ལོ་རྒྱུས་རིག་པའི་སྤྱི་དོན་གྱི་ནང་དོན་མདོར་བསྟན།
སྐབས་དང་བོ། ལོ་རྒྱུས་རིག་པ་བ་དང་ལོ་རྒྱུས་རིག་པ་བའི་དོན་དངོས།
༡ ལོ་རྒྱུས་ཀྱི་ངོ་བོ།
ཉེ་དུས་ཀྱི་ལོ་རྒྱུས་རིག་པ་བ་རྣམས་ཀྱིས་རང་ཉིད་ཀྱི་ལས་ཀ་དེ་ཡང་མཚམས་མི་ཆད་པར་ཐོད་བརྒལ་འབྱུང་ཐུབ་པའི་རེ་བ་བཟུང་ཡོད་ཅིང་། ཁོང་རྣམས་ཀྱིས་དུས་རབས་རེ་རེ་བཞིན་བརྒྱུད་དེ་བྱུང་བའི་གནའ་རབས་ཀྱི་ཤེས་ཡོན་དག་ལ་ཡང་རང་ཉིད་ཀྱིས་བཟོ་བཅོས་བྱས་ཡོད་སྟབས། ཞིབ་ཅིང་ཚགས་པའི་ལོ་རྒྱུས་རྒྱུ་ཆ་ཞིག་ལ་བསྒྱུར་བཅོས་དང་ལྷད་མ་ཞུགས་པར་ཕྱི་མོ་ལྟར་དུ་གནས་པ་ཞིག་དང་། མི་སྒེར་གྱི་དགའ་སྐྱོ་ཆགས་སྡང་སོགས་དང་མ་འབྲེལ་བ་ཞིག་གཏན་ནས་མེད་པས། དེ་འབྲེལ་གྱི་གསལ་བཤད་གང་བྱས་ཐམས་ཅད་ཀྱང་མཐའ་མེད་དུ་འདོད་པ་ཡིན། ཁ་ཅིག་གིས་ལོ་རྒྱུས་ཀྱི་དཔྱད་བརྗོད་ཐམས་ཅད་ཀྱང་མི་དང་ལྟ་ཚུལ་མི་འདྲ་བ་དུ་མར་རག་ལས་ཡོད་པར་མ་ཟད། མི་དང་མིའི་འདོད་ཚུལ་ལ་ཡང་གནམ་སའི་ཁྱད་པར་ཡོད་པས། ཕྱི་རོལ་ཡུལ་དུ་གྲུབ་པའི་ལོ་རྒྱུས་ཀྱི་དོན་དངོས་ཟེར་བ་ཞིག་གཞི་མ་གྲུབ་པར་འདོད་པ་ཡང་ཡོད། ང་ཚོས་ལོ་རྒྱུས་ནི་ཅི་ཞིག་ཡིན་ནམ་ཞེས་པའི་དྲི་བར་ལན་འདེབས་པའི་སྐབས་སུ། ང་ཚོའི་དྲིས་ལན་གྱིས་བསམ་བཞིན་དང་བསམ་བཞིན་མ་ཡིན་པའི་སྒོ་ནས་ང་ཚོ་གང་ལ་གཏོགས་པའི་དུས་རབས་སུ་རང་ཉིད་ཀྱིས་གནས་ཚོད་ག་འདྲ་ཞིག་བཟུང་ཡོད་པ་མཚོན་བཞིན་ཡོད་ཅིང་། དེ་ལ་བརྟེན་ནས་གཞི་རྒྱ་ཆེ་བའི་གནད་དོན་ཆེན་པོ་ཞིག་གི་ཕྱོགས་ཆ་རེ་འགྲུབ་བཞིན་ཡང་ཡོད།
ལོ་རྒྱུས་ནི་ཅི་ཞིག་ཡིན་ནམ་ཞེས་པའི་དྲི་བར་གྷི་ལུ་དབྱིན་ལགས་ཀྱིས་དོན་དངོས་ཡིན་ཞེས་གསུངས་ཡོད་ཅིང་། དུས་རབས་བཅུ་དགུ་བའི་ལོ་རྒྱུས་རིག་པ་བ་ཕལ་མོ་ཆེས་གྷི་ལུ་དབྱིན་ལགས་ཀྱི་ལྟ་དགོངས་ལ་མོས་མཐུན་གནང་ཡོད། དུས་རབས་བཅུ་དགུ་བའི་ལོ་རབས་སུམ་ཅུའི་ནང་དུ་ལན་ཁུ་ལགས་ཀྱིས་ལོ་རྒྱུས་ནི་གཞུང་ལུགས་སྟོང་བཤད་དུ་འདོད་པའི་ལྟ་དགོངས་ལ་དགག་བཞག་གནང་བའི་སྐབས་སུ། ཁོང་གིས་ལོ་རྒྱུས་རིག་པ་བའི་འགན་ཁུར་ཉག་གཅིག་ནི་དོན་དངོས་ཇི་བཞིན་ལོ་རྒྱུས་ལ་གསལ་བཤད་གནང་རྒྱུ་དེ་ཡིན་ཞེས་གསུངས་མྱོང་ཞིང་། འཇར་མན་དང་དབྱིན་ཇི། ཧྥ་རན་སིའི་ལོ་རྒྱུས་རིག་པ་བ་རྣམས་ཀྱིས་ཀྱང་དོན་དངོས་ཅི་བཞིན་ལོ་རྒྱུས་ལ་གསལ་བཤད་བྱེད་དགོས་ཞེས་ངག་ནས་མ་ཎི་འདོན་པ་ཇི་བཞིན་བཟླས་མྱོང་ཞིང་། དེ་ལྟར་བྱེད་དོན་ཡང་ཁེར་ཚུགས་སུ་ལོ་རྒྱུས་ཀྱི་དོན་དངོས་སོགས་ལ་བསམ་གཞིག་བྱེད་པའི་ཁུར་བོ་སེལ་བའི་ཆེད་དུ་རེད། དུས་ཕྱིས་དངོས་དཔང་རིང་ལུགས་པས་ལོ་རྒྱུས་ནི་ཚན་རིག་ཅིག་ཡིན་ཞེས་བསྒྲགས་ཤིང་། གང་དེར་ཤུགས་རྐྱེན་ཡང་ཆེན་པོ་དང་ལྡན་པར་གྱུར་ཡོད། དངོས་དཔང་རིང་ལུགས་པ་རྣམས་ཀྱིས་ནི་ཐོག་མར་དོན་དངོས་གཏན་ཁེལ་བྱེད་དགོས་ཤིང་། དེའི་རྗེས་སུ་དོན་དངོས་ལས་རང་ཉིད་ཀྱི་བསྡོམས་ཚིག་རྙེད་དགོས་ཞེས་བཞེད། བཞེད་པ་འདི་ནི་དབྱིན་ཇིའི་ཉམས་མྱོང་རིང་ལུགས་པའི་སྲོལ་རྒྱུན་རིག་གནས་དང་འཚམས་པར་མ་ཟད། སྲོལ་རྒྱུན་འདི་ནི་ལོ་ཁུ་ནས་རུ་སོ་བར་གྱི་དབྱིན་ཇིའི་མཚན་ཉིད་རིག་པའི་བཞེད་པ་གཙོ་བོ་ཞིག་ཆགས་ཡོད།
དེ་ཡང་ཐོག་མར་ལོ་རྒྱུས་རིག་པ་བས་དོན་དངོས་བསྡུ་སྒྲིག་བྱེད་པ་དང་། དེ་ནས་དོན་དངོས་དེ་དག་ལ་རྒྱུས་ཡོད་པར་བྱེད་པ་དང་། དེ་ནས་ལོ་རྒྱུས་རིག་པ་བ་རང་ཉིད་ཀྱི་དགའ་ཕྱོགས་ཀྱི་བྱེད་ཐབས་གཞིར་བཟུང་ནས་ལས་སྣོན་དང་། ལོ་རྒྱུས་རྩོམ་འབྲི་བྱེད་དགོས་པ་བཅས་སོ།།
ཨ་ཁི་ཊོན་ལགས་ཀྱིས་ལོ་རྒྱུས་ནི་དངོས་ཡོད་བདེན་འཚོལ་ཡིན་དགོས་པར་འདོད་ཅིང་། ཁོང་གིས་ཁམ་ཟམ་ཉེ་རབས་ལོ་རྒྱུས་ཞེས་པའི་རྩོམ་སྒྲིག་པར་གནང་བའི་འཕྲིན་ཡིག་ལས། ང་ཚོས་སྙུག་རྩེ་ལས་བྱུང་བའི་ལོ་རྒྱུས་བརྩམས་ཆོས་དག་གིས་ཧྥ་རན་སི་དང་དབྱིན་ཇིའི་མི་དམངས་ཀྱི་ཡིད་ཚིམ་པར་བྱེད་དགོས་པར་མ་ཟད། ཧྭི་ལན་གྱི་མི་དམངས་ཀྱི་ཡིད་ཀྱང་ཚིམ་པར་བྱེད་དགོས། གལ་ཏེ་རྩོམ་པ་བོའི་མིང་དངོས་སུ་མི་འགོད་པའི་དབང་དུ་བཏང་ན། མི་སུས་ཀྱང་ནེའུ་ཅིན་ཆོས་དཔོན་གྱིས་གང་ཞིག་ནས་སྙུག་མཚམས་བཞག་ཡོད་པ་མི་ཤེས་པ་ཞིག་ཡོང་དགོས་ཞེས་གསུངས་ཡོད།
༢ ལོ་རྒྱུས་ཀྱི་དོན་དངོས།
གོང་དུ་ལོ་རྒྱུས་ཀྱི་དོན་དངོས་ཞེས་མང་དུ་གླེང་སྟབས། སྐབས་འདིར་ཡང་སྙིང་གང་ཞིག་ལ་ལོ་རྒྱུས་ཀྱི་དོན་དངོས་ཞེས་འབོད་པར་གོ་བ་ཞིག་ལེན་དགོས་ཀྱི་ཡོད། དེ་ཡང་ཁེ་སན་གྱིས་ལུའུ་བྷེ་ཧོང་གཙང་བོ་བརྒལ་བའི་དོན་དངོས་དང་ཁང་བའི་དཀྱིལ་དུ་མདུན་ཅོག་ཅིག་ཡོད་པའི་དོན་དངོས་གཉིས་ནི་རིགས་མཐུན་པའི་དོན་དངོས་གཉིས་ཡིན་ཞིང་། དེ་ཡང་བསྡུར་བ་བྱེད་ཆོག་པའི་རིགས་ཤིག་རེད་ཅེས་བཤད་ན་ཡང་མི་འགྲིག་པ་མེད། དོན་དངོས་འདི་གཉིས་ནི་རིགས་མཚུངས་པའི་རྣམ་པའམ་བསྡུར་བ་བྱེད་ཆོག་པའི་རྣམ་པའི་ངོས་ནས་ང་ཚོའི་འདུ་ཤེས་ཀྱི་སྣང་ངོར་འཆར་བར་བྱེད་ཅིང་། དེ་ཡང་དོན་དངོས་འདི་གཉིས་ལ་མཚོན་ནས་བཤད་ན་དེ་གཉིས་ལ་ཡང་ཕྱི་རོལ་ཡུལ་དུ་གྲུབ་པའི་ཁྱད་ཆོས་ཤིག་ནི་འདྲ་མཚུངས་སུ་ཡོད། སྐབས་འདིར་ང་ཚོ་ཡང་གནད་དོན་འདི་འདྲ་ཞིག་དང་འཕྲད་ཡོང་སྟེ། སྔར་འདས་ཀྱི་དོན་དངོས་ཡོད་ཚད་ལོ་རྒྱུས་ཀྱི་དོན་དངོས་ཡིན་པའི་ངེས་པ་མེད་ཅིང་། སྔར་འདས་ཀྱི་དོན་དངོས་ཡོད་ཚད་ཀྱང་ལོ་རྒྱུས་རིག་པ་བ་རྣམས་ཀྱིས་ལོ་རྒྱུས་ཀྱི་དོན་དངོས་སུ་ངོས་བཟུང་ནས་བརྡར་ཤ་བཅད་མེད་པས། དོན་དམ་དུ་ལོ་རྒྱུས་ཀྱི་དོན་དངོས་དང་དོན་དངོས་གཞན་དག་གི་ཁྱད་པར་འབྱེད་བྱེད་ཀྱི་ཚད་གཞི་ནི་ཅི་ཞིག་ཡིན་ནམ་ཞེས་པ་འདི་ཙམ་ཡིན།
སྤྱིར་དོན་དངོས་ལ་ཡང་རྩ་བའི་རང་བཞིན་གྱི་དོན་དངོས་རེ་ཡོད་ཅིང་། དེ་དག་ནི་ལོ་རྒྱུས་རིག་པ་བ་ཐམས་ཅད་ཀྱིས་གཅིག་མཐུན་དུ་ཁས་ལེན་པའི་རིགས་ཡིན་པར་མ་ཟད། རྩ་བའི་དོན་དངོས་དེ་དག་གིས་ལོ་རྒྱུས་ཀྱི་རྩ་བའི་སྒྲོམ་གཞི་གྲུབ་པར་བྱས་ཡོད། དེ་ཡང་དཔེར་ན། ཧེ་སུ་ཡན་དམག་འཁྲུག་ནི་སྤྱི་ལོ་༡༠༦༦ལོར་བྱུང་བ་ལས་སྤྱི་ལོ་༡༠༦༧ལོར་བྱུང་བ་མིན་པའི་དོན་དངོས་ཀྱི་རིགས་ལྟ་བུ་དང་། སོ་ཁི་རེ་ཋ་ལགས་ནི་གནའ་བོའི་གྷི་རི་སི་ནས་འཁྲུངས་པ་ལས་གནའ་བོའི་རྒྱ་གར་ནས་འཁྲུངས་པ་མིན་པའི་རིགས་ལྟ་བུའོ།། ལོ་རྒྱུས་རིག་པ་བ་རྣམས་ཀྱིས་དོན་འདི་རིགས་ལ་བརྟག་ཅིང་དཔྱད་པའི་སྐབས་སུ་ཡིག་ཚང་རིག་པ་དང་། གནའ་རྫས་རིག་པ་སོགས་ལ་ཡང་བརྟེན་ཆོག་གི་ཡོད། དོན་འདི་ཙམ་གྱི་ཐད་ནས་ནི་ལོ་རྒྱུས་རིག་པ་བ་ཐམས་ཅད་ཀྱང་སྔོན་གྱི་མཁས་པའི་དབང་བོ་རྣམས་ཀྱིས་གཏན་ལ་ཕབ་ཟིན་པའི་གནད་ཀྱི་རྗེས་སུ་འབྲང་ན་ཤིན་ཏུ་ལེགས།
སྔོན་གྱི་བཤད་སྲོལ་དུ་དོན་དངོས་རང་ལ་ཁ་གྲག་ཏུ་ཆུགས་ཞེས་བཤད། དེ་ཡང་འདི་ལ་ནི་ནོར་བ་རེ་འགའ་ཡང་ཡོད་དེ། ལོ་རྒྱུས་རིག་པ་བ་རྣམས་ལ་དོན་དངོས་ཀྱི་ཁ་གྲགས་པར་མཁོ་བའི་སྐབས་སུ་དོན་དངོས་ཀྱིས་ད་གཟོད་ཁ་གྲགས་སྲིད་ཅིང་། དོན་དངོས་གང་དག་ལ་ཁ་གྲགས་པར་འཇུག་པ་དང་། སྒྲིག་སྲོལ་གང་ཞིག་དང་རྒྱབ་ལྗོངས་གང་ཞིག་གཞིར་བཟུང་ནས་ཁ་གྲག་ཏུ་འཇུག་པ་ཡང་། ཡོད་ཚད་ལོ་རྒྱུས་རིག་པ་བ་རང་ཉིད་ཀྱིས་ཐག་གཅོད་བཞིན་ཡོད།
ང་ཚོ་སྤྱི་ལོ་༡༠༦༦ལོར་བྱུང་བའི་ཧུའུ་སུ་ཡན་སུ་དམག་འཁྲུག་ལ་སྤྲོ་བ་ཡོད་པའི་རྒྱུ་རྐྱེན་ནི་ལོ་རྒྱུས་རིག་པ་བ་རྣམས་ཀྱིས་དེ་ཉིད་དོན་དག་གལ་ཆེ་བའི་ལོ་རྒྱུས་ཀྱི་དོན་དངོས་ཤིག་ཏུ་བརྩིས་པ་ལས་གཞན་དུ་མ་འདས། དཔེར་ན། ཁེ་སན་གྱིས་ལུའུ་བྷེ་ཧོང་གཙང་བོ་བརྒལ་བའི་དོན་དངོས་ནི་ལོ་རྒྱུས་རིག་པ་བ་རྣམས་ཀྱིས་ལོ་རྒྱུས་ཀྱི་དོན་དངོས་གལ་ཆེན་ཞིག་ཏུ་བརྩིས་ནས་གདམས་བཀོད་བྱུང་བ་ལས། གང་དེའི་སྔ་རྗེས་སུ་མི་གྲངས་ཀྱིས་མི་ཆོད་པ་ཞིག་གིས་ཀྱང་གཙང་བོ་དེ་ཉིད་བརྒལ་ཡོད། འོན་ཀྱང་། དེ་དག་ནི་ལོ་རྒྱུས་ཀྱི་དོན་དངོས་ཤིག་མི་ཆགས་དོན་ལོ་རྒྱུས་རིག་པ་བ་རྣམས་ཀྱིས་སྣང་མེད་དུ་བཞག་པས་རེད། དེ་ཡང་ཡིན་ཏེ། ཚན་རིག་ནི་ཤེས་རབ་གཙོ་བོར་བྱས་ནས་དོན་དངོས་ལ་སྙིགས་དོར་བཅུད་ལེན་བྱས་པའི་ཕུང་བོ་ཞིག་ཡིན་ཞེས་གསུངས་པ་ནང་བཞིན། ལོ་རྒྱུས་ཀྱང་དེ་ལས་མ་འདས་པས། འདས་ཟིན་པའི་དོན་དངོས་ཡོད་ཚད་ལོ་རྒྱུས་ཀྱི་དོན་དངོས་སུ་འདོད་ན་ནི་མཐའ་གཅིག་ཏུ་ནོར་འཁྲུལ་ཡིན་ནོ།།
༣ དོན་དངོས་གང་ཞིག་ལོ་རྒྱུས་ཀྱི་དོན་དངོས་སུ་འགྱུར་བའི་གོ་རིམ།
སྤྱི་ལོ་༡༨༥༠ལོར་སུ་ཐ་ལུའུ་པུའུ་ལེ་ཅིའི་སྒེར་ཚོང་ཁང་ཆུང་ཆུང་གང་དེར་འཕྲོག་བཅོམ་བྱུང་ཞིང་། མཇུག་མཐར་མི་ཚོགས་གདུག་རྩུབ་ཅན་སྐོར་ཞིག་གིས་ཁོང་རྡུང་རྡེག་བྱས་ནས་བསད། འདི་ནི་ལོ་རྒྱུས་ཀྱི་དོན་དངོས་ཤིག་རེད་དམ་ཞེ་ན། ལོ་གཅིག་གི་གོང་རོལ་དུ་ངས་མ་རེད་ཅེས་ཐེ་ཚོམ་སྤུ་ཙམ་ཡང་མེད་པར་ལན་འདེབས་ངེས། འོན་ཀྱང་། ལོ་གཅིག་གི་གོང་རོལ་ཏུ་འབུམ་རམས་པ་ལྗིན་ཐུ་ལེན་ཁུ་ལ་ཁུ་ལགས་ཀྱིས་ཨོཁྶ་ཕོར་ཌ་གཙུག་ལག་སློབ་ཆེན་དུ་འཆད་ཁྲིད་གནང་བའི་སྐབས་སུ། ཁོང་གིས་དོན་རྐྱེན་འདི་གླེང་མྱོང་། འདི་ཙམ་གྱིས་དོན་རྐྱེན་འདི་ལོ་རྒྱུས་ཀྱི་དོན་དངོས་སུ་གྱུར་བ་རེད་དམ་ཞེ་ན། དེ་ཡང་མ་ཡིན་ནོ།། དེ་ནི་མི་ཞིག་གིས་ལོ་རྒྱུས་ཀྱི་སྟེགས་བུར་དོན་དངོས་གང་དེ་མཚམས་སྦྱོར་བྱས་པ་ཙམ་ལས་མ་འདས་སྙམ། དེ་ཡང་ང་ཚོས་གཅིག་བྱས་ན་ལོ་རེ་འགའི་རྗེས་སུ་དོན་རྐྱེན་འདི་དུས་རབས་བཅུ་དགུ་བའི་དབྱིན་ཇི་དང་འབྲེལ་བ་ཡོད་པའི་ཡིག་རིགས་དང་གསུང་རྩོམ་རེ་འགའི་མཆན་དུ་བཏབས་ཡོད་པ་མཐོང་སྲིད་ཅིང་། དེའི་རྗེས་སུ་ཡིག་རིགས་དང་གསུང་རྩོམ་དག་གི་རྩོམ་གྱི་སྤྱི་ཁོག་ཏུ་བྱུང་བ་ཡང་མཐོང་སྲིད། དེ་ལྟར་ན་དེའི་རྗེས་ཀྱི་ལོ་ཉི་ཤུའམ་སུམ་ཅུ་ལྷག་འདས་པའི་དུས་སུ་དོན་རྐྱེན་འདི་ནི་ལོ་རྒྱུས་ཀྱི་དོན་དངོས་ཤིག་ཏུ་འགྱུར་བར་གདོན་མི་ཟའོ།།
དེ་ཡང་ཟུར་གཞན་ཞིག་ནས་བསམ་བློ་བཏང་ན། དེ་ཡང་དོན་རྐྱེན་འདི་ཡང་མི་གཅིག་གིས་དོ་སྣང་མ་བྱུང་བ་ཡིན་ན་ནི། དེ་ཡང་འདས་པའི་ལོ་རྒྱུས་ཀྱི་དོན་དངོས་མིན་པའི་རྒྱ་མཚོའི་ཀླུང་དུ་ཤུལ་མེད་དུ་སིམ་པར་གྱུར་ཡོད་པ་ཡང་གདོན་མི་ཟའོ།།
ལོ་རྒྱུས་ཀྱི་དོན་དངོས་ཞེས་པ་ཡང་ལོ་རྒྱུས་རིག་པ་བ་རྣམས་ཀྱིས་སྙིགས་དོར་བཅུད་ལེན་བྱས་ནས་ཡོང་བ་རེད་ཅེས་བཤད་པ་ན། བར་མཚམས་འདིར་གནད་དོན་འདི་འདྲ་ཞིག་ཡོད་དེ། ད་ལྟར་གནས་པའི་ཡིག་ཚགས་རི་ལྟར་སྤུངས་པ་འདི་དག་ཀྱང་དོན་ལ་འདས་པའི་དུས་སུ་ལོ་རྒྱུས་རིག་པ་བ་དང་ཡིག་འབྲི་བ་དག་གིས་ཤེས་ཚོད་ཀྱིས་ཟིན་ཐོར་བཀོད་པའི་དོན་དངོས་ཤ་སྟག་ཡིན་ཞིང་། སྐབས་འདིར་ལོ་རྒྱུས་ཀྱི་དོན་དངོས་དང་དེ་མིན་པའི་འདས་པའི་དོན་དངོས་གཉིས་ཀྱི་དབྱེ་མཚམས་མི་སྣང་བར་གྱུར་ཡོད། ཞིབ་འཇུག་པ་ཕོ་ཏུན་གྱིས་གནའ་རབས་དང་དུས་རབས་བར་མའི་སྐབས་ཀྱི་ཡིག་ཚང་ཕལ་མོ་ཆེ་ནི་རུལ་བ་དང་ཆད་པའི་སྐྱོན་མང་དུ་མཆིས་ཞེས་གསུངས་ཡོད། འོན་ཀྱང་། ཡིག་ཚང་དེ་དག་གི་སྐྱོན་ཆ་ཆེ་ཤོས་ནི་ཆད་པ་དང་རུལ་བའི་སྐྱོན་འདི་དག་མ་ཡིན་ཏེ། དེ་ཡང་སྤྱི་ལོ་སྔོན་གྱི་དུས་རབས་ལྔ་བ་ཡས་མས་སུ་ཟིན་ཐོར་བཀོད་པའི་གནའ་བོའི་གྷི་རི་སིའི་ཡིག་ཚང་དག་གི་སྐྱོན་ཆ་ཆེ་ཤོས་ནི་ཆད་རུལ་གྱི་སྐྱོན་མ་ཡིན་པར་གང་དེར་ཨ་ཐན་སི་མཁར་གྲོང་གི་མི་ཉུང་ཤས་ཤིག་གི་གནས་ཚུལ་ཙམ་ལས་གཞན་དུ་མི་སྣང་བ་འདི་ཙམ་ཡིན། སྤྱི་ལོ་སྔོན་གྱི་དུས་རབས་ལྔ་བའི་ཨ་ཧྥེན་སུ་ལ་ཨ་ཧྥེན་སུའི་སྤྱི་དམངས་ཀྱིས་ལྟ་སྟངས་ཇི་ལྟ་བུ་ཞིག་བཟུང་ཡོད་པའི་སྐོར་ང་ཚོས་ཤེས་རྟོགས་བྱུང་བ་མ་མང་ན་མི་ཉུང་། འོན་ཀྱང་། སུ་བྷ་ཏ་པ་དང་ཁུ་ལེན་སུ་པ། དྷུ་པེའུ་སུ་པའི་ནང་སེམས་སུ་ཨ་ཧྥེན་སུ་ཇི་ལྟ་བུ་ཞིག་ཡིན་པའི་སྐོར་ང་ཚོས་ཅུང་ཙམ་ཡང་མི་ཤེས། པོ་སུ་པ་དང་བྲན་གཡོག ཨ་ཧྥེན་སུ་རུ་གནས་འཚོ་ཞིང་ཨ་ཧྥེན་སུའི་སྤྱི་དམངས་སུ་མི་གཏོགས་པའི་མི་རྣམས་ཀྱི་ནང་སེམས་སུ་ཨ་ཧྥེན་སུ་ཇི་ལྟ་བུ་ཞིག་ཡིན་པའི་སྐོར་ང་ཚོས་ཤེས་མིན་བཤད་མ་དགོས་པ་ཞིག་རེད། དེར་བརྟེན་ང་ཚོས་ཨ་ཧྥེན་སུའི་སྐོར་གྱི་ཤེས་བྱ་དག་ཀྱང་སྔ་མོ་ནས་གཏན་ཁེལ་བྱས་ཟིན་ཡོད་པ་རེད།
དེ་བཞིན་ང་ཚོས་དེང་དུས་ཀྱིས་མི་རྣམས་ཀྱིས་བྲིས་པའི་དུས་རབས་བར་མའི་ལོ་རྒྱུས་ཀློག་པའི་སྐབས་སུ། ང་ཚོས་དུས་རབས་བར་མའི་མི་རྣམས་ནི་ཆོས་ལུགས་ལ་ཤི་འཐམ་རོ་འཐམ་བྱེད་པའི་མི་ཚོགས་ཤིག་ཡིན་པ་མཐོང་ཡོང་། འོན་ཀྱང་། ཁོ་ཚོས་དོན་འདི་ཇི་ལྟར་ཤེས་པ་ཡིན་ནམ། འདི་དོན་དངོས་ཤིག་ཡིན་ནམ་སྙམ་པའི་ཐེ་ཚོམ་ཞིག་འགོག་མེད་དུ་སྐྱེ་ཡོང་། ད་ལྟ་ང་ཚོས་མཐོང་ཐུབ་པའི་དུས་རབས་བར་མའི་ལོ་རྒྱུས་ཡོད་ཚད་ཀྱང་དོན་ལ་མི་རབས་ནས་མི་རབས་བརྒྱུད་དེ་ལོ་རྒྱུས་རྩོམ་སྒྲིག་པ་དག་གིས་ང་ཚོར་བདམས་ནས་བྱུང་བ་ཤ་སྟག་ཅིག་རེད། མི་དེ་དག་གི་ལས་སུ་བྱ་བ་ནི་རིག་པ་རྩེ་གཅིག་གིས་ཆོས་ལུགས་ཀྱི་གཞུང་ལུགས་དང་ལག་ལེན་མཐའ་འཁྱོལ་ཡོང་བར་བྱེད་པ་འདི་ཙམ་ཡིན་ཞིང་། དེ་དག་གིས་ཆོས་ལུགས་ནི་བླ་ན་མེད་པ་ཡིན་སྟབས་དེ་འབྲེལ་གྱི་དོན་བྱ་མཐའ་དག་ལས་གཞན་དག་ནི་ཡིག་ཐོག་ཏུ་འགོད་རིན་མི་འདུག་སྙམ་སྟེ་དོར་བར་མཛད་ཡོད། དེར་བརྟེན་ལོ་རྒྱུས་ཀྱི་དོན་དངོས་ཕལ་མོ་ཆེ་ཞིག་གི་བདེན་དཔང་ཡང་གཏན་དུ་མི་སྣང་བར་གྱུར་ཡོད། དེ་ཡང་དགེ་རྒན་ཆེན་མོ་པ་ལུ་ཁུ་ལ་ཧྥུ་ལགས་ཀྱིས་སྤྱིར་དོན་དངོས་རྩ་བར་བྱས་ནས་ཡོད་ཀྱང་། དེ་ཡང་ནན་གྱིས་བཤད་ན། དེ་དག་ཐམས་ཅད་ནི་དོན་དངོས་མ་ཡིན་པར་རྒྱུན་མི་ཆད་པར་བརྡར་ཤ་བཅད་ནས་ཡོང་བ་ཤ་སྟག་ཏུ་ངེས་ཞེས་གསུངས་པ་ཇི་བཞིན་ནོ།།
༤ ལོ་རྒྱུས་མཚན་ཉིད་རིག་པ།
ལོ་རྒྱུས་ནི་ཅི་ཞིག་ཡིན་ནམ?
ལོ་རྒྱུས་མཚན་ཉིད་རིག་པ་ཞེས་པའི་ཐ་སྙད་འདི་ནི་སྤྱི་ལོ་དུས་རབས་༡༩བའི་ནང་དུ་ཧྥུའུར་ཐེ་ལགས་ཀྱིས་སྲོལ་གཏོད་གནང་བ་ཡིན་ཞིང་། དུས་ཕྱིས་མི་རྣམས་ཀྱིས་ཐ་སྙད་འདི་ལ་གོ་བ་སྣ་ཚོགས་བླངས་ཡོད། ངར་མཚོན་ནས་བཤད་ན་ལོ་རྒྱུས་མཚན་ཉིད་རིག་པ་ཞེས་པའི་ནང་དོན་གང་ཡིན་ཞེ་ན། དེ་ནི་ལོ་རྒྱུས་ནི་ཅི་ཞིག་ཡིན་ནམ་ཞེས་པའི་དྲིས་ལན་ལས་མ་འདས་སྙམ། དབྱིན་ཇིའི་ལོ་རྒྱུས་རིག་པ་བ་རྣམས་ལོ་རྒྱུས་ཀྱི་ནང་དོན་སྤྱི་བསྡོམས་བྱེད་པར་མོས་པ་དེ་འདྲ་མེད། དེ་ཡང་ཁོང་རྣམས་ལོ་རྒྱུས་ཀྱི་ནང་དོན་གཞི་གྲུབ་པར་ཡིད་མ་ཆེས་པས་མིན་པར། ལོ་རྒྱུས་ཀྱི་དོན་སྙིང་ནི་འདུས་བྱས་ཤིག་དང་། མ་བཤད་གསལ་མཐོང་ཞིག་ཏུ་འདོད་པས་རེད།
འདས་པའི་མི་ལོ་ལྔ་བཅུའི་རིང་དུ་ལོ་རྒྱུས་ནི་ཅི་ཞིག་ཡིན་ནམ་ཞེས་པའི་གནད་དོན་གང་དེར་ཞིབ་འཇུག་མང་དུ་གནང་མྱོང་ཞིང་། དེ་ཡང་དུས་རབས་བཅུ་དགུ་བའི་ནང་དུ་རང་དབང་རིང་ལུགས་ཀྱི་གནམ་འོག་ཏུ་གྲགས་འགུལ་མང་དུ་བཟོས་མྱོང་། འཇར་མན་དུ་དུས་རབས་བཅུ་དགུ་བའི་ལོ་རབས་༨༠ནས་ལོ་རབས་༩༠བའི་བར་ཐོག་མར་ལོ་རྒྱུས་ཀྱི་དོན་དངོས་ཐག་གཅོད་པའི་བསམ་བློའི་རླབས་རྒྱུན་ཞིག་འཕྱུར་ཞིང་། དེ་ཡང་ལོ་རྒྱུས་ཀྱི་དོན་དངོས་ཐག་གཅོད་པའི་དགོངས་དོན་གང་དེར་དགག་བཞག་མང་དུ་བྱུང་། བསམ་བློ་དེ་ལ་ཡང་ཐོག་མར་དབྱིན་ཇི་ནས་ངོས་ལེན་ཐོབ་ཅིང་། དུས་རབས་ཉི་ཤུ་བའི་དུས་སྟོད་དུ་བསམ་བློ་གང་དེ་ཨི་ཋ་ལིར་ཁྱབ་པར་གྱུར། གནས་དེའི་ཁོ་ལོ་ཆི་ལགས་ཀྱིས་ལོ་རྒྱུས་མཚན་ཉིད་རིག་པའི་སྐོར་ནས་འགྲེལ་བཤད་ཞིབ་ཚགས་དང་ལྡན་པ་གནང་ཞིང་། དེ་ཡང་ཁོང་ལ་འཇར་མན་གྱི་སློབ་དཔོན་ཆེན་མོ་དག་གི་ཤུགས་རྐྱེན་ཐེབས་ཡོད་པ་ནི་གསལ་བོར་མཐོང་ཐུབ་སྟེ། ཁོ་ལོ་ཆི་ལགས་ཀྱིས་ལོ་རྒྱུས་ཡོད་ཚད་ནི་དེང་རབས་ཀྱི་ལོ་རྒྱུས་ཡིན་ཞེས་གསུངས་ཤིང་། གང་དེའི་བསྟན་དོན་ནི་ལོ་རྒྱུས་ནི་ངོ་བོའི་ཆ་ནས་དེང་དུས་ཀྱི་མིག་ཟུང་ལ་བརྟེན་ནས་འདས་ཟིན་ལ་ལྟ་བ་དང་། དེང་དུས་ཀྱི་གནད་དོན་གཞིར་བཟུང་ནས་འདས་ཟིན་ལ་ལྟ་བ་དང་། ལོ་རྒྱུས་རིག་པ་བའི་འགན་ཁུར་གཙོ་བོ་ནི་ཟིན་འགོད་མ་ཡིན་པར་དཔྱད་བརྗོད་ཡིན་ཞེས་པའོ།།
སྤྱི་ལོ་༡༩༡༠ལོར་ཨ་རིའི་ལོ་རྒྱུས་རིག་པ་བ་ཁར་བྷེ་ཁུ་ལགས་ཀྱིས་ལོ་རྒྱུས་རིག་པ་བ་གང་ཞིག་ལ་མཚོན་ན་ཡང་། ཁོང་གིས་ལོ་རྒྱུས་ཀྱི་དོན་དངོས་གསར་གཏོད་མ་བྱས་པའི་གོང་རོལ་དུ། ལོ་རྒྱུས་ཀྱི་དོན་དངོས་ཤིག་གཞི་མ་གྲུབ་ཅེས་གསུངས།
དགོངས་དོན་འདི་དག་ལ་ནི་སྐབས་དེར་མི་རྣམས་ཀྱིས་དོ་སྣང་ཆེན་པོ་བྱས་མེད་ཅིང་། སྤྱི་ལོ་༡༩༢༠ལོའི་རྗེས་སུ་ཁོ་ལོ་ཆིའི་བསམ་བློའི་དགོངས་དོན་དེ་ཡང་དབྱིན་ཇི་དང་ཧྥ་རན་སི་ནས་གཞི་རྒྱ་ཆེན་པོར་དར་ཁྱབ་བྱུང་ཡོད། དེ་ཡང་ཁོ་ལོ་ཆིའི་བསམ་བློའི་དགོངས་དོན་དར་ཁྱབ་ཆེན་པོ་བྱུང་བའི་རྒྱུ་མཚན་ནི་འཇར་མན་གྱི་མཁས་པ་དག་ལས་ཀྱང་གཏིང་ཟབ་པ་དང་། རྩོམ་རྩལ་ཡོད་པས་མ་ཡིན་པར། སྐབས་དེར་འཛམ་གླིང་འཁྲུག་ཆེན་དང་བོ་བྱུང་བའི་དབང་གིས་དེང་དུས་ཀྱི་གནད་དོན་གཞིར་བཟུང་ནས་འདས་དོན་ལ་བརྟག་དཔྱད་གཏོང་བའི་དགོས་དབང་ཞིག་རང་བཞིན་གྱིས་ཆགས་ཡོང་བས་རེད། དེར་བརྟེན་ལོ་རྒྱུས་རིག་པ་བ་རྣམས་ཀྱིས་ལོ་རྒྱུས་ལ་མཚན་ཉིད་གང་ཞིག་བཞག་ཀྱང་། དེ་ཡང་རང་ཉིད་འཚོ་བཞུགས་གནང་བའི་སྤྱི་ཚོགས་ཀྱི་གནས་བབ་དང་ཏན་ཏན་འབྲེལ་བ་ཡོད་པ་ཞིག་རེད་སྙམ།
ཧུ་ལེན་བོའུ་ཏུ་ལགས་ཀྱི་དགོངས་པ་ནི། ལོ་རྒྱུས་མཚན་ཉིད་རིག་པ་བ་རྣམས་ཀྱི་དོ་སྣང་བྱ་བའི་ཡུལ་ནི་འདས་དོན་མ་ཡིན་ཞིང་། ལོ་རྒྱུས་རིག་པ་བས་འདས་དོན་ལ་བསམ་གཞིག་བྱས་པ་ཡང་མ་ཡིན་པར། དེ་གཉིས་དབར་གྱི་འབྲེལ་བར་གོ་དགོས་ཤིང་། ལོ་རྒྱུས་རིག་པ་བས་བརྟག་དཔྱད་བྱེད་བཞིན་པའི་འདས་དོན་ནི་འདས་ཟིན་པའི་འདས་དོན་ཙམ་ཞིག་མ་ཡིན་པར། ཚད་ངེས་ཅན་ཞིག་གི་ངོས་ནས་དངོས་ཡོད་འཚོ་བའི་ཁྲོད་དུ་མངོན་སུམ་དུ་གསོན་པའི་འདས་དོན་ཞིག་ཡིན་དགོས། དེ་ཡང་ལོ་རྒྱུས་རིག་པ་བ་རྣམས་ཀྱིས་སྔར་འདས་ཀྱི་ཁྲོད་དུ་སྦས་པའི་ཚུལ་དུ་གནས་པའི་བསམ་བློ་གང་དེར་རྒྱུས་ལོན་བྱེད་མ་ཐུབ་ན། དེ་ཡང་ཚེ་སྲོག་མེད་པ་ཞིག་དང་ལོ་རྒྱུས་རིག་པ་བ་རང་ཉིད་ལ་མཚོན་ནས་བཤད་ན་ཡང་སྙིང་བོ་ཅི་ཡང་མེད་པ་ཞིག་རེད། དེར་བརྟེན་ལོ་རྒྱུས་ཡོད་ཚད་ནི་དོན་ལ་བསམ་བློའི་ལོ་རྒྱུས་ཤིག་ཡིན་ཞིང་། དེ་བས་ལོ་རྒྱུས་ནི་འདི་ལྟ་བུའི་བསམ་བློའི་ལོ་རྒྱུས་ལ་བརྟག་དཔྱད་ཞིབ་འཇུག་ནང་བའི་ལོ་རྒྱུས་རིག་པ་བ་རྣམས་ཀྱིས་རང་ཉིད་ཀྱི་ལྟ་དགོངས་གཞིར་བཟུང་ནས་ཡང་བསྐྱར་གོ་རིམ་བསྒྲིགས་པའི་བརྒྱུད་རིམ་ཞིག་ལ་གོ་དགོས་པ་ཡིན་ཞེས་པའོ།།
གཞན་ཡང་། ལོ་རྒྱུས་ཀྱི་དོན་དངོས་ཞེས་པ་ཡང་དོན་ལ་ཟིན་ཐོར་འགོད་མཁན་དག་གི་ནང་ཤེས་རྒྱུད་ལ་བརྟེན་ནས་བྱུང་བ་ཡིན་ཞིང་། དེ་བས་ང་ཚོས་ལོ་རྒྱུས་ཀྱི་གསུང་རྩོམ་ཞིག་ལ་ཞིབ་འཇུག་བྱེད་པའི་སྐབས་སུ་ཐོག་མར་གསུང་རྩོམ་གྱི་ནང་དོན་ལ་དབྱེ་ཞིབ་དང་བརྟག་དཔྱད་མི་གཏོང་བར། ལོ་རྒྱུས་གསུང་རྩོམ་གང་དེའི་རྩོམ་པ་བོར་ཞིབ་འཇུག་དང་རྒྱུས་ལོན་གཏིང་ཟབ་བྱེད་པ་ནི་ཤིན་ཏུ་གལ་ཆེ། དེ་ཡང་ལོ་རྒྱུས་གསུང་རྩོམ་ཞིག་གི་རིན་ཐང་རྟོགས་པར་འདོད་ན་ཐོག་མར་ལོ་རྒྱུས་རྩོམ་པ་བོ་གང་དེས་ཅི་ཞིག་བྱེད་བཞིན་ཡོད་པ་མཁྱེན་དགོས། དེ་ཡང་གསལ་བོར་བཤད་ན་ལོ་རྒྱུས་ཀྱི་དོན་དངོས་ལ་ཞིབ་འཇུག་བྱེད་པ་ལ་ཁྱོད་ཀྱིས་ངེས་པར་དུ་ཐོག་མར་ལོ་རྒྱུས་རིག་པ་བ་གང་དེར་ཞིབ་འཇུག་བྱེད་དགོས་པ་ཡིན། དེ་ཡང་གང་དེའི་བསམ་བློ་དང་ལྟ་བ་སོགས་སོ།།
ལོ་རྒྱུས་རིག་པ་བ་རྣམས་ལ་ནི་ངེས་པར་དུ་འཆར་སྣང་གི་བསམ་བློ་ཞིག་དགོས་ཤིང་། དེ་ནི་རང་ཉིད་ཀྱིས་བརྟག་དཔྱད་བྱེད་བཞིན་པའི་མི་སྣའི་ནང་སེམས་ཀྱི་འཇིག་རྟེན་གང་དེ་ཚོད་དཔག་བྱེད་ཐུབ་དགོས་ཀྱི་ཡོད། གཞན་ཡང་། ང་ཚོས་དེང་དུས་ཀྱི་མིག་ཟུང་ལ་བརྟེན་ནས་འདས་ཟིན་ལ་རྒྱུས་ལོན་བྱེད་དགོས་ཤིང་། དེ་ཡང་སྔར་བྱུང་བའི་ལོ་རྒྱུས་རིག་པ་བ་རྣམས་ཀྱང་སྐབས་དེའི་མིའི་རིགས་ཀྱི་འཆིང་རྒྱས་བཅིངས་ཡོད་པ་བཅས་སོ།།
སྐབས་གཉིས་པ། སྤྱི་ཚོགས་དང་མི་སྒེར།
ང་ཚོ་མའི་མངལ་ནས་སྐྱེས་པ་ནས་བཟུང་འཛམ་གླིང་གི་སྤྱི་ཚོགས་རེ་འགའ་ཞིག་གིས་ང་ཚོར་ཤུགས་རྐྱེན་ཐེབས་པའི་མགོ་བཟུང་བ་ཡིན་པར་མ་ཟད། ང་ཚོ་སྐྱེ་དངོས་ཁོ་ན་ཞིག་ནས་སྤྱི་ཚོགས་ཀྱི་བསྐྱེད་འབྲས་ཤིག་ཏུ་འགྱུར་བའི་མགོ་ཡང་བཟུང་བ་ཡིན། ལོ་རྒྱུས་ཀྱི་དུས་རིམ་རེ་རེ་དང་བྱུང་རབས་སྔོན་གྱི་མི་ཞིག་སྤྱི་ཚོགས་ཤིག་ཏུ་འབྱོར་བ་ཡིན་ན། དེ་ཡང་སྤྱི་ཚོགས་ཤིག་གིས་བསྐྲུན་ནས་ཡོང་བ་གདོན་མི་ཟ། མི་གང་དེས་བཤད་པའི་སྐད་ཆ་ཡང་རང་ཉིད་ཀྱི་རྣམ་དཔྱོད་ལ་བརྟེན་ནས་བྱུང་བ་མ་ཡིན་པར། རང་ཉིད་གང་ལ་གཏོགས་པའི་སྤྱི་ཚོགས་དེ་ལ་བརྟེན་ནས་བྱུང་བ་ཞིག་ཡིན་ཞིང་། སྐད་ཆ་དང་ཁོར་ཡུག་གིས་མི་གང་དེའི་བསམ་བློ་གཏོང་ཕྱོགས་དང་གོམ་གཤིས་སོགས་ཐག་གཅོད་པ་ཡིན་ཏེ། གང་དེའི་ཐོག་མའི་ལྟ་ཚུལ་སོགས་ཀྱང་མི་གཞན་ལ་བརྟེན་ནས་བྱུང་བ་ཡིན་པས་སོ།། སྤྱི་ཚོགས་དང་ཡལ་བར་བྲལ་བའི་རང་རྒྱལ་བ་ལྟ་བུ་ཞིག་གིས་སྐད་ཆ་བཤད་མི་ནུས་ཤིང་། བསམ་བློ་ཡང་གཏོང་མི་ཤེས་པ་ཡིན། མིའི་རིགས་རིག་པ་བ་རྣམས་ཀྱིས་གདོད་མའི་མི་རྣམས་དང་དཔལ་ཡོན་ཅན་གྱི་མི་རྣམས་བསྡུར་བ་བྱས་པ་ན། དེ་དག་ལ་མི་སྒེར་གྱི་ཁྱད་ཆོས་ཤིན་ཏུ་ཉུང་ཞིང་ཐམས་ཅད་སྤྱི་ཚོགས་ཀྱིས་བསྐྲུན་པ་ཤ་སྟག་ཏུ་འདོད།
སྐྱེ་དངོས་རིག་པ་བ་དག་གིས་ཡུན་རིང་བོར་བཤད་པའི་མི་རིགས་དག་མཆོག་དམན་དུ་དབྱེ་བའི་ལྟ་བ་རྙིང་བ་གང་དེ་ད་ལྟ་ཤུལ་མེད་ལྟ་བུར་ཆགས་ཡོད་མོད། འོན་ཀྱང་། མི་རིགས་མི་འདྲ་བའི་སྤྱི་ཚོགས་དང་། སློབ་གསོ། རིག་གནས་སོགས་ཀྱི་དབང་གིས་མི་རིགས་རེ་རེ་ལའང་ཐུན་མིན་གྱི་ཁྱད་ཆོས་དང་གོམས་སྲོལ་ཁྱད་པར་བ་རེ་ཡོད་པ་ནི་བཟློག་ཏུ་མེད་པ་ཞིག་རེད། མི་གཤིས་ཞེས་པའི་དཔྱོད་དཀའ་བའི་འདུས་གཟུགས་འདི་ནི་རྒྱལ་ཁབ་ནས་རྒྱལ་ཁབ་བར་དང་། དུས་རབས་ནས་དུས་རབས་བར་དུ་མཚམས་མི་ཆད་པར་འགྱུར་ལྡོག་འབྱུང་བཞིན་ཡོད་ཅིང་། དེ་ཡང་ང་ཚོས་དར་རྒྱས་ཆེ་བའི་སྤྱི་ཚོགས་དང་སྤྱི་ཚོགས་ཀྱི་གོམས་སྲོལ་སྣ་ཚོགས་ཀྱི་བསྐྱེད་འབྲས་ཤིག་ཏུ་མི་འདོད་ཐབས་མེད་དུ་ཆགས་ཡོད། དཔེར་ན། ཨ་རིའི་མི་དང་། རྒྱ་གར་བ་དང་། ཨུ་རུ་སིའི་མི་དག་གི་བར་དུ་ཕྱོགས་གང་ཅིའི་ཐད་ནས་ཀྱང་རང་བཞིན་གྱིས་ཁྱད་པར་ཞིག་ཡོད་པ་ལྟ་བུའོ།།
ཐང་དབྱིན་བྷེ་སོགས་ལོ་རྒྱུས་རིག་པའི་མཁས་དབང་འགའ་ཞིག་གིས་ནུས་ཤུགས་ཡོད་རྒུས་འཁོར་བསྐྱོད་སྨྲ་བའི་རིག་པའི་གཞུང་ལུགས་ཀྱིས་འགྲོ་བ་མིའི་རིགས་ཡོད་ཚད་ལམ་གཅིག་བརྒྱུད་ནས་འཕེལ་བཞིན་ཡོད་པའི་ལོ་རྒྱུས་ཀྱི་གཞུང་ལུགས་གང་དེའི་ཚབ་བྱེད་པར་འབད་པ་གནང་མྱོང་། འོན་ཀྱང་། ཐང་དབྱིན་བྷེས་གཙོས་པའི་དབྱིན་ཇིའི་ལོ་རྒྱུས་སྨྲ་བ་མང་དག་ཅིག་གི་ལྟ་བ་གང་དེ་གཏན་ཚིགས་ལྡན་པ་ཞིག་དང་ཚུགས་ཐུབ་པ་ཞིག་ཆགས་ཐུབ་མེད། དེ་ཡང་ལོ་རྒྱུས་སུ་མི་རིགས་སྤྱི་ལ་ཁྱབ་པའི་ཐུན་མོང་གི་ཁྱད་ཆོས་ཤིག་མེད་པས་རེད།
གོང་དུ་བཤད་པའི་རྒྱུ་མཚན་དེ་དག་གི་དབང་གིས་སྐབས་འདིར་ང་ཚོས་ངེས་པར་དུ་མཁྱེན་དགོས་པ་གཉིས་ཡོད་པ་ལས། དང་བོ་ནི། གལ་ཏེ་ཁྱེད་ཀྱིས་ཐོག་མར་ལོ་རྒྱུས་རིག་པ་བ་གང་དེས་ལོ་རྒྱུས་ཞིབ་འཇུག་གི་ལངས་ཕྱོགས་མ་མཐོང་ན། ལོ་རྒྱུས་རིག་པ་བ་གང་དེའི་གསུང་རྩོམ་ལ་རྒྱུས་ལོན་དང་གཟིགས་དཔྱད་གནང་མི་ཐུབ་པ་དང་། གཉིས་པ་ནི་ལོ་རྒྱུས་རིག་པ་བ་གང་དེའི་ལངས་ཕྱོགས་ཀྱི་རྩ་བ་ཡང་དོན་གྱིས་སྤྱི་ཚོགས་དང་ལོ་རྒྱུས་ཤིག་གི་རྒྱབ་ལྗོངས་སུ་ཟུག་ཡོད། དེ་ཡང་ལོ་རྒྱུས་རིག་པ་བ་གང་ཉིད་ཀྱིས་ལོ་རྒྱུས་གསུང་རྩོམ་མ་བརྩམས་པའི་སྔ་རོལ་ནས་ཀྱང་ཁོང་ལོ་རྒྱུས་ཀྱི་བསྐྱེད་འབྲས་ཤིག་ཏུ་གྱུར་ཟིན་ཡོད་པས་ཡིན།
ངས་གོང་དུ་ལོ་རྒྱུས་ལ་ཞིབ་འཇུག་བྱེད་པའི་གོང་རོལ་དུ་ལོ་རྒྱུས་རྩོམ་པ་བོར་ཞིབ་འཇུག་བྱེད་དགོས་ཞེས་བཤད་ཡོད་ཅིང་། སྐབས་འདིར་དོན་དེར་ཁ་གསབ་ཅིག་བྱེད་འདོད་དེ། དེ་ཡང་ལོ་རྒྱུས་རིག་པ་བར་ཞིབ་འཇུག་བྱེད་པའི་གོང་རོལ་དུ་ངེས་པར་དུ་ལོ་རྒྱུས་རིག་པ་བ་གང་དེ་འཚར་ལོངས་བྱུང་བའི་ལོ་རྒྱུས་ཀྱི་རྒྱབ་ལྗོངས་དང་སྤྱི་ཚོགས་ཁོར་ཡུག་སོགས་ལ་ཡང་བརྟག་དཔྱད་དང་རྒྱུས་ལོན་ལེགས་པོ་ཞིག་བྱེད་དགོས་ཀྱི་ཡོད། དེ་ཡང་ལོ་རྒྱུས་རིག་པ་བ་ནི་ལོ་རྒྱུས་དང་སྤྱི་ཚོགས་ཀྱི་བསྐྱེད་འབྲས་ཤིག་ཡིན་པས་སོ།།
སྐབས་གསུམ་པ། ལོ་རྒྱུས་ལས་བྱུང་བའི་རྒྱུ་འབྲས་ཀྱི་འབྲེལ་བ།
འོ་མ་ཟངས་ངའི་ནང་དུ་བླུགས་ནས་གདུས་པ་ན་རང་བཞིན་གྱིས་འཕྱུར་ཡོང་བ་རེད། དེའི་རྒྱུ་མཚན་གང་ཡིན་ཞེས་དྲིས་ན། ངས་དེ་ནི་འོ་མའི་ཐུན་མིན་ཁྱད་ཆོས་ཤིག་རེད་ཅེས་ལན་འདེབས་སྲིད། དྲིས་ལན་འདི་ནི་དོན་དངོས་ཤིག་རེད། འོན་ཀྱང་། གང་དེས་གསལ་བཤད་གང་ཡང་བྱེད་ཐུབ་པ་མ་རེད། དཔེ་དེ་བཞིན་དུ་འཛམ་གླིང་འཁྲུག་ཆེན་གཉིས་པ་བྱུང་བའི་རྒྱུ་མཚན་གང་ཡིན་ནམ་ཞེས་དྲིས་ན། དེ་ནི་ཧི་ཋ་ལིར་དམག་འཁྲུག་ལ་དགའ་བའི་རྐྱེན་གྱིས་རེད་ཅེས་ལན་བཏབ་ན། དྲིས་ལན་དེ་ནི་དོན་དངོས་ཤིག་ཡིན་པར་མ་ཟད་བདེན་པ་ཡང་རེད། འོན་ཀྱང་། དོན་དེས་གསལ་བཤད་གང་ཡང་བྱེད་ཐུབ་པ་མ་རེད།
ལོ་རྒྱུས་རིག་པ་བ་ཞིག་ཡིན་པ་ནས་བཟུང་ཅིའི་ཕྱིར་ཞེས་པའི་དྲི་བ་མཐའ་མེད་པར་འདོན་དགོས་པར་མ་ཟད། ལོ་རྒྱུས་ཞིབ་འཇུག་ཅེས་པ་ཡང་དོན་ལ་ལོ་རྒྱུས་ལས་བྱུང་བའི་དོན་དངོས་ཐམས་ཅད་ཀྱི་རྒྱུ་འབྲས་ཀྱི་འབྲེལ་བ་ལ་ཞིབ་འཇུག་བྱེད་པའི་ལས་ལ་གོ་དགོས་ཀྱི་ཡོད། དེ་མིན་རྒྱལ་བོ་གང་ཞིག་ནི་དུས་ནམ་ཞིག་ལ་བྱུང་བ་དང་། དེ་ལོ་དུ་ཙམ་ལ་བཞུགས་པ་དང་། དེ་ལ་བཙུན་མོ་དང་བུ་དུ་ཡོད་ཙམ་ལས་མ་བཤད་པ་ཡིན་ན། དེ་ལ་སྙིང་བོ་ཅི་ཡང་མེད་ཅིང་། འདི་དག་ནི་ལོ་རྒྱུས་ཀྱི་རྩ་བའི་སྒྲོམ་གཞི་འགའ་ཞིག་ལས་ལོ་རྒྱུས་མ་ཡིན། དེ་ཡང་དཔེར་ན། སྤྱི་ལོ་༡༩༡༧ལོར་ཨུ་རུ་སིར་གསར་བརྗེ་འབྱུང་དགོས་དོན་ཅི་ཡིན་ནམ། གསར་བརྗེ་གང་དེར་མཇུག་འབྲས་དེ་ལྟ་བུ་ཞིག་འབྱུང་དོན་ཅི་ཡིན་སོགས་ཀྱི་རྒྱུ་རྐྱེན་སོགས་ལ་ཞིབ་འཇུག་བྱས་ན་ད་གཟོད་ལོ་རྒྱུས་ཡིན་ནོ།། སྤྱིར་ལོ་རྒྱུས་ཀྱི་རྒྱུ་རྐྱེན་གླེང་བའི་སྐབས་སུ་ཁ་ཅིག་གིས་ལོ་རྒྱུས་ཀྱི་འགྲེལ་བ་དང་ལོ་རྒྱུས་ཀྱི་གསལ་བཤད་ཤིན་ཏུ་གལ་ཆེ་ཞེས་གླེང་ཞིང་། དེ་ལ་ཡང་རིགས་གཉིས་ཏེ། ལོ་རྒྱུས་ཀྱི་དོན་དངོས་གང་ཞིག་གླེང་བ་ལ་དོན་དངོས་དེ་ཅིའི་ཕྱིར་བྱུང་བ་དང་ཇི་ལྟར་བྱུང་བ་བཅས་གཉིས་ཡོད་པ་ཡིན།
སྤྱིར་ལོ་རྒྱུས་ཁྲོད་ཀྱི་འགྱུར་ལྡོག་གང་ཞིག་ཡིན་ན་ཡང་དེ་ལ་ཐོག་མར་རྒྱུ་རྐྱེན་ལ་འགྱུར་ལྡོག་བྱུང་བ་སྔོན་དུ་འགྲོ་དགོས་པ་ལས། དེ་མིན་ངོ་བོ་གཞན་གྱི་སྟེང་ནས་གང་དེར་འགྱུར་ལྡོག་འབྱུང་མི་སྲིད། དེ་བས་ལོ་རྒྱུས་རིག་པ་བ་ཞིག་ཡིན་པ་ནས་བཟུང་བཟློག་མེད་རང་བཞིན་དང་བཟློག་ཐབས་མེད་པ། གཡོལ་ཐབས་མེད་པ་སོགས་ཀྱི་ཐ་སྙད་དག་ཅི་ཐུབ་ཀྱིས་བཀོལ་མི་དགོས་པ་ཞིག་གནང་དགོས།
དེ་ཡང་འདི་དག་ལས་ཉེ་རབས་སུ་ཤུགས་ཆེ་ཤོས་ནི་གློ་བུར་བའི་རང་བཞིན་ཞེས་པ་འདི་ཡིན་ཞིང་། གང་དེའི་བསྟན་དོན་ནི་དཔེར་ན། ནཱ་ཕོ་ལོན་དང་ཇིང་གིར་རྒྱལ་བོ་སོགས་ལོ་རྒྱུས་ཁྲོད་ཀྱི་མི་སྣ་སྐོར་ཞིག་རང་བྱུང་གི་གནོད་འཚེའི་དབང་གིས་རྐྱེན་ལམ་དུ་ཤོར་ཡོད་ཅིང་། དེ་དག་འདས་པ་ལ་བརྟེན་ནས་གློ་བུར་དུ་དམག་དོན་དང་ཆབ་སྲིད་འཐོར་ཞིག་ཏུ་ཕྱིན་པས། ལོ་རྒྱུས་ཀྱི་ཁ་ཕྱོགས་ཀྱང་གློ་བུར་དུ་འགྱུར་ལྡོག་བྱུང་བའི་སྐོར་འདི་དག་ལ་གོ་བཞིན་ཡོད། འོན་ཀྱང་། དོན་རྐྱེན་འདི་དག་ནི་སྔར་འདས་ཀྱི་དོན་དག་རེ་འགའ་ཡིན་མོད། དེ་དག་ནི་མི་རིགས་གང་ཞིག་གི་རིག་གནས་དང་གོམས་སྲོལ། ཆོས་ལུགས། ཀུན་སྤྱོད་སོགས་དང་འབྲལ་ཐབས་མེད་པའི་འགྱུར་ལྡོག་ཅི་ཡང་མིན་སྟབས། གང་དེས་བསྐྱེད་པའི་ཤུགས་རྐྱེན་ཡང་ཤིན་ཏུ་ཆུང་ཞིང་། ཞིབ་འཇུག་གི་རིན་ཐང་ཡང་མེད་པས་དེ་དག་ནི་དོན་ལ་ལོ་རྒྱུས་ཀྱི་དོན་དངོས་སུ་མི་གཏོགས་སོ།།
ལོ་རྒྱུས་ཀྱི་རྒྱུ་རྐྱེན་ཞེས་པ་ཡང་མཐའ་གཅིག་ཏུ་འདི་ཡིན་ཞེས་པ་དང་ལོ་རྒྱུས་རིག་པ་བ་ཐམས་ཅད་ལ་ཡང་ཐུན་མོང་གི་འདོད་ཚུལ་ཞིག་ཡོད་མི་སྲིད། དེ་ཡང་དཔེར་ན། ཉིན་ཞིག་བློ་བཟང་གིས་ཆང་བཏུང་ནས་བཟི་སྟེ་རླངས་འཁོར་སྐོར་ནས་སྲང་ལམ་ཞིག་ཏུ་རྒྱུགས་ཡོང་ཞིང་། སྐབས་དེར་ཚེ་རིང་ལ་དུ་བ་ཆད་པས་ལམ་གྱི་ཕ་རོལ་ཏུ་དུ་བ་ཉོ་རུ་འགྲོ་བཞིན་པ་དང་འཕྲད་པས། དེར་རླངས་འཁོར་དོན་རྐྱེན་བྱུང་ནས་ཚེ་རིང་རྐྱེན་ལམ་དུ་འདས་སོང་། དོན་རྐྱེན་འདིའི་རྒྱུ་རྐྱེན་ལ་བསམ་བློ་གཏོང་སྐབས་མི་རེ་རེ་ལ་ལྟ་ཚུལ་རེ་ཡོད་སྲིད་པ་ཡིན། ཁ་ཅིག་གིས་ཚེ་རིང་དུ་བ་ལ་དགའ་བའི་རྐྱེན་གྱིས་རེད་ཅེས་བཤད་སྲིད་ལ། ཁ་ཅིག་གིས་བློ་བཟང་གིས་ཆང་བཏུང་དྲགས་པས་རེད་ཅེས་བཤད་སྲིད། ཡང་ཁ་ཅིག་གིས་འགྲིམ་འགྲུལ་བདེ་འཇགས་ལས་ཁུངས་ཀྱིས་ནན་ཏན་མ་བྱས་པའི་རྐྱེན་གྱིས་རེད་ཅེས་སོགས་མང་དུ་བཤད་སྲིད། རྒྱུ་མཚན་དེ་བཞིན་ལོ་རྒྱུས་ཀྱི་དོན་དངོས་གང་ཞིག་ཡིན་ཡང་དེའི་རྒྱུ་རྐྱེན་གླེང་བའི་སྐབས་སུ་མཐའ་གཅིག་ཏུ་འདི་ཡིན་ཞེས་སྤྱིའི་ཐུན་མོང་གི་ལྟ་ཚུལ་ཞིག་ཡོད་མི་སྲིད་པས། ལོ་རྒྱུས་ཀྱི་དོན་དངོས་གང་ཞིག་ལ་ཞིབ་འཇུག་བྱེད་པའི་སྐབས་སུ་གང་དེའི་རྒྱུ་རྐྱེན་ནི་ལོ་རྒྱུས་རིག་པ་བའམ་ལོ་རྒྱུས་ཞིབ་འཇུག་རང་གི་བསམ་བློའི་ནུས་སྟོབས་ལ་བརྟེན་ནས་འབྱུང་བཞིན་ཡོད།
དེར་བརྟེན་ལོ་རྒྱུས་ཞིབ་འཇུག་ནི་དོན་ལ་ལོ་རྒྱུས་ཀྱི་རྒྱུ་རྐྱེན་ལ་ཞིབ་འཇུག་བྱེད་པའི་གོ་རིམ་ཞིག་ཡིན་ཞིང་། ལོ་རྒྱུས་རིག་པ་བ་ཞིག་ཡིན་པ་ནས་བཟུང་དུས་རྒྱུན་དུ་རང་གིས་རང་ལ་ཅིའི་ཕྱིར་ཞེས་པའི་དྲི་བ་འདྲི་དགོས་ཀྱི་ཡོད།
གཞན་དུ་ལོ་རྒྱུས་ནི་ཚན་རིག་ཅིག་ཡིན་ཞེས་བཤད་ན་ཆོག་ཅིང་། དེ་ཡང་ཞིབ་འཇུག་བྱེད་ཐབས་ཀྱི་ངོས་ནས་ཚན་རིག་གི་ཁྱད་ཆོས་མངོན་པར་གསལ་ནས་ཡོད། འོན་ཀྱང་། ལོ་རྒྱུས་ནི་མ་འོངས་པའི་ལམ་སྟོན་ཙམ་ལས་མ་འོངས་པ་རྟོགས་ཐབས་ཀྱི་རིག་པ་ཞིག་ཏུ་འདོད་མི་རུང་། དཔེར་ན། སློབ་གྲྭ་ཞིག་ཏུ་ནད་ཡམས་ཤིག་བྱུང་བའི་དབང་དུ་བཏང་ན། ལོ་རྒྱུས་རིག་པ་བས་ནད་ཡམས་འདིར་འཛེམ་དོགས་མ་བྱས་ན་སློབ་གྲྭའི་སློབ་མ་ག་གེ་མོར་ནད་ཡམས་འགོས་སྲིད་ཅེས་བཤད་ཐུབ་པ་ཙམ་ལས། སློབ་གྲྭའི་ནང་གི་བཀྲ་ཤིས་དང་བསོད་ནམས་ལ་ནད་ཡམས་འགོས་ངེས་ཞེས་བྱེ་བྲག་གི་གསལ་བཤད་བྱེད་མི་ནུས། དེ་བས་ལོ་རྒྱུས་རིག་པ་ནི་མ་འོངས་པ་རྟོགས་ཐུབ་པའི་ལུང་བསྟན་ཞིག་ཏུ་དུས་དང་རྣམ་པ་ཀུན་ཏུ་འདོད་མི་རུང་།
དེ་ནས་ལོ་རྒྱུས་ཞིབ་འཇུག་དང་ལོ་རྒྱུས་བརྩམས་ཆོས་འབྲི་བའི་སྐབས་སུ་སྤྱིར་མི་རིགས་ཤིག་གི་ཀུན་སྤྱོད་ཀྱི་ལྟ་བས་ཤུགས་རྐྱེན་ཐེབས་ཚུལ་དང་། དེ་ལ་བརྟེན་ནས་གནས་བབ་གང་ཞིག་བྱུང་བ་སོགས་གླེང་དགོས་ཀྱི་ཡོད་མོད། མི་སྒེར་གྱི་ཀུན་སྤྱོད་ལ་ངན་མཚང་འབྲུ་བ་ནི་ལོ་རྒྱུས་རིག་པ་བའི་ལས་སུ་བྱ་བ་ཞིག་མ་ཡིན། དཔེར་ན། སུ་ཏཱ་ལིན་རང་ཉིད་ཀྱི་ཆུང་མ་གཉིས་པར་བྱམས་བརྩེ་དང་བརྩི་བཀུར་ཡོད་མེད་དང་། རྒྱལ་མོ་ཨེ་ལགས་རྫ་བྷེ་མཛེས་དང་མི་མཛེས། རྒྱལ་བོ་འུ་དམ་བཙན་ལ་རྭ་ཡོད་མེད་སོགས་ནི་ལོ་རྒྱུས་ཀྱི་གླེང་བྱ་མ་ཡིན་ལ། ལོ་རྒྱུས་ཀྱི་སྐབས་སུ་དེ་དག་གླེང་བ་ལ་དགོས་པ་ཅི་ཡང་མེད། དེ་ལས་ལོ་རྒྱུས་ཀྱི་སྐབས་སུ་མི་དེ་དག་གིས་བྱ་བ་གང་བྱས་དང་། བྱ་བ་དེ་བྱས་པས་ཤུགས་རྐྱེན་གང་ཞིག་བསྐྲུན་ཡོད་པ། དེ་དག་གི་རྒྱུ་རྐྱེན་དང་འབྲས་བུ་སོགས་གླེང་བ་ཐུབ་ན་རབ་དང་མཆོག་ཡིན་ནོ།།
ཞེས་པ་འདི་ནི་དབྱིན་ཇིའི་མཁས་དབང་ཨེ་ཆི་ཁའར་ལགས་ཀྱིས་བརྩམས་པའི་ལོ་རྒྱུས་ནི་ཅི་ཞིག་ཡིན་ནམ་ཞེས་པའི་གླེགས་བམ་གང་དེ་བཀླགས་ཤིང་། གང་དེ་རང་རེའི་ལོ་རྒྱུས་རིག་པ་དོན་དུ་གཉེར་བཞིན་པའི་སློབ་གཉེར་བ་དག་གིས་ངེས་པར་དུ་མཁྱེན་དགོས་པ་ཞིག་ཏུ་སྙམ་ནས། དེའི་ནང་དོན་མདོར་བསྡུས་ཤིག་འདིར་བཀོད་པ་དང་། ཞོར་དུ་དེབ་མཆོག་འདི་འོས་སྦྱོར་བྱས་པ་ཡང་ཡིན་པས། རྒྱས་པར་ཤེས་འདོད་ན་བསྟན་བཅོས་གང་དེ་བཀླགས་པས་ཤེས་པར་འགྱུར་རོ་ཞེས་གནམ་ལྷུན་གྱིས་སྦྱར་བ་རྫོགས་སོ།།
No comments:
Post a Comment