བུད་མེད་མེ་ཏོག་མ་ལི་ཀ

བུད་མེད་མེ་ཏོག་མ་ལི་ཀ

ཨེ་ལེགས་ཟན་ཌར། ཌུ་མ་སིས་བརྩམས།

ཟླ་བ་གཞོན་ནུས་རྒྱ་ཡིག་ནས་བསྒྱུར།

བདག་གིས་བསམས་ན། མིའི་རིགས་ལ་རྒྱུན་རིང་པོའི་ཞིབ་འཇུག་བྱས་པ་བརྒྱུད་ནས་ད་གཟོད་མི་སྣ་བཞེངས་བསྐྲུན་བྱེད་ཐུབ་པར་འདོད་པ་སྟེ། དེ་ནི་ནན་ནན་ཏན་ཏན་གྱིས་སློབ་སྦྱོང་བྱས་པ་བརྒྱུད་སྐད་རིགས་ཞིག་ལེགས་པར་བཤད་ཐུབ་པ་དང་འདྲ།

ང་རང་མི་སྣ་བཞེངས་བསྐྲུན་བྱེད་ཐུབ་པའི་ལོ་ཚད་ལ་སླེབས་མེད་པས། ད་ཡོད་ཀྱི་སྒྲུང་གཏམ་འགྲེལ་བཤད་བྱས་ནས་ཚིམས་ཐབས་མི་བྱེད་ཐུ་མེད་རེད། དེའི་རྐྱེན་གྱིས་བདག་གི་རེ་བ་ནི་ཀློག་པ་པོས་སྒྲུང་གཏམ་འདི་ཁུངས་མེད་རྫུན་བཟོ་མ་ཡིན་པར་ཡིད་ཆེས་རྒྱུ་དེ་ཡིན་ལ། འདིའི་ནང་གི་མི་སྣ་ལས་འདྲེན་མ་མ་གཏོགས་གཞན་ཚང་མ་ད་དུང་འཚོ་བཞུགས་གནང་ཡོད། དེར་མ་ཟད། ངས་འཚོལ་སྡུད་བྱས་པའི་དཔྱད་གཞིའི་ཡིག་རིགས་འདི་རྣམས་དང་དེའི་དཔང་མི་རྣམས་ཀྱང་ད་རུང་ཕད་རི་སིར་བཞུགས་ཡོད། གལ་ཏེ་དགོས་མཁོ་འདྲ་བྱུང་ན། ངས་ཁོང་རྣམས་ལ་བདེན་པ་ར་སྤྲོད་དུ་བཅུག་ཆོགཡིན་ནའང་དམིགས་བསལ་གྱི་གོ་སྐབས་ཞིག་གི་དབང་གིས་ང་ཁོ་ནས་ད་གཟོད་གནས་ཚུལ་ཐ་དག་འབྲི་ཐུབ་པ་ཡིན།ང་ནི་མཐའ་མཇུག་གི་ཞིབ་ཕྲའི་གནས་ཚུལ་རྟོགས་མཁན་གྱི་མི་གཅིག་པུ་དེ་ཡིན་ལ། གལ་ཏེ་མཐའ་མཇུག་གི་ཞིབ་ཕྲའི་གནས་ཚུལ་དེ་དག་མེད་པ་ཡིན་ན་ནི་དབུགས་ཐེངས་གཅིག་ལ་འདི་ལྟ་བུའི་ཆ་ཚང་ཞིག་ཡིད་དབང་འཕྲོག་པའི་སྒྲུང་གཏམ་ཞིག་འབྲི་ཐུབ་མི་སྲིད་པ་ཞིག་རེད། གཤམ་ནི་ངས་ཇི་ལྟར་ཞིབ་ཕྲའི་གནས་ཚུལ་འདི་དག་ཤེས་རྟོགས་བྱང་བའི་བརྒྱུད་རིམ་ཡིན། གཅིག་བཞི་གྱ་བདུན་ལོའི་ཟླ་གསུམ་པའི་ཚེས་བཅུ་གཉིས་ཀྱི་ཉིན་དེར། ངས་ཕེ་ཐེ་སྲང་ལམ་དུ་ཁྱིམ་ཆས་དང་གནའ་རྫས་རྩ་ཆེན་ཕམ་ཚོང་བརྒྱག་རྒྱུའི་ཞེང་ཁ་ཆེ་བའི་གསལ་བསྒྲགས་སེར་བོ་ཞིག་མཐོང་བྱུང་། ཕམ་ཚོང་འདུ་ཚོགས་ནི་དངོས་བདག་གྲོངས་ཟིན་པ་བརྟེན་ནས་འཚོགས་རྩིས་རེད་འདུག གསལ་བསྒྲགས་སྟེང་། འདས་པོའི་རུས་མིང་གི་སྐོར་གང་ཡང་གླེང་མི་འདུག་པར་ཕམ་ཚོང་རྒྱག་ས་ཨན་ཏན་སྲང་ལམ་ཨང་དགུ་བ་དང་དུས་ཚོད་ནི་ཚེས་བཅུ་དྲུག་གི་ཉིན་གུང་ནས་ཕྱི་དྲོའི་ཆུ་ཚོད་ལྔ་བའི་བར་ཡིན་པ་གཅིག་པུ་གསལ་བཤད་བྱས་འདུག་ལ། དེ་ལས་གཞན་དེའི་སྟེང་དུ་ཚེས་བཅུ་གསུམ་དང་བཅུ་བཞིར་སྔོན་ཚུད་དུ་སྡོད་ཁང་འདི་དང་ཁྱིམ་ཆས་ལ་གཟིགས་སྐོར་དུ་བཅར་འཐུས་པར་བྲིས་འདུགང་རང་སྤྱིར་བཏང་ནས་གནའ་རྫས་རྩ་ཆེན་ལ་ཤིན་ཏུ་དགའ་བས། གོ་སྐབས་བཟང་བོ་འདི་ཤོར་དུ་འཇུག་ཆེད་ཉན་ཏེ། མི་ཉོ་བ་ཡིན་ནའང་ལྟ་ཙམ་བྱེད་ཆོག་པ་རེད་སྙམ་ནས་ཉིན་རྗེས་མར་ང་རང་ཨན་ཏན་སྲང་ལམ་ཨང་དགུ་བར་སོང་བ་ཡིན།

ད་དུང་སྔ་བོ་ཡིན་ནའང་། ཁང་བའི་ནང་གཟིགས་སྐོར་དུ་ཕེབས་པའི་ཕོ་མོ་མི་ཉུང་བ་ཞིག་སླེབས་ཟིན་འདུག བུད་མེད་དེ་དག་ནི་ལུས་ལ་དར་སྣམ་གྱི་ལྭ་བ་དང་། ཀ་ཤི་སྨིར་དཔུང་རྒྱན་སྟོད་ཐུང་གཡང་ཤམ་བྱས་ནས་གྱོན་ཡོད་པ་དང་། ད་དུང་མཆོར་ཉམས་ལྡན་པའི་རྟ་འདྲུད་ཕེབས་བྱམས་ཀྱིས་ཀྱང་སྒོ་ཁར་སྒུག་ནས་བསྡད་ཡོད་མཁན་ཏག་ཏག་རེད་འདུག་མོད། ཁོ་ཚོས་ཀྱང་མིག་མདུན་གྱི་རྒྱ་ཞིང་རྒྱས་པ་འདི་མཐོང་དུས། བསྟོད་བསྔགས་མཚམས་མི་ཆད་པར་བྱེད་ཀྱིན་འདུགཅང་འགོར་མ་དགོས་པར་བདག་གིས་ཁོང་ཚོས་ཧ་ལས་ནས་བསྟོད་ར་འཐེན་པའི་རྒྱུ་མཚན་རྟོགས་སོང་། ངས་ཏོག་ཙམ་ཞིབ་ལྟ་བྱས་པ་ཙམ་གྱིས་ཀྱང་མཐོང་ཐུབ་པ་ཞིག་སྟེ། དེ་ནི་ང་རང་མཐོ་རིམ་སྤྱི་ཚོགས་ཀྱི་སྨད་འཚོང་མ་ཞིག་གི་ནང་དུ་སླེབས་ཡོད་པ་དེ་རེད། གལ་ཏེ་མཐོ་རིམ་སྤྱི་ཚོགས་ཁྲོད་ཀྱི་བུད་མེད (གཟིགས་སྐོར་དུ་ཡོང་མཁན་ཚང་མ་མཐོ་རིམ་སྤྱི་ཚོགས་ཁྲོད་ཀྱི་བུད་མེད་རེད)་རྣམས་ལ་ཆེས་མཐོང་འདོད་པ་ཞིག་ཡོད་ན་དེ་ནི་བུད་མེད་འདིའི་རིགས་ཀྱི་སྡོད་ཁང་ཡིན་པ་རེད། བུད་མེད་འདིའི་རིགས་ཀྱི་ཤིང་རྟས་ཁོང་ཚོའི་ཤིང་རྟ་དུས་རྒྱུན་དུ་ཉམས་དམའ་བར་བྱེད་ཅིང་། བུད་མེད་འདིའི་རིགས་ལ་ཁོང་ཚོ་དང་འདྲ་བར་གླུ་གར་ཁང་དང་ཨི་ཋ་ལིའི་ཟློས་གར་ཁང་དུའང་སྦུག་ཁང་ཡོད་ལ། ནམ་ཡང་ཁོང་ཚོ་དང་འདུག་མཉམ་དང་ལངས་མཉམ་བྱེད་ཀྱིན་ཡོད་པས་རེད། དེར་མ་ཟད་བུད་མེད་འདིའི་རིགས་ཀྱིས་ཕད་རི་སིར་བག་མེད་ངང་ཁོང་ཚོའི་རྣམ་པ་དང་རྒྱན་ཆ། འཆལ་སྤྱོད་ངོམ་ཤོམ་བྱེད་པ་རེད།

ད་ནི་བུ་མོ་འདི་མིའི་འཇིག་རྟེན་དང་ཁ་བྲལ་ཟིན་པས། ཆེས་གཙང་བའི་བུད་མེད་དག་ཀྱང་ཁོང་མོའི་ཉལ་ཁང་ལ་ཡོང་སྤོབས་པ་སྟེ། འཆི་བས་བརྗིད་ཆགས་རྒྱ་ཆེ་བའི་འབག་བཙོག་གི་ཁོར་ཡུག་འདིའི་མཁའ་རླུང་དེ་དག་གཙང་བསྒྱུར་སོང་བས་རེད། གལ་ཏེ་དེ་ལས་གཞན་པའི་ཁ་གཡར་ས་འདྲ་དགོས་ན། ཁོང་ཚོ་ཕམ་ཚོང་ལ་ཡོང་བ་ལས་སུ་ཞིག་གི་ཁྱིམ་ཡིན་པ་ཁྱོན་ནས་མ་ཤེས་ཚུལ་བཤད་ཀྱང་ཆོག ཁོང་ཚོས་གསལ་བསྒྲགས་མཐོང་ནས་དེར་བསྒྲགས་པའི་ཅ་ལག་དག་ལ་བལྟ་འདོད་པ་དང་། སྔོན་ལ་གཅིག་འདེམས་འདོད་པ་ཙམ་ཡིན་ཚུལ་བཤད་ཆོག དེ་མ་ཡིན་པའི་གནས་ལུགས་དང་མཐུན་པའི་བཤད་སྟངས་ཤིག་ཅི་ཡང་མེད་པ་རེད།

བསམ་ཚུལ་འདི་འདྲ་ཞིག་བཟུང་ནས། ཁོང་ཚོར་རྩ་ཆེ་བའི་དངོས་རྫས་འདི་དག་གི་ཁྲོད་ནས་སྨད་འཚོང་མའི་འཚོ་བའི་ཤུལ་རིས་འཚོལ་བ་ལ་སྒུག་བཟོད་མ་ཐུབ་པའི་འདོད་ཧམ་ཞིག་ཡོད་པ་རེད། ཁོང་ཚོས་མི་གཞན་པས་སྨད་འཚོང་མའི་བསམ་ཡུལ་ལས་འདས་པའི་འཚོ་བ་དང་འབྲེལ་ནས་བཤད་པའི་སྐད་ཆ་ཡང་འདྲ་མིན་གོ་མྱོང་ཡོད་ངེས་པ་རེད།

སྟབས་མ་ལེགས་པ་ཞིག་ནི་སྨད་འཚོང་མ་མེད་སོང་བ་བསྟུན་ནས་ངོ་མཚར་བའི་དོན་དག་གང་མང་ཡང་མཉམ་དུ་ཡལ་བ་དེ་རེད། སྐུ་ལྕམ་འདི་དག་གིས་འབད་རྩོལ་ཇི་ལྟར་བྱས་ན་ཡང་། མོ་ཤི་བའི་རྗེས་ཀྱི་ཕམ་ཚོང་བརྒྱག་རྒྱུའི་ཅ་ལག་མ་གཏོགས་མཐོང་མི་ཐུབ་ལ། མ་ཤི་སྔོན་དུ་ཕམ་ཚོང་བརྒྱབས་ཟིན་པ་དག་ནི་ད་ཆ་ཆ་ཙམ་ཡང་མཐོང་མ་ཐུབ་པ་རེད། འོན་ཀྱང་། འདིར་ཉོ་རི་བ་ནི་ད་དུང་མི་ཉུང་བ་ཞིག་མཆིས་ཏེ། ཁྱིམ་ཆས་ཚང་མ་ཧ་ཅང་མཛེས་ཤིང་བཀྲག་མདངས་ལྡན་ལ། ཙན་དན་གྱིས་གྲུབ་ཅིང་བྷུ་ཨར་ཕྲ་ཞིབ་བརྐོས་རིས་ཅན་གྱི་ཆ་སྒམ་དང་སྒྲོག་ཙེ། སེ་ཧྲུའུ་ལེ་གྲོང་དང་རྒྱ་ནག་ནས་ཐོན་པའི་རྫ་ཆས། ས་ཁིག་སིན་ས་ཆ་ནས་ཐོན་པའི་ལྡེར་བཟོ་དང་། དར་ཟབ། དར་གྱི་སྣམ་བུ། མཐའ་རྒྱན་སོགས་ཆ་ཚང་འཛོམས་འདུག

ང་རང་ཧ་ལས་ཤིང་ཧང་སངས་པའི་བུད་མེད་དེ་རྣམས་དང་འགྲོགས་ཏེ་ཁང་མིག་རེ་རེ་བརྒྱུད་ནས་སོང་བ་ཡིན། ཁོང་ཚོ་ཏར་ཟིག་གི་རས་ལས་གྲུབ་པའི་སྒྲིབ་ཡོལ་བཀལ་ཡོད་པའི་ཁང་མིག་ཅིག་ཏུ་འཛུལ་སོང་ལ། ཏག་ཏག་ང་ནང་ལ་འཛུལ་རྩིས་བྱེད་དུས་ཁོང་ཚོ་ཁོང་ཚོའི་མཚར་སྙེག་གི་བྱ་སྤྱོད་ལ་ཁ་སྐྱེངས་པོ་བཟོས་སོང་བ་བཞིན་ཕྱིར་བཀྱེད་ནས་སླེབས་བྱུང་བས། འདིས་ཀྱང་ང་རང་གི་རྒྱུས་ལོན་མཐར་ཐུག་པ་བྱེད་འདོད་པར་ངང་སྒུག་བྱེད་མི་ཐུབ་པ་བཟོས་སོང་། མ་གཞིར་དེ་ནི་མཛེས་བཟོ་ཁང་ཞིག་རེད་འདུག་ལ་ནང་དུ་མཛེས་ཆས་འདྲ་མིན་ཀྱིས་ཁེངས་ནས་འདུག རྣམ་པ་འདིས་ཀྱང་འདས་པོའི་མ་ཤི་སྔོན་གྱི་བག་མེད་ཀྱི་རྒྱུ་ནོར་འཛད་སྤྱོད་ཀྱི་ཚད་གང་འདྲ་ཞིག་ལ་སླེབས་ཡོད་པ་ལས་སླ་བོར་རྟོགས་ཐུབ་པ་ཞིག་རེད། རྩིག་འགྲམ་གྱི་ཞེང་ལ་ཁྲི་ཙེ་གསུམ་དང་དཀྱུས་ལ་ཁྲི་ཙེ་དྲུག་ཅན་གྱི་སྒྲོག་ཙེ་ཞིག་གི་སྟེང་དུ་ཨོ་ཁིག་ཁི་དང་ཨོ་དི་ཨིག་ལག་རྩལ་བ་གྲགས་ཅན་གཉིས་ཀྱིས་བཟོས་པའི་དངོས་རྫས་རྩ་ཆེན་འདྲ་མིན་འོད་ལམ་ལམ་བྱེད་ཅིང་། སྣ་ཁ་མང་ཞིང་ལྟ་བས་ཆོག་མི་ཤེས་པ་ཞིག་འདུག འདི་ལྟ་བུའི་བུད་མེད་ཅིག་སྟེ། ཁོ་མོའི་མཛེས་བཟོ་དང་དོད་ལ་མེད་དུ་མི་རུང་བའི་དངོས་རྫས་འབོར་ཆེན་འདི་དག་གསེར་གྱིས་བཟོས་ཡོད་པ་མིན་ན་ནི་དངུལ་གྱིས་བཟོས་ཡོད་པ་ཤ་སྟག་ཡིན་པ་རེད། དེར་མ་ཟད་བསགས་དངོས་འདི་དག་ནི་ལོ་ཟླ་འདི་དག་གི་ཁྲོད་དུ་རིམ་གྱིས་རིམ་གྱིས་བྱས་ན་ད་གཟོད་བསགས་ཐུབ་པ་རྐྱང་རེད། དགའ་རོགས་སུ་འདྲ་ཞིག་ཡིན་ཡང་མི་གཅིག་ཁོ་ནས་འདི་བཞིན་ཆ་འཛོམས་པ་ཞིག་མཁོ་སྤྲོད་བྱེད་ཐུབ་ཐབས་མེད་པ་ཞིག་རེད།

བདག་གིས་འདི་ལྟ་བུའི་བུད་མེད་ཅིག་གི་མཛེས་བཟོ་ཁང་མཐོང་རྗེས། ཡ་མཚན་ཅང་མི་སྐྱེས་པར་དེ་ལས་ལྡོག་སྟེ་དགའ་སྣང་ཁྱད་པར་བ་ཞིག་དང་སྦྲགས་དངོས་རྫས་རེ་རེར་ཞིབ་ཚགས་པོར་བལྟས་པ་ཡིན་ལ། དེ་ལས་ཞིབ་ཚགས་པོའི་བརྐོ་བཟོའི་བཀོལ་ཆས་ཆ་ཚང་སྟེང་རུས་མིང་གི་གསལ་བྱེད་མགོ་མ་མི་འདྲ་དང་ཐལ་རིས་མི་གཅིག་པ་རེ་ཡོད་པ་མཐོང་བྱུང་། བདག་གིས་དངོས་རྫས་འདི་དག་རེ་རེར་ལྟ་བཞིན་པའི་མོད་ལ། དེ་དག་རེ་རེས་ང་རང་ལ་སྙིང་རྗེ་བའི་བུ་མོ་འདིའི་ལང་ཚོ་ཚོང་བསྒྱུར་གྱི་འཚོ་ཐབས་དེ་དྲན་དུ་བཅུག་བྱུང་། 

བརྩམས་སྒྲུང་འདི་ནི་(The lady of the Camellias)ཕ་རན་སིའི་རྩོམ་པ་པོ་གྲགས་ཅན་ཨེ་ལེགས་ཟན་ཊར་ཌུ་མ་སིས་བརྩམས་པའི་བརྩེ་དུང་གི་སྒྲུང་གྲགས་ཅན་ཞིག་རེད། བརྩམས་སྒྲུང་འདི་བཀླགས་པའི་བརྒྱུད་རིམ་ཁྲོད་ང་ལ་ཚོར་བ་ཤུགས་ཆེན་པོ་བྱུང་བ་ནི། ལྷད་མེད་ཀྱི་བརྩེ་དུང་ནི་འདི་འདྲ་ཞིག་ལོས་ཡིན་བསམས་པ་ཞིག་བྱུང་།

*གསལ་བཤད།

འདི་ནི་༢༠༠༨ལོའི་གུང་གསེང་སྐབས་ལྷོ་ཕྱོགས་འབྲས་སྤུངས་སུ་ཡོད་དུས་ཟླ་༦པའི་ཚེས་བཅུ་དགུ་ཉིན་ནས་སྒྱུར་མགོ་བརྩམས་ཏེ་བསྒྱུར་བ་ཡིན། ད་ཐེངས་གུང་གསེང་དང་བསྟུན་ནས་ལྷག་མ་རྣམས་རྫོགས་པར་བསྒྱུར་བའི་འཆར་གཞི་ཡོད་མོད་ཀྱང་། ཁ་སྔོན་བོད་ནས་ཐོན་པའི་དེབ་གསར་བ་དག་ལས་ཨོ་རྒྱན་རྡོ་རྗེ་ཟེར་བ་ཞིག་གིས་བརྩམས་སྒྲུང་འདི་བསྒྱུར་ཟིན་ནས་དེབ་ཏུ་བསྐྲུན་༼དེབ་མིང་ཇ་ཤིང་མེ་ཏོག་མ་ཞེས་བཏགས་འདུག་ལ། བོད་ལྗོངས་མི་རིགས་དཔེ་སྐྲུན་ཁང་ནས་དཔར་འདུག༽འདུག་པ་མཐོང་བ་དང་། དེའི་འགྱུར་གྱི་མ་ཡིག་ཀྱང་རྒྱ་ཡིག་ཡིན་པ་སོགས་ལ་བརྟེན་འདི་མུ་མཐུད་བསྒྱུར་བའི་དགོས་པ་ཆེར་མ་མཐོང་། དེ་བས་འདིར་སྔོན་མར་བསྒྱུར་ཟིན་པའི་ཤོག་ངོས་འདི་དག་རྒྱ་ཆེའི་ཀློག་པ་པོ་ཡོངས་ཀྱི་སྤྱན་ལམ་དུ་བསྟར་བ་ཡིན།