དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱག་འཚལ་ལོ། །
རྒྱ་གར་སྐད་དུ། གཎཀམོགྒལླཱནསུཏྟཾ།
བོད་སྐད་དུ། སྐར་མཁན་མཽད་གལ་གྱི་བུའི་མདོ།
འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན། ཤར་གྱི་ཀུན་དགའ་ར་བ་རི་དྭགས་འཛིན་གྱི་མའི་ཁང་བཟངས་ན་བཞུགས་སོ། །དེའི་ཚེ་བྲམ་ཟེ་སྐར་མཁན་མཽད་གལ་གྱི་བུ་བཅོམ་ལྡན་འདས་ག་ལ་བར་ཤིན་ཏུ་ཉེ་བར་དོང་སྟེ། དོང་ནས་ཀྱང་བཅོམ་ལྡན་འདས་དང་ལྷན་ཅིག་དྲན་པ་ཡང་དག་པར་འཇོག་བཞིན་ཞེ་ས་དང་བཅས་ཏེ་ཡང་དག་པར་དགའ་བར་འགྱུར་བའི་གཏམ་དག་བྱས་ནས། ཕྱོགས་གཅིག་ཏུ་འདུག་གོ ། ཕྱོགས་གཅིག་ཏུ་བསྡད་ནས་ཀྱང་བྲམ་ཟེ་སྐར་མཁན་མཽད་གལ་གྱི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ། གོའུ་ཏ་མ། འདི་ལྟ་སྟེ། དཔེར་ན། རི་དྭགས་འཛིན་གྱི་མའི་ཁང་བཟངས་འདིའི་རྡོ་སྐས་མཐའ་མ་བར་གྱིས་བསླབ་པ་མཐར་གྱིས་པ་དང་། བྱ་བ་མཐར་གྱིས་པ་དང་། ལམ་མཐར་གྱིས་པ་སྟོན་པར་བྱེད་དོ། །ཀྱེ་གོའུ་ཏ་མ། བྲམ་ཟེའི་ཁ་ཏོན་ལ་ཡང་བསླབ་པ་མཐར་གྱིས་པ་དང་། བྱ་བ་མཐར་གྱིས་པ་དང་། ལམ་མཐར་གྱིས་པ་སྟོན་པར་བྱེད་དོ། །ཀྱེ་གོའུ་ཏ་མ། འཕོང་རྩལ་ལ་ཡང་བསླབ་པ་མཐར་གྱིས་པ་དང་། བྱ་བ་མཐར་གྱིས་པ་དང་། ལམ་མཐར་གྱིས་པ་སྟོན་པར་བྱེད་དོ། །ཀྱེ། གོའུ་ཏ་མ། བདག་ཅག་སྐར་མཁན་རྩིས་ཀྱིས་འཚོ་བ་རྣམས་ཀྱི་གྲངས་ལའང་བསླབ་པ་མཐར་གྱིས་པ་དང་། བྱ་བ་མཐར་གྱིས་པ། ལམ་མཐར་གྱིས་པ་སྟོན་པར་བགྱིད་དོ། །ཀྱེ། གོའུ་ཏ་མ། བདག་གིས་སློབ་མ་རྣམས་ལ་ཐོག་མར་འདི་ལྟར་བརྩི་བར་བྱེད་དེ། གཅིག་གཅིག་གི་གཅིག གཉིས་གཅིག་གི་གཉིས། གསུམ་གཅིག་གི་གསུམ། བཞི་གཅིག་གི་བཞི། ལྔ་གཅིག་གི་ལྔ། དྲུག་གཅིག་གི་དྲུག །བདུན་གཅིག་གི་བདུན། བརྒྱད་གཅིག་གི་བརྒྱད། དགུ་གཅིག་གི་དགུ། བཅུ་གཅིག་གི་བཅུའོ། །ཀྱེ། གོའུ་ཏ་མ། བདག་གིས་བརྒྱ་བར་དུའང་བརྩི་བར་བགྱིད་དོ། །དེ་ལས་མང་བ་ཡང་བརྩི་བར་བགྱིད་དོ། །ཀྱེ། གོའུ་ཏ་མ། ཅི་ཁྱོད་ཀྱིས་ཆོས་འདུལ་བ་ལ་འདི་བཞིན་དུ་བསླབ་པ་མཐར་གྱིས་པ་དང་། བྱ་བ་མཐར་གྱིས་པ་དང་། ལམ་མཐར་གྱིས་པ་རྣམས་རབ་ཏུ་སྟོན་པར་བྱེད་ནུས་སམ།
བྲམ་ཟེ། ཆོས་འདུལ་བ་ལ་ཡང་འདི་ལྟར་བསླབ་པ་མཐར་གྱིས་པ་དང་། བྱ་བ་མཐར་གྱིས་པ་དང་། ལམ་མཐར་གྱིས་པ་རྣམས་རབ་ཏུ་སྟོན་པར་མཛད་ནུས་སོ། །འདི་ལྟ་སྟེ། དཔེར་ན། རྟ་འདུལ་མཁན་མཁས་པས་རྟ་ཅང་ཤེས་བཟང་པོ་རྙེད་པ་ཐོག་མ་ཉིད་དུ་ཁ་ལ་སྲབ་སྐོན་པར་བྱེད་དུ་འཇུག་པ་དང་། དེ་ནས་བྱ་བ་གཞན་བྱེད་དུ་འཇུག་པ་དེ་ལྟར་དུ། བྲམ་ཟེ། དེ་བཞིན་གཤེགས་པས་ཀྱང་སྐྱེས་བུ་གདུལ་བར་བྱ་བ་རྙེད་པ་ཐོག་མ་ཉིད་དུ་རྣམ་པར་གདུལ་དུ་འཇུག་སྟེ། དགེ་སློང་། ཁྱོད་ཚུར་ཤོག འདུལ་བ་དང་ལྡན་པར་བྱའོ། ། སོ་སོ་ཐར་པའི་སྡོམ་པ་ལ་སྤྱད་པར་བྱའོ། །སྤྱོད་པ་དང་སྤྱོད་ཡུལ་ཕུན་སུམ་ཚོགས་པ་དང་ལྡན་པར་བྱའོ། །རྡུལ་གྱི་ཚད་ཀྱི་སྤང་བྱའང་འཇིག་པར་བལྟ་བར་བྱའོ། །བསླབ་པ་རྣམས་དང་བསླབ་པའི་གནས་རྣམས་ཡང་དག་པར་སྤྱད་པར་བྱའོ། །བྲམ་ཟེ། ནམ་ཞིག་དགེ་སློང་རྣམས་ཚུལ་ཁྲིམས་དང་ལྡན་པར་གྱུར། སོ་སོ་ཐར་པའི་སྡོམ་པ་ལ་སྤྱོད་པར་གྱུར། སྤྱད་པ་དང་སྤྱོད་ཡུལ་ཕུན་སུམ་ཚོགས་པ་དང་ལྡན་པར་གྱུར། རྡུལ་གྱི་ཚད་ཀྱི་སྤང་བྱར་ཡང་འཇིག་པར་ལྟ། བསླབ་པ་རྣམས་དང་བསླབ་པའི་གནས་རྣམས་ལ་ཡང་དག་པར་སྤྱོད་པར་གྱུར་བ་ན། དེ་བཞིན་གཤེགས་པས་དེ་དག་ལ་གཞན་རྣམས་གདུལ་དུ་གཞུག་སྟེ། དགེ་སློང་དག ཁྱོད་འདིར་ཤོག དབང་པོ་རྣམས་ཀྱིས་ཡོངས་སུ་སྒོ་བསྡམ་པར་བྱའོ། །མིག་གིས་གཟུགས་མཐོང་ནས་མཚན་མར་མ་འཛིན་པར་མ་འགྱུར་ཞིག མངོན་རྟགས་སུ་འཛིན་པར་མ་འགྱུར་ཞིག །གང་གི་ཕྱིར་མིག་གི་དབང་པོ་བསྡམས་པར་མ་གྱུར་པར་སྤྱོད་པ་དག་ལ་བརྣབ་སེམས་དང་། ཡིད་མི་བདེ་བ་སྡིག་པ་མི་དགེ་བའི་ཆོས་རྣམས་ལ་སེམས་ཟག་པ་དང་བྲལ་བར་བྱ་བའི་ཕྱིར་དེ་དག་ལ་འབད་པ་དང་། སྡོམ་ཞིང་སྲུང་སྟེ། མིག་གི་དབང་པོ་ལ་མིག་གི་དབང་པོ་བསྡམས་ཏེ་གནས་པར་བྱའོ། །རྣ་ཡིས་སྒྲ་ཐོས་ནས་མཚན་མར་མ་འཛིན་པར་མ་འགྱུར་ཞིག མངོན་རྟགས་སུ་འཛིན་པར་མ་འགྱུར་ཞིག །གང་གི་ཕྱིར་རྣའི་དབང་པོ་བསྡམས་པར་མ་གྱུར་པར་སྤྱོད་པ་དག་ལ་བརྣབ་སེམས་དང་། ཡིད་མི་བདེ་བ་སྡིག་པ་མི་དགེ་བའི་ཆོས་རྣམས་ལ་སེམས་ཟག་པ་དང་བྲལ་བར་བྱ་བའི་ཕྱིར་དེ་དག་ལ་འབད་པ་དང་། སྡོམ་ཞིང་སྲུང་སྟེ། རྣའི་དབང་པོ་ལ་རྣའི་དབང་པོ་བསྡམས་ཏེ་གནས་པར་བྱའོ། །སྣ་ཡིས་དྲི་ཚོར་ནས་མཚན་མར་མ་འཛིན་པར་མ་འགྱུར་ཞིག མངོན་རྟགས་སུ་འཛིན་པར་མ་འགྱུར་ཞིག །གང་གི་ཕྱིར་སྣའི་དབང་པོ་བསྡམས་པར་མ་གྱུར་པར་སྤྱོད་པ་དག་ལ་བརྣབ་སེམས་དང་། ཡིད་མི་བདེ་བ་སྡིག་པ་མི་དགེ་བའི་ཆོས་རྣམས་ལ་སེམས་ཟག་པ་དང་བྲལ་བར་བྱ་བའི་ཕྱིར་དེ་དག་ལ་འབད་པ་དང་། སྡོམ་ཞིང་སྲུང་སྟེ། སྣའི་དབང་པོ་ལ་སྣའི་དབང་པོ་བསྡམས་ཏེ་གནས་པར་བྱའོ། །ལྕེ་ཡིས་རོ་ཚོར་ནས་མཚན་མར་མ་འཛིན་པར་མ་འགྱུར་ཞིག མངོན་རྟགས་སུ་འཛིན་པར་མ་འགྱུར་ཞིག །གང་གི་ཕྱིར་ལྕེའི་དབང་པོ་བསྡམས་པར་མ་གྱུར་པར་སྤྱོད་པ་དག་ལ་བརྣབ་སེམས་དང་། ཡིད་མི་བདེ་བ་སྡིག་པ་མི་དགེ་བའི་ཆོས་རྣམས་ལ་སེམས་ཟག་པ་དང་བྲལ་བར་བྱ་བའི་ཕྱིར་དེ་དག་ལ་འབད་པ་དང་། སྡོམ་ཞིང་སྲུང་སྟེ། ལྕེའི་དབང་པོ་ལ་ལྕེའི་དབང་པོ་བསྡམས་ཏེ་གནས་པར་བྱའོ། །ལུས་ཀྱིས་རེག་བྱ་མྱང་ནས་མཚན་མར་མ་འཛིན་པར་མ་འགྱུར་ཞིག མངོན་རྟགས་སུ་འཛིན་པར་མ་འགྱུར་ཞིག །གང་གི་ཕྱིར་ལུས་ཀྱི་དབང་པོ་བསྡམས་པར་མ་གྱུར་པར་སྤྱོད་པ་དག་ལ་བརྣབ་སེམས་དང་། ཡིད་མི་བདེ་བ་སྡིག་པ་མི་དགེ་བའི་ཆོས་རྣམས་ལ་སེམས་ཟག་པ་དང་བྲལ་བར་བྱ་བའི་ཕྱིར་དེ་དག་ལ་འབད་པ་དང་། སྡོམ་ཞིང་སྲུང་སྟེ། ལུས་དབང་པོ་ལ་ལུས་ཀྱི་དབང་པོ་བསྡམས་ཏེ་གནས་པར་བྱའོ། །ཡིད་ཀྱིས་ཆོས་རྣམ་པར་ཤེས་ནས་མཚན་མར་མ་འཛིན་པར་མ་འགྱུར་ཞིག མངོན་རྟགས་སུ་འཛིན་པར་མ་འགྱུར་ཞིག །གང་གི་ཕྱིར་ཡིད་ཀྱི་དབང་པོ་བསྡམས་པར་མ་གྱུར་པར་སྤྱོད་པ་དག་ལ་བརྣབ་སེམས་དང་། ཡིད་མི་བདེ་བ་སྡིག་པ་མི་དགེ་བའི་ཆོས་རྣམས་ལ་སེམས་ཟག་པ་དང་བྲལ་བར་བྱ་བའི་ཕྱིར་དེ་དག་ལ་འབད་པ་དང་། སྡོམ་ཞིང་སྲུང་སྟེ། ཡིད་ཀྱི་དབང་པོ་ལ་ཡིད་ཀྱི་དབང་པོ་བསྡམས་ཏེ་གནས་པར་བྱའོ། །བྲམ་ཟེ། ནམ་ཞིག་དགེ་སློང་རྣམས་དབང་པོའི་སྒོ་ཡོངས་སུ་བསྡམས་ཤིང་གནས་པ་དང་། དེ་བཞིན་གཤེགས་པས་དེ་རྣམས་ལ་གཞན་གདུལ་དུ་གཞུག་སྟེ། དགེ་སློང་ཁྱོད། ཚུར་ཤོག ཟས་ཀྱི་ཚོད་རིག་པར་འགྱུར་བར་བྱའོ། །སོ་སོ་བརྟགས་པས་ཚུལ་བཞིན་དུ་ཟས་བཟའ་བར་བྱ་སྟེ། རྩེ་བའི་ཕྱིར་མ་ལགས། རྒྱགས་པའི་ཕྱིར་མ་ལགས། འཚག་གི་ཕྱིར་མ་ལགས། རྣམ་པར་བརྒྱན་པའི་ཕྱིར་མ་ལགས་ཀྱི། ཇི་ལྟར་སྲིད་དུ་ལུས་གནས་ཤིང་རྟེན་པ་དང་། བཀྲེས་པ་བཟློག་པ་དང་། ཚངས་པར་སྤྱོད་པ་རྗེས་སུ་གཟུང་བའི་ཕྱིར་རོ། །ཚོར་བ་སྔ་མ་བཟློག་ཅིག་ཚོར་བ་གསར་པ་སྐྱེད་པར་བྱ་བའི་ཕྱིར་དང་། བདག་གང་དུ་སྐྱེ་བར་འགྱུར་ན། དེར་བདེ་བ་ལ་རེག་པར་གནས་པར་བྱ་བའི་ཕྱིར་རོ། །བྲམ་ཟེ། ནམ་ཞིག་དགེ་སློང་རྣམས་ཟས་ཀྱི་ཚོད་རིག་པར་གྱུར་ན། དེ་བཞིན་གཤེགས་པས་དེ་རྣམས་ལ་གཞན་ལ་གདུལ་དུ་གཞུག་སྟེ། དགེ་སློང་དག །ཁྱོད་ཚུར་ཤོག མི་ཉལ་བའི་སྦྱོར་བ་ལ་བརྩོན་པར་བྱའོ། །མཚན་ཉིན་མོ་རྒྱུ་བ་དང་གནས་པ་དག་ལ་ཆོས་རྣམས་ལ་སེམས་སྒྲིབ་པ་མེད་ཅིང་ཡོངས་སུ་དག་གོ །མཚན་མོའི་ཐུན་དང་པོ་ལ་རྒྱུ་བ་དང་གནས་པ་དག་ལས་ཆོས་རྣམས་ལ་སེམས་སྒྲིབ་པ་མེད་ཅིང་ཡོངས་སུ་དག་ནས་མཚན་མོའི་ཐུན་བར་པ་ལ་སེང་གེ་ཉལ་སྟབས་ཀྱིས་གློ་གཡས་པ་ཕབ་སྟེ། རྐང་པས་རྐང་པ་མནན་ནས། དྲན་པ་དང་ཤེས་བཞིན་གྱིས་སྣང་བའི་འདུ་ཤེས་དང་ལྡན་པའི་འདུ་ཤེས་ཡིད་ལ་བྱེད་ཅིང་ཉལ་བར་བྱེད་དོ། །མཚན་མོའི་ཐུན་ཐ་མ་ལ་མྱུར་བ་མྱུར་བར་ལངས་ནས་རྒྱུ་བ་གནས་པ་དག་ལ་ཆོས་རྣམས་ལ་སེམས་སྒྲིབ་པ་མེད་ཅིང་ཡོངས་སུ་དག་གོ །བྲམ་ཟེ། དགེ་སློང་རྣམས་མི་ཉལ་བའི་སྦྱོར་བ་དང་རྗེས་སུ་ལྡན་པར་གྱུར་ན། དེ་བཞིན་གཤེགས་པས་དེ་རྣམས་ལ་གཞན་གདུལ་དུ་གཞུག་སྟེ། དགེ་སློང་དག ཁྱོད་ཚུར་ཤོག དྲན་པ་དང་ཤེས་བཞིན་དང་ཡང་དག་པར་ལྡན་པར་བྱའོ། །སྔོན་དུ་སྐྱོད་པ་དང་ཕྱིར་ལྡོག་པ་ན་ཡང་དྲན་པ་ཉེ་བར་བཞག་པ་དང་ལྡན་པས་བྱའོ། །སྔོན་དུ་ལྟ་བ་དང་ཕྱིར་ལྟ་བ་ན་ཡང་དྲན་པ་ཉེ་བར་བཞག་པ་དང་ལྡན་པས་བྱའོ། །ཕྱིར་དགྱེ་བ་དང་མར་སྒུར་བ་ན་ཡང་དྲན་པ་ཉེ་བར་བཞག་པ་དང་ལྡན་པས་བྱའོ། །ཕྱིའི་ལྷུང་བཟེད་དང་ཆོས་གོས་དང་སྣམ་སྦྱར་འཛིན་པ་ན་ཡང་དྲན་པ་ཉེ་བར་བཞག་པ་དང་ལྡན་པས་བྱའོ། །ཟ་བ་དང་། འཐུང་བ་དང་། ལྡོད་པ་དང་། མྱོང་བ་ན་ཡང་དྲན་པ་ཉེ་བར་བཞག་པ་དང་ལྡན་པས་བྱའོ། །བཤང་བ་དང་གཅི་བ་ན་ཡང་དྲན་པ་ཉེ་བར་བཞག་པ་དང་ལྡན་པས་བྱའོ། །འགྲོ་བ་དང་། ལང་བ་དང་། སྡོད་པ་དང་། ཉལ་བ་དང་། སད་པ་དང་། བཤད་པ་དང་། ཁ་རོག་གེར་འདུག་པ་ན་ཡང་དྲན་པ་ཉེ་བར་བཞག་པ་དང་ལྡན་པས་བྱའོ། །བྲམ་ཟེ། ནམ་ཞིག་དགེ་སློང་རྣམས་དྲན་པ་དང་ཤེས་བཞིན་ཡང་དག་པ་དང་ལྡན་པར་གྱུར་ན། དེ་བཞིན་གཤེགས་པས་དེ་རྣམས་ལ་གཞན་གདུལ་དུ་གཞུག་སྟེ། དགེ་སློང་དག ཁྱོད་ཚུར་ཤོག གནལ་མལ་དབེན་པ་བསྟེན་པར་བྱའོ། །ནགས་དང་། ཤིང་དྲུང་དང་། རི་དང་། ཕུག་དང་། རིའི་ཁང་པ་དང་། དུར་ཁྲོད་དང་། ནགས་ཁྲོད་དང་། བླ་གབ་མེད་པ་དང་། རྩྭ་སྤྱིལ་བསྟེན་པར་བྱའོ། །དེ་དག་ཟས་ཟོས་ནས་བསོད་སྙོམས་ལས་སླར་ལོག་སྟེ། སྐྱིལ་མོ་ཀྲུང་བཅས་ནས་འདུག་ཅིང་ལུས་དྲང་པོར་བསྲང་སྟེ། དྲན་པ་མངོན་དུ་བཞག་ནས། དེ་དག་འཇིག་རྟེན་པའི་ཆགས་པ་སྤངས་ཏེ། ཆགས་པ་དང་བྲལ་བའི་སེམས་མང་པོར་སྤྱོད་ཅིང་། ཆགས་པའི་སེམས་ཡོངས་སུ་སྦྱོང་ངོ་། །གནོད་སེམས་སྤངས་ཏེ་གནོད་པ་དང་བྲལ་བ་སེམས་ཅན་ཐམས་ཅད་ལ་ཕན་པ་དང་རྗེས་སུ་བརྩེ་བའི་སེམས་མང་པོར་སྤྱོད་ཅིང་། གནོད་སེམས་ཀྱི་སྐྱོན་དང་བཅས་པའི་སེམས་ཡོངས་སུ་སྦྱོང་ངོ་། །རྨུག་གཉིད་སྤངས་ཏེ་རྨུག་གཉིད་དང་བྲལ་བ་སྣང་བའི་སེམས་དང་བཅས་ཏེ་རང་ཉིད་རབ་ཏུ་ཤེས་པར་བྱེད་ཅིང་། རྨུགས་གཉིད་ཀྱི་སེམས་ཡོངས་སུ་སྦྱོང་ངོ་། །རྒོད་འགྱོད་སྤངས་ཏེ། དྲེགས་པ་མེད་པ་ནང་གི་ཡོངས་སུ་ཞི་བའི་སེམས་མང་པོར་སྤྱོད་ཅིང་། རྒོད་འགྱོད་ཀྱི་སེམས་ཡོངས་སུ་སྦྱོང་ངོ་། །ཐེ་ཚོམ་སྤངས་ཏེ། ཐེ་ཚོམ་ལས་ཡོངས་སུ་བརྒལ་བར་སྤྱོད་ཅིང་། དགེ་བའི་ཆོས་རྣམས་ལ་འདི་ལྟ་བུའམ་ཇི་ལྟ་བུ་ཞེས་བྱ་བའི་ཐེ་ཚོམ་གྱི་སེམས་ཡོངས་སུ་སྦྱོང་ངོ་།།
དེ་དག་སྒྲིབ་པ་ལྔ་པོ་འདི་དག་སྤངས་ཏེ། སེམས་ཀྱི་ཉེ་ཉོན་དག་ཤེས་རབ་ཀྱིས་སྟོབས་མེད་པར་བྱས་ཏེ། འདོད་པ་དག་ལས་དབེན་པ། སྡིག་པ་མི་དགེ་བའི་ཆོས་ལས་དབེན་པ། རྟོག་པ་དང་བཅས་དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་། བདེ་བའི་བསམ་གཏན་དང་པོ་མངོན་དུ་བསྒྲུབས་ནས་གནས་སོ། །དེ་དག་རྣམ་པར་རྟོག་པ་དང་། རྣམ་པར་དཔྱོད་པ་ཞི་བར་བྱ་བའི་ཕྱིར། ནང་གི་སེམས་ལ་རབ་ཏུ་དགའ་བ་གཅིག་ཏུ་དམིགས་པས་རྣམ་པར་མི་རྟོག །རྣམ་པར་མི་དཔྱོད་པའི་ཏིང་ངེ་འཛིན་ལས་སྐྱེས་པའི་དགའ་བ་དང་། བདེ་བའི་བསམ་གཏན་གཉིས་པ་མངོན་དུ་བསྒྲུབས་ཏེ་གནས་སོ། །དེ་དག་དགའ་བ་སྤངས་ནས་བཏང་སྙོམས་དང་། དྲན་པ་དང་། རབ་ཏུ་ཤེས་པ་དང་། བདེ་བས་ལུས་ལ་སོ་སོར་མྱོང་བར་གནས་ཏེ། གང་འཕགས་པ་དག་གིས་གསུངས་པའི་དྲན་པ་དང་ལྡན་པའི་བཏང་སྙོམས་པར་བྱས་ཏེ། བདེ་བར་གནས་སོ་ཞེས་བྱ་བའི་བསམ་གཏན་གསུམ་པ་མངོན་དུ་བསྒྲུབས་ཏེ་གནས་སོ། །དེ་དག་བདེ་བ་ཡང་སྤངས། སྡུག་བསྔལ་བ་ཡང་སྤངས་ཏེ། ཡིད་བདེ་བ་དང་། ཡིད་མི་བདེ་བ་ནི་སྔར་སྤངས་པས་ན་སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པ་བཏང་སྙོམས་དང་། དྲན་པ་ཡོངས་སུ་དག་པ་བསམ་གཏན་བཞི་བ་མངོན་པར་བསྒྲུབས་ནས་གནས་སོ། །
བྲམ་ཟེ། དགེ་སློང་གང་དག་སློབ་པ་ཡིན་པ་རྣམས་ཀྱིས་མ་ཐོབ་པའི་ཡིད་ཀྱིས་བླ་ན་མེད་པའི་གྲུབ་པ་དང་བདེ་བ་དོན་གཉེར་བས་སྤྱོད་པ་ཡིན་ལ། དེ་དག་ལ་བདག་གི་རྗེས་སུ་བསྟན་པ་འདི་ལྟ་བུའོ། །གཞན་ཡང་དགེ་སློང་གང་དག་དགྲ་བཅོམ་པ། ཟག་པ་ཟད་པ། བྱ་བ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པར་སྦྱོར་བ་ཡོངས་སུ་བས་པ། བཀའ་ཡང་དག་པས་སེམས་ཤིན་ཏུ་རྣམ་པར་གྲོལ་བ་དེ་དག་ཆོས་འདི་དག་ལ་མཐོང་ཆོས་བདེ་བར་སྤྱོད་པ་དང་དྲན་པ་ཉེ་བར་གཞག་པའི་ཕྱིར་ཉིད་དུ་ཡོངས་སུ་སྒྲུབ་པར་འགྱུར་རོ། །
དེ་སྐད་ཅེས་བཀའ་སྩལ་པ་དང་། བྲམ་ཟེ་སྐར་མཁན་མཽད་གལ་གྱི་བུས་བཅོམ་ལྡན་འདས་ལ་འདི་སྐད་ཅེས་གསོལ་པ། ཅི་གོའུ་ཏ་མའི་ཉན་ཐོས་རྣམས་གོའུ་ཏ་མ་ཁྱོད་ཀྱིས་ཇི་ལྟར་གདམས་པ་དང་རྗེས་སུ་བསྟན་པ་བཞིན་དུ་ཐམས་ཅད་མཐར་ཐུག་མྱ་ངན་མེད་པ་འཐོབ་པར་འགྱུར་རམ། ཡང་ལ་ལ་ལ་ཐོབ་པར་མི་འགྱུར། བྲམ་ཟེ། བདག་གི་ཉན་ཐོས་རྣམས་ལས་ལ་ལ་བདག་གིས་ཇི་ལྟར་གདམས་པ་དང་རྗེས་སུ་བསྟན་པ་བཞིན་དུ་ཐམས་ཅད་མཐར་ཐུག་མྱ་ངན་ལས་འདས་པར་འགྱུར་ལ། ལ་ལ་མྱ་ངན་ལས་འདས་པར་མི་འགྱུར་རོ། །བཙུན་པ། རྒྱུ་ཅི་དང་རྐྱེན་ཅིས་གང་མྱ་ངན་ལས་འདས་པ་ཡོད་པ་དང་། མྱ་ངན་ལས་འདས་པར་འགྲོ་བའི་ལམ་ཡོད་པ་དང་། ཡང་དག་པར་འཛིན་དུ་འཇུག་པ་པོ་གོའུ་ཏ་མ་བཞུགས་པ་དང་། གོའུ་ཏ་མའི་ཉན་ཐོས་རྣམས་གོའུ་ཏ་མ་ཁྱོད་ཀྱིས་ཇི་ལྟར་གདམས་པ་དང་རྗེས་སུ་བསྟན་བཞིན་དུའང་ལ་ལ་ལ་མཐར་ཐུག་མྱ་ངན་མེད་པ་འཐོབ་པར་འགྱུར་བ་དང་། ཡང་ལ་ལ་ལ་ཐོབ་པར་མི་འགྱུར།
བྲམ་ཟེ། དེ་ལ་བདག་ཁྱོད་ལ་འདི་ལྟར་སླར་འདྲི་བར་བགྱི་ཡི། ཇི་ལྟར་ནུས་པ་ལྟར་དུ་ཁྱོད་ཀྱིས་བདག་ལ་སྨྲོས་ཤིག བྲམ་ཟེ། ཁྱོད་ཇི་སྙམ་དུ་སེམས། ཁྱོད་རྒྱལ་པོའི་ཁབ་ཏུ་འགྲོ་བའི་ལམ་སྟོན་པ་ལ་མཁས་སམ། ཀྱེ། བདག་རྒྱལ་པོའི་ཁབ་ཏུ་བགྲོད་པའི་ལམ་སྟོན་པ་ལ་མཁས་པ་ཉིད་དོ། །བྲམ་ཟེ། དེ་ལ་ཁྱོད་ཇི་སྙམ་དུ་སེམས། སྐྱེས་བུ་རྒྱལ་པོའི་ཁབ་ལ་བགྲོད་པར་འདོད་པ་ཞིག་འདིར་འོངས་ཏེ། དེ་ཁྱོད་ལ་ཤིན་ཏུ་ཉེ་བར་བཅར་ཏེ་སྨྲས་པ། བཙུན་པ། བདག་རྒྱལ་པོའི་ཁབ་ཏུ་བགྲོད་པར་འདོད་ན། རྒྱལ་པོའི་ཁབ་དེ་ལ་བགྲོད་པའི་ལམ་བདག་ལ་སྟོན་པར་མཛོད། དེ་ལ་ཁྱོད་འདི་སྐད་ཅེས་སྨྲས་པ། ཀྱེ། སྐྱེས་བུ། ལམ་འདི་རྒྱལ་པོའི་ཁབ་ལ་འགྲོ་བ་སྟེ། དེ་ནས་ཡུད་ཙམ་སོང་ཞིག དེ་ནས་ཡུད་ཙམ་སོང་ཞིག་དང་ཁྱོད་ཀྱིས་མིང་ལ་ག་གེ་མོ་བྱ་བ་གྲོང་ཞིག་མཐོང་བར་འགྱུར་རོ། ། དེ་ནས་ཡུད་ཙམ་སོང་བར་གྱུར་ན་མིང་ལ་ག་གེ་མོ་བྱ་བའི་གྲོང་རྡལ་ཞིག་མཐོང་བར་འགྱུར་རོ། ། དེ་ནས་ཡུད་ཙམ་ཞིག་སོང་ཞིག དེ་ནས་ཡུད་ཙམ་ཞིག་སོང་ན་ཁྱོད་ཀྱིས་རྒྱལ་པོའི་ཁབ་ཀྱི་ཉམས་དགའ་བའི་ཀུན་དགའ་ར་བ་དང་། ཉམས་དགའ་བའི་ནགས་དང་། ཉམས་དགའ་བའི་ས་དང་། ཉམས་དགའ་བའི་རྫིང་བུ་དག་མཐོང་བར་འགྱུར་རོ། ། དེ་ལ་ཁྱོད་ཀྱིས་འདི་ལྟར་གདམས་པ་དང་རྗེས་སུ་བསྟན་པ་བཞིན་དུའང་། ལམ་ལོག་པར་ཞུགས་ནས་ནུབ་ཏུ་གདོང་ཕྱོགས་ཏེ་སོང་བར་གྱུར་ཏོ། །དེ་ནས་ཡང་རྒྱལ་པོའི་ཁབ་ཏུ་བགྲོད་པར་འདོད་པའི་སྐྱེས་བུ་གཞན་ཞིག་འོངས་ཏེ། དེ་ཁྱོད་ལ་ཤིན་ཏུ་ཉེ་བར་བཅར་ཏེ་སྨྲས་པ། བཙུན་པ། བདག་རྒྱལ་པོའི་ཁབ་ཏུ་བགྲོད་པར་འདོད་ན། རྒྱལ་པོའི་ཁབ་དེ་ལ་བགྲོད་པའི་ལམ་བདག་ལ་སྟོན་པར་མཛོད། དེ་ལ་ཁྱོད་འདི་སྐད་ཅེས་སྨྲས་པ། ཀྱེ། སྐྱེས་བུ། ལམ་འདི་རྒྱལ་པོའི་ཁབ་ལ་འགྲོ་བ་སྟེ། དེ་ནས་ཡུད་ཙམ་སོང་ཞིག དེ་ནས་ཡུད་ཙམ་སོང་ཞིག་དང་ཁྱོད་ཀྱིས་མིང་ལ་ག་གེ་མོ་བྱ་བ་གྲོང་ཞིག་མཐོང་བར་འགྱུར་རོ། ། དེ་ནས་ཡུད་ཙམ་སོང་བར་གྱུར་ན་མིང་ལ་ག་གེ་མོ་བྱ་བའི་གྲོང་རྡལ་ཞིག་མཐོང་བར་འགྱུར་རོ། ། དེ་ནས་ཡུད་ཙམ་ཞིག་སོང་ཞིག དེ་ནས་ཡུད་ཙམ་ཞིག་སོང་ན་ཁྱོད་ཀྱིས་རྒྱལ་པོའི་ཁབ་ཀྱི་ཉམས་དགའ་བའི་ཀུན་དགའ་ར་བ་དང་། ཉམས་དགའ་བའི་ནགས་དང་། ཉམས་དགའ་བའི་ས་དང་། ཉམས་དགའ་བའི་རྫིང་བུ་དག་མཐོང་བར་འགྱུར་རོ། ། དེ་ལ་ཁྱོད་ཀྱིས་འདི་ལྟར་གདམས་པ་དང་རྗེས་སུ་བསྟན་པ་བཞིན་དུ་བདེ་བར་རྒྱལ་པོའི་ཁབ་ཏུ་ཕྱིན་པར་གྱུར་ཏོ། །
བྲམ་ཟེ། རྒྱུ་ཅི་དང་རྐྱེན་ཅིས་གང་རྒྱལ་པོའི་ཁབ་ཡོད་པ་དང་། རྒྱལ་པོའི་ཁབ་ཏུ་བགྲོད་པའི་ལམ་ཡོད་པ་དང་། ཡང་དག་པར་འཛིན་དུ་འཇུག་པ་པོ་ཁྱོད་ཡོད་པ་དང་། ཁྱོད་ཀྱིས་ཇི་ལྟར་གདམས་པ་དང་རྗེས་སུ་བསྟན་བཞིན་དུའང་སྐྱེས་བུ་གཅིག་ལམ་ལོག་པར་ཞུགས་ནས་ནུབ་ཏུ་གདོང་ཕྱོགས་ནས་ཕྱིན་པར་གྱུར་ལ། གཅིག་བདེ་བར་རྒྱལ་པོའི་ཁབ་ཏུ་བདེ་བར་ཕྱིན་པར་གྱུར་ཏམ། ཀྱེ། གོའུ་ཏ་མ། བདག་གིས་དེ་ལ་ཅི་ཞིག་བྱ། བདག་ནི་ལམ་སྟོན་པ་པོ་ཙམ་ལགས་སོ། །
བྲམ་ཟེ། དེ་བཞིན་དུ། མྱ་ངན་ལས་འདས་པ་ཡོད་པ་དང་། མྱ་ངན་ལས་འདས་པར་འགྲོ་བའི་ལམ་ཡོད་པ་དང་། ཡང་དག་པར་འཛིན་དུ་འཇུག་པ་པོ་གོའུ་ཏ་མ་བཞུགས་པ་དང་། བདག་གི་ཉན་ཐོས་རྣམས་ལ་བདག་གིས་ཇི་ལྟར་གདམས་པ་དང་རྗེས་སུ་བསྟན་བཞིན་དུའང་། ལ་ལ་ལ་མཐར་ཐུག་མྱ་ངན་མེད་པ་འཐོབ་པར་འགྱུར་བ་དང་། ཡང་ལ་ལ་ལ་ཐོབ་པར་མི་འགྱུར་བ་འདིར་བདག་གིས་ཅི་ཞིག་བྱ། བྲམ་ཟེ། དེ་བཞིན་གཤེགས་པ་ནི་ལམ་སྟོན་པ་པོའོ། །
དེ་སྐད་ཅེས་བཀའ་སྩལ་པ་དང་། བྲམ་ཟེ་སྐར་མཁན་མཽད་གལ་གྱི་བུས་བཅོམ་ལྡན་འདས་ལ་འདི་སྐད་ཅེས་གསོལ་པ། ཀྱེ། གོའུ་ཏ་མ། སྐྱེས་བུ་གང་དག་དད་པ་མེད་པ། དད་པས་མ་ཡིན་པར་འཚོ་འཚོས་ཙམ་གྱི་སླད་དུ་ཁྱིམ་ནས་ཁྱིམ་མེད་པར་རབ་ཏུ་བྱུང་བ། གཡོ་དང་སྒྱུ་དང་ཁེངས་པ་དང་རྒྱགས་པ་དང་། མི་བརྟན་པ་དང་། མུ་ཅོར་སྒྲོག་པ་དང་། རྒྱས་པར་སྨྲ་བ་དང་། དབང་པོའི་སྒོ་མ་བསྡམས་པ་དང་། ཟས་ཀྱི་ཚོད་མི་རིག་པ་དང་། མི་ཉལ་བའི་སྦྱོར་བ་དང་མི་ལྡན་པ་དང་། དགེ་སྦྱོང་གི་ཆོས་ལ་ལྟོས་པ་མེད་པ་དང་། བསླབ་པ་ལ་མི་གུས་པ་དང་། མང་པོ་ཅན་དང་། ལེ་ལོ་ཅན་དང་། འཇུག་པ་ལ་སྔོན་དུ་འགྲོ་བ་དང་། ཪབ་ཏུ་དབེན་པ་ལ་མངོན་པར་མི་དགའ་བ་དང་། བརྩོན་འགྲུས་ཞན་པ་དང་། བརྗེས་ངས་པ་དང་། ཤེས་བཞིན་མ་ཡིན་པ་དང་། མཉམ་པར་མ་གཞག་པ་དང་། སེམས་རྣམ་པར་འཕྲུལ་བ་དང་། ཤེས་རབ་འཆལ་བ་དང་། ལུག་ལྟར་གླེན་པ་དེ་དག་དང་། གོའུ་ཏ་མ། ལྷན་ཅིག་གནས་པར་མ་མཛད་ཅིག
གཞན་ཡང་། རིགས་ཀྱི་བུ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བ། གཡོ་མེད་པ་དང་། སྒྱུ་མེད་པ་དང་། ཁེངས་པ་མེད་པ་དང་། རྒྱགས་པ་མེད་པ་དང་། བརྟན་པ་དང་། མུ་ཅོར་སྒྲོག་པ་མ་ཡིན་པ་དང་། རྒྱས་པར་སྨྲ་བ་མ་ཡིན་པ་དང་། དབང་པོའི་སྒོ་བསྡམས་པ་དང་། ཟས་ཀྱི་ཚོད་རིག་པ་དང་། མི་ཉལ་བའི་སྦྱོར་བ་དང་ལྡན་པ་དང་། དགེ་སྦྱོང་གི་ཆོས་ལ་ལྟོས་པ་དང་། བསླབ་པ་ལ་གུས་པ་དང་། མང་པོ་ཅན་མ་ཡིན་པ་དང་། ལེ་ལོ་ཅན་མ་ཡིན་པ་དང་། འཇུག་པ་ལ་མངོན་པར་མི་དགའ་བ་དང་། ཪབ་ཏུ་དབེན་པ་ལ་སྔོན་དུ་འགྲོ་བ་དང་། བརྩོན་འགྲུས་རྩོམ་པ་དང་། བདག་ཉིད་སྤངས་པ་དང་། ཤེས་བཞིན་དང་། མཉམ་པར་གཞག་པ་དང་། སེམས་རྩེ་གཅིག་པ་དང་། ཤེས་རབ་ལྡན་པ་དང་། ལུག་ལྟར་གླེན་པ་མ་ཡིན་པ་དེ་དག་དང་། གོའུ་ཏ་མ། ལྷན་ཅིག་གནས་པར་མཛོད། ཀྱེ། གོའུ་ཏ་མ། འདི་ལྟ་སྟེ། དཔེར་ན། རྩ་བ་དྲི་མ་ཅན་གང་དག་ལས་དུས་དང་རྗེས་སུ་འབྲང་བའི་ཙན་དན་ནི་མཆོག་ཏུ་བརྗོད་པ་དང་། སྙིང་པོ་དྲི་མ་ཅན་གང་དག་ལས་ཙན་དན་དམར་པོ་ནི་མཆོག་ཏུ་བརྗོད་པ་དང་། མེ་ཏོག་དྲི་མ་ཅན་གང་དག་ལས་མེ་ཏོག་བཱ་རྴི་ཀཱི་ནི་མཆོག་ཏུ་བརྗོད་པ་དེ་ལྟར་དུ། གོའུ་ཏ་མ་ཁྱོད་ཀྱི་གདམས་པ་ནི་ཆོས་རྣམས་ལས་མཆོག་ཏུ་གྱུར་པའོ། །ཀྱེ། གོའུ་ཏ་མ། ངོ་མཚར་རྨད་དུ་བྱུང་ངོ་། ། ཀྱེ། གོའུ་ཏ་མ། ངོ་མཚར་རྨད་དུ་བྱུང་ངོ་། །འདི་ལྟ་སྟེ། དཔེར་ན། མགོ་མཇུག་ལྡོག་པ་རྣམས་མགོ་འཇུག་མ་ལོག་པར་མཛད། བསྒྲིབས་པར་གྱུར་པ་རྣམས་རྣམ་པར་ཕྱེ་བར་མཛད། རྨོངས་པ་རྣམས་ལ་ལམ་བསྟན་པར་མཛད། སྨག་ལ་སྣུམ་གྱི་སྒྲོན་མེ་བཏེགས་པར་མཛད་ནས། མིག་དང་ལྡན་པ་རྣམས་ཀྱིས་གཟུགས་རྣམས་མཐོང་བར་མཛད་དོ། །གོའུ་ཏ་མ་ཁྱོད་ཀྱིས་རྣམ་གྲངས་དུ་མའི་སྒོ་ནས་ཆོས་རབ་ཏུ་གསལ་བར་མཛད་དོ། །དེ་བས་འདིར་བདག་གོའུ་ཏ་མ་ཁྱོད་ལ་སྐྱབས་སུ་མཆིའོ། ། ཆོས་དང་དགེ་འདུན་ལའང་སྐྱབས་སུ་མཆིའོ། ། བདག་གོའུ་ཏ་མ་ཁྱོད་ཀྱི་དགེ་བསྙེན་དུ་གཟུང་དུ་གསོལ་ལ། དེང་སླན་ཆད་ཇི་སྲིད་འཚོ་བའི་བར་དུ་བདག་སྐྱབས་སུ་མཆིའོ། །
སྐར་མཁན་མཽད་གལ་གྱི་བུ་ཞེས་བྱ་བའི་མདོ་ཡོངས་སུ་རྫོགས་སོ། །
གངས་ཅན་གྱི་ལོ་ཙཱ་བ་ཟླ་བ་གཞོན་ནུའམ་ཡང་གླེ་རྡོ་རྗེ་སྐྱབས་ཀྱིས་བསྒྱུར་བ་དགེའོ། །
