ཋཱ་ཀུར།
༡
བདག་ནི་ཁྱོད་ཀྱིས་ལྷག་མེད་བྱས།།
འདི་ཀོ་ཁྱོད་ཀྱི་མཛད་པ་ཉིད།།
སྣོད་ནི་སྟོང་བར་བྱས་ནས་སླར།།
ཚེ་སྲོག་གསར་བས་དགང་བར་བགྱིད།།
འཕྲེད་གླིང་ཆུང་ཆུང་བཟུང་ནས་ནི།།
རི་དང་གཙང་བོའི་རགས་ལ་འཁོར།།
སྙན་འཇེབས་རྟག་བརྟན་རོལ་དབྱངས་ནི།།
དབུགས་ཀྱི་ཟོལ་གྱིས་སྦུ་གུར་འདྲེན།།
ཁྱོད་ཀྱི་འཆི་མེད་རེག་པ་ནི།།
ཐོབ་ནས་བདག་ནི་མཚམས་ལས་འགོངས།།
སྒྲས་ནི་ཕུལ་བྱུང་དགའ་བ་དེ།
མྱངས་ནས་ཕྱི་ལ་ལུད་པ་མཐོང་།།
སྦྱིན་པ་རྟག་ཏུ་གནང་མོད་ཀྱང་།།
སྣོད་ནི་ད་དུང་སྟོང་བར་གདའ།།
ཉིན་མཚན་ཀུན་ཏུ་ཁྱོད་སྤྲོད་ཀྱང་།།
བདག་ལ་ཐོབ་པ་ཁྱོར་བ་གང་།།
སྦྱིན་པ་ཉིན་མཚན་ཀུན་སྦྱིན་ཡང་།།
བདག་ལ་ཁྱོར་བ་གང་ཙམ་རེག།
དུས་ནི་ཀུན་ཏུ་སྦྱིན་བྱེད་ཀྱང་།།
སྣོད་ལ་ད་དུང་སྟོང་ཆ་བདོག།
༢
ཁྱོད་ཀྱིས་གླུ་ལེན་བསྐུལ་ཙ་ན།།
བདག་ཡིད་སྙེམས་པས་ཁེངས་པར་གྱུར།།
མིག་ཟུང་ཟམ་མེ་ཟིམ་མེའི་ངང་།།
ཁྱོད་ཞལ་འཛུམ་མེད་ལྟ་བའི་ཚེ།།
སྐྱུར་དང་སྡུག་ཏུ་འཁྱིལ་བའི་སེམས།།
བདུད་རྩིའི་རང་བཞིན་གླུ་རུ་བཞུས།།
བདག་གི་སྒྲུབ་དང་མཆོད་དོ་ཅོག།
བྱ་བཞིན་སྤུ་ལངས་འཕུར་མཆོངས་བྱེད།།
བདག་གླུ་གསན་ནས་ཚིམས་པ་ཤེས།།
བདག་གཞས་སྙན་པར་ཚོར་བ་རིག།
གླུ་ལེན་སྟོབས་དག་ཉིད་ཀྱིས་ནི།།
ཁྱོད་དྲུང་བརྙེས་པའང་བདག་གིས་རྟོགས།།
སེམས་ནས་ཇི་སྲིད་འགྲོ་མི་ཤེས།།
ཞབས་དག་གླུ་ཡི་སྟོབས་ཀྱིས་རེག།
བརྒྱལ་འགྱུར་དབྱངས་ཀྱིས་བདག་བཟི་སྟེ།།
རང་གི་རྗེ་ལ་གྲོགས་ཞེས་བོས།།
གསལ་བཤད།
མུར་ལཱི་དྡྷར། ཤྲཱི་བཱསྟབ་ཤེ་ཁ་རའི་ཧིན་འགྱུར་གཞིར་བཞག་སྟེ་བསྒྱུར་བའོ།།
སྙིམ་པའི་གླུ་ཞེས་པ་འདི་བདག་ཉིད་ཀྱིས་བསམ་གཞིགས་དང་རྟོགས་ཞིབ་རྒྱུན་རིང་བྱས་མཐར་བསྒྱུར་ཏེ་བཏགས་ཤིང་། ཟམ་གདོང་བླ་མ་དང་གར་ཤ་དངོས་གྲུབ་གཉིས་ཀའི་ཐུགས་་ཀྱི་དགུ་ཡུལ་ལའང་མ་ཚུད་པའི་བརྡ་ཆད་དག་མོ་འགྱུར་ཇི་བཞིན་པ་ཞིག་ཏུ་བདག་འདོད་ཡོད།
འགྱུར་ཡག་པོ་ཡོད་མེད་ངས་བཤད་མི་ཤེས། འོན་ཀྱང་བོད་ཚིག་བསྡུས་ཤིང་ལྗིད་པ་དང་ཚིག་གི་ཚགས་ཧ་ཅང་དམ་པས་སྨྲ་མི་ཤེས་པའི་ཁྱད་ཆོས་སམ་བྲོ་བ་ཞིག་སྟེར་གི ངོ་མ་འདི་ལྟར་རྒྱུན་བསྲིང་ན་གྲུབ་འབྲས་ནི་ཚོད་ཀྱིས་ཐུབ་པ་ཞིག་རེད། བུ་བཟང་པོ། མུ་མཐུད་ནས་རྩོལ་བ་གྱིས་ཤིག
ReplyDeleteབཟོད་རྒྱམ་པས།
བཟོད་རྒྱམ་ཕེབས་པར་དགའ་ནས་ཡོད།རྗེས་ལ
ReplyDelete