-->

Jun 22, 2011

མེ་ཏོག་ཕྲེང་རྒྱུད



ཋཻ་གོར།

ཁྱེད་ནི་བདག་གི་རྨི་ལམ་གྱི་མཁའ་དབྱིངས་སུ་ལྡིང་སྐོར་རྒྱག་གིན་པའི་མཚན་མོའི་སྤྲིན་པ་དེ་རེད

བདག་གིས་ནམ་ཡང་བརྩེ་བ་དང་སྐོམ་གདུང་གིས་ཁྱེད་ཉིད་རི་མོར་འབྲི་ཞིང་ཁྱེད་ཉིད་ལ་བཟོ་ལྟ་དོད་ཀྱིན་ཡོད

ཁྱེད་ང་ཁོ་ནའི་ཡིན  ང་ཁོ་ནའི་ཡིན  ངའི་རྫོགས་མཐའ་མེད་པའི་རྨི་ལམ་འཁོར་མཁན་ཀྱེ

ཁྱེད་ཀྱི་ཞབས་ཟུང་ནི་བདག་ཉིད་ཀྱི་རེ་སྨོན་གྱི་ཚ་དྲོད་ཀྱིས་དམར་ལིང་ལིང་དུ་བཟོས་སོང

བདག་གི་ཉི་ནུབ་ཀྱི་གླུ་གཞས་འཐུ་མཁན་ཀྱེ  བདག་གི་སྐྱོ་ཆང་གི་རོ་བྲོས་ཁྱེད་ཀྱི་མཆུ་སྒྲོས་མངར་མ་སྐྱུར་དུ་བསྒྱུར་སོང

 

ཁྱེད་རང་ང་ཁོ་ནའི་ཡིན  ང་ཁོ་ནའི་ཡིན  བདག་གི་ཁེར་རྐྱང་གི་རྨི་ལམ་ནང་གི་གནས་སྡོད་པ་ཀྱེ

བདག་གི་བརྩེ་ཞེན་གྱི་གྲིབ་མས་ཁྱེད་ཀྱི་མིག་ཟུང་ནག་རོག་གེར་བྱས་སོང

བདག་གི་ཅེར་གྱིས་ལྟ་བའི་ཟབ་ས་ན་སྡོད་པའི་རྣམཤེས་ཀྱེ

བདག་གིས་ཁྱེད་བཟུང་ནས་བདག་གི་རོལ་དབྱངས་ཀྱི་རྒྱ་ལ་གཅུད་ཟིན

ངའི་སྙིང་སྡུག  ཁྱེད་རང་ང་ཁོ་ནའི་ཡིན  ང་ཁོ་ནའི་ཡིན  བདག་གི་རྫོགས་མཐའ་མེད་པའི་རྨི་ལམ་འཁོར་མཁན་ཀྱེ


Jun 12, 2011

སྒྱུ་རྩལ་དང་བླ་སྲོག






བདག་གིས་རི་མོ་འབྲི་མགོ་རྩོམ་དུས། རས་གཞི་བཀྲམས་ཡོད་པ་མ་རྟོགས་ཀྱང་། ངས་ལག་ཟུང་གིས་ནམ་མཁའ་བཟུང་ནས་ཡོད།

---ཨེམ་ཨཕེ། ཧུ་སེེན།

 

སྒྱུ་རྩལ་ནི་ཅི་ཞིག་རེད། དེ་ནི་སྐྱེས་བུའི་གསར་གཏོད་རང་བཞིན་གྱི་བླ་སྲོག་གིས་བདེན་པའི་འབོད་པ་ལ་ཡ་ལན་བྱེད་སྟངས་ཤིག་རེད།

---ཋེ་ཀོར

 

ངས་རང་གི་སྒྱུ་རྩལ་གྱིས་མི་རྣམས་ལ་རེག་ན་འདོད། ངས་ཁོང་ཚོར་ཚོར་ཤུགས་དྲག་པོ་བྱུང་སོང་། ཞི་འཇམ་གྱིས་ཚོར་བྱུང་ཞེས་བཤད་དུ་འཇུག་འདོད།

---ཝན་གྷོ་ཞི།

 

མིའི་བླ་སྲོག་ལ་ཆ་མཚོན་ནས་བཤད་ན། སྒྱུ་རྩལ་ནི་སྒེའུ་ཁུང་ལྟ་བུ་ཞིག་སྟེ། དེ་མེད་ན། ཁོས་ནང་རོལ་གྱི་འཇིག་རྟེན་བརྒལ་ནས་ཅི་ཡང་མཐོང་མི་ཐུབ་པར་མ་ཟད། འཇིག་རྟེན་གྱིས་ནང་རོལ་གྱི་མི་དེ་ཡང་མཐོང་མི་ནུས་པ་རེད།

---ཇོན་སོན།

 

སྒྱུ་རྩལ་ནི་མིའི་གསོག་འཇོག་བྱས་པའི་བླ་སྲོག་གི་སྦྲང་རྩི་དེ་རེད།

---ཐེ་ཌོར ཌ་རེ་སིར།

 

སྒྱུ་རྩལ་ནི་དགའ་རོགས་བར་གྱི་གླེང་མོལ་དེ་རེད། སྒྱུ་རྩལ་གྱིས་སེམས་ཀྱི་སྒོ་མོ་འབྱེད་ཅིང་། སྒྱུ་རྩལ་དངོས་གནས་པ་དེས་སེམས་ཀྱི་བླ་ན་མེད་པའི་ལྷིང་འཇགས་དེ་དགའ་བསུའི་ཐལ་སྒྲ་རུ་སྒྱུར་བར་བྱེད།

---ཧཱ་ཕེ་ཟི།

 

༢༠༡༡ལོའི་ཟླ་༦པའི་ཚེས་༡༡ཉིན་རྒྱ་གར་གྱི་སྐབས་བབ་ཚགས་པར་ལས་བཏུས་ཏེ་བསྒྱུར།