༄༅། །བསྟན་བཅོས་མཁས་པའི་ཁ་རྒྱན་བཞུགས་སོ། །
 |
ས་སྐྱ་པཎྜི་ཏ།
༄༅། །ཨོཾ་སྭ་སྟི་སིདྡྷཾ། སྒྲའི་བསྟན་བཅོས་མཁས་པའི་ཁ་རྒྱན།
བླ་མ་དང་དཀོན་མཆོག་གསུམ་ལ་གུས་པས་ཕྱག་འཚལ་ལོ། །
སྐུ་ནི་འཆི་མེད་དབང་བོས་མཚོན་དཀའ་ཞིང༌། །གསུང་ནི་ཚངས་པའི་དབྱངས་ལ་ཕྲག་དོག་བྱེད། །
ཕྱོགས་ལས་རྣམ་པར་རྒྱལ་བའི་ཐུགས་མངའ་བ། །བདག་གི་སྙིང་ལ་ཡུན་དུ་གནས་པར་མཛོད། །
གསར་བཅད་སྐད་ཀྱི་ནོར་བུ་རིན་ཆེན་ཚོགས། །རྣམ་དག་བློ་ཡིས་བྱི་དོར་ལེགས་བྱས་ཤིང༌། །
དྲི་མེད་ཚིག་གི་སྲད་བུས་ལེགས་བརྒྱུས་ཏེ། །མཁས་རྣམས་ཁ་རྒྱན་མཛེས་པ་བདག་གིས་བྱ། །
དེ་ལ་དང་བོར་དབྱངས་རྣམས་ནི་ལྔའོ། །ཨ་ཡིག་བོར་བ་རྣམས་ནི་འདིར་ཡན་ལག་གོ །ཀ་ལ་སོགས་པ་རྣམས་ནི་གསལ་བྱེད་རྣམས་སོ། །བཞི་བཞི་བའི་སྡེ་བ་ནི་བདུན་ནོ། །ཧ་ནི་མཐར་གནས་པའོ། །ག་ང་ད་ན་བ་མ་འ་ར་ལ་ས་རྣམས་ནི་རྗེས་སུ་འཇུག་པ་རྣམས་སོ། །ད་ས་དག་ནི་ཡང་འཇུག་པ་དག་གོ །ད་ནི་ན་ར་ལ་རྣམས་ཀྱིའོ། །ས་ནི་ག་ང་བ་མ་རྣམས་ཀྱིའོ། དེ་རྣམས་ལས་ག་ད་བ་མ་འ་རྣམས་ནི་སྔོན་དུའང་ངོ༌། །ལྷག་མ་རྣམས་ནི་གང་དུ་ཡང་མ་ཡིན་པའོ། །དེ་རྣམས་ལ་རྐྱང་བ་དང་འཕུལ་བ་དང་བརྩེགས་པ་དང༌། རྗེས་སུ་རྐྱང་འཇུག་དང་ཡན་ལག་རྣམས་སྦྱར་བས་ཕྱེ་བའི་ཡི་གེའི་རྣམ་གྲངས་ནི་གཞན་དུ་གྲགས་པ་ཉིད་དོ། ། ཞེས་པ་ཕྲད་ཀྱི་སྦྱོར་བ་ལས་དང་བོའོ།། །།
གི་ཀྱི་གྱི་འི་རྣམས་ཨི་ཡིག་གི་རྐྱེན་ནོ། །གིར་ཀྱིར་གྱིར་ཡིར་རྣམས་ཀྱང་ངོ༌། །གིས་ཀྱིས་གྱིས་ཡིས་རྣམས་ཀྱང་ངོ༌། །ཅིང་ཞིང་ཤིང་རྣམས་ཀྱང་ངོ༌། །ཅིག་ཤིག་ཞིག་རྣམས་ཀྱང་ངོ༌། །ཅི་ཇི་དག་ཀྱང་ངོ༌། །ཏུ་དུ་རུ་སུ་རྣམས་ཨུ་ཡིག་གིའོ། །པུ་བུ་འུ་རྣམས་ཀྱང་ངོ༌། །པུར་བུར་འུར་རྣམས་ཀྱང་ངོ༌། །པུས་བུས་འུས་རྣམས་ཀྱང་ངོ༌། །སྟེ་དེ་ཏེ་རྣམས་ཨེ་ཡིག་གིའོ། །ཅེ་ཤེ་ཞེ་རྣམས་ཀྱང་ངོ༌། །ཅེས་ཤེས་ཞེས་རྣམས་ཀྱང་ངོ༌། །ག་སོགས་རྣམས་ལ་ཨོ་ཡིག་སྦྱར་བ་རྣམས་ཨོ་ཡིག་གིའོ། །པོ་ཝོ་མོ་རྣམས་ཀྱང་ངོ༌། །པོར་ཝོར་མོར་རྣམས་ཀྱང་ངོ༌། །པོས་ཝོས་མོས་རྣམས་ཀྱང་ངོ༌། །པ་བ་ཝ་མ་རྣམས་ཨ་ཡིག་གིའོ། །པར་བར་ཝར་མར་རྣམས་ཀྱང་ངོ༌། །པས་བས་ཝས་མས་རྣམས་ཀྱང་ངོ༌། །ཀྱང་ཡང་འང་རྣམས་ཀྱང་ངོ༌། །རྣམ་པར་བརྟག་པ་ཅན་ཡང་ངོ༌། །འདི་ལ་སོགས་པ་དོན་གྱི་ཕྲད་རྣམས་ནི་གཞན་དུ་གྲགས་པས་འདིར་མ་བཤད་དོ། །ཞེས་པ་ཕྲད་ཀྱི་སྦྱོར་བ་ལས་གཉིས་པའོ།། །།
ག་ང་དག་ལས་ཕ་རོལ་དུ་གིའོ། །ད་བ་ས་རྣམས་ལས་ཀྱིའོ། །ན་མ་ར་ལ་རྣམས་ལས་གྱིའོ། །འ་ལས་འིའོ། །ས་མཐའ་ཅན་སྤངས་པའི་ཡང་ངོ༌། །རང་དང་ས་རྗེས་སུ་འཇུག་པའི་རྣམས་ཀྱང་དེ་བཞིན་ནོ། །བྱ་བ་ལ་སྦྱོར་བའི་ཀུན་ཏུ་གྱིས་སོ། །ག་ད་བ་རྣམས་ཀྱི་ཅིང་ངོ༌། །སའི་ཤིང་ངོ༌། །ལྷག་མ་རྣམས་ཀྱི་ཞིང་ངོ༌། །ག་ལ་སོགས་པ་སྤངས་པའི་ཡང་ངོ༌། །ད་ཡང་འཇུག་པ་རྣམས་ཀྱི་ཅིང་ཡང་ ནའོ། །ཅིག་ཤིག་ཞིག་རྣམས་ཀྱང་དེ་བཞིན་ནོ། །རྗེས་འཇུག་སྤངས་པའི་ཅིག་ཡང་ནའོ། །བྱ་བ་ལ་སྦྱོར་བའི་ཡང་ནའོ། །ས་ལས་ཅིག་ཀྱང་ངོ༌། །ཞིག་སྟེ་སླར་འདྲ་ཕྱིར་རྣམས་ལ་ཅིའོ། ཞིག་ལ་ཅི་ཡང་ངོ༌། །སྙེད་སྲིད་ལྟར་བཞིན་སྐད་རྣམས་ལ་ཇིའོ། །ཞེས་པ་ཕྲད་ཀྱི་སྦྱོར་བ་ལས་གསུམ་པའོ།། །།
ག་བ་དག་གི་ཕ་རོལ་ཏུའོ། །ང་ད་ན་མ་ར་ལ་རྣམས་ཀྱི་དུའོ། །ད་ཡང་འཇུག་པ་རྣམས་ཀྱི་ཏུ་ཡང་ནའོ། །ཞུགས་པའི་ཏུ་ཉིད་དོ། །འ་འི་རུའོ། །ས་མཐའ་ཅན་ཕྱིས་པའི་ཡང་ངོ༌། །སའི་སུའོ། །གའི་པུའོ། །ལྷག་མ་རྣམས་ཀྱི་བུའོ། །འ་དང་རྗེས་འཇུག་མེད་པའི་འུ་ཡང་ནའོ། །ར་དང་ས་རྗེས་སུ་འཇུག་པ་རྣམས་ཀྱང་དེ་བཞིན་ནོ། །ཞེས་པ་ཕྲད་ཀྱི་སྦྱོར་བ་ལས་བཞི་བའོ། །
ག་ང་བ་མ་འ་རྣམས་ཀྱི་ཕ་རོལ་ཏུ་སྟེའོ། །དའི་དེའོ། །ན་ར་ལ་ས་རྣམས་ཀྱི་ཏེའོ། །ད་ཡང་ཞུགས་པའི་ཡང་ངོ༌། །ས་མཐའ་ཅན་ མེད་པའི་སྟེའོ། །ཅེ་ག་ད་བ་རྣམས་ཀྱིའོ། །ཤེ་སའི་འོ། །ཞེ་ལྷག་མ་རྣམས་དང་རྗེས་འཇུག་མེད་པའི་ཡང་ངོ༌། །སའི་ཡང་ནའོ། །ཅེས་ཤེས་ཞེས་རྣམས་ཀྱང་དེ་བཞིན་ནོ། །ཞེས་པ་ཕྲད་ཀྱི་སྦྱོར་བ་ལས་ལྔ་བའོ།། །།
ག་སོགས་རྣམས་ཀྱི་ཕ་རོལ་ཏུ་རང་རང་ལ་ཨོ་ཡིག་སྦྱོར་བའོ། །དེ་ཡང་འཇུག་པ་རྣམས་ཀྱི་ཏེ་ཡང་ནའོ། །ཞུགས་པའི་ཏོ་ཉིད་དོ། །ས་མཐའ་ཅན་བོར་བའི་འོ་ཉིད་དོ། །ས་མཐའ་ཅན་གྱི་ཕ་རོལ་ཏུ་པོའོ། །འ་དང་དེ་རྣམས་མེད་པའི་འོ་ཡང་ངོ༌། །ཐམས་ཅད་ལ་མོ་ཡང་ངོ༌། ར་དང་ས་རྗེས་སུ་འཇུག་པ་རྣམས་ཀྱང་དེ་བཞིན་ནོ། །ཞེས་པ་ཕྲད་ཀྱི་སྦྱོར་བ་ལས་དྲུག་པའོ། །
ག་ད་བ་ས་རྣམས་ཀྱི་ཕ་རོལ་ཏུ་པའོ། །ང་ར་ལ་རྣམས་ཀྱི་ཝ་ཡང་ནའོ། །ན་མ་དག་གི་པ་ཡང་ནའོ། །འའི་ཝའོ། །ས་མཐའ་ཅན་བོར་བའི་ཡང་ངོ༌། །ཐམས་ཅད་ལ་མ་ཡང་ངོ་། །ར་དང་ས་རྗེས་སུ་འཇུག་པ་རྣམས་ཀྱང་དེ་བཞིན་ནོ། །ཀྱང་ག་ད་བ་ས་རྣམས་ཀྱི་ཕ་རོལ་དུའོ། ཡང་ལྷག་མ་རྣམས་ཀྱིའོ། །ད་ཡང་འཇུག་པ་རྣམས་ཀྱི་ཀྱང་ཡང་ནའོ། །ས་མཐའ་ཅན་ཕྱིས་པའིའང་ངོ༌། །ཡང་ཡང་ནའོ། །རྣམ་པར་རྟོག་པ་ཅན་ནི་ག་སོགས་རྣམས་ཀྱི་ཕ་རོལ་ཏུ་རང་རང་གི་རྗེས་སུ་མ་སྦྱར་བའོ། །དེ་རྣམས་སྤངས་པའི་འམ་མོ། །ཞེས་པ་ཕྲད་ཀྱི་སྦྱོར་བ་ལས་བདུན་པའོ།། །།
དོན་གྱི་ངོ་བོ་སྟོན་པ་ནི་མིང་ངོ༌། དེ་ལས་ཕ་རོལ་ཏུ་རྣམ་དབྱེ་རྣམས་སོ། །ཉིད་དང་བོའི་གཅིག་གི་ཚིག་གིའོ། དག་གཉིས་ཀྱིའོ། །རྣམས་མང་བོའི་འོ། །ཏུ་དུ་སུ་རུ་རྣམས་ཕྲད་བཞིན་དུ་གཉིས་པའི་གཅིག་གིའོ། །འ་དང་ས་མཐའ་ཅན་མེད་པའི་རྗེས་སུ་སྦྱར་བ་ཡང་ངོ༌། །དག་ཏུ་གཉིས་ཀྱིའོ། །རྣམས་སུ་མང་བོའིའོ། །གིས་ཀྱིས་གྱིས་ཡིས་རྣམས་ཕྲད་བཞིན་དུ་གསུམ་པའི་གཅིག་གིའོ། །འ་དང་ས་མཐའ་ཅན་སྤངས་པའི་རྗེས་སུ་ས་སྦྱར་བ་ཡང་ངོ༌། །དག་གིས་གཉིས་ཀྱིའོ། །རྣམས་ཀྱིས་མང་བོའིའོ། ལ་བཞི་བའི་གཅིག་གིའོ། །དག་ལ་གཉིས་ཀྱིའོ། །རྣམས་ལ་མང་བོའིའོ། །ལས་ལྔ་བའི་གཅིག་གིའོ། །དག་ལས་གཉིས་ཀྱིའོ། །རྣམས་ལས་མང་བོའིའོ། །ནས་དག་ནས་རྣམས་ནས་རྣམས་ཡང་ནའོ། །གི་ཀྱི་གྱི་འི་རྣམས་ཕྲད་བཞིན་དུ་དྲུག་པའི་གཅིག་གིའོ། །དག་གི་གཉིས་ཀྱིའོ། །རྣམས་ཀྱི་མང་བོའིའོ། །ན་བདུན་པའི་གཅིག་གིའོ། །དག་ན་གཉིས་ཀྱིའོ། །རྣམས་ན་མང་བོའིའོ། །གཉིས་པའི་རྣམས་དང༌། བཞི་བའི་རྣམས་དང༌། བདུན་པའི་རྣམས་ཡང་ནའོ། །བརྒྱད་པའི་རྣམས་དང་བོའི་རྣམས་ལ་ཀྱེ་སྦྱར་བའོ། །ཞེས་པ་རྣམ་པར་དབྱེ་བའོ། །
ལས་ལ་དང་བོར་འཇུག་པའི་བྱེད་པ་ལ་འ་ཡང་ངོ༌། །ད་འཇུག་པའི་བྱེད་པ་ལའང་འ་ཡང་ངོ༌། །བ་འཇུག་པའི་ལ་འ་འམ་འ་མཐའ་ཅན་ཕྱིས་པ་ཡང་ངོ༌། མ་འཇུག་པའི་ལ་གའམ་འ་མཐའ་ཅན་བོར་བ་ཡང་ངོ༌། །འ་འཇུག་པའི་ལ་ནི་གཞན་མ་ཡིན་པ་ཉིད་དོ། །འ་མཐའ་ཅན་སྤངས་པའི་ལའང་ཡང་ངོ༌། །ལུས་དང་སྲོག་གཞན་དུ་འགྱུར་བ་ནི་ཅི་རིགས་པར་རོ། །བྱ་བ་ལ་ལས་གཙོ་བོར་སྟོན་ན་ལས་དང༌། བྱེད་པ་གཙོར་སྟོན་ན་བྱེད་པའི་སྒྲའོ། །ཡང་ན་ཅི་རིགས་པར་རོ། །བྱ་བ་བྱས་པ་ལ་ལ་ནི་གཞན་ཡང་ངོ༌། །གཉིས་པ་མང་བོའི་ཚིག་དག་ནི་དག་དང་རྣམས་ཉིད་དོ། །ཞེས་པ་བྱེད་པའི་ཚིག་གོ །
འདིར་ནི་ཕྲད་རྣམས་འདུད་པ་བཞིན། །རྣམ་དབྱེ་སྙན་པར་སྨྲ་བ་བཞིན། །བྱེད་ཚིག་གཡོས་ལེགས་སྟོན་པ་བཞིན། །མཁས་རྣམས་མགྲོན་དུ་བོས་པ་བཞིན། །ཕྲད་དང་རྣམ་དབྱེ་བྱེད་ཚིག་རྣམས། །འགྲན་པ་བཞིན་དུ་བསྟར་བ་འདི། །ཞལ་རས་རྒྱན་གྱིས་མཛེས་འདོད་པའི། །མཁས་པ་རྣམས་ལ་བདག་ཉིད་འབུལ། །ད་དུང་མཁས་ལ་ཉེར་མཁོ་བའི། །རྣམ་དབྱེ་དུ་མ་ཡོད་མོད་ཀྱི། །ཡི་གེའི་ཚོགས་ཀྱིས་རྣམ་སྐྲག་པས། །དོན་དེའི་སྤྲོས་པ་རེ་ཞིག་བཞག །ཁོ་བོས་ལེགས་པར་རྣམ་དཔྱད་ནས། །ཕན་པའི་བསམ་པས་བཤད་མོད་ཀྱང༌། །ནོངས་པའམ་ཕྲག་དོག་གིས་དོར་ན། །མཁས་རྣམས་བདག་ལ་བརྩེ་བར་མཛོད། །གསར་བཅད་ཇི་བཞིན་མཁས་རྣམས་ཀྱི། །ཁ་རྒྱན་བཀྲ་བས་རྣམ་སྤྲས་ལས། །ཐོབ་པའི་དགེ་བས་འགྲོ་རྣམས་ཀྱིས། །ཐུབ་མཚན་ཚངས་དབྱངས་ཐོབ་པར་ཤོག །ཅེས་པ་མཁས་པའི་ཁ་རྒྱན། ས་སྐྱ་པཎྜི་ཏས་སྐད་གསར་བཅད་དང་རྗེས་སུ་མཐུན་པར། བརྡ་སྤྲོད་པའི་མཁས་པ་རྣམས་ལ་ཉེ་བར་མཁོ་བ་བཞིན་རྒྱན་དུ་བྱས་པའོ། །དགེ་བར་གྱུར་ཅིག། །།
སྤྱི་ལོ་༢༠༢༠ཟླ་༡༢ཚེས་༢༠ལ་ཟླ་བ་གཞོན་ནུས་གཅིག་ཞུས་པ་ཕན་པར་སྨོན།
No comments:
Post a Comment