རྟེན་འབྱུང་གི་སྒྲ་སྒྲུབ་བྱེ་བྲག་རྟོགས་བྱེད་བཞུགས་སོ།།

 

Sanskrit: प्रतीत्यसमुत्पाद; Pali: पटिच्चसमुप्पाद paṭiccasamuppāda

ཨོཾ་སྭསྟི། སངས་རྒྱས་བཅོམ་ལྡན་འདས་དང་། འཕགས་པ་ཀླུ་སྒྲུབ་ལ་ཕྱག་འཚལ་ལོ། །

བྱིངས་ཨད་སོགས་ལས་ཨི་ཎ་དང་ཝཱི་དང་ཝཱ་འགྲོ་བ་ལ་ཞེས་པ་ཨི་ཎ་བྱིངས་སུ་འགྱུར་རོ། །དེའི་ཎ་རྟགས་ཀྱི་དོན་ཡིན་པས་ཕྱིས་ཏེ། ཨི་གཞག་གོ། །དེ་ལ་ཚིག་གསལ་དང་མཛོད་འགྲེལ་དུ། ཨེ་ཏི་ནི་འགྲོ་བའི་དོན་ཏོ་ཞེས་གསུངས་པ་ནི་བྱིངས་སུ་མཚོན་པ་ལ་ཤྟིཔའི་རྐྱེན་སྦྱར་བ་སྟེ། ཙནྡྲའི་མདོ་ལེའུ་གསུམ་པར། རང་གི་ངོ་བོ་ལ་ཨི་དང་། ཀི་དང་། ཤྟིཔའོ་ཞེས་གསུངས་པས་ཤྟིཔའོ། །དེའི་ཤ་དང་། བ་རྟགས་ཀྱི་དོན་ཡིན་པས་དབྱིའོ། །ལེའུ་ཉི་ཤུ་གཉིས་པར་བྱ་བའི་དོན་གྱི་ཨིཀའི་ཨཏ་ཨེངའོ་ཞེས་པས་ཨི་ཨེར་འགྱུར་ཏེ། ཨེ་ཏིའོ། །(དེ་བོད་ཀྱི་ཡིག་མཁན་གྱིས་ཨི་ཏི་རུ་ནོར་སྣང་ངོ་། །བྱིངས་སུ་འགྱུར་རྒྱུ་ཨི་ཡིན་ནོ། །) དེའི་སྔོན་དུ་ཉེ་བསྒྱུར་པྲ་ཏི་སྟེ། དེ་ལ་རྣམ་དབྱེ་གང་སྦྱར་ཡང་མི་ཟད་པའི་ཚིག་སྡུད་བྱས་ཏེ་དབྱིའོ། །ལེའུ་གསུམ་པར། བྱེད་པ་བོ་གཅིག་པ་དག་གི་སྔ་མ་ལས་སོ་ཞེས་པ་གང་གི་ཀྟྭཱ་ཞེས་པ་ལ་བསྙེགས་པས་ཀྟྭཱའི་རྐེན་སྦྱར་རོ། །ལེའུ་ཉི་ཤུ་བར།ནཉ་མིན་པའི་ཚིག་སྡུད་ལ་ཀྟྭཱའི་ལྱཔའོ་ཞེས་པས་ཀྟྭཱ་ལྱཔ་རུ་བསྒྱུར་རོ། །

དེའི་ལ་ཡིག་དབྱིངས་ཀྱི་དོན་ཡིན་ཞིང་པ་ཡིག་ཏུཀ་འབྱུང་བའི་ཆེད་དུ་རྟགས་ཀྱི་དོན་ཡིན་པས་ཕྱིས་ལ་ཡ་ཡིག་གཞག་གོ ། ལེའུ་བཅུ་བདུན་པར། ཐུང་ངུའི་ཏིང་མ་ཡིན་པ་ལ་བི་ཏ་ལ་ཏུཀའོ་ཞེས་པས་ཨི་དང་ཡའི་བར་དུ་ཏུ་ཀའོ། །དེའི་ཀ་ཡིག་རྟགས་ཀྱི་དོན་དང་། ཨུ་ཡིག་བརྗོད་པའི་དོན་ཡིན་པས་ཕྱིས་ཏེ་ཏ་བཞག་པས་ཡ་དང་བརྩེགས་པ་ཏྱའོ། །ལེའུ་བཅུ་བདུན་པར། ཨཀ་ནི་ཨ་ཀ་ལ་རིང་བོའོ་ཞེས་པས་པྲ་ཏཱིའི་ཨི་ཡིག་དང་བྱིངས་ཀྱི་ཨི་ཡིག་གཉིས་དག་རིང་བོར་བྱས་ཏེ། པྲ་ཏཱི་ཏྱའོ། །

ལེའུ་བཞི་བར་དོན་ཙམ་ལ་དང་བོའོ་ཞེས་པས་རྣམ་དབྱེ་དང་བོ་སུ་སྦྱར་རོ། །ལྱཔ་ནི་གྲངས་མེད་དམ་མི་ཟད་པ་ཡིན་པས་ན། བཞི་བར་གྲངས་མེད་ལས་སུཔའི་འཇིག་གོ་ཞེས་པས་སུ་དབྱིའོ། །ཡང་བྱིངས་དི་ཝ་སོགས་སུ་པད་འགྲོ་བ་ལའོ་ཞེས་པས་པ་དབྱིངས་སོ། །དེའི་སྔོན་དུ་སམ་དང་། ཨུད་ཉེར་བསྒྱུར་རོ། །འགྲོ་བའི་དོན་ཅན་གྱི་བྱིངས་ཡིན་ཡང་ཉེར་བསྒྱུར་དེ་དག་དང་སྦྲེལ་བས་འབྱུང་བ་ལ་འཇུག་སྟེ། སྐད་ཀྱི་བྱིངས་ནི་སྟོབས་ལྡན་ཡང་ཞེས་སོགས་སོ། །ལེའུ་གསུམ་པར། བྱེད་པ་ལའང་གྷཉའོ་ཞེས་པས་གྷཉའི་རྐྱེན་སྦྱར་རོ། །གྷའི་སྲོག་ཨ་ཡིག་བཞག་ལ། གྷ་དང་ཉ་ཡིག་རྟགས་ཀྱི་དོན་ཏོ། །ལེའུ་ཉེར་གཅིག་པར། ཉིད་ལའོ་ཞེས་པ་དེ་གོང་གི་ཨཱཏ་ཅེས་པ་ལ་བསྙེགས་པས་པཱ་ཞེས་པར་སྦྱར་རོ། །སྒྲ་བ་རྣམས་ཀྱི་ངག་ལ། དབྱངས་མེད་དབྱངས་དང་སྦྱར་རོ་ཞེས་འདོན་པས་སམ་གྱི་མ་ལ་ཨུ་སྲོག་ཏུ་སྦྱར་ཞིང་ད་ལ་གྷཉའི་ཨ་ཡིག་སྦྱར་ཏེ། ས་མུཏྤཱ་ད་ཞེས་པའོ། །

[དེ་བས་གོང་འོག་ཐམས་ཅད་སྦྱར་བས། པྲ་ཏཱི་ཏྱ་ས་མུ་ཏྤཱ་ད་སྟེ་རྟེན་ཅིང་འབྲེལ་བར་འབྱུང་བ་ཞེས་པའི་དོན་ནོ།།]

འདི་ན་ཤིན་ཏུ་མཁས་པར་ཁས་འཆེ་ཡང་། །འདི་ཙམ་གྱིས་ཀྱང་མགོ་བོ་རྨོངས་འགྱུར་བ། །ཐོས་པ་ཉུང་ངུས་ཚིམ་པ་དེ་རྣམས་ཀྱང་། །མྱུར་དུ་རྟེན་འབྱུང་མངོན་སུམ་རྟོགས་པར་ཤོག །རྟེན་ཅིང་འབྲེལ་བར་འབྱུང་ཞེས་པ། །ཆོས་རྣམས་ཀུན་གྱི་ཆོས་ཉིད་ཀྱིས། །ཆོས་ཀུན་སྤྲོས་བྲལ་ཉིད་གསུངས་པ། །གཉིས་མེད་གསུང་བ་སྲས་བཅས་མཆོད། །

ཅེས་པ་དཔལ་ལྡན་བློ་གྲོས་བརྟན་པས་བར་སྐབས་སུ་སྨྲས་པའོ།།   

དཏ། གད། རེ། ༦༤བ༣-༦༥ན། ཟླ་བ་གཞོན་ནུས་ཁོལ་དུ་ཕྱུང་ཞིང་གཅིག་ཞུས་སོ།།