མཚན་མ་གཉིས་པ།
༼དེ་ནས་འབངས་མོ་ཞུགས་ཏེ༽
འབངས་མོས། རྗེའི་སྲས་མོ་མས་ལ་ཡ་ཅན་མས་བདག་ལ་གསུངས་པ།བུ་མོ་མེ་ཏོག་གསར་བ་ཅན་བདག་གི་མིང་བོ་ཇོ་བོ
་བཤེས་གཉེན་གྱི་དབྱིག་དེ་རིང་ཡུན་རིང་དུ་ཐོགས་སོ།། དེའི་ཕྱིར་སོང་ལ་འོང་ངམ་མི་འོང་རྟོགས་ཤིག་ཅེས་སོ།།
༼ཡོངས་སུ་བགྲོད་དེ་ཕྱི་རོལ་དུ་མངོན་པར་ཕྱོ གས་ཤིང་བལྟས་ནས༽ འདི་ཉིད་ནས་འོངས་པ་འདི་སུ་ཞིག་ཡིན།
༼ངེས་པར་བརྟགས་ནས༽ཅི་དྲུང་མོའམ། འབངས་མོ་གཉིས་པ་ཡང་ཞུགས་སོ།།
དང་བོ་མས། ༼ཉེ་བར་བཏུད་ནས༽གྲོགས་མོ། དྲུང་མོ་ཁྱོད་ཅིའི་ཕྱིར་མགྱོགས་པར་འགྲོ་བར་བྱེད།
གཉིས་པས། རྗེའི་སྲས་མོ་མ་ལ་ཡ་ཅན་མས་བདག་ལ་གསུངས་པ། བུ་མོ་གྲུང་མོ།བདག་གི་ལུས་ཀྱིས་མེ་ཏོག་འཐུ་བའི་ཡོངས་སུ་ངལ་བ་མི་བཟོད་དོ།།སྟོན་ཀའི་གདུང་བས་བྱས་པ་བཞིན་དུ་བདག་ཡོངས་སུ་གདུང་བས་ཤིན་ཏུ་ལྷག་པར་གཟིར་བར་གྱུར་ཏོ།། དེས་ན་ཁྱོད་སོང་ལ་ཆུ་ཤིང་གཞོན་ནུའི་འདབ་མས་བསྒྲིབས་པ་ཙན་དན་འཁྲི་ཤིང་གི་ཁང་བར། ཟླ་བ་ཆུ་ཤེལ་གྱི་རྡོ་ལ་མལ་སྟན་ཆས་གྱིས་ཤིག་ཅེས་སོ།། ཇི་ལྟར་གསུངས་པ་བཞིན་དུ་བདག་གིས་ཀྱང་བྱས་ཏེ། དེའི་ཕྱིར་སོང་ནས་རྗེའི་སྲས་མོ་ཉིད་ལ་སྦྲན་པར་བྱའོ།།
དང་བོ་མས། གལ་ཏེ་དེ་ལྟར་ཡིན་ན་མྱུར་དུ་ཆས་དག་གྱིས་ཤིག དེར་སོང་ན་དེའི་གདུང་བ་ཉེ་བར་ཞི་བར་འགྱུར་རོ།།
གཉིས་པས། ༼བགད་ནས་རང་གིས་རྟོགས་པར༽ གང་ཞིག་འདི་འདྲ་བའི་གདུང་བ་དག་ནི་དེ་ལྟ་བུས་ཉེ་བར་ཞི་བར་མི་འགྱུར་རོ།། རྣམ་པར་བཀྲ་ཞིང་དགའ་བར་བྱ་བ་ཙན་དན་འཁྲི་ཤིང་གི་ཁང་བ་མཐོ ན་ནས་དེ་ནི་ཤིན་ཏུ་ཡང་ལྷག་པར་འགྱུར་རོ ་ཞེས་བདག་རྟོག་གོ། ༼གསལ་བར༽གྲོགས་མོ་ཁྱོད་སོང་ཤིག བདག་གིས་ཀྱང་རྡོ་བའི་གཞི་བསར་བ་དག་རྗེའི་
སྲས་མོ་ལ་སྦྲན་པར་བྱའོ་ཞེས་ནས་སོང་སྟེ་འཇུག་པར་བྱེད་པའོ།།༼དེ་ནས་སྲེད་པ་དང་ལྡན་པའི་མ་ལ་ཡ་ཅན་མ་དང་། འབངས་མོ་ཡང་ཞུགས་སོ།།༽
འདྲེན་མས། ༼ཤུགས་ནར་ཕྱུང་ནས་བདག་ཉིད་ཀྱིས་རོགས་པར༽ སྐྱེ་བོ་དེ་ལ་སེམས་ཁྱོད་ཀྱིས་བདག་ངོ་ཚས། དེ་ལར་ཕྱིར་ཕྱོགས་པར་བྱས་ཏེ། ད་ནི་ཁོད་ཉིད་དེར་འགྲོ་བའི་ཕྱིར་ན། ཨེ་མ་ཁྱོད་ནི་བདག་ཉིད་རྒྱས་པར་བྱེད་པ་ཞིག་གོ།། ༼གསལ་བར༽ བུ་མོ་བཅོམ་ལྡན་མའི་གནས་སུ་འགྲོ་བའི་ལམ་དག་བདག་ལ་སྟོན་ཅིག
འབངས་མོས། རྗེའི་སྲས་མོ། ཙན་དན་འཁྲི་ཤིང་གི་ཁང་བར་གཤེགས་པ་མ་ལགས་སམ།
འདྲེན་མས། ༼ངོ་ཚ་དང་བཅས་པར༽བུ་མོ། ཁྱོད་ཀྱིས་ལེགས་པར་དྲན་པར་བྱས་སོ།། དེའི་ཕྱིར་ཚུར་ཤེག དེ་ཉིད་དུ་འགྲོ་བར་བྱའོ།།
འབངས་མོས། བྱོན་ཅིག བྱོན་ཅིག
༼རྗེའི་སྲས་མོ་སོང་བར་གྱུར་ཏོ།།༽
འབངས་མོས། ༼རྗེའི་སྲས་མོ་གཞན་དུ་སོང་བ་ན། འབངས་མོས་ཕྱི ར་བལྟས་ནས་མྱ་ངན་དང་བཅས་པར་བདག་ཉིད་ཀྱིས་རྟོགས་པར༽ ཀྱེ་མ། འདི་ནི་སྙིང་གིས་སྟོང་བ་༼སྨྱོན་པའི་དོན་རང་༽ཞིག་སྟེ་ཇི་ལྟར་ཡང་ལྷ་མོའི་གནས་དེ་ཉིད་དུ་འཇུག་པར་བྱེད་དོ།། ༼གསལ་བར་༽དེ་ན་ཙན་དན་འཁྲི་ཤིང་ཁང་བ་ཡོད་པ་མ་ཡིན་ནམ། དེས་ན་འདིར་བྱོན་ཅིག
འདྲེན་མས། ༼སྐྱེངས་པའི་འཛུམ་དང་བཅས་པར་དེ་ལྟར་བྱེད་དོ།།༽
འབངས་མོས། ཙན་དན་འཁྲི་ཤིང་གི་ཁང་བ་དེ་ནི་འདི་ལགས་སོ།། དེས་ན་ནང་དུ་ཞུགས་ཏེ་ཟླ་བ་ཆུ་ཤེལ་གི་ནོར་བུའི་རྡོ་ལ་རྗེའི་སྲས་མོ་བཞུགས་པར་མཛོད་ཅིག
༼གཉི་ག་འཁོད་དོ།།༽རང
འདྲེན་མས། ༼དེ་ལྟར་བྱས་ཏེ་ཤུགས་ནར་ཕྱུང་ནས་བདག་ཉིད་ཀྱིས་རྟོགས་པར༽བཅོམ་ལྡན་མེ་ཏོག་གི་མཚོན་དང་ལྡན་པ་གང་གི་གཟུགས་ཀྱིས་ཕམ་པར་བྱས་པ་དེ་༼སྤྲིན་གྱི་བཞོན་པ་རང༽ལ་ཅི་ཡང་མི་བགྱིད་པར་གནོད་པ་མ་བྱས་ཤིང་བུད་མེད་དུ་གྱུར་པ་དག་ལ་བསྣུན་པར་བགྱིད།ངོ་ཚ་བ་མ་མཆིས་སམ།༼ཞེས་ཏེ་མོས་པའི་གནས་སྐབས་ཀྱི་གར་དག་བྱས་ཏེ། གསལ་བར༽ ངེས་པར་བྱས་ནས་བུ་མོ་ཅིའི་ཕྱིར་ཡལ་འདབ་སྟུག་པོས་ཉི་མའི་འོད་ཟེར་སྒྲིབ་པ་དང་ལྡན་པའི་ཙན་དན་འཁྲི་ཤིང་གི་ཁང་བ་འདི་དག་དིང་བདག་གདུང་བའི་སྡུག་བསྔལ་སེལ་བར་མི་བྱེད།
འབངས་མོས། ༼འཛུམ་དང་བཅས་པར༽གདུང་བའི་རྒྱུ་ནི་བདག་གིས་ཤེས་ཏེ། འོན་ཀྱང་། རྗེའི་སྲས་མོ། བདག་ལ་ཐུགས་མི་ཆེས་པས་ཁས་ལེན་པར་མི་འགྱུར་རོ།།
འདྲེན་མས། ༼བདག་ཉིད་ཀྱིས་རྟོགས་པར༽འདིས་བདག་མཚོན་ཡང་རེ་ཞིག་དྲི་བར་བྱའོ།། ༼གསལ་བར༽བུ་མོ། རེ་ཞིག་དེ་དག་གིས་ཅི། དེའི་རྒྱུ་ཅི་ཡིན་བདག་ལ་སྨྲོས་ཤིག
འབངས་མོས། རྗེའི་སྲས་མོ་འདི་ནི་ཁྱོད་ཀྱི་སྙིང་ལ་འདོད་པའི་མཆོག །
འདྲེན་མས། ༼བརྟབས་པ་དང་བཅས་ཤིང་དགའ་བ་དང་བཅས་པར་ལངས་ཏེ། མདུན་དུ་གོམ་པ་གཉིས་གསུམ་སོང་ནས༽ དེ་གང་ན། གང་ན།
འབངས་མོས། ༼ལངས་ཏེ། འཛུམ་པ་དང་བཅས་པར༽རྗེའི་སྲས་མོ། ཅི་ལགས།
འདྲེན་མས། ༼ངོ་ཚ་དང་བཅས་པར་འདུག་སྟེ་ཁ་འོག་ཏུ་བལྟས་ནས་འཁོད་དོ།།༽
འབངས་མོས། རྗེའི་སྲས་མོ། བདག་ནི་འདི་སྐད་བརྗོད་པར་འདོད་དོ། འདི་ནི་ཁྱོད་ཀྱི་སྙིང་ལ་འདོད་པའི་མཆོག་གདུང་བའི་རྒྱུ་ཡིན་པ་གང་གིས་ན་ཙན་དན་འཁྲི་ཤིང་གི་ཁང་བ་རང་བཞིན་གྱིས་བསིལ་ཡང་ཁྱོད་ཀྱི་གདུང་བའི་སྡུག་བསྔལ་སེལ་བར་མི་ནུས་སོ།།
འདྲེན་མས། ༼དགའ་བ་དང་བཅས་པར་འབངས་མོ་ལ་འཁྱུད་ནས༽ བུ་མོ་གྲུང་མོ་ཁྱོད་ནི་ངེས་པར་གྲུང་མོ་སྟེ། གཞན་པ་ཅི་ཞིག་དྲི་བར་བྱ། དེས་ན་སྨྲོས་ཤིག
འབངས་མོས། རྗེའི་སྲས་མོ། ད་ལྟ་ཉིད་ཁྱོད་ལ་སྨྲས་པ་ཡིན་ན། དེས་ན་མཆོག་ལྟབས་བྱས་པའི་གདུང་བ་འདིས་རེ་ཞིག་གདུང་བར་མ་བྱེད་ཅིག གལ་ཏེ་བདག་གྲུང་མོ་ཡིན་པ་དེ་ལྟ་ན་དེ་ཡང་རྗེའི་སྲས་མོ་མཐོང་བ་མེད་པར་ཡུད་ཙམ་ཡང་གཞན་དུ་མངོན་པར་དགའ་བར་མི་འགྱུར་རོ།།འདི་ཡང་བདག་གིས་ཤེས་པ་ཉིད་དོ།།
འདྲེན་མས། ༼མཆི་མ་དང་བཅས་པར༽བུ་མོ། དེ་ལ་བུའི་སྐལ་བ་བདག་ལ་ག་ལ་ཡོད།
འབངས་མོས། རྗེའི་སྲས་མོ། དེ་སྐད་ཅི་ལ་གསུངས། ཁྱབ་འཇུག་བྲང་གི་གཞི་ལ་དཔལ་མོ་འཛིན་པ་ཡང་བདེ་བར་ཇི་ལྟར་འགྱུར།
འདྲེན་མས། སྐྱེ་བོ་ལེགས་པ་ངག་སྙན་པ་བོར་ནས། གཞན་སྨྲ་བར་བྱེད་དམ་ཅི། བུ་མོ། བདག་གི་གདུང་བ་འདི་བས་ཀྱང་འདི་ཤིན་ཏུ་ལྷག་པར་གཟིར་བ་སྟེ། གང་གཟི་བྱིན་ཆེན་པོ་དེ་ལ་ཚིག་ཙམ་གྱིས་ཀྱང་དགའ་བར་མ་བྱས་པ་བདག་ཚུལ་དང་མཐུན་པ་མ་ཡིན་པར་མཁྱེན་ཏོ།།༼ཞེས་ངུས་སོ།།༽
འབངས་མོས། ༼མཆི་མ་དང་བཅས་པར༽རྗེའི་སྲས་མོ། མ་བཤུམས་ཤིག ༼ལངས་ནས་ཡལ་འདབ་བླངས་ནས་བཙིར་ཏེ་ཁུ་བ་སྙིང་གར་བྱུགས་སོ།། ༽རྗེའི་སྲས་མོ། བདག་སྨྲའོ།། མ་བཤུམས་ཤིག ནུ་མའི་ངོས་ལ་བྱུགས་པ་ཙན་དན་ཡལ་འདབ་ཀྱི་ཐུང་ཆུ་འདི་ནི་ངེ ས་པར་རྒྱུན་ཆད་མེད་པར་འབབ་པ་མཆི་མའི་ཐིགས་པ་འདི་དག་གིས་དྲོ་བར་བྱས་པར་ཁྱོད་ཀྱི་སྙིང་གའི་གདུང་བ་མི་སེལ་ལོ།།༼ཞེས་ཏེ་ཆུ་ཤིང་གི་འདབ་མ་དག་གིས་གཡོབ་པར་བྱེད་དོ།།༽
འདྲེན་མས། ༼ལག་པས་བཟློག་ཅིང༽ བུ་མོ། མ་གཡོབ། མ་གཡོབ། ཆུ་ཤིང་གི་འདབ་མའི་རླུང་འདི་ནི་ཤིན་ཏུ་ཚའོ།།
འབངས་མོས། རྗེའི་སྲས་མོ། འདིའི་སྐྱོན་དུ་མ་བྱེད་ཅིག འདི་ལྟར་སྙམ་སྟེ། སྟུག་པའི་ཙན་དན་འཁི་ཤིང་ཡལ་འདབ་དང་འགྲོགས་པ་ཆུ་ཤིང་གི་འདབ་མའི་རླུང་འདི་ནི་ཤིན་ཏུ་བསིལ་ཡང་ཁྱོད་ཉིད་ཀྱི་དབུགས་ཀྱིས་ཚ་བར་བྱས་སོ།།
འདྲེན་མས། ༼མཆི་མ་དང་བཅས་པར༽བུ་མོ། སྡུག་བསྔལ་འདི་ཉེ་བར་ཞི་བའི་ཐབས་འགའ་ཞིག་ཡོད་དམ།
འབངས་མོས། རྗེའི་སྲས་མོ། གལ་ཏེ་དེ་ཉིད་འདིར་འོངས་ན་ཡོད་པ་ཉིད་དོ།།
༼དེ་ནས་འདྲེན་པ་དང་། བིདཱུཥཀ་དག་ཞུགས་སོ།།༽
འདྲེན་པས། ཕྱིར་ལོག་དཀར་དང་དཀར་མིན་མིག་གི་འོད་ཀྱིས་བསྟི་གནས་ཤིང་དེ་རྣམས།། ཡལ་ག་ལ་ཆགས་རི་དྭགས་པགས་པའི་ཚོགས་ཀྱིས་སྒེག་པ་བཞིན་བྱེད་ཅིང་།། ཐུབ་པའི་སྔོན་དུ་བདག་ལ་བལྟས་པ་གང་དེ་ཉིད་ཀྱིས་བདག་ནི་བཅོམ་གྱུར་ན།། མེ་ཏོག་མདའ་ཅན་ཁྱོད་ཀྱིས་དོན་མེད་མདའ་འདི་དག་ནི་ཅི་སླད་འཕེན་པར་བྱེད།།
བིདཱུཥཀས། ཀྱེ། གྲོགས་པོ། ངེས་པར་ཁྱོད་ཀྱི་བརྟན་པ་གང་དུ་སོང་།
འདྲེན་པས། གྲོགས་པོ། བདག་ལ་བརྟན་པ་ཡོད་པ་ཉིད་མ་ཡིན་ནམ།གང་གི་ཕྱིར།
ཟླ་བས་དག་པའི་མཚན་ལས་མིན་ནམ་ཅི་ཞིག་ཨུཏྤལ་སྔོན་པོ་མ་བསྣམས་སམ།།
རབ་རྒྱས་ཛཱ ་ཏའི་མེ་ཏོག་དྲི་ལྡང་སྲོད་ལའི་རླུང་དག་བཟོད་པ་མིན་ནམ་ཅི།།
པད་ཚལ་སྦྲང་རྩི་བྱེད་པའི་དར་དིར་སྒྲ་དག་ཅི་ཞིག་བདག་གིས་མ་མཉན་ནམ།།
གདུང་བ་དག་གིས་གནོད་མེད་བདག་ལ་མི་བརྟན་པ་ཞེས་གང་གིས་ཁྱོད་རྗོད་བྱེད།།
ཡང་ནི། གོགས་པོ་ཨ་ཏིའི་རིགས་བདག་གིས་ཡང་ངག་པར་མ་བརྗོད་དོ།། ལུས་མེད་ཀྱིས་འཕངས་པ་མེ་ཏོག་གི་མདའ་ནི་བུད་མེད་ཀྱི་སྙིངགིས་བཟོད་པ་མ་ཡིན་ནམ། གང་གིས་ན་དེ་རིང་ཁོད་ཀྱི་མདུན་དུ་བདག་གིས་བརྟན་པ་ཡིན་ནོ་ཞེསབརྗོད་པར་བྱ།
བིདཱུཥཀས། ༼བདག་ཉིད་ཀྱིས་རྟོགས་པར༽འདི་ལྟར་བརྟན་པ་མེད་པ་ཉིད་དུ་ཡང་ཁས་ལེན་ཅིང་། འདིས་སྙིང་ལ་གདུང་བ་ཆེན་པོ་གནས་པ་དག་གསལ་བར་བྱེད་དོ།། དེས་ན་རེ་ཞིག་ཇི་ལྟར་ཡང་འདི་གཡེང་བར་བྱའོ།།༼གསལ་བར༽ཀྱེ། གྲོགས་པོ། དིང་ཁྱོད་བླ་མའི་བསྙེན་བཀུར་མྱུར་བ་ཉིད་དུ་བྱས་ནས་ཅིའི་སླད་དུ་འདིར་འོངས།
འདྲེན་པས། གྲོགས་པོ། གནས་དག་དྲིས་ཏེ་གཞན་སུ་ཞིག་ལ་འདི་སྨྲ་བར་བྱ། དིང་བདག་གི་རྨི་ལམ་དུ་ཤེས་པ་ནི་དགའ་མའི་མཆོག་དེ་ཉིད་མཛུབ་མོས་སྟོན་ཅིང་ཙན་དན་འཁྲི་ཤིང་གི་ཁང་བ་ཟླ་བ་ཆུ་ཤེལ་གྱི་སྟན་འདི་ལ་འདུག་ནས་མཛའ་བས་ཁྲོས་ཏེ། བདག་ལ་འགའ་ཞིག་སྨོད་བཞིན་དུ་ངུ་ཞིང་འདུག་པ་བདག་གིས་མཐོང་ངོ་།། དེས་ན་རྨི་ལམ་དུ་དགའ་མ་དང་འགྲོགས་པའི་དགའ་བ་ཉམས་སུ་མྱོང་བར་གྱུར་བའི་གནས་འདི་ཉིད་དུ་ཉི་མ་བསྐྱལ་བར་འདོད་དོ།། དེའི་ཕྱིར། ཚུར་ཤེག དེ་ཉིད་དུ་འགྲོ་བར་བྱའོ།། ༼ཞེས་ཏེ་སོང་ངོ།།༽
འབངས་མོས། ༼རིངས་པ་དང་བཅས་པར་ཐོས་ནས༽ རྗེའི་སྲས་མོ། རྐང་བའི་སྒྲ་འདྲ་བ་དག་ཐོས་སོ།།
འདྲེན་མས། ༼ རིངས་པ་དང་བཅས་པར་བདག་ཉིད་ལ་བལྟ་ཞིང༽ བུ་མོ། བདག་གི་སྤྱོད་པ་འདི་འདྲ་བ་འདི་མཐོང་ནས་འདི་འགའ་ཞིག་གིས་བདག་གི་སེམས་པ་རིག་པར་འགྱུར་རོ།། དེས་ན་ཤིང་མྱ་ངན་མེད་པ་དམར་བོའི་ཁྲོད་འདིར་འདུག་སྟེ། འདི་དག་སུ་ཞིག་ཡིན་བལྟ་བར་བྱའོ།།
༼དེ་བཞིན་བྱས་སོ།༽
བིདཱུཥཀས། འདི་ནི་ཙན་དན་འཁྲི་ཤིང་གི་ཁང་བ་སྟེ། དེས་ན་འཇུག་པར་བྱའོ།།༼གར་གྱིས་རབ་ཏུ་ཞུགས་པར་གྱུར་ཏོ།།༽
འདྲེན་པས། ཙན་དན་འཁྲི་ཤིང་དག་གི་ཁང་བ་ནི།། ཟླ་བ་ནོར་བུའི་རྡོ་དང་ལྡན་མོད་ཀྱང་།། ཟླ་བཞིན་མ་བྲལ་འདི་ལ་བདག་མི་དགའ།། ཟླ་འོད་དང་བྲལ་མཚན་མོའི་སྒོ་བཞིན་ནོ།།
འབངས་མོས། ༼མཐོང་ནས༽རྗེའི་སྲས་མོ། དགའ་བ་འཕེལ་བར་མཛོད་ཅིག ཁྱོད་ཀྱི་སྙིང་སྡུག་དེ་ནི་འདི་ཉིད་དོ།།
འདྲེན་མས། ༼མཐོང་ནས་དགའ་བ་དང་བཅས་ཤིང་བརྟབས་པ་དང་བཅས་པར༽བུ་མོ། འདི་མཐོང་བར་ཤིན་ཏུ་འཇིགས་པའི་ཕྱིར། འདི་དང་ཤིན་ཏུ་ཉེ་བར་འདུག་མི་བཟོད་དོ།། གལ་ཏེ་ན་འདིས་བདག་མཐོང་བར་འགྱུར་རོ།། དེས་ན་ཚུར་ཤེག གཞན་དུ་འགྲོའོ།། ༼བྱིན་པ་འདར་བ་དང་བཅས་པར་རྐང་བ་བཀོད་ནས༽བུ་མོ། བདག་གི་བྱིན་པ་དག་འདར་རོ།།
འབངས་མོས། ༼བགད་ནས༽ཤིན་ཏུ་སྐྲག་མ། འདིར་འཁོད་ཀྱང་ཁྱོད་སུ་ཞིག་གིས་མཐོང་། ཤིང་མྱ་ངན་མེད་དམར་བོའི་ཁྲོད ན་གནས་པ་དག་བརྗེད་དམ། དེས་ན་འདི་ཉིད་དུ་འཁོད་ལ་འདུག་ཅིག ༼དེ་ལྟར་བྱས་སོ།།༽
བིདཱུཥཀས། ༼བརྟགས་ནས༽ཀྱེ། གྲོགས་པོ། ཟླ་བ་ནོར་བུའི་རྡོ་ལམ་དེ་འདི་ཡིན་ནམ།
འདྲེན་པ(མ?)ས། ༼མཆི་མ་དང་བཅས་པར་ཤུགས་རིང་ཕྱུང་ངོ་།།༽
འབངས་མོས། རྗེའི་སྲས་མོ། འདི་འདི་ཞེས་པའི་གཏམ་དག་ཐོས་སོ།།དེས་ན་ངེས་པར་བརྟགས་ལ་མཉན་པར་བྱའོ།། ༼དེ་བཞིན་བྱས་སོ།།༽
བིདཱུཥཀས། ༼ལག་པ་བསྐྱོད་ཅིག༽ ཀྱེ་གྲོགས་པོ། ཟླ་བ་ནོར་བུའི་རྡོ་ལམ་དེ་འདི་ཡིན་ནམ་བྱས་པ་ན། ༼ལག་པས་འདེན་པ་བསྐྱོད་ཅིང༽ ཀྱེ་གྲོགས་པོ།བདག་བསྐྱར་དུ་འདི་སྐད་བརྗོད་པར་བྱ་སྟེ་ཟླ་བ་ནོར་བུའི་རྡོ་ལམ་དེ་འདི་ཉིད་དོ།། ༼རང༽
འདྲེན་པས། ༼ཡང་དག་པར་མཚོན་ཅིང་ལག་པས་བསྟན་ནས༽ལག་གཡོན་ཡལ་འདབ་དག་ལ་རྣམ་པར་དཀར་བའི་གདོང་བ་བཞག་ནས་ནི།།ཤུགས་རིང་དབུགས་འབྱིན་ཡིད་ལ་ཁོ་བ་ངེས་བྱས་སྨིན་མ་དག།ཅུང་ཟད་བསྐྱོད་ཅིང་ཡུན་རིང་ཐོགས་པ་བདག་ལ་བསམ་པ་གསལ་བྱས་པའི།། དགའ་མ་གང་དུ་བདག་གིས་མཐོང་བའི་ཟླ་བ་ནོར་བུའི་རྡོ་འདིའོ།། དེའི་ཕྱིར། ཟླ་བ་ནོར་བུའི་རྡོ་འདི་ཉིད་ལ་འདུག་པར་བྱའོ།།
བིདཱུཥཀས། གང་ཁྱོད་གསུངས་པའོ།།
༼གཉི་ག་ཉེ་བར་འཁོད་དོ།།༽
འདྲེན་མས། ༼བསམས་པ། འདིས་སེམས་པར་བྱེད་པ་དེ་སུ་ཞིག་ཡིན༽
འབངས་མོས། རྗེའི་སྲས་མོ། ཇི་ལྟར་ཡུ་བུ་ཅག་གིས་བསྒྲིབས་ནས་འདི་དག་མཐོང་བ་དེ་བཞིན་ཉིད་དུ། ཁྱོད་ཀྱང་འདི་དག་གིས་མཐོང་བ་ཡིན་པ་སྲིད་དོ།།
འདྲེན་མས། འདི་ནི་རིགས་ཏེ། འོན་ཀྱང་མཛའ་བས་ཁྲོ་བའི་དགའ་མའི་སྐྱེ་བོ་སྙིང་ལ་བྱས་ནས་རྗོད་པར་བྱེད་དོ།།
འབངས་མོས། འདི་འདྲ་བའི་དོགས་པ་མ་བྱེད་ཅིག ད་དུང་རེ་ཞིག་མཉན་པར་བྱའོ།།
བིདཱུཥཀས། ༼བདག་ཉིད་ཀྱིས་རྟོགས་པར་༽འདིའི་གཏམ་འདི་ནི་མངོན་པར་དགའོ།། དེས་ན་འདི་ཉིད་འཕེལ་དུ་གཞུག་པར་བྱའོ།། ༼གསལ་བར༽ཀྱེ་གྲོགས་པོ་དེ་ནས་ངུ་བ་དང་བཅས་པ་དེ་ལ་ཁྱོད་ཀྱིས་ཅི་ཞིག་སྨྲས།
འདྲེན་པས། གྲོགས་པོ། བདག་གིས་འདི་སྐད་བརྗོད་དེ།
ཟླ་བ་ཆུ་ཤེལ་རྡོ་དག་ནི།། མཆི་མའི་ཆུ་ཡིས་བྲན་པ་འདི།།
ཁྱོད་ཀྱི་བཞིན་གྱི་ཟླ་བ་དག། ཤར་བ་འདི་ཡིས་བཞུས་པ་ཡིན།།
འདྲེན་མས། ༼ཁྲོ་བ་དང་བཅས་པར༽གྲུང་མོ། འདི་ལས་ཀྱང་གཞན་མཉན་པར་བྱ་
བ་ཡོད་དམ། ༼མཆི་མ་དང་བཅས་པར༽ཚུར་ཤེག འགྲོ་བར་བྱའོ།།
