སངས་རྒྱས་སྤྱོད་པ།
स्त्री-निवारण
བུད་མེད་ཀྱིས་བགེགས་བྱས་པའི་ལེའུ་བཞུགས་སོ།།
དེ་ནས་སྐྱེད་མོས་ཚལ་དེ་ནས། །ཡ་མཚན་གྱིས་ནི་མིག་གཡོ་རྣམས། །
བུད་མེད་རྣམས་ནི་ཁྱོ་ཐོབ་བཞིན། །མི་སྐྱོང་སྲས་ཀྱི་མདུན་དུ་འོངས། །
འོངས་ནས་དེ་ལ་དེ་རྣམས་ཀྱིས། །ཡ་མཚན་རབ་རྒྱས་སྤྱན་མ་རྣམས། །
པདྨའི་མཛོད་འདྲའི་ཕྱག་རྣམས་ཀྱིས། །ཕྲིན་ལས་ཡང་དག་སྤྱོད་པ་བྱས། །
གཡོ་མེད་དགའ་བ་རྣམ་གསལ་བའི། །སྤྱན་མིག་རྣམས་ཀྱིས་འཐུང་བ་བཞིན། །
ཡིད་དཀྲུགས་འདོད་པས་སེམས་གཡེངས་རྣམས། །དེ་ལ་ཡོངས་སུ་བསྐོར་ནས་གནས། །
ལྷན་སྐྱེས་རྒྱན་རྣམས་ཀྱིས་བཞིན་དུ། །མཚན་མ་མཛེས་རྣམས་ཀྱིས་བརྒྱན་པ། །
འདོད་ལྷ་ལུས་དང་ལྡན་ནོ་ཞེས། །དེ་ལ་མི་མོ་དེ་རྣམས་སྙམ། །
ཞི་བ་ཉིད་ཕྱིར་བརྟན་ཉིད་ཕྱིར། །ཁ་ཅིག་གསང་བའི་འོད་ཟེར་ཅན། །
ས་ལ་དངོས་སུ་བབས་པ་ཡི། །ཟླ་བ་བཞིན་དུ་རྟོག་པར་གྱུར། །
དེ་ཡི་ལུས་ཀྱིས་གཡེངས་དེ་རྣམས། །ངེས་བཟུང་ལུས་ནི་རྣམ་འགྱུར་ཞིང་། །
ཕན་ཚུན་མིག་རྣམས་ཀྱིས་བསྣུན་ནས། །དལ་བུས་དབུགས་ནི་རྣམ་པར་བརྒྱུས། །
དེ་ལྟར་མི་མོ་དེ་རྣམས་ཀྱིས། །དེ་ནི་མིག་ཙམ་གྱིས་མཐོང་ཉིད། །
སྨྲ་བ་མེད་ཅིང་དགའ་མེད་པར། །འདི་ཡི་མཐུ་ཡིས་ནོན་པར་གྱུར། །
དེ་ལྟར་དེ་རྣམས་རྩོམ་བྲལ་ཞིང་། །སྙིང་རྗེས་རྣམ་པར་འཁྲུགས་མཐོང་ནས། །
བྲམ་ཟེ་མདུན་ན་འདོན་གྱི་སྲས། །བློ་ལྡན་འཆར་ཀས་ཚིག་སྨྲས་སོ། །
ཀུན་གྱི་སྒྱུ་རྩལ་ཀུན་ཤེས་ཤིང་། །དགོངས་པ་ལེན་ལ་མཁས་མ་རྣམས། །
གཟུགས་དང་མཛངས་དང་ལྡན་པ་སྟེ། །རང་གི་ཡོན་ཏན་གཙོར་ཕྱིན་ནོ། །
ལུས་ངན་གྱི་ཡང་སྐྱེད་ཚལ་དང་། །བྱང་གི་སྒྲ་མི་སྙན་ན་ཡང་། །
ཡོན་ཏན་འདི་རྣམས་ཀྱིས་མཛེས་ཏེ། །ནོར་འཛིན་འདི་ན་སྔོན་ཉིད་དོ། །
ཆགས་བྲལ་རྣམས་དང་དྲང་སྲོང་ཡང་། །ཁྱེད་ཅག་རྣམས་ཀྱིས་གཡོ་ནུས་ཤིང་། །
ལྷ་མོ་རྣམས་ཀྱིས་ཤེས་པ་ཡིས། །ལྷ་རྣམས་ལ་ཡང་ལེན་པར་རོ། །
དགོངས་པ་ཤེས་དང་རྩེད་འཇོ་དང་། །མཛངས་དང་གཟུགས་ནི་ཕུན་ཚོགས་པས། །
བུད་མེད་རྣམས་ཀྱང་ཆགས་ནུས་ན། །སྐྱེས་པ་རྣམས་ནི་སྨོས་ཅི་དགོས། །
རྣམ་པ་དེ་ལྟར་རབ་སྦྱར་བ། །དེ་ཡི་རང་གི་སྤྱོད་ཡུལ་ལས། །
རྣམ་པ་དེ་ལྟར་སྤྱོད་པ་འདི། །ཁྱོད་ཀྱི་དྲང་བོའི་ཚིག་མ་གྱུར། །
ཁྱོད་ཀྱི་འདི་ནི་ངོ་ཚ་བས། །མིག་འཁུམས་བག་མ་གསར་བ་ཡི། །
སྤྱོད་པ་དང་མཚུངས་ཡང་ན་ནི། །བ་གླང་སྐྱོང་གི་ཆུང་མའི་འོས། །
གང་ཡང་འདི་ནི་དཔའ་བ་སྟེ། །དཔལ་གྱི་མཐུ་ལས་ཆེན་པོ་ཡིན། །
བུད་མེད་ཀྱི་ཡང་གཟི་ཆེ་སྟེ། །དེ་ཕྱིར་འདི་ཡང་ངེས་པར་བྱ། །
སྔོན་ཡང་ཀཱ་ཤིའི་མཛེས་མ་ནི། །སྨད་འཚོང་མ་ཡི་དྲང་སྲོང་ཆེ། །
ལྷ་ཡིས་ཐུབ་པར་དཀའ་བ་ཡང་། །དྲང་སྲོང་རྒྱས་པས་རྐང་བས་བརྡུངས། །
མཱན་ཐལ་གཽ་ཏམ་དགེ་སློང་ནི། །སྨད་འཚོང་གཙོ་མོ་བྱིན་མ་ཡི། །
དགའ་འདོད་དེ་ཡི་དོན་ཆེད་དུ། །སྔོན་གྱི་ཚེ་ན་རོ་རྣམས་བཏོན། །
མུན་རིངས་མིང་ཅན་གཽ་ཏ་མ། །དྲང་སྲོང་ཆེན་པོ་ཚེ་རིངས་པོ། །
ཁ་དོག་དབྱིབས་མཆོག་མ་ཡིན་པའི། །བུད་མེད་ཀྱིས་ནི་ཚིམ་པར་བྱས། །
དྲང་སྲོང་རྭ་སྐྱེས་ཐུབ་པ་མཆོག །བུད་མེད་ཡུལ་ལ་མི་མཁས་པ། །
རྣམ་པ་སྣ་ཚོགས་ཐབས་རྣམས་ཀྱིས། །ཞི་མས་དེ་ལྟར་བླངས་ཤིང་ཕམ། །
སྣ་ཚོགས་བཤེས་གཉེན་དྲང་སྲོང་ཆེ། །བརྟུལ་ཞུགས་ཆེན་པོ་བརྟན་པ་ཡང་། །
ལྷ་མོ་མར་སྲུང་མས་ཕྲོགས་ཏེ། །ལོ་བཅུ་རྣམས་ལ་ཉི་མར་ཤེས། །
དྲང་སྲོང་དེ་རྣམས་དེ་རྣམས་སོགས། །བུད་མེད་ཀྱིས་བསྒྱུར་བླངས་གྱུར་ན། །
རོལ་ཞིང་ལང་ཚོ་སྔ་མ་ཡིས། །མི་བདག་སྲས་པོ་སྨོས་ཅི་དགོས། །
དེ་ལྟར་གྱུར་ན་ཡིད་ཆེས་ཤིང་། །འདི་ནི་མི་སྐྱོང་རིགས་ཀྱི་དཔལ། །
འདི་ལས་ཕྱིར་ཕྱོགས་མ་ཡིན་པ། །ཇི་ལྟར་དེ་ལྟར་ནན་ཏན་མཛོད། །
ལང་ཚོ་ལྡན་མ་འགའ་ཞིག་རྣམས། །མཚུངས་པའི་སྐྱེ་བོ་འཕྲོག་པ་སྟེ། །
མཆོག་དང་མཆོག་མིན་དག་གི་སེམས། །ལེན་པ་གང་དེ་བུད་མེད་རྣམས། །
དེ་ལྟར་འཆར་ཀའི་ཚིག་ཐོས་ནས། །བུད་མེད་དེ་རྣམས་ཕུག་པ་བཞིན། །
གཞོན་ནུ་ལེན་པར་རབ་མཚོན་ཏེ། །བདག་ཉིད་ཡང་དག་ཀུན་ནས་འཛེགས། །
འཇིགས་ལས་འཇིགས་བཞིན་ཡན་ལག་མ། །དེ་རྣམས་སྨིན་དང་ལྟ་དང་སྒེག །
དགོད་དང་རོལ་དང་འགྲོ་བ་ཡིས། །ཀུན་ནས་བསྐྱོད་པའི་སྤྱོད་པ་བྱས། །
རྒྱལ་བོའི་བཀའ་ལུང་སྦྱར་ཕྱིར་དང་། །གཞོན་ནུ་ཉིད་ཀྱང་འཇམ་ཕྱིར་དང་། །
རྒྱགས་པ་ཡིས་ནི་མྱོས་པའི་ཕྱིར། །ཡིད་མི་ཆེས་པ་མྱུར་བར་དོར། །
གླང་མོའི་ཚོགས་དང་ཐབས་ཅིག་ཏུ། །གླང་བོ་གངས་ཅན་ནགས་ན་ལྟར། །
དེ་ནས་མི་མོའི་སྐྱེ་བོ་ཡིས། །གཞོན་ནུ་བསྐོར་ཞིང་ནགས་ན་སྤྱད། །
ཡིད་འོང་ནགས་དེར་གཞོན་ནུ་དེ། །བུད་མེད་རྣམས་ཀྱི་མདུན་འགྲོ་འབར། །
རྣམ་པར་མཛེས་པའི་སྐྱེད་ཚལ་ན། །ལྷ་མོས་བསྐོར་བའི་ཉི་མ་བཞིན། །
རྣམ་པར་སྒེག་བཅས་གཞོན་ནུ་མ། །རྒྱགས་པས་མ་སྤངས་དེ་རྣམས་དགའ། །
སྲ་ཞིང་ཟླུམ་རྒྱས་ལྷན་ཅིག་པའི། །ནུ་མ་རྣམས་ཀྱིས་དེ་ལ་རེག །
དཔུང་བ་ལས་བྲུལ་འཇམ་རིང་མཉེན། །ལག་པའི་ལྗོན་ཤིང་སྟོབས་མེད་མ། །
ཁ་ཅིག་བདེན་མིན་འཁྲུལ་བ་རུ། །བྱས་ནས་དེ་ལ་སྟོབས་ཀྱིས་འཁྱུད། །
ཁ་ཅིག་ཟངས་མཆུ་མ་མཆུ་ཅན། །ཁ་ཅིག་ཆང་གི་དྲི་ངག་གིས། །
གཅིག་པུ་དབེན་པར་སྡོད་ཅིག་ཅེས། །འདི་ཡི་རྣ་བར་ཤབ་ཤུབ་བྱེད། །
ཁ་ཅིག་བཀའ་ལུང་སྩོལ་བ་བཞིན། །བྱུག་པ་གཤེར་མས་རབ་སྨྲས་ཏེ། །
འདིར་ནི་གུས་པར་གྱིས་ཤིག་ཅེས། །དགོད་དང་འཁྱུད་དང་འདོད་པས་སོ། །
ཁ་ཅིག་གསེར་གྱི་སྐ་རགས་ཀྱི །ཅལ་ཅོལ་རྣམས་ཀྱིས་ཙམ་ཙོམ་དང་། །
ཕྲ་མོའི་དར་གྱི་གོས་གྱོན་ཞིང་། །འདི་ལ་རོ་སྨད་སྟོན་ཅིང་བསྐོར། །
ཡང་དང་ཡང་དུ་མྱོས་པའི་སྒྱུས། །གཞན་མ་དར་སྔོན་ཉིལ་བ་སྟེ། །
སྐ་རགས་ཕན་ཚུན་སྡུད་པ་ནི། །མཚན་མོ་གློག་ཕྲེང་བཞིན་དུ་མཛེས། །
ཙཱུ་ཏའི་ཡལ་ག་མེ་ཏོག་རྒྱས། །བཟུང་ནས་གཞན་ནི་འཕྱང་གྱུར་ལ། །
གསེར་གྱི་བུམ་པར་མཚུངས་པ་ཡི། །འོ་མ་འཛིན་པ་སྟོན་པར་བྱེད། །
ཁ་ཅིག་པདྨའི་ནགས་ཚལ་ནས། །འོངས་ནས་པད་བཅས་པདྨའི་སྤྱན། །
པདྨའི་ཞལ་གྱི་ལོགས་གནས་ཤིང་། །པདྨའི་དཔལ་བཞིན་བསྡད་པར་གྱུར། །
རང་གནས་དེ་ལ་བསྐུལ་བ་བཞིན། །བསླུས་པར་གྱུར་ཞེས་མིག་རྣམས་ཀྱིས། །
ཁ་ཅིག་མངོན་པའི་གར་དང་བཅས། །དོན་ལྡན་དངར་བའི་གླུ་ལེན་ནོ། །
དགེ་བའི་གདོང་གིས་གཞན་མས་ནི། །སྨིན་པའི་གཞུ་ནི་རྣམ་བཀང་སྟེ། །
བསྐོར་གནས་བརྟན་དང་རོལ་བ་ཡིས། །འདི་ཡི་སྤྱོད་ལ་རྗེས་ཟློས་བྱས། །
རྒྱས་ཟླུམ་ནུ་ལྡན་ཁ་ཅིག་ནི། །དགོད་པས་རྣ་ལུང་གཡོས་གྱུརད་ཅིང་། །
ཁྱོད་ནི་ཐོབ་པར་གྱུརད་ཅིག་ཅེས། །མཐོན་པོ་རྣམས་ཀྱིས་བཞད་ཅིང་སྨྲས། །
གཞན་ནི་དེ་བཞིན་འགྲོ་འདོད་པ། །མེ་ཏོག་ཕྲེང་བའི་ཚལ་གྱིས་བཅིངས། །
ཁ་ཅིག་ཅོད་བཅས་དངར་མོ་ཡི། །ངག་གི་ཞགས་པ་རྣམས་ཀྱིས་བཟུང་། །
སོ་སོར་འབྲལ་བ་དོན་གཉེར་འགའ། །ཙཱུ་ཏའི་སྙེ་མ་བཟུང་ནས་ནི། །
མེ་ཏོག་འདི་ནི་གང་གི་ཞེས། །རྒྱགས་པས་རྣམ་པར་འཁྲུགས་ཤིང་དྲིས། །
ཁ་ཅིག་འགྲོས་དང་ཆ་ལུགས་ནི། །སྐྱེས་པ་བཞིན་དུ་བྱས་ནས་ནི། །
ས་འདི་རྒྱལ་བར་གྱུར་ཅིག་ཀྱེ། །བུད་མེད་ལས་རྒྱལ་དེ་ལ་སྨྲས། །
དེ་ནས་གཡོ་བའི་མིག་ཅན་འགས། །ཨུཏྤལ་སྔོན་པོ་སྣོམ་བྱེད་ཅིང་། །
ཅུང་ཞིག་རྒྱགས་སྐད་ཚིག་རྣམས་ཀྱིས། །མི་སྐྱོང་བདག་སྐྱེས་ལ་སྨྲས་སོ། །
གཟིགས་ཤིག་ཇོ་བོ་ཙཱུ་ཏའི་ཤིང་། །མེ་ཏོག་སྦྲང་རྩིའི་དྲིས་ཁྱབ་ལ། །
ཁུ་བྱུག་འདིར་ནི་སྐད་འདོན་པ། །གསེར་གྱི་གུར་ན་བཀག་པ་འདྲ། །
མྱ་ངན་མེད་པའི་ཤིང་འདི་གཟིགས། །འདོད་པ་ཅན་གྱི་མྱ་ངན་འཕེལ། །
བུང་བ་འདིར་ནི་སྒྲ་སྒྲོགས་པ། །མེ་ཡིས་ཚིག་པ་ཡིན་པ་འདྲ། །
ཙཱུ་ཏའི་ཤིང་གིས་ཡང་དག་འཁྱུད། །གཟིགས་ཤིག་ཏི་ལ་ཀ་ཡི་ཤིང་། །
བུད་མེད་ལུས་སེར་ཆགས་པ་ཡིས། །སྐྱེས་པ་གོས་དཀར་གོན་པར་འདྲ། །
རབ་རྒྱས་ཀུ་ར་བ་ཀར་གཟིགས། །མ་ཟོས་པ་ཡི་སྨུག་རྩིའི་འོད། །
བུད་མེད་རྣམས་ཀྱི་སེན་འོད་ཀྱིས། །སྨ་ཕབ་གྱུར་ཏེ་དུད་པ་འདྲ། །
གཞོན་ནུ་མྱ་ངན་མེད་འདི་གཟིགས། །འདབ་མ་རྣམས་ཀྱིས་སྤྲས་པ་གང་། །
ཁོ་མོའི་ལག་པ་མཛེས་པ་ཡིས། །ངོ་ཚར་གྱུར་ཏེ་གནས་པ་འདྲ། །
རྫིང་བུ་གཟིགས་ཤིག་འགྲམ་སྐྱེས་པའི། །ལྕང་མ་རྣམས་ཀྱིས་རབ་ཏུ་བསྐོར། །
དཀར་བོའི་དར་གྱི་གོས་གོན་པའི། །རབ་མྱོས་མ་རྣམས་ཉལ་བ་འདྲ། །
བུད་མེད་རྣམས་ལ་བདག་ཉིད་ཆེ། །གཟིགས་ཤིག་ངང་བ་ཆུ་འདི་ལ། །
རྒྱབ་ན་བསྒོ་བྱའི་བྲན་བཞིན་དུ། །ངང་མོ་རྗེས་འཇུག་རྗེས་སུ་འགྲོ། །
རབ་ཏུ་མྱོས་པའི་ཁུ་བྱུག་ནི། །སྐད་གྲགས་སྒྲ་ནི་གསོན་མཛོད་ཅིག །
ཁུ་བྱུག་གཞན་ནི་དེ་མ་ཐག །ཀུས་འདེབས་བྲག་ཅའི་སྒྲ་བརྙན་འདྲ། །
མཁའ་ལ་རྒྱུ་བ་རྣམས་ཀྱི་ཡང་། །རྒྱགས་པ་དཔྱིད་ཀྱིས་ཁྱེར་ཏེ་འོངས། །
བསམ་བྱ་མིན་སེམས་སྐྱེ་བོ་ནི། །ཤེས་རབ་ཅན་དུ་རློམ་པ་མེད། །
དེ་ལྟར་དར་ལ་བབ་པ་རྣམས། །ཡིད་དཀྲུགས་འདོད་པས་སེམས་དྲེགས་ཤིང་། །
སྣ་ཚོགས་ཚུལ་ནི་དེ་དང་དེས། །གཞོན་ནུ་ལ་ནི་ཉེ་བར་བརྩམས། །
དེ་ལྟར་ཀུན་ནས་གཡེངས་ན་ཡང་། །བརྟན་པས་དབང་བོ་དཀྲིས་པ་དེ། །
འཆི་བར་བྱ་ཞེས་སྐྱོ་བྱས་ཤིང་། ། དགའ་དང་འཇིགས་པ་མེད་པར་འགྱུར། །
དེ་རྣམས་ཀྱི་ནི་གནས་སྐབས་དེ། །གཟིགས་ནས་སྐྱེས་མཆོག་དམ་པ་དེས། །
མཉམ་ལ་སྐྱོ་དང་བརྟན་པ་ཡི། །ཐུགས་ཀྱིས་བསམས་པར་གྱུར་བའོ། །
ཅི་ཞིག་བུད་མེད་འདི་རྣམས་ནི། །ལང་ཚོ་གཡོ་བར་རྟོགས་པ་མིན། །
གང་ཕྱིར་གཟུགས་ཀྱི་མྱོས་པ་ནི། །གང་ཞིག་རྒ་བས་ཉམས་པར་འགྱུར། །
གང་གི་ནང་དུ་བྱིང་བ་རུ། །ངེས་པར་དེ་རྣམས་ཀྱིས་མི་མཐོང་། །
འགྲོ་བ་ནད་ཀྱི་ཆོས་ཅན་ལ། །འཇིགས་པ་སྤངས་ཏེ་དེ་ལྟར་དགའ། །
ཐམས་ཅད་འཕྲོག་བྱེད་འཆི་བ་ཡི། །ངེས་པར་མངོན་པར་ཤེས་མིན་ཞིང་། །
དེ་ལྟར་རང་གནས་སྐྱོ་མེད་པར། །རྩེད་མོ་དང་ནི་བཞད་གད་བྱེད། །
རྒ་དང་ན་དང་འཆི་བ་ཡང་། །ཤེས་ལྡན་ཡིན་ན་སེམས་ལྡན་སུ། །
རང་གནས་ལངས་དང་འདུག་པ་འམ། །ཉལ་བྱེད་རྒོད་པ་སྨོས་ཅི་དགོས། །
ནད་དང་འཆི་བ་ཉིད་དང་ནི། །མཆོག་ཏུ་འཁོགས་གང་དེ་མཐོང་ནས། །
རང་གནས་གྱུར་ཞིང་སྐྱོ་མེད་པ། །ཇི་ལྟར་སེམས་མེད་དེ་ལྟར་དེ། །
མེ་ཏོག་རྣམས་དང་འབྲས་བུ་ཡིས། །རྣམ་པར་སྤངས་པར་གྱུར་བའི་ཤིང་། །
འགྱེལ་ལམ་ཡང་ན་བཅད་པ་སྟེ། །ཤིང་གཞན་མྱ་ངན་བྱེད་མ་ཡིན། །
དེ་ལྟར་བསམ་གཏན་མཆོག་མཐོང་ནས། །ཡུལ་རྣམས་ལ་ནི་འདོད་པ་ཐལ། །
འཆར་ཀ་ཚུལ་ལུགས་བསྟན་བཅོས་ཤེས། །མཛའ་བ་ཉིད་ཀྱིས་དེ་ལ་སྨྲས། །
ཁོ་བོ་མི་སྐྱོང་གིས་བྱིན་ཏེ། །ཁྱོད་ལ་གྲོགས་སུ་ནུས་པ་ལོ། །
གང་ཕྱིར་ཁྱེད་ལ་སྨྲ་འདོད་པ། །རབ་དགའ་ལྡན་པ་དེ་ཕྱིར་རོ། །
ཕན་པ་མིན་ལས་རབ་བཟློག་ཅིང་། །ཕན་པ་ལ་ཡང་རྗེས་འཇུག་བགྱིད། །
སྡུག་ཀྱང་ཡོངས་སུ་མི་གཏོང་བ། །གྲོགས་པོའི་མཚན་ཉིད་རྣམ་པ་གསུམ། །
བདག་དེ་བྱམས་པར་དམ་བཅས་ནས། །སྐྱེས་བུའི་དོན་ལས་ཕྱིར་ཕྱོགས་པ། །
གལ་ཏེ་ཁྱོད་ལ་བཏང་སྙོམས་བྱེད། །བདག་ལ་མཛའ་བརྩེ་མེད་པར་འགྱུར། །
དེ་ཕྱིར་མཛའ་བོར་གྱུར་ནས་སྨྲས། ། གཞོན་ནུའི་ལུས་དང་ལྡན་པ་ནི། །
ཁྱོད་ཀྱིས་འདི་འདྲ་བུད་མེད་ཀྱིས། །ཡུལ་ལ་མཁས་པའི་གཟུགས་བརྙན་མིན། །
དེ་ཡི་ངོ་ཚའི་རྒོད་དོན་དང་། །བདག་ཉིད་དགའ་བའི་དོན་ཉིད་དུ། །
བདེན་མིན་གྱིས་ཀྱང་མི་མོ་ཡི། །རྗེས་སུ་འཇུག་པ་རིགས་པ་ཡིན། །
ཡང་དག་འདུད་དང་རྗེས་འཇུག་གི། །བུད་མེད་རྣམས་ཀྱིས་སེམས་འཆིང་སྟེ། །
བརྩེ་བའི་ཡོན་ཏན་སྐྱེ་གནས་ཕྱིར། །ཡིད་ལ་འདོད་པ་བུད་མེད་ཡིན། །
དེ་ཕྱིར་རྣམ་པར་ཡངས་པའི་སྤྱན། །སྙིང་ལ་གཞན་དུ་ཕྱིར་བལྟས་ཀྱང་། །
འདི་ཡི་ཚུལ་དང་རྗེས་མཐུན་པར། །མཁས་པ་རྣམ་པར་དཔྱད་པར་འོས། །
མཁས་པ་སྨན་ཡིན་བུད་མེད་ལ། །མཁས་པ་རབ་མཆོག་རྒྱན་ཡིན་ནོ། །
མཁས་པ་དང་བྲལ་གཟུགས་དག་ནི། །མེ་ཏོག་མེད་པའི་ནགས་དང་འདྲ། །
ཡང་ན་མཁས་པའི་རང་བཞིན་གྱི། །བསམ་པ་རང་བཞིན་ཁས་ལེན་མཛོད། །
ཡུལ་རྣམས་ཉེས་པར་དཀའ་ཐོབ་ནས། །ཕྱི་བཤོལ་བྱེད་པ་འོས་མ་ཡིན། །
སྔོན་ཚེ་ལྷ་ཡི་དབང་བོས་ཀྱང་། །འདོད་པ་མཆོག་ཅེས་ཤེས་བྱས་ནས། །
གཽ་ཏམ་ཐུབ་པའི་དགའ་ལྡན་མ། །བཤོལ་མེད་མ་ལ་འདོད་པ་བྱས། །
ཟླ་བའི་ཆུང་མ་སྣར་མ་ནི། །དྲང་སྲོང་རི་བྱིས་དོན་དུ་གཉེར། །
དེ་ནས་དེ་དང་འདྲ་བ་ཡི། །བརྐམ་བྱ་མ་ནི་རྙེད་ཅེས་ཐོས། །
ཨུ་ཏ་ཐྱ་ཡི་ཆུང་མ་ནི། །རླུང་གི་བུ་མོ་མཐུན་མ་ལ། །
དཀའ་ཐུབ་ཆེན་པོའི་ཕུར་བུ་ཡིས། །བྷ་ར་དྭཱ་ཛ་བསྐྱེད་པར་གྱུར། །
དྲང་སྲོང་ཕུར་བུའི་ཆུང་མ་ནི། །སྦྱིན་སྲེག་མ་ལ་སྦྱིན་སྲེག་མཆོག །
ཟླ་བ་ཡིས་ནི་ལག་པ་ཡི། །ལྷ་ཡི་ལས་བྱེད་བསྐྱེད་པར་གྱུར། །
སྔོན་ཚེ་བུ་མོ་ནག་མོ་ནི། །ཆུར་སྐྱེས་མ་ལས་སྐྱེས་མ་ལ། །
རྩིབ་ལོགས་སྐྱེས་ནི་ཆགས་སྐྱེས་ཤིང་། །ཡ་མུ་ན་ཡི་འགྲམ་དུ་ཕྱིན། །
གནོད་སྦྱིན་ཕྲེང་མ་རིགས་ངན་མ། །སྨོད་མ་ལ་ནི་དགའ་འདོད་པས། །
གོང་མ་སྲེག་ནི་ཟ་བའི་བུ། །ཐུབ་པ་གནས་མཆོག་གིས་བསྐྱེད་དོ། །
འགྲོ་མགྱོགས་རྒྱལ་བོ་དྲང་སྲོང་ཉིད། །ན་ཚོད་རྣམ་པར་སོང་བ་ཡི། །
ལྷ་མོ་སྣ་ཚོགས་མཆོད་མར་བཅས། །སྣ་ཚོགས་ཤིང་རྟའི་ནགས་སུ་སྤྱད། །
བུད་མེད་འགྲོགས་པ་ཞི་མིན་དུ། །སྐྱ་བསེང་གིས་ནི་ཤེས་ནས་ཀྱང་། །
དགའ་མའི་གཟུགས་ཡོན་གྱིས་བཀུག་སྟེ། །འདོད་ལས་སྐྱེས་པའི་བདེ་བ་བསྟེན། །
སྐྱེད་མཛད་རྒྱལ་བོ་དམར་སེར་ཡང་། །བྲམ་ཟེའི་བུ་མོ་ཕྲོགས་ནས་ནི། །
ན་བབས་ཐོབ་པ་ཉིད་ཡིན་ཡང་། །ཡིད་དཀྲུགས་འདོད་པ་མ་བསྟེན་མིན། །
དེ་ལ་སོགས་པ་བདག་ཉིད་ཆེས། །ཡུལ་རྣམས་སྨད་པ་ཡིན་ན་ཡང་། །
དགའ་བའི་ཆེད་དུ་ལོངས་སྤྱད་དེ། །ཡོན་ཏན་ལྡན་ལ་སྔོན་ཉིད་དོ། །
ཁྱོད་ཀྱང་རིགས་པ་ལས་ཐོབ་ཅིང་། །སྟོབས་ལྡན་གཟུགས་ལྡན་དར་ལ་བབ། །
གང་དུ་སྐྱེ་འགྲོ་འདི་ཆགས་ན། །ཡུལ་རྣམས་ལ་ནི་ཕྱི་བཤོལ་བྱེད། །
དེ་ལྟར་འཇམ་ཞིང་ལུང་དང་བཅས། །དེ་ཡིས་ཚིག་ནི་གསན་གྱུར་ནས། །
འབྲུག་གི་སྒྲ་སྐད་དབྱངས་ཀྱིས་ནི། །གཞོན་ནུ་ཡིས་ནི་ལན་སྨྲས་སོ། །
ངག་ཚིག་འདི་ནི་འཐད་པ་སྟེ། །ཁྱོད་ཀྱི་མཛའ་བ་གསལ་བྱེད་དོ། །
གང་དུ་བདག་ལ་ངན་པར་སེམས། །འདིར་ནི་ཁྱོད་ལ་རྗེས་ཞི་བགྱི། །
ཡུལ་རྣམས་ལ་ནི་ཕྱི་བཤོལ་བྱེད། །འཇིག་རྟེན་དེའི་བདག་ཉིད་དུ་ཤེས། །
འགྲོ་བ་མི་རྟག་པར་ཤེས་ནས། །འདིར་ནི་བདག་ཡིད་དགའ་བ་མིན། །
རྒ་དང་ན་དང་འཆི་བ་སྟེ། །གལ་ཏེ་འདི་གསུམ་མ་ཡིན་ན། །
ཡིད་དུ་འོང་བའི་ཡུལ་རྣམས་ལ། །ཁོ་བོ་ཡང་ནི་དགའ་བར་འགྱུར། །
གལ་ཏེ་བུད་མེད་རྣམས་ཀྱི་ལུས། །དེ་ཉིད་རྟག་པར་འགྱུར་ན་ནི། །
སྐྱོན་ལྡན་འདོད་པ་རྣམས་ལ་ཡང་། །ཁོ་བོའི་སེམས་ནི་འདོད་ལ་ཕྱོགས། །
གང་ཚེ་འདི་དག་རྣམས་ཀྱི་གཟུགས། །རྒས་པས་འཐུང་བ་འབྱུང་འགྱུར་ཞིང་། །
བདག་ཉིད་ཀྱི་ཡང་འདོད་མེད་ན། །རྨོངས་ལས་དེར་ནི་དགའ་བར་འགྱུར། །
རྒ་དང་ན་དང་འཆི་བའི་ཆོས། །རྒ་ན་འཆི་བའི་བདག་ཉིད་ཀྱིས། །
སྐྱོ་བ་མེད་པར་རོལ་བ་ནི། །རི་དྭགས་དང་ནི་བྱ་དང་མཚུངས། །
བདག་ཉིད་ཆེན་པོ་འདི་རྣམས་ཀྱང་། །འདོད་པའི་བདག་ཉིད་ཅེས་སྨྲས་གང་། །
འདིར་ནི་སྐྱོ་བར་བྱ་བ་སྟེ། །གང་ཕྱིར་དེ་རྣམས་ཀྱི་ཡང་ཟད། །
གང་དུ་སྤྱི་ལས་ཟད་པ་དེ། །བདག་ཉིད་ཆེན་པོར་མི་སེམས་ཏེ། །
ཡུལ་རྣམས་ལ་ནི་ཆགས་པ་འམ། །སྦྱོར་མིན་བདག་ཉིད་ལྡན་ཉིད་ཀྱིས། །
མཁས་པ་ཡིས་ཀྱང་དཔེ་བརྗོད་ཅིང་། །བདེན་མིན་གྱིས་ཀྱང་བུད་མེད་ཀྱི། །
སྐྱེ་ལ་ཞུགས་ཞེས་སྨྲས་པ་གང་། །བདེན་མིན་བདག་གིས་ཤེས་མ་ཡིན། །
གང་དུ་དྲང་མིན་རྗེས་འཇུག་པ། །དེ་ལ་བདག་ནི་སྲེད་པ་མེད། །
བསམ་པ་ཀུན་གྱི་འབྲེལ་བ་དེ། །གལ་ཏེ་མེད་ན་སྨོད་པར་ཤོག །
མི་བརྟན་པ་ཡི་དད་པ་དང་། །སྐྱོན་དུ་མཐོང་བའི་ནུས་པ་མེད། །
ཆགས་པ་སྐྱེས་པར་གྱུར་བའི་སེམས། །སླུ་བར་བྱ་བ་ཅི་ཞིག་ཡིན། །
བུད་མེད་སྐྱེས་པའི་ཆགས་སྐྱེས་ཤིང་། །བུད་མེད་སྐྱེས་པ་ཕན་ཚུན་དུ། །
གལ་ཏེ་དེ་ལྟར་བསླུ་ན་ནི། །ལྟ་བར་བཟོད་པ་ཉིད་མ་ཡིན། །
དེ་ལྟར་གྱུར་ན་སྡུག་བསྔལ་གྱིས། །ཉམ་ཐག་རྒ་འཆིའི་སྐལ་བ་ཅན། །
བདག་ནི་འཕགས་མིན་འདོད་པ་ལ། །སླུ་བར་འོས་པ་མ་ཡིན་ནོ། །
ཨེ་མ་ཤིན་ཏུ་བརྟན་ལ་སྟོབས་ལྡན་ཁྱོད་ཀྱི་སེམས། །འདོད་པ་གཡོ་བ་རྣམས་སུ་སྙིང་བོ་མཐོང་གྱུར་ལ། །
འཇིགས་པ་ཤིན་ཏུ་མི་བཟད་བདོག་པའི་འཆི་བའི་ལམ། །སྐྱེ་དགུ་ཞུགས་པ་ལྟ་བཞིན་ཡུལ་ལ་ཁྱོད་ཆགས་སམ། །
ཤིན་ཏུ་རྣོ་ཞིང་འཇིགས་པའི་ཡུལ་ལ་ཟོན་མཛད་ཅིང་། །རྒ་དང་རྒུད་པ་ནད་ཀྱི་འཇིགས་པ་རྣམ་སེམས་ཤིང་། །
འགྲོ་བ་རྣམས་ནི་མེ་ཡིས་འཚིག་པ་བཞིན་ཐོས་ནས། །ཞི་བ་འཐོབ་མིན་བརྟན་མིན་དགའ་བ་ག་ལ་ཞིག །
ཐེ་ཚོམ་མེད་པར་འཆི་ཞེས་རབ་ཏུ་ཤེས་པ་ཡི། །མི་རྣམས་གང་གི་སྙིང་ལ་ཆགས་པ་རབ་བསྐྱེད་པ། །
དེ་ཡི་སེམས་ནི་ལྕགས་ལས་གྱུར་བར་ཤེས་པ་སྟེ། །འཇིགས་པ་ཆེ་ལ་ཆགས་པ་གང་ཞིག་ངུ་བ་མེད། །
དེ་ནས་གཞོན་ནུ་ཡིས་ནི་འདོད་པ་རྣམས་ཀྱི་རྟེན། །འཇོམས་བྱེད་གཏམ་ནི་རྣམ་པར་ངེས་པའི་བདག་ཉིད་མཛད། །
སྐྱེ་བོ་རྣམས་ཀྱི་མིག་གི་འགྲོ་བྱ་གསལ་བྱེད་ཀྱི། །དཀྱིལ་འཁོར་ས་འཛིན་རི་བོ་ལ་ནི་ནུབ་པར་གྱུར། །
དེ་ནས་རྒྱན་དང་མེ་ཏོག་ཕྲེང་བ་འབྲས་མེད་འཛིན། །སྒྱུ་རྩལ་ཡོན་ཏན་གྱིས་དང་རབ་དགས་འབྲས་མེད་རྣམས། །
རང་གི་སེམས་ལ་ཡིད་དཀྲུགས་འདོད་པ་རྣམས་སྨད་ནས། །ཡིད་ལ་རེ་ཉམས་བུད་མེད་རྣམས་ནི་གྲོང་དུ་ཐལ། །
དེ་ནས་གྲོང་ཁྱེར་སྐྱེད་མོས་ཚལ་སོང་སྐྱེ་བོའི་དཔལ། །ལེགས་པར་བརྟགས་ནས་སྤྱོད་ལ་སོ་སོར་བརྟུལ་ཏེ་ཡང་། །
ཐམས་ཅད་མི་རྟག་པར་གྱུར་རྣམ་པར་སེམས་བཞིན་དུ། །སླར་ཡང་མི་སྐྱོང་བདག་སྐྱེས་གྲོང་དུ་རྣམ་པར་ཞུགས། །
དེ་ནས་དེ་ཡི་ཡིད་ནི་ཡུལ་ལ་རྣམ་པར་ཕྱིར་ཕྱོགས་རྒྱལ་བོས་ཐོས་གྱུར་ནས། །
སྙིང་ལ་མདུང་རིང་ཟུག་པའི་གླང་ཆེན་བཞིན་དུ་མཚན་མོ་དེ་ལ་གཉིད་མ་ལོག །
དེ་ནས་སྔགས་མང་རྣམ་པ་སྣ་ཚོགས་ལམ་རྣམས་དག་གིས་ཐང་ཆད་བློན་པོར་བཅས། །
དེས་ནི་འདོད་པ་ལས་གཞན་སྲས་ཀྱི་བློ་ཡི་ངེས་པ་གཟིགས་མ་གྱུར། །
སངས་རྒྱས་ཀྱི་སྤྱོད་པ་ཞེས་བྱ་བའི་སྙན་དངགས་ཆེན་པོ་ལས། བུད་མེད་ཀྱིས་བགེགས་བྱས་པའི་ལེའུ་སྟེ་བཞི་བའོ།།
ཟླ་བ་གཞོན་ནུས་སློབ་དཔོན་རྟ་དབྱངས་མཛད་པའི་སྙན་ངག་ཆེན་མོ་སངས་རྒྱས་སྤྱོད་པ་ལས་ལེའུ་བཞི་བ་ཁོལ་དུ་ཕྱུང་ཞིང་། ཞུ་དག་དང་ཧོང་ཀོང་བསབས་པ་དང་བཅས་ཏེ་སྤེལ་བ་ཕན་པར་གྱུར་ཅིག
