ཀླུ་ཀུན་ཏུ་དགའ་བ་ཞེས་བྱ་བའི་ཟློས་གར་ཞེས་བྱ་བ་བཞུགས་སོ།།
ཟླ་བ་གཞོན་ནུས་ཞུ་སྒྲིག་བྱས།
༄༅།། རྒྱ་གར་སྐད་དུ། ནཱགཱནནྡནཱམནཱཊཀ བོད་སྐད་དུ། ཀླུ་ཀུན་ཏུ་དགའ་བ་ཞེས་བྱ་བའི་ཟློས་གར།
ཐམས་ཅད་མཁྱེན་པ་ལ་ཕྱག་འཚལ་ལོ།།
དགའ་མ་དགའ་བའི་ཟོལ་ལས་སྐྱེས་པའི་སྤུ་ལངས་དག་གིས་བསྒྲིབས་པའི་ལུས་འཛིན་ཅིང་།།
འཛུམ་དང་ལྡན་པས་རྒྱལ་བའི་བྱང་ཆུབ་དག་ལ་བཀོད་པ་མེ་ཏོག་སྙིམ་པ་ནི།།
གཤོག་རྩལ་རབ་བསྐྱོད་སྒྲ་སྒྲོགས་སྦྲང་རྩི་བྱེད་རྣམས་སྦྲང་རྩི་རེ་བས་བསྟེན་ཅིང་དེའི།།
རྐང་བས་བསྣུན་པས་ཁ་ཟུམ་ཚོགས་ཕྱེ་གེ་སར་གསར་པས་གྱུར་པ་ཁྱེད་ལ་སྲུངས།།
བསམ་གཏན་ཟོལ་དག་ཉེ་བར་བཟུང་ནས་སྐད་ཅིག་མིག་ཕྱེ་སུ་ལ་སེམས་པར་བྱེད།།
སྐྱོབ་པ་ཡིན་ཡང་ལུས་མེད་མདས་གཟིར་སྐྱེ་བོ་འདི་དག་སྲུང་བ་མིན་ལ་ལྟོས།།
སྙིང་རྗེར་ལྡན་པས་བརྫུས་ཏེ་ཁྱོད་ལས་གཞན་པའི་བརྩེ་མེད་སྐྱེས་བུ་ག་ལ་ཡོད།།
བདུད་མོ་རྣམས་ཀྱིས་བྱང་ཆུབ་ལ་འདི་ཕྲག་དོག་གིས་བརྗོད་རྒྱལ་་བས་ཁྱེད་ལ་སྲུངས།།
གཞན་ཡང་།
གཞུ་བཀང་འདོད་པ་དང་ནི་རྔ་གསང་བརྡུང་ཞིང་སྒྲ་སྒྲོགས་བདུད་ཀྱི་དཔའ་བོ་དང་།།
སྨིན་འཁྱོག་རབ་འདར་གླལ་འཛུམ་ལོགས་སུ་ལྟ་བ་མཐོ་རིས་བུ་མོའི་སྐྱེ་བོ་དང་།།
གྲུབ་པ་ཡན་ལག་མཆོག་བཏུད་རྣམས་དང་མཚར་བས་སྤུ་ལངས་ལུས་ཅན་ནོར་ལྷ་ཡིས།།
བྱང་ཆུབ་འཐོབ་ལ་བསམ་གཏན་གཡོ་མེད་ཅེས་བལྟས་ཐུབ་པའི་དབང་བོས་ཁྱེད་ལ་སྲུངས།།
༼དགའ་ལྡན་གྱི་མཐར༽
མཚན་མ་དང་བོ།
མདོ་འཛིན་པས། ཤིན་ཏུ་མང་བར་འགྱུར་བས་དགའ་བར་བྱས་ཏེ་མདོ་འཛིན་པའོ།།
༼འགྲིག་སོང་། འགྲིག་སོང་། ཤིན་ཏུ་རྒྱས་པར་མ་བྱེད་ཅིག༽
དེ་རིང་བདག་པོའི་དགའ་སྟོན་ལ་ཕྱོགས་སྣ་ཚོགས་ནས་འོངས་པ་དཔལ་ལྡན་དགའ་བའི་ལྷའི་ཞབས་ཀྱི་པདྨ་ཉེ་བར་བསྟེན་པའི་རྒྱལ་པོའི་ཚོགས་རྣམས་ཀྱིས་གུས་པ་དང་ལྡན་པར་བོས་ཏེ། བདག་ལ་སྨྲས་པ། ཇི་ལྟར་ཁོ་བོ་ཅག་གི་རྗེ་དཔལ་ལྡན་དགའ་བའི་ལྷས། སྔར་མེད་པའི་དངོས་པོའི་རྒྱན་རྣམ་པར་བཀོད་པ་རིག་པ་འཛིན་པའི་སྐྱེས་རབས་ལས་བརྩམས་པ། ཀླུ་ཀུན་ཏུ་དགའ་བ་ཞེས་བྱ་བའི་ཟློས་གར་མཛད་པ་ནི་ཁོ་བོ་ཅག་རྣམས་ཀྱི་ཉན་པ་པོའི་བརྒྱུད་པ་ལས་ཐོས་ཏེ། སྦྱོར་བ་དག་ནི་མ་མཐོང་ངོ་།། དེའི་ཕྱིར་རྒྱལ་པོ་དེ་ཉིད་ལ་གུས་པ་དང་། ཁོ་བོ་ཅག་ལ་རྗེས་སུ་གཟུང་བའི་བློས་སྦྱོར་བ་ཇི་ལྟ་བ་བཞིན་དུ་ཁྱོད་ཀྱིས་ཟློས་གར་དག་བྱོས་ཤིག་ཅེས་སོ།། དེའི་ཕྱིར་རེ་ཞིག་ཚོན་གྱི་བཀོད་པ་དག་བྱས་ནས་ཇི་ལྟར་མངོན་པར་འདོད་པ་བཞིན་ཡོངས་སུ་རྫོགས་པར་བྱའོ།། འདུས་པའི་སྐྱེ་བ་འདི་དག་གི་ཡིད་ནི་ཀུན་དུ་ཚིམ་པར་གྱུར་ཏེ་ཞེས་བྱ་བར་བདག་གིས་ངེས་ཏེ། གང་གི་ཕྱིར། དཔལ་ལྡན་དགའ་བ་སྙན་དངགས་མཁན་པོ་མཁས་ལ་འདུས་པ་འདི་དག་ཡོན་ཏན་འཛིན།། འཇིག་རྟེན་དུ་ནི་བྱང་ཆུབ་སེམས་དཔའི་སྤྱོད་པ་ཡིད་འཕྲོག་ཟློས་གར་བདག་ཅག་མཁས།། འདིར་ནི་དངོས་པོ་རེ་རེ་དག་ཀྱང་འདོད་པའི་འབྲས་བུ་འཐོབ་པའི་གནས་ཡིན་ན།། བདག་གི་སྐལ་བ་རྒྱས་པས་ཡོན་ཏན་ཀུན་གྱི་ཚོགས་འདུས་འདི་ལ་སྨོས་ཅི་དགོས།།
དེས་ན་རེ་ཞིག་ཁྱིམ་པ་མོ་བོས་ཏེ་གླུ་དག་ལ་གནས་པར་བྱའོ།། ༼ཡོངས་སུ་བགྲོད་ཅིང་ཡོལ་བ་ལ་མངོན་པར་ཕྱོགས་ཏེ་བལྟས་ནས་༽ འདི་ངེད་ཅག་གི་ཁྱིམ་མོ།། རེ་ཞིག་རབ་ཏུ་གཞུག་པར་བྱ། ༼རབ་ཏུ་ཞུགས་ནས༽འཕགས་མ། རེ་ཞིག་འདིར་ཤེག།
༼དེ་ནས་གར་མཁན་མ་ངུ་ཞིང་ཞུགས་སོ།།༽
མདོ་འཛིན་པས། ༼མཐོང་ནས༽འཕགས་མ། ཀླུ་ཀུན་ཏུ་དགའ་བ་ཞེས་བྱ་བའི་ཟློས་གར་བྱ་བ་ཡིན་ན་ཅིའི་དོན་དུ་རྒྱུ་མེད་པ་ཉིད་དུ་ངུ་བར་བྱེད།
གར་མཁན་མས། ཇོ་བོ་ཇི་ལྟར་མི་ངུ་སྟེ། གང་གི་ཕྱིར་རེ་ཞིག་ཡབ་ནི་ཡུམ་དང་འགྲོགས་ནས་རྒན་པོའི་དངོས་པོས་ཡིད་བྱུང་སྟེ། དེ་ནི་ཁྱོད་ཀྱིས་གཉེན་ཚན་གྱི་ཁུར་དག་འཛིན་པར་བཟོད་དོ་ཞེས་ཐུགས་ལ་བཞག་ནས་དཀའ་ཐུབ་ཀྱི་ནགས་སུ་གཤེགས་སོ།།
མདོ་འཛིན་པས། བདག་ཀྱང་ཡོངས་སུ་བཏང་ནས་ཇི་ལྟར་ཡབ་ཡུམ་ནགས་སུ་གཤེགས། ༼རྣམ་པར་བསམས་ནས༽དེ་ལ་ད་ནི་ཅི་ཞིག་རིགས་པར་འགྱུར། ཡང་ན་བདག་བླ་མའི་ཞབས་ཀྱི་རིམ་གྲོ་བྱེད་པའི་བདེ་བ་ཡོངས་སུ་བཏང་ནས་ཇི་ལྟར་ཁྱིམ་དུ་འདུག་པར་བྱེད།
ཇི་ལྟར་སྤྲིན་གྱི་བཞོན་པ་བཞིན།།དབང་ཕྱུག་རིམ་པས་འོངས་བཏང་སྟེ།།
ཕ་མའི་སྲི་ཞུ་བསྒྲུབ་པའི་ཕྱིར།། བདག་ཀྱང་ནགས་སུ་འགྲོ་བར་བྱ།།
༼སོང་བར་གྱུར་ཏེ་སྐབས་དབྱེ་བའོ།།༽
༼དེ་ནས་སྤྲིན་གྱི་བཞོན་པ་དང་། བི་དཱུ་ཥ་ཀ་དག་ཞུགས་ཏེ༽
འདྲེན་པས། ཆགས་པའི་གནས་ཞེས་བྱ་བར་བདག་གིས་རིག། འཇིག་ཅེས་བྱ་བར་བདག་གིས་མ་རྟོགས་མིན།། བྱ་དང་བྱ་མིན་རྣམ་པར་དཔྱད་རྣམས་ལ།། ཕྱིར་ཕྱོགས་གྱུར་པ་རས་ལ་སུས་མ་རིག། ཕ་མའི་སྲི་ཞུ་བྱེད་པ་བདག་གི་ནི།། ལས་ཚོ་དབང་བོའི་དབང་དུ་གྱུར་པ་འདི།། གལ་ཏེ་གུས་པས་འདི་ལྟར་ཉིད་གྱུར་ན།། དེ་ལྟར་སྨད་པར་འོས་ཀྱང་དགའ་བྱེད་འགྱུར།།
བི་དཱུ་ཥ་ཀས། ༼ཁྲོ་བ་དང་བཅས་པར༽ཀྱེ། གང་གི་ཚེ་གསོན་བཞིན་དུ་ཤི་བའི་རྒན་རྒོན་འདི་དག་འདི་ལྟར་ནགས་ན་འདུག་པ་ལ་འདི་སྙེད་ཀྱི་དུས་སུ་སྡུག་བསྔལ་ཉམས་སུ་མྱོང་ཡང་ཁྱོད་ནི་ཡིད་བྱུང་བར་མ་གྱུར་ཏོ།། དེས་ན་རབ་ཏུ་དང་བས་ད་དུང་ཡང་རེ་ཞིག་བླ་མའི་༼ཕ་མ་རང་༽ཞབས་ཀྱི་སྲི་ཞུ་ལ་ཆགས་པ་ལས་ཕྱིར་བཟློག་ལ་རྒྱལ་སྲིད་ཀྱི་བདེ་བ་ཉམས་སུ་མྱོང་བར་བྱོས་ཤིག
འདྲེན་པས། ཇི་ལྟར་ཡབ་ཀྱི་མདུན་དུ་སར་འདུག་མཛེས་པ་དེ་ལྟ་སེང་གེའི་ཁྲི་ལ་ཡོད་དམ་ཅི།། ཡབ་ཀྱི་ཞབས་དག་མཉེད་པ་ལས་བྱུང་བདེ་བ་དེ་ནི་རྒྱལ་སྲིད་དག་ལའང་ཡོད་དམ་ཅི།། བླ་མའི་ལྷག་མ་སྤྱད་པའི་དགའ་བ་གང་འདིས་ས་གསུམ་སྤྱད་པ་དག་ལ་ཡོད་དམ་ཅི།། བླ་མས་བཏང་བའི་རྒྱལ་སྲིད་ངེས་པར་གདུང་བྱེད་དག་སཏེ་དེས་ན་ཡོན་ཏན་ཅི་ཞིག་ཡོད།།
བི་དཱུ་ཥ་ཀས། ༼བདག་ཉིད་ཀྱིས་རྟོགས་པར༽ཨེ་མ་འདི་ནི་སྐྱེ་བ་བླ་མའི་སྲི་ཞུ་ལ་ཆགས་པ་ཞིག་གོ་སྙམ་དུ་བསམས་ནས། དེས་ན་འདི་ཡང་རེ་ཞིག་བརྗོད་པར་བྱའོ།། ༼ གསལ་བར༽ ཀྱེ་གྲོགས་པོ། ངེས་པར་རྒྱལ་སྲིད་ཀྱི་བདེ་བ་འབའ་ཞིག་གི་ཆེད་དུ་བདག་གིས་འདི་བརྗོད་པ་མ་ཡིན་ཏེ།། གཞན་ཡང་ཁྱོད་ལ་བྱ་བ་དག་ཡོད་པ་ཉིད་དོ།།
འདྲེན་པས། ༼འཛུམ་དང་བཅས་པས༽བྱ་བ་བདག་གིས་བྱས་པ་ཉིད་མ་ཡིན་ནམ་ལྟོས་ཤིག རིགས་པར་འོས་པའི་ལམ་ལ་བློན་པོ་རྣམས་སྦྱར་དམ་པ་རྣམས་ནི་བདེ་ལ་བཞག། དེ་བཞིན་གཉེན་གྱི་སྐྱེ་བོ་བདག་མཚུངས་ཉིད་བྱས་རྒྱལ་སྲིད་དག་ཀྱང་བསྲུང་བར་བྱས།། ཡིད་ལ་རེ་བ་ལས་ལྷག་འབྲས་སྟེར་དཔག་བསམ་ཤིང་ཡང་སློང་བ་རྣམས་ལ་བྱིན།། འདི་ལས་གཞན་པའི་བྱ་བ་ཅི་ཞིག་ཁྱོད་ཀྱི་སེམས་ལ་གང་ཞིག་གནས་པ་སྨྲོས།།
བི་དཱུ་ཥ་ཀས། ཀྱེ་གྲོགས་པོ། ཤིན་ཏུ་ཐུབ་ཆོད་ལྡན་ཞིང་ཉམས་པར་བྱེད་པའི་ལྷ། མ་ཏང་ག་འདི་མི་མཐུན་པའི་ཕྱོགས་སུ་ཉེ་བར་གནས་པ་ལ་གཙོ་བོ་དང་གཉེན་དག་ཡང་དག་པར་གནས་ཀྱང་ཁྱོད་མེད་ན་བདག་ནི་རྒྱལ་སྲིད་ལེགས་པར་གནས་པར་མི་རྟོག་གོ།
འདྲེན་པས། མ་ཏང་གས་རྒྱལ་སྲིད་ལེན་པར་འགྱུར་རོ་ཞེས་བྱ་བའི་དོགས་པ་ཡོད་དམ་ཅི། གལ་ཏེ་དེ་ལྟར་གྱུར་ན་དེ་ལས་ཅིར་འགྱུར། བདག་གི་ལུས་ལ་སོགས་པ་ཐམས་ཅད་གཞན་གྱི་དོན་ཉིད་དུ་ཡོངས་སུ་བསྲུངས་པ་མ་ཡིན་ནམ། གང་ཡང་རང་གིས་མ་བྱིན་པ་དེ་ནི་ཡབ་ཀྱི་ངོར་ཡིན་ནོ།། དེས་ན་དོན་མེད་པའི་བསམ་པ་འདིས་ཅི་ཞིག་བྱ། ཡབ་ཀྱིས་རྗེས་སུ་བསྟན་པ་ཉིད་ལྷུར་བསྒྲུབ་པར་བྱའོ།།
བི་དཱུ་ཥ་ཀས། ཀྱེ་ཡབ་ཀྱི་ཅི་ཞིག་བསྟན།
འདྲེན་པས། ཇི་ལྟར་ཉི་མ་མང་བོར་ཡོངས་སུ་དཔྱད་པས་དཀའ་ཐུབ་ཀྱི་ནགས་འདི་ཡམ་ཤིང་དང་། ཀུ་ཤ་དང་། མེ་ཏོག་དང་། ཉེ་བར་མཁོ་བའི་རྩ་བ་དང་། འབྲས་བུ་དང་། སྡོང་བུ་དང་། དྲི་ཞིམ་པ་དང་། རྔད་མང་བ་དག་རིང་དུ་བྱས་པར་གྱུར་གྱིས། དེའི་ཕྱིར། མ་ལ་ཡའི་རི་ལ་སོང་ལ་བསྟི་གནས་འགའ་ཞིག་རྟོགས་ཤིང་ཅེས་ཡབ་ཀྱིས་བདག་ལ་རྗེས་སུ་བསྟན་ཏོ།། དེའི་ཕྱིར་རེ་ཞིག་མ་ལ་ཡ་ཉིད་དུ་འགྲོའོ།། ༼ཞེས་ཏེ་སོང་བར་གྱུར་ཏོ།།༽
བི་དཱུ་ཥ་ཀས། ༼མདུན་དུ་བལྟས་ནས༽ཀྱེ་གྲོགས་པོ། ལྟོས་ཤིག ལྟོས་ཤིག རླན་དང་བཅས་ཤིང་སྟག་པོའི་ཙན་དན་གྱི་ནགས་ཀྱི་ཁྲོད་ནས་ཡོངས་སུ་བསྐྱོད་པ་དྲི་བཟང་རྒྱ་ཆེན་པོས་བསྒོས་པ་ཅན་རིའི་ངོས་མི་བཟད་པ་ལས་བབས་པས་དུམ་བུར་འགྱུར་བའི་ཆུ་རྒྱུན་ལས་འཐོར་བའི་ཐིགས་པ་བསིལ་པོ་འཛིན་པ་མ་ལ་ཡའི་རླུང་འདི་ནི་ངེས་པར་ལམ་གྱིས་ཡོངས་སུ་དུབ་པ་དག་སེལ་ཞིང་། དང་བོར་འགྲོགས་པར་འདོད་པའི་དགའ་མ་ལ་མགྲིན་པ་ནས་བཟུང་བ་བཞིན་དུ་གྲོགས་པོ་མཛའ་བོ་ལ་སྤུ་ལོང་རྒྱས་པར་བྱེད་པ་འདྲའོ།།
འདྲེན་པས། ༼ཀུན་ཏུ་བལྟས་ནས༽ཨ་ཡེ། བདག་ཅག་རི་མ་ལ་ཡར་སླེབས་པར་གྱུར་ཏོ།། ༼བརྟགས་ནས༽ ཨེ་མ། འདི་ནི་དགའ་བར་བྱ་བ་ཞིག་སྟེ། དེ་ལྟར་ཡང་། དགའ་ལྡན་ཕྱོགས་ཀྱི་གླང་བོ་འགྲམ་པའི་ངོས་བརྡར་ཙན་དན་དག་ནི་ཆག་ཅིང་ཟག། ཆུ་གཏེར་རླབས་རྣམས་རབ་ཏུ་བསྣུན་པས་ཕུག་དང་ལུང་བ་དག་ནི་ཆོ་ངེས་སྒྲོགས།། གྲུབ་པའི་བུད་མེད་བགྲོད་པ་རྣམས་ཀྱི་རྐང་བའི་སྨུག་རྩིས་དམར་བ་མུ་ཏིག་རྡོ།། བསྟེན་བྱ་རི་བོ་མ་ལ་ཡ་འདིས་བདག་གི་སེམས་ནི་ཅི་ཡང་སྲེད་ལྡན་བྱེད།། དེས་ན་ཚུར་ཤོག འདི་ལ་འཛེགས་ཏེ་འདུག་པར་འོས་པའི་བསྟི་གནས་དག་བཙལ་བར་བྱའོ།། ༼འཛེགས་ཏེ་མཚན་མ་གསལ་བར་བྱས་ནས༽
བདག་གི་མིག་ནི་གཡས་པ་གཡོ།། འབྲས་བུ་འདོད་པ་འགའ་ཡང་མེད།། ཐུབ་པའི་གསུང་ཡང་བརྫུན་མ་ཡིན།། འདི་ནི་ཅི་ཞིག་འཆད་འགྱུར་ཀྱེ།།
བི་དཱུ་ཥ་ཀས། ཀྱེ་གྲོགས་པོ། གྲོགས་པོ་ལ་དགའ་བ་འགའ་ཞིག་ཉེ་བར་སྟོན་ཏོ།།
འདྲེན་པས། ངེས་པར་ཇི་ལྟར་ཁྱོད་ཀྱིས་སྨྲས་པ་དེ་བཞིན་ནོ།།
བི་དཱུ་ཥ་ཀས། ཀྱེ་གྲོགས་པོ། ལྟོས་ཤིག ལྟོས་ཤིག ཁྱད་པར་དང་བཅས་པར་སྟུག་ཅིང་སྣུམ་པའི་རྐང་འཐུང་གིས་ཉེ་བར་མཛེས་ཤིང་བའི་མར་གྱི་དྲིའི་སྙིང་བོ་ཅན་གྱི་དུ་བ་དྲག་ཏུ་འཕྱུར་ལ། རི་དྭགས་ཀྱི་ཚོགས་འཇིགས་པ་མེད་ཅིང་ལམ་དུ་བག་ཕབ་སྟེ་གནས་པ་འདི་ནི་དཀའ་ཐུབ་ཀྱི་ནགས་ཚལ་བཞིན་དུ་མཚོན་ནོ།།
འདྲེན་པས། གྲོགས་པོ། ཡང་དག་པར་མཚོན་ནོ།། འདི་དག་ནི་དཀའ་ཐུབ་ཀྱི་ནགས་ཚུལ་ཉིད་དེ། གང་གི་ཕྱིར།
གོས་ཀྱི་དོན་དུ་ཤིང་ཤུན་རྣམས་བཅད་བརྩེ་བ་ཉིད་ཀྱིས་ཤིན་ཏུ་ཆེ་བ་མིན། །རུལ་བའམ་རྙིང་བ་ཆགས་པས་མཚན་པའི་ཆུ་རྒྱུན་དག་ནི་མཁའ་ལྟར་རབ་ཏུ་དྭངས། །འགའ་ཞིང་དག་ན་མུཉྫའི་སྐེ་རགས་ཁྱེའུ་ས་བཅད་ཅིང་དོར་བར་གྱུར་པ་མཐོང་། །རྟག་ཏུ་ཐོས་པས་ནེ་ཙོ་དག་ཀྱང་རིག་བྱེད་ཚིག་འདི་རབ་ཏུ་སྒྲོག་པར་བྱེད།།
དེས་ན་ཚུར་ཤོག རབ་ཏུ་ཞུགས་ཏེ་ཉེ་བར་མཚོན་པར་བྱའོ།།
༼རབ་ཏུ་ཞུགས་ཏེ་གར་དག་བྱེད་དོ།།༽
འདྲེན་པས། ཨེ་མ་ཐུབ་པའི་སྐྱེ་བོ་རབ་ཏུ་དགའ་བ་རྣམས་ནི་རིག་བྱེད་ཀྱི་ཚིག་རྒྱས་པ་ལ་ཐེ་ཚོམ་རྣམ་པར་གཅོད་པར་བྱེད་ལ། ཁྱེའུའི་སྐྱེ་བོ་རྣམས་ནི་ཇི་ལྟར་གཤེར་བ་གཤེར་བའི་ཡམ་ཤིང་དག་གཅོད་ཅིང་། དཀའ་ཐུབ་པའི་གཞོན་ནུ་མ་རྣམས་ནི་ལྗོན་པ་གསར་བའི་ཀྱོ་ར་འགེངས་ཉིད་དོ།། འདི་ཉིད་ན།
བུང་བའི་སྒྲ་ཡིས་ལེགས་པར་འོངས་སམ་ཞེས་ནི་བརྗོད་པ་བཞིན།།
འདི་དག་མགོ་ནི་འབྲས་བུ་དུས་པས་འདུད་པར་བྱེད་པ་བཞིན།།
མེ་ཏོག་ཆར་བ་འཐོར་ཞིང་བདག་ལ་མཆོད་ཡོན་སྟེར་བ་བཞིན།།
ཡལ་ག་ལྡན་པ་ཡིས་ཀྱང་མགྲོན་གྱི་བསྙེར་བཀུར་ཇི་ལྟར་བསླབས།།
དེའི་ཕྱིར་དཀའ་ཐུབ་ཀྱི་ནགས་ཚལ་འདིར་ནི་འདུག་པར་འོས་པ་ཞིག་སྟེ། འདིར་གནས་ན་བདག་ཅག་གི་སེམས་བདེ་བར་འགྱུར་རོ་སྙམ་མོ།།
བི་དཱུ་ཥ་ཀས། ཀྱེ་གྲོགས་པོ། འོན་ཀྱང་ངེས་པར་རི་དྭགས་འདི་དག་མགྲིན་པ་ཅུང་ཟད་དཀྱོགས་ཏེ་གཡོ་བ་མེད་པའི་ཁ་ལས་ཅུང་ཟད་ཟོས་པའི་རྩྭ་ཁམ་ནས་ན་གནས་པ་ཟག་ཅིང་རྣ་བ་གཅིག་རབ་ཏུ་བསླངས་ཏེ་གཏད་ནས་མིག་ཟུམ་པ་དང་བཅས་པས་ཉན་པར་བྱེད་པ་ལྟ་བུར་མཚོན་ནོ།།
འདྲེན་པས། ༼འདྲེན་པས་རྣ་བ་གཏད་ནས༽
གནས་ཐོབ་རབ་ཏུ་གསལ་བའི་འགྲོས་ཅན་གདངས་སྙན་དག་གིས་རྣམ་པར་གཞག་པ་འཛིན་བྱེད་པ།།
བུང་བའི་སྒྲ་བཞིན་ངེས་པར་ཡིད་འཕྲོག་རྒྱུད་མངས་དག་གི་རྒྱུད་མངས་སྒྲ་དང་ལྡན་པ་ཡིས།།
གསལ་ཞིང་རོལ་སྒེག་ཚིག་ལྡན་གླུ་ནི་ཀུན་ཏུ་འཁྱོག་པའི་ལུས་ཅན་རི་དྭགས་འདི་དག་རྣམས།།
སོ་ཡི་བར་ན་གནས་པ་རྩྭ་ཡི་ཁམ་ནི་གཅོད་པའི་སྒྲ་དག་བསྡམས་ནས་ཉན་པར་བྱེད།།
བི་དཱུ་ཥ་ཀས། ཀྱེ་གྲོགས་པོ། དཀའ་ཐུབ་ཀྱི་ནགས་ཚལ་འདི་ན་སུ་ཞིག་གླུ་ལེན་པར་བྱེད།
འདྲེན་པས། ཇི་ལྟར་སོར་མོ་འཇམ་པའི་འདབ་མས་མངོན་པར་བསྣུན་པའི་རྒྱུད་མངས་ཤིན་ཏུ་གསལ་བ་མ་ཡིན་པར་སྒྲོགས་ཤིང་གླུ་ཡང་སྙན་ཅིང་ཕྲ་བ་གཙོར་ལེན་པ་དེ་ལྟར་བདག་རྟོག་པ་ནི་གནས་འདི་ན་ལྷ་དག་མཉེས་པར་བྱེད་ཅིང་ལྷའི་བུད་མེད་རྒྱུད་མངས་དང་ལྡན་པའི་གླུ་ལེན་པར་བྱེད་དོ།།
བི་དཱུ་ཥ་ཀས། ཀྱེ་གྲོགས་པོ། ཚུར་ཤོག ཡུ་བུ་ཅག་ཀྱང་ལྷའི་གནས་བལྟ་བར་བྱའོ།། ༼ཉེ་བར་སོང་སྟེ་འཕྲལ་ལ་འདུག་ནས༽ གྲོགས་པོ་གལ་ཏེ་ན་སྐྱེ་བོ་འདི་ལྟ་བར་མི་འོས་པ་སྲིད་དོ།། དེ་ནས་རེ་ཞིག་ཏ་མ་ལའི་གེལ་པ་འདིའི་ནང་དུ་འདུག་སྟེ་ལྷ་བལྟ་བའི་སྐབས་བཙལ་བར་བྱའོ།།
༼དེ་ལྟར་བྱས་སོ།།༽
༼དེ་ནས་མ་ལ་ཡ་ཅན་མ་དང་། འབངས་མོ་ཞུགས་ཏེ་སལ་འདུག་ནས་རྒྱུད་མངས་སྦྲེང་བར་བྱེད་དོ།།༽
འདྲེན་མས། ༼གླུ་ལེན་པ༽ གཽ་རཱི་རབ་རྒྱས་པདྨའི་གེ་སར་གྱི།། དངུལ་ལྟར་དཀར་བའི་འོད་ཅན་བཅོམ་ལྡན་མ།། ཁྱོད་ཀྱི་བཀའ་དྲིན་དག་གིས་བདག་གི་ནི།། མངོན་པར་འདོད་པ་རབ་ཏུ་གྲུབ་པར་མཛོད།།
འདྲེན་པས། ༼རྣ་གཏད་ནས༽ ཨེ་མ་ཧོ་གླུ། ཨེ་མ་ཧོ་རོལ་མོ། འདི་ལ་གསལ་བྱེད་ཀྱི་དབྱངས་རྣམ་པ་བཅུ་བོ་འདིས་གསལ་བ་ཐོབ་ཅིང་། མྱུར་བ་དང་། བར་མ་དང་། དལ་བའི་སྟབས་རྣམ་པ་གསུམ་རབ་ཏུ་གསལ་བར་ཡོངས་སུ་བཅད་དེ། བ་ལང་གི་རྔ་མ་ལ་སོགས་པ་རྣམ་པ་གསུམ་གྱི་རིམ་པས་ངལ་གསོ་བར་བྱས་པ་དེ་ཁོ་ནའི་ཚོགས་ཀྱི་རྗེས་སུ་འབྲང་བའི་རོལ་མོའི་ཆོ་ག་ཡང་དག་པ་གསུམ་བསྟན་ཏོ།།
འབངས་མོས། རྗེའི་སྲས་མོ་ངེས་པར་ཡུན་རིང་དུ་གླུ་དག་བླངས་ནས་ཁྱོད་ཀྱི་ལག་རྩེ་དག་ཡོངས་སུ་མི་ངལ་ལམ།
འདྲེན་མས། གྲུང་མོ། བཅོམ་ལྡན་མོ༼ལྷ་མོ་རང་༽འི་མདུན་དུ་རྒྱུད་མངས་སྒྲོགས་པར་བྱེད་པ་ལ་བདག་ག་ལ་ངལ།
འབངས་མོས། ༼སྨོད་པ་དང་བཅས་པར༽ རྗེའི་སྲས་མོ་ཀྱེ། བརྩེ་མོ་འདིའི་མདུན་དུ་རྒྱུད་མངས་བསྒྲགས་པས་ཅི་ཞིག་བྱ་ཞེས་བདག་སྨྲའོ།། གང་ཞིག་འདི་སྙེད་ཀྱི་དུས་སུ་སྐྱེ་བོ་གཞོན་ནུ་མའི་དཀའ་ཐུབ་བསྙེན་ནས་ངེས་པ་ལ་གནས་པས་བསྟན་ཀྱང་ད་དུང་ཁྱོད་ལ་དང་བར་མི་སྟོན་ནོ།།
བི་དཱུ་ཥ་ཀས། ༼ཐོས་ནས༽ ཀྱེ་གྲོགས་པོ། འདི་ནི་ངེས་པར་གཞོན་ནུ་མ་སྟེ་ཅིའི་ཕྱིར་མི་ལྟ།
འདྲེན་པས། སྐྱོན་ཅི་ཡོད། གཞོན་ནུ་མ་ལྟ་བ་ནི་སྐྱོན་མེད་པ་ཉིད་དོ།། འོན་ཀྱང་གལ་ཏེ་ན་བདག་ཅག་མཐོང་ནས་འཇིགས་ཏེ། ངོ་ཚ་བ་གཞོན་ནུ་མ་ལ་རྙེད་སླ་བས་འདིར་ཡུན་རིང་དུ་མི་སྡོད་པ་མི་སྲིད་དོ།། དེས་ན་རེ་ཞིག་འཁྲི་ཤིང་གི་དྲ་བ་འདིས་བསྒྲིབས་ཏེ་བལྟ་བར་བྱའོ།།
༼གཉི་གས་བལྟས་ཏེ༽
བི་དཱུ་ཥ་ཀས། ༼ཡ་མཚན་དང་བཅས་པར༽ ཀྱེ་གྲོགས་པོ། ལྟོས་ཤིག་ལྟོས་ཤིག ངོ་མཚར་རོ་ངོ་མཚར་རོ།། རྒྱུད་མངས་ཀྱི་སྒྲས་རྣ་བའི་བདེ་བ་སྐྱེད་པར་བྱེད་པ་འབའ་ཞིག་ཏུ་མ་ཟད་དེ། རྣམ་པར་ཤེས་པའི་རྗེས་སུ་མཐུན་པའི་གཟུགས་འདིས་མིག་གི་ཡང་བདེ་བ་སྐྱེད་པར་བྱེད་དོ།། དེའི་ཕྱིར་འདི་ནི་སུ་ཞིག་ཡིན། ཅི་ལྷ་མོའམ། ཀླུའི་བུ་མོའམ། ཡང་ན་རིག་པ་འཛིན་པའི་བུ་མོའམ། ཡང་ན་གྲུབ་པའི་རིགས་ལས་འཁྲུངས་པ་ཞིག་གོ།
འདྲེན་པས། ༼རྣམ་པར་ལྟ་ཞིང་ཆགས་པ་དང་བཅས་པར༽ གྲོགས་པོ། འདི་སུ་ཞིག་ཡིན་བདག་གིས་མ་རྟོགས་སོ།། བདག་གིས་འདི་ཙམ་ཤེས་ཏེ།
གལ་ཏེ་མཐོ་རིས་བུ་མོ་ཡིན་ན་འཕྲོག་བྱེད་མིག་སྟོང་ལྡན་དེས་དོན་བྱས་འགྱུར།།
གལ་ཏེ་ཀླུ་ཡི་བུ་མོ་ཡིན་ནའང་འདིའི་གདོང་ཡོད་ཚེ་ས་འོག་ཟླ་བས་སྟོང་བ་མིན།།
གལ་ཏེ་རིག་འཛིན་མ་ཡིན་གཞན་རིགས་ལས་རྒྱལ་བདག་ཅག་རིགས་ནི་འབྲས་དང་བཅས།།
གལ་ཏེ་གྲུབ་རིགས་ལས་སྐྱེས་དེ་ཕྱིར་གྲུབ་པ་འཇིག་རྟེན་གསུམ་དུ་གྲགས་པར་འགྱུར།།
བི་དཱུ་ཥ་ཀས། ༼འདྲེན་པ་ལ་བལྟས་ནས་དགའ་བ་དང་བཅས་ཤིང་རང་གིས་རྟོགས་པར༽ ཨེ་མའོ།། ཡུན་རིང་བོ་ཞིག་ནས་ཡིད་སྲུབ་ཀྱི་སྤྱོད་ཡུལ་དུ་ལྷུང་བར་གྱུར་ཏོ།། བདག་ཉིད་ལ་སྟོན་ཅིང་། ཡང་ན་མ་ཡིན་ཏེ། བྲམ་ཟེ་བདག་གིའོ།།
འབངས་མོས། ༼མཛའ་བ་དང་བཅས་པར༽ཀྱེ། བྲམ་ཟེ་བདག་སྨྲའོ།།
བརྩེ་མེད་མ་འདིའི་མདུན་དུ་རྒྱུད་མངས་བསྒྲགས་པས་ཅི་ཞིག་བྱ། ༼ཞེས་ཏེ་རྒྱུད་མངས་འཕངས་སོ།།༽
འདྲེན་མས། བུ་མོ། བཅོམ་ལྡན་མ་གཽ་རཱི་ལ་མ་སྨད་ཅིག ཀེ་དིང་བཅོམ་ལྡན་མས་བཀའ་དྲིན་མཛད་པ་བཞིན་ནོ།།༼དེ་རིང་བཅོམ་ལྡན་མས་བདག་ལ་མཆོག་བྱིན་ནོ།།རང་།༽
འབངས་མོས། རྗེའི་སྲས་མོ། རེ་ཞིག་ཅི་འདྲ་བ་དག་སྨྲོས་ཤིག
འདྲེན་མས། བུ་མོ། ངེས་པར་དེང་རྨི་ལམ་དུ་བདག་འདི་བཞིན་ཉིད་དུ་རྒྱུད་མངས་བསྒྲེང་བ་ལ་བཅོམ་ལྡན་མས་གསུངས་པ། བུ་མོ་ཁྱོད་ཀྱིས་རྒྱུད་མངས་བསྒྲེང་བ་མཁས་པ་ཁྱད་པར་དུ་འཕགས་པ་འདི་དང་། བདག་ལ་ཐུན་མོང་མ་ཡིན་པའི་གུས་པ་བུ་མོའི་དངོས་པོ་ལ་རྙེད་དཀའ་བ་འདིས་བདག་ཤིན་ཏུ་ཚིམ་པར་གྱུར་ཏོ།། དེའི་ཕྱིར་ཡུན་རིང་བོ་མ་ཡིན་པ་ན་རིག་པ་འཛིན་པའི་འཁོར་ལོས་སྒྱུར་བས་ལག་པ་འཛིན་པར་འགྱུར་རོ་ཞེས་སོ།།
འབངས་མོས། ༼དགའ་བ་དང་བཅས་པར༽ རྗེས་སྲས་མོ། གལ་ཏེ་དེ་ལྟར་ཡིན་ན་རྨི་ལམ་དུ་ཞེས་ཅིའི་ཕྱིར་བརྗོད། ལྷ་མོས་སྙིང་ལ་འདོད་པའི་མཆོག་བྱིན་པ་ཉིད་ཡིན་ནོ།།
བིདཱུཥཀས། ངེས་པར་བདག་ཅག་ལྷ་མོ་ལྟ་བའི་སྐབས་སུ་བབ་པོ།། དེའི་ཕྱིར་ཚུར་ཤེག ཉེ་བར་འགྲོ་བར་བྱའོ་ཞེས་ཏེ་ཉེ་བར་བཏུད་དོ།།
འདྲེན་པས། རེ་ཞིག་བདག་ཞུགས་པར་མི་བྱའོ།།
བི་དཱུ་ཥ་ཀས། ༼མི་འདོད་བཞིན་དུའང་འདྲེན་པ་ཤུགས་ཀྱིས་ཁྱེར་༼འཁྲིད་༽ནས་དྲུང་དུ་སླེབས་པར་བྱས༽ ཇོ་མོ་གྲུང་མོ། བདག་བདེན་པར་སྨྲ་སྟེ། འདི་ནི་མཆོག་བྱིན་པ་ཉིད་དོ།།
འདྲེན་མས། ༼འཇིགས་པ་དང་བཅས་ཏེ་འདྲེན་པ་མཚོན་ཏེ༽ བུ་མོ། འདི་སུ་ཞིག་ཅེས་སོ།།
འབངས་མོས། གཞན་དང་ཐུན་མོང་མ་ཡིན་པའི་རྣམ་པ་འདིས་ན། འདི་ཉིད་བཅོམ་ལྡན་མས་བཀའ་དྲིན་མཛད་པ་ཡིན་སྙམ་མོ།།
འདྲེན་མས། ༼ཆགས་པ་དང་བཅས་ཤིང་ངོ་ཚ་བ་དང་བཅས་པར༽ བལྟས་སོ།།
འདྲེན་པས། གཡོ་ཞིང་ཡངས་པའི་མིག་ལྡན་དབུགས་འབྱིན་ཅིང་།། འདར་ཞིང་མཁྲེགས་སྟུག་ནུ་ལྡན་འཁྲུལ་བྱེད་མ།། ལུས་འདི་དཀའ་ཐུབ་ཉིད་ཀྱིས་ཤིན་ཏུ་ནི།། ངལ་གྱུར་སླར་ཡང་ཅི་སླད་གདུང་བར་བྱེད།།
འདྲེན་མས། བུ་མོ། ཤིན་ཏུ་འཇིགས་པས་འདི་ལ་མངོན་དུ་ཕྱོགས་ཏེ་འདུག་པར་མི་ནུས་སོ།། ༼ཞེས་ཏེ་ལོགས་ལ་བལྟས་ནས་འཁོད་དོ།།༽
བི་དཱུ་ཥ་ཀས། ཇོ་མོ་ཁྱོད་ཀྱི་དཀའ་ཐུབ་ཀྱི་ནགས་ཚལ་འདི་ན་གང་ཞིག་འགྲོན་པོ་འོངས་པ་ལ་ཚིག་ཙམ་གྱིས་ཀྱང་ཕེབས་པར་སྨྲ་བ་མ་ཡིན་པ་འདི་འདྲ་བའི་ཀུན་ཏུ་སྤྱོད་པ་ཡོད་དམ་ཅི།
འབངས་མོས། རྗེའི་སྲས་མོ། འགྲོན་པོ་ལ་བསྙེན་བཀུར་བྱ་བ་རིགས་པ་ཡིན་ནོ།། དེའི་ཕྱིར་ཇི་ལྟར་མཐུ་ཆེན་པོ་དང་ལྡན་པ་འདི་དག་ལ་གུས་པར་བྱ་བ་རྨོངས་པར་གནས། ཡང་ན་ཁྱོད་བཞུགས་ཤིག ཁོ་མོ་ཉིད་ཀྱི་ཇི་ལྟར་རིགས་པ་དག་བྱའོ།། ༼འདྲེན་པ་ལ་མཚོན་ཏེ༽ ཇོ་བོ་ལེགས་པར་འོངས་སམ། ཇོ་བོ་སྟན་ཡོངས་སུ་བཟུང་བས་ཕྱོགས་འདི་བརྒྱན་པར་མཛོད་ཅིང
བི་དཱུ་ཥ་ཀས། ཀྱེ་གྲོགས་པོ། འདི་ནི་ལེགས་པར་སྨྲའོ།། ཡུད་ཙམ་ཞིག་འདུག་སྟེ་ངལ་གསོ་བར་བྱའོ།།
འདྲེན་པས། ཁྱོད་ནི་རིགས་པར་སྨྲའོ།། ༼གཉི་ག་འཁོད་དོ༽
འདྲེན་མས། ཀ་ཡེ། བཞད་གད་ཀྱི་ངང་ཚུལ་ཅན་མ་དེ་ལྟར་མ་བྱེད། གལ་ཏེ་དཀའ་ཐུབ་པ་འགའ་ཞིག་གིས་མཐོང་ན་འདི་ལས་བདག་དུལ་བ་མ་ཡིན་པ་དང་ལྡན་པར་དོགས་པར་འགྱུར་རོ།།
