ཀླུ་ཀུན་དུ་དགའ་བ་ཞེས་བྱ་བའི་ཟློས་གར་བཞུགས་སོ།།
རྒྱ་གར་སྐད་དུ། ནཱ་གཱ་ནནྡ་ནཱ་མ་ནཱ་ཊ་ཀ
བོད་སྐད་དུ། ཀླུ་ཀུན་དུ་དགའ་བ་ཞེས་བྱ་བའི་ཟློས་གར།
ཐམས་ཅད་མཁྱེན་པ་ལ་ཕྱག་འཚལ་ལོ།།
མཚན་མ་དང་བོ།
དགའ་མ་དགའ་བའི་ཟོལ་ལས་སྐྱེས་པའི་སྤུ་ལངས་དག་གིས་བསྒྲིབས་པའི་ལུས་འཛིན་ཞིང་།།
འཛུམ་དང་ལྡན་པས་རྒྱལ་བའི་བྱང་ཆུབ་དག་ལ་བཀོད་པ་མེ་ཏོག་སྙིམ་པ་ནི།།
གཤོག་རྩལ་རབ་བསྐྱོད་སྒྲ་སྒྲོགས་སྦྲང་རྩི་བྱེད་རྣམས་སྦྲང་རྩི་རེ་བས་བསྟེན་ཞིང་དེའི།།
རྐང་བས་བསྣུན་པས་ཁ་ཟུམ་ཚོགས་ཕྱེ་གེ་སར་གསར་བར་གྱུར་བས་ཁྱེད་ལ་སྲུངས།།
བསམ་གཏན་ཟོལ་དག་ཉེ་བར་བཟུང་ནས་སྐད་ཅིག་མིག་ཕྱེ་སུ་ལ་སེམས་པར་བྱེད།།
སྐྱོབ་པ་ཡིན་ཡང་ལུས་མེད་མདས་གཟིར་སྐྱེ་བོ་འདི་དག་སྲུང་བ་མིན་ལ་ལྟོས།།
སྙིང་རྗེར་ལྡན་པ་རྫུན་ཏེ་ཁྱོད་ལས་གཞན་པའི་བརྩེ་མེད་སྐྱེས་བུ་ག་ལ་ཡོད།།
བདུད་མོ་རྣམས་ཀྱིས་བྱང་ཆུབ་ལ་འདི་ཕྲག་དོག་གིས་བརྗོད་རྒྱལ་བས་ཁྱེད་ལ་སྲུངས།།
གཞན་ཡང་།
གཞུ་བཀང་འདོད་པ་དང་ནི་རྔ་གསང་རྡུང་ཞིང་སྒྲ་སྒྲོགས་བདུད་ཀྱི་དཔའ་བོ་དང་།།
སྨིན་འཁྱོག་རབ་འདར་གླལ་འཛུམ་ལོགས་སུ་ལྟ་བ་མཐོ་རིས་བུ་མོའི་སྐྱེ་བོ་དང་།།
གྲུབ་པ་ཡན་ལག་མཆོག་བཏུད་རྣམས་དང་མཚར་བས་སྤུ་ལངས་ལུས་ཅན་ནོར་ལྷ་ཡིས།།
བྱང་ཆུབ་ཐོབ་ལ་བསམ་གཏན་གཡོ་མེད་ཅེས་བལྟས་ཐུབ་པའི་དབང་བོས་ཁྱེད་ལ་སྲུངས།།
མདོ་འཛིན་པ། ཤིན་ཏུ་མང་བར་འགྱུར་བས། (དགའ་བར་བྱས་ཏེ་མདོ་འཛིན་པའོ) དི་རིང་དབང་བོའི་དགའ་སྟོན་ལ་ཕྱོགས་སྣ་ཚོགས་ནས་འོངས་པ་དཔལ་ལྡན་དགའ་བའི་ལྷའི་ཞབས་ཀྱི་པདྨ་ཉེ་བར་བསྟེན་པའི་རྒྱལ་བོའི་ཚོགས་རྣམས་ཀྱིས་གུས་པ་དང་ལྡན་པར་བོས་ཏེ། བདག་ལ་སྨྲས་པ། “ཇི་ལྟར་ཁོ་བོ་ཅག་གི་རྗེ་དཔལ་ལྡན་དགའ་བའི་ལྷས། སྔར་མེད་པའི་དངོས་པོའི་རྒྱན་རྣམ་པར་བཀོད་པ་རིག་པ་འཛིན་པའི་སྐྱེས་རབས་ལས་བརྩམས་པ།
ཀླུ་ཀུན་དུ་དགའ་བ་ཞེས་བྱ་བའི་ཟློས་གར་མཛད་པ་ནི་ཁོ་བོ་ཅག་རྣམས་ཀྱིས་ཉན་པ་བོའི་བརྒྱུད་པ་ལས་ཐོས་ཏེ། སྦྱོར་བ་དག་ནི་མ་མཐོང་ངོ་། །དེའི་ཕྱིར་རྒྱལ་བོ་དེ་ཉིད་ལ་གུས་པ་དང་། ཁོ་བོ་ཅག་རྗེས་སུ་གཟུང་བའི་བློས་སྦྱོར་བ་ཇི་ལྟ་བུ་བཞིན་དུ་ཁྱོད་ཀྱིས་ཟློས་གར་དག་བྱོས་ཤིག”ཅེས་སོ། །དེའི་ཕྱིར་རེ་ཞིག་ཚོན་གྱི་བཀོད་པ་དག་བྱས་ནས་ཇི་ལྟར་མངོན་པར་འདོད་པ་བཞིན་ཡོངས་སུ་རྫོགས་པར་བྱའོ།
།འདུས་པའི་སྐྱེ་བོ་འདི་དག་གི་ཡིད་ནི་ཀུན་དུ་ཚིམ་པར་གྱུར་རོ་ཞེས་བྱ་བར་བདག་གིས་ངེས་ཏེ། གང་གི་ཕྱིར།
དཔལ་ལྡན་དགའ་བ་སྙན་དངགས་མཁན་པོ་མཁས་པ་འདུས་པ་འདི་དག་ཡོན་ཏན་འཛིན། །
འཇིག་རྟེན་དུ་ནི་བྱང་ཆུབ་སེམས་དཔའི་སྤྱོད་པ་ཡིད་འཕྲོག་ཟློས་གར་བདག་ཅག་མཁས།
།
འདིར་ནི་དངོས་པོ་རེ་རེ་དག་ཀྱང་འདོད་པའི་འབྲས་བུ་ཐོབ་པའི་གནས་ཡིན་ན།
།
བདག་གི་སྐལ་བ་རྒྱས་པས་ཡོན་ཏན་ཀུན་གྱི་ཚོགས་འདུས་འདི་ལ་སྨོས་ཅི་དགོས།།
དེས་ན་རེ་ཞིག་ཁྱིམ་པ་མོ་བོས་ཏེ་གླུ་དག་ལ་གནས་པར་བྱའོ།། (ཡོངས་སུ་བགྲོད་ཅིང་ཕྱིར་མངོན་པར་ཕྱོགས་ཏེ་བལྟས་ནས)
འཕགས་མ་རེ་ཞིག་འདིར།།
(དེ་ནས་གར་མཁན་མ་ངུ་ཞིང་ཞུགས་སོ)
མདོ་འཛིན་པ། (མཐོང་ནས) འཕགས་མ། ཀླུ་ཀུན་དུ་དགའ་བ་ཞེས་བྱ་བའི་ཟློས་གར་བྱ་བ་ཡིན་ན་ཅིའི་དོན་དུ་རྒྱུ་མེད་པ་ཉིད་དུ་ངུ་བར་བྱེད།
གར་མཁན་མ། ཇོ་བོ་ཇི་ལྟར་མི་ངུ་སྟེ། གང་གི་ཕྱིར། རེ་ཞིག་ཡབ་ནི་ཡུམ་དང་འགྲོགས་ནས་རྒན་པོའི་དངོས་པོས་ཡིད་བྱུང་སྟེ།
ད་ནི་ཁྱོད་ཀྱིས་གཉེན་ཚན་གྱི་ཁུར་དག་འཛིན་པར་བཟོད་དོ་ཞེས་ཐུགས་ལ་བཞག་ནས་དཀའ་ཐུབ་ཀྱི་ནགས་སུ་གཤེགས་སོ།།
མདོ་འཛིན་པ། བདག་ཀྱང་ཡོངས་སུ་བཏང་ནས་ཇི་ལྟར་ཡབ་ཡུམ་ནགས་སུ་གཤེགས། (རྣམ་པར་བསམས་ནས) དེ་ལ་ད་ནི་ཅི་ཞིག་རིགས་པར་འགྱུར། ཡང་ན་བདག་བླ་མའི་ཞབས་ཀྱི་རིམ་གྲོ་བྱེད་པའི་བདེ་བ་ཡོངས་སུ་བཏང་ནས་ཇི་ལྟར་ཁྱིམ་དུ་འདུག་པར་བྱེད།
གང་གི་ཕྱིར།
ཇི་ལྟར་སྤྲིན་གྱི་བཞོན་པ་བཞིན། །དབང་ཕྱུག་རིམ་པས་འོངས་བཏང་སྟེ།
།
ཕ་མའི་སྲི་ཞུ་བསྒྲུབ་པའི་ཕྱིར། །བདག་ཀྱང་ནགས་སུ་འགྲོ་བར་བྱ།།
(སོང་བར་གྱུར་ཏོ)
སྐབས་དབྱེ་བའོ།།
(དེ་ནས་སྤྲིན་གྱི་བཞོན་པ་དང་། བཞད་གད་པ་དག་ཞུགས་ཏེ)
འདྲེན་པ། ཆགས་པའི་གནས་ཞེས་བྱ་བར་བདག་གིས་རིག།།འཇིག་ཅེས་བྱ་བར་བདག་གིས་མ་རྟོགས་མིན།
།བྱ་དང་བྱ་མིན་རྣམ་པར་དཔྱད་རྣམས་ལ། །ཕྱིར་ཕྱོགས་གྱུར་བར་ས་ལ་སུས་མ་རིག།།ཕ་མའི་སྲི་ཞུ་བྱེད་པ་བདག་གི་ནི།
།ལང་ཚོ་དབང་པོའི་དབང་དུ་གྱུར་པ་འདི། །གལ་ཏེ་གུས་པས་འདི་ལྟར་ཉིད་གྱུར་ན། །དེ་ལྟར་སྨད་པར་འོས་ཀྱང་དགའ་བྱེད་འགྱུར།།
བཞད་གད་པ། (ཁྲོས་པ་དང་བཅས་པར) ཀྱེ། གང་གི་ཚེ་གསོན་བཞིན་དུ་ཤི་བའི་རྒན་རྒོན་འདི་དག་འདི་ལྟར་ནགས་ན་འདུག་པ་ལ་འདི་སྙེད་ཀྱི་དུས་སུ་སྡུག་བསྔལ་ཉམས་སུ་མྱོང་ཡང་ཁྱོད་ནི་ཡིད་བྱུང་བར་མ་གྱུར་རོ། །དེས་ན་རབ་ཏུ་དང་བས་ད་དུང་ཡང་རེ་ཞིག་བླ་མའི་ཞབས་ཀྱི་སྲི་ཞུ་ལ་ཆགས་པ་ལས་ཕྱིར་བཟློག་ལ་རྒྱལ་སྲིད་ཀྱི་བདེ་བ་ཉམས་སུ་མྱོང་བར་བྱོས་ཤིག
འདྲེན་པ། ཇི་ལྟར་ཡབ་ཀྱི་མདུན་དུ་སར་འདུག་མཛེས་པ་དེ་ལྟ་སེང་གེའི་ཁྲི་ལ་ཡོད་དམ་ཅི།
།ཡབ་ཀྱི་ཞབས་དག་མཉེད་པ་ལས་བྱུང་བདེ་བ་དེ་ནི་རྒྱལ་སྲིད་དག་ལའང་ཡོད་དམ་ཅི།
།བླ་མའི་ལྷག་མ་སྤྱད་པའི་དགའ་བ་གང་འདིས་ས་གསུམ་སྤྱད་པ་དག་ལ་ཡོད་དམ་ཅི། །བླ་མས་བཏང་བའི་རྒྱལ་སྲིད་ངེས་པར་གདུང་བྱེད་དག་སྟེ་དེས་ན་ཡོན་ཏན་ཅི་ཞིག་ཡོད།།
བཞད་གད་པ། (བདག་ཉིད་ཀྱིས་རྟོགས་པར) ཨེ་མ་འདི་ནི་སྐྱེ་བོ་བླ་མའི་སྲི་ཞུ་ལ་ཆགས་པ་ཞིག་གོ
(རྣམ་པར་བསམས་ནས) དེས་ན་འདིར་ཡང་རེ་ཞིག་བརྗོད་པར་བྱའོ།།
(གསལ་བར) ཀྱེ། གྲོགས་པོ་ངེས་པར་རྒྱལ་སྲིད་ཀྱི་བདེ་བ་འབའ་ཞིག་གི་ཆེད་དུ་བདག་གིས་འདི་བརྗོད་པ་མ་ཡིན་ཏེ།
གཞན་ཡང་ཁྱོད་ལ་བྱ་བ་དག་ཡོད་པ་ཉིད་དོ།།
འདྲེན་པ། (འཛུམ་དང་བཅས་པར) བྱ་བ་བདག་གིས་བྱས་པ་ཉིད་མ་ཡིན་ནམ། ལྟོས་ཤིག །
རིགས་པར་འོས་པའི་ལམ་ལ་བློན་པོ་རྣམས་སྦྱར་དམ་པ་རྣམས་ནི་བདེ་ལ་བཞག
།དེ་བཞིན་གཉེན་གྱི་སྐྱེ་བོ་བདག་མཚུངས་ཉིད་བྱས་རྒྱལ་སྲིད་དག་ཀྱང་བསྲུངས་པར་བྱས།
།ཡིད་ལ་རེ་བ་ལས་ལྷག་འབྲས་སྟེར་དཔག་བསམ་ཤིང་ཡང་སློང་བ་རྣམས་ལ་བྱིན། །འདི་ལས་གཞན་པའི་བྱ་བ་ཅི་ཞིག་ཁྱོད་ཀྱི་སེམས་ལ་གང་ཞིག་གནས་པ་སྨྲོས།།
བཞད་གད་པ། ཀྱེ། གྲོགས་པོ། ཤིན་ཏུ་ཐུབ་ཆོད་ལྡན་ཞིང་ཉམས་པར་བྱེད་པའི་ལྷ་མ་ཏང་ག་འདི་མི་མཐུན་པའི་ཕྱོགས་སུ་ཉེ་བར་གནས་པ་ལ།
གཙོ་བོ་དང་གཉེན་དག་ཡང་དག་པར་གནས་ཀྱང་ཁྱོད་མེད་ན་བདག་ནི་རྒྱལ་སྲིད་ལེགས་པར་གནས་པར་མི་རྟོག་གོ།
འདྲེན་པ། མ་ཏང་གས་རྒྱལ་སྲིད་ལེན་པར་འགྱུར་རོ་ཞེས་བྱ་བའི་དོགས་པ་ཡོད་དམ་ཅི།
བཞད་གད་པ། དེ་ལས་ཅི།
འདྲེན་པ། གལ་ཏེ་དེ་ལྟར་གྱུར་ན་དེ་ལས་ཅིར་འགྱུར། བདག་གི་ལུས་ལ་སོགས་པ་ཐམས་ཅད་གཞན་གྱི་དོན་ཉིད་དུ་ཡོངས་སུ་བསྲུངས་པ་མ་ཡིན་ནམ།
གང་ཡང་རང་གིས་མ་བྱིན་པ་དེ་ནི་ཡབ་ཀྱི་ངོར་ཡིན་ནོ། །དེས་ན་དོན་མེད་པའི་བསམ་པ་འདིས་ཅི་ཞིག་བྱ།
ཡབ་ཀྱིས་རྗེས་སུ་བསྟན་པ་ཉིད་ལྷུར་བསྒྲུབ་པར་བྱའོ།།
བཞད་གད་པ། ཀྱེ། ཡབ་ཀྱིས་ཅི་ཞིག་བསྟན།
འདྲེན་པ། ཇི་ལྟར “བུ། སྤྲིན་གྱི་གཞོན་པ། ཉི་མ་མང་བོར་ཡོངས་སུ་སྤྱད་པས་དཀའ་ཐུབ་ཀྱི་ནགས་འདི་ཡམ་ཤིང་དང་། ཀུ་ཤ་དང་།
མེ་ཏོག་དང་། ཉེ་བར་མཁོ་བའི་རྩ་བ་དང་། འབྲས་བུ་དང་། སྡོང་བུ་དང་། དྲི་ཞིམ་པ་དང་། རྔད་མང་བ་དག་རིང་དུ་བྱས་པར་གྱུར་གྱིས།
དེའི་ཕྱིར། མ་ལ་ཡའི་རི་ལ་སོང་ལ་བསྟི་གནས་འགའ་ཞིག་རྟོགས་ཤིག”ཅེས་ཡབ་ཀྱིས་བདག་ལ་རྗེས་སུ་བསྟན་ཏོ། །དེའི་ཕྱིར་རེ་ཞིག་མ་ལ་ཡ་ཉིད་དུ་འགྲོའོ།།
བཞད་གད་པ། ཇི་ལྟར་ཁྱོད་ཀྱིས་བཀའ་བསྩལ་བ་བཞིན་ནོ། ། འགྲོའོ།།
(ཞེས་ཏེ་གཉི་ག་སོང་བར་གྱུར་ཏོ)
བཞད་གད་པ། (མདུན་དུ་བལྟས་ནས) ཀྱེ། གྲོགས་པོ། ལྟོས་ཤིག །ལྟོས་ཤིག
།རླན་དང་བཅས་ཤིང་སྟུག་པོའི་ཙན་དན་གྱི་ནགས་ཀྱི་ཁྲོད་ནས་ཡོངས་སུ་བསྐྱོད་པ་དྲི་བཟང་རྒྱ་ཆེན་པོས་བསྒོས་པ་ཅན་རིའི་ངོས་མི་བཟད་པ་ལས་བབས་པས་དུམ་བུར་གྱུར་བའི་ཆུ་རྒྱུན་ལས་འཐོར་བའི་ཐིགས་པ་བསིལ་བོ་འཛིན་པ་མ་ལ་ཡའི་རླུང་འདི་ནི་ངེས་པར་ལམ་གྱིས་ཡོངས་སུ་དུབ་པ་དག་སེལ་ཞིང་།
དངབོར་འགྲོགས་པར་འདོད་པའི་དགའ་མ་ལ་མགྲིན་པ་ནས་བཟུང་བ་བཞིན་དུ་གྲོགས་པོ་མཛའ་བོ་ལ་སྤུ་ལོང་རྒྱས་པར་བྱེད་པ་འདྲའོ།།
འདྲེན་པ། (ཀུན་དུ་བལྟས་ནས) ཨ་ཡེ། བདག་ཅག་རི་མ་ལ་ཡར་སླེབས་པར་གྱུར་ཏོ།། (བརྟགས་ནས) ཨེ་མ་འདི་ནི་དགའ་བར་བྱ་བ་ཞིག་སྟེ། དེ་ལྟར་ཡང་། དགའ་ལྡན་ཕྱོགས་ཀྱི་གླང་བོ་འགྲམ་པའི་ངོས་བདར་ཙན་དན་དག་ནི་ཆག་ཅིང་ཟག། །ཆུ་གཏེར་རླབས་རྣམས་རབ་ཏུ་བསྣུན་པས་ཕུག་དང་ལུང་བ་དག་ནི་ཆོ་ངེས་སྒྲོགས། །གྲུབ་པའི་བུད་མེད་བགྲོད་པ་རྣམས་ཀྱི་རྐང་བའི་སྨུག་རྩིས་དམར་བ་མུ་ཏིག་རྡོ། །བསྟེན་བྱ་རི་བོ་མ་ལ་ཡ་འདིས་བདག་གི་སེམས་ནི་ཅི་ཡང་སྲེད་ལྡན་བྱེད།།
དེས་ན་ཚུར་ཤོག །འདི་ལ་འཛེགས་ཏེ་འདུག་པར་འོས་པའི་བསྟི་གནས་དག་རྟོག་པར་བྱའོ།།
བཞད་གད་པ། འུ་བུ་ཅག་དེ་བཞིན་བྱེད་དོ། (མདུན་དུ་ལངས་ཏེ) གཤེགས་ཤིག །
(གཉི་ག་འཛེགས་པའི་གར་བྱེད་དོ)
འདྲེན་པ། (མིག་གཡོན་པ་གཡོ་བ་གསལ་བར་བྱས་ནས) ཨ་ཡི། བདག་གི་མིག་ནི་གཡས་པ་གཡོ། །འབྲས་བུ་འདོད་པ་འགའ་ཡང་མེད།
།ཐུབ་པའི་གསུང་ཡང་རྫུན་མ་ཡིན། །འདི་ནི་ཅི་ཞིག་འཆད་འགྱུར་ཀྱེ།།
བཞད་གད་པ། ཀྱེ་གྲོགས་པོ། དགའ་བ་འགའ་ཞིག་ཉེ་བར་སྟོན་ནོ།།
འདྲེན་པ། ངེས་པར་ཇི་ལྟར་ཁྱོད་ཀྱིས་སྨྲས་པ་དེ་བཞིན་ནོ།།
བཞད་གད་པ། ཀྱེ་གྲོགས་པོ། ལྟོས་ཤིག །ལྟོས་ཤིག
།ཁྱད་པར་དང་བཅས་པར་སྟུག་ཅིང་སྣུམ་པའི་རྐང་འཐུང་གིས་ཉེ་བར་མཛེས་ཤིང་། བའི་མར་གྱི་དྲིའི་སྙིང་བོ་ཅན་གྱི་དུ་བ་དྲག་ཏུ་འཕྱུར་ལ། རི་དྭགས་ཀྱི་ཚོགས་འཇིགས་པ་མེད་ཅིང་ལམ་དུ་བག་ཕབ་སྟེ་གནས་པ་འདི་ནི་དཀའ་ཐུབ་ཀྱི་ནགས་ཚལ་བཞིན་དུ་མཚོན་ནོ།།
འདྲེན་པ། གྲོགས་པོ། ཡང་དག་པར་མཚོན་ནོ།། འདི་དག་ནི་དཀའ་ཐུབ་ཀྱི་ནགས་ཚལ་ཉིད་དེ།
གང་གི་ཕྱིར། གོས་ཀྱི་དོན་དུ་ཤིང་ཤུན་རྣམས་བཅད་བརྩེ་བ་ཉིད་ཀྱིས་ཤིན་ཏུ་ཆེ་བ་མིན། །རིལ་བ་རྙིང་བ་ཚོགས་པས་མཚན་པའི་ཆུ་རྒྱུན་དག་ནི་མཁའ་ལྟར་རབ་ཏུ་དྭངས། །འགའ་ཞིག་དག་ན་མུཉྫའི་སྐེ་རགས་ཁྱེའུས་བཅད་ཅིང་དོར་བར་གྱུར་བ་མཐོང་། །རྟག་ཏུ་ཐོས་པས་ནེ་ཙོ་དག་ཀྱང་རིག་བྱེད་ཚིག་འདི་རབ་ཏུ་སྒྲོགས་པར་བྱེད།།དེས་ན། ཚུར་གཤེགས་རབ་ཏུ་ཞུགས་ཏེ། ཉེ་བར་མཚོན་པར་བྱའོ།།
(རབ་ཏུ་ཞུགས་པའི་གར་དག་བྱེད་དོ)
འདྲེན་པ། (ཡ་མཚན་དང་བཅས་རྣམ་པར་བལྟས་ནས) ཨེ་མ་ཐུབ་པའི་སྐྱེ་བོ་རབ་ཏུ་དགའ་བ་རྣམས་ནི་རིག་བྱེད་ཀྱི་ཚིག་རྒྱས་པ་ལ་ཐེ་ཚོམ་རྣམ་པར་དཔྱོད་པར་བྱེད་ལ། ཁྱེའུའི་སྐྱེ་བོ་རྣམས་ནི་ཇི་ལྟར་གཤེར་བ་གཤེར་བའི་ཡམ་ཤིང་དག་གཅོད་ཅིང་།
དཀའ་ཐུབ་པའི་གཞོན་ནུ་མ་རྣམས་ནི་ལྗོན་པ་གསར་བའི་སྐྱོ་ར་འགེངས་པར་བྱེད་པའི་དཀའ་ཐུབ་ཀྱི་ནགས་ཚལ་ནི་རབ་ཏུ་ཞི་བ་དང་དགའ་བར་བྱེད་པ་ཉིད་དོ།
།
འདི་ཉིད་ན།
བུང་བའི་སྒྲ་ཡིས་ལེགས་པར་འོངས་སམ་ཞེས་ནི་བརྗོད་པ་བཞིན། །འདི་དག་མགོ་ནི་འབྲས་བུ་དུད་པས་འདུད་པར་བྱེད་པ་བཞིན།
།
མེ་ཏོག་ཆར་བ་འཐོར་ཞིང་བདག་ལ་མཆོད་ཡོན་སྟེར་བ་བཞིན།
།ཡལ་ག་ལྡན་པ་ཡིས་ཀྱང་མགྲོན་གྱི་བསྙེན་བཀུར་ཇི་ལྟར་བསླབས། །
དེའི་ཕྱིར། དཀའ་ཐུབ་ཀྱི་ནགས་ཚལ་འདིར་ནི་འདུག་པར་འོས་པ་ཞིག་སྟེ།
འདིར་གནས་ན་བདག་ཅག་གི་སེམས་བདེ་བར་འགྱུར་རོ་སྙམ་མོ།།
བཞད་གད་པ། ཀྱེ་གྲོགས་པོ། འོན་ཀྱང་ངེས་པར་རི་དྭགས་འདི་དག་མགྲིན་པ་ཅུང་ཟད་འཁྱོགས་ཏེ་གཡོ་བ་མེད་པའི་ཁ་ལས་ཅུང་ཟད་ཟོས་པའི་རྩྭ་ཁམ་ནང་ན་གནས་པ་ཟག་ཅིང་རྣ་བ་གཅིག་རབ་ཏུ་བསླངས་ཏེ་གཏད་ནས་མིག་ཟུམ་པ་དང་བཅས་པས་ཉན་པར་བྱེད་པ་ལྟ་བུར་མཚོན་ནོ།།
འདྲེན་པ། (རྣ་བ་གཏད་ནས) གྲོགས་པོ།
ལེགས་པར་མཚོན་པར་བྱས་སོ། །དེ་ལྟར་ཡང་། གནས་ཐོབ་རབ་ཏུ་གསལ་བའི་འགྲོས་ཅན་གདངས་སྙན་དག་གིས་རྣམ་པར་བཞག་པ་འཛིན་བྱེད་པ། །བུང་བའི་སྒྲ་བཞིན་ངེས་པར་ཡིད་འཕྲོག་རྒྱུད་མངས་དག་གི་རྒྱུད་མངས་སྒྲ་དང་ལྡན་པ་ཡིས།
།གསལ་ཞིང་རོལ་སྒེག་ཚིག་ལྡན་གླུ་ནི་ཀུན་དུ་འཁྱོག་པའི་ལུས་ཅན་རི་དྭགས་འདི་དག་རྣམས། །སོ་ཡི་བར་ན་གནས་པ་རྩྭ་ཡི་ཁམ་ནི་གཅོད་པའི་སྒྲ་དག་བསྡམས་ནས་ཉན་པར་བྱེད།།
བཞད་གད་པ། ཀྱེ་གྲོགས་པོ། དཀའ་ཐུབ་ཀྱི་ནགས་ཚལ་འདི་ན་སུ་ཞིག་གླུ་ལེན་པར་བྱེད།
འདྲེན་པ། ཇི་ལྟར་སོར་མོ་འཇམ་པའི་འདབ་མས་མངོན་པར་བསྣུན་པའི་རྒྱུད་མངས་ཤིན་ཏུ་གསལ་བ་མ་ཡིན་པར་སྒྲོགས་ཤིང་།
གླུ་ཡང་སྙན་ཅིང་ཕྲ་བ་གཙོར་ལེན་པ་དེ་ལྟར་བདག་རྟོག་པ་ནི་གནས་འདི་ན་ལྷ་དག་མཉེས་པར་བྱེད་ཅིང་ལྷའི་བུད་མེད་རྒྱུད་མངས་དང་ལྡན་པའི་གླུ་ལེན་པར་བྱེད་དོ།།
བཞད་གད་པ། ཀྱེ་གྲོགས་པོ། ཚུར་ཤོག ཡུ་འུ་ཅག་ཀྱང་ལྷའི་གནས་བལྟ་བར་བྱའོ།།
འདྲེན་པ། ལེགས་པར་བརྗོད་དེ། ངེས་པར་ལྷ་ནི་ཕྱག་བྱ་བར་འོས་པའོ།། (ཉེ་བར་སོང་སྟེ་འཕྲལ་ལ་འདུག་ནས)
གྲོགས་པོ། གལ་ཏེ་ན་སྐྱེ་བོ་འདི་ལྟ་བར་མི་འོས་པ་སྲིད་དོ།།
དེ་ནས་རེ་ཞིག་ཏ་མ་ལའི་གེལ་བ་འདིའི་ནང་དུ་འདུག་སྟེ་ལྷ་ལྟ་བའི་སྐབས་བཙལ་བར་བྱའོ།། (དེ་ལྟར་བྱས་སོ)
(དེ་ནས་མ་ལ་ཡ་ཅན་མ་དང་། འབངས་མོ་ཞུགས་ཏེ་ས་ལ་འདུག་ནས་རྒྱུད་མངས་སྦྲེང་བར་བྱེད་དོ)
འདྲེན་མ། (གླུ་ལེན་པ) གཽ་རཱི་རབ་རྒྱས་པདྨའི་གེ་སར་གྱི།
།དངུལ་ལྟར་དཀར་བའི་འོད་ཅན་བཅོམ་ལྡན་མ། །ཁྱོད་ཀྱི་བཀའ་དྲིན་དག་གིས་བདག་གི་ནི། །མངོན་པར་འདོད་པ་རབ་ཏུ་གྲུབ་པར་མཛོད།།
འདྲེན་པ། (རྣ་གཏད་ནས) ཨེ་མ་ཧོ།
གླུ། ཨེ་མ་ཧོ། རོལ་མོ། འདི་ལ་གསལ་བྱེད་ཀྱི་དབྱངས་རྣམ་པ་བཅུ་བོ་འདིས་གསལ་བ་ཐོབ་ཅིང་། མྱུར་བ་དང་། བར་མ་དང་། དལ་བའི་སྟབས་རྣམ་པ་གསུམ་རབ་ཏུ་གསལ་བར་ཡོངས་སུ་བཅད་དེ།
བ་ལང་གི་རྔ་མ་ལ་སོགས་པ་རྣམ་པ་གསུམ་གྱི་རིམ་པས་ངལ་བསོ་བར་བྱས་པ་དེ་ཁོ་ནའི་ཚོགས་ཀྱི་རྗེས་སུ་འབྲང་བའི་རོལ་མོའི་ཆོ་ག་ཡང་དག་པ་གསུམ་བསྟན་ནོ།།
འབངས་མོ། རྗེའི་སྲས་མོ། ངེས་པར་ཡུན་རིང་དུ་གླུ་དག་བླངས་ནས་ཁྱོད་ཀྱི་ལག་རྩེ་དག་ཡོངས་སུ་མི་ངལ་ལམ།
འདྲེན་མ། གྲུང་མོ། བཅོམ་ལྡན་མའི་མདུན་དུ་རྒྱུད་མངས་སྒྲོགས་པར་བྱེད་པ་ལ་བདག་ག་ལ་ངལ།
འབངས་མོ། (སྨོད་པ་དང་བཅས་པར) ཀྱེ། བརྩེ་མེད་མ་འདིའི་མདུན་དུ་རྒྱུད་མངས་བསྒྲགས་པས་ཅི་ཞིག་བྱ་ཞེས་བདག་སྨྲའོ།
།གང་ཞིག་འདི་སྙེད་ཀྱི་དུས་སུ་སྐྱེ་བོ་གཞོན་ནུ་མའི་དཀའ་ཐུབ་བསྙེན་གནས་ངེས་པ་ལ་གནས་པས་བསྟེན་ཡང་ད་དུང་ཁྱོད་ལ་དང་བར་མི་སྟོན་ནོ།།
བཞད་གད་པ། (ཐོས་ནས) ཀྱེ་གྲོགས་པོ།
འདི་ནི་ངེས་པར་གཞོན་ནུ་མ་སྟེ། ཅིའི་ཕྱིར་མི་ལྟ།
འདྲེན་པ། སྐྱོན་ཅི་ཡོད། གཞོན་ནུ་མ་ལྟ་བ་ནི་སྐྱོན་མེད་པ་ཉིད་དོ། །འོན་ཀྱང་གལ་ཏེ་ན་བདག་ཅག་མཐོང་ནས་འཇིགས་ཏེ།
ངོ་ཚ་བ་གཞོན་ནུ་མ་ལ་རྙེད་སླ་བས་འདིར་ཡུན་རིང་དུ་མི་སྡོད་པ་སྲིད་དོ། །དེས་ན་རེ་ཞིག་འཁྲི་ཤིང་གི་དྲ་བ་འདིས་བསྒྲིབས་ཏེ་བལྟ་བར་བྱའོ།།
(གཉི་གས་བལྟས་ཏེ)
བཞད་གད་པ། (ཡ་མཚན་དང་བཅས་པར) ཀྱེ་གྲོགས་པོ། ལྟོས་ཤིག །ལྟོས་ཤིག །ངོ་མཚར་རོ། །ངོ་མཚར་རོ། །རྒྱུད་མངས་ཀྱི་སྒྲས་རྣ་བའི་བདེ་བ་སྐྱེད་པར་བྱེད་པ་འབའ་ཞིག་ཏུ་མ་ཟད་དེ།
རྣམ་པར་ཤེས་པའི་རྗེས་སུ་མཐུན་པའི་གཟུགས་འདིས་མིག་གི་ཡང་བདེ་བ་སྐྱེད་པར་བྱེད་དོ། །དེའི་ཕྱིར་འདི་ནི་སུ་ཞིག་ཡིན།
ཅི་ལྷ་མོའམ། ཀླུའི་བུ་མོའམ། ཡང་ན་རིག་པ་འཛིན་པའི་བུ་མོ་འམ། ཡང་ན་གྲུབ་པའི་རིགས་ལས་འཁྲུངས་པ་ཞིག་གོ།
འདྲེན་པ། (རྣམ་པར་བལྟ་ཞིང་ཆགས་པ་དང་བཅས་པར) གྲོགས་པོ།
འདི་སུ་ཞིག་ཡིན་ཞེས་བདག་གིས་མ་རྟོགས་སོ། །བདག་གིས་འདི་ཙམ་ཤེས་ཏེ།
གལ་ཏེ་མཐོ་རིས་བུ་མོ་ཡིན་ན་འཕྲོག་བྱེད་མིག་སྟོང་ལྡན་དེས་དོན་བྱས་གྱུར།
།
གལ་ཏེ་ཀླུ་ཡི་བུ་མོ་ཡིན་ནའང་འདིའི་གདོང་ཡོད་ཚེ་ས་འོག་ཟླ་བས་སྟོང་མ་ཡིན།
།
གལ་ཏེ་རིག་འཛིན་མ་ཡིན་གཞན་རིགས་ལས་རྒྱལ་བདག་ཅག་རིགས་ནི་འབྲས་དང་བཅས།
།
གལ་ཏེ་གྲུབ་རིགས་ལས་སྐྱེས་དེ་ཕྱིར་གྲུབ་པ་འཇིག་རྟེན་གསུམ་དུ་གྲགས་པར་འགྱུར།།
བཞད་གད་པ། (འདྲེན་པ་ལ་བལྟས་ནས་དགའ་བ་དང་བཅས་ཤིང་རང་གིས་རྟོགས་པར) ཨེ་མའོ། །ཡུན་རིང་བོ་ཞིག་ནས་ཡིད་སྲུབས་ཀྱི་སྤྱོད་ཡུལ་དུ་ལྷུང་བར་གྱུར་རོ།། (བདག་ཉིད་ལ་སྟོན་ཞིང) ཡང་ན་མ་ཡིན་ཏེ། བྲམ་ཟེ་བདག་གིའོ།།
འབངས་མོ། (མཛའ་བ་དང་བཅས་པར) ཀྱེ། བདག་སྨྲའོ། །བརྩེ་མེད་མ་འདིའི་མདུན་དུ་རྒྱུད་མངས་བསྒྲགས་པས་ཅི་ཞིག་བྱ། (ཞེས་ཏེ་རྒྱུད་མངས་འཕངས་སོ)
འདྲེན་མ། བུ་མོ། བཅོམ་ལྡན་མ་གཽ་རཱི་ལ་མ་སྨད་ཅིག །ཀྱེ། དིང་བཅོམ་ལྡན་མས་བཀའ་དྲིན་མཛད་པ་བཞིན་ནོ།།
འབངས་མོ། རྗེའི་སྲས་མོ། རེ་ཞིག་ཅི་འདྲ་བ་དག་སྨྲོས་ཤིག
འདྲེན་མ། བུ་མོ། ངེས་པར་དིང་རྨི་ལམ་དུ་བདག་འདི་བཞིན་ཉིད་དུ་རྒྱུད་མངས་སྦྲེང་བ་ལ་བཅོམ་ལྡན་མས་གསུངས་པ།
“བུ་མོ། ཁྱོད་ཀྱིས་རྒྱུད་མངས་སྦྲེང་བ་མཁས་པ་ཁྱད་པར་དུ་འཕགས་པ་འདི་དང་། བདག་ལ་ཐུན་མོང་མ་ཡིན་པའི་གུས་པ་བུ་མོའི་དངོས་པོ་ལ་རྙེད་དཀའ་བ་འདིས་བདག་ཤིན་ཏུ་ཚིམ་པར་གྱུར་རོ། །དེའི་ཕྱིར་ཡུན་རིང་བོ་མ་ཡིན་པ་ན་རིག་པ་འཛིན་པའི་འཁོར་ལོས་སྒྱུར་བས་ལག་པ་འཛིན་པར་འགྱུར་རོ”ཞེས་སོ།།
འབངས་མོ། (དགའ་བ་དང་བཅས་པར) རྗེའི་སྲས་མོ། གལ་ཏེ་དེ་ལྟར་ཡིན་ན་རྨི་ལམ་དུ་ཞེས་ཅིའི་ཕྱིར་བརྗོད། ལྷ་མོས་སྙིང་ལ་འདོད་པའི་མཆོག་བྱིན་པ་ཉིད་ཡིན་ནོ།།
བཞད་གད་པ། ངེས་པར་བདག་ཅག་ལྷ་མོ་ལྟ་བའི་སྐབས་སུ་བབ་བོ། །དེའི་ཕྱིར་ཚུར་ཤོག
། ཉེ་བར་འགྲོ་བར་བྱའོ།། (ཞེས་ཏེ་ཉེ་བར་བཏུད་དོ)
འདྲེན་པ། རེ་ཞིག་བདག་ཞུགས་པར་མི་བྱའོ།།
བཞད་གད་པ། (མི་འདོད་བཞིན་དུ་ཁྱེར་ནས) ཇོ་མོ་གྲུང་མོ་བདག་བདེན་པར་སྨྲ་སྟེ། འདི་ནི་མཆོག་བྱིན་པ་ཉིད་དོ།།
འདྲེན་མ། (འཇིགས་པ་དང་བཅས་པར་འདྲེན་པ་ལ་མཚོན་ཏེ)
བུ་མོ། འདི་སུ་ཞིག
འབངས་མོ། གཞན་དང་ཐུན་མོང་མ་ཡིན་པའི་རྣམ་པ་འདིས་ན།
འདི་ཉིད་བཅོམ་ལྡན་མས་བཀའ་དྲིན་མཛད་པ་ཡིན་ནམ་སྙམ་མོ།།
འདྲེན་མ། (ཆགས་པ་དང་བཅས་ཤིང་ངོ་ཚ་བ་དང་བཅས་པར་བལྟས་སོ)
འདྲེན་པ། གཡོ་ཞིང་ཡངས་པའི་མིག་ལྡན་དབུགས་འབྱིན་ཞིང་། །འདར་ཞིང་མཁྲེགས་སྟུག་ནུ་ལྡན་འཁྲུལ་བྱེད་མ། །ལུས་འདི་དཀའ་ཐུབ་ཉིད་ཀྱིས་ཤིན་ཏུ་ནི།
།ངལ་གྱུར་སླར་ཡང་ཅི་སླད་གདུང་བར་བྱེད།།
འདྲེན་མ། བུ་མོ། ཤིན་ཏུ་འཇིགས་པས་འདི་ལ་མངོན་དུ་ཕྱོགས་ཏེ་འདུག་པར་མི་ནུས་སོ།། (ཞེས་ཏེ་ལོགས་ལ་བལྟས་ནས་འཁོད་དོ)
འབངས་མོ། རྗེའི་སྲས་མོ། འདི་ཅི།
འདྲེན་མ། གྲུང་མོ། བདག་འདིའི་འཁྲིས་སུ་འདུག་པར་མི་ནུས་སོ། །དེ་བས་གཞན་དུ་འགྲོ་བར་བྱའོ།།
(ལངས་པར་འདོད་དོ)
བཞད་གད་པ། ཀྱེ། འདི་ངེས་པར་སྐྲག་གོ། བདག་གི་བསླབ་པའི་རིག་པ་བཞིན་དུ་ཡུད་ཙམ་ཞིག་ལ་གཟུང་བར་བྱའོ།།
འདྲེན་པ། སྐྱོན་ཅི།
བཞད་གད་པ། ཇོ་མོ། ཁྱོད་ཀྱི་དཀའ་ཐུབ་ཀྱི་ནགས་ཚལ་འདི་ན་གང་ཞིག་འགྲོན་པོ་འོངས་པ་ལ་ཚིག་ཙམ་གྱིས་ཀྱང་ཕེབས་པར་སྨྲ་བ་མ་ཡིན་པ་འདི་འདྲ་བའི་ཀུན་དུ་སྤྱོད་པ་ཡོད་དམ་ཅི།
འབངས་མོ། (འདྲེན་མར་བལྟས་ནས་བདག་ཉིད་ཀྱིས་རྟོགས་པར)
འདིའི་མིག་འདི་ལ་རྗེས་སུ་ཆགས་པ་བཞིན་དུ་མཚོན་ནོ།། (གསལ་བར) རྗེའི་སྲས་མོ། བྲམ་ཟེ་རིགས་པ་དག་སྨྲའོ། །འགྲོན་པོ་ལ་བསྙེན་བཀུར་བྱ་བ་རིགས་པ་ཡིན་ནོ།
།དེའི་ཕྱིར་ཇི་ལྟར་མཐུ་ཆེན་པོ་དང་ལྡན་པ་འདི་དག་ལ་གུས་པར་བྱ་བ་ལ་རྨོངས་པར་གནས། ཡང་ན་ཁྱོད་བཞུགས་ཤིག
།ཁོ་མོ་ཉིད་ཀྱིས་ཇི་ལྟར་རིགས་པ་དག་བྱའོ།། (འདྲེན་པ་ལ་མཚོན་ཏེ) ཇོ་བོ། ལེགས་པར་འོངས་སམ། ཇོ་བོས་སྟན་ཡོངས་སུ་བཟུང་བས་ཕྱོགས་འདི་བརྒྱན་པར་མཛོད་ཅིག
བཞད་གད་པ། ཀྱེ། གྲོགས་པོ། འདི་ནི་ལེགས་པར་སྨྲའོ།
།ཡུད་ཙམ་ཞིག་འདུག་སྟེ་ངལ་གསོ་བར་བྱའོ།།
འདྲེན་པ། ཁྱོད་ནི་རིགས་པར་སྨྲའོ།།
(གཉི་ག་འཁོད་དོ)
འདྲེན་མ། ཀྭ་ཡེ། བཞད་གད་ཀྱི་ངང་ཚུལ་ཅན་མ།
དེ་ལྟར་མ་བྱེད། གལ་ཏེ་དཀའ་ཐུབ་པ་འགའ་ཞིག་གིས་མཐོང་ན་འདི་ལས་བདག་དུལ་བ་མ་ཡིན་པ་དང་ལྡན་པར་དོགས་པར་འགྱུར་རོ།།
(དེ་ནས་དཀའ་ཐུབ་པ་ཞུགས་ཏེ)
དཀའ་ཐུབ་པ། རིགས་ཀྱི་བདག་པོ་ཀཽ་ཤི་ཀས་བདག་ལ་བཀའ་བསྒོས་པ། “མཉེས་གཤིན་ཤཱ་ཎྜི་ལྱ། ཡབ་ཀྱི་བཀས། རྒྱལ་ཚབ་བཤེས་གཉེན་གྱི་དབྱིག་གཞོན་ནུ་སྤྲིན་གྱི་བཞོན་པ་རིག་པ་འཛིན་པའི་འཁོར་ལོས་སྒྱུར་བར་འགྱུར་བ་དག་རི་མ་ལ་ཡ་འདི་ཉིད་ཀྱི་ཕྱོགས་འགའ་ཞིག་ན་གནས་པ་སྲིང་མོ་མ་ལ་ཡ་ཅན་གྱི་ཁྱིམ་ཐབ་ཀྱི་སླད་དུ་བལྟ་བའི་ཕྱིར་དི་རིང་འོངས་ཏེ།
གལ་ཏེ་དེ་བལྟ་ཞིང་མ་ལ་ཡ་ཅན་གྱི་ཉི་མ་གུང་གི་མཆོད་སྦྱིན་གྱི་དུས་ཡོལ་བར་འགྱུར་སྲིད་དོ།
།དེས་ན་དེ་བོས་ལ་ཤོག་ཅིག”ཅེས་སོ། །དེས་ན་བདག་རེ་ཞིག་གཽ་རཱིའི་ཁང་བ་ཉིད་དུ་འགྲོའོ།། (འགྲོ་ཞིང་ས་ལ་རྣམ་པར་བལྟས་ནས) ཨ་ཡི། རྡུལ་དང་ལྡན་པའི་ཕྱོགས་ན་རབ་ཏུ་གསལ་བའི་འཁོར་ལོས་མཚན་པའི་རྗེས་ཀྱི་ཕྲེང་བ་དག་སྣང་བ་འདི་སུ་ཞིག་གི་ཡིན།
(མདུན་དུ་བལྟས་ཏེ་སྤྲིན་གྱི་བཞོན་པ་ལ་ངེས་པར་བརྟགས་ནས) འདི་ནི་སྐྱེས་བུ་ཆེན་པོ་འདི་ཡི་ཡིན་ནམ་སྙམ་མོ།།
གཞན་ཡང་།
མགོ་ལ་གཙུག་ཏོར་འདི་གསལ་སྨིན་མའི་བར་ན་མཛོད་སྤུ་འདི་ནི་རྣམ་པར་མཛེས།
།
མིག་ནི་པདྨའི་རྗེས་སུ་མཐུན་ཞིང་བྲང་གདེངས་འཕྲོག་བྱེད་དག་ལ་འགྲན་པར་བྱེད།
།
ལག་པ་འཁོར་ལོས་མཚན་པ་ཇི་ལྟར་དེ་ལྟར་སྐྱེས་བུ་དག་ནི་སུ་ཞིག་འདི།
།
རིག་པ་འཛིན་པའི་འཁོར་ལོས་སྒྱུར་བའི་གནས་དག་མ་ཐོབ་འདུག་པ་ཡིན་ནམ་སྙམ།།
ཡང་ན། ཐེ་ཚོམ་གྱིས་ཅི་ཞིག་བྱ་སྟེ། ཤིན་ཏུ་གསལ་བར་འདི་ནི་སྤྲིན་གྱི་བཞོན་པ་ཡིན་པར་ངེས་སོ།། (མ་ལ་ཡ་ཅན་མ་ལ་བལྟས་ནས) ཨ་ཡེ། འདི་ཡང་རྒྱལ་བོའི་བུ་མོའོ།། (གཉི་ག་ལ་བལྟས་ནས) གལ་ཏེ་ཕན་ཚུན་རྗེས་སུ་འཚམས་པ་འདི་དག་འབྲེལ་བར་བྱེད་ན་བྱེད་པ་བོ་ནི་ཡུན་རིང་བོ་ཞིག་ན་རིགས་པ་བྱེད་པར་གྱུར་ཏོ།། (འདྲེན་པ་ལ་ཉེ་བར་བཏུད་ནས) ཁྱོད་ནི་དགེ་བར་གྱུར་ཅིག
འདྲེན་པ། བཅོམ་ལྡན། སྤྲིན་གྱི་བཞོན་པ་ཕྱག་བགྱིད་དོ།། (ཞེས་ཏེ་ལྡང་བར་འདོད་དོ)
དཀའ་ཐུབ་པ། མངོན་དུ་ལྡང་མི་དགོས་སོ།། ཀྱེ།
“མངོན་འོངས་ཀུན་གྱི་བླ་མ་ཉིད་”ཅེས་པས། ཁྱོད་ཉིད་བདག་ཅག་གི་བླ་མ་ཡིན་ནོ།།
དེས་ན་ཇི་ལྟར་བདེ་བར་བཞུགས་ཤིག
འདྲེན་མ། ཇོ་བོ་ལ་ཕྱག་འཚལ་ལོ།།
དཀའ་ཐུབ་པ། (དེ་མཐོང་ནས) རྗེས་སུ་འཚམས་པའི་བདག་པོའི་སྐལ་བ་དང་ལྡན་པར་གྱུར་ཅིག རྒྱལ་བོའི་བུ་མོ། ཁྱོད་ལ་རིགས་ཀྱི་བདག་པོ་ཀཽ་ཤི་ཀས་བཀའ་བསྩལ་བ། “ཁྱོད་ཀྱི་མཆོད་སྦྱིན་གྱི་དུས་ཡོལ་བར་འགྱུར་གྱིས་མྱུར་དུ་ཤོག་ཅིག”ཅེས་སོ།།
འདྲེན་མ། (མི་དགའ་བ་དང་བཅས་པར) གང་བླ་མས་བཀའ་བསྩལ་བ་ཉིད་དོ།།
(རང་གིས་རྟོགས་པར) གཅིག་ནི་བླ་མའི་གསུང་དང་གཞན། །མཛའ་བོ་བལྟ་བའི་རྩེ་དགའ་བཟང་།
།འགྲོ་འམ་མི་འགྲོ་འགལ་བ་ལ། །བདག་སྙིང་འཕྱང་མོ་ཡུག་པར་འགྱུར།།
(ཤུགས་ཕྱུང་ཞིང་ལངས་ཏེ་ངོ་ཚ་བ་དང་བཅས་ཤིང་ཆགས་པ་དང་བཅས་པར་འདྲེན་པ་ལ་ལྟ་ཞིང་དཀའ་ཐུབ་པ་དང་ལྷན་ཅིག་སོང་བར་གྱུར་རོ)
འདྲེན་པ། (སྲེད་པ་དང་བཅས་པར་ཤུགས་ཕྱུང་ནས་འདྲེན་མ་ལ་ལྟ་ཞིང)
ཚང་རའི་ཁྱོན་གྱི་ཁུར་ལྡན་ཞིང་། །དམན་པ་དག་ཏུ་འགྲོ་མ་འདི། །གཞན་དུ་འགྲོ་ཡང་བདག་གི་ནི།
།སྙིང་ལ་གོམ་པ་བཀོད་པར་གྱུར།།
འབངས་མོ། ཚུར་ཤོག །ཚུར་ཤོག །རྗེའི་སྲས་མོ།
(ཞེས་ཏེ་མ་ལ་ཡ་ཅན་མ་འཁོར་དང་བཅས་པ་སོང་བར་གྱུར་ཏོ)
བཞད་གད་པ། ཀྱེ། གང་ཞིག་བལྟ་བར་བྱ་བ་དག་མཐོང་ངོ་།
།ད་ནི་ཉི་མ་གུང་གི་ཉི་མའི་གདུང་བ་ཉིས་འགྱུར་དུ་བྱས་པ་བཞིན་དུ་བདག་གི་ལྟོ་བའི་མེ་དག་ལྷབ་ལྷབ་བྱེད་དོ།།
དེའི་ཕྱིར་འདི་ནས་སོང་སྟེ། གང་གིས་བྲམ་ཟེ་དག་གི་མགྲོན་དུ་འགྱུར་བར་བྱས་ནས་ཐུབ་པའི་སྐྱེ་བོ་ལས་དངོས་སུ་རྙེད་པའི་རྩ་བ་དང་ཆུ་བ་ལ་སོགས་པས་སྲོག་གཟུང་བར་བྱའོ།།
འདྲེན་པ། (སྟེང་དུ་བལྟས་ནས)
ཨ་ཡེ། བཅོམ་ལྡན་འོད་ཟེར་སྟོང་ཕྲག་ལྡན་ནི་ནམ་མཁའི་དཀྱིལ་ན་འཛེགས་ཏེ་བཞུགས་སོ།
།དེ་ལྟར་ཡང་།
གདུང་བས་དེ་དུས་ཙན་དན་ལ་བདར་ཐང་ཆུས་དཀར་བའི་འགྲམ་པ་འཛིན་བྱེད་ཅིང་།
།
རང་གི་རྣ་བ་བསྐྱོད་པའི་རླུང་ནི་ཡང་དག་ཆགས་པས་བཞིན་ལ་གཡོབ་བྱེད་ཅིང་།
།
ལག་པས་གཏོར་བའི་ཆུ་ཐིགས་སྙིང་ཁར་ཁྱད་པར་དུ་འདྲེན་གླང་བོའི་བདག་པོ་འདི། །
ད་ནི་བཟོད་དཀའ་ཟུག་རྔུ་དྲག་པོས་ཟུག་པ་ལྟ་བུའི་གནས་སྐབས་འཛིན་པར་བྱེད།།
(ཅེས་ཏེ་གཉི་ག་སོང་ངོ)
མཚན་མ་དང་བོའོ།།
*མཆན།
འཇིག་རྟེན་དབང་ཕྱུག་ཟླ་བའི་བསྲེས་པོ་(जगदीशचन्द्रमिश्र)དང་མཁན་པོ་སྟོབས་ཀྱི་ལྷ་(बलदेवोपाध्याय)གཉིས་ཀྱིས་བསྒྲིགས་པའི་རྒྱ་དཔེ་གཉིས་དང་གཏུགས་ཤིང་། མཱ་དྷ་བ་ཙནྡྲ་གྷོ་ཥས་(माधव चन्द्र घोष)བསྒྲིགས་པའི་རྒྱ་དཔེ་དང་ཡང་ཟུར་ལྟ་བྱས་ཏེ། བསྟན་འགྱུར་དུ་འབྱུང་བའི་ཤོང་འགྱུར་གྱི་སྣོད་ཀྱི་མིང་མཐའི་བྱེད་པའི་སྒྲ་རྣམས་དགོས་དབང་གིས་བསྡུས། བི་དཱུ་ཥ་ཀ་ཞེས་པ་བཞད་གད་པ་རང་དུ་གྲགས་པས་བཞད་གད་པར་བཅོས། དེ་བཞིན་སྣོན་འཕྲི་དང་། གོང་འོག་སྣོར་དགོས་པ་འགའ་བསྣོར་བ་སོགས་འགྱུར་བཅོས་ཅུང་ཟད་དང་བཅས་རང་སྣང་ལ་དག་པར་ཞུས་ཏེ་གཏན་ལ་ཕབ་པས་ཡོངས་སུ་རྫོགས་པ་ཀུན་ལ་ཕན་པར་གྱུར་ཅིག །
ཟླ་བ་གཞོན་ནུའམ་སི་ནཱི་བཱ་ལཱིའམ་རྡོ་རྗེ་སྐྱབས་ཀྱིས་ ༢༠༡༩ ལོའི་ཟླ་ ༦ པའི་ཚེས་ ༢༥ ཉིན་རྫོགས་པར་བགྱིས་པ་དགེའོ།།
༈ *ཀླུ་ཀུན་དགའི་ཁྲིད་ལ་གསན་འདོད་ན་འདིར་ཕེབས། མཆོད་བརྗོད་ཀྱི་ཤུ་ལོག་ཁག་གི་རྣམ་བཤད་ལ་གཟིགས་ན་འདིར་ཕེབས།
