ཉེ་སྒྱུར་ཉི་ཤུ་པ།

གར་ཞ་བ་དངོས་གྲུབ་ཀྱིས་མཛད།


རྒྱ་གར་སྐད་དུ། བིཾཤཏིཨུཔསརྒ ནཱམ།
བོད་སྐད་དུ། ཉེ་སྒྱུར་ཉི་ཤུ་པ་ཞེས་བྱ་བ།
ངག་གི་དབང་ཕྱུག་འཇམ་པའི་དབྱངས་ལ་ཕྱག་འཚལ་ལོ།།
གང་ཞིག་ཕན་བདེ་འབྱུང་བའི་གནས།།
དཀོན་མཆོག་རིན་ཆེན་ལ་ཕྱག་འཚལ།།
སྒྲ་དབྱངས་རྒྱ་མཚོ་སྨྲ་བའི་ལྷ།།
མགོན་པོ་འཇམ་པའི་དབྱངས་ལ་འདུད།།
དབྱངས་གསལ་རྗོད་བྱེད་མིང་གཞིའི་སྒྲ།།
སྔོན་གསུང་རྟག་ཏུ་ཞི་བ་མཆོད།།
བརྡ་དག་ལེགས་སྦྱོར་མཁས་རྣམས་དང༌།།
ལོ་ཙཱ་བླ་མར་ཕྱག་བཙལ་ནས།།
བྱིངས་རྣམས་ཀུན་གྱི་དོན་སྒྱུར་བའི།།
སྔོན་རྗེས་བར་གསུམ་འཇུག་པའི་སྒྲ།།
ཉེ་སྒྱུར་ཉི་ཤུའི་སྦྱོར་བ་རྣམས།།
རིམ་པ་བཞིན་དུ་བཤད་པར་བྱ།།
དེ་ཡང་པྲ་དང་པ་རཱ་སམ྄།།
ཨ་པི་ཨ་ནུ་ཨཔ་དང་ཨུཔ།།
ངེས་པའི་ནི་དང་ཨ་ཏི་ཨཱ།།
པ་རི་པྲ་ཏི་ལེགས་པའི་སུ།།
འབྲལ་བའི་བི་དང་ཨ་བྷི་དང༌།།
དུར྄་ནི་ངན་དང་ཨུཏ྄་ནི་མཆོག།
ནིར྄་མེད་ལྷག་པའི་ཨ་དྷི་དང༌།།
དམན་པའི་ཨབ་སོགས་ཉེ་སྒྱུར་རོ།།
པྲ་ནི་རབ་དང་རབ་ཏུ་དང༌།།
དེ་བཞིན་ཤིན་ཏུ་ཀུན་ཏུ་མཆོག།
སླར་ཡང་ཉེ་ཚེའི་ཉེ་སྒྱུར་སྒྲ།།
འཇུག་པ་བརྒྱད་དུ་ཤེས་པར་བྱ།།
པ་རཱ་ཞེས་པའི་མི་ཟད་སྒྲ།།
གཞན་དང་མཆོག་ཏུ་ཐ་སྙད་ཀྱང༌།།
དོན་ནི་ལྡོག་པའམ་ཁྱད་པར་ལ།།
འཇུག་ཅེས་མཁས་པ་ཀུན་གྱིས་བཞེད།།
སཾ་ནི་ཡང་དག་ཡང་དག་པ།།
ཀུན་དང་ཀུན་ཏུ་ཀུན་ནས་དང༌།།
རབ་རྫོགས་འདུ་འདུས་ཡོངས་སུ་དང༌།།
སླར་ཡང་ལེགས་པ་ཉེ་བའོ།།
ཨ་པི་འང་ཡང་དག་གི་སྒྲ།།༡
ཉེ་སྒྱུར་ཡིན་གྱི་རྒྱན་སྡུད་མིན།།
དོན་ནི་ངེས་པའི་བྱཡང་བྱསྒྲ་ལ།།
འཇུག་ཀྱང་ཁྱབ་ཆེ་མ་ཡིན་ནོ།།
ཨ་ནུ་རྗེས་དང་རྗེས་སུ་དག།།
གནས་དང་དུས་ཀྱི་སྒྲ་ལ་འཇུག།
དེ་བཞིན་མཐུན་དང་མཐུན་པ་ཡང༌།།
འདྲ་མཚུངས་དག་གི་དོན་དུ་སྦྱར།།
ཨཔ྄༢་ནི་ངན་པ་དམན་པ་དང༌།།
ཟུར་དང་ཉམས་པ་བྲལ་བ་དང༌།།
དེ་བཞིན་རབ་སོགས་ཉེ་སྒྱུར་གྱིས།།
དམན་པའི་ཐ་སྙད་ཁོ་ན་འདྲེན།།
ཨུཔ་ནི་ཉེ་དང་ཉེ་བར་དང༌།།
བསྙེན་པ་དང་ནི་ཆུང་བ་དང༌།།
གཞོན་པ་ལ་སོགས་ཉེ་བའི་དོན།།
ཡོངས་སུ་རྫོགས་པ་ཉིད་དུ་འགྱུར།།
ནི་ནི་ངེས་དང་ངེས་པ་དང༌།།
ཀུན་དང་བྲལ་བ་རྣམས་ལ་འཇུག།
སྐབས་འགར་ནིར་དང་སྒྲ་འདྲ་ཡང༌།།
དོན་ལ་ཁྱད་ཡོད་ཞིབ་ཏུ་འབད།།
ཨ་ཏི་རབ་དང་ཕུལ་བྱུང་དང༌།།
ཐལ་བ་དང་ནི་འདས་པ་དང༌།།
དེ་བཞིན་ཤིན་ཏུ་ལ་སོགས་སྒྲ།།
ཕལ་ཆེར་ཕུལ་བྱུང་རྗོད་པར་ཤེས།།
ཨཱ་ནི་ཀུན་ནས་ཀུན་ཏུ་ཀུན།།
ཡོངས་སུ་དང་ནི་ཅང་དང་གང༌།།
ལེགས་པ་ལ་སོགས་ཉེ་སྒྱུར་གྱི།།
འཇུག་ཚུལ་གཞི་ལས་གཞན་དུ་ཤེས།།
པ་རི་ཡང་དག་ཡང་དག་པ།།
ཀུན་དང་ཀུན་དུ་ཀུན་ནས་དང༌།།
དེ་བཞིན་ཡོངས་དང་ཡོངས་སུ་དང༌།།
སླར་དང་རབ་སོགས་འཇུག་པ་དགུ།།
པྲ་ཏི་སོ་སོ་སོ་སོར་དང༌།།
རེ་རེ་དང་ནི་ལེགས་པའི་རབ།།
དེ་བཞིན་སླར་དང་ཉིང་སོགས་དྲུག།
ཉེ་སྒྱུར་སྒྲ་རུ་ཡིན་པར་ཤེས།།
སུ༣་ནི་ལེགས་དང་ལེགས་པ་དང༌།།
རབ་དང་རབ་ཏུ་དང་ནི་མཆོག།
དེ་བཞིན་བཟང་སོགས་འཇུག་པ་དྲུག།
དོན་གཅིག་མིང་གི་རྣམ་གྲངས་ཡིན།།
བི་ནི་རྣམ་པ་བྲལ་བ་དང༌།།
ལོག་པ་དང་ནི་ངན་རབ་ཁྱབ།།
དེ་བཞིན་སླར་དང་ཁྱད་པར་བླ།།
ཀུན་ཏུ་མེད་དང་ཤིན་ཏུ་ལྷག།
ཨ་བྷི་མངོན་དང་མངོན་པར་དང༌།།
མངོན་པ་ལ་སོགས་ཉེ་སྒྱུར་གྱི།།
སྒྲ་འཇུག་འདྲ་ཡང་དོན་གྱི་ཁྱད།།
ཤིན་ཏུ་མེད་ཀྱང་ལེགས་པར་འབུངས།།
དུར྄་རམ་དུས྄་ནི་སྒྲ་སྦྱོར་གྱི།།
ཁྱད་ཡིན་སྒྲ་མེད་རྣམས་ལ་དུས྄།།
འགྱུར་ནི་ངན་དང་དཀའ་བ་གཉིས།།
རིག་གཞུང་དག་ན་ཁྱབ་པར་འཇུག།
ཨུཏ྄་ནི་རབ་དང་མཆོག་དང་ནི།།
མཐོ་བ་དང་ནི་མཐོན་པོ་དང༌།།
སྟེང་དང་ཀུན་སོགས་ཉེ་སྒྱུར་གྱི།།་
ཕལ་ཆེར་ཚིག་གི་ཁྱད་ཆོས་སྟོན།།
ནིར྄་དང་ནིས྄་ཀྱི་ཉེ་སྒྱུར་ནི།།
དོན་གཅིག་སྒྲ་སྦྱོར་དག་གི་ཁྱད།།
བརྗོད་བྱ་མེད་དང་ངེས་པ་ལ།།
འཇུག་ཅིང་སྒྲ་མེད་རྣམས་ལ་ནིས྄།།
ཨ་དྷི་གཙོ་བོའི་ལྷག་པ་དང༌།།
མང་བ་དང་ནི་མཐོ་བའི་ལྷག།
ཉེ་སྒྱུར་རྣམ་པ་འདི་གཉིས་ཀྱི།།
དོན་ལ་ཁྱད་ཆེ་ཡོད་མ་ཡིན།།
ཨབ་ནི་ངན་པ་དམན་པ་དང༌།།
ཀུན་དང་ངེས་པ་རྣམ་པར་དང༌།།
དེ་བཞིན་ཟུར་དང་ལེགས་པ་དང༌།།
རབ་ཏུ་ཡོངས་སུ་འཇུག་པ་དགུ།།
དེ་ལྟར་འཇུག་པར་བྱ་བ་ཡི།།
ཉེ་སྒྱུར་ཉི་ཤུའི་ཐ་སྙད་རྣམས།།
ལེགས་སྦྱར་སྦྱོར་བ་ཡིན་མོད་ཀྱང༌།།
བོད་གཞུང་དག་ལའང་ཤིན་ཏུ་རིགས།།
ཅི་སྟེ་བོད་ཀྱི་མིང་ཚིག་དང༌།།
རྣམ་དབྱེ་བྱ་བྱེད་ཁྱད་ཆོས་སོགས།།
ལེགས་སྦྱར་གཞུང་གི་བརྡ་སྤྲོད་དང༌།།
སྦྱོར་བ་ཤིན་ཏུ་མཚུངས་པ་ཡིན།།
དེ་ཕྱིར་བོད་གཞུང་ཤེས་འདོད་རྣམས།།
ཉེ་སྒྱུར་དོན་ལ་འཇུག་པ་གཅེས།།
མ་འཇུག་ཐུ་མིའི་བརྡ་སྤྲོད་ལ།།
དཔྱིས་ཕྱིན་ངེས་པ་ག་ལ་ཡོད།།
དེ་ཕྱིར་བློ་གསར་གཞོན་ནུའི་ཚོགས།།
སྒྲ་སྐད་གཙུག་ལག༤་བདག་གྱིས་ཤིག།
ལུང་དུ་སྟོན་པའི་གཞུང་ལས་སཾབྷོཊའི་བྱཀརཎའི་སྐབས་ཏེ་གཉིས་པའོ།།
ལུང་དུ་སྟོན་པ་ཉེ་སྒྱུར་ཉི་ཤུ་པ་ཞེས་བྱ་བ་རྫོགས་སོ།།
མཆན།
༡། ཨ་པི་ཞེས་པའི་ཉེ་བར་བསྒྱུར་བ་ནི་དོན་དགུ་པོ་དེ་རྣམས་ལ་འཇུག་གོ། འབྱུང་བ་ལ་སླར་འབྱུང་བ་དང༌། འགྲུབ་པ་ལ་སླར་འགྲུབ་པ་དང༌། སྙོམས་པ་ལ་སླར་སྙོམས་པ་དང༌། བསྡུས་པ་ལ་སླར་བསྡུས་པ་དང༌། སྨོད་པ་ལ་སླར་སྨོད་པ་དང༌། ཤིས་པ་ལ་སླར་ཤིས་པ་དང༌། གཤིག་པ་ལ་སླར་གཤིག་པ་དང༌། བརྒྱན་པ་ལ་སླར་བརྒྱན་པ་དང་འདྲི་བ་ལ་སླར་འདྲི་བའོ།། ཙནདྲ་གོ་མིའི་འགྲེལ་པ། ལོ་ཙཱ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས་བསྒྱུར་པའོ།།
TIBETAN-TRIPITIKA, Bstan-Hgyur, Sgra-Rig-pa, vol 140, 123-129 PP.
༢། ཨཔ་ཞེས་བྱ་བའི་ཉེ་བའི་བསྒྱུར་བ་ནི་དོན་བདུན་པོ་དེ་རྣམས་ལ་འཇུག་གོ། ཤེས་པ་ལ་ཕུལ་དུ་ཤེས་པ་དང༌། དམིགས་པ་ལ་ཕུལ་དུ་དམིགས་པ་དང༌། བྱང་བ་ལ་ཕུལ་དུ་བྱང་བ་དང༌། རྙེད་པ་ལ་ཕུལ་དུ་རྙེད་པ་དང༌། ཁྱབ་པ་ལ་ཕུལ་དུ་ཁྱབ་པ་དང༌། དགའ་བ་ལ་ཕུལ་དུ་དགའ་བ་དང་གྲོལ་བ་ལ་ཕུལ་དུ་གྲོལ་བའོ།།
T.T. Sgra-Rigpa, vol. 140,123-129 PP.
༣། སུ་ཞེས་པའི་ཉེ་བར་བསྒྱུར་བ་ནི་དོན་ལྔ་པོ་དེ་རྣམས་ལ་འཇུག་གོ། མཆོད་པ་ལ་བདེ་བར་མེས་མཆོད་པ་དང༌། གདུང་བ་ལ་བདེ་བར་གདུང་བ་དང༌། རྗེས་སུ་འདོད་པ་ལ་བདེ་བར་རྗེས་སུ་འདོད་པ་དང༌། ཚོགས་པ་ལ་བདེ་བར་ཚོགས་པ་དང་དཀའ་བ་སྤྱོད་པ་ལ་བདེ་བར་དཀའ་སྤྱོད་པའོ།།
T.T. Sgra-Rigpa, vol. 140,123-129 PP.
༤། གཙུག་ལག་བཞི་ནི། (༡) སྒྲ་སྐད་ཀྱི་གཙུག་ལག (༢) ཡི་གེའི་གཙུག་ལག (༣) རྣམ་པར་རིག་བྱེད་ཀྱི་གཙུག་ལག (༤)འཇིག་རྟེན་པའི་གཙུག་ལག་དང་བཞིའོ།།

འདི་ཡང་ཁ་བ་རི་བའི་སྐད་ཡིག་དབྱར་མཚོ་ལྟར་འཕེལ་རེར་གང་མིང་ཟླ་བ་གཞོན་ནུར་འབོད་པས་དྲང་སྲོང་ལྷུང་བ་རི་དྭགས་ཀྱི་ནགས་འདབས་ཀྱི་ཞི་འཚོ་དཔེ་མཛོད་ནས་གློག་ཀླད་དུ་གཏགས་ཏེ་རང་སྐད་ལ་དུང་བ་བླ་ལྷག་ཏུ་ཆེ་བ་གང་མང་གི་སེམས་ཀྱི་ཟས་བརྫངས་པའོ།།
༢༠༠༩།༢།༡༣ ལ།