-->

Mar 9, 2011

བྱ་ལེན་མ་མངོན་པར་ཤེས་པའི་ཟློས་གར།

བྱ་ལེན་མ་མངོན་པར་ཤེས་པའི་ཟློས་གར། अभिज्ञानशाकुन्तलम् ཟླ་བ་གཞོན་ནུ།
ཟློས་གར་འདིའི་སྣོད་ཀྱི་ངོ་སྤྲོད།
ཕོ།༡༽ མདོ་འཛིན་པ། ཟློས་གར་གྱི་དབུ་འབྱེད་པའི་གར་མཁན་གཙོ་བོ།
༢༽ དུཥྱནྟ། ཧསྟིནཔུར་གྱི་རྒྱལ་བོ། འདྲེན་པ།
༣༽ སཱུཏ། དུཥྱནྟའི་ཤིང་རྟའི་ཁ་ལོ་བ།
༤༽དམག་དཔོན།༼བྷདྲསེན༽ རྒྱལ་བོའི་དམག་དཔོན།
༥༽ བིདཱུཥཀ༼མཱདྷབྱ༽ རྒྱལ་བོའི་བཤེས།
༦༽ ཀཎཝ༼ཀཤྱཔ༽བྱ་ལེན་མའི་ཕ་ཚབ། མོའི་ཆོས་ཀྱི་ཡབ།
༧༽ མཱརཱིཙ། ༼ཀཤྱཔ༽དྲང་སྲོང་ཆེན་པོ་ཞིགམོ།
༨༽ གར་མཁན་མ། མདོ་འཛིན་པའི་ཆུང་མ།
༩༽ བྱ་ལེན་མ། འདྲེན་མ། ཀཎཝ་ཡི་ཆོས་ཀྱི་བུ་མོ།
༡༠༽ ཨནསཱུཡ། ༼མ་སྨད་མ།༽བྱ་ལེན་མའི་གྲོགས་མོ།
༡༡༽ པྲིཡཾབདཱ། བྱ་ལེན་མའི་གྲོགས་མོ།
རྒྱ་གར་སྐད་དུ། ཨབྷིཛྙཱནཤཱཀུནྟལནཊཀནཱམ།
བོད་སྐད་དུ། བྱ་ལེན་མ་མངོན་པར་ཤེས་པའི་ཟློས་གར་ཞེས་བྱ་བ།སངས་རྒྱས་ལ་ཕྱག་འཚལ་ལོ།།
བྱེད་པོས་དང་པོར་བཀོད་པ་གང་ཡིན་ཆོ་གས་ཕུལ་བའི་སྦྱིན་སྲེག་སྦྱིན་དང་ལེན་པོ་སུ།།
གང་ལ་ཐོས་པའི་ཡུལ་གྱི་དཔལ་ལྡན་གང་གིས་ཀུན་ཁྱབ་གཉིས་པོ་གང་གིས་དུས་རྣམས་བྱས།།
གང་ལ་ཀུན་གྱི་ས་བོན་ཞེས་བྱ་གང་གིས་མ་ལུས་སྐྱེ་དགུ་གསོན་ཅིང་འཚོ་བྱེད་པའི།།
མངོན་སུམ་ཉིད་ཀྱི་སྐུ་བརྒྱད་མངའ་བའི་དབང་ཕྱུག་དེ་ཡིས་ཁྱེད་ཅག་ཀུན་ཏུ་བསྲུང་གྱུར་ཅིག། ༼དགའ་བར་བྱས་ཏེ།༽ མདོ་འཛིན་པས། ༼ཡོལ་བར་གདོང་ཕྱོགས་ཏེ༽ ཀྱེ། འཕགས་མ། གལ་ཏེ་ཆས་ཀྱི་ཆོ་ག་གྲུབ་ན་འདིར་བྱོན་ཅིག
གར་མཁན་མས། རྗེའི་སྲས། འདི་བདག་མཆིས་སོ།།
མདོ་འཛིན་པས། ཀྱེ། འཕགས་མ། འདི་ཁྱད་པར་དང་བཅས་པའི་མཁས་པའི་འདུན་མ་ཡིན་ན། དེ་རིང་ཁོ་བོ་ཅག་རྣམས་ཀྱིས་ངེས་པར་ནག་མོ་འཁོལ་གྱིས་རྣམ་པར་བཀོད་པའི་བྱ་ལེན་མ་མངོན་པར་ཤེས་པའི་ཟློས་གར་ཞེས་བྱ་བ་ཟློས་གར་གསར་བའི་དངོས་པོས་བསྟབ་པར་བྱའོ།། དེ་བས་སྣོད་སོ་སོ་ལ་བརྩོན་པ་བསྐྱེད་པར་རིགས་སོ།།
གར་མཁན་མས། གང་གི་མཁས་པའི་ཐབས་ཀྱིས་རབ་ཏུ་སྦྱོར་བར་བྱེད་པ་ལ། གང་གིས་ཀྱང་འཕྱ་བའི་གནས་སུ་འགོད་པར་མི་བྱེད་དོ།།
མདོ་འཛིན་པས། ཀྱེ། འཕགས་མ། བདག་གིས་ཁྱོད་ལ་གསོང་བོར་བརྗོད་པར་བྱ་སྟེ།
ཇི་སྲིད་མཁས་རྣམས་ཚིམས་པ་འབྱུང་གི་བར།། དེ་སྲིད་རབ་སྦྱོར་ལེགས་ཞེས་བདག་མི་སེམས།།
སློབ་པ་རྣམས་ཀྱི་ཡིད་ནི་སྟོབས་ལྡན་ཡང་།། རྒྱུ་རྐྱེན་གཞན་གྱིས་ཡུལ་ལ་དོགས་འགྱུར་ཕྱིར།།
གར་མཁན་མས། འཕགས་པ། འདི་ལྟར་ཏེ། རྗེས་ལ་བགྱི་བར་བྱ་བ་འཕགས་པས་བཀའ་སྩོལ་ཅིག
མདོ་འཛིན་པས། ཚོགས་འདིའི་རྣ་བ་གསལ་བར་བྱེད་པ་ལས་གཞན་ཅི་ཞིག དེ་བས་འདི་ཉིད་དེ་རེ་ཞིག་ཚུགས་ཏེ་རིང་བོ་མ་ལོན་ཅིང་དུས་ཀུན་ལོངས་སུ་སྤྱོད་འོས་ཀྱི་དབྱར་གྱི་དུས་གཞིར་བྱས་ཏེ་གླུ་ལོངས་ཤིག ད་ལྟ་ནི།
ཆུ་ཡི་ཁྲུས་ཀྱིས་བདེ་སྟེར་ཞིང་།། ཀ་མ་ལ་ཡིས་དྲི་ཞིམ་སྩོལ།།
གྲིབ་སྟུག་སིམ་པ་སྤྲོད་མཛད་པའི།། ཉིན་མོ་འདི་ཡིས་བདག་ཡིད་འཕྲོག།
གར་མཁན་མས། དེ་བཞིན་ནོ།། ཞེས་གླུ་བླངས་པ།
རབ་མཉེན་གེ་སར་གཞོན་ནུའི་རྩེ་མོ་ལ།། རེག་ཙམ་བུང་བའི་ཚོགས་ཀྱིས་འོ་བྱེད་པའི།།
ལེགས་ལྡན་ཤི་རཱི་ཥ་ཡི་མེ་ཏོག་རྣམས།། ཀུན་ཏུ་མྱོས་པ་རྣམས་ཀྱིས་རྒྱན་དུ་འཛིན།།
མདོ་འཛིན་པས། ཀྱེ། འཕགས་མ། གླུ་ལེགས་པར་བླངས་སོ།།
ཨེ་མ། ཆགས་པས་བཅིངས་པའི་འདུན་མའི་དཀྱིལ་འཁོར་འདི་ནི་ཕྱོགས་ཀུན་ནས་བྲིས་པའི་རི་མོ་བཞིན་སྣང་ངོ་།། ད་ནི་རབ་ཏུ་བྱེད་པ་གང་ལ་བརྟེན་ནས་ངེད་ཅག་གིས་འདི་དག་དགྱེས་པར་བྱ།
གར་མཁན་མས། ངེས་པར་འཕགས་པས་ཐོག་མ་ཉིད་ནས་བཀའ་བསྩལ་པ་བྱ་ལེན་མ་མངོན་པར་ཤེས་པ་ཞེས་བྱ་བ་སྔར་མེད་པའི་ཟློས་གར་གྱི་རབ་ཏུ་སྦྱོར་བ་ལ་བརྟེན་ནས་བྱའོ།།
མདོ་འཛིན་པས། ཀྱེ། འཕགས་མ། བདག་ལ་ཡང་དག་པར་རྗེས་སུ་དྲན་པར་བྱས་སོ།། སྐད་ཅིག་འདི་ལ་བདག་གིས་བརྗེད་པར་གྱུར་ཏེ། གང་གི་ཕྱིར།
མི་སྐྱོང་དུཥྱནྟ་འདི།། རི་དྭགས་གཞོན་ནུས་དྲངས་པ་ལྟར།།
ཁྱོད་ཀྱི་གླུ་དབྱངས་འཕྲོག་བྱེད་ཀྱིས།། འདིར་ནི་ཁོ་བོ་རབ་ཏུ་དྲངས།། ༼ཞེས་ཏེ་སོང་བར་གྱུར་ཏོ།།༽ ཞེས་པ་རབ་བསྟོད་དོ།།
རྒྱལ་བོ་དུཥྱནྟ་དང་ཤཀུནྟལཱ༼བྱ་ལེན་མ༽ གསལ་བཤད། ཟློས་གར་འདིའི་རབ་བསྟོད་འདི་དྲ་གྲོགས་རྣམས་ལ་ལེགས་སྐྱེས་ཀྱི་ཚབ་ཏུ་ཕལ་བ་ཡིན། འདི་ནི་གུས་པའི་ལེགས་སྦྱར་སློབ་དཔོན་ཨཱནིརྦན་དཱས་མཆོག་ལས་ཞུས་ཤིང་དགེ་ཆོས་མཆོག་གི་འགྱུར་ལ་གཞི་བཅོལ་ཏེ་བསྒྱུར་བའོ།།འོན་ཀྱང་རྒྱུ་རྐྱེན་སྣ་མང་ལ་བརྟེན་ནས་དྲ་ཐོག་ཏུ་མུ་འགོད་བྱ་རྒྱུ་མིན།