྐོ་མཁན་སོགས་ལག་ཤེས་བཟོ་ལས་སྣ་ཚོགས་ཡོད། དེ་དག་དེང་དུས་ཀྱི་འཕྲུལ་འཁོར་གྱི་བཟོ་ལས་ལ་བལྟས་ན་རྗེས་ལུས་ཡིན་མོད། མང་ཚོགས་ཀྱི་འཚོ་བའི་ཐད་ལ་འདང་བརྒྱབ་ན་མཐོང་ཆེན་བྱེད་རིན་ཡོད་པ་ཞིག་རེད། ནང་དོན་རིག་པ་རྒྱུད་སྡེ་བཞི་དང་སྡེ་སྣོད་གསུམ་གྱི་འཆད་ཉན་སོགས་དེང་དུས་འཛམ་གླིང་གི་མི་རིགས་གཞན་ལས་ལྷག་པ་ཞིག་ཡོད། དེ་དག་ནི་རིག་གནས་ཆེ་བ་ལྔ་ཡིན་ལ། ཆུང་བ་ལྔའི་སྙན་ངག་ནི། སློབ་དཔོན་དབྱུག་པ་ཅན་གྱི་མེ་ལོང་མའི་ཐོག་ཏུ་བོད་རང་གི་བློ་གྲོས་ཀྱི་ནོར་བསགས་པས་ཕུན་སུམ་ཚོགས་པ་ཞིག་ཡོད། མངོན་བརྗོད་ལ་ནི། འཆི་མེད་མཛོད་དང༌། བོད་རང་གིས་བརྩམས་པའི་མཁས་པའི་རྣ་རྒྱན་སོགས་དགེ་མཚན་ཅན་ཞིག་ཡོད། སྡེབ་སྦྱོར་ནི་རིན་ཆེན་འབྱུང་གནས་ལྟར་ལེགས་སྦྱར་གྱི་སྟེང་ནས་བསྒྲིགས་པ་དང༌། བོད་རང་གི་ཚིག་སྣ་ཚོགས་སྒྲིག་ཚུལ་འཇེབས་ཤིང་ཆ་ཚང་བ་ཞིག་ཡོད། སྐར་རྩིས་ནི། དུས་འཁོར་རྒྱུད་དང་རྒྱ་ནག་གི་རྩིས་རྙིང་དང་རྩིས་གསར་གྱི་སྟེང་དུ་རང་གིས་ཚན་རིག་པའི་དཔྱད་པ་སྣ་ཚོགས་ཀྱི་འབྲས་བུ་བསྣན་པའི་རྩིས་རིག་སྔོན་ཐོན་ཞིག་ཡོད། ཟློས་གར་ནི། དེང་དུས་འཆམ་བཞིན་པའི་ཟློས་གར་ཆེན་པོ་བརྒྱད་གཙོར་བྱས་པའི་སྣ་ཚོགས་ཤིག་དང་གླུ་གར་ཡང་ཀུན་གྱི་རྣ་ལམ་དང་སྤྱན་ལམ་དུ་གྱུར་བ་འདི་བཞིན་ནོ། །དེ་དག་ནི་རིག་གནས་ཆུང་བའོ།།

བོད་དུ་དེང་རབས་ཅན་གྱི་ཚན་རིག་ལག་རྩལ་རྗེས་ལུས་ཡིན་པ་སྨོས་མི་དགོས་མོད། དེ་དག་རྗེས་ལུས་ཡིན་པས་སྔར་གྱི་རྨང་གཞིའི་རིག་གནས་དག་རྒྱང་བསྐྱུར་བྱས་ན། གསར་བ་ཡང་འཛུགས་མི་ནུས་ཏེ་སྔར་ལོ་འགའི་རིང་ལ་བོད་རང་གི་སྐད་ཡིག་རྒྱང་བསྐྱུར་བྱས་ནས་རྒྱ་ཡིག་གི་ཐོག་ནས་རིག་གནས་བསླབས་པ་ཡིན་ཏེ། གྲུབ་འབྲས་རེ་ལོས་ཡོད་མོད་དེ། བུལ་ལ་འབུར་དུ་ཐོན་མི་ཐུབ་པ་འདི་འདྲའོ། །དེས་ན་བོད་རང་གི་སྐད་ཡིག་གི་རྨང་གཞི་ཡོད་པའི་ཐོག་ནས་གསར་བ་བསླབས་ན་སྐྱེད་ཐོན་ཞིང་སྐྱེད་ཐོན་པ་ཅུང་ཟད་མྱུར་བར་འདུག་སྙམ་པས། རྣམ་པར་དཔྱོད་པའི་བློ་གྲོས་ཀྱི་འཇུག་པ་ཡངས་པ་རྣམས་ཀྱིས་དཔྱད་པར་མཛོད་ཅིག་ཅེས་པའང་བསམ་གཏན་རྒྱ་མཚོ་མི་འཇིགས་དབྱངས་ཅན་དགའ་བའི་བློ་གྲོས་སུ་འབོད་པས་རབ་རྒྱལ་ལྕགས་བྱ་(༡༩༨༡)ལོའི་དཔྱིད་ཀར་སུག་ལས་བགྱིས་པ་ཛ་ཡནྟུ།། །།

#ཟླ་ཚེས་བཟང་བོར་སི་ནཱི་བཱ་ལཱིས་སི་ཁྲོན་མི་རིགས་དཔེ་སྐྲུན་ཁང་གིས་སྤྱི་ལོ་༢༠༠༩ལོར་པར་དུ་བསྐྲུན་པའི་ཁོང་གི་གསུང་འབུམ་པོད་དྲུག་གི་བདག་ཉིད་ཅན་གྱི་པོད་མཐའ་མ་ལས་ཁོལ་དུ་ཕྱུང་སྟེ་སྤེལ་བ་དགེའོ།།