མཁས་པ་བློ་གྲོས་བཟང་བོའི་གཏམ་དུ་བྱ་བ།
བསྐལ་བ་གྲངས་མེད་བཞི་དང་ནི། །འབུམ་ཕྲག་གཅིག་ནི་ལྷག་པ་ན། །
གྲོང་ཁྱེར་འཇིགས་མེད་ལྡན་ཞེས་པ། །མཐོང་བ་ཡིས་ནི་དགའ་བར་བྱེད། །
རྒྱུན་མི་འཆད་པ་སྒྲ་བཅུ་བཞིན། །བཟའ་དང་བཏུང་བ་ཡང་དག་ལྡན། །༡༢
གླང་བོའི་སྒྲ་དང་རྟ་ཡི་སྒྲ། །རོལ་མོ་དུང་དང་ཤིང་རྟའི་སྒྲ། །
ཟ་དང་འཐུང་བ་དེ་ཉིད་དང་། ། བཟའ་དང་བཏུང་བའི་སྒྲ་དང་ནི། །༡༣
གྲོང་ཁྱེར་ཡན་ལག་ཉིང་ལག་ལྡན། །འདོད་པ་ཐམས་ཅད་ཉེ་རབ་གནས། །
རིན་ཆེན་བདུན་པོ་ཡང་དག་ལྡན། །སྐྱེ་བོ་སྣ་ཚོགས་ཡང་དག་གང། །༡༤
ལྷ་ཡི་གྲོང་ཁྱེར་ཕུན་ཚོགས་བཞིན། །བསོད་ནམས་ཅན་ནི་གནས་པའོ། །
འཇིག་མེད་ལྡན་པའི་གྲོང་ཁྱེར་དུ། །བྲམ་ཟེ་བློ་བཟངས་ཞེས་བྱ་བས། །༡༥
ལོངས་སྤྱོད་བྱེ་བ་དུ་མ་བསགས། །ནོར་དང་འབྲུ་ནི་མང་བོ་ཡི། །
ནང་གི་གསང་སྔགས་འཛིན་པ་དང་། །རིག་བྱེད་གསུམ་གྱི་ཕ་རོལ་སོན། །
མཚན་ཉིད་དེ་ལྟ་བུ་བྱུང་དང་། །དམ་པའི་ཆོས་ཀྱི་ཕ་རོལ་སོན། །༡༦
དབེན་པར་གཅིག་པུར་གནས་ནས་ནི། །དེ་ཚེ་བདག་ནི་འདི་ལྟར་བསམས། །
སྲིད་པར་སྐྱེ་བ་སྡུག་བསྔལ་ཞིང། །ལུས་ནི་ཡོངས་སུ་ཞིག་པ་ན། །༡༧
སྐྱེ་བའི་ཆོས་དང་རྒ་བའི་ཆོས། །ན་བའི་ཆོས་དང་དེ་ཚེ་བདག །
སྐྱེ་བ་མེད་དང་འཆི་མེད་བདེ། །མྱ་ངན་འདས་པ་ཡོངས་སུ་བཙལ། །༡༨
གང་ཚེ་དྲི་ངན་ལུས་འདི་ནི། །སྣ་ཚོགས་མི་གཙང་གིས་གང་ཞིང། །
དོན་མེད་ལྟོས་པ་མེད་པ་ཡིན། །དོར་ནས་འགྲོ་བར་བྱ་བ་ཡིན། །༡༩
དེ་ཡི་ལམ་ནི་ཡོད་དམ་སྙམ། །འབད་པ་མེད་པར་ལམ་མི་ཐོབ། །
དེ་ཡི་ལམ་ནི་བཙལ་བར་བྱ། །སྲིད་པ་རྣམས་ལས་གྲོལ་འགྱུར་སྙམ། །༢༠
ཇི་ལྟར་སྡུག་བསྔལ་ཡོད་པ་ན། །བདེ་བ་ཞེས་པའང་ཡོད་པ་ཡིན། །
དེ་ལྟར་སྲེད་པ་ཡོད་པ་ན། །སྲིད་པ་མེད་པའང་ཡོད་པ་ཡིན། །༢༡
ཇི་ལྟར་ཚ་བ་ཡོད་གྱུར་ན། །གྲང་བ་ཡང་ནི་ཡོད་པ་ཡིན། །
དེ་ལྟར་མེ་གསུམ་ཡོད་གྱུར་ན། །མྱ་ངན་འདས་པའང་ཡོད་པ་ཡིན། །༢༢
ཇི་ལྟར་སྡིག་པ་ཡོད་གྱུར་ན། །དགེ་བ་ཡང་ནི་ཡོད་པ་ཡིན། །
དེ་ལྟར་སྐྱེ་བ་ཡོད་གྱུར་ན། །སྐྱེ་བ་མེད་པའང་ཡོད་པར་འདོད། །༢༣
ཇི་ལྟར་མི་གཙང་གོས་པའི་མི། །གང་བའི་མཚོ་ནི་མཐོང་བཞིན་དུ། །
མཚོ་དེར་འཇུག་པར་མི་བྱེད་ན། །དེ་ནི་མཚོ་ཡི་སྐྱོན་མིན་ནོ། །༢༤
དེ་ལྟར་ཉོན་མོངས་དྲི་འཁྲུད་པ། །བདུད་རྩིའི་མཚོ་ནི་ཡོད་པ་ཡི། །
མཚོ་དེ་ལ་ནི་མི་འཇུག་ན། །བདུད་རྩི་མཚོ་ཡི་སྐྱོན་མིན་ནོ། །༢༥
ཇི་ལྟར་ཆོམ་རྐུན་གྱིས་བསྐོར་བ། །འགྲོ་བའི་ལམ་ནི་ཡོད་པ་ལ། །
སྐྱེས་བུ་འབྲོས་པར་མི་བྱེད་ན། །དེ་ནི་ལམ་གྱི་སྐྱོན་མ་ཡིན། །༢༦
ཇི་ལྟར་ཉོན་མོངས་ཀྱིས་བསྐོར་ན། །ཞི་བའི་ལམ་ནི་ཡོད་པ་ལ། །
དེ་ཡི་ལམ་དུ་མི་འཇུག་ན། །ཞི་བའི་ལམ་གྱི་སྐྱོན་མ་ཡིན། །༢༧
ཇི་ལྟར་ནད་ཀྱིས་གཟིར་བའི་མི། །གསོ་དཔྱད་བྱེད་པ་ཡོད་གྱུར་བ། །
ནད་ནི་ཞི་བར་མི་བྱེད་ན། །དེ་ནི་སྨན་པའི་སྐྱོན་མ་ཡིན། །༢༨
དེ་ལྟར་ཉོན་མོངས་པ་ཡི་ནད། །གཟིར་ཞིང་སྡུག་བསྔལ་གྱུར་བའི་ཚེ། །
སློབ་དཔོན་འཚོལ་བར་མི་བྱེད་ན། །སློབ་དཔོན་གྱི་ནི་སྐྱོན་མ་ཡིན། །༢༩
ཇི་ལྟར་མི་ཡིས་དྲི་ང་བ། །མགུལ་ལ་བཅིངས་ན་སྐྱུག་བྲོ་སྟེ། །
དེ་དག་སྤངས་ནས་འགྲོ་བྱེད་ན། །སྐྱུག་མི་བྲོ་ཞིང་བདེ་བར་འགྲོ། །༣༠
དེ་བཞིན་དུ་ནི་དྲི་ང་ལུས། །སྣ་ཚོགས་པ་ཡིས་གང་གྱུར་བ། །
སྤངས་ནས་འགྲོ་བར་བྱེད་པ་ནི། །དོན་མེད་ལྟོས་པ་མེད་པ་ཡིན། །༣༡
ཇི་ལྟར་བཤང་བའི་གནས་སུ་ནི། །སྐྱེས་པ་བུད་མེད་ཀྱིས་བཤངས་ནས། །
དོར་ནས་འགྲོ་བར་བྱེད་པ་ནི། །དོན་མེད་ལྟོས་པ་མེད་པ་ཡིན། །༣༢
དེ་ལྟར་བདག་གི་ལུས་འདི་ཡང། །མི་གཙང་སྣ་ཚོགས་ཀྱིས་གང་བ། །
དོར་ནས་བདག་ཀྱང་འགྲོ་བར་བྱ། །ཇི་ལྟར་བཤང་བའི་གནས་བཞིན་ནོ། །༣༣
ཇི་ལྟར་གྲུ་ནི་རྡོལ་གྱུར་ན། །ཆུ་ནི་ནང་དུ་འབྱུང་བར་འགྱུར། །
དེ་ནི་གྲུ་མཁན་གྱིས་དོར་ནས། །དོན་མེད་ལྟོས་པ་མེད་པ་ཡིན། །༣༤
དེ་ལྟར་བདག་གི་ལུས་འདི་ཡང། །བུ་ག་དགུ་ཡང་མི་རྟག་པས། །
དོར་ནས་འགྲོ་བར་བྱེད་པ་ན། །གྲུ་མཁན་གྲུ་ནི་དོར་བ་བཞིན། །༣༥
ཇི་ལྟར་ཆོམ་རྐུན་ལྷན་ཅིག་མི། །ནོར་ནི་ཁྱེར་ནས་འགྲོ་བ་ན། །
ནོར་ཁྱེར་འཇིགས་པ་མཐོང་བ་ན། །འཇིགས་གནས་དོར་ནས་འགྲོ་བྱེད་བཞིན། །༣༦
དེ་བཞིན་དུ་ནི་ལུས་འདི་ནི། །ཆོམ་རྐུན་ཆེན་པོ་དང་མཚུངས་ཞིང། །
འདིར་ནི་དོར་ནས་འགྲོ་བ་ན། །དགེ་བ་སྤྱོད་པ་འཇིགས་མེད་དོ། །༣༧
ཇི་ལྟར་བདག་གིས་བསམས་གྱུར་བ། །སྣ་ཚོགས་བྱེ་བ་བརྒྱ་ཡི་ནོར། །
མགོན་དང་མགོན་མེད་རྣམས་ལ་སྦྱིན། །གངས་ཅན་ལ་ནི་ཉེ་བར་སོང། །༣༨
གངས་ཅན་དང་ནི་མི་རིང་བར། །ཆོས་ཀྱི་རི་ཞེས་བྱ་བ་ལ། །
བདག་གིས་དེ་ལ་མཆོག་ཏུ་བརྟེན། །ལོ་མའི་ཁང་བ་ལེགས་བྱས་སོ། །༣༩
དེ་རུ་འཆག་པར་བྱེད་པ་དང་། །སྐྱོན་ནི་ལྔ་བོ་རྣམ་པར་སྤངས། །
ཡོན་ཏན་བརྒྱད་དང་ཡང་དག་ལྡན། །མངོན་པར་ཤེས་པའི་སྟོབས་ལྡན་ནོ། །༤༠
སྐྱོན་དགུ་དང་ནི་ལྡན་པ་ཡི། །དེར་ནི་དེ་ཉིད་དོར་གྱུར་ནས། །
ཤིང་ཤུན་དུམ་བུའི་གོས་གྱོན་ན། །ཡོན་ཏན་བཅུ་གཉིས་ལྡན་པའོ། །༤༡
སྐྱོན་ནི་བརྒྱད་དང་ལྡན་པ་ཡི། །ལོ་མའི་ཁང་བ་སྤངས་གྱུར་ནས། །
ཤིང་གི་དྲུང་དུ་ཉེ་བར་འདུག །ཡོན་ཏན་བཅུ་དང་ལྡན་པ་ཡིན། །༤༢
རྨོས་དང་བསྐྲུན་པའི་འབྲུ་རྣམས་ནི། །ལྷག་མ་མེད་པར་དོར་བྱས་ནས། །
ཡོན་ཏན་མ་ལུས་ལྡན་པ་ཡི། །ཤིང་ཏོག་མཆོག་ནི་དང་བོར་ཟོས། །༤༣
དེ་རུ་དཀའ་ཐུབ་བྱས་ནས་ནི། །འདུག་དང་འཆག་པའི་གནས་རྣམས་སུ། །
ཞག་བདུན་གྱི་ནི་ནང་ཉིད་དུ། །མངོན་པར་ཤེས་པའི་སྟོབས་ཐོབ་བོ། །༤༤
སྟན་གཅིག་ལ་ནི་རྟེན་ནས་སུ། །བདག་གིས་དེ་ལྟར་གྲུབ་པ་ཐོབ། །
རྒྱལ་བ་མར་མེ་མཛད་ཅེས་པ། །འཇིག་རྟེན་འདྲེན་པ་བྱོན་པར་གྱུར། །༤༥
མངལ་དུ་ཞུགས་ནས་སྐྱེས་གྱུར་བ། །སངས་རྒྱས་ནས་ནི་ཆོས་བསྟན་པ། །
མཚན་མ་བཞི་བོ་མཐོང་མ་གྱུར། །བསམ་གཏན་བདེ་བས་མ་ཐོས་སོ། །༤༦
ཡུལ་དང་ཕྱོགས་ཀྱི་མཐར་གནས་པའི། །དེ་བཞིན་གཤེགས་པ་མགྲོན་དུ་གཉེར། །
དེ་ཉིད་བྱིན་ནས་ལམ་འདི་ནི། །སེམས་ནི་དགའ་བས་ལམ་ཕྱོགས་གཅིག །༤༧
བདག་ནི་དེ་ཚེ་དེ་ཡི་དུས། །རང་གི་གནས་ནི་བྱེད་པ་དང་། །
ཤིང་ཤུན་གོས་ནི་རླུང་གིས་གཡོ། །དེ་ཚེ་བདག་ནི་མཁའ་ལ་འགྲོ། །༤༨
དགའ་དང་ཚིམ་དང་བདེ་བ་ཡིས། །སྐྱེ་བོ་ལམ་འཕྱག་བྱེད་པ་མཐོང། །
ནམ་མཁའ་ལས་ནི་བྱོན་ནས་སུ། །དེ་མ་ཐག་པར་མི་ལ་དྲིས། །༤༩
དགའ་དང་ཚིམ་ལ་བདེ་བ་ཡི། །མཁས་ཤིང་རིག་པའི་སྐྱེ་བོ་ཆེ། །
ལམ་ནི་སྙོམས་པར་བྱེད་པ་ན། །སུ་ཞིག་ཕྱིར་དུ་ལམ་འདི་འཆོས། །༥༠
བདག་གི་དེ་ལ་དྲི་ལུང་བསྟན། །འཇིག་རྟེན་འདས་པའི་སངས་རྒྱས་ནི། །
རྒྱལ་བ་མར་མེ་མཛད་ཅེས་པ། །འཇིག་རྟེན་འདྲེན་པ་བྱོན་པ་ཡིན། །༥༡
མི་མཉམ་ལམ་ནི་འཆོས་པ་དང་། །དེ་ཡི་ལམ་ནི་བྱི་དོར་བྱེད། །
སངས་རྒྱས་ཞེས་པ་བདག་གིས་ཐོས། །དེ་མ་ཐག་ཏུ་དགའ་བ་སྐྱེས། །༥༢
སངས་རྒྱས་སངས་རྒྱས་ཞེས་བརྗོད་པ། །ཡིད་བདེ་དགའ་བ་སྐྱེས་པར་གྱུར། །
ཚིམ་ཞིང་དགའ་བ་སྐྱེས་པའི་སེམས། །དེ་རུ་འཁོར་ཏེ་རྣམ་པར་བསམས། །༥༣
འདིར་ནི་ས་བོན་བསྐྲུན་བྱས་ནས། །དེ་མ་ཐག་ཏུ་བདག་ལ་སྐྱེ། །
གལ་ཏེ་སངས་རྒྱས་ཆེད་བྱི་དོར། །མ་བཅོས་གནས་གཅིག་བདག་ལ་བྱིན། །༥༤
བདག་ཀྱང་བྱི་དོར་བྱེད་པ་ཡིན། །མི་མཉམ་པ་ནི་འཆོས་པ་ཡིན། །
དེ་ཚེ་ལམ་ནི་བྱི་དོར་བྱ། །བདག་ལ་མ་བཅོས་གནས་གཅིག་བྱིན། །༥༥
སངས་རྒྱས་སངས་རྒྱས་ཞེས་བསམ་ཞིང། །དེ་ཚེ་བདག་ནི་ལམ་འདི་འཆོས། །
བདག་གི་གནས་ནི་མ་གྲུབ་པར། །ཐུབ་པ་ཆེན་པོ་མར་མེ་མཛད། །༥༦
མངོན་ཤེས་དྲུག་པོ་མཚུངས་ལྡན་པར། །འབུམ་ཕྲག་བཞི་བོ་རྣམས་ལ་ནི། །
དྲི་མ་མེད་ཅིང་ཟག་པ་ཟད། །རྒྱལ་བ་ལམ་དུ་བྱོན་པར་གྱུར། །༥༧
བསུ་བ་བྱེད་པ་བོ་རྣམས་ནི། །རོལ་མོ་རྣམས་ནི་དཀྲོལ་བ་དང་། །
ལྷ་དང་མི་རྣམས་ཡི་རང་བྱེད། །ལེགས་སོ་ཞེས་པའི་ཚིག་བྱིན་ནོ། །༥༨
ལྷ་ཡིས་མི་རྣམས་མཐོང་བ་དང་། །མི་རྣམས་ཀྱིས་ཀྱང་ལྷ་རྣམས་མཐོང། །
དེ་གཉིས་ཀྱིས་ནི་ཐལ་མོ་སྦྱོར། །དེ་བཞིན་གཤེགས་དང་ཐབས་ཅིག་འགྲོ། །༥༩
ལྷ་དང་ལྷ་ཡི་རོལ་མོ་དང་། །མི་དང་མི་ཡི་རོལ་མོ་དང་། །
གཉིས་ཀ་ཡང་ནི་རོལ་མོ་དཀྲོལ། །དེ་བཞིན་གཤེགས་དང་ཐབས་ཅིག་འགྲོ། །༦༠
ལྷ་མི་མེ་ཏོག་མན་དཱ་ར། །པད་མ་ཡོངས་སུ་འདུ་བའི་ཤིང་། །
ཕྱོགས་དང་མཚམས་སུ་མེ་ཏོག་འཐོར། །ལྷ་རྣམས་མཁའ་ལ་གནས་ནས་སོ། །༦༡
ཙམ་པ་རྒྱ་སྐྱེགས་ས་ལ་ལཾ། །ཀླུ་དང་ཀླུ་ཤིང་ཀེ་ཏ་ཀཾ །
སྟེང་གི་ཕྱོགས་དང་མཚམས་སུ་འཐོར། །ས་སྟེང་འགྲོ་བ་མི་རྣམས་སོ། །༦༢
དེར་ནི་བདག་གི་སྐྲ་བཀྲོལ་ནས། །ཤིང་ཤུན་ཆོས་གོས་གཟིག་ལྤགས་ནི། །
འཇིམ་པའི་སྟེང་དུ་བཏིང་ནས་སུ། །ཁ་སྦུབ་ཏུ་ནི་བདག་གིས་ཉལ། །༦༣
འཇིམ་པའི་སྟེང་ནས་མི་གཤེགས་པར། །བདག་ནི་གནོན་ཅིང་སངས་རྒྱས་རྣམས། །
སློབ་མ་འཁོར་བཅས་གཤེགས་སུ་གསོལ། །བདག་ལ་ཕན་པར་འགྱུར་བ་ཡིན། །༦༣ ཀ
ས་གཞི་ལ་ནི་ཉལ་ནས་ནི། །བདག་གིས་དེ་ལྟར་བསམས་པ་ན། །
བདག་ནི་དེ་རིང་འདོད་པ་ཡི། །བདག་གིས་ཉོན་མོངས་གཞོམ་པའོ། །༦༤
བདག་ནི་ཆ་ལུགས་གཞན་གྱིས་ཀྱང། །འདིར་ནི་ཆོས་འདི་མངོན་དུ་བྱ། །
ཐམས་ཅད་མཁྱེན་པ་ཐོབ་གྱུར་ནས། །ལྷ་དང་བཅས་པ་སངས་རྒྱས་འགྱུར། །༦༥
བདག་ཉིད་གཅིག་པུ་གྲོལ་ནས་ཅི། །སྐྱེས་བུ་མཐུ་ལྡན་མཐོང་བ་དང་། །
ཐམས་ཅད་མཁྱེན་པ་ཐོབ་གྱུར་ནས། །ལྷ་དང་མི་རྣམས་ཡང་དག་བསྒྲལ། །༦༦
བདག་གི་འདི་ཡི་གཞི་ཡིས་ནི། །མཐུ་དང་ལྡན་པ་མཐོང་བ་དང་། །
ཐམས་ཅད་མཁྱེན་པ་ཐོབ་ནས་ནི། །སྐྱེ་བོ་མང་བོ་བདག་གིས་བསྒྲལ། །༦༧
འཁོར་བའི་མདུད་པ་བཅད་ནས་ནི། །སྲིད་གསུམ་པོ་ཟད་བྱས་ལ། །
ཆོས་ཀྱི་གྲུ་ཡི་ནང་ཞུགས་ནས། །ལྷ་དང་མི་རྣམས་ཡང་དག་བསྒྲལ། །༦༨
མི་ཡི་ལུས་ནི་མཚན་མར་ལྡན། །སྟོན་པའི་ལྟ་བའི་རྒྱུ་དང་ནི། །
རབ་བྱུང་ཡོན་ཏན་ལྡན་པ་དང་། །རིགས་པ་དང་ནི་འདུན་པ་དང་། །
ཆོས་བརྒྱད་པོ་ནི་བསྡུས་ནས་སུ། །སྨོན་ལམ་མངོན་པར་འཕེལ་བའོ། །༦༩
མར་མེ་མཛད་པ་འཇིག་རྟེན་མཁྱེན། །སེམས་ཅན་ཕན་ཕྱིར་འཇིག་རྟེན་བྱུང། །
བདག་གི་མགོ་བོའི་གམ་འདུག་སྟེ། །འདི་ལྟ་བུ་ཡི་ཚིག་གསུངས་སོ། །༧༠
དཀའ་ཐུབ་པ་འདི་ལྟོས་ཤིག་དང་། །དཀའ་བ་མཆོག་གི་རལ་བ་འཛིན། །
འདི་ནི་བསྐལ་བ་མང་འདས་ནས། །འཇིག་རྟེན་དུ་ནི་སངས་རྒྱས་འགྱུར། །༧༡
སེར་སྐྱ་དགའ་བའི་གྲོང་དུ་འཁྲུངས། །དེ་བཞིན་གཤེགས་པ་ངེས་པར་འབྱུང། །
དཀའ་ཐུབ་གནས་སུ་གནས་ནས་ནི། །ཤིན་ཏུ་དཀའ་བའི་དཀའ་ཐུབ་སྤྱད། །༧༢
ཨ་ཙ་པཱ་ལའི་ཤིང་དྲུང་དུ། །དེ་བཞིན་གཤེགས་པ་བཞུགས་ནས་སུ། །
དེར་ནི་འོ་ཐུག་བླངས་ནས་ནི། །ནཻ་ར་ཛ་རའི་འགྲམ་གནས་ནས། །༧༣
ནཻ་ར་ཛ་རའི་འགྲམ་དུ་ནི། །འོ་ཐུག་རྒྱལ་བས་ལོངས་སྤྱོད་དོ། །
ལམ་གྱི་མཆོག་གི་ཆེད་དུ་ནི། །བྱང་ཆུབ་བཞིར་ནི་བྱོན་འགྱུར་རོ། །༧༤
བླ་མེད་བྱང་ཆུབ་སྙིང་བོ་ལ། །དེ་ནས་བསྐོར་བ་བྱས་ནས་ནི། །
ཨ་ཤྭཏྠ་ཡི་དྲུང་དུ་ནི། །གྲགས་ཆེན་ཞེས་པ་སངས་རྒྱས་འགྱུར། །༧༥
འདི་ཡི་སྐྱེ་བའི་ཡུམ་གྱུར་བ། །སྒྱུ་མ་ཞེས་པར་འགྱུར་བ་ཡིན། །
ཡབ་ནི་ཟས་གཙང་ཞེས་བྱའོ། །འདི་ནི་གཽ་ཏམ་ཞེས་པར་འགྱུར། །༧༦
ཟག་པ་ཟད་ཅིང་འདོད་ཆགས་བྲལ། །ཞི་བའི་སེམས་དང་མཚུངས་པར་ལྡན། །
པང་ནས་སྐྱེས་དང་ཉེ་རྒྱལ་ནི། །ཉན་ཐོས་རྣམས་ཀྱི་མཆོག་ཡིན་ནོ། །༧༧
ཉེ་གནས་ཀུན་དགའ་བོ་ཞེས་པས། །རྒྱལ་བ་དེ་ལ་ཞབས་ཏོག་བྱེད། །
དགེ་མ་དང་ནི་ཨུད་པལ་མདོག །ཉན་ཐོས་མ་ཡི་མཆོག་ཡིན་ནོ། །༧༨
ཟག་པ་མེད་ཅིང་འདོད་ཆགས་བྲལ། །ཞི་བའི་སེམས་དང་མཚུངས་པར་ལྡན། །
དེ་ཡི་བཅོམ་ལྡན་བྱང་ཆུབ་ཤིང། །ཨ་ཤྭཏྠ་ཞེས་བརྗོད་པ་ཡིན། །༧༩
འདི་ཡི་ཚིག་ནི་ཐོས་ནས་ནི། །མཚུངས་མེད་དྲང་སྲོང་ཆེན་པོ་ལ། །
ལྷ་དང་མི་ནི་རྗེས་ཡི་རངས། །སངས་རྒྱས་ས་བོན་མྱུ་གུ་འདི། །༨༠
སྒྲ་ནི་ཆེན་པོ་སྒྲོགས་བྱེད་ཅིང། །གསལ་བར་བཞད་པར་བྱེད་པ་དང་། །
ཐལ་མོ་སྦྱར་ནས་ཕྱག་བྱེད་པ། །སྟོང་ཕྲག་བཅུ་ཡི་ལྷ་དང་བཅས། །༨༡
བསྟན་པ་འདི་ལ་འབྲས་མ་ཐོབ། །གལ་ཏེ་འཇིག་རྟེན་མགོན་པོ་འདི། །
མ་འོངས་པ་རྣམས་འདས་གྱུར་ནས། །འདི་ནི་སྔོན་དུ་འགྱུར་བའོ། །༨༢
ཇི་ལྟར་ཆུ་ཀླུང་ཕ་རོལ་མི། །འགྲོ་བ་བོ་ཡི་མུ་གནས་ལ། །
འོག་གི་མུ་ནས་བཟུང་ནས་ནི། །ཆུ་ཀླུང་ཆེན་པོའི་ཕ་རོལ་འགྲོ། །༨༣
དེ་ལྟར་འདི་ལྟར་བདག་གིས་ནི། །རྒྱལ་བ་འདི་ནི་གལ་ཏེ་ན། །
མ་འོངས་པ་ནི་མང་སོང་ནས། །འདི་ནི་མངོན་སུམ་གྱུར་བ་ཡིན། །༨༤
མར་མེ་མཛད་ནི་འཇིག་རྟེན་མཁྱེན། །འདི་ལྟར་འགྱུར་ཞེས་གསུངས་པ་ཡིན། །
བདག་གི་ལས་རྣམས་བསལ་བྱས་ནས། །རྐང་བ་གཡས་པ་བཏེགས་བྱས་སོ། །༨༥
གང་ཞིག་དེ་ལ་རྒྱལ་སྲས་ནི། །བདག་ལ་ཀུན་གྱིས་བསྐོར་བ་བྱས། །
མི་དང་ཀླུ་དང་དྲི་ཟ་རྣམས། །ཕྱག་བྱས་ནས་ནི་གཤེགས་པར་གྱུར། །༨༦
དགེ་འདུན་བཅས་པ་འཇིག་རྟེན་འདྲེན། །བདག་གིས་གཤེགས་པ་མཐོང་བ་ན། །
དགའ་ཞིང་ཚིམ་པའི་སེམས་ཀྱིས་ནི། །དེ་ཚེ་བདག་གིས་སྟན་ལས་ལངས། །༨༧
བདག་ནི་བདེ་ཞིང་བདེ་བར་འགྱུར། །དགའ་ཞིང་དགའ་བར་གྱུར་བ་སྟེ། །
དགའ་དང་ལྡན་པར་སྐྱེ་བ་དང་། །དེ་ཡི་ཚེ་ན་སྐྱིལ་ཀྲུང་བཅས། །༨༨
སྐྱིལ་ཀྲུང་ལ་ནི་གནས་ནས་སུ། །དེ་ལ་བདག་གིས་འདི་ལྟར་བསམས། །
བདག་གི་བསམ་གཏན་དབང་དུ་གྱུར། །ཡེ་ཤེས་ཀྱི་ནི་ཕ་རོལ་ཕྱིན། །༨༩
སྟོང་ཕྲག་གི་ནི་འཇིག་རྟེན་ན། །ང་དང་མཚུངས་པའི་དྲང་སྲོང་མེད། །
རྫུ་འཕྲུལ་ཆོས་ནི་བདག་མི་མཚུངས། །འདི་འདྲ་ཅི་བདེ་གཞན་མ་ཐོབ། །༩༠
བདག་གིས་སྐྱིལ་ཀྲུང་བཅས་ནས་བདག །སྟོང་ཕྲག་བཅུ་ལྷག་གནས་ནས་སུ། །
སྒྲ་ཆེན་པོ་ནི་སྒྲོགས་པར་བྱེད། །ངེས་པར་ཁྱོད་ནི་སངས་རྒྱས་འགྱུར། །༩༡
གང་ཞིག་བྱང་སེམས་སྔོན་མ་རྣམས། །སྐྱིལ་ཀྲུང་དུ་ནི་བཞུགས་ནས་སུ། །
མཚན་མ་རྣམས་ནི་མཐོང་བ་ནི། །དེ་རྣམས་དེ་རིང་མཐོང་བ་ཡིན། །༩༢
གྲང་བ་རྣམས་ནི་མེད་པར་གྱུར། །དྲོ་བ་རྣམས་ནི་ཉེ་བར་ཞི། །
དེ་རྣམས་དེ་རིང་སོ་སོར་མཐོང། །ངེས་པར་ཁྱོད་ནི་སངས་རྒྱས་འགྱུར། །༩༣
སྟོང་ཕྲག་བཅུ་ཡི་འཇིག་རྟེན་ཁམས། །ཕན་ཚུན་དུ་ནི་འཇིགས་མེད་གྱུར། །
དེ་རྣམས་དེ་རིང་སོ་སོར་མཐོང། །ངེས་པར་ཁྱོད་ནི་སངས་རྒྱས་འགྱུར། །༩༤
རླུང་ཆེན་པོ་ནི་མི་ལྡང་ཞིང། །ཆུ་རྣམས་རྒྱུན་ལས་ལོག་པ་དང་། །
དེ་རྣམས་དེ་རིང་སོ་སོར་མཐོང། །ངེས་པར་ཁྱོད་ནི་སངས་རྒྱས་འགྱུར། །༩༥
ཐང་སྐྱེས་ཆུ་སྐྱེས་མེ་ཏོག་རྣམས། །ཐམས་ཅད་དུ་ནི་མེ་ཏོག་བྱེ། །
དེ་རྣམས་དེ་རིང་མེ་ཏོག་བྱེ། །ངེས་པར་ཁྱོད་ནི་སངས་རྒྱས་འགྱུར། །༩༦
འཁྲི་ཤིང་ཡང་ན་ཤིང་གྱུར་བ། །དེ་མ་ཐག་ཏུ་འབྲས་བུར་གྱུར། །
དེ་རྣམས་དེ་ཀུན་འབྲས་གྱུར་བ། །ངེས་པར་ཁྱོད་ནི་སངས་རྒྱས་འགྱུར། །༩༧
ནམ་མཁའ་དང་ནི་ས་གཞི་ལ། །རིན་ཆེན་དེ་དག་འོད་འགྱེད་དོ། །
དེ་རྣམས་དེ་རིང་འོད་འགྱེད་པས། །ངེས་པར་ཁྱོད་ནི་སངས་རྒྱས་འགྲོ། །༩༨
ལྷ་རྣམས་དང་ནི་མི་རྣམས་ནི། །དེ་དག་རོལ་མོའི་སྒྲ་སྒྲོགས་སོ། །
དེ་རྣམས་དེ་རིང་སྒྲ་འབྱིན་པས། །ཁྱོད་ནི་ངེས་པར་སངས་རྒྱས་འགྱུར། །༩༩
མེ་ཏོག་སྣ་ཚོགས་པ་ཡི་ཚོགས། །དེ་མ་ཐག་ཏུ་ཆར་བ་འབེབས། །
དེ་རྣམས་དེ་རིང་ཆར་འབེབས་པས། །ངེས་པར་ཁྱོད་ནི་སངས་རྒྱས་འགྱུར། །༡༠༠
རྒྱ་མཚོ་ཆེན་པོ་མ་གཡོ་ཞིང། །འཇིག་རྟེན་སྟོང་ཕྲག་བཅུ་བོ་གཡོ། །
དེ་རྣམས་དེ་རིང་གྱུར་བས་ན། །ངེས་པར་ཁྱོད་ནི་སངས་རྒྱས་འགྱུར། །༡༠༡
སྟོང་ཕྲག་བཅུ་ཡི་དམྱལ་བ་རྣམས། །དེ་མ་ཐག་ཏུ་བསྲེག་དང་བྲལ། །
དེ་རྣམས་དེ་རིང་ཞི་བས་ན། །ངེས་པར་ཁྱོད་ནི་སངས་རྒྱས་འགྱུར། །༡༠༢
ཉི་མ་དྲི་མ་མེད་པ་དང་། །རྒྱུ་སྐར་ཐམས་ཅད་མཐོང་བ་དང་། །
དེ་རྣམས་དེ་རིང་མཐོང་བས་ན། །ངེས་པར་ཁྱོད་ནི་སངས་རྒྱས་འགྱུར། །༡༠༣
ཆར་བ་འབབ་པར་མ་གྱུར་ཀྱང། །ས་ནི་སྣུམ་བག་བཅས་པ་དང་། །
དེ་རྣམས་དེ་རིང་ས་ལ་གྱུར། །ངེས་པར་ཁྱོད་ནི་སངས་རྒྱས་འགྱུར། །༡༠༤
རྒྱུ་སྐར་ཚོགས་ནི་རྣམ་པར་གསལ། །ནམ་མཁའི་དབྱིངས་སུ་རྒྱུ་སྐར་རྣམས། །
ཟླ་བ་དང་ནི་འགྲོགས་པ་བཞིན། །ངེས་པར་ཁྱོད་ནི་སངས་རྒྱས་འགྱུར། །༡༠༥
ས་ཁུང་རི་ཁུང་སྲོག་ཆགས་རྣམས། །སེམས་གཅིག་པས་ནི་ཕ་རོལ་མཐོང། །
དེ་རིང་དེ་རྣམས་སེམས་དགའ་བས། །ངེས་པར་ཁྱོད་ནི་སངས་རྒྱས་འགྱུར། །༡༠༦
སེམས་ཅན་རྣམས་ནི་མི་དགའ་མེད། །དེ་མ་ཐག་ཏུ་དགའ་བར་འགྱུར། །
དེ་རིང་དེ་རྣམས་དགའ་བས་ན། །ངེས་པར་ཁྱོད་ནི་སངས་རྒྱས་འགྱུར། །༡༠༧
དེ་ཚེ་ནད་རྣམས་ཉེ་བར་ཞི། །འདོད་པའི་ནད་ནི་མེད་པའོ། །
དེ་རིང་དེ་རྣམས་མཐོང་བས་ན། །ངེས་པར་ཁྱོད་ནི་སངས་རྒྱས་འགྱུར། །༡༠༨
དེ་ཚེ་ཆགས་པ་བསྲབས་པ་དང་། །སྐྱོན་དང་རྨོངས་པ་རྣམ་པར་ཞིག །
དེ་རིང་དེ་ཀུན་དོར་བས་ན། །ངེས་པར་ཁྱོད་ནི་སངས་རྒྱས་འགྱུར། །༡༠༩
དེ་ཡི་ཚེ་ན་འཇིགས་མེད་པ། །དེ་རིང་དེ་རྣམས་མཐོང་བས་ན། །
བདག་གི་རྟགས་དེ་ཀུན་གྱིས་ཤེས། །ངེས་པར་ཁྱོད་ནི་སངས་རྒྱས་འགྱུར། །༡༡༠
སྟེང་འོག་རྡུལ་ནི་གོ་བཟློག་འགྲོ། །དེ་རིང་ཡང་ནི་དེ་རྣམས་མཐོང། །
བདག་གི་རྟགས་དེ་ཀུན་གྱིས་ཤེས། །ངེས་པར་ཁྱོད་ནི་སངས་རྒྱས་འགྱུར། །༡༡༡
དྲི་རྣམས་ངན་པ་སོང་བ་དང་། །ལྷ་ཡི་དྲི་ནི་འོང་བ་དང་། །
དེ་རིང་དེ་རྣམས་དྲི་ལྡང་བས། །ངེས་པར་ཁྱོད་ནི་སངས་རྒྱས་འགྱུར། །༡༡༢
ལྷ་རྣམས་ཐམས་ཅད་མཐོང་བ་དང་། །གཟུགས་མེད་པ་རྣམས་སྤངས་པ་ནི། །
དེ་རིང་དེ་ཀུན་མཐོང་བས་ན། །ངེས་པར་ཁྱོད་ནི་སངས་རྒྱས་འགྱུར། །༡༡༣
དམྱལ་བ་རྣམས་ནི་ཇི་སྲིད་པ། །དེ་ཡི་ཚེ་ན་ཐམས་ཅད་མཐོང། །
དེ་རྣམས་དེ་རིང་ཀུན་མཐོང་བས། །ངེས་པར་ཁྱོད་ནི་སངས་རྒྱས་འགྱུར། །༡༡༤
སྒོ་ཆུང་དང་ནི་རི་ཡི་རྣམས། །དེ་ཡི་ཚེ་ན་མི་མཐོང་མེད། །
དེ་རིང་ནམ་མཁའ་བཞིན་དུ་མཐོང། །ངེས་པར་ཁྱོད་ནི་སངས་རྒྱས་འགྱུར། །༡༡༥
རུམ་དུ་གནས་དང་འཐོན་པ་ནི། །སྐད་ཅིག་ཙམ་གྱིས་མ་ཡིན་ནོ། །
དེ་རིང་དེ་རྣམས་སོ་སོར་མཐོང། །ངེས་པར་ཁྱོད་ནི་སངས་རྒྱས་འགྱུར། །༡༡༦
བརྩོན་འགྲུས་བརྟན་པར་བྱས་ནས་ནི། །ངེས་པར་འབྱུང་བ་ལྡོག་མི་བྱ། །
བདག་གིས་འདི་རྣམས་ལེགས་ཤེས་པས། །ངེས་པར་ཁྱོད་ནི་སངས་རྒྱས་འགྱུར། །༡༡༧
སངས་རྒྱས་ཀྱི་ནི་གསུང་ཐོས་ནས། །སྟོང་ཕྲག་བཅུ་དང་གཉིས་ཀ་ཡི། །
ཚིམ་ཞིང་དགྱེས་ལ་རབ་ཏུ་དགའ། །བདག་གིས་དེ་ཚེ་འདི་ལྟར་བསམས། །༡༡༨
གཉིས་ནི་མི་གསུང་སངས་རྒྱས་ནི། །རྒྱལ་བ་དོན་ཡོད་པ་ཡི་གསུང། །
སངས་རྒྱས་རྣམས་ནི་གཞན་མི་གསུང། །བདག་ནི་ངེས་པར་སངས་རྒྱས་འགྱུར། །༡༡༩
ཇི་ལྟར་མཁའ་ལ་རྡོ་འཕངས་པ། །ངེས་པར་ས་ལ་ལྷུང་བར་འགྱུར། །
དེ་བཞིན་དུ་ནི་སངས་རྒྱས་ཀྱི། །གསུང་ནི་ངེས་པར་འགྱུར་བ་བཞིན། །༡༢༠
ཇི་ལྟར་སེམས་ཅན་ཐམས་ཅད་ནི། །ངེས་པར་འཆི་བར་འགྱུར་བའོ། །
དེ་བཞིན་དུ་ནི་སངས་རྒྱས་ཀྱི། །གསུང་ནི་ངེས་པར་འགྱུར་བ་བཞིན། །༡༢༡
ཇི་ལྟར་ནམ་ནི་ཟད་པ་ན། །ངེས་པར་ཉི་མ་འཆར་བར་འགྱུར། །
དེ་བཞིན་དུ་ནི་སངས་རྒྱས་ཀྱི། །གསུང་ནི་ངེས་པར་འགྱུར་བ་བཞིན། །༡༢༢
ཇི་ལྟར་སེང་གེའི་གནས་ནས་ནི། །སེང་གེའི་སྒྲ་ནི་ངེས་པའོ། །
དེ་བཞིན་དུ་ནི་སངས་རྒྱས་ཀྱི། །གསུང་ནི་ངེས་པར་འགྱུར་བ་བཞིན། །༡༢༣
ཇི་ལྟར་སྦྲུམ་མ་སྨིན་གྱུར་ན། །མངལ་ནས་ངེས་པར་སྐྱེ་བར་འགྱུར། །
དེ་བཞིན་དུ་ནི་སངས་རྒྱས་ཀྱི། །གསུང་ནི་ངེས་པར་འགྱུར་བ་བཞིན། །༡༢༤
བདག་གིས་སངས་རྒྱས་བྱེད་པའི་ཆོས། །གང་དང་དེ་རུ་བཙལ་བྱས་པ། །
སྟེང་དང་འོག་དང་ཕྱོགས་བཅུ་དང་། །ཆོས་ཀྱི་དབྱིངས་ཀྱི་བར་དུ་ཡིན། །༡༢༥
དེ་ཚེ་བཙལ་བ་ན་ནི་མཐོང། །དང་བོར་སྦྱིན་པའི་ཕ་རོལ་ཕྱིན། །
སྔོན་གྱི་སྐྱེས་བུ་ཆེན་པོ་ཡི། །ལམ་ནི་ཕ་རོལ་རྗེས་སུ་འགྲོ། །༡༢༦
འདི་ནི་རེ་ཞིག་ཁྱོད་ཀྱིས་ཀྱང། །བརྟན་པོར་བྱས་ནས་གཟུང་བར་གྱིས། །
གལ་ཏེ་བྱང་ཆུབ་ཐོབ་འདོད་ན། །སྦྱིན་པའི་ཕ་རོལ་ཕྱིན་པར་གྱིས། །༡༢༧
ཇི་ལྟར་བུམ་པ་གང་གྱུར་བ། །གང་གི་ཁ་ནི་སྦུབ་པ་ན། །
ཆུ་ནི་ལྷག་མ་མེད་པར་འབོ། །བུམ་པའི་ནང་དུ་མི་གནས་སོ། །༡༢༨
དེ་བཞིན་དུ་ནི་སློང་བ་མཐོང། །མཆོག་དམན་འབྲིང་བོ་གང་ཡིན་པ། །
མ་ལུས་པར་ནི་སྦྱིན་པར་བྱ། །ཁ་སྦུབ་བུམ་པ་དེ་བཞིན་ནོ། །༡༢༩
འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་བྱེད་ཆོས། །
གཞན་ལ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །༡༣༠
དེ་ཡི་ཚེ་ན་ཚོལ་བ་མཐོང། །གཉིས་པ་ཚུལ་ཁྲིམས་ཕ་རོལ་ཕྱིན། །
སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །༡༣༡
རེ་ཞིག་གཉིས་པ་འདི་ཡིས་ནི། །བརྟན་པོར་བྱས་ནས་གཟུང་བར་བྱ། །
གལ་ཏེ་བྱང་ཆུབ་ཐོབ་འདོད་ན། །ཚུལ་ཁྲིམས་ཕ་རོལ་ཕྱིན་པར་གྱིས། །༡༣༢
ཇི་ལྟར་རྒོད་གཡག་རྔ་མ་ནི། །གང་དང་གང་གིས་བཟུང་བ་ན། །
ལྟོས་པ་མེད་པར་སྲོག་འདོར་རོ། །རྔ་མ་ལ་དགའ་ཁྲོ་བ་མེད། །༡༣༣
དེ་བཞིན་དུ་ནི་ས་བཞི་རུ། །ཚུལ་ཁྲིམས་ཡོངས་སུ་རྫོགས་པ་དང་། །
རྟག་ཏུ་ཚུལ་ཁྲིམས་ཀུན་སྲུང་བྱེད། །རྒོད་གཡག་རྔ་མ་བསྲུང་བ་བཞིན། །༡༣༤
འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་བྱེད་ཆོས། །
གཞན་པ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །༡༣༥
དེ་ཡི་ཚེ་ན་ཚོལ་བ་མཐོང། །གསུམ་པ་ངེས་འབྱུང་ཕ་རོལ་ཕྱིན། །
སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །༡༣༦
རེ་ཞིག་གསུམ་པ་འདི་ཡིས་ནི། །བརྟན་པོར་བྱས་ཏེ་གཟུང་བར་བྱ། །
གལ་ཏེ་བྱང་ཆུབ་ཐོབ་འདོད་ན། །ངེས་འབྱུང་ཕ་རོལ་ཕྱིན་པར་གྱིས། །༡༣༧
ཇི་ལྟར་སྐྱེས་བུ་བཙོན་རར་བཅིངས། །ཡུན་རིང་གནས་ཤིང་སྡུག་བསྔལ་བ། །
དེ་ལ་དགའ་བར་མི་བྱེད་པར། །མྱུར་དུ་འགྲོལ་བར་འདོད་པར་སེམས། །༡༣༨
དེ་བཞིན་ཁྱོད་ནི་སྐྱེ་ཀུན་དུ། །བཙོན་ར་བཞིན་དུ་བལྟ་བར་གྱིས། །
ངེས་པར་འབྱུང་བ་སྔོན་དུ་ན། །སྐྱེ་བ་ལས་ནི་གྲོལ་བར་འགྱུར། །༡༣༩
འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་བྱེད་ཆོས། །
གཞན་པ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །༡༤༠
དེ་ཡི་ཚེ་ན་ཚོལ་བ་མཐོང། །བཞི་བ་ཤེས་རབ་ཕ་རོལ་ཕྱིན། །
སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །༡༤༡
རེ་ཞིག་བཞི་བ་འདི་ཡིས་ནི། །བརྟན་པོར་བྱ་སྟེ་གཟུང་བར་བྱ། །
གལ་ཏེ་བྱང་ཆུབ་ཐོབ་འདོད་ན། །ཤེས་རབ་ཕ་རོལ་ཕྱིན་པར་གྱིས། །༡༤༢
ཇི་ལྟར་དགེ་སློང་བསོད་སྙོམས་པ། །དམན་དང་འབྲིང་དང་ཆེན་པོ་ཡི། །
རིགས་རྣམས་དཔྱོད་པར་མི་བྱེད་པར། །དེ་ལྟར་བཟའ་བའི་ཟས་ཐོབ་བོ། །༡༤༣
དེ་བཞིན་ཁྱོད་ཀྱིས་དུས་ཀུན་དུ། །སྐྱེ་བོ་མཁས་ལ་ཡོངས་སུ་དྲིས། །
ཤེས་རབ་ཕ་རོལ་ཕྱིན་སོང་བས། །བྱང་ཆུབ་ཐོབ་པར་འགྱུར་བ་ཡིན། །༡༤༤
འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་བྱེད་ཆོས། །
གཞན་པ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །༡༤༥
དེ་ཡི་ཚེ་ན་ཚོལ་བ་མཐོང། །ལྔ་བ་བརྩོན་འགྲུས་ཕ་རོལ་ཕྱིན། །
སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །༡༤༦
རེ་ཞིག་ལྔ་བ་འདི་ཡིས་ནི། །བརྟན་པོར་བྱས་ཏེ་གཟུང་བར་བྱ། །
གལ་ཏེ་བྱང་ཆུབ་མཆོག་འདོད་ན། །བརྩོན་འགྲུས་ཕ་རོལ་ཕྱིན་པར་གྱིས། ༡༤༧
ཇི་ལྟར་རི་དྭགས་རྒྱལ་བོ་ནི། །སྡོད་དང་འགྲོ་བའི་གནས་རྣམས་སུ། །
ཞུམ་པ་མེད་པའི་བརྩོན་འགྲུས་ཀྱིས། །ཡིད་ནི་རྟག་ཏུ་བརྟན་པ་ཡིན། །༡༤༨
དེ་བཞིན་ཁྱོད་ཀྱིས་དུས་ཀུན་དུ། །བརྩོན་འགྲུས་བརྟན་པོར་གྱིས་ལ་ཟུངས། །
བརྩོན་འགྲུས་ཕ་རོལ་ཕྱིན་གྱུར་ནས། །བྱང་ཆུབ་ཐོབ་པར་འགྱུར་བ་ཡིན། །༡༤༩
འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་འདོད་པ། །
གཞན་པ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །༡༥༠
དེ་ཡི་ཚེ་ན་ཚོལ་བ་མཐོང། །དྲུག་པ་བཟོད་པའི་ཕ་རོལ་ཕྱིན། །
སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །༡༥༡
རེ་ཞིག་དྲུག་པ་འདི་ཡིས་ནི། །བརྟན་པོར་བྱས་ཏེ་གཟུང་བར་བྱ། །
དེ་ལ་ཞེ་སྡང་མ་བྱས་ན། །ཡང་དག་བྱང་ཆུབ་ཐོབ་པར་འགྱུར། །༡༥༢
ཇི་ལྟར་ཡང་ནི་ས་གཞི་ལ། །གཙང་དང་མི་གཙང་བྱུགས་པ་ན། །
ཐམས་ཅད་བླུགས་ཀྱང་བཟོད་པར་བྱེད། །སྐྱུག་བྲོ་བ་ནི་བྱེད་པ་མེད། །༡༥༣
དེ་བཞིན་ཁྱོད་ཀྱིས་ཐམས་ཅད་ལ། །ཕན་དང་གནོད་པ་བྱེད་པ་ན། །
བཟོད་པའི་ཕ་རོལ་ཕྱིན་གྱུར་ནས། །བྱང་ཆུབ་ཡང་དག་ཐོབ་པར་འགྱུར། །༡༥༤
འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་འདོད་ཆོས། །
གཞན་པ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །༡༥༥
དེ་ཡི་ཚེ་ན་ཚོལ་བ་མཐོང། །བདུན་པ་བདེན་པའི་ཕ་རོལ་ཕྱིན། །
སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །༡༥༦
རེ་ཞིག་བདུན་པ་འདི་ཡིས་ནི། །བརྟན་པར་བྱས་ནས་གནས་པར་གྱིས། །
དེ་ལ་རྫུན་ནི་མི་སྨྲ་བས། །ཡང་དག་བྱང་ཆུབ་ཐོབ་པར་འགྱུར། །༡༥༧
ཇི་ལྟར་ཐ་སྐར་ཞེས་བྱ་བ། །ལྷ་དང་མི་རྣམས་མཚུངས་པར་ནི། །
དུས་ཀྱི་ལོ་ཡི་དུས་སུ་ནི། །ལམ་གཞན་དུ་ནི་མི་འགྲོ་ཞིང་། །༡༥༨
ཁྱོད་ཀྱིས་ཀྱང་ནི་དེ་བཞིན་བདེན། །བདེན་པ་བཟུང་ནས་མི་འགྲོ་བ། །
བདེན་པའི་ཕ་རོལ་ཕྱིན་གྱུར་པས། །བྱང་ཆུབ་ཡང་དག་ཐོབ་པར་འགྱུར། །༡༥༩
འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་འདོད་ཆོས། །
གཞན་པ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །༡༦༠
དེ་ཡི་ཚེ་ན་ཚོལ་བ་མཐོང། །བརྒྱད་པ་ལྷག་གནས་ཕ་རོལ་ཕྱིན། །
སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །༡༦༡
རེ་ཞིག་བརྒྱད་པ་འདི་ཡིས་ནི། །བརྟན་པར་བྱས་ཏེ་གནས་པར་གྱིས། །
དེ་ལ་ཁྱོད་ནི་གཡོ་མེད་པས། །ཡང་དག་བྱང་ཆུབ་ཐོབ་པར་འགྱུར། །༡༦༢
ཇི་ལྟར་རི་བོའི་བྲག་ཆེན་པོ། །གཡོ་བ་མེད་ཅིང་ལེགས་པར་གནས། །
རླུང་ཆེན་པོས་ནི་གཡོ་བ་མེད། །རང་གི་གནས་སུ་གནས་པ་ཉིད། །༡༦༣
དེ་བཞིན་ཁྱོད་ཀྱིས་ལྷག་གནས་པར། །ཐམས་ཅད་དུ་ནི་མི་གཡོ་བར། །
ལྷག་གནས་ཕ་རོལ་ཕྱིན་གྱུར་པས། །ཡང་དག་བྱང་ཆུབ་ཐོབ་པར་འགྱུར། །༡༦༤
འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་འདོད་ཆོས། །
གཞན་པ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །༡༦༥
དེ་ཡི་ཚེ་ན་ཚོལ་བ་མཐོང། །དགུ་བ་བྱམས་པའི་ཕ་རོལ་ཕྱིན། །
སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པའོ། །༡༦༦
རེ་ཞིག་དགུ་བ་འདི་ཡིས་ནི། །བརྟན་པར་བྱས་ཏེ་གནས་པར་གྱིས། །
གལ་ཏེ་བྱང་ཆུབ་ཐོབ་འདོད་ན། །བྱམས་པ་མཚུངས་པ་མེད་པར་གྱིས། །༡༦༧
ཇི་ལྟར་ཆུ་ཞེས་བྱ་བ་ལ། །དགེ་འམ་སྡིག་པའི་སྐྱེ་བོ་ནི། །
མཚུངས་པར་བསིལ་བར་གྱུར་ལ་རེག །རྡུལ་དང་དྲི་མ་སྤོང་བར་བྱེད། །༡༦༨
དེ་ལྟར་ཁྱོད་ཀྱིས་མི་ཕན་དང་། །ཕན་ལའང་མཚུངས་པར་བྱམས་པར་བྱ། །
བྱམས་པའི་ཕ་རོལ་ཕྱིན་གྱུར་ནས། །ཡང་དག་བྱང་ཆུབ་ཐོབ་པར་འགྱུར། །༡༦༩
འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་འདོད་ཆོས། །
གཞན་པ་ཡང་ནི་བཙལ་བར་གྱིས། །གང་ཞིག་ཆོས་ནི་ཐོབ་བྱེད་པ། །༡༧༠
དེ་ཡི་ཚེ་ན་ཚོལ་བ་མཐོང། །བཅུ་བ་བཏང་སྙོམས་ཕ་རོལ་ཕྱིན། །
སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །༡༧༡
རེ་ཞིག་བཅུ་བ་འདི་ཡིས་ནི། །བརྟན་པར་བྱས་ནས་གནས་པར་གྱིས། །
སྲང་ནི་གང་བར་འགྱུར་བ་བཞིན། །ཡང་དག་བྱང་ཆུབ་ཐོབ་པར་འགྱུར། །༡༧༢
ཇི་ལྟར་ས་གཞི་ཞེས་བྱ་ལ། །གཙང་དང་མི་གཙང་བྱུགས་པ་ན། །
ལྟོས་པ་མེད་ཅིང་བཏང་སྙོམས་པས། །ཁྲོ་བ་མེད་པར་སྤོང་བ་ཡིན། །༡༧༣
ཇི་ལྟར་ཁྱོད་ཀྱིས་ཀྱང་བདེ་སྡུག །དུས་རྣམས་ཀུན་ཏུ་སྲང་བཞིན་དུ། །
བཏང་སྙོམས་ཕ་རོལ་ཕྱིན་གྱུར་ནས། །ཡང་དག་བྱང་ཆུབ་ཐོབ་པར་འགྱུར། །༡༧༤
འདི་ཡི་འཇིག་རྟེན་དེ་རྣམས་ཉིད། །གང་ཞིག་བྱང་ཆུབ་ཐོབ་བྱེད་ཆོས། །
འདི་ནི་སྟེང་དང་གཞན་ནའང་མེད། །བརྟན་པར་བྱ་སྟེ་སེམས་ལ་ཞོག །༡༧༥
རང་བཞིན་གྱིས་ནི་གཡོ་མེད་པར། །འདི་ཡི་ཆོས་ནི་དྲན་པར་བྱེད། །
ཆོས་ཀྱི་གཞི་ཡི་ས་གཞི་ནི། །འཇིག་རྟེན་སྟོང་ཕྲག་རབ་ཏུ་གཡོས། །༡༧༦
སེམས་མེད་པ་ཡི་ས་གཞི་ནི། །བུར་ཤིང་འཁྲུལ་འཁོར་བཞིན་དུ་བཙིར། །
འབྲུ་མར་འཁྲུལ་འཁོར་བཞིན་དུ་འཁོར། །དེ་ལྟར་ས་ནི་རབ་ཏུ་གཡོས། །༡༧༧
ཇི་སྲིད་འཁོར་རྣམས་ཡོད་པ་ལ། །སངས་རྒྱས་ཀྱི་ནི་སྦྲེལ་བས་ན། །
དེ་ནི་དེ་རུ་སྡུག་བསྔལ་སེམས། །བརྒྱལ་བར་གྱུར་ནས་ས་ལ་ཉལ། །༡༧༨
བུམ་པ་སྟོང་ཕྲག་དུ་མ་དང་། །སྣོད་ཆེན་བརྒྱ་ཕྲག་མང་བོ་རྣམས། །
དེར་ནི་ཕྱེ་མ་ཞིབ་མོར་གྱུར། །ཕན་ཚུན་ཐུག་ཅིང་འཆག་པས་སོ། །༡༧༩
བརྒྱལ་དང་སྐྲག་དང་འཇིགས་པ་དང་། །གནོད་ཅིང་གཟིར་བའི་སེམས་ཀྱིས་འགྱེལ། །
སྐྱེ་བོ་ཐམས་ཅད་གཅིག་ཏུ་འདུས། །མར་མེ་མཛད་ཀྱི་དྲུང་དུ་སོང། །༡༨༠
འཇིག་རྟེན་པ་རྣམས་ཅི་ཕྱིར་གྱུར། །དགེ་བའམ་ཡང་ན་སྡིག་གམ་ཅི། །
འཇིག་རྟེན་ཀུན་ལ་ཉེར་འཚེ་བྱུང། །སྤྱན་ལྡན་ལེགས་པར་གསུང་དུ་གསོལ། །༡༨༡
དེ་རྣམས་ཀུན་ལ་ཆོས་བསྟན་ཅིང། །ཐུབ་པ་ཆེན་པོ་མར་མེ་མཛད། །
འཇིགས་པར་མ་བྱེད་དབུགས་དབྱུང་གིས། །འདི་ཡི་ས་གཞི་གཡོ་བས་ནི། །༡༨༢
གང་ཞིག་དེ་རིང་བདག་ལུང་བསྟན། །འཇིག་རྟེན་པ་རྣམས་སངས་རྒྱས་འགྱུར། །
དེ་ནི་ཆོས་ནི་དྲན་པར་བྱེད། །སྔོན་གྱི་རྒྱལ་བ་བསྟེན་བྱས་ཤིང། །༡༨༣
དེ་ཡི་ཆོས་རྣམས་དྲན་བྱེད་པས། །སངས་རྒྱས་ས་ནི་མ་ལུས་པ། །
དེས་ན་འདི་ཡི་ས་རྣམས་གཡོས། །ལྷ་དང་བཅས་པ་སྟོང་ཕྲག་བཅུ། །༡༨༤
སངས་རྒྱས་ཀྱི་ནི་གསུང་ཐོས་ནས། །དེ་མ་ཐག་ཏུ་འཇིགས་མེད་སེམས། །
ཐམས་ཅད་བདག་གི་དྲུང་དུ་འོངས། །སླར་ཡང་བདག་ལ་ཕྱག་དག་བྱས། །༡༨༥
སངས་རྒྱས་ཡོན་ཏན་བསམས་བྱས་ཤིང་། །ཡིད་ནི་བརྟན་པར་བྱས་ནས་ནི། །
མར་མེ་མཛད་ལ་ཕྱག་བྱས་ནས། །དེ་ཚེ་བདག་ནི་སྟན་ལས་ལངས། །༡༨༦
ལྷ་དང་མི་ཡི་མེ་ཏོག་རྣམས། །ལྷ་དང་མི་རྣམས་གཉིས་ཀ་ཡིས། །
སྟན་ལས་ལངས་པར་གྱུར་ནས་ནི། །མེ་ཏོག་མཚུངས་པར་བསྡུས་ནས་སོ། །༡༨༧
ལྷ་དང་མི་རྣམས་གཉིས་ཀ་ཡང། །ཐམས་ཅད་ཞི་བར་གྱུར་ཞེས་བསྟོད། །
ཁྱོད་ཀྱིས་ཆེན་པོ་དོན་དུ་གཉེར། །ཇི་ལྟར་འདོད་པ་དེ་ཐོབ་བོ། །༡༨༨
དུས་མིན་འཆི་བ་རིང་དུ་སོང། །ནད་རྣམས་ཐམས་ཅད་ཉམས་པར་གྱུར། །
ཁྱོད་ལ་བར་ཆད་མི་འབྱུང་ངོ་། །མཆོག་གི་བྱང་ཆུབ་མྱུར་དུ་ཐོབ། །༡༨༩
ཇི་ལྟར་དུས་སུ་སླེབ་པ་ན། །ལྗོན་ཤིང་མེ་ཏོག་བྱེ་བར་གྱུར། །
དེ་བཞིན་དཔའ་བོ་ཆེན་པོ་ཁྱོད། །སངས་རྒྱས་ཡེ་ཤེས་མེ་ཏོག་གྱུར། །༡༩༠
གང་ཞིག་ཇི་ལྟར་རྫོགས་སངས་རྒྱས། །ཕ་རོལ་ཕྱིན་བཅུ་རྫོགས་པར་བྱས། །
དེ་བཞིན་དཔའ་བོ་ཆེན་པོ་ཁྱོད། །ཕ་རོལ་ཕྱིན་བཅུ་རྫོགས་པར་གྱིས། །༡༩༡
ཇི་ལྟར་གང་ཞིག་རྫོགས་སངས་རྒྱས། །བྱང་ཆུབ་སྙིང་པོ་རྫོགས་པར་གྱུར། །
དེ་བཞིན་དཔའ་བོ་ཆེན་པོ་ཁྱོད། །རྒྱལ་བའི་བྱང་ཆུབ་རྫོགས་པར་གྱིས། །༡༩༢
གང་ཞིག་ཇི་ལྟར་རྫོགས་སངས་རྒྱས། །ཆོས་ཀྱི་འཁོར་ལོ་བསྐོར་བར་གྱུར། །
དེ་བཞིན་དཔའ་བོ་ཆེན་པོ་ཁྱོད། །ཆོས་ཀྱི་འཁོར་ལོ་བསྐོར་བར་གྱིས། །༡༩༣
ཇི་ལྟར་ཟླ་བ་ཉ་བ་ཡིས། །ཡོངས་སུ་དག་པས་འོད་འགྱེད་པ། །
དེ་བཞིན་ཁྱོད་ཀྱི་བསམ་རྫོགས་ནས། །སྟོང་ཕྲག་བཅུ་བོར་འོད་ཁྱེས་ཤིག །༡༩༤
ཉི་མ་སྒྲ་གཅན་ལས་གྲོལ་ནས། །ཚ་ཟེར་རབ་ཏུ་འགྱེད་བྱེད་པ། །
དེ་བཞིན་འཇིག་རྟེན་གྲོལ་བྱས་ནས། །ཁྱོད་ཀྱི་དཔལ་གྱིས་འོད་ཁྱེས་ཤིག །༡༩༥
གང་ཞིག་ཇི་ལྟར་ཆུ་ཀླུང་ནི། །རྒྱ་མཚོ་ཆེན་པོའི་རྗེས་སུ་འགྲོ། །
དེ་ལྟར་ལྷ་མིའི་འཇིག་རྟེན་ཚོགས། །ཁྱོད་ཀྱི་རྗེས་སུ་འཇུག་འགྱུར་ཤོག །༡༩༦
དེ་རྣམས་ཁྱོད་ལ་བསྟོད་ཅིང་བསྔགས། །ཆོས་བཅུ་བོ་ལ་གནས་བྱས་ནས། །
དེ་ཡི་ཆོས་རྣམས་རྫོགས་བྱེད་ཅིང། །དེ་ཚེ་ནགས་ཚལ་ཆེན་པོར་ཕྱིན། །༡༩༧
མཁས་པ་བློ་གྲོས་བཟང་བོའི་གཏམ་དུ་བྱ་བ་རྫོགས་སོ།། །།
སློབ་དཔོན་ཟླ་བ་གཞོན་ནུས་ཁོལ་དུ་ཕྱུང་སྟེ་རྒྱ་དཔེ་དང་གཏུགས་ཏེ་གཅིག་ཞུས་པ་དགེ།
No comments:
Post a Comment